ភ្នំពេញៈ អ្នកវិនិយោគវិស័យអចលនទ្រព្យនានា និងអ្នកជំនាញក្នុងវិស័យនេះបាននិយាយថា កម្ដៅនយោបាយបច្ចុប្បន្ននេះ មិនប៉ះពាល់ដល់ការវិនិយោគក្នុងវិស័យសំណង់ និងអចលនទ្រព្យនៅកម្ពុជានោះទេ។
លោក ទុយ ប៊ុន ភាគហ៊ុនិកនៃក្រុមហ៊ុនលំនៅដ្ឋានL កម្ពុជាភ្នំពេញបានថ្លែងឲ្យដឹងនាព្រឹកថ្ងៃទី4 សីហានេះថា ស្ថានភាពនាពេលនេះមិនមានបញ្ហាអ្វីនោះទេ ប៉ុន្តែក្នុងនាមជាអ្នកវិនិយោគ លោកស្នើសុំឲ្យអ្នកនយោបាយរួបរួមគ្នា និងធ្វើអ្វីយកច្បាប់មកនិយាយគ្នា ដើម្បីឲ្យប្រជាពលរដ្ឋបានសុខ និងមិនមានអ្វីគួរឲ្យព្រួយបារម្ភ។ លោកបន្តថា យើងរង់ចាំមើលទាំងអស់គ្នា តែអ្វីជាការកត់សម្គាល់របស់លោក គឺស្ថានភាពមិនមានអ្វីប្លែកគួរឲ្យបារម្ភទេ ព្រោះវាហាក់កើតឡើងដដែលៗបន្ទាប់មកវានឹងក្លាយជារឿងធម្មតាសម្រាប់ប្រទេសរបស់យើង។
លោកឧកញ៉ា សៀ រិទ្ធី អគ្គនាយកក្រុមហ៊ុន World Bridge Group ដែលបាននិងកំពុងវិនិយោគគម្រោងខុនដូTHe Bridge The PeAk និងគម្រោងអចលនទ្រព្យជាច្រើនទៀតក្នុងទីក្រុងភ្នំពេញបានថ្លែងឲ្យដឹងថា លោកជឿជាក់ថា ក្រោមការដឹកនាំរបស់សម្តេចតេជោ ការបោះឆ្នោតនេះនឹងដំណើរការទៅដោយរលូន។ លោកបន្តថា យើងជាអ្នករកស៊ី យើងត្រូវការស្ថិរភាពដែលជារឿងសំខាន់បំផុត ប៉ុន្តែប្រជាជនតែងតែមានការបារម្ភជារឿងធម្មតា តែសម្រាប់លោកដែលជាអ្នកវិនិយោគវិញ លោកមានការជឿជាក់។
លោកបន្តថា លោកគិតថា ការបោះឆ្នោតឆ្នាំក្រោយមិនមានបញ្ហាអ្វីនោះទេ វាជាអារម្មណ៍របស់ប្រជាជនប៉ុណ្ណោះ។ អ្នកវិនិយោគបរទេស ពួកគេមិននិយាយមែន តែពួកគេមិនបារម្ភទេ ព្រោះអ្នកវិនិយោគដែលពូកែ គឺជាអ្នកវិនិយោគដែលពូកែឆក់ឱកាស ហេតុនេះបើមានអ្នកណាហ៊ាន អ្នកនោះនឹងទទួលបានជោគជ័យ។
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាលោក គីម ហ៊ាង បានថ្លែងថា ការបោះឆ្នោតឆ្នាំ2018នឹងមិនមានបញ្ហាអ្វីឡើយ ទោះជាមានការបារម្ភតិចតួចពីសំណាក់ប្រជាពលរដ្ឋខ្មែរក្តី ប៉ុន្តែវាមិនមានអ្វីគួរឲ្យបារម្ភទេ។លោកបន្តថា ទោះជាយ៉ាងណាក៏តម្លៃដីធ្លី ឬអចលនទ្រព្យដទៃទៀតនឹងមិនឡើងថ្លៃនោះទេ ព្រោះវាជាពេលដែលប្រជាពលរដ្ឋព្រួយបារម្ភ ហើយវាជាអារម្មណ៍ធម្មតារបស់ពួកគាត់។
លោកបន្តថា “វាមិនមានអ្វីគួរឲ្យបារម្ភទេ តែការបារម្ភរបស់មនុស្សមួយចំនួនក៏នៅតែមានជាធម្មតា ប៉ុន្តែស្ថានភាពជាទូទៅមិនមានអ្វីគួរឲ្យកត់សម្គាល់ទេ”៕