ក្រុមបាល់ទាត់ជម្រើសជាតិអាល្លឺម៉ង់ និងក្រុមជម្រើសជាតិអង់គ្លេស នឹងសម្លឹងរកជ័យជម្នះ នៅពេលដែលពួកគេធ្វើជាម្ចាស់ផ្ទះទទួលក្រុមជម្រើសជាតិន័រវែស និងស្លូវ៉ាគី រៀងៗខ្លួន ក្នុងការប្រកួតជម្រុះ World Cup នៅរាត្រីនេះ។
ក្រុមម្ចាស់ជើងឯកពិភពលោកអាល្លឺម៉ង់ ទើបតែបានរក្សាកំណត់ត្រាឈ្នះ 100ភាគរយរបស់ខ្លួន ក្នុងការប្រកួតជម្រុះក្នុងពូល C ក្រោយពីបានផ្តួលក្រុមជម្រើសជាតិសាធារណរដ្ឋឆែក 1-0 ក្នុងទីក្រុង Prague កាលពីថ្ងៃសៅរ៍។ ជ័យជម្នះនេះមានន័យថា ក្រុមជម្រើសជាតិអាល្លឺម៉ង់ ដណ្តើមបាន21ពិន្ទុពេញពីការប្រកួតទាំង7លើក ដើម្បីនាំមុខលើក្រុមលេខ2 អៀរឡង់ខាងជើងចំនួន5ពិន្ទុ ខណៈដែលពួកគេត្រូវការត្រឹមតែ4ពិន្ទុទៀតប៉ុណ្ណោះពីការប្រកួត3លើកចុងក្រោយដើម្បីឈ្នះសិទ្ធិទៅកាន់ប្រទេសរុស្ស៊ី ឆ្នាំ2018 ជាស្ថាពរ។
ប៉ុន្តែ ការដណ្តើមបានជ័យជម្នះលើក្រុមជម្រើសជាតិន័រវែស នៅកីឡដ្ឋាន Mercedes-Benz Arena ក្នុងទីក្រុងប៊ែរឡាំងនៅរាត្រីនេះនៅតែគ្រប់គ្រាន់សម្រាប់ពួកគេ ប្រសិនបើក្រុមជម្រើសជាតិអៀរឡង់ខាងជើងមិនអាចយកឈ្នះលើក្រុមសាធារណរដ្ឋឆែក នៅថ្ងៃដដែលនេះបានទេនោះ។
ក្នុងពេលក្រុមទាំងពីរជួបគ្នាកាលពីជើងទី1 ក្រុមជម្រើសជាតិអាល្លឺម៉ង់ បានផ្តួលក្រុមជម្រើសជាតិន័រវែស ក្នុងលទ្ធផល 3–។ ស្របពេលជាមួយគ្នានេះដែរ ក្រុមបាល់ទាត់ជម្រើសជាតិអង់គ្លេស ក៏សម្លឹងរកការបោះជំហានកាន់តែកៀកទៅរកការឈ្នះសិទ្ធិទៅប្រកួត World Cup ឆ្នាំ2018 ផងដែរ នៅពេលដែលពួកគេបើកទ្វារទទួលក្រុមកំពុងឈរលេខ2 ស្លូវ៉ាគី ក្នុងការប្រកួតនាកីឡដ្ឋាន Wembley នៅថ្ងៃចន្ទនេះ។
ក្រុមតោកំណាចទាំង3មួយនេះ បច្ចុប្បន្នកំពុងតែស្ថិតក្នុងចំណាត់ថ្នាក់លេខ1 ដោយមាន17ពិន្ទុ ក្នុងពូល F ពោលគឺនាំមុខ2ពិន្ទុលើក្រុមស្លូវ៉ាគី ក្រោយពីបានផ្តួលក្រុមជម្រើសជាតិម៉េសេដ្វាន 4–០ កាលពីថ្ងៃសៅរ៍។
ដោយឡែក ក្រុមជម្រើសជាតិស្លូវ៉ាគី នឹងរក្សាការដេញតាមពីក្រោយក្រុមអង់គ្លេសយ៉ាងប្រកៀក តាមរយៈការយកឈ្នះលើក្រុមជម្រើសជាតិស្លូវេនី 1-0 ក្នុងការប្រកួតជម្រុះ World Cup កាលពីថ្ងៃសៅរ៍។ ក្នុងពេលក្រុមទាំងពីរជួបនៅលើទឹកដីក្រុមស្លូវ៉ាគី ក្រុមជម្រើសជាតិអង់គ្លេស ដណ្តើមបានជ័យជម្នះក្នុងលទ្ធផល 1-0។ ការប្រកួតទាំងពីរគូនេះនឹងចាប់ផ្តើមនៅម៉ោង1:45ទៀបភ្លឺ៕