ភ្នំពេញៈ ស្របពេលចំនួនក្រុមហ៊ុនចូលរួមបោះផ្សាយលក់មូលបត្រនៅមានកម្រិត អគ្គនាយកគណៈកម្មការមូលបត្រកម្ពុជាបានថ្លែងថា ផ្សារហ៊ុនកម្ពុជាបើកទ្វារជានិច្ចរង់ចាំស្វាគមន៍ក្រុមហ៊ុនដែលមានបំណងចូលរួមបោះផ្សាយលក់មូលបត្រក្នុងផ្សារនេះ។
លោក ស៊ូ សុជាតិ អគ្គនាយកគណៈកម្មការមូលបត្រកម្ពុជាបានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី30 សីហានេះថា គណៈកម្មការមូលបត្រមានបទប្បញ្ញត្តិរួចរាល់អស់ហើយ ដើម្បីធ្វើការងារជាមូយក្រុមហ៊ុនឯកជននានាសម្រាប់ការរៀបចំខ្លួនចូលផ្សារមូលបត្រកម្ពុជា ដែលរហូតមកទល់ពេលនេះផ្សារហ៊ុនកម្ពុជាមានតែក្រុមហ៊ុនចំនួន5ប៉ុណ្ណោះកំពុងបោះផ្សាយលក់មូលបត្ររបស់ខ្លួនក្នុងផ្សារនេះ។ លោកបន្តថា តាមការសិក្សាក្រុមហ៊ុនឯកជននានាមានការយល់ដឹងពីផលប្រយោជន៍ និងបរិបទនៃការចូលផ្សារហ៊ុនច្រើនជាងមុន ប៉ុន្តែការសម្រេចចិត្តចូលផ្សារហ៊ុនឬមិនចូល វាអាស្រ័យលើការសម្រេចរបស់ក្រុមហ៊ុនណាមួយនោះ។
លោកបន្តថា ទ្វារផ្សារហ៊ុនបើកចំហជានិច្ចរង់ចាំស្វាគមន៍ក្រុមហ៊ុនឯកជន ដើម្បីបោះផ្សាយលក់មូលបត្ររបស់ខ្លួន ហើយយើងរំពឹងថា នៅចុងឆ្នាំនេះ ឬដើមឆ្នាំក្រោយនឹងមានក្រុមហ៊ុនឯកជនមួយទៀតអាចចូលបោះផ្សាយមូលបត្ររបស់ខ្លួនបាន។
បច្ចុប្បន្នផ្សារហ៊ុនកម្ពុជាមានក្រុមហ៊ុនចំនួន5កំពុងបោះផ្សាយលក់មូលបត្រ ដូចជារដ្ឋាករទឹកស្វយ័តក្រុងភ្នំពេញ កំពង់ផែភ្នំពេញ កំពង់ផែខេត្តព្រះសីហនុ ក្រុមហ៊ុនកាត់ដេរហ្គ្រេនធ្វីន និងតំបន់សេដ្ឋកិច្ចពិសេសភ្នំពេញ។
លោក ង៉ែត ជូ ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុន Emerging Market Consulting បានថ្លែងថា សកម្មភាពនៃការទិញលក់មូលបត្រនៅក្នុងផ្សារហ៊ុនពិតជាមិនមានសកម្មភាពច្រើននោះទេ ដោយសារមានក្រុមហ៊ុនតិចតួចបានចូលផ្សារហ៊ុន ការមិនផ្តល់ទំនុកចិត្តដល់អ្នកវិនិយោគ ប្រជាពលរដ្ឋមិនទាន់ផ្តល់ទំនុកចិត្តដល់ក្រុមហ៊ុនបោះផ្សាយលក់មូលបត្រទាំងនោះ ដែលទាមទារឲ្យក្រុមហ៊ុនទាំងនោះបង្កើនទំនុកចិត្តដល់អតិថិជន។
លោកបន្តថា បញ្ហាប្រឈមដទៃទៀតគឺក្រុមហ៊ុនប្រភេទ SME ភាគច្រើនមិនទាន់បានត្រៀមខ្លួនក្នុងការផ្លាស់ប្តូរក្រុមហ៊ុនពីលក្ខណៈគ្រួសារទៅជាក្រុមហ៊ុនមានស្តង់ដានោះទេ។ ស្របពេលជាមួយគ្នានេះ ផ្សារហ៊ុនកម្ពុជាមិនទាន់ដើរបានរលូន ក៏ជាផ្នែកមួយមិនទាក់ទាញក្រុមហ៊ុនឲ្យចូលរួមបោះផ្សាយលក់មូលបត្រផងដែរ៕
