ភ្នំពេញៈ មន្ត្រីជាន់ខ្ពស់ក្រសួងកសិកម្មបានថ្លែងថា កម្ពុជាគ្រោងនឹងដាំដុះស្រូវថ្មីចំនួន2ប្រភេទទៀតដើម្បីនាំចេញទៅកាន់ប្រទេសជប៉ុន និងប្រទេសមួយចំនួននៅតំបន់មជ្ឈិមបូព៌ា។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទលោក វេង សាខុន បានថ្លែងឲ្យដឹងកាលពីពេលថ្មីៗនេះថា កម្ពុជានឹងធ្វើការផលិតស្រូវ2ប្រភេទទៀតសម្រាប់នាំចេញនាពេលអនាគត គឺស្រូវឈ្មោះ Japanica និងស្រូវដែលមានគ្រាប់វែងៗសម្រាប់នាំចេញទៅកាន់ប្រទេសអ៊ីស្រាអែល និងប្រទេសនៅក្នុងតំបន់មជ្ឈិមបូព៌ាដទៃទៀត។ លោកបន្តថា ស្រូវ Japanica ជាប្រភេទស្រូវដែលគេកិនជាអង្ករសម្រាប់ធ្វើស៊ូស៊ី ដែលមានភាពពេញនិយមខ្លាំងនៅប្រទេសជប៉ុន។
លោកបន្តថា “ប្រទេសក្នុងតំបន់បានធ្វើការផលិតស្រូវទាំង2ប្រភេទនេះដើម្បីនាំចេញហើយ និងនាពេលអនាគតក្រុមហ៊ុននៅកម្ពុជាក៏អាចនឹងផលិត ដែរប្រសិនជាមានការបញ្ជាទិញ។
លោក វេង សាខុន បានបន្តថា តាមព័ត៌មានក្រុមហ៊ុន Golden Rice និងក្រុមហ៊ុនសោមាគ្រុបបានពិចារណានាំចូលពូជស្រូវទាំងពីរប្រភេទនេះដើម្បីធ្វើការផលិតនាំចេញផងដែរ ប៉ុន្តែព័ត៌មានលម្អិតយ៉ាងណានោះលោកមិនទាន់បញ្ជាក់ឲ្យដឹងនៅឡើយទេ។
លោកឧកញ៉ា សុង សារ៉ន អគ្គនាយកក្រុមអេមរូរ៉ាយបានថ្លែងថា យើងមានគំនិតផលិតស្រូវនេះតាំងពីយូរមកហើយ ប៉ុន្តែធ្វើមិនទាន់ចេញជាលទ្ធផលនៅឡើយទេ ព្រោះលោកកំពុងស្ថិតក្នុងដំណាក់កាលសិក្សា ដោយសារស្រូវប្រភេទនេះមិនមែនចេះតែដាំបាននៅគ្រប់តំបន់នោះទេ ព្រោះការដាំស្រូវប្រភេទនេះ វាពាក់ព័ន្ធនឹងលក្ខខណ្ឌអាកាសធាតុ និងភូមិសាស្ត្រ។ លោកបន្តថា ស្រូវប្រភេទនេះ ប្រសិនជាស្ថិតនៅក្រោមលក្ខខណ្ឌអាកាសធាតុលើស 25អង្សារសេនៅពេលយប់គឺមិនអាចដាំបាននោះទេ។
លោកបន្តថា ស្រូវប្រភេទនេះវាក៏ពាក់ព័ន្ធនឹងរបាយទឹកភ្លៀងផងដែរ ហេតុនេះទោះបីជាស្រូវប្រភេទនេះមានទីផ្សារល្អក្តី ក៏មិនសុទ្ធតែប្រទេសណាក៏អាចដាំបាននោះដែរ។ លោកបន្តថា ខេត្តដែលមានភាពអំណោយផល សម្រាប់ដាំស្រូវ Japanica នេះគឺ ខេត្តព្រះវិហារ រតនគិរី និងខេត្តមណ្ឌលគិរី៕
