ក្រោយពីបានបង្កើតកំណត់ត្រាខ្ពស់បំផុតក្នុងរយៈពេល9ឆ្នាំកាលពីយប់ថ្ងៃទី21កក្កដាកន្លងទៅ តម្លៃមាសនាព្រឹកនេះ (22កក្កដា) បន្តកើនជាង20ដុល្លារ ពោលគឺកើនឡើងលើសពី1,860ដុល្លារក្នុង1អោន។
បិទការជួញដូរកាលពីថ្ងៃទី21កក្កដា តម្លៃមាសលក់ចេញផ្ទាល់បានកើនជិត24ដុល្លារក្នុង1អោន គឺកើនឡើងដល់1,841ដុល្លារ ខ្ពស់ជាងគេបង្អស់រាប់ចាប់តាំងពីខែកញ្ញា ឆ្នាំ2011។ ព្រឹកនេះ មាសក៏នៅតែបន្តឡើងថ្លៃ ដោយបច្ចុប្បន្ន ការជួញដូរមាស មានតម្លៃប្រមាណជា1,863ដុល្លារក្នុង1អោន។
Bart Melek ដែលជានាយកផ្នែកយុទ្ធសាស្ត្រទំនិញមកពីក្រុមហ៊ុន TD Securities យល់ថា “រូបិយប័ណ្ណដុល្លារអាមេរិកធ្លាក់ថ្លៃ នាំឱ្យពិភពលោកងាកទៅរកទ្រព្យផ្សេងទៀតដែលល្អជាងនេះ។ ប្រភេទទ្រព្យដែលមានអត្រាការប្រាក់ធ្លាក់ចុះ ក៏ជាកត្តាមួយជួយដល់មាសផងដែរ”។
តម្លៃរូបិយវត្ថុដុល្លារអាមេរិក កាលពីម្សិលមិញបានដាំក្បាលចុះជ្រៅបំផុតក្នុងរយៈពេល4ខែកន្លងទៅនេះ បើធៀបនឹងកញ្ចប់រូបិយវត្ថុធំៗឯទៀត។ ប្រាក់ដុល្លារត្រូវបានចាត់ទុកថាជាគូប្រជែងសំខាន់របស់មាស នៅពេលដែលក្រុមអ្នកវិនិយោគមានតម្រូវការគេចចេញពីហានិភ័យ។
ក្រុមមន្ត្រីសហរដ្ឋអាមេរិក សប្ដាហ៍នេះ កំពុងតែពិភាក្សាគ្នាអំពីកញ្ចប់ថវិកាថ្មីសម្រាប់ជំនួយសេដ្ឋកិច្ច។ ចំណែកក្រុមមេដឹកនាំនៃសហភាពអឺរ៉ុប កាលពីម្សិលមិញក៏សម្រេចបានកិច្ចព្រមព្រៀងមួយស្ដីអំពីការបញ្ចេញកញ្ចប់ថវិកាជំរុញកំណើនសេដ្ឋកិច្ចដែលមានតម្លៃជាង850ពាន់លានដុល្លារអាមេរិក ក្រោយការពិភាក្សាគ្នាអស់ជាច្រើនថ្ងៃ។
ការស្រង់ស្ថិតិមួយរបស់ទីភ្នាក់ងារសារព័ត៌មាន Reuters បានបង្ហាញថា តម្លៃមាសកំពុងតែឆ្ពោះទៅរកកំំណត់ត្រាថ្មីមួយទៀតក្នុងរយៈពេល18ខែទៅមុខ។ ក៏ប៉ុន្តែ អត្រានៃការលក់គ្រឿងអលង្ការនៅទ្វីបអាស៊ី នៅមានកម្រិតទាប បូករួមនឹងការរំពឹងដ៏តិចតួចចំពោះកំណើនសេដ្ឋកិច្ចទូទាំងពិភពលោកទៀត នោះនឹងអាចកាត់បន្ថយកំណើនដ៏ខ្លាំងក្លានៃតម្លៃមាសនាពេលខាងមុខ។
ចំណែកនៅក្នុងទីផ្សារក្នុងស្រុកវិញ តម្លៃមាសមួយចំនួនរួមមានដូចជា មាសគីឡួលក់ចេញ1តម្លឹងស្មើនឹង2,170ដុល្លារ ខណៈមាសគីឡួទិញចូល1តម្លឹងស្មើនឹង2,150ដុល្លារ និងមាសដេញលក់ចេញ1ជីស្មើនឹង822.000រៀល (ប្រហែល202ដុល្លារ)៕
ប្រភព៖ សារព័ត៌មានបរទេស/សាលាក្រុងភ្នំពេញ
