ភ្នំពេញ៖ រោងចក្រសហគ្រាសនៅតាមមូលដ្ឋានមិនត្រឹមតែជួយបង្កើនការងារ និងប្រាក់ចំណូលដល់កម្មករនោះទេ ប៉ុន្តែថែមទាំងជួយកាត់បន្ថយនូវការធ្វើចំណាកស្រុក និងផ្តល់ការងារដល់ស្ត្រីមេផ្ទះ និងមនុស្សចាស់មួយចំនួនឱ្យអាចរកចំណូលបានគួរសមទៀតផង។
ក្រៅអំពីការងារដាំស្លមើលថែកូនចៅនៅផ្ទះហើយនោះ ស្ត្រីមេផ្ទះ និងចាស់ៗនៅក្នុងភូមិព្រែកសំរោង ភូមិព្រែកខ្សេវ ភូមិព្រែកឡុង និងភូមិព្រែកថីក្នុងឃុំរកាខ្ពស់ ស្រុកស្អាង ខេត្តកណ្តាលនៅមានរបរបន្ទាប់បន្សំមួយទៀត គឺស៊ីឈ្នួលកាត់ព្រុយខោអាវថ្មីៗពីរោងចក្រដែលក្នុងមួយខែអាចទទួលបានកម្រៃបន្ថែមប្រមាណ100 ទៅ150ដុល្លារផងដែរក្នុងមួយខែ។
អ្នកស្រី នួន សុខនាង នៅភូមិព្រែកខ្សេវបានប្រាប់ឱ្យដឹងថា អ្នកស្រីមានរបរលក់នំគ្រក់ ហើយក្រៅពីការងារលក់ដូរ និងដាំស្លរហើយ អ្នកស្រីនៅមានរបរមួយផ្សេងទៀត គឺទទួលខោអាវទើបដេរហើយថ្មីៗពីរោងចក្រយកមកកាត់ព្រុយនៅឯផ្ទះ ដែលមួយខែៗអាចរកចំណូលបន្ថែមបានប្រមាណជាង100ដុល្លារ ហើយខាងរោងចក្រគេដឹកយកមកឱ្យដល់ផ្ទះទៀតផង។ លុះធ្វើរួចរាល់ហើយ គ្រាន់តែទូរស័ព្ទប្រាប់គេ ខាងរោងចក្រនឹងមកដឹកយកទៅវិញ និងយកថ្មីទៀតមកឱ្យធ្វើបន្ត។ ការងារនេះមិនលំបាកណាស់ណាទេ និងថែមទាំងអាចជួយបន្ថែមចំណូលឱ្យមានជីវភាពកាន់តែប្រសើរឡើងទៀតផង។
ចំណែកលោកយាយ មុំ សុខ អាយុ75ឆ្នាំ រស់នៅភូមិព្រែកឡុង ក៏បានមានប្រសាសន៍ដែរថា សព្វថ្ងៃបានការងារកាត់ព្រុយខោអាវរោងចក្រនេះហើយដែលជួយឱ្យគាត់រកកម្រៃបានសម្រាប់ធ្វើបុណ្យដាក់ទានទៅវត្តវ៉ា ហើយក៏មិនហត់នឿយដែរ ព្រោះចាំតែអង្គុយកាត់នៅផ្ទះប៉ុណ្ណោះ។ គេដឹកយកមកឱ្យដល់កន្លែង ហើយដល់ខែគេយកលុយមកទូទាត់ឱ្យដល់ផ្ទះទៀតដែលធ្វើឱ្យគាត់អាចជួយមើលថែទាំចៅ និងចាំផ្ទះបានទៀតផង សរុបទៅគឺបានរបរនេះហើយដែលផ្តល់នូវចំណូលប្រចាំខែមិនចាំបាច់សុំ ឬចាំកូនឱ្យប្រាក់ចាយនោះ។
មេការម្នាក់នៅរោងចក្រយ៉ុងវ៉ា នៅក្នុងឃុំរកាខ្ពស់ក្នុងចំណោមរោងចក្រចំនួនទាំង10 អ្នកនាង ម៉ែន ស្រីទូច ក៏បានប្រាប់ឱ្យដឹងដែរថា ដោយសារនៅក្នុងរោងចក្រមានការខ្វះខាតកម្មករ ទើបយើងបានដឹកសម្លៀកបំពាក់ដេររួចយកទៅឱ្យបងប្អូនជួយកាត់ព្រុយនៅតាមផ្ទះ ដើម្បីជួយបង្កើនចង្វាក់ការងារក្នុងរោងចក្រឱ្យបានទាន់ពេលវេលា។
លោក សុខ ប៊ុនថន ជំទប់ទី1ឃុំរកាខ្ពស់បានមានប្រសាសន៍ថា នៅទូទាំងឃុំមានភូមិចំនួន7 មានប្រជាពលរដ្ឋចំនួន 2,895គ្រួសារ និងមានចំនួនមនុស្សសរុប13,149 នាក់ ហើយមានរោងចក្រកាត់ដេរចំនួន10 មានកម្មករកម្មការិនីចំនួន2,410នាក់ ហើយភូមិដែលប្រជាពលរដ្ឋទទួលយកសម្លៀកបំពាក់ពីរោងចក្រទៅកាត់ព្រុយនោះមានចំនួន4ភូមិ រួមមានភូមិ ព្រែកឡុង ភូមិព្រែកសំរោង ភូមិព្រែកខ្សេវ និងភូមិព្រែកថី។ ការងារនេះវាមិនត្រឹមតែផ្តល់នូ វចំណូលដល់បងប្អូនដែលជាស្ត្រីមេផ្ទះនោះទេ វាថែមទាំងជួយកាត់បន្ថយល្បែងស៊ីសងនៅក្នុងមូលដ្ឋានទៀតផង ព្រោះពួកគាត់មានការងារធ្វើ ដូច្នេះគ្មានពេលទំនេរទៅលេងល្បែងស៊ីសងនោះឡើយ។ ចុងក្រោយលោកក៏សូមអំពាវនាវទៅដល់បងប្អូនដែលកំពុងធ្វើចំណាកស្រុកទាំងប្រថុយប្រថាននោះ គួរតែគិតគូរឡើងវិញ ព្រោះក្នុងភូមិឃុំរបស់យើងក៏អាចរកប្រាក់ចំណូលបានដែរ និងដែលសំខាន់គឺកំពុងខ្វះខាតកម្លាំងពលកម្ម៕
