ភ្នំពេញៈ អគ្គលេខាធិការក្រុមប្រឹក្សាអភិវឌ្ឍន៍កម្ពុជា លោក សុខ ចិន្តាសោភា បានថ្លែងថា ក្រុមប្រឹក្សាអភិវឌ្ឍន៍កម្ពុជា (CDC) នៅតែបន្តបេសកកម្មរបស់ខ្លួនដើម្បីធ្វើយ៉ាងណាឲ្យបរិយាកាសវិនិយោគនៅកម្ពុជាកាន់តែមានភាពល្អប្រសើរបន្តទៀត។
អគ្គលេខាធិការក្រុមប្រឹក្សាអភិវឌ្ឍន៍កម្ពុជា និងជារដ្ឋមន្ត្រីប្រតិភូអមនាយករដ្ឋមន្ត្រីបានលើកឡើងបែបនេះក្នុងកិច្ចពិភាក្សាការងារជាមួយគណៈប្រតិភូសភាពាណិជ្ជកម្មកម្ពុជាដើម្បីបង្កើនទំនាក់ទំនងជាមួយគ្នាឲ្យកាន់តែជិតស្និទ្ធរវាងក្រុមប្រឹក្សាអភិវឌ្ឍន៍កម្ពុជា និងវិស័យឯកជនកាលពីល្ងាចថ្ងៃម្សិលមិញថា ការធ្វើបច្ចុប្បន្នភាពរបស់រាជរដ្ឋាភិបាល លើប្រធានបទមួយចំនួន គឺកំពុងបានដើរតួនាទីយ៉ាងសំខាន់ក្នុងកិច្ចអភិវឌ្ឍវិស័យសេដ្ឋកិច្ច រួមមានវេទិការាជរដ្ឋាភិបាល និងផ្នែកឯកជន គោលនយោបាយ និងលិខិតបទដ្ឋានគតិយុត្តសំខាន់ៗ ក្នុងនោះរាជរដ្ឋាភិបាលបានដាក់ចេញចាប់តាំងពីឆ្នាំ2014 រហូតដល់បច្ចុប្បន្ន តួលេខចម្បង និងសំខាន់ៗ ការធ្វើធុរកិច្ច ការវិនិយោគនៅកម្ពុជា និងវឌ្ឍនភាពនៃការអនុវត្តគោលនយោបាយអភិវឌ្ឍន៍ឧស្សាហកម្មកម្ពុជា ឆ្នាំ2015-2025។
លោកបន្តថា “រាជរដ្ឋាភិបាល និងផ្នែកវិស័យឯកជន គឺជាដៃគូដ៏ចាំបាច់ និងមិនអាចខ្វះបានដែលត្រូវបំពេញឲ្យគ្នាទៅវិញទៅមកក្នុងការរួមចំណែកដល់ការជំរុញសេដ្ឋកិច្ចជាតិឲ្យកាន់តែលូតលាស់បន្ថែមទៀត។ លោកបន្តថា “ក្រុមប្រឹក្សាអភិវឌ្ឍន៍កម្ពុជានៅតែបន្តបេសកកម្មរបស់ខ្លួនក្នុងការសម្របសម្រួលធ្វើយ៉ាងណាឲ្យបរិយាកាសវិនិយោគនៅកម្ពុជាកាន់តែមានភាពអំណោយផលក្នុងទិសដៅជំរុញលើកទឹកចិត្តដល់អ្នកវិនិយោគក្នុង និងក្រៅប្រទេសឲ្យមកបណ្តាក់ទុនកាន់តែច្រើនឡើង។
អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជាបានថ្លែងថា វេទិការាជរដ្ឋាភិបាល និងផ្នែកវិស័យឯកជន ចាប់តាំងពីឆ្នាំ1999មកបានធ្វើឡើងចំនួន17ដងរួចមកហើយ ក្នុងនោះស្ថាប័ននេះគឺជាសេនាធិការរបស់រាជរដ្ឋាភិបាល ក្នុងការពិនិត្យ និងសម្រេចការងារនីតិសម្បទា អភិវឌ្ឍ និងការវិនិយោគនានាដែលតម្រូវឲ្យក្រុមប្រឹក្សាអភិវឌ្ឍន៍កម្ពុជា ធ្វើការស្អិតល្មួតជាមួយគ្រប់តួអង្គពាក់ព័ន្ធទាំងអស់ ជាពិសេសអ្នកវិនិយោគក្នុង និងក្រៅស្រុកជាដើម៕