ភ្នំពេញៈ ទីផ្សារអចលនទ្រព្យកម្ពុជា កំពុងមានការផ្លាស់ប្តូរ និងទាមទារនូវទំនុកចិត្តកាន់តែខ្ពស់ ខណៈការប្រកួតប្រជែងកំពុងកើនឡើង។
លោក គីម ហ៊ាង ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានថ្លែងឲ្យដឹងតាមទូរស័ព្ទនាព្រឹកថ្ងៃទី5 មិថុនាម្សិលមិញនេះថា ក្នុងខណៈពេលទីផ្សារអចលទ្រព្យកំពុងមានការប្រកួតប្រជែងគ្នា អ្នកមានទុនវិនិយោគគ្រប់គ្រាន់នឹងទទួលបានជោគជ័យ ផ្ទុយទៅវិញអ្នកប្រកាសគម្រោងហើយរង់ចាំប្រាក់ពីអតិថិជនយកទៅសាងសង់ មិនទទួលបានជោគជ័យនោះទេ និងថែមទាំងអាចប្រឈមមុខនឹងការសាងសង់មិនចប់ទៀតផង។
![](https://i0.wp.com/www.lareine.com.kh/wp-content/uploads/2017/06/18881756_1935043513409489_3631051448002033940_n.jpg?resize=696%2C522&ssl=1)
លោកបន្តថា “អ្នកមានលុយសាងសង់ មិនប្រឈមនឹងបញ្ហានោះទេ ពេលពួកគេសាងសង់ចប់ គម្រោងរបស់ពួកគេនឹងទទួលបានជោគជ័យ មិនមានបញ្ហាក្នុងទីផ្សារនោះទេ”។ លោកបន្តថា “ទីផ្សារខុនដូនៅតែល្អប្រសើរ ប៉ុន្តែវាប្រឈមមុខនឹងការលក់យឺតផងដែរ ដោយសារការផ្គត់ផ្គង់កាន់តែកើនឡើងច្រើន”។
![](https://i0.wp.com/www.lareine.com.kh/wp-content/uploads/2017/06/6-sea-rithy.jpg?resize=546%2C312&ssl=1)
ចំណែកលោកឧកញ៉ា សៀ រិទ្ធី អគ្គនាយកក្រុមហ៊ុន World Bridge Landបានថ្លែងថា ទោះជាទីផ្សារខុនដូខ្លះប្រឈមបញ្ហាក្តី ប៉ុន្តែលោកមិនមានការព្រួយបារម្ភនោះទេ ព្រោះគម្រោងរបស់លោកផ្តោតលើអ្នកក្នុងស្រុក ដែលជាអ្នកមានធនធានច្រើន។ លោកបន្តថា អ្វីដែលលោកផ្តោតសំខាន់ គឺទីតាំង ទីតាំង និងទីតាំង និងគម្រោងដែលអាចផ្តល់ភាពងាយស្រួលដល់អតិថិជន ដែលពួកគេមករស់នៅក្នុងគម្រោងរបស់លោកហើយមានសេវាកម្ម ដែលផ្តល់ភាពងាយស្រួល និងសេវាដែលអាចរកបាននៅជិតខ្លួនពួកគេ៕