ថ្ងៃនេះ ទស្សនាវដ្តី ឡារ៉ែន សុំលើកយករឿង ដែលពាក់ព័ន្ធនឹងគោលការណ៍ ក្នុងការជ្រើសរើសទិញបន្លែមកជម្រាបជូនប្រិយមិត្តអ្នកអាន ដោយញែកទៅតាមប្រភេទរបស់បន្លែដូចជា បន្លែមើម បន្លែផ្លែ បន្លែស្លឹក ជាដើម។
ការជ្រើសរើសទិញបន្លែដែលជាមើម៖
.មើមត្រាវ មើមដំឡូង ចូរជ្រើសរើសយកមើមណា ដែលមានទម្ងន់ធ្ងន់ សាច់ណែន សម្បករាបស្មើ។
.មើមឆៃថាវ ចូររើសយកមើមណា ដែលខ្ចី មិន-ងកោង សម្បករាបស្អាត។
.មើមខ្ទឹមបារាំង ចូររើសយកមើមណា ដែលហាប់ណែន សម្បករឹង។
ការជ្រើសរើសទិញ បន្លែដែលជាផ្លែ កួរវែងៗ ប្រភេទ សណ្តែកកួរ សណ្តែកបារាំង ជាដើម ចូរជ្រើសរើសយកផ្លែណាដែលខ្ចី ពណ៌បៃតងខ្ចី សាច់ណែន មិនប៉ោងស្ពុលៗ កួរត្រង់ៗល្អ មិនកោង-ង ។
ឯបន្លែផ្លែផ្សេងទៀតដែលមានដូចជា៖
.ផ្លែត្រប់ស្រួយ ចូររើសយកផ្លែ ដែលមានទងនៅជាប់ ស្រស់ មិនស្វិតទន់ និងធ្ងន់។
.ផ្លែត្រសក់ ចូររើសយកផ្លែណាដែលធ្ងន់ៗ ពណ៌បៃតងខ្ចី ផ្លែវែងខ្លូត សម្បកម៉ដ្ឋរលោង មិនជាំទន់។
.ផ្លែត្រឡាច ត្រូវរើសយកផ្លែណា ដែលធំ តែនៅខ្ចី ពណ៌បៃតងស្រស់ នៅមានរោម-សៗ ផ្លែខ្លូតល្អ និងជាពិសេសមុននឹងទិញ សូមកុំភ្លេចចិតក្បាលចេញបន្តិច រួចលិឍមើលថា តើល្វីង ឬក៏អត់ផង បើល្វីងមិនអាចប្រើការបានទេ។
.ផ្លែល្ពៅ ផ្លែណាល្អ ត្រូវតែធ្ងន់ ណែន សាច់ពណ៌លឿងលាយបៃតង សម្បករឹងគ្រើម។
.ផ្លែក្រូចឆ្មារ ចូររើសយកផ្លែដែលមានសម្បករាបរលោង មិនស្វិត និងសាកល្បងយកដៃច្របាច់មើល មិនរឹងជ្រុលពេក។
ការជ្រើសរើសទិញបន្លែស្លឹក ដែលមានជាអាទិ៍ ដូចជា សាលាដ ស្ពៃ-ស ស្ពៃខ្មៅ ផ្ទី ជាដើមនោះ ចូររើសយកបន្លែណា ដែលមានពណ៌បៃតងស្រស់ មិនស្វិតស្រពោន មិនស្អុយ គ្មានស្នាមជាំ គុម្ពធំល្អ ស្លឹកនៅជាប់នឹងគល់។ ត្រូវជ្រើសរើសយកគុម្ពណា ដែលមានស្នាមដង្កូវស៊ីខ្លះៗ ដើម្បីឱ្យបានប្រាកដក្នុងចិត្តថា បន្លែនោះ មិនបានប្រើថ្នាំសម្លាប់សត្វល្អិតច្រើនហួសហេតុពេកហ្នឹងឯង។ ចំណែកបន្លែស្ពៃក្តោបវិញ ចូរជ្រើសរើសយកគុម្ពណាណែនៗ និងធ្ងន់។ ហើយបើមានទំហំប៉ុនៗគ្នា ត្រូវរើសយកគុម្ពណាដែលធ្ងន់ជាង ព្រោះវាមានស្រទាប់ស្លឹកច្រើន និងហាប់ ឯគុម្ពណាដែលស្រាលៗនោះ អាចមានដង្កូវ ឬស្លឹករលួយនៅខាងក្នុង៕
