យោងតាមការប្រកាសព័ត៌មានរបស់ធនាគារពិភពលោកបានបង្ហាញថា ធនាគារពិភពលោកបានផ្តល់ជំនួយដល់កម្ពុជាប្រមាណ 90លានដុល្លារអាមេរិក ដើម្បីអភិវឌ្ឍគុណភាពឧត្តមសិក្សា និងការស្រាវជ្រាវ។
គម្រោងនេះផ្តោតសំខាន់លើការបណ្តុះបណ្តាលជំនាញវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (STEM) និងពង្រឹងបន្ថែមនូវគុណភាពអប់រំ ក្នុងគោលដៅបង្កើនឱកាសទទួលបានការសិក្សារបស់សិស្ស-និស្សិតកម្ពុជានៅកម្រិតឧត្តមសិក្សា និងជួយបង្កើនអភិបាលកិច្ចក្នុងវិស័យអប់រំ។
រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ឯកឧត្តមទេសរដ្ឋមន្ត្រី អូន ព័ន្ធមុនីរ័ត្ន បានលើកឡើងថា ការផ្តល់នូវហិរញ្ញប្បទានលើវិស័យឧត្តមសិក្សា និងការស្រាវជ្រាវនេះជាគម្រោងដែលស្របគ្នាជាមួយនឹងបណ្តាអាទិភាពនៅក្នុងគោលនយោបាយអភិវឌ្ឍន័ឧស្សាហកម្ម 2015-2025 របស់កម្ពុជា ហើយគម្រោងនេះនឹងជួយយើងឱ្យឈានទៅបង្កើតយុទ្ធសាស្ត្រគ្រប់ជ្រុងជ្រោយសម្រាប់ការអភិវឌ្ឍឧត្តមសិក្សា ដើម្បីជួយនិស្សិតកម្ពុជាដែលបានបញ្ចប់ការសិក្សាមានសមត្ថភាពអាចឆ្លើយតបទៅនឹងទីផ្សារការងារដែលកំពុងមានតម្រូវការខ្លាំង។
លោកស្រី Inguna Dobraja នាយិកាធនាគារពិភពលោកប្រចាំនៅកម្ពុជា បានថ្លែងថា ការកសាងសមត្ថភាពស្រាវជ្រាវឱ្យមានគុណភាពខ្ពស់ និងការត្រៀមឱ្យនិស្សិតមានជំនាញខ្ពស់ ជាចំណុចចម្បងមួយសម្រាប់កម្ពុជា និងធនាគារពិភពលោក។ ការចាប់ផ្តើមសកម្មភាពពីពេលនេះទៅ នឹងអាចជួយកម្ពុជាឱ្យឈានទៅរកការអភិវឌ្ឍវិស័យធនធានមនុស្សប្រកបដោយប្រសិទ្ធភាពនៅថ្នាក់ឧត្តមសិក្សា។
គម្រោងនេះមានរយៈពេល 6ឆ្នាំ ដែលមានសមត្ថភាពបង្កើនគុណភាពអប់រំ លើជំនាញ STEM និងវិស័យសិកម្ម ក្នុងគោលដៅអប់រំនិស្សិតកម្ពុជាឱ្យមានចំណេះដឹងសម្រាប់ផ្ទេរបន្តទៅកាន់មនុស្សជាច្រើនទៀត ហើយរុញច្រានប្រទេសចេញពីសេដ្ឋកិច្ចដោយផ្អែកលើការប្រពលវប្បកម្ម ឱ្យក្លាយជាប្រទេសដែលមានសេដ្ឋកិច្ចមួយផ្អែកលើចំណេះជំនាញវិញ។
សម្រាប់សកម្មភាពវិញ ហិរញ្ញប្បទាននេះក៏ជួយទ្រទ្រង់ដល់គោលនយោបាយអភិវឌ្ឍន៍ឧស្សាហកម្មតាមរយៈសកម្មភាពធំៗចំនួន5 គឺផ្តល់មូលនិធីសម្រាប់ការសិក្សាស្រាវជ្រាវក្នុងមុខវិជ្ជាអាទិភាព បង្កើនចំនួនបន្ទប់សិក្សា និងមន្ទីពិសោធន៍ សង់កន្លែងស្នាក់នៅសម្រាប់និស្សិតក្រីក្រ ពង្រីកប្រព័ន្ធធានាគុណភាព និងប្រព័ន្ធព័ត៌មាន និងសហការជាមួយដៃគូអន្តរជាតិក្នុងការកែលម្អកម្មវិធី និងវិធីសាស្ត្របង្រៀនផងដែរ៕
