សុខភាព - La Reine Media

តើអ្នកចាំបាច់ត្រូវ “បន្ទោបង់” រាល់ថ្ងៃឬ?

រឿងបន្ទោបង់(បត់ដៃ បត់ជើង)នឹងគិតវាជារឿងតូចតាចក៏ថាបាន តែបើសិនជាការបន្ទោបង់ដំណើរការមិនប្រក្រតីវិញនោះ វាអាចធ្វើឱ្យយើងមិនស្រួលសប្បាយខ្លួន មិនស្រួលពោះ និងអាចរំខានទៅដល់ការទទួលទានអាហារ ការរំលាយអាហារ និងមានក្ដីទុក្ខវេទនាពីអាការ “ទល់លាមក” ឬកើតរោគ “ឫសដូងបាត” ទៀតផង។ តែការណ៍នឹងធ្វើឱ្យរាងកាយមានប្រព័ន្ធបន្ទោបង់ដែលល្អក៏អាចជារឿងលំបាកដែរសម្រាប់មនុស្សជាច្រើន។

អ្នកជំនាញខាងផ្នែកប្រព័ន្ធរំលាយអាហារបានបញ្ជាក់ថា “រាងកាយរបស់មនុស្សយើងមានភាពស្មុគស្មាញ ការធ្វើការងាររបស់អវយវៈផ្សេងៗរបស់មនុស្សម្នាក់ៗអាចនឹងមានភាពខុសប្លែកគ្នាបន្តិចបន្តួច មិនថាតែរឿងការគេងសម្រាកលង់លក់ ការបន្ទោបង់ទាំងធំ និងតូច ជារឿងដែលមើលទៅហាក់ដូចជាធម្មតាសម្រាប់មនុស្សជាច្រើននោះ អាចនឹងក្លាយជារឿងលំបាកសម្រាប់មនុស្សមួយចំនួនបាន ជាពិសេសរឿង “បន្ទោបង់”។ អ្នកខ្លះអាចមានអារម្មណ៍ថា ក្នុង 1ថ្ងៃត្រូវបន្ទោបង់យ៉ាងតិច 1ដង ព្រោះបើសិនជាពេញមួយថ្ងៃ មិនបន្ទោបង់សោះនោះ នឹងមានអារម្មណ៍ទើសទាល់ណែនៗពោះ និងអាចហុចផលឱ្យនៅថ្ងៃបន្ទាប់មកធ្វើឱ្យពិបាកបន្ទោបង់ ឬបន្ទោបង់ពិបាកខ្លាំង រហូតអាចកើតអាការទល់លាមកទៀតផង តែអ្នកខ្លះកន្លងមក 2 – 3ថ្ងៃទើបបត់ជើងម្ដង តែក៏បន្ទោបង់បានយ៉ាងងាយស្រួលដោយមិនមានអារម្មណ៍ថាពិបាកអ្វីឡើយ ដូច្នេះហើយទើបរឿងរបស់ការបន្ទោបង់សម្រាប់មនុស្សម្នាក់ៗហាក់ដូចជាខុសប្លែកពីគ្នា និងច្រើនបែបច្រើនយ៉ាងតាមការធ្វើការរបស់ប្រព័ន្ធបន្ទោបង់ រួមទាំងដំណើរជីវិត អាហារការហូបចុកផ្សេងៗជាដើមផងដែរ”។

ចំនួនដងនៃការបន្ទោបង់ដែលស័ក្តិសមរបស់មនុស្សម្នាក់ៗក៏ហាក់ដូចជាខុសប្លែកពីគ្នាខ្លាំងដែរ។ តាមរយៈរបាយការណ៍ពីការសិក្សាស្រាវជ្រាវជាច្រើនបានរកឃើញថា ការបន្ទោបង់ដែលល្អដល់សុខភាពរាងកាយខ្លាំងបំផុត នឹងស្ថិតក្នុងចំនួនតាំងពី3ដងក្នុងមួយថ្ងៃ រហូតទៅដល់3ដងក្នុងមួយសប្ដាហ៍ និងតិចជាង 40%ដែលបានរកឃើញថា មានអ្នកបន្ទោបង់មួយថ្ងៃ 1ដង។

យ៉ាងណាក៏ដោយ ចំនួនដងរបស់ការបន្ទោបង់អាចពាក់ព័ន្ធនឹងអាការរបស់រោគឆ្លងប្រភេទខ្លះដែរ ដូចជា រោគរាករូស(ដែលធ្វើឱ្យមានការបន្ទោបង់ច្រើនដង) មហារីក(បន្ទោបង់ចេញមកជាឈាម) ឬបើសិនជាគ្មានការបន្ទោបង់សោះ ក៏អាចជាសញ្ញាដាស់តឿនរបស់រោគដែលពាក់ព័ន្ធនឹងប្រព័ន្ធបន្ទោបង់ដូចគ្នា។

តើចាំបាច់ត្រូវតែបន្ទោបង់ឱ្យបានក្នុងមួយថ្ងៃ 1ដងឬទេ?
អ្នកស្រាវជ្រាវខាងវិទ្យាសាស្ត្រមកពីស្ថាប័នវិទ្យាសាស្ត្ររបស់ប្រទេសអូស្ត្រាលីបានបញ្ជាក់ថា “ការបន្ទោបង់ឱ្យបានមួយថ្ងៃ 1ដងមិនមែនជារឿងចាំបាច់ទេ តែបើបន្ទោបង់តិចជាង3ដងក្នុងមួយសប្ដាហ៍ អាចនឹងបង្កឱ្យកើតគ្រោះថ្នាក់ឡើងបាន ដូចជាកើតរោគឫសដូងបាត ឬរន្ធគូទកើតមានរបួសដោយសារលាមកមានទំហំធំ និងរឹងរហូតធ្វើឱ្យមានឈាមចេញមកជាដើម”។

“អាការទល់លាមកអាចកើតឡើងបានពីច្រើនមូលហេតុ តាំងពីបណ្ដាលមកពីការព្យាបាលរបស់ជំងឺមួយចំនួន(ដោយសារផលប៉ះពាល់ពីថ្នាំប្រភេទខ្លះ ) និងមូលហេតុដែលច្បាស់លាស់បំផុតនោះគឺ ការញ៉ាំអាហារដែលមានជាតិកាកសរសៃតិចជ្រុលពេក។

គន្លឹះល្អៗក្នុងការធ្វើឱ្យការបន្ទោបង់ល្អប្រក្រតី
ងាយៗបំផុតគឺ បន្ថែមអាហារដែលមានជាតិកាកសរសៃឱ្យបានច្រើនឡើងនៅក្នុងពេលបាយម្ដងៗ ដូចជា បន្លែ ផ្លែឈើ ធញ្ញជាតិ សណ្ដែក និងញ៉ាំទឹកឱ្យបានច្រើនឡើង។ ការហាត់ប្រាណជាប្រចាំក៏ធ្វើឱ្យប្រព័ន្ធបន្ទោបង់ធ្វើការយ៉ាងមានប្រសិទ្ធភាពខ្លាំងឡើងដូចគ្នាដែរ។ បើចាប់ផ្ដើមមានអាការទល់លាមក តឹងណែនពោះ ចង់បត់ជើង លោកអ្នកអាចញ៉ាំទឹកឱ្យច្រើនឡើង ឬញ៉ាំអាហារដែលមានប្រូបៃអូទិកស៍ ដូចជា ទឹកដោះគោជូរ យ៉ាអួរ និង គីមឈី ក៏អាចជួយបានដូចគ្នាដែរ៕

January 2, 2019

វិធីងាយៗក្នុងការលេបថ្នាំគ្រាប់ ឱ្យកាន់តែងាយស្រួលឡើង

មនុស្សជាច្រើនមានបញ្ហាជាមួយការលេបថ្នាំគ្រាប់ មិនថាតែកូនក្មេង ឬមនុស្សធំពេញវ័យហើយនោះឡើយ អ្នកខ្លះដល់ថ្នាក់ក្អួតចេញមកវិញបន្ទាប់ពីខំព្យាយាមលេបគ្រាប់ថ្នាំឱ្យបានទៀតផង ហើយអ្នកខ្លះទៀតដល់ថ្នាក់ត្រូវយកថ្នាំគ្រាប់ទាំងនោះទៅដាក់ក្នុងទឹកឱ្យរលាយ ឬកិនជាម្សៅ និងជួនកាលថែមទាំងដកស្រោមកាប់ស៊ូលចេញយកតែម្សៅថ្នាំខាងក្នុងមកលាយជាមួយទឹកដើម្បីលេបក៏មាន។

វិធីលេបថ្នាំគ្រាប់យ៉ាងងាយៗ
ការសិក្សាស្រាវជ្រាវ ពីមហាវិទ្យាល័យ Heidelberg នៅក្នុងប្រទេសអាល្លឺម៉ង់ បានណែនាំបង្ហាញពីតិចនិកងាយៗក្នុងការជួយឱ្យយើងលេបថ្នាំគ្រាប់បានយ៉ាងងាយស្រួលដូចតទៅ ៖
1. ចាក់ទឹកចូលទៅក្នុងដបប្លាស្ទិក ឬដបទឹកភេសជ្ជៈ។
2. ដាក់គ្រាប់ថ្នាំនៅលើអណ្ដាត ឬអាចដាក់ទៅជិតគល់អណ្ដាតក៏បាន។
3. ប្រើបបូរមាត់ទាំងខាងលើ និងខាងក្រោមពាំមាត់ដបឱ្យជាប់ និងជិតកុំឱ្យទឹក ឬខ្យល់ហៀរចេញទៅក្រៅមាត់បាន។
4. លើកគូទដបទឹកឡើងឱ្យទឹកហូរចូលទៅក្នុងមាត់ ហើយក្នុងពេលដែលទឹកកំពុងហូរចូលមាត់នោះ ចូរបន្ថែមកម្លាំងបឺតទឹកចូលទៅក្នុងមាត់ដំណាលគ្នាផង។ កុំឱ្យមានខ្យល់ចូលទៅក្នុងអំឡុងពេលញ៉ាំទឹក។

អ្នកដែលធ្វើការសាកល្បងលេបថ្នាំដោយវិធីនេះប្រមាណជា140នាក់បានរកឃើញថាការលេបថ្នាំដោយវិធីនេះ (បិទភ្នែកខណៈ ពេលលេបថ្នាំផង) ជួយឱ្យការលេបថ្នាំគ្រាប់កាន់តែងាយស្រួលឡើងជាង 60% បើប្រៀបធៀបនឹងការលេបថ្នាំគ្រាប់ដោយញ៉ាំទឹកពីកែវ។

ក្រៅពីនេះនៅមាន 1វិធីទៀតដែលអាចជួយឱ្យការលេបថ្នាំគ្រាប់កាន់តែងាយស្រួលឡើង និងទទួលជោគជ័យដែលស័ក្តិសមជាមួយថ្នាំគ្រាប់ប្រភេទកាប់ស៊ូល នោះគឺ៖
1. ដាក់ថ្នាំគ្រាប់កាប់ស៊ូលនៅលើអណ្ដាត។
2. ក្រេបទឹកចូលទៅក្នុងមាត់មួយក្អឹក តែបៀមទុកសិន កុំអាលលេប។
3. ឱនមុខ ឱ្យចង្កាចង្អុលមកដើមទ្រូង។
4. រួចលេបទឹកចូលទៅដំណាលគ្នានឹងថ្នាំខណៈពេលកំពុងឱនមុខនោះ។ ភាគច្រើនថ្នាំគ្រាប់កាប់ស៊ូល ច្រើនតែមានទម្ងន់ស្រាល និង អណ្ដែតលើទឹក នៅពេលយើងឱនមុខ ហើយលេបថ្នាំដែលកំពុងអណ្ដែតលើទឹកនោះ វានឹងធ្វើឱ្យការលេបថ្នាំគ្រាប់កាប់ស៊ូលក្លាយជារឿងដែលកាន់តែងាយស្រួលឡើង។ វិធីនេះអាច បង្កើនប្រសិទ្ធភាពក្នុងការលេបថ្នាំបានច្រើន ដល់ទៅ 89% បើប្រៀបធៀបនឹងការញ៉ាំទឹក ដើម្បីលេបថ្នាំពីកែវទឹកដោយវិធីធម្មតា។

ក្រៅពីវិធីទាំង2ខាងលើ ដែលជួយឱ្យការលេបថ្នាំគ្រាប់ក្លាយជារឿងងាយស្រួលហើយនោះ បើសិនជាសាកល្បងធ្វើហើយនៅតែមិនបានផលទៀត ចូរសាកល្បងញាត់គ្រាប់ថ្នាំចូលទៅក្នុងនំទន់ៗ ដូចជា ចាហួយ ឬនំអាកោជាដើមមុននឹងដួសជាដុំតូចៗ ហើយលេប ចូល ទៅទាំងដុំ ឬក៏កិនថ្នាំឱ្យម៉ដ្ឋ ហើយលាយជាមួយនំទន់ៗ ឬហាន់គ្រាប់ថ្នាំជាបំណែកតូចៗ ហើយលេបម្ដង 1បំណែកៗក៏អាចជួយឱ្យការលេបថ្នាំប្រព្រឹត្តទៅបានងាយស្រួលដែរ៕

January 2, 2019

តើគួរជ្រើសរើសវ៉ែនតាបែបណា ឱ្យស័ក្ដិសមនឹងភ្នែករបស់អ្នក?

ជឿថាមនុស្សភាគច្រើននៅក្នុងសម័យកាលបច្ចុប្បន្ននេះ បានជ្រាបដឹងអំពីគ្រោះថ្នាក់នៃកម្ដៅថ្ងៃកើតឡើងចំពោះស្បែក ហើយក៏មានការការពារស្បែកដោយប្រើប្រាស់ឡេការពារកម្ដៅថ្ងៃជាច្រើនផលិតផល ដែលមានលក់នៅលើទីផ្សារផងដែរ។ ការផ្សព្វផ្សាយពាណិជ្ជកម្មបានប្រាប់អតិថិជនថា គ្រោះថ្នាក់ចំពោះស្បែក ដោយសារកម្ដៅថ្ងៃអាចនឹងធ្វើឱ្យស្បែកខ្មៅជាំ ស្បែកឡើងប្រេះ ស្ងួត ស្រអាប់ មិនស្រស់ថ្លា ហើយគ្រោះថ្នាក់ធ្ងន់ធ្ងរ អាចនឹងកើតជំងឺមហារីកស្បែក ដោយសារកាំរស្មីយូវី (UV)។ គ្រូពេទ្យជំនាញបានប្រាប់ឱ្យដឹងថា កាំរស្មី UV មិនត្រឹមតែមានគ្រោះថ្នាក់ចំពោះស្បែកតែមួយប៉ុណ្ណោះទេ តែវាក៏បង្កគ្រោះថ្នាក់យ៉ាងសាហាវចំពោះភ្នែករបស់អ្នកដូចគ្នាដែរ។ កាំរស្មីព្រះអាទិត្យមួយនេះ បានបង្កឱ្យភ្នែកមានអាការឈឺចុកចាប់ដូចជា ក្រហាយភ្នែក ហូរទឹកភ្នែក ភ្នែកឡើងក្រហម ភ្នែកឡើងសរសៃក្រហមតូចៗ ភ្នែកឡើងបាយ ទឹកដក់ក្នុងភ្នែក និងរលាកប្រស្រីភ្នែកជាដើម។ ទោះជាយ៉ាងណាក៏ដោយ មានមនុស្សភាគតិចណាស់ ដែលបានចាប់អារម្មណ៍ការពារភ្នែកពីកម្ដៅថ្ងៃ ខណៈដែលពួកគេធ្វើដំណើរលើផ្លូវវែងឆ្ងាយ។ ការការពារភ្នែកពីកាំរស្មី UV ជារឿងដ៏សំខាន់បំផុត ដែលអ្នកត្រូវយកចិត្តទុកដាក់ចំពោះសុខភាពភ្នែករបស់អ្នក។ មានវិធីសាស្ត្រជាច្រើនដែលគ្រូពេទ្យជំនាញបានណែនាំ តែទស្សនាវដ្ដី ឡារ៉ែន សូមលើកយកនូវវិធីប្រើប្រាស់វ៉ែនតាការពារកម្ដៅថ្ងៃ សម្រាប់ចែកជូនប្រិយមិត្តអ្នកអានឱ្យបានជ្រាបដូចតទៅ។

1. តើធ្វើដំណើរផ្លូវឆ្ងាយត្រូវប្រើ វ៉ែនតាខ្មៅ ឬវ៉ែនតាការពារកាំរស្មី UV?
វ៉េនតាខ្មៅការពារកម្ដៅថ្ងៃ ឬកាំរស្មី UV ជាទូទៅគឺមាន7ពណ៌ដូចជា ពណ៌ស្វាយ ពណ៌ទឹកសមុទ្រ ពណ៌ខៀវ ពណ៌បៃតង ពណ៌លឿង ពណ៌ការ៉ុត និងពណ៌ក្រហម។ ពណ៌ទាំងអស់នេះសុទ្ធសឹងតែជាពណ៌ដែលអាចទប់ទល់នឹងកម្ដៅថ្ងៃបានយ៉ាងល្អ ដូច្នេះរាល់វ៉ែនតាការពារកម្ដៅថ្ងៃនីមួយៗ តែងមានពណ៌ទាំងអស់នេះ ចម្រុះគ្នានៅក្នុងសាច់កញ្ចក់វ៉ែនតា និងទៅតាមការនិយមពេញចិត្តរបស់អ្នកប្រើប្រាស់ ក្នុងការរៀបចំស្ទាយល៍រៀងៗខ្លួន។ យ៉ាងណាមិញ បើទោះបីជាពណ៌ដែលបានរៀបរាប់ទាំងអស់នេះ អាចការពារពន្លឺព្រះអាទិត្យបានក្ដី ក៏វាមិនអាចទប់ទល់បានពេញ100%បាននោះទេ។ អ្នកត្រូវបន្ថែមនូវបន្ទះការពារកាំរស្មី UV មួយជាន់ទៀត។ នៅលើកញ្ចក់វ៉ែនតាដែលបានសរសេរថា UV 400 ឬ UV 100% នោះសុទ្ធសឹងតែមានការបញ្ជាក់ការពារយ៉ាងត្រឹមត្រូវ។ តែយ៉ាងណាមិញ អ្នកមិនគួរជ្រើសរើសប្រើប្រាស់វែ៉នតាដែលមានពណ៌ខ្មៅខ្លាំង ឬកញ្ចក់ខ្មៅតែម្ដងនោះទេ ព្រោះថា ពណ៌ខ្មៅ វាជាពណ៌ដែលស្រូប ឬចម្លងកម្ដៅថ្ងៃបានយ៉ាងប្រសើរបំផុត នោះវាអាចនឹងងាយស្រូបកម្ដៅចូលក្នុងរង្វង់ភ្នែករបស់អ្នក នាំឱ្យភ្នែករបស់អ្នកងាយរងគ្រោះថ្នាក់ទៅវិញ។

2. ការជ្រើសរើសវ៉ែនតាឱ្យស័ក្ដិសមនឹងអ្នក
* វ៉ែនតាដែលការពារភ្នែកពីកាំរស្មីព្រះអាទិត្យបាន100%។
* ជ្រើសរើសមុខកញ្ចក់ដែលអាចបិទបាំងរង្វង់ភ្នែកបានពេញ មិនឱ្យត្រូវពន្លឺថ្ងៃ ដើម្បីការពារភ្នែកមិនឱ្យឡើងជាំខ្មៅ ។
* វ៉ែនតាត្រូវបន្ថែមបន្ទះការពារកាំរស្មីយ៉ាងហោច1ជាន់បន្ថែមទៀត ត្រូវពិនិត្យ និងសាកល្បងមើលជាមួយពន្លឺថ្ងៃថាតើ មានពន្លឺចូលភ្នែកដែលឬទេ? មុននឹងសម្រេចចិត្តទិញយកមកប្រើ។
* ជ្រើសរើសវ៉ែនតាដែលផ្ទុយនឹងទម្រង់មុខរបស់អ្នក ដូចជា អ្នកដែលមានមុខមូល មិនគួរជ្រើសវ៉ែនតាណា ដែលមានរូបរាងមូលដែរនោះទេ។
* ទំហំនៃកញ្ចក់វ៉ែនតាត្រូវតូចល្មមសមនឹងទំហំមុខរបស់អ្នក។
* វ៉ែនតាដែលអ្នកពាក់ចាំបាច់ត្រូវតែសមស្របទៅនឹងបុគ្គលិកលក្ខណៈរបស់ខ្លួនអ្នកផងដែរ។ មានន័យថា បើអ្នកជាមនុស្សសុភាពរាបសារ មិនគួរពាក់វ៉ែនតាណាដែលមានម៉ូដហ៊ឺហារ ឡូយឆាយជ្រុលពេកនោះទេ។

3. ការប្រើប្រាស់កញ្ចក់កែវភ្នែក (Contact Lens)
គ្រូពេទ្យជំនាញ បានប្រាប់ឱ្យដឹងថា ការប្រើកញ្ចក់កែវភ្នែក ឬ Contact Lens នៅក្នុងកម្ដៅថ្ងៃអាចមានផលអាក្រក់ ដូចជា មានឱកាសឆ្លងមេរោគ ធ្វើឱ្យភ្នែកស្ងួត និងកញ្ចក់ភ្នែកខ្វះអុកស៊ីហ្ស៊ែន ជាពិសេសកញ្ចក់ Lens ដែលឃោសនាថា មានទឹកជាសមាសធាតុផ្សំច្រើននោះ គឺអាចធ្វើឱ្យភ្នែកស្ងួតលើសដើម។ សម្រាប់កញ្ចក់ Lens ពណ៌ផ្សេងៗនោះ ម៉ាកខ្លះមិនមានស្តង់ដារ អាចធ្វើឱ្យអាល់លែកហ្ស៊ី រលាក ឬធ្វើឱ្យស្ងួតភ្នែកលើសដើម ដោយសារកញ្ចក់ Lens ប្រភេទនេះក្រាស់ជាងធម្មតា រីឯកញ្ចក់ពា Lens មួយចំនួនទៀត អាចកោងខុបខ្លាំង ដើម្បីឱ្យអ្នកពាក់មើលទៅឃើញភ្នែកធំ នោះវាធ្វើឱ្យកញ្ចក់ Lens កោង អាចសង្កត់គែមកញ្ចក់ភ្នែកកាន់តែខ្លាំងឡើង។ សម្រាប់ការថែទាំកែវភ្នែក បើអ្នកពាក់កញ្ចក់ Lens នោះ អ្នកត្រូវថែទាំជាពិសេស មិនថាជាកញ្ចក់ Lens បែបមីញ៉ូប ឬកញ្ចក់ Lens បែបពណ៌ផ្សេងៗនោះទេ អ្នកគួរតែត្រៀមនូវទឹកលាងសម្អាតកញ្ចក់ភ្នែក (ទឹកភ្នែកសិប្បនិម្មិត) ដែលមានលក់ទូទៅ សម្រាប់លាងសម្អាត និងកម្ចាត់មេរោគឱ្យបានល្អ៕

December 31, 2018

គ្រោះថ្នាក់ 12យ៉ាង ចំពោះរាងកាយដោយសារការខ្វះ “វីតាមីន B12”

កំលោះៗ ក្រមុំៗអាចនឹងស៊ាំធ្លាប់នឹងវីតាមីនតែប៉ុន្មានមុខប៉ុណ្ណោះ ព្រោះភាគច្រើនច្រើនតែងរកវីតាមីនមកញ៉ាំដើម្បីតែភាពស្រស់ស្អាត ដូចជាវីតាមីនC ដើម្បីថែបំប៉នស្បែក ឬវីតាមីនA ដើម្បីបំប៉នកែវភ្នែកជាដើម តែការពិតទៅវីតាមីន B ក៏សំខាន់ចំពោះរាងកាយមិនតិចជាងវីតាមីនប្រភេទផ្សេងទៀតឡើយ ជាពិសេសវីតាមីន B12 ដែលមានភាពសំខាន់ចំពោះប្រព័ន្ធផ្សេងៗរបស់រាងកាយ ប្រព័ន្ធប្រសាទ និងខួរក្បាលច្រើនលើសពីយើងគិតទៅទៀត។ បើរាងកាយមិនបានទទួលវីតាមីន B12 គ្រប់គ្រាន់ អាចនឹងបង្កឱ្យកើតគ្រោះថ្នាក់ដល់រាងកាយក្នុងផ្នែកផ្សេងៗបាន។

ប្រយោជន៍របស់វីតាមីន B12
វីតាមីនB មានចំណែកជួយក្នុងការផលិតកោសិកាគ្រាប់ឈាមក្រហម បំប៉នប្រព័ន្ធប្រសាទ និងខួរក្បាល បង្កើនកម្មវិធីការផលិត DNA និងជួយដល់ការធ្វើការងាររបស់ប្រព័ន្ធផ្សេងៗក្នុងរាងកាយ។ ជាមធ្យមមនុស្សក្នុងវ័យធ្វើការគួរបានទទួលវីតាមីន B12 ក្នុង1ថ្ងៃ 2.4មីក្រូក្រាម ហើយវីតាមីន B12 ក៏ដូចវីតាមីនដទៃទៀតដែរដែលរាងកាយមិនអាចផលិតដោយខ្លួនឯងបាន និងត្រូវតែទទួលបានពីអាហារដែលអ្នកទទួលទានប៉ុណ្ណោះ។

បច្ច័យប្រថុយប្រថានដែលអាចធ្វើឱ្យរាងកាយបានទទួលវីតាមីនB12តិចជ្រុល
បើលោកអ្នកមានទង្វើដូចតទៅនេះ លោកអ្នកអាចប្រថុយនឹងការបានទទួលវីតាមីន B12 តិចជ្រុល ៖
ទទួលទានមំសវិរតិ(មិនបរិភោគសាច់សត្វ) ឬទទួលទានអាហារបួសរយៈពេលយូរ និងមិនបានទទួលទានវីតាមីនបន្ថែម ព្រោះវីតាមីនB12 គ្មាននៅក្នុងបន្លែទេ តែមាននៅក្នុងសាច់សត្វ ស៊ុត សត្វស្លាប អាហារប្រភេទទឹកដោះ និងអាហារផ្សេងទៀតដែលធ្វើពីសាច់សត្វ។

អ្នកកើតជំងឺ ខ្រូន (Crohn ជាភាពខុស ប្រក្រតីរ៉ាំរ៉ៃរបស់ពោះវៀនធំ ធ្វើឱ្យកើតការឈឺក្ដៅផ្សារក្រហាយ និងហើមប្រព័ន្ធរំលាយ អាហារ) និងអ្នកដែលត្រូវញ៉ាំថ្នាំបញ្ចុះជាតិអាស៊ីតក្នុងក្រពះជាប្រចាំ ដែលអាចធ្វើឱ្យរាងកាយបឺតយកវីតាមីនB12 បាន តិច ព្រោះវីតាមីន B12 នឹង ត្រូវបឺតជ្រាបយកបានត្រូវតែមានជាតិអាស៊ីតនៅក្នុងប្រព័ន្ធរំលាយអាហារ។

អាយុច្រើនឡើង ធ្វើឱ្យការផលិតទឹករំលាយអាហារ(អាស៊ីត)ក្នុងក្រពះថយចុះទៅតាមវ័យដែលធ្វើឱ្យការបឺតជ្រាបយកវីតាមីន B12 បានតិចទៅតាមហ្នឹងដែរ។

គ្រោះថ្នាក់ចំពោះសុខភាពដោយសារការខ្វះវីតាមីន B12
1. ប្រព័ន្ធការទទួលដឹង(វេទនារម្មណ៍) ធ្វើ
ការខុសប្រក្រតី ដូចជាការដឹងពីរសជាតិ ឬការ ទទួលដឹងក្លិនផ្លាស់ប្ដូរ។
2. មានអាការស្ពឹក ឬស្រពន់នៅលើដៃ ជើង និងបាតជើង។
3. ពិបាកដើរ បាត់បង់ភាពរហ័សរហួន(ដើរ ទ្រេតទ្រោត ជើងទាំងពីរដើរមិនមានតុល្យភាពគ្នា)។
4. ប្រថុយនឹងសភាវលោហិតស្លេក។
5. ហើម ឬរលាកអណ្ដាត។
6. រិះគិត ឬ វិភាគរឿងផ្សេងៗដើម្បីរកហេតុ ផលមិនសូវបាន ឬការចងចាំបាត់បង់អស់មួយ ចំណែក។
7. ទប់ ឬទ្រាំការបន្ទោបង់មិនបាន។
8. សុខភាពជារួមចុះទន់ខ្សោយ។
9. ឆាប់ ឬងាយនឿយល្វើយ។
10. ឆាប់ ឬងាយវិតក្កកង្វល់ និងស្រេ្ត
11. សោកសៅ ឬចេះតែមើលឃើញទិដ្ឋ- ភាពអាក្រក់ៗ។
12. ប្រថុយប្រថាននឹងជំងឺដែលពាក់ព័ន្ធនឹងប្រព័ន្ធប្រសាទ ខួរក្បាល និងលោហិត។

វិធីបង្កើនបរិមាណវីតាមីន B12 ក្នុងរាងកាយ
1. ទទួលទានវីតាមីន B12 បន្ថែមពីពេលញ៉ាំអាហារប្រក្រតី(គួរទៅទទួលយកការប្រឹក្សានិងពិនិត្យសុខភាពដោយលម្អិត។អំពីគ្រូពេទ្យមុននឹងទិញមកទទួលទាន)។
2.ទទួលអាហារដែលមានវីតាមីនB12ឱ្យបានច្រើនឡើង ដូចជា សាច់សត្វ សាច់ត្រី អាហារសមុទ្រ ផលិតផលធ្វើពីទឹកដោះគោផ្សេងៗ។

ចំណេះដឹងបន្ថែមដែលមនុស្សយើងច្រើនតែយល់ខុសពាក់ព័ន្ធនឹងវីតាមីន B12
អត្ថបទនៅក្នុងអុីនធើណិតអាចមាន ការអធិប្បាយថា វីតាមីនB12អាចការពារជំងឺខួរ ក្បាលចុះខ្សោយ ជំងឺបេះដូង ជំងឺរ៉ាំរ៉ៃ គ្រោះថ្នាក់ផ្សេងៗ រួមទាំងកែបញ្ហាសភាវគ្មានបុត្រ ជំងឺសើរស្បែក និងជំងឺផ្សេងៗទៀតជាច្រើនទៀត ដែលទាំងអស់នេះច្រើនតែចេញមកពីការសិក្សាវិ ភាគ ដែលមិនទាន់មានភ័ស្តុតាងច្បាស់លាស់នៅឡើយ។

December 29, 2018

បុរសនិយមហាត់ប្រាណ ចាំបាច់ត្រូវបំពេញសាធាតុរ៉ែនៅក្នុងរាងកាយ

សាច់ដុំក្បាលពោះ6កង់ (Six Packs) សាច់ដុំទ្រូង ឬសាច់ដុំស្មាបើករីកធំ សុទ្ធសឹងជាក្ដីប្រាថ្នារបស់សុភាពបុរសទាំងឡាយ។ កន្លែងសាច់ដុំផ្នែកនៃរាងកាយទាំងអស់នេះ ដែលធ្វើឱ្យបុរសមានរូបរាងសង្ហា និងទាក់ទាញ។ តើអ្នកមានបានដឹងទេថា នៅពេលដែលបុរសនិយមហាត់ប្រាណយកសាច់ដុំ ធ្វើឱ្យបាត់បង់សារធាតុរ៉ែនៅក្នុងរាងកាយ? សារធាតុរ៉ែ គឺចាំបាច់ដើម្បីលើកកម្ពស់សុខភាព និងអនុវត្តមុខងារជាច្រើននៃរាងកាយ។ ដូច្នេះ ទង្វើនៃការហាត់ប្រាណ ធ្វើឱ្យសារធាតុរ៉ែមានការថយចុះ ហើយចុះអ្នកត្រូវការបំពេញសារធាតុរ៉ែអ្វីខ្លះចំពោះរាងកាយ?

1. កាល់ស្យូម
តម្រូវការនៃជាតិកាល់ស្យូមនៅក្នុងរាងកាយរបស់អ្នក គឺនៅចន្លោះ800មីលី្លក្រាមទៅ1,300មីលី្លក្រាម។ ជាតិកាល់ស្យូមមានសារៈសំខាន់ សម្រាប់ការបង្កើតភ្នាសកោសិកា។ អ្នកត្រូវការកោសិកាទាំងនេះសម្រាប់ការសាងសង់ឆ្អឹង សាច់ដុំ បេះដូង និងប្រព័ន្ធរំលាយអាហារ។ ក្រោយ ឬមុនពេលហាត់ប្រាណ ត្រូវមានទម្លាប់ទទួលទានទឹកដោះគោស្រស់មួយកែវជារៀងរាល់ថ្ងៃ។

2. ប៉ូតាស្យូម
រាងកាយរបស់អ្នកត្រូវការជាតិរ៉ែប៉ូតាស្យូមប្រមាណពី2,500មីលី្លក្រាមទៅ4,700មីលី្លក្រាមក្នុងរបបអាហាររបស់ពួកគេ។ ប៉ូតាស្យូម ជួយក្នុងការសាងសង់សាច់ដុំ រក្សាការលូតលាស់របស់រាងកាយ និងកោសិកា។ សារធាតុប៉ូតាស្យូមមាននៅក្នុងផ្លែឈើដូចជា ផ្លែចេក ផ្លែប៊័រ និងពពួកសណ្តែកជាដើម។ ក្រោយពេលហាត់ប្រាណរួច អ្នកអាចចម្អែតក្រពះដោយអាហារទាំងអស់នេះ ជំនួសចំណីអាហារក៏បាន។

3. ផូស្វ័រ
អ្នកត្រូវការជាតិរ៉ែផូស្វ័រប្រមាណ800មីលី្លក្រាមជារៀងរាល់ថ្ងៃ។ រ៉ែប្រភេទនេះមានសារៈសំខាន់ខ្លាំងណាស់សម្រាប់ការបង្កើតឆ្អឹង និងការផ្តល់ភាពរឹងមាំដល់ឆ្អឹង។ វាមាននៅក្នុងអាហារដូចជា គ្រាប់ធញ្ញជាតិ សណ្ដែកសៀង ផ្លែផាសិន ល្ហុង និងផ្លែស្រកានាគ។

4. សូដ្យូម
ក្នុងរបបអាហារប្រចាំថ្ងៃរបស់អ្នក រាងកាយអ្នកត្រូវការជាតិសូដ្យូមប្រមាណពី1,500មីលី្លក្រាមទៅ2,500មីលីក្រាម។ សារធាតុសូដ្យូម ជួយក្នុងការគ្រប់គ្រងបរិមាណជាតិទឹកសរុប និងកម្រិត pH នៅក្នុងរាងកាយ។ វាក៏ដើរតួនាទីយ៉ាងសំខាន់ក្នុងមុខងារសរសៃប្រសាទ និងការកន្ត្រាក់សាច់ដុំ។ សូដ្យូម មាននៅក្នុងប្រភេទទឹករ៉ែ និងអំបិល។

5. ម៉ាញ៉េស្យូម
រាងកាយរបស់អ្នកត្រូវការជាតិរ៉ែម៉ាញ៉េស្យូមប្រហែល350មីលី្លក្រាមទៅ420មីល្លីក្រាម នៅក្នុងរបបអាហាររបស់អ្នក។ ជាតិម៉ាញ៉េស្យូមអាចជួយភ្ញោចអង់ហ្ស៊ីម និងគ្រប់គ្រងតុល្យភាពអេឡិចត្រូលីត្រនៅក្នុងរាងកាយ។ ម៉ាញ៉េស្យូម មាននៅក្នុងអាហារ និងផ្លែឈើដូចជា ក្រូចឆ្មារ ទឹកដូង ផ្លែទៀប ផ្លែពុទ្រា និងផ្លែឈូកជាដើម៕

December 29, 2018

7 សញ្ញាគ្រោះថ្នាក់ ដែលប្រាប់ថា ដល់ពេលព្យាបាល ឫសធ្មេញ ហើយ

អាការឈឺធ្មេញ អាចបញ្ជាក់ប្រាប់អំពីអាការខុសប្រក្រតីរបស់ធ្មេញបានច្រើនយ៉ាង មិនថាតែធ្មេញពុក ធ្មេញទាល់ ធ្មេញបែក ឬរលាកអញ្ចាញធ្មេញនោះឡើយ តែបើជាអាការដែលបង្ហាញថា ឫសធ្មេញរបស់លោកអ្នកដល់ពេលវេលាត្រូវចូលទៅទទួលការជួសជុលជាបន្ទាន់វិញនោះ ច្រើនតែមានសញ្ញាគ្រោះថ្នាក់ដែលខ្លាំងជាងគ្រាន់តែឈឺធ្មេញធម្មតា។

សញ្ញាគ្រោះថ្នាក់… ដល់ពេលត្រូវព្យាបាល ឫសធ្មេញ ហើយ
1. កើតអាការឈឺធ្មេញពើតៗ តាមចង្វាក់លោតរបស់ជីពចរ។
2. ឈឺធ្មេញខ្លាំងពេលទំពា និងខាំអាហារ។
3. ឈឺ និងហើមអញ្ចាញដោយសារអាការអញ្ចាញធ្មេញឆ្លងមេរោគ។
4. ឈឺនៅពេលធ្មេញប៉ះគ្នា។
5. ឈឺធ្មេញដោយមិនដឹងមូលហេតុ។
6. ឈឺធ្មេញ សូម្បីតែពេលគេងនៅពេលយប់។
7. ឈឺធ្មេញដោយមិនចាំបាច់មានអ្វីមកជំរុញដូចជា ទឹកត្រជាក់ ឬអាហារដែលមានរសជាតិផ្អែម(នំ ឬបង្អែម)។

ហេតុអ្វីយើងត្រូវព្យាបាលឫសធ្មេញ?
ដោយសារឫសធ្មេញអាចមានភាពខុសប្រក្រតីដោយសារការឆ្លងមេរោគ ការរលាក តាមរយៈអាការធ្មេញពុកធ្លុះទៅដល់បណ្ដុំប្រសាទធ្មេញ មានធ្មេញដែលប្រេះ ឬបែករហូតទៅដល់បណ្ដុំសរសៃប្រសាទធ្មេញ ធ្មេញបានទទួលការបុកប៉ះខ្លាំងរហូតខូចខាតដោយសារគ្រោះថ្នាក់ឧប្បត្តិហេតុ រហូតធ្វើឱ្យមេរោគចូលទៅបំផ្លាញបណ្ដុំសរសៃប្រសាទធ្មេញនៅខាងក្នុងបាន។

តើត្រូវធ្វើដូចម្ដេច នៅពេលត្រូវព្យាបាលឫសធ្មេញ?
បច្ចុប្បន្នមានវិធីព្យាបាលឫសធ្មេញជាច្រើនដែលពាក់ព័ន្ធ វាអាស្រ័យលើភាពធ្ងន់ធ្ងររបស់ឫសធ្មេញដែលត្រូវបំផ្លាញ និងការពិនិត្យវិនិច្ឆ័យរបស់លោកគ្រូពេទ្យ។ ចាប់ផ្ដើមតាំងពីការរ៉ធ្មេញដើម្បីបើកផ្លូវចូលឆ្ពោះទៅរកបណ្ដុំសរសៃប្រសាទធ្មេញ កម្ចាត់សាច់ភ្នាសដែលមានឆ្លងមេរោគចោល លាងសម្អាតចង្អូរឫសធ្មេញ ដើម្បីមិនឱ្យមេរោគត្រឡប់ចូលមកជាថ្មីទៀត។ បន្ទាប់ពីនោះទើបងាកមកស្ដារសភាពឫសធ្មេញជាបណ្ដើរៗឡើងវិញ ដែលមានតាំងពីការដាក់ដាំបង្គោលធ្មេញ ការបណ្ដុះឆ្អឹង បណ្ដុះសាច់អញ្ចាញ (បើសិនចាំបាច់) រួមទៅដល់ការបិទប្រហោងធ្មេញ ធ្វើឱ្យធ្មេញត្រឡប់មកមានរូបរាងលក្ខណៈដូចដើមវិញជាដើម ដែលអ្នកជំងឺនឹងអាចប្រើប្រាស់ធ្មេញទំពាអាហារ និងមើលថែទាំសម្អាតដោយការដុសធ្មេញ និងប្រើអំបោះខាត់ធ្មេញបានដូចប្រក្រតី។

ការថែរក្សាធ្មេញយ៉ាងត្រឹមត្រូវ ដើម្បីការពារបណ្ដុំសរសៃប្រសាទធ្មេញដែលត្រូវបំផ្លាញ
1. សម្អាតធ្មេញដោយការដុសធ្មេញ និងប្រើអំបោះខាត់សម្អាតធ្មេញយ៉ាងត្រូវតាមវិធី យ៉ាងតិចក្នុងមួយថ្ងៃ 2ដង ព្រឹក-ល្ងាច ឬប្រើអំបោះខាត់សម្អាតធ្មេញគ្រប់ពេលក្រោយបរិភោគអាហារ។
2. មិនប្រើធ្មេញខាំត្របាក់ ខាំបំបែករបស់រឹងៗ ឬខាំទាញវត្ថុស្វិតៗ ព្រោះអាចធ្វើឱ្យធ្មេញរងការខូចខាត។
3. បើទទួលគ្រោះថ្នាក់ឧប្បត្តិហេតុដែលធ្វើឱ្យធ្មេញបាក់បែកខូចខាត ដូចជា របើកធ្មេញប្រេះ បែកជាដើមនោះ គួរប្រញាប់ទៅជួបលោកគ្រូពេទ្យដើម្បីធ្វើការព្យាបាលទាន់ពេលវេលា។
4. បើមានអាការឈឺធ្មេញ ឈឺអញ្ចាញធ្មេញ ឬមានភាពខុសប្រក្រតីផ្សេងៗ ដូចជា មានក្លិនមាត់មិនល្អខ្លាំងជាដើម គួរប្រញាប់ទៅជួបទន្តពេទ្យ។
5. ទៅជួបទន្តពេទ្យរៀងរាល់6ខែម្ដង៕

December 29, 2018

នាំគ្នាមកស្គាល់ពី សត្វល្អិត ឬព្រូន ក្នុងសាច់ជ្រូក តើមានគ្រោះថ្នាក់ដល់រាងកាយមនុស្សឬទេ?

ឈ្មោះថា សត្វល្អិត ឬព្រូន មិនថាជាអ្វីក៏ដោយ គ្មាននរណាម្នាក់ចង់ឱ្យវាចូលមកនៅក្នុងរាងកាយរបស់យើងឡើយ មែនទេ? តែបើសិនជាយើងចៃដន្យវាក់អ៊ើសត្វព្រូនសរសៃវែងតូចៗ ទន់ៗនៅក្នុងសាច់ជ្រូក ឬក្នុងគ្រឿងក្នុងជ្រូកក្នុងអំឡុងពេលចម្អិនម្ហូបអាហារ ឬយ៉ាប់ជាងនោះទៅទៀតគឺ ខាំចូលមាត់ទំពាខ្ញាច់ៗរួចទៅហើយកន្លះដុំនោះ តើវានឹងបង្កជាគ្រោះថ្នាក់ដល់រាងកាយរបស់យើងដែរឬទេ? ឡារ៉ែន មានចម្លើយសម្រាប់សំណួរនេះ!

តើសត្វល្អិត ឬព្រូនក្នុងសាច់ជ្រូកឆៅ គឺជាព្រូនប្រភេទណា?
ព្រូននៅក្នុងសាច់ជ្រូកដែលយើងច្រើនប្រទះឃើញជាព្រូនអំបោះដែលមានលក្ខណៈសរសៃៗតូចៗ ទន់ៗ ពណ៌ក្រហមៗដែលនឹងចូលទៅក្នុងខ្លួនរបស់សត្វជ្រូកតាមរយៈការស៊ី ដោយជ្រូកអាចនឹងស៊ីអាហារដែលមានលាយឡំ ឬប្រឡាក់លាមកដែលមានស៊ុតរបស់ព្រូន ទើបធ្វើឱ្យស៊ុតព្រូនចូលទៅរីកធំធាត់នៅក្នុងពោះវៀន សួត និងអវយវៈខាងក្នុងផ្សេងទៀតរបស់សត្វជ្រូក។ បើសិនជាសត្វជ្រូកមិនបានទទួលការចិញ្ចឹមថែទាំយ៉ាងស្អាត ត្រូវនឹងសុខអនាម័យ និងមិនបានទទួលការទម្លាក់សត្វល្អិត ឬព្រូនតាមពេលកំណត់ទេនោះ ក៏គេអាចប្រទះឃើញមានព្រូននៅក្នុងជ្រូកដែរ ហើយបើសិនជាស្ត្រីមេផ្ទះលាងសម្អាតគ្រឿងក្នុងជ្រូកមិនបានល្អ ក៏ព្រូនអាចជាប់មកជាមួយម្ហូបអាហាររបស់យើងបានដែរ។

ទទួលទានដោយសត្វល្អិត ឬព្រូនចូលទៅក្នុងរាងកាយ នឹងបង្កគ្រោះថ្នាក់ឬទេ?
ដំណឹងល្អគឺ បើសិនជាព្រូននោះត្រូវបានចម្អិនឆ្អិនល្អហើយ អាចទទួលទានបាន មិនបង្កគ្រោះថ្នាក់ដល់រាងកាយយើងទេ តែបើសិនបរិភោគសាច់ជ្រូកដែលមានព្រូន ឬស៊ុតព្រូនដែលចម្អិនមិនបានឆ្អិនល្អចូលទៅ ព្រូនក៏អាចទៅរីកធំធាត់នៅក្នុងរាងកាយយើងបាន ហើយបើសិនកើតរោគព្រូនអំបោះនេះហើយ អាចនឹងកើតអាការណែនដើមទ្រូង ឆាប់ហត់ដង្ហក់ មានគ្រុនក្ដៅខ្លួន ហើយបើសិនជាព្រូនបង្កប់ខ្លួននៅក្នុងពោះវៀនតូចផងនោះ នឹងកើតមានសភាវពោះធំ ខ្វះសារធាតុអាហារ ឈឺចុកពោះ ក្អួតចង្អោរ ហើយបើសិនជាមានព្រូនច្រើន ពួកវាអាចរមួលផ្ដុំចូលគ្នាជាដុំរហូតធ្វើឱ្យស្ទះពោះវៀនធ្វើឱ្យមានបញ្ហាធំបាន។

វិធីការពាររោគព្រូនអំបោះ
1 . បរិភោគតែសាច់សត្វដែលចម្អិនឆ្អិន 100%។
2 . ជ្រើសរើសបរិភោគសាច់សត្វដែលចេញមកពីប្រភពផលិតដែលមានស្តង់ដារ។
3 . បើចម្អិនម្ហូបអាហារដោយខ្លួនឯង គួរលាងសម្អាតសាច់សត្វ និងគ្រឿងក្នុងទាំងនោះឱ្យបានស្អាតហ្មត់ចត់។
4 . បើទទួលទានអាហារស្ទើរឆ្អិនស្ទើរឆៅហើយកើតមានអាការដូចដែលបានរៀបរាប់មកខាងលើ ចូរប្រញាប់ទៅជួបលោកគ្រូពេទ្យដើម្បីធ្វើការព្យាបាលជាបន្ត។ តែប៉ុណ្ណឹងក៏មិនចាំបាច់នាំគ្នាភ័យភ្ញាក់ផ្អើលខ្លាំងរហូតដល់ឈប់ញ៉ាំម្ហូបអាហារដែលធ្វើពីសាច់សត្វអីដែរ តែចំណុចសំខាន់គឺគួរចម្អិនឱ្យឆ្អិនល្អមុនទទួលទានគ្រប់ពេល ដើម្បីមិនប្រថុយនឹងការកើតមានព្រូននៅក្នុងពោះ OK!៕

December 6, 2018

ស្ត្រី គួរអនុវត្តទង្វើទាំងនេះ ដើម្បីបញ្ឆេះអារម្មណ៍សិចរបស់បុរស

មិនថាតែចំពោះជនជាតិអាស៊ី ឬអឺរ៉ុបនោះទេ ភាគច្រើនស្រ្តីតែងតែយល់ច្រឡំ និងប្រកាន់ខ្លួនយ៉ាងដូច្នេះថា រាល់សកម្មភាពសិចជាមួយដៃគូ គឺជាការទទួលខុសត្រូវរបស់ភាគីខាងបុរសទាំងអស់ ដោយរាប់ចាប់តាំងពីពេលចាប់ផ្តើម រហូតដល់ពេលបញ្ចប់ ដោយខ្លួនឯងគ្រាន់តែអ្នកចាំបំពេញបំណងដោយការដេកស្ងៀមថ្មឹងរឹងខ្លួនដូចគល់ឈើ ឬរង់ចាំតែទទួលផលសុខស្រួលតាមតែសកម្មភាពរបស់បុរសដែលផ្តល់ឱ្យតែប៉ុណ្ណោះ។ ដោយឡែកសម្រាប់អ្នកជាស្ត្រីផ្ទាល់តែម្ដង ប្រសើនបើអ្នកយល់បែបនេះដែរ វាជាការខុសឆ្ងង់ដែលត្រូវតែមានការកែប្រែទម្លាប់ចាស់ ហើយងាកមកអនុវត្តនូវសកម្មភាពងាយៗជាមួយដៃគូ ដើម្បីទទួលបានសេចក្ដីសុខស្រួលទាំងអស់គ្នាក្នុងនាមជាភរិយាស្វាមី។ អ្នកគ្រាន់តែអនុវត្តនូវចំណុចងាយៗដូចខាងក្រោម៖

ការបង្ហាញអារម្មណ៍បញ្ជាក់ពីចំណង់សិចរបស់អ្នក ៖ មិនថាតែចំពោះបុរសណាម្នាក់នោះទេ នៅពេលដែលនារីដែលជាដៃគូរបស់ខ្លួន បង្ហាញពីអារម្មណ៍យកចិត្តទុកដាក់ណែបនិត្យបង្កប់ដោយអត្ថន័យយ៉ាងស៊ីជម្រៅបែបស្នេហា ភាគច្រើនគឺរមែងស្លុងអារម្មណ៍ទៅតាមហ្នឹងដែរជាមិនខាន។ ដូច្នេះ ប្រសិនបើអ្នកចង់បានក្ដីស្រឡាញ់ ដែលឈានទៅរកសកម្មភាពសិចជាមួយបុរសជាដៃគូ អ្នកគួរតែសាកល្បងដូចការណែនាំមួយនេះ នោះនឹងដឹងពីលទ្ធផលដែលទទួបានជាមិនខាន។

ការប្រើដៃដើម្បីដាស់អារម្មណ៍សិចបុរស ៖ កុំថាឡើយបុរសអាចប្រើដៃរបស់ខ្លួនធ្វើជាឧបករណ៍ដាស់អារម្មណ៍នារីឱ្យមានភាពពុះកញ្ច្រោល សម្រាប់នារីក៏អាចប្រើដៃដាស់អារម្មណ៍កាមគុណបុរសបានដូចគ្នា។ នៅពេលដែលឈានចូលដល់ដំណាក់កាលទី2 ដែលអាចអន្ទងចិត្តបុរសជាដៃគូឱ្យមានអារម្មណ៍សិចជាមួយអ្នករួចហើយ ដៃរបស់អ្នកគឺមានប្រសិទ្ធភាពបំផុតក្នុងការធ្វើឱ្យបុរសមានភាពត្រេកត្រអាលស្ទើរតែទប់អារម្មណ៍មិនបាន ដោយអ្នកគ្រាន់តែប្រើដៃចាប់ក្តោបក្រសោបអវៈយវៈភេទរបស់ដៃគូ(អង្គជាតិ) ហើយត្រដុសថើរទៅលើ ចុះក្រោម ដោយសកម្មភាពមួយៗ។

បន្ថែមអារម្មណ៍សិចបុរសដោយប្រើមាត់ ៖ អ្នកមានធ្លាប់ដឹងទេថា ការប្រើមាត់ធ្វើជាឧបករណ៍ជំនួយសិចមានឥទ្ធពលខ្លាំងដល់កម្រិតណា? វាមិនខុសគ្នាពីអ្នកដែលធ្លាប់ទទួលបានអារម្មណ៍សុខស្រួលយ៉ាងពុះកញ្ច្រោលរហូតរមួលខ្លួន ក្រោមសកម្មភាពដ៏រស់រវើកនៃអណ្តាតដៃគូលិឌប្រដាប់ភេទរបស់អ្នកនោះទេ។ បុរសក៏ដូចគ្នា។ នៅពេលអ្នកប្រើមាត់ និងអណ្តាតឃុំគ្រងប្រដាប់ភេទបុរសជាដៃគូ (បៀមប្រៀបដូចការ៉េម) នោះបុរសនឹងកើតមានអារម្មណ៍ក្ដៅពេញទាំងប្រាណរហូតមិនអាចទប់អារម្មណ៍ខ្លួនឯងបានក៏ថាបានដែរ។

ទុកឱកាសឱ្យភាគីបុរសជាអ្នកនាំមុខ ៖ វាជាការពិតណាស់ទៅហើយ សម្រាប់អ្នកដែលជាស្រ្តីមិនអាចចាប់បង្ខំបុរសជាដៃគូឱ្យផ្តេកផ្តួលរួមដំណេកជាមួយអ្នកភ្លាមៗបាននោះទេ ប៉ុន្តែអ្នកអាចដុតបញ្ឆេះអារម្មណ៍របស់ដៃគូឱ្យឆេះក្ដៅបាន។ ជាមួយនឹងសកម្មភាពទាំងអស់ខាងលើនេះ យើងថា ភាគីខាងបុរសនឹងមិនអាចតាំងជំហរ ទប់អារម្មណ៍បាននោះទេ ហើយជាចុងក្រោយបំណងរបស់អ្នកច្បាស់ជាទទួលបានផ្លែផ្កាយ៉ាងត្រចេះត្រចង់រួមគ្នាជាមួយដៃគូជាក់ជាមិនខាន។

ជូនពរឱ្យដំណើរជីវិតសិចជាដៃគូរបស់អ្នកទទួលបានភាពល្អប្រសើរ និងយូរអង្វែង…៕

November 26, 2018

អាថ៌កំបាំងរបស់ការ “ស្ងាប‟ និងហេតុផលដែលធ្វើឱ្យអ្នកដទៃត្រូវស្ងាបតាម…

ស្ងាប ជាអាការដែលយើងជួបប្រទះជាញឹកញាប់នៅលើមនុស្សគ្រប់វ័យ ដែលរហូតមកដល់ពេលនេះហើយក៏នៅតែមិនទាន់មានចម្លើយដែលច្បាស់លាស់ណាមួយបញ្ជាក់ថា ហេតុអ្វីបានមនុស្សយើងត្រូវស្ងាបនៅឡើយ តែមានទ្រឹស្ដីជាច្រើនដែលអធិប្បាយថា ហេតុអីបានមនុស្សត្រូវស្ងាប និងហេតុអីបានត្រូវស្ងាបតាមគ្នា… ទ្រឹស្ដីទាំងអស់នោះមានដូចជា ៖

ជួយឱ្យយើងមានអារម្មណ៍លែងងងុយគេង
ជាអ្វីដែលយើងបានដឹងច្បាស់ទាំងអស់គ្នាហើយថា ការស្ងាបតែងតែតាមមកដោយការធ្វើចលនារាងកាយ ដូចជា ការពត់ខ្លួន ឬក្រោកឈរជាដើម ដែលទង្វើដ៏គួរឱ្យរំខានទាំងអស់នេះអាចជួយទប់ស្កាត់ អារម្មណ៍ងងុយគេងដែលកើតឡើងបាន។ ជួយបន្ថែមភាពត្រជាក់ដល់ខួរក្បាលទ្រឹស្ដីមួយទៀតបានប្រាប់ថា ការស្ងាបជួយឱ្យខួរក្បាលត្រជាក់ ដោយសារតែការស្ងាបនឹងធ្វើឱ្យត្រូវស្រូបដង្ហើមចូលវែងៗ ដើម្បីទាញយកខ្យល់អាកាសត្រជាក់ៗចូលទៅតាមមាត់ បន្ទាប់ពីនោះក៏នឹងធ្វើឱ្យឈាមដែលកំពុងហូរទៅចិញ្ចឹមខួរក្បាលត្រជាក់។ អ្នកកំណត់ទ្រឹស្ដីនេះបានអះអាងថា មានការសង្កេតឃើញសីតុណ្ហភាពរបស់ខួរក្បាលកើនឡើងខ្ពស់ក្នុងអំឡុងមុននឹងកើតអាការស្ងាប និងសង្កេតឃើញសីតុណ្ហភាពដែលថយចុះក្នុងអំឡុងពេលក្រោយស្ងាបរួច។

ហេតុអីបានមានការស្ងាបតាមគ្នា?
ការស្ងាបជាទង្វើដែលធ្វើឱ្យកើតមានការស្ងាបតាមគ្នាបាន ដូច្នេះពេលដែលឃើញនរណាម្នាក់ស្ងាប យើងក៏ច្រើនតែចង់កើតអាការស្ងាបតាមដែរ ដែលអាការនេះមានការសន្និដ្ឋានថា ការស្ងាបតាមគ្នានេះ មានចំណែកពាក់ព័ន្ធនឹងកម្រិតភាពយល់ចិត្តយល់ថ្លើម និងយល់ពីអារម្មណ៍របស់អ្នកដទៃ។

មិនចង់ស្ងាប ចូរសាកល្បងធ្វើបែបនេះ…
* ដកដង្ហើមចូលវែងៗ ៈ បើអ្នកណាមានអារម្មណ៍ថាខ្លួនឯងកើតអាការស្ងាបយ៉ាងច្រើននោះ ចូរសាកល្បងដកដង្ហើមចូល-ចេញវែងៗតាមច្រមុះ ព្រោះរាងកាយអាចត្រូវការអុកសុីែហ៊្សនក្នុងបរិមាណច្រើនឡើង។ ការស្រាវជ្រាវមួយបានរកឃើញថា ការដកដង្ហើមចូល-ចេញវែងៗ អាចជួយបន្ថយអាការដែលចង់ស្ងាបតាមគ្នាបាន។
* កម្រើករាងកាយ ៈ អ្នកគួរកម្រើករាងកាយឱ្យច្រើនឡើង កុំអង្គុយនៅស្ងៀម ក្រៅពីនេះ អារម្មណ៍នឿយល្វើយ ធុញទ្រាន់ និងតានតឹងក៏ច្រើនតែធ្វើឱ្យមនុស្សយើងកើតអាការស្ងាបច្រើនបានដែរ។
* ធ្វើឱ្យរាងកាយត្រជាក់ ៈ អ្នកអាចប្រើវិធីចេញទៅដើរលេងនៅក្នុងទីកន្លែងដែលមានធាតុអាកាសល្អ ឬមានសីតុណ្ហភាពដែលត្រជាក់ស្រួលជាងកន្លែងចាស់ តែបើអ្នកគ្មានពេលក្នុងការធ្វើបែបនោះបាន ក៏សាកល្បងញ៉ាំភេសជ្ជៈត្រជាក់ៗ ឬញ៉ាំនំត្រជាក់ៗ ដូចជា ការ៉េម ឬទឹកកកឈូសក៏បាន។ នៅពេលសីតុណ្ហភាពរបស់រាងកាយត្រជាក់ចុះហើយ ប្រហែលជាជួយឱ្យអាការស្ងាបច្រើននោះថយចុះ ឬបាត់អស់ទៅវិញបាន។

បើស្ងាបច្រើន ឬស្ងាបញឹកញាប់ជ្រុលពេក គួរទៅជួបគ្រូពេទ្យឬទេ?
អ្នកគួរតែទៅជួបគ្រូពេទ្យ បើមានអារម្មណ៍ថាអាការស្ងាបរបស់អ្នកមិនប្រក្រតី និងមានអាការផ្សេងទៀតរួមជាមួយដែលអាចជាអាការដែលរំខានដល់ការរស់នៅប្រចាំថ្ងៃរបស់អ្នក។ អ្នកគួរប្រាប់គ្រូពេទ្យថា មានអាការស្ងាបកើតឡើងនៅពេលណា រួមទាំងអាការផ្សេងៗរួមជាមួយផងដូចជាមើលឃើញមិនសូវច្បាស់ ឈឺចាប់នៅត្រង់ណាមួយ ឬមានអត់បានគេងដែរឬទេជាដើម។ ព័ត៌មានទាំងអស់នេះ អាចនឹងជួយឱ្យគ្រូពេទ្យវិនិច្ឆ័យអាការដែលបង្កប់នៅក្នុងរាងកាយរបស់អ្នកបាន រួមទាំងការណែនាំក្នុងការព្យាបាលដែលល្អប្រសើរឡើងផងដែរ។

ការពិតទៅ ការស្ងាបអាចជាសញ្ញាខាងរាងកាយដែលកើតអាការចង់ឈ្នះចង់ចាញ់គ្នារវាងអាការដឹងខ្លួន និងអាការងងុយគេង ហើយនៅទីបំផុតក៏ធ្វើឱ្យកើតអាការងោក និងលក់ក្នុង(អារម្មណ៍គេងលក់ តែភ្នែកនៅបើក)ឡើង ដូច្នេះបើពេលនោះអាការងងុយគេងមានជ័យជម្នះ ហើយស្មារតី និងអារម្មណ៍របស់មនុស្សដែលកំពុងបើកបរបញ្ជាឱ្យចតរថយន្តដើម្បីឈប់សម្រាកនោះ យើងគួរតែធ្វើតាមបញ្ជារបស់រាងកាយ…៕

October 25, 2018

8 សញ្ញា ដាស់តឿនថា អ្នកកំពុងតែ “ញ៉ាំទឹកតិចពេកហើយ”

ជីវិតដ៏សែនប្រញាប់ប្រញាល់របស់អ្នក អាចនឹងធ្វើឱ្យអ្នកភ្លេចញ៉ាំទឹកឱ្យបានគ្រប់គ្រាន់នឹងតម្រូវការរបស់រាងកាយ ដែលការញ៉ាំទឹកបានតិចនេះនឹងបង្កឱ្យកើតចំណុចអាក្រក់ជាច្រើនយ៉ាង រួមទាំងជំងឺដ៏គួរឱ្យភ័យខ្លាច ដូចជា រលាកប្លោកនោម ឬរលាកតម្រងនោមជាដើមទៀតផង។ល។ តែបញ្ហាគឺ អ្នកអាចនឹងមិនដឹងខ្លួនថា អ្នកកំពុងតែញ៉ាំទឹកបានតិចពេកនោះឡើយ ដូច្នេះអ្នកនាំគ្នាមកសង្កេតមើលរាងកាយរបស់អ្នកវិញប្រសើរជាងថា តើដល់ពេលហើយ ឬនៅ ដែលអ្នកគួរតែបន្ថែមទឹកឱ្យរាងកាយឱ្យបានច្រើនឡើង?

1. ការស្រេកទឹក
គឺពេលខ្លះអ្នកអាចនឹងស្រេកទឹកដោយមិនដឹងខ្លួន ហើយពេលបានញ៉ាំទឹក សឹងតែមិនចង់ឈប់ញ៉ាំ លើកកែវឡើងញ៉ាំតែម្ដងអស់ហើយថែមទាំងអាចនៅមានអារម្មណ៍ថា មិនទាន់បាត់ស្រេកទៀត។

2. ទឹកមូត្រមានពណ៌លឿងចាស់-ពណ៌ទឹកក្រូចជាប្រចាំ
ពណ៌របស់ទឹកមូត្រដែលប្រក្រតីគួរតែជាពណ៌លឿងខ្ចីស្រាល និងក្លិនក៏មិនគួរឈួលខ្លាំងរហូតមានអារម្មណ៍ដឹងថាខុសប្រក្រតីយ៉ាងច្បាស់ដែរ។ ទឹកមូត្រពណ៌លឿងចាស់ ហើយមានអារម្មណ៍ថាដូចជារាងខាប់ៗនោះ គឺបញ្ជាក់ថា អ្នកញ៉ាំទឹកបានតិចពេកហើយ។

3. បត់ជើងតូចមិនដល់4ដងក្នុងមួយថ្ងៃ
មនុស្សប្រក្រតីត្រូវតែក្រោកទៅចូលបន្ទប់ទឹកដើម្បីបត់ជើងតូចច្រើនជាង 4ដងក្នុងមួយថ្ងៃ តែបើអ្នកដឹងខ្លួនថា ថ្ងៃខ្លះដែលអ្នកអង្គុយធ្វើការ និងសឹងតែមិនបានទៅចូលបន្ទប់ទឹកសោះនោះ អ្នកគួរតែដឹងខ្លួន និងសួរខ្លួនឯងហើយថា អេ៎ ថ្ងៃនេះបានញ៉ាំទឹកខ្លះនៅហ្នឹង?

4. បបូរមាត់ស្ងួត
ក្រៅពីមានប្រតិកម្មចាញ់ក្រែមលាបមាត់ហើយ បើអ្នកមានអាការស្ងួតបបូរមាត់ញឹកញាប់ នោះអាចបណ្ដាលមកពីរាងកាយរបស់អ្នកខ្វះទឹកច្រើនហើយ។

5. ភ្នែកឡើងស្ងួត
រឹតតែអ្នកណាដែលអង្គុយធ្វើការនៅមុខកុំព្យូទ័រ ឬពាក់ខន់ថិកលេនស៍ផងនោះ នឹងជួបបញ្ហាស្ងួតភ្នែកញឹកញាប់ រឹតតែបើសិនជាអ្នកញ៉ាំទឹកមិនបានគ្រប់គ្រាន់ផងនោះ ភ្នែករបស់អ្នកនឹងរឹតតែស្ងួតខ្លាំងឡើង។ ស្ងួតដល់ថ្នាក់ពិបាកពាក់ខន់ថិកលេនស៍ ឬសូម្បីតែពេលដោះក៏រឹតតែពិបាកដែរ ព្រោះខន់ថិកលេនស៍នឹងបឺតជាប់នឹងភ្នែក ព្រោះខ្វះសំណើម… គួរឱ្យខ្លាចណាស់មែនទេ?

6. ទល់លាមក
ប្រាកដណាស់ នៅពេលរាងកាយមិនបានទទួលទឹកយ៉ាងគ្រប់គ្រាន់ កាកសរសៃអាហារដែលឆ្លងកាត់ការរំលាយ ការត្រងចេញក៏ខ្វះសំណើមដូចគ្នា ដូច្នេះលាមកនឹងឡើងរឹង ពិបាកបត់ជើង ភ្លេចៗខ្លួនអាចកើតអាការទល់លាមកញឹកញាប់ ធ្វើឱ្យប្រថុយនឹងជំងឺឫសដូងបាតទៀតផង។

7. ស្បែកស្ងួត ស្លាកស្នាមសួររកមុខមុនវ័យ
តឱ្យអ្នកមានស្បែកឡើងប្រេងក៏ដោយ តែអ្នកនឹងក្លាយជាមនុស្សស្បែកឡើងប្រេងដែលខ្វះជាតិទឹក ស្បែករបស់អ្នកនឹងរឹតតែឡើងប្រេងខ្លាំងឡើង ព្រោះនៅពេលអ្នកមានស្បែកស្ងួតជ្រុលពេក ក្រពេញខ្លាញ់នៅក្រោមស្រទាប់ស្បែកនឹងរឹតតែផលិតប្រេងឡើងមកស្រោបស្បែកមិនឱ្យស្បែកស្ងួត។ តែបើអ្នកជាមនុស្សស្បែកស្ងួតវិញ ក៏នឹងរឹតតែស្ងួតខ្លាំងឡើងទៀត ហើយចុងក្រោយ ស្លាកស្នាមក៏នឹងមកសួរសុខទុក្ខមុនវ័យមិនខាន។ សាកល្បងសង្កេតមើលថា តើស្លាកស្នាមនៅម្ដុំថ្ពាល់ ចុងភ្នែក និងថ្ងាសមកដល់ហើយឬនៅ? បើអ្នកអាយុនៅតិចសោះ ស្រាប់តែមានស្លាកស្នាមឡើងពេញមុខហើយនោះ បញ្ជាក់ថា ស្បែករបស់អ្នកខ្វះសំណើមហើយ ហើយអ្នកអាចញ៉ាំទឹកមិនបានច្រើនគ្រប់គ្រាន់ហ្នឹងឯង។

8. ប្រព័ន្ធរំលាយអាហារមានបញ្ហា
អ្នកដែលញ៉ាំទឹកមិនគ្រប់គ្រាន់ មានឱកាសកើតរោគក្រពះ ឬអាស៊ីតហូរបញ្ច្រាស់ខ្លាំងជាងប្រក្រតី ព្រោះនៅពេលដែលក្រពះមានទឹកមកជួយរំលាយអាហារមិនគ្រប់គ្រាន់ បរិមាណរបស់អាស៊ីតក៏នឹងខាប់ខ្លាំងឡើងភាពរឹងមាំរបស់ក្រពះក្នុងការរំលាយអាហារ រួមទាំងទឹករំអិលដែលជួយក្នុងការរំលាយអាហារក្នុងក្រពះក៏ថយចុះ អាចធ្វើឱ្យអាហារមិនរំលាយ ធ្វើឱ្យតឹងពោះឆ្អល់ពោះ ឬយូរៗទៅអាចប្រថុយនឹងអាការអាស៊ីតហូរបញ្ច្រាស់បាន។

វិធីការពារមិនឱ្យរាងកាយខ្វះទឹកក៏ងាយៗគ្មានអ្វីពិបាកសោះ ដោយអ្នកគ្រាន់តែដាក់កែវទឹកនៅជិតៗខ្លួន ហើយលើកក្រេបឱ្យបានញឹកញាប់ពេញមួយថ្ងៃ និងត្រូវញ៉ាំឱ្យអស់រៀងរាល់ថ្ងៃ ហើយកុំរវល់តែវីវក់ជាមួយការងាររហូតដល់ភ្លេចញ៉ាំទឹកញឹកញាប់ឱ្យសោះ។ តែប៉ុណ្ណឹងរាងកាយរបស់អ្នកនឹងបានទទួលទឹកយ៉ាងគ្រប់គ្រាន់មិនខាន៕

October 24, 2018

Category: សុខភាព