ភ្នំពេញ៖ គិតចាប់ពីថ្ងៃដែលប្រាសាទសំបូរព្រៃគុកបានចុះជាសម្បត្តិបេតិកភណ្ឌពិភពលោក រាប់មកដល់ថ្ងៃនេះបានត្រឹមតែរយៈពេល50ថ្ងៃប៉ុណ្ណោះ តែមានភ្ញៀវទេសចរជាតិ និងអន្តរជាតិ មកទស្សនាលេងកម្សាន្តសរុបច្រើនដល់ទៅចំនួន 233,598 នាក់ ដែលក្នុងនោះមានភ្ញៀវអន្តរជាតិចំនួន 838នាក់ ដែលមានការកើនឡើងស្ទើរតែ100% បើធៀបនឹងការដែលមិនទាន់បានចុះជាសម្បត្តិបេតិកភណ្ឌពិភពលោក។ នេះបើតាមការបញ្ជាក់ឱ្យដឹងពី លោក សេង អាន ប្រធានមន្ទីរទេសចរណ៍ ខេត្តកំពង់ធំ នាព្រឹកថ្ងៃទី31 ខែសីហា ឆ្នាំ2017នេះ។
លោក សេង អាន បានថ្លែងយ៉ាងដូច្នេះថា ប្រាសាទសំបូរព្រៃគុក ដែលមានទីតាំងស្ថិតនៅភូមិប្រាសាទសំបូរ ឃុំប្រសាទសំបូរ ស្រុកប្រាសាទសំបូរ ខេត្តកំពង់ធំ បានចុះជាសម្បត្តិបេតិកភណ្ឌពិភពលោកកាលពីថ្ងៃទី8 ខែកក្កដា ឆ្នាំ2017 កន្លងទៅនេះ ហើយបើរាប់មកដល់ថ្ងៃនេះ បានត្រឹមតែរយៈពេល 54 ថ្ងៃប៉ុណ្ណោះ តែមានភ្ញៀវទេសចរជាតិ និងអន្តរជាតិមកទស្សនាកម្សាន្តសរុបចំនួន 233,598 នាក់ មកទស្សនាលេងកម្សាន្ត ក្នុងនោះភ្ញៀវអន្តរជាតិមានចំនួន 838នាក់ ដែលមានការកើតឡើងស្ទើរតែ100% បើធៀបនឹងពេលដែលយើងមិនទាន់បានចុះជាសម្បត្តិបេតិកភណ្ឌពិភពលោក។
ការកើនឡើងរបស់ភ្ញៀវទេសចរនេះមានការកើនខ្ពស់បំផុតនៅថ្ងៃទី6 – 7 ខែសីហា ឆ្នាំ2017 ជាថ្ងៃដែលយើងរៀបចំធ្វើពិធីបួងសួងសុំសេចក្តីសុខ។ លោកបានសង្កត់ធ្ងន់ថា ចំពោះការកើនឡើងរបស់ភ្ញៀវទេសចរទាំងនេះ មន្ទីរទេសចរណ៍ក៏ដូចជាក្រសួងទេសចរណ៍ដែរបានគ្រោងមិនអនុញ្ញាតឱ្យយានយន្តបើកបរចូលមកក្នុងតំបន់ប្រាសាទនោះឡើយ ដោយផ្តល់ជាសេវាសម្រាប់ភ្ញៀវទេសចរចូលទៅទស្សនាជារថយន្តប្រើប្រាស់ថាមពលអគ្គិសនី ការជិះកង់ និងជិះរទេះ វិញ ឬបើភ្ញៀវទេសចរចង់ធ្វើដំណើរដោយថ្មើរជើងក៏បាន។
ប្រធានមន្ទីរទេសចរណ៍ខេត្តកំពង់ធំរូបនេះបានបន្ថែមថា ការដែលយើងធ្វើដូច្នេះគឺដើម្បីថែរក្សាប្រាសាទឱ្យបានគង់វង្ស លើសពីនេះទៅទៀតការបង្កើតសេវាទេសចរណ៍ទាំងអស់នេះឡើង គឺដើម្បីបង្កើននូវកម្រិតជីវភាពដល់បងប្អូនដែលរស់នៅក្នុងតំបន់នោះ តាមរយៈការលក់ផលិតផលក្នុងស្រុក ការបង្កើតជាផ្ទះសម្រាប់ស្នាក់ ដែលស្របតាមពាក្យស្លោកថា «ទេសចរណ៍ គឺជាឧស្សាហកម្មគ្មានផ្សែង»។
លោក សេង អាន ក៏សូមសំណូមពរឱ្យភ្ញៀវទេសចរជាតិ និងអន្តរជាតិ ដែលមកទស្សនាទាំងអស់មេត្តាជួយថែរក្សាប្រាង្គប្រាសាទដ៏ល្អឯកនេះឱ្យបានគង់វង្ស ជួយថែរក្សានូវអនាម័យ បរិស្ថាន និងជួយផ្សព្វផ្សាយបន្តទៀត ដើម្បីភាពរីកចម្រើនខាងវិស័យទេសចរណ៍របស់ប្រទេសកម្ពុជាបន្ថែមទៀត៕
