ភ្នំពេញៈ ការសាងសង់មជ្ឈមណ្ឌលពាណិជ្ជកម្មនៅត្រីមាសទី 2ឆ្នាំនេះ មានភាពល្អប្រសើរឡើងវិញ បន្ទាប់ពីមានសភាពស្ងប់ស្ងាត់កាលពីដើមឆ្នាំដោយសារការព្រួយបារម្ភទាក់ទងនឹងការបោះឆ្នោត។
យោងតាមការសិក្សារបស់ក្រុមហ៊ុនអចលនទ្រព្យលំដាប់ពិភពលោក CBRE Cambodia ដែលបានបញ្ចប់កាលពីពេលថ្មីៗនេះបានរកឃើញថា ទុនវិនិយោគដែលបានវិនិយោគក្នុងវិស័យសំណង់ និងអចលនទ្រព្យឆ្នាំនេះបានកើនឡើង 64ភាគរយ ធៀបរយៈពេលដូចគ្នាកាលពីឆ្នាំមុន ដោយទំហំទឹកប្រាក់បានកើនឡើងដល់ប្រមាណ 3660លានដុល្លារអាមេរិក និងគម្រោងចំនួន 737ត្រូវបានផ្តល់ការអនុម័តដោយក្រសួងដែនដី នគរូបនីយកម្ម និងសំណង់។
របាយការណ៍ដដែលបានរកឃើញថា ក្នុងអំឡុងឆ្នាំដដែលនេះ តម្លៃខុនដូស្ថិតក្នុងសភាពទ្រឹង ខណៈមានខុនដូតែមួយគម្រោងប៉ុណ្ណោះបានបើកសម្ពោធសាងសង់នៅតំបន់ជ្រោយចង្វារ។
ទោះជាយ៉ាងណា របាយការណ៍របស់ CBRE Cambodia ក៏បានរកឃើញវឌ្ឍនភាពផងដែរទាក់ទងនឹងអត្រាប្រើប្រាស់ការិយាល័យមានការកើនឡើងក្នុងឆមាសទី1ឆ្នាំនេះ ដោយអត្រាប្រើប្រាស់បានកើនឡើង 1.25ភាគរយធៀបរយៈពេលដូចគ្នាកាលពីឆ្នាំមុន។
លោក ច្រឹក សុខនីម អគ្គនាយកក្រុមហ៊ុន Century21 Mekong បានថ្លែងថា ការប្រើប្រាស់ការិយាល័យមាននិន្នាការកើនឡើងក្នុងទីផ្សារនេះ ដោយសារការចូលមកដល់នូវក្រុមហ៊ុនថ្មីៗ និងក្រុមហ៊ុនក្នុងស្រុកកំពុងបង្វែរការចាប់អារម្មណ៍ ដោយងាកពីការជួលផ្ទះល្វែង ឬផ្ទះវីឡាមកប្រើប្រាស់អគារការិយាល័យរួមវិញ។ ការិយាល័យមានភាពពេញនិយមនៅតែជាប្រភេទការិយាល័យលំដាប់ B ដោយសារវាមានតម្លៃសមរម្យ និងសមស្របនឹងលក្ខខណ្ឌក្រុមហ៊ុននៅកម្ពុជា។
ទាក់ទងវិស័យខុនដូវិញ ការសាងសង់ខុនដូបន្តសកម្មភាពល្អប្រសើរ ហើយការលក់ក៏មិនជួបបញ្ហាអ្វីនោះដែរ ដោយសារតម្រូវការនៅតែបន្តកើនឡើងទោះបីជាការផ្គត់ផ្គង់បានកើនឡើងយ៉ាងគំហុកក្តី៕