ភ្នំពេញៈ ថ្នាក់ដឹកនាំជាន់ខ្ពស់ក្រុមហ៊ុន World City បានថ្លែងថា នាពេលនេះក្រុមហ៊ុនកំពុងធ្វើការងារជាមួយដៃគូដើម្បីចាប់ផ្តើមគម្រោងវិនិយោគនានាក្នុងទីក្រុងរណប CAMKO CITY។
លោក ខេង សែ ប្រធានគ្រប់គ្រងគម្រោង និងនីតិកម្មនៃក្រុមហ៊ុនWorld City ដែលបាននិងកំពុងវិនិយោគគម្រោងទីក្រុងរណប CAMKO CITY បានថ្លែងឲ្យដឹងកាលពីព្រឹកថ្ងៃទី2 ខែកញ្ញាកន្លងទៅថា បច្ចុប្បន្ននេះក្រុមហ៊ុនបានចាប់ផ្តើមសាងសង់បន្តអគារចំនួន2ក្នុងចំណោមអគារខុនដូចំនួន7ដែលមិនទាន់បានសាងសង់បញ្ចប់កាលពីខែមិថុនាពាក់កណ្តាលឆ្នាំនេះ និងគ្រោងបញ្ចប់អគារទាំង2នេះនៅខែមិនា ឆ្នាំ2018ខាងមុខនេះ។ អគារចំនួន2នេះមានផ្ទះសរុបចំនួន 79យូនីត។
លោកបន្តថា “ក្នុងពេលនេះ ក្រុមហ៊ុនកំពុងស្ថិតក្នុងដំណាក់កាលពិភាក្សាជាមួយដៃគូផ្សេងទៀតនៅប្រទេសកូរ៉េដើម្បីចាប់ផ្តើមសាងសង់គម្រោងផ្សេងៗទៀតក្នុងទីក្រុងរណបនេះ។
អគ្គនាយកក្រុមហ៊ុន Century21 Mekong លោក ច្រឹក សុខនីម បានថ្លែងថា បច្ចុប្បន្នទីក្រុងរណប CAMKO មិនស្ថិតនៅឆ្ងាយទៀតទេ ព្រោះតំបន់នេះកំពុងមានការអភិវឌ្ឍខ្លាំង ហេតុនេះការចាប់ផ្តើមគម្រោងនេះគឺជាសញ្ញាល្អថ្មីមួយ ដើម្បីទាញទំនុកចិត្តត្រឡប់មកវិញ ប៉ុន្តែយ៉ាងណាក៏ដោយការពន្យារពេលលើគម្រោងអ្វីមួយជារឿងធម្មតា។ លោកបន្តថា ការចាប់ផ្តើមឡើងវិញជាមួយគុណភាពសំណង់ និងដាក់តម្លៃឲ្យបានសមរម្យសម្រាប់គម្រោងទីក្រុងរណបនេះនឹងទទួលបានជោគជ័យ មិនមានអ្វីគួរឲ្យបារម្ភទេ។
លោក គុយ វ៉ាត អគ្គនាយកក្រុមហ៊ុន VTRUST GROUP បានថ្លែងក្នុងពេលចុះពិនិត្យពីវឌ្ឍនភាពគម្រោងនេះកាលពីពេលកន្លងមកថា គម្រោងនេះជាគម្រោងល្អ ដោយសារក្រុមហ៊ុនអភិវឌ្ឍហេដ្ឋារចនាសម្ព័ន្ធមានភាពទាក់ទាញ គុណភាពលំនៅដ្ឋាន និងខុនដូមានភាពល្អប្រសើរ និងតម្លៃលក់សមរម្យពិតជាមានភាពទាក់ទាញ និងជាកត្តាកំណត់ឲ្យភាពជោគជ័យរបស់គម្រោងនេះ៕