ប្រយោជន៍របស់ផ្លែក្រូចឆ្មារ ជាមួយការងារក្នុងផ្ទះ ដែលបងៗស្ត្រីមេផ្ទះជាច្រើននាក់ អាចមិនធ្លាប់ដឹងថា ការពិតទៅ ផ្លែក្រូចឆ្មារ អាចធ្វើអ្វីៗ បានច្រើនជាងគ្រាន់តែជាគ្រឿងគ្រៅ សម្រាប់បន្ថែមរសជាតិអាហារទៀតផង។
1 – កម្ចាត់ក្លិនសំរាម
កំចាត់ក្លិនស្អុយៗក្នុងធុងសំរាម ដោយការពុះផ្លែក្រូចឆ្មារជា 4ចំណែក ហើយបោះចូលទៅក្នុងធុងសំរាម ព្រមជាមួយទឹក
សូដា 1ស្លាបព្រាកាហ្វេ ដើម្បីជួយបង្អាក់ កុំឱ្យមានក្លិនសំរាមស្អុយពេញក្នុងផ្ទះ ទំរាំនឹងដល់ពេលត្រូវយកសំរាមទៅចោល។
2 – បន្ថែមភាពស្រស់ស្រាយ សម្រាប់ទឹកថ្នាំជូតសម្អាត
បន្ថែមទឹកក្រូចឆ្មារ 2 – 3ស្លាបព្រាកាហ្វេ ចូលទៅក្នុងទឹកថ្នាំជូតសម្អាតវត្ថុផ្សេងៗ ដើម្បីជួយសាងក្លិនក្រអូបស្រស់ស្រាយតាមធម្មជាតិក្នុងពេលប្រើប្រាស់។
3 – កម្ចាត់ស្នាមប្រឡាក់លើកម្រាលតុ
បើមានស្នាមខ្លាញ់ៗ របស់ម្ហូបអាហារ ជាប់នៅលើក្រណាត់កម្រាលតុ ចូរយកចំណិតក្រូចឆ្មារ មកដុសនៅលើស្នាមប្រឡាក់នោះ រួចហើយយកទៅហាលថ្ងៃចោល 2 – 3ម៉ោង បន្ទាប់ពីនោះមក សឹមយកទៅបោកគក់តាមប្រក្រតី។
4 – ការពារសាច់ផ្លែប៉ោមដូរពណ៌
យកចំណិតផ្លែប៉ោម ដែលចិតហើយ ទៅដាក់ត្រាំក្នុងទឹកស្អាត ដែលមានលាយទឹកក្រូចឆ្មារ ដើម្បីបង្អាក់មិនឱ្យសាច់ផ្លែប៉ោម ប្តូរពណ៌ ទៅជាពណ៌ស្ករ ឬច្របាច់ទឹកក្រូចឆ្មារចូលទៅក្នុងញាំផ្លែឈើបន្តិច ដើម្បីឱ្យពណ៌របស់សាច់ផ្លែឈើ នៅតែស្រស់គួរឱ្យចង់ញ៉ាំដដែល។
5 – សម្អាតជ្រុញហាន់ម្ហូបអាហារ
កម្ចាត់ស្នាម និងក្លិននៅលើជ្រុញ ដោយការយកចំណិតក្រូចឆ្មារ មកដុសឱ្យសព្វលើជ្រុញ បន្ទាប់មក លាងឱ្យស្អាត និងយកទៅដាក់ហាលថ្ងៃឱ្យស្ងួត។
6 – ដេញស្រមោច និងសត្វល្អិត
បន្តក់ទឹកក្រូចឆ្មារ ដើម្បីស្ទាក់ផ្លូវដើរ របស់ស្រមោច មិនថានៅលើកម្រាលឥដ្ឋ ឬស្នាមប្រេះបែកផ្សេងៗ ព្រោះក្លិនឈួលរបស់ទឹកក្រូចឆ្មារ នឹងធ្វើឱ្យស្រមោច លែងមករញេរញ៉ៃនៅម្តុំនោះទៀត ក្រៅពីនេះនៅអាចប្រើដេញពីងពាង ឬកន្លាតចេញពីផ្ទះបានទៀតផង។
7 – ធ្វើឱ្យកែវ និងកញ្ចក់ឡើងភ្លឺថ្លា
បន្តក់ទឹកក្រូចឆ្មារ ចូលទៅក្នុងទឹកសាប៊ូលាងចាន ដើម្បីលាងកែវឱ្យភ្លឺថ្លា ដូចទើបតែទិញមកថ្មីៗ ឬលាយជាមួយទឹកដើម្បីជូតកញ្ចក់ ឱ្យភ្លឺស្អាត ក៏បានដូចគ្នា។
8 – ធ្វើឱ្យឧបករណ៍ផ្ទះបាយ ដែលធ្វើពីដែកអុីណុក ឡើងភ្លឺចាំងរលោង
កម្ចាត់ស្នាមកំណកទឹក ដែលតោងជាប់ស្អិតនៅលើឧបករណ៍ ដែលធ្វើពីដែកអុីណុក ដោយការយកចំណិតផ្លែក្រូចឆ្មារមកដុសលើឧបករណ៍ទាំងនោះតែម្តង មិនចាំបាច់ប្រើផលិតផលលាងសម្អាតណាបន្ថែមឡើយ តែប៉ុណ្ណឹង ក៏ភ្លឺចាំងដូចថ្មី ទៅហើយ។
9 – ការពារបាយជាប់ឆ្នាំង
បន្តក់ទឹកក្រូចឆ្មារចូលទៅក្នុងឆ្នាំង ឬខ្ទះពេលចង់ចម្អិនអាហារ ប្រភេទបាយ វានឹងជួយមិនឱ្យបាយជាប់ខ្ទះ និងថែមទាំងធ្វើឱ្យគ្រាប់បាយរៀងគ្នាល្អ គួរឱ្យចង់ញ៉ាំទៀតផង។
10 – កម្ចាត់ស្នាមប្រឡាក់នៅលើខោអាវ
កំចាត់ស្នាមញើស ស្នាមដុះផ្សិត ខ្លាញ់ ឬស្រា លើខោអាវ បានយ៉ាងងាយៗដោយទឹកក្រូចឆ្មារ ដោយគ្រាន់តែយកចំណិតក្រូចឆ្មារ មកដុសជាមួយអំបិល នៅលើកន្លែងដែលមានស្នាមប្រឡាក់នោះតែម្តង បន្ទាប់ពីនោះមក សឹមយកទៅបោកគក់សម្អាតតាមធម្មតា។
11 – ជួយបន្ធូរកម្លាំង ក្នុងការលាងសម្អាតបន្ទប់ទឹក
ចាក់ទឹកក្រូចឆ្មារ ចូលទៅក្នុងទឹកសាប៊ូលាងសម្អាតបន្ទប់ទឹក ដើម្បីបន្ថែមប្រសិទ្ធភាព ក្នុងការកម្ចាត់ស្នាមកំណកក្អែលដែលតោងជាប់ណែននៅតាមឥដ្ឋការ៉ូ ដោយការចាក់ទឹកសាប៊ូលាយទឹកក្រូចឆ្មារនោះ ឱ្យសព្វក្នុងបន្ទប់ទឹក រួចទុកចោល 2ម៉ោង មុននឹងដុសសម្អាតចេញឱ្យស្អាត។
12 – បន្ថែមភាពស្រស់ស្រាយដល់ក្រណាត់ស
ក្រូចឆ្មារ គឺជាជម្រើសដ៏ល្អ បែបគ្មានសារធាតុពុលមួយ សម្រាប់ក្រណាត់ពណ៌ស។ គ្រាន់តែបន្ថែមទឹកក្រូចឆ្មារ 1/4 នៃពែង ចូលទៅក្នុងម៉ាស៊ីនបោកខោអាវ ដោយអាចបន្ថែមថាមពល នៃភាពសភ្លឺស្រស់ស្រាយឱ្យច្រើនឡើង និងដាក់ហាលជាមួយនិងពន្លឺថ្ងៃ ជំនួសឱ្យការចំហុយឱ្យស្ងួត តែប៉ុណ្ណោះ។
13 – កម្ចាត់ស្នាមកំណកខ្លោចខ្មៅ នៅក្នុងចង្ក្រានម៉ៃក្រូវេហ្វ
ច្របាច់ទឹកក្រូចឆ្មារចូលទៅក្នុងទឹកស្អាត ហើយយកទៅដាក់កម្ដៅ នៅក្នុងចង្ក្រានម៉ៃក្រូវេហ្វ 2 – 3នាទី ចំហាយទឹកក្នុងម៉ៃក្រូវេហ្វ នឹងជួយរំលាយស្នាមកំណកខ្លោចខ្មៅ ដែលតោងជាប់នៅខាងក្នុងនោះ ធ្វើឱ្យងាយជូតសម្អាតបានយ៉ាងស្អាតល្អ។
14 – បង្កើនភាពស្រស់បស់នៅក្នុងខ្យល់អាកាស
បង្កើនភាពស្រស់បស់ ដល់បន្ទប់គេងក្នុងរដូវរងា ដោយការដាក់ចំណិតក្រូចឆ្មារ ដែលហាន់ស្តើងៗ ចូលទៅក្នុងទឹកក្តៅឧណ្ហ។ ក្រូចឆ្មារនឹងបង្កើនភាពស្រស់ស្រាយ និងសំណើម មិនឱ្យប្រឈមនឹងបញ្ហាស្បែកស្ងួត ថែមទាំងជួយឱ្យមានក្លិននៅក្នុងផ្ទះក្រអូបស្រស់ស្រាយបែបធម្មជាតិទៀតផង។
15 – កម្ចាត់ក្លិនមិនល្អនៅក្នុងទូទឹកកក
កម្ចាត់ក្លិនផ្តុះៗនៅក្នុងទូទឹកកក ដោយការយកដុំសំលី ជ្រលក់ក្នុងទឹកក្រូចឆ្មារ ហើយយកទៅដាក់នៅក្នុងទូទឹកកកឱ្យបានច្រើនម៉ោង ក្លិនទឹកក្រូចឆ្មារនឹងជួយកម្ចាត់ក្លិនមិនល្អ បានយ៉ាងមានប្រសិទ្ធភាព៕
