ទីក្រុង Busan របស់ កូរ៉េខាងត្បូង ថ្មីៗនេះបានដាក់សំណើស្ដីពីគម្រោងសាងសង់ព្រលានយន្តហោះអណ្ដែតលើសមុទ្រមួយកន្លែងដែលគ្រោងស្ថាបនារួចរាល់នៅឆ្នាំ 2029។
គម្រោងសាងសង់ព្រលានយន្តហោះអណ្ដែតលើទឹកត្រូវបានលើកឡើងដើម្បីជំរុញដំណើរការក្នុងការស្ថាបនាព្រលានយន្តហោះថ្មី Gadeok។ ព្រលានយន្តហោះ Gadeok នេះនឹងមានស្ថានីយអ្នកដំណើរនៅលើដីគោក ខណៈដែលផ្លូវរត់របស់យន្តហោះនឹងសាងសង់លើផ្ទៃសមុទ្រ។
យោងតាមអាជ្ញាធរក្រុង Busan ការសាងសង់ផ្លូវរត់របស់យន្តហោះក្នុងទម្រង់អណ្ដែតលើទឹកនេះ ស៊ីពេលតិចជាង ធៀបនឹងការដែលត្រូវកែលំអដីក្នុងការស្ថាបនាលើដីគោក។ វិធីថ្មីនេះក៏មិនសូវប៉ះពាល់បរិស្ថាន និងងាយពង្រីកបន្ថែម។
ក៏ប៉ុន្តែ ការសាងសង់ព្រលានយន្តហោះលើផ្ទៃទឹកនឹងត្រូវចំណាយប្រាក់ច្រើន ដែលអាចឡើងដល់ 11 ពាន់លានដុល្លារអាម៉េរិក និងអាចប្រឈមនឹងបញ្ហាមួយចំនួនទាក់ទងនឹងសុវត្ថិភាព ក្នុងនោះមានដូចជាសមត្ថភាពនៃការទប់ទល់នឹងខ្យល់ព្យុះជាដើម៕
