(ភ្នំពេញ) – ក្រុមការងារអន្តរាគមន៍បង្ក្រាបបទល្មើសចលនាសត្វ នៃអគ្គនាយកដ្ឋានសុខភាពសត្វ និងផលិតកម្មសត្វ បានរកឃើញសាច់បង្កកគ្មានច្បាប់ជិត 400 តោន នៅក្នុងឃ្លាំងមួយកន្លែង នៅ រាជធានីភ្នំពេញ។
កាលពីពេលថ្មីៗនេះ សាច់បង្កកខុសច្បាប់ជាង 377,000 គីឡូក្រាម ត្រូវបានរកឃើញក្នុងឃ្លាំងមួយនៅភូមិសំរោងទាវ សង្កាត់ក្រាំធ្នង់ ខណ្ឌសែនសុខ រាជធានីភ្នំពេញ នៅពេលក្រុមការងារដែលមានការសម្របសម្រួលពីលោក ម៉ុត ដារ៉ា ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ និងដឹកនាំការត្រួតពិនិត្យផ្ទាល់ដោយលោក ហ៊ុន សារ៉ាត់ អនុប្រធាននាយកដ្ឋានសុខភាពសត្វ និងសុខភាពសាធារណៈបសុព្យាបាល បានចុះត្រួតពិនិត្យទីតាំងដែលគួរឱ្យសង្ស័យខាងលើ។
ករណីរកឃើញនេះ បានកើតឡើងតែប៉ុន្មានថ្ងៃប៉ុណ្ណោះ បន្ទាប់ពីឯកឧត្ដមបណ្ឌិត ម៉ុង ឫទ្ធី ប្រធានគណៈកម្មការទីបីនៃព្រឹទ្ធសភា និងជាសហប្រធានក្រុមការងារ (ក) ផ្នែកកសិកម្ម ឧស្សាហកម្ម បានថ្លែងក្នុងកម្មវិធីបើកសិក្ខាសាលាស្ដីពីសុវត្ថិភាពសាច់បង្កក សម្រាប់សុខភាពប្រជាពលរដ្ឋ ដែលបានរៀបចំឡើងកាលពីថ្ងៃទី 30 ខែវិច្ឆិកា ឆ្នាំ 2023។
ក្នុងសិក្ខាសាលាខាងលើនេះ ឯកឧត្ដមបណ្ឌិត ម៉ុង ឫទ្ធី មានប្រសាសន៍ថា វិស័យចិញ្ចឹមសត្វនៅកម្ពុជា បានបាត់បង់ចំណែកយ៉ាងធំនៅក្នុងទីផ្សារភោជនីយដ្ឋាន និងកែច្នៃសាច់ ដោយសារតែការគ្រប់គ្រងការនាំចូលសាច់បង្កក សាច់ខូចគុណភាពមិនបានល្អ៕
