យន្តហោះអគ្គិសនី Electric NXT អាចបង្កើតបានកំណត់ត្រាពិភពលោក នៅពេលវាហោះហើរក្នុងល្បឿន 480 គីឡូម៉ែត្រ/ម៉ោង ដោយប្រើប្រាស់អាគុយទម្ងន់ 300 គីឡូក្រាម។
Electric NXT (E-NXT) គឺជាយន្តហោះកៅអីមួយ ដែលត្រូវបានអភិវឌ្ឍរួមគ្នាដោយក្រុមហ៊ុន Electroflight និងក្រុមហ៊ុន Rolls-Royce។ ពួកគេសង្ឃឹមថា យន្តហោះនេះនឹងបំបែកកំណត់ត្រាស្ដីពីយន្តហោះអគ្គិសនីដែលមានល្បឿនលឿនជាងគេបង្អស់ ជាមួយនឹងការហោះហើរបានជាង 480 គីឡូម៉ែត្រ/ម៉ោង។ កំណត់ត្រាបច្ចុប្បន្នគឺ 342 គីឡូម៉ែត្រ/ម៉ោង។
Rolls-Royce បានសហការជាមួយ Electroflight រយៈពេល 3 ឆ្នាំមកហើយ ដើម្បីអភិវឌ្ឍ E-NXT ដោយវិនិយោគជាទឹកប្រាក់ 8.3 លានដុល្លារ។
សមាជិកជាច្រើននៅក្នុងក្រុមវិស្វករទាំង 20 រូប ដែលកំពុងធ្វើការនៅក្នុងឃ្លាំងរបស់ Electroflight សុទ្ធតែមានបទពិសោធន៍ក្នុងវិស័យប្រណាំងរថយន្ត ចំណែកអ្នកគ្រប់គ្រង Stjohn Youngman វិញ មកពីវិស័យផលិតរថយន្តកីឡា។
ប៉ុន្តែ ការអភិវឌ្ឍយន្តហោះអគ្គិសនី មិនមែនជារឿងងាយស្រួលឡើយ បើធៀបនឹងការអភិវឌ្ឍរថយន្តអគ្គិសនី។ ដំបូង យន្តហោះត្រូវការនាំយកអាគុយដែលមានទម្ងន់ដ៏ធ្ងន់ ឡើងទៅលើអាកាស និងស្ថិតនៅក្នុងរយៈពេលយូរ។ ប្រព័ន្ធអាគុយសម្រាប់ E-NXT មានទម្ងន់ 300 គីឡូក្រាម ធ្ងន់ជាងពីរដង ធៀបនឹងទម្ងន់ម៉ាស៊ីនរបស់យន្តហោះ។ ដូច្នេះ ការងារភាគច្រើនរបស់ Electroflight គឺការអភិវឌ្ឍប្រព័ន្ធអាគុយ ការថ្លឹងថ្លែងអំពីជម្រើសរវាងទម្ងន់ និងថាមពល។
គោលដៅសម្រេចបានល្បឿនកម្រិតកំពូល នឹងធ្វើឱ្យប្រព័ន្ធអាគុយស្ថិតក្នុងសម្ពាធដ៏ធ្ងន់ធ្ងរ។ រថយន្តកីឡាជាច្រើន អាចបង្កើនកម្លាំងឡើងដល់ជាង 500 សេះ ដោយត្រូវការថាមពលបែបនេះក្នុងរយៈពេលខ្លី ប៉ុន្តែ យន្តហោះរបស់ Electroflight វិញ នឹងត្រូវរក្សាកម្លាំងខ្លាំងដូច្នេះជានិច្ច នៅក្នុងការហោះហើរបំបែកកំណត់ត្រារយៈពេល 8 នាទី។ សូម្បីតែនៅក្នុងល្បឿននៃការហោះហើរធម្មតា អាគុយរបស់យន្តហោះ ក៏នៅតែត្រូវដំណើរការដល់កម្រិត 60% នៃថាមពលអតិបរមារបស់វា។
ដើម្បីកាត់បន្ថយទម្ងន់ ក្រុមវិស្វករ ត្រូវដាក់ប្រព័ន្ធអាគុយនៅក្នុងស្រទាប់ជញ្ជាំងយន្តហោះដែលធ្វើអំពីសរសៃកាបោនរឹង។ ក្នុងស្រទាប់ជញ្ជាំង មានប្រព័ន្ធអាគុយដាច់ដោយឡែកចំនួន 3 ដូច្នេះ បើទោះជាប្រព័ន្ធអាគុយ 1 ឬ 2 ក្នុងចំណោមប្រព័ន្ធអាគុយដែលនៅសល់ ត្រូវខូច ក៏យន្តហោះនៅតែអាចដំណើរការទៅមុខ។
ប្រព័ន្ធអាគុយទាំងនេះ មានផ្ទុកអាគុយចំនួន 6,400 គ្រាប់ ហើយក្នុង 1 គ្រាប់ៗ មានទំហំធំជាងបន្តិច ធៀបនឹងថ្មប្រភេទ AA ដែលគេប្រើក្នុងគ្រួសារ ជាប្រភេទដែលគេប្រើសម្រាប់រថយន្តអគ្គិសនីនាបច្ចុប្បន្ន។ ប្រព័ន្ធអាគុយទាំងអស់ ត្រូវបានបញ្ចុះកំដៅដោយប្រព័ន្ធទូយោទឹក និង glycol ដ៏ស្មុគស្មាញ ព័ទ្ធជុំវិញអាគុយ។
Electroflight សង្ឃឹមថា បច្ចេកទេសដែលពួកគេមាន នឹងប្រែក្លាយពួកគេទៅជាក្រុមហ៊ុននាំមុខគេក្នុងទីផ្សារអាគុយសម្រាប់យន្តហោះ។ អាគុយប្រភេទនេះ ត្រូវការផ្លាស់ប្ដូរជាញឹកញាប់ ដោយសារត្រូវការបញ្ចូលថាមពលថ្មី ឬដោយសារចាស់ ប្រើលែងបាន ដូច្នេះហើយ ការចំណាយក៏ក្លាយជារឿងសំខាន់។ ដើម្បីដោះស្រាយបញ្ហានេះ Electroflight ត្រូវបញ្ចុះតម្លៃយន្តហោះ និងអាគុយ ដោយការបង្កើតរោងចក្រផលិតឱ្យបានច្រើនតាមដែលអាចធ្វើទៅរួច៕
ប្រភព៖ Yahoo
ប្រែសម្រួល៖ បុត្រា
