ភ្នំពេញៈ កំពង់ផែទេសចរណ៍ថ្មីមួយដែលមានតម្លៃ10លានដុល្លារក្រោមជំនួយរបស់ធនាគារអភិវឌ្ឍន៍អាស៊ី គ្រោងនឹងចាប់ផ្តើមសាងសង់នៅចុងឆ្នាំនេះ និងបញ្ចប់នៅចុងឆ្នាំ 2019ខាងមុខ។
លោក ថោង ខុន រដ្ឋមន្ត្រីក្រសួងទេសចរណ៍បានថ្លែងឲ្យដឹងតាមទូរស័ព្ទនាព្រឹកថ្ងៃទី5 កញ្ញានេះថា ក្រោមជំនួយពីធនាគារអភិវឌ្ឍន៍អាស៊ីក្នុងក្របខ័ណ្ឌនៃបណ្តាប្រទេសតាមអនុតំបន់ទន្លេមេគង្គនៃច្រករបៀងភាគខាងត្បូង ធនាគារនេះបានផ្តល់ឥណទានចំនួន18លានដុល្លារដើម្បីសាងសង់កំពង់ផែទេសចរណ៍មួយនេះ។ កំពង់ផែនេះគ្រោងចំណាយទឹកប្រាក់10លានដុល្លារ និងថវិកាដទៃទៀតគ្រោងនឹងប្រើប្រាស់សម្រាប់អភិវឌ្ឍផ្សារក្តាមក្នុងខេត្តកំពតផងដែរ។
លោកបន្តថា កំពង់ផែនេះនឹងជួយរួមចំណែកទាក់ទាញភ្ញៀវទេសចរមកពីតាមបណ្តាប្រទេសក្នុងតំបន់ ពិសេសប្រទេសវៀតណាម និងប្រទេសថៃ តាមរយៈការភ្ជាប់ការធ្វើដំណើរតាមផ្លូវទឹក តាមកប៉ាល់លឿន ឬកប៉ាល់ទេសចរណ៍ខ្នាតធំ។ លោកបន្តថា កំពង់ផែនេះជាផ្នែកមួយនៃជំនួយរបស់ធនាគារអភិវឌ្ឍន៍អាស៊ី តាមរយៈក្របខ័ណ្ឌនៃបណ្តាប្រទេសក្នុងអនុតំបន់ទន្លេមេគង្គនៃច្រករបៀងភាគខាងត្បូង។
ក្នុងគម្រោងសាងសង់ កំពង់ផែនេះមានទីតាំងក្នុងភូមិជំគ្រាល ឃុំជំគ្រាល ស្រុកទឹកឈូ ខេត្តកំពត។
លោករដ្ឋមន្ត្រីទេសចរណ៍បានបន្តថា ទំហំវិសាលភាពនៃកំពង់ផែភ្ញៀវទេសចរនេះនឹងមានលទ្ធភាពអាចឲ្យភ្ញៀវទេសចរឆ្លងកាត់បានចំនួន 1.5លាននាក់ក្នុង1ឆ្នាំ។ ក្នុងគម្រោងសាងសង់នេះនឹងផ្ដល់ផលប្រយោជន៍ជាច្រើនដល់តំបន់ទេសចរណ៍ជាច្រើនផ្សេងទៀតផងដែរ ដោយក្នុងនោះវាអាចបង្កភាពងាយស្រួលដល់ភ្ញៀវទេសចរដែលមានបំណងចង់បន្តដំណើរពីតំបន់មួយទៅតំបន់មួយទៀតដូចជាពីខេត្តកំពត ទៅភ្នំបូកគោ ទៅខេត្តព្រះសីហនុ និងទៅខេត្តសៀមរាបជាដើមបានទៀតផង។
ទាក់ទងនឹងការសាងសង់កំពង់ផែទេសចរណ៍នេះ ឯកឧត្តម ចាន់ ជេស្ដា អភិបាលខេត្ត កំពតបានបញ្ជាក់ថា ផែទេសចរណ៍នេះនឹងផ្ដល់ផលប្រយោជន៍ជាច្រើនដល់ប្រទេសជាតិទាំងមូល ហើយវានឹងផ្ដល់ការងារកាន់តែច្រើនលើវិស័យទេសចរណ៍ដល់ប្រជាជនកម្ពុជា។ ឯកឧត្តមក៏បានបន្ថែមថា តាមរយៈកំពង់ផែនេះ វាក៏ជាផ្នែកមួយដែលនឹងស្រូបយកភ្ញៀវទេសចរអឺរ៉ុបបានកាន់តែច្រើនផងដែរ ព្រោះកំពង់ផែនេះផ្ដល់សេវាកម្មទេសចរណ៍ជាកញ្ចប់ដែលនាំភ្ញៀវទេសចរពីខេត្តកំពតទៅកោះត្រល់ប្រទេសវៀតណាម និងដែនសមុទ្រប្រទេសថៃជាដើម៕
