ភ្នំពេញ៖ ដើម្បីផ្តល់ភាពងាយស្រួល ក៏ដួចជាការលើកកម្ពស់ពាណិជ្ជកម្មឱ្យកាន់តែមានភាពល្អប្រសើរ កម្ពុជាបានចុះហត្ថលេខាលើកិច្ចព្រមព្រៀងក្របខ័ណ្ឌស្តីពីកិច្ចសម្រួលពាណិជ្ជកម្មឆ្លងកាត់ព្រំដែនដោយពុំប្រើប្រាស់ក្រដាសស្នាមជាមួយប្រទេសក្នុងតំបន់អាស៊ីប៉ាស៊ីហ្វិក។
ចំនួនប្រទេសដែលស្ថិតក្នុងតំបន់អាស៊ីប៉ាស៊ីហ្វិក រួមមានប្រមាណជា 48ប្រទេសដែលក្នុងនោះមានដូចជា អូស្ត្រាលី ជប៉ុន ប៉ូឡូញ បង់ក្លាដែស ចិន កាណាដា ឥណ្ឌា ណេប៉ាល់ ម៉ុងហ្គោលី ម៉ូរ៉ុកកូ ហ្វីលីពីន រុស្ស៊ី និងកម្ពុជាជាដើម។ល។
កិច្ចព្រមព្រៀងនេះត្រូវបានចុះហត្ថលេខាកាលពីថ្ងៃទី29 ខែសីហា ឆ្នាំ2017 នៅទីស្នាក់ការកណា្តលគណៈកម្មាធិការសេដ្ឋកិច្ច និងសង្គមសម្រាប់អាស៊ីប៉ាស៊ីហ្វិករបស់អង្គការសហប្រជាជាតិ(UNESCAP) ជាមួយប្រតិភូកម្ពុជាដឹកនាំដោយឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មលើកិច្ចព្រមព្រៀងក្របខ័ណ្ឌស្តីពីកិច្ចសម្រួលពាណិជ្ជកម្មឆ្លងកាត់ព្រំដែនដោយពុំប្រើប្រាស់ក្រដាសស្នាមសម្រាប់តំបន់អាស៊ីប៉ាស៊ីហ្វិកក្នុងកិច្ចសន្ទនាថ្នាក់ខ្ពស់ទាក់ទិនការជំរុញពាណិជ្ជកម្មតំបន់ តាមរយៈការចូលរួមសេដ្ឋកិច្ចឌីជីថល ក្រោមការសម្របសម្រួលរបស់គណៈកម្មាធិការ UNESCAP។
ឯកឧត្តម ប៉ាន សូរស័ក្តិ មានប្រសាសន៍ថា កិច្ចព្រមព្រៀងនេះមានគោលបំណងជំរុញការធ្វើពាណិជ្ជកម្មរវាងប្រទេសជាសមាជិកតាមរយៈការប្រើប្រាស់ឯកសារនាំចេញ-នាំចូល ជាទម្រង់អេឡិចត្រូនិកដោយមិនចាំបាច់ប្រើក្រដាសស្នាម និងកំណត់វិធានជាមូលដ្ឋានព្រមទាំងបង្កើតយន្តការនានាសម្រាប់គាំទ្រដល់ការទទួលស្គាល់នូវឯកសារ និងទិន្នន័យទាក់ទងនឹងការនាំចេញ-នាំចូល ដែលកិច្ចការនេះមានលក្ខណៈប្រហាក់ប្រហែលគ្នានឹងគម្រោងបញ្ជរតែមួយអាស៊ាន និងបញ្ជរតែមួយជាតិផងដែរ។
សូមជម្រាបផងដែរថា ប្រទេសបង់ក្លាដែស ប្រទេសចិន ក៏បានចុះហត្ថលេខាជាមួយប្រទេសកម្ពុជាក្នុងពិធីចុះហត្ថលេខានេះផងដែរ។ ក្រោយពីចុះហត្ថលេខា ប្រទេសកម្ពុជានឹងបន្តរៀបចំហេដ្ឋារចនាសម្ព័ន្ធបច្ចេកវិទ្យាព័ត៌មានតាមក្រសួង-ស្ថាប័នពាក់ព័ន្ធ កសាងលិខិតបទដ្ឋានគតិយុត្ត និងបណ្តុះបណ្តាលធនធានមនុស្សជាបណ្តើរៗ តាមរយៈការផ្តល់ជំនួយបច្ចេកទេសពីដៃគូអភិវឌ្ឍន៍នានា ពិសេសគណៈកម្មាធិការ UNESCAP មុននឹងផ្តល់សច្ចាប័ន និងជូនដំណឹងទៅ UNESCAP អំពីការចាប់ផ្តើមអនុវត្តកិច្ចព្រមព្រៀងនេះ៕