រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានថ្លែងឱ្យដឹងក្នុងពិធីបើកកិច្ចប្រជុំកំពូលអន្តរជាតិស្តីពីហេដ្ឋារចនាសម្ព័ន្ធវិស័យ ICT កាលពីថ្ងៃទី28 ខែសីហា ឆ្នាំ2017 នេះថា តំបន់ជនបទទូទាំងប្រទេសនឹងមានប្រព័ន្ធអ៊ីនធើណិតប្រើបានដូចទីក្រុងដែរក្នុងរយៈពេល 3 ឆ្នាំទៀត។
ឯកឧត្តម ត្រាំ អ៊ីវតឹក រដ្ឋមន្ត្រីបានបង្ហាញពីបរិយាកាសនៃវិស័យទូរគមនាគមន៍នៅកម្ពុជា និងបានលើកឡើងអំពីមហិច្ឆតារបស់កម្ពុជាក្នុងការតភ្ជាប់ទំនាក់ទំនងតាមប្រព័ន្ធឌីជីថលនៅត្រឹមឆ្នាំ 2020 ហើយបានទទួលស្គាល់ពីតួនាទីដ៏សំខាន់មិនអាចខ្វះបាននៃភាពជាដៃគូរវាងស្ថាប័នរដ្ឋ និងវិស័យឯកជនក្នុងការសម្រេចបាននូវការត្រៀមខ្លួនជាស្រេចក្នុងវិស័យ ICT។
ឯកឧត្តមថ្លែងថា៖«រាជរដ្ឋាភិបាលសង្ឃឹមថា កម្ពុជានឹងមានប្រព័ន្ធអ៊ិនធើណិតប្រើប្រាស់100%នៅតំបន់ប្រជុំជន និង70%នៅតំបន់ជនបទនាឆ្នាំ 2020»។
ដើម្បីសម្រេចបានគម្រោងមួយនេះ មន្ត្រីរដ្ឋាភិបាល អ្នកដឹកនាំធុរកិច្ច និងអ្នកជំនាញផ្នែកទូរគមនាគមន៍ និងហេដ្ឋារចនាសម្ព័ន្ធបានមកជួបជុំគ្នាក្នុងកិច្ចប្រជុំកំពូលនេះដើម្បីរួមគ្នាដោះស្រាយបញ្ហា និងស្វែងរកឱកាសជុំវិញការចែករំលែកបទពិសោធ និងចំណេះដឹងស្តីពីការគ្រប់គ្រងបង្គោលអង់តែន បទប្បញ្ញត្តិនៃវិស័យទូរគមនាគមន៍ និងក្របខ័ណ្ឌអាជ្ញាប័ណ្ណនៅកម្ពុជា។ ក្នុងនោះ ក្រសួងបានធ្វើការសហការគ្នាយ៉ាងសកម្ម និងជិតស្និទ្ធជាមួយក្រុមហ៊ុនហេដ្ឋារចនាសម្ព័ន្ធដែលមានជំនាញ គឺជាគន្លឹះដ៏សំខាន់ដើម្បីធានាថា យើងកំពុងស្ថិតនៅលើផ្លូវត្រឹមត្រូវ។
ឯកឧត្តមបញ្ជាក់ទៀតថា ជាមួយនឹងកំណើន GDP ថេរក្នុងកម្រិត 7.០% កម្ពុជា គឺជាប្រទេសមួយក្នុងចំណោមបណ្តាប្រទេសដែលមានការរីកចម្រើនលូតលាស់លឿនបំផុតក្នុងទ្វីបអាស៊ី ហើយក៏បានត្រៀមខ្លួនជាស្រេចក្នុងការអភិវឌ្ឍវិស័យICTផងដែរ។ បច្ចុប្បន្នកម្ពុជាមានអ្នកប្រើប្រាស់អ៊ិនធើណិតរហូតដល់ទៅ 7.2 លាននាក់ និងអ្នកប្រើប្រាស់ទូរស័ព្ទជិត 20 លាននាក់ ទីផ្សារអ៊ិនធើណិតនឹងផ្តល់ជូននូវឱកាសដ៏ធំធេងសម្រាប់ការអភិវឌ្ឍប្រទេស ខណៈដែលការជ្រៀតចូលនូវអ៊ិនធើណិត ត្រូវបានគេរំពឹងថានឹងបន្តកើនឡើងយ៉ាងខ្លាំងបន្ថែមទៀត៕
