ភ្នំពេញ: ទោះបីទោះបតែផ្ទុះរឿងកូនចៅតារាម៉ូដែលខ្លះដុះស្លាបរត់ចោលក្រុមទាំងមេដំបូលអះអាងថាធ្លាប់បានលើកស្ទួយជួយសង្គ្រោះគ្រាលំបាកនោះក្តី ក៏ប្រធានក្រុមបង្ហាញម៉ូដខេមបូឌាស៊ូភើរម៉ូដែល និងពិធីការិនី SEATV កញ្ញា ឌួង ហ្សូរីដា បានបង្ហាញទឹកមុខស្រស់ស្រាយស្ដែងជំនឿចិត្តលើការសម្ពោធជំនួញថ្មី មានទាំងព្រះសង្ឃមកប្រោះព្រំពរជ័យ និងតារាល្បីៗមកអបអរសាទរយ៉ាងអ៊រូអរ។
ការបើកអាជីវកម្មនេះលក់ផលិតផលថែរក្សាសម្ផស្ស និងសុខភាព នៅហាង មុទិតា Beauty-Mart ទីតាំងជាប់ហាងកាត់ដេររបស់កញ្ញា ឌួង ហ្សូរីដា ផ្ទាល់តែម្ដងនោះ ក៏ត្រូវបានពិធីការិនីវ័យសាមប្លាយទម្លាយថា នាងត្រូវលះបង់ក្ដីស្រមៃធំមួយ ទើបអាចប្រមែប្រមូលទុនជា ញើសឈាមរបស់នាងមកបើកហាងថ្មីនេះ។ នៅមុនថ្ងៃសម្ពោធ ពិធីការិនីសម្បូរវោហារកញ្ញា ឌួង ហ្សូរីដា និងអ្នកនាង ចន ច័ន្ទលក្ខិណា បានបង្ហោះរូបថតនៅ បុរីអ័រគីដេ និងបានពោលថា៖ «មើលមួយភ្លែត ស្មានតែទៅទិញផ្ទះមែន ? ស្រដៀងៗដែរហ្នឹងណា..! តែអត់ទេ»។ កញ្ញា ឌួង ហ្សូរីដា បានបង្ហើរសំណេរទៀតថា៖ «ស្រឡាញ់អើយ សែនស្រឡាញ់ តែលុយមិនទាន់សន្សំបានអាចទិញនៅឡើយទេ រវល់តែសន្សំ លុយយកទៅរកស៊ីលក់ចាប់ហួយបន្ថែមមួយមុខទៀត»។
យ៉ាងណាមិញ របរចាប់ហួយដែលពិធីការិនីរូបនេះលើកឡើងគឺសំដៅលើហាងលក់ដុំ និងរាយ នូវផលិតផលថែរក្សា ការពារ ព្យាបាល សុខភាព សម្ផស្ស ដែលនាំចូលពីប្រទេសកូរ៉េ ថៃ ជប៉ុន អាមេរិក បារាំង និងអ៊ីតាលី បន្ថែមលើអាជីវកម្មលក់សម្បុក និងទឹកមាត់ត្រចៀកកាំផលិតក្នុងស្រុក ពាក់ស្លាកយីហោ «មុទិតា» ដូចគ្នានោះ។ ក្នុងពិធីសូត្រមន្តកាលពីថ្ងៃចន្ទម្សិលមិញនេះ ក៏មានវត្តមានមិត្តរួមអាជីពដូចជាតារាសម្ដែងអ្នកនាង ចន ច័ន្ទលក្ខិណា បង្ហាញមុខអបអរសាទរដែរ ហើយកញ្ញា ឌួង ហ្សូរីដា បានសម្ដែងអារម្មណ៍រីករាយផងដែរថា៖ «អរគុណអតិថិជនចាស់ដែលមកកៅឆាយទាំងព្រឹក គ្រាន់តែសូត្រមន្តហើយគឺថាហេង ហេង ហេង»។ ពិធីការិនីដែលតែងលាន់មាត់ត្អូញថា៖ «ទាល់តែប្រឹងទាំងថ្ងៃ និងយប់ទើបអាចបំពេញតម្រូវការក្នុងគ្រួសារ និងជីវិតខ្លួនឯងបាន» រូបនេះក៏ធ្លាប់ពន្យល់ពីឈ្មោះ មុទិតា ដែលនាងប្រើជាស្លាកឈ្មោះហាង និងផលិតផលរបស់នាងនោះ។
កញ្ញា ឌួង ហ្សូរីដា មុននេះក៏ធ្លាប់រំលេចជំនួញផលិតស៊ឹងខ្មែរមិនបានប៉ុន្មាន ក៏សម្រុកបើកហាងទៀតនោះ នាងក៏បានរំឭកផងដែរថា៖ «មុទិតា ជាឈ្មោះដែលឪពុកខ្ញុំដាក់ឲ្យ ហើយទឹកចិត្តរបស់ខ្ញុំតែងតែលើកលែងជានិច្ចចំពោះមនុស្សបាបទាំងឡាយ ដែលតែងតែមុសា ដោយសារកុសលផលបុណ្យពិតប្រាកដរបស់ខ្ញុំ ដែលតែងតែធ្វើបុណ្យ ដាក់បាត្ររាល់ថ្ងៃជាមួយឪពុកខ្ញុំតាំងពីតូចកាលលោកនៅមានជីវិត។ លោកធ្លាប់ធ្វើជាក្មេងស្នាក់នៅក្នុងវត្តដើម្បីរៀន លោកតែងតែអប់រំកូនជានិច្ចអំពីកម្មផល បើកូនខឹង បើកូនអន់ចិត្ត កូនត្រូវតែនៅស្ងៀម ហើយអធិដ្ឋាន ថ្លែងទៅកាន់វត្ថុស័ក្ដិសិទ្ធិ ព្រះពុទ្ធជាម្ចាស់កម្មផលឲ្យលោកបានដឹង ខ្ញុំជឿ ខ្ញុំប្រតិបត្តិ ហើយតែងតែលើកលែងបណ្ដោយតាមកម្មផលជានិច្ច»៕
