សុខភាព - La Reine Media

ថ្នាក់លើរបស់វេជ្ជបណ្ឌិត Li Wenliang បានស្លាប់ហើយ ដោយសារតែ Covid-19

លោក Mei Zhongming អាយុ57ឆ្នាំ ជាវេជ្ជបណ្ឌិតម្នាក់ដែលជាថ្នាក់លើរបស់សពលោកវេជ្ជបណ្ឌិត Li Wenliang (ដែលបានស្លាប់ដោយសារមេរោគកូរ៉ូណាកាលពីខែមុន) ក៏បានបាត់បង់ជីវិតដោយសារមេរោគដ៏កាចសាហាវនេះដែរ កាលពីវេលាថ្ងៃត្រង់ ថ្ងៃទី3មិនានេះ។

វេជ្ជបណ្ឌិត Mei Zhongming អនុប្រធានផ្នែកជំងឺភ្នែកនៅមន្ទីរពេទ្យមជ្ឈិមក្រុងអ៊ូហាន (Wuhan Central Hospital) គឺជាថ្នាក់លើរបស់សពលោកវេជ្ជបណ្ឌិត Li Wenliang ដែលបានស្លាប់ដោយសារមេរោគកូរ៉ូណាកាលពីខែកុម្ភៈ។ វេជ្ជបណ្ឌិត Mei បានឆ្លងមេរោគកូរ៉ូណានេះ នៅពេលលោកកំពុងប្រយុទ្ធប្រឆាំងនឹងរោគរាតត្បាតនេះ ហើយលោកបានស្លាប់នៅក្នុងមន្ទីរពេទ្យ Jinyintan Hospital ជាកន្លែងដែលលោកបានសម្រាកព្យាបាលជំងឺ។

លោកវេជ្ជបណ្ឌិតទាំង2អ្នកខាងលើនេះ គឺជាមនុស្សដែលធ្លាប់បញ្ចេញព័ត៌មានដំបូងទាក់ទិននឹងមេរោគកូរ៉ូណា។ ប៉ុន្តែ ពេលនោះគ្មានអ្នកណាជឿរឿងនេះ មិនត្រឹមតែប៉ុណ្ណោះ វេជ្ជបណ្ឌិត Li Wenliang ដែលជាថ្នាក់ក្រោមរបស់វេជ្ជបណ្ឌិត Men Zhongming ថែមទាំងត្រូវនគរបាលហៅទៅសួរនាំ និងបង្ខំឱ្យចុះហត្ថលេខាលើកំណត់ហេតុមួយទៀតផង៕

ប្រភព៖ សារព័ត៌មានបរទេស

March 3, 2020

ពលរដ្ឋអាមេរិកាំងសម្រុកទៅផ្សារទិញអីវ៉ាន់ ត្រៀមទុកប្រើប្រាស់រយៈពេលយូរ

បន្ទាប់ពីអាជ្ញាធរបានប្រកាសអំពីហានិភ័យនៃអាសន្នរោគកូរ៉ូណាដែលអាចរាតត្បាតពាសពេញផ្ទៃប្រទេស ពលរដ្ឋអាមេរិកាំង ក៏ចាប់ផ្ដើមសម្រុកទៅផ្សារទំនើប ដណ្ដើមគ្នាទិញទំនិញចាំបាច់អស់ៗពីផ្សារ។

ព័ត៌មានស្ដីអំពីចំនួនអ្នកឆ្លងមេរោគ Covid-19 កើនឡើងច្រើនជាង 100ករណី និងអ្នកស្លាប់ចំនួន6ករណី នៅក្នុងរដ្ឋ Washington បានធ្វើឱ្យប្រជាជននៅក្នុងតំបន់ជាច្រើននៅសហរដ្ឋអាមេរិក នាំគ្នាសម្រុកទៅទិញអីវ៉ាន់នៅផ្សារទំនើប យកមកទុកប្រើប្រាស់រយៈពេលវែង។

លោក Duane Tanouye ដែលមានវត្តមាននៅក្នុងផ្សារ Costco បានឱ្យដឹងថា មនុស្សជាង200នាក់បានមកតម្រង់ជួរនៅខាងក្រៅផ្សារ រង់ចាំទិញទំនិញ។ នៅទីនេះ អតិថិជន មិនអាចទិញទំនិញឱ្យលើសពីការកំណត់របស់ផ្សារទំនើបនេះនោះទេ។ ប៉ុន្តែ មនុស្សជាច្រើននៅតែប្រឹងរើសយកទំនិញទៅតាមការចង់បានរបស់ពួកគេ។

នៅរដ្ឋ New York ប្រជាជនក៏មានការភ័យព្រួយ ខ្លាចខ្វះអាហារ និងរបស់ប្រើប្រាស់ចាំបាច់ប្រចាំថ្ងៃ បន្ទាប់ពីស្រ្តីម្នាក់នៅក្នុងខណ្ឌ Manhanttan មានផ្ទុកមេរោគកូរ៉ូណា ក្រោយពីបានត្រឡប់មកពីប្រទេសអ៊ីរ៉ង់។ ពលរដ្ឋនៅតំបន់នេះ ក៏នាំគ្នាសម្រុកទៅទិញទំនិញឱ្យបានច្រើនតាមដែលអាចធ្វើទៅបាន។ បុគ្គលិកម្នាក់របស់ផ្សារទំនើប Whole Foods Market បានឱ្យដឹងថា ផ្សារទំនើបនេះ កំពុងតែខ្វះទំនិញជាច្រើនមុខ ក្នុងនោះក៏មានទឹកសុទ្ធ និងអាហារក្រៀមជាដើម។ ចំណែកទំនិញដែលលក់ដាច់់បំផុត មានដូចជាទឹកថ្នាំលាងដៃ ថ្នាំបញ្ចុះកម្ដៅ ទឹកសុទ្ធ អង្ករ និងរបស់របរប្រើប្រាស់ប្រចាំថ្ងៃផ្សេងៗទៀត ដូចជាក្រដាសអនាម័យ កន្សែងត្រជាក់ និងក្រដាសជូតមុខ។ល។

ក្រៅពីបណ្ដាផ្សារទំនើបនានាខាងលើនេះ គេក៏ឃើញមានផ្សារទំនើបនៅក្នុងតំបន់ផ្សេងៗនៃសហរដ្ឋអាមេរិក ក៏ត្រូវប្រឈមនឹងបញ្ហាស្រដៀងគ្នានេះដែរ។

Nancy Messonnier ដែលជាមន្ត្រីម្នាក់ធ្វើការនៅមជ្ឈមណ្ឌលគ្រប់គ្រង និងទប់ស្កាត់រោគឆ្លងនៅអាមេរិក កាលពីថ្ងៃទី25កុម្ភៈ បានព្រមានអំពីផលប៉ះពាល់របស់រោគរាតត្បាត Covid-19 គឺពិតជាធំធេង ហើយការដែលមេរោគនេះឆ្លងរាលដាលទ្រង់ទ្រាយធំនៅអាមេរិក គឺជា “រឿងដែលមិនអាចគេចផុត”។ ក្រុមមន្ត្រីបានណែនាំឱ្យពលរដ្ឋចាប់ផ្ដើមអនុវត្តវិធានការទប់ស្កាត់រោគរាតត្បាតនេះ។

កាកបាទក្រហមសហរដ្ឋអាមេរិក កាលពីសប្ដាហ៍មុន បានណែនាំឱ្យប្រជាជនត្រៀមអាហារក្រៀម និងរបស់របរប្រើប្រាស់ប្រចាំថ្ងៃ និងថ្នាំពេទ្យមួយចំនួនដែលអាចប្រើប្រាស់បាន30ថ្ងៃ ដើម្បីត្រៀមសម្រាប់គ្រាដែលអាសន្នរោគនេះឆ្លងរាលដាលខ្លាំង៕

ប្រភព៖ សារព័ត៌មានបរទេស

March 3, 2020

អង្គការ WHO “លេង” TikTok ដើម្បី “ពន្លត់” ព័ត៌មានក្លែងក្លាយស្ដីអំពី Covid-19

អង្គការសុខភាពពិភពលោក(WHO) បានបង្កើតគណនី TikTok ផ្លូវការរបស់ខ្លួន ដើម្បីជាផ្នែកមួយក្នុងការទប់ស្កាត់ដំណឹងក្លែងក្លាយទាក់ទិននឹងបញ្ហារោគរាតត្បាត Covid-19 នៅទូទាំងពិភពលោក។

នៅក្នុងវីដេអូដំបូងរបស់ខ្លួននៅលើ TikTok សាស្ត្រាចារ្យ Benedetta Allegranzi អ្នកជំនាញជាន់ខ្ពស់អំពីការទប់ស្កាត់ និងគ្រប់គ្រងជំងឺឆ្លងរបស់អង្គការសុខភាពពិភពលោក(WHO) បានចែករំលែកចំណេះដឹងទាក់ទិននឹងការការពារខ្លួនពីការឆ្លងនៃមេរោគកូរ៉ូណាប្រភេទថ្មីនេះ និងបានណែនាំឱ្យអ្នកប្រើប្រាស់ TikTok ចូលទៅអានព័ត៌មាននៅលើគេហទំព័រផ្លូវការរបស់អង្គការមួយនេះផងដែរ។

WHO សរសេរនៅផ្នែកខាងលើនៃវីដេអូនេះថា “យើងចូលរួមប្រើប្រាស់ TikTok គឺដើម្បីផ្ដល់ជូនមិត្តទាំងអស់នូវដំបូន្មានទាន់ហេតុការណ៍ និងគួរជាទីទុកចិត្ត ស្ដីអំពីសុខភាពសាធារណៈ”។

សូមបញ្ជាក់ថា មុននេះ គេឃើញមានរូបត្លុក “meme” ពាស់ពេញបណ្ដាញសង្គម TikTok ទាក់ទិននឹងរោគរាតត្បាតកូរ៉ូណា Covid-19។ ជាងនេះ គេក៏ឃើញមានអ្នកលេងបណ្ដាញសង្គមខ្លះ ធ្វើដូចជាខ្លួនឯងបានឆ្លងរោគនេះផងដែរ។

ការដែល WHO ចូលរួមលេង TikTok (ដែលជាបណ្ដាញសង្គមចែករំលែងឃ្លីបវីដេអូខ្លីៗ) បែបនេះ អាចជួយឱ្យអ្នកប្រើប្រាស់ទទួលបានព័ត៌មានលឿន និងប្របកដោយភាពត្រឹមត្រូវអំពីរោគរាតត្បាត Covid-19។ គេហទំព័រ MIT Technology Review បានឱ្យដឹងថា WHO រួមនឹងមជ្ឈមណ្ឌលគ្រប់គ្រង និងទប់ស្កាត់រោគឆ្លងរបស់សហរដ្ឋអាមេរិក បានចំណាយពេលជាច្រើនសប្ដាហ៍ក្នុងការទប់ស្កាត់ព័ត៌មានក្លែងក្លាយដែលត្រូវគេចែករំលែងនៅលើ Facebook, Twitter, TikTok រួមនឹងកម្មវិធីរបស់ Tencent។

នៅចំពោះមុខការ “រាតត្បាត” នៃព័ត៌មានក្លែងក្លាយ ក្រុមហ៊ុន Google ក៏បានបង្ហាញព័ត៌មានពី WHO នៅផ្នែកខាងលើនៃលទ្ធផលស្វែងរកព័ត៌មានស្ដីអំពីវីរុសកូរ៉ូណា។ Facebook ក៏បានបន្ថែមការណែនាំឱ្យចូលទៅកាន់គេហទំព័ររបស់អង្គការសុខភាពពិភពលោក នៅលើ New Feeds របស់ម្ចាស់គណនី។ នៅពេលគេស្វែងរកពាក្យគន្លឹះ “virus corona” បណ្ដាញសង្គម Twitter នឹងណែនាំឱ្យចូលអានព័ត៌មានរបស់អង្គការសុខភាពក្នុងតំបន់ និងពិភពលោក។ ចំណែក TikTok វិញ ក៏បានតភ្ជាប់អ្នកប្រើប្រាស់របស់ខ្លួនដែលស្វែងរកព័ត៌មានទាក់ទិននឹងមេរោគកូរ៉ូណា ទៅកាន់គេហទំព័ររបស់អង្គការសុខភាពពិភពលោក(WHO)នេះដែរ។

បណ្ដាញសង្គមទាំងអស់ក្នុងពិភពលោក បានសន្យាថានឹងលុបចោលរាល់ព័ត៌មានក្លែងក្លាយដែលទាក់ទិននឹងរោគរាតត្បាត Covid-19 ដែលដូចទៅនឹងវិធានការទប់ស្កាត់ខ្លឹមសារដែលមាននិន្នាការប្រឆាំងនឹងថ្នាំវ៉ាក់សាំង កាលពីប៉ុន្មានឆ្នាំកន្លងទៅនេះ។

គេហទំព័រ The Verge បានសរសេរថា “WHO បានបង្ហាញអំពីជំហានរីកចម្រើនមួយនៅពេលប្រកាសព័ត៌មានពិតនៅលើបណ្ដាញសង្គមផ្សេងៗដូច្នេះ”៕

ប្រភព៖ សារព័ត៌មានបរទេស

March 3, 2020

Covid-19៖ ថ្នាក់ដឹកនាំជាន់ខ្ពស់មួយចំនួនដែលបានស្លាប់ និងបានឆ្លងវីរុសកូរ៉ូណា

មេរោគកូរ៉ូណា Covid-19 បានចាប់ផ្ដើមឆ្លងរាលដាលនៅទីក្រុង Wuhan ខេត្ត Hubei ប្រទេសចិន កាលពីខែធ្នូ ឆ្នាំ2019 និងបានឆ្លងរាលដាល់ដល់ស្ទើរគ្រប់ទីកន្លែងក្នុងពិភពលោក បណ្ដាលឱ្យមានអ្នកស្លាប់ជាង 3,117នាក់ និងអ្នកផ្ទុកមេរោគនេះកើនដល់ 90,933នាក់ ក្នុងនោះមានទាំងប្រជាជនសាមញ្ញ មានទាំងអ្នកដឹកនាំមន្ទីរពេទ្យ និងមានទាំងមេដឹកនាំជាន់ខ្ពស់នៃក្រសួង ឬស្ថាប័នរដ្ឋ។ល។

ខាងក្រោមនេះគឺជាថ្នាក់ដឹកនាំមួយចំនួនដែលបានស្លាប់ និងបានឆ្លងវីរុសកូរ៉ូណា Covid-19 ៖

សមាជិកក្រុមប្រឹក្សាផ្ដល់យោបល់នៃប្រទេសអ៊ីរ៉ង់(ស្លាប់)

លោក Seyyed Mohammad Mirmohammadi សមាជិកមួយរូបនៃក្រុមប្រឹក្សាផ្ដល់យោបល់ (Expediency Discernment Council) របស់សាធារណរដ្ឋឥស្លាមអ៊ីរ៉ង់ បានបាត់បង់ជីវិត ដោយសារជំងឺកូរ៉ូណា Covid-19។ នេះបើតាមការចុះផ្សាយរបស់សារព័ត៌មានក្នុងស្រុកអ៊ីរ៉ង់ Iran Front Page នៅថ្ងៃទី2 ខែមីនា។

មន្ត្រីជាន់ខ្ពស់របស់អ៊ីរ៉ង់អាយុ72ឆ្នាំរូបនេះ បានស្លាប់ នៅឯមន្ទីរពេទ្យ Masih Daneshvari ក្នុងទីក្រុង Tehran ។

លោក Mirmohammadi ត្រូវបានតែងតាំងដោយផ្ទាល់ពីមេដឹកនាំកំពូល Ayatollah Seyyed Ali Khamenei កាលពីឆ្នាំ2017 ជាសមាជិកមួយរូបនៃក្រុមប្រឹក្សាផ្ដល់យោបល់ ដែលមានតួនាទីដោះស្រាយរាល់ការខ្វែងគំនិតគ្នារវាងសភាតំណាងរាស្ត្រ និងក្រុមប្រឹក្សាភិបាលរបស់អ៊ីរ៉ង់។

អនុប្រធានាធិបតីអ៊ីរ៉ង់ ទទួលបន្ទុកកិច្ចការនារី និងគ្រួសារ(បានឆ្លងមេរោគ)

អនុប្រធានាធិបតីអ៊ីរ៉ង់ ទទួលបន្ទុកកិច្ចការនារី និងគ្រួសារ លោកស្រី Masoumeh បានឆ្លងវីរុសកូរ៉ូណា ប៉ុន្តែ គេមិនបានដឹងថា លោកស្រីបានឆ្លងមេរោគនេះនៅពេលណា និងកន្លែងណានោះទេ។

សារព័ត៌មានមួយចំនួនបានចេញផ្សាយថា លោកស្រី Masoumeh ត្រូវបានគេឃើញមានវត្តមាននៅក្នុងកិច្ចប្រជុំមួយជាមួយប្រធានាធិបតីអ៊ីរ៉ង់ និងមន្ត្រីជាន់ខ្ពស់ផ្សេងទៀត នៅមុនពេលលោកស្រីត្រូវគេពិនិត្យឃើញថាមានផ្ទុកមេរោគកូរ៉ូណា។

អនុរដ្ឋមន្ត្រីក្រសួងសុខាភិបាលអ៊ីរ៉ង់(បានឆ្លងមេរោគ)

លោក Iraj Harirchi គឺជាអ្នកនាំមុខគេក្នុងការប្រយុទ្ធប្រឆាំងនឹងការឆ្លងរាលដាលនៃរោគរាតត្បាតនៃប្រទេសនេះ។

អ្នកនាំពាក្យរបស់ក្រសួងសុខាភិបាលអ៊ីរ៉ង់បានបញ្ជាក់នៅក្នុងកិច្ចសម្ភាសមួយដែលបានចាក់ផ្សាយនៅលើទូរទស្សន៍ក្នុងស្រុកមួយឱ្យដឹងថា លោក Iraj Harirchi បានឆ្លងមេរោគ និងកំពុងទទួលការព្យាបាល។

តំណាងរាស្ត្រអ៊ីរ៉ង់ មកពីទីក្រុង Astana Ashrafieh(ស្លាប់)

តំណាងរាស្ត្រអ៊ីរ៉ង់ម្នាក់ គឺលោក Mohammad Ali Ramazani Dastak ត្រូវបានគេរាយការណ៍ថា បានស្លាប់កាលពីថ្ងៃទី29កុម្ភៈ បន្ទាប់ពីបានឆ្លងមេរោគ Covid-19 អស់រយៈពេលជាច្រើនថ្ងៃ។

លោក Mohammad Ali Ramazani Dastak ទើបតែបានជាប់ឆ្នោតជាតំណាងរាស្ត្រនៃទីក្រុង Astana Ashrafieh កាលពីខែមុន។ លោកត្រូវគេរាយការណ៍ថា បានបាត់បង់ជីវិតកាលពីព្រឹកថ្ងៃទី29កុម្ភៈ ក្រោយពីត្រូវបានក្រុមគ្រូពេទ្យពិនិត្យឃើញថា មានផ្ទុកមេរោគកូរ៉ូណាកាលពីចុងខែកុម្ភៈឆ្នាំ2020។

តំណាងរាស្ត្ររូបនេះ ត្រូវបានបញ្ជូនទៅកាន់មន្ទីរពេទ្យ “ដោយមានរោគសញ្ញាគ្រុនផ្ដាសាយ និងស្នាមរបួសដោយសារគីមី” ដែលបង្ករឡើងកាលពីសង្គ្រាមអ៊ីរ៉ង់-អ៊ីរ៉ាក់។

លោក Dastak គឺជាអ្នកនយោបាយទី2 របស់អ៊ីរ៉ង់ ដែលបានស្លាប់ដោយសារមេរោគ Covid-19។ អ្នកនយោបាយអ៊ីរ៉ង់ដែលបានស្លាប់មុននេះ គឺលោក Hadi Khosrowshahi។

អតីតឯកអគ្គរដ្ឋទូតអ៊ីរ៉ង់ប្រចាំនៅទីក្រុង Vatican(ស្លាប់)

សារព័ត៌មានក្នុងប្រទេសអ៊ីរ៉ង់បានរាយការណ៍ថា អតីតឯកអគ្គរដ្ឋទូតអ៊ីរ៉ង់ប្រចាំនៅទីក្រុង Vatican លោក Hadi Khosrowshahi បានបាត់បង់ជីវិតកាលពីថ្ងៃទីព្រហស្បតិ៍ ទី27កុម្ភៈ ដោយសារបានឆ្លងមេរោគកូរ៉ូណា។

សារព័ត៌មាន Tasnim បានឱ្យដឹងថា អ្នកនយោបាយវ័យ81ឆ្នាំរូបនេះ បានស្លាប់នៅក្នុងមន្ទីរពេទ្យនៃប្រទេសអ៊ីរ៉ង់។

ប្រធានមន្ទីរពេទ្យ Wuchang ក្នុងទីក្រុង Wuhan ខេត្ត Hubei ប្រទេសចិន(ស្លាប់)

វេជ្ជបណ្ឌិត Liu Zhiming ប្រធានមន្ទីរពេទ្យ Wuchang ក្នុងទីក្រុង Wuhan បានបាត់បង់ជីវិតដោយសារបានឆ្លងមេរោគកូរ៉ូណាប្រភេទថ្មី ឈ្មោះ Covid-19។ នេះបើតាមសារព័ត៌មានចិន CCTV។

លោក Liu Zhiming មានអាយុ51ឆ្នាំ បានស្លាប់នៅវេលាម៉ោង10និង30នាទីព្រឹក ក្នុងថ្ងៃទី18កុម្ភៈ ឆ្នាំ 2020។ លោកគឺជាប្រធានមន្ទីរពេទ្យដំបូងគេដែលបានស្លាប់ដោយសាររោគរាតត្បាតនេះ។

ក្រៅពីអ្នករងគ្រោះដោយសាររោគរាតត្បាត Covid-19 ខាងលើ ក៏នៅមានមនុស្សជាច្រើនផ្សេងទៀតដែលបាន និងកំពុងទទួលរងឥទ្ធិពលពីអាសន្នរោគដ៏កាចសាហាវនេះ ក្នុងនោះមាន3,117នាក់បានស្លាប់ និងជាង90,936នាក់បានឆ្លងមេរោគ Covid-19៕

ប្រភព៖ សារព័ត៌មានបរទេស

March 3, 2020

បកស្រាយចម្ងល់ រឿង “វីរុសកូរ៉ូណា ឬ COVID-19” គឺអ្វី? មានអាការរោគយ៉ាងម៉េច?

ស្ថានការណ៍របស់មេរោគឆ្លងដែលបង្ហាញឈ្មោះនៅលើបណ្ដាញសង្គមរៀងរាល់ថ្ងៃនាពេលបច្ចុប្បន្ន និងនៅមិនទាន់មានសញ្ញាណាមួយថា វានឹងធូរស្រាលឡើងសោះនោះ គឺ “វីរុសកូរ៉ូណា” ឬ “COVID-19”បានធ្វើឱ្យមនុស្សជាច្រើនមានក្ដីបារម្ភកង្វល់ និងនាំគ្នាតាមដានព័ត៌មានគ្រប់ពេលវេលាអំពីចំនួនអ្នកឆ្លងមេរោគ អត្រាការស្លាប់ រួមទាំងការការពារខ្លួនឯងឱ្យរួចផុតពីការឆ្លងមេរោគដ៏កំណាចនេះផងដែរ។

តើមានអ្វីខ្លះដែលយើងគួរដឹងពាក់ព័ន្ធនឹងមេរោគកូរ៉ូណា ឬ COVID-19 ខ្លះនោះ សូមតាមដានតទៀត…

វីរុសកូរ៉ូណា ឬ COVID-19 គឺអ្វី?

វីរុសកូរ៉ូណា ជាមេរោគវីរុសដែលត្រូវបានរកឃើញនៅឆ្នាំ1960 តែនៅមិនទាន់ដឹងពីប្រភពកំណើតច្បាស់ថា ចេញមកពីទីណានៅឡើយ តែជាវីរុសដែលអាចឆ្លងបានទាំងមនុស្ស និងសត្វ។ មកទល់បច្ចុប្បន្នមានការរកឃើញមេរោគវីរុសប្រភេទនេះរួចមកហើយទាំងអស់ 6ប្រភេទ ចំណែកប្រភេទដែលកំពុងឆ្លងរាលដាលខ្លាំងទូទាំងពិភពលោកនៅពេលនេះ គឺជាប្រភេទដែលមិនធ្លាប់ជួបពីមុនមកឡើយ គឺជាប្រភេទទី7 ដូច្នេះហើយទើបវាត្រូវបានហៅថា “វីរុសកូរ៉ូណាប្រភេទថ្មី” និងពេលក្រោយមក វាត្រូវបានដាក់ឈ្មោះឱ្យជាផ្លូវការថា “COVID-19” ហ្នឹងឯង។

វីរុសកូរ៉ូណាប្រភេទថ្មី ឬ COVID-19 ចេញមកពីណា?

វីរុសកូរ៉ូណាប្រភេទថ្មី ឬ COVID-19 ពីដំបូងត្រូវបានរកឃើញពីសត្វជាមុន ជាសត្វសមុទ្រដែលមានការឆ្លងមេរោគវីរុសនេះ ហើយមនុស្សដែលនៅជិត ដែលបានប៉ះពាល់នឹងសត្វទាំងនោះ ក៏ឆ្លងមេរោគវីរុសនេះមកមួយជាន់ទៀត ដោយចាប់ផ្ដើមពីទីក្រុងវូហាន ប្រទេសចិន ដែលមានការសង្ស័យថា មានប្រភពចេញមកពីផ្សារលក់សត្វសមុទ្រ និងសត្វព្រៃទាំងឡាយ។

អាការជំងឺ ពេលឆ្លងមេរោគវីរុសកូរ៉ូណាប្រភេទថ្មី ឬ COVID-19

អាការរបស់វីរុស COVID-19 ដែលអាចសង្កេតឃើញយ៉ាងងាយដោយខ្លួនឯង មានអាការ 5ធំៗ ដូចខាងក្រោម៖

1.មានគ្រុនក្ដៅខ្លួន
2.ឈឺក
3.ក្អកស្ងួត
4.ហៀរសំបោរ
5.ដកដង្ហើមដង្ហក់
ខាងមន្ទីរពេទ្យអាចនឹងធ្វើការត្រួតពិនិត្យបន្ថែមដោយការ X-Rayសួត ហើយរកឃើញថា សួតរលាកហើម បើសិនមានអាការធ្ងន់ធ្ងរ អាចបណ្ដាលឱ្យគ្រោះថ្នាក់ដល់អវយវៈខាងក្នុងផ្សេងទៀតផង។

គ្រោះថ្នាក់របស់មេរោគវីរុសកូរ៉ូណាប្រភេទថ្មី ឬ COVID-19

ទោះជាអាការជាទូទៅ មើលទៅហាក់ដូចជាត្រឹមតែគ្រុនផ្ដាសាយធម្មតាមែន តែអ្វីដែលគេនាំគ្នាភ័យខ្លាចទូទាំងពិភពលោកនោះគឺ ដោយសារតែមេរោគវីរុសនេះ ជាមេរោគប្រភេទថ្មីដែលមិនទាន់មានថ្នាំមួយណាអាចព្យបាលឱ្យជាដោយផ្ទាល់បាននៅឡើយ។ ការព្យាបាលដំណើរការទៅបែបទប់ទល់ និងប្រគងទៅតាមអាការតែប៉ុណ្ណោះ។

ក្រៅពីនេះ គ្រោះថ្នាក់ដែលធ្វើឱ្យប្រថុយប្រថានដល់ជីវិតនោះ នឹងកើតឡើងនៅពេលដែលប្រព័ន្ធប្រឆាំងជំងឺនៅក្នុងរាងកាយរបស់យើងមិនរឹងមាំ ឬមេរោគវីរុសចូលទៅបំផ្លាញការធ្វើការងាររបស់សួត រហូតធ្វើឱ្យមេរោគវីរុសសាយភាយរាលដាលច្រើនឡើង និងឆាប់រហ័ស។

វិធីការពារការឆ្លងមេរោគវីរុសកូរ៉ូណាប្រភេទថ្មី ឬ COVID-19

1.ចៀសវាងពីការនៅជិតអ្នកជំងឺដែលមានអាការក្អក កណ្ដាស់ ហៀរសំបោរ ដកដង្ហើមហត់ដង្ហក់ និងឈឺក។2.ចៀសវាងការធ្វើដំណើរទៅតំបន់ដែលមានភាពប្រថុយប្រថានក្នុងឆ្លងរោគនេះ។
3.ពាក់ម៉ាស់ការពារគ្រប់ពេលវេលា ពេលនៅក្នុងទីសាធារណៈ។
4.លាងសម្អាតដៃជាប់ជានិច្ចដោយសាប៊ូ ឬអាល់កុលជេលយ៉ាងតិច 20នាទី(អាល់កុលកម្រិតមិនទាបជាង 70% និងមិនលាយទឹក)។
5.តមយកដៃប៉ះភ្នែក ច្រមុះ មាត់ នៅពេលដែលមិនទាន់បានលាងដៃ។
6.ចៀសវាងការប្រឡែងលេងជាមួយសត្វ ដោយគ្មានការពារ។
7.ទទួលទានអាហារឆ្អិន ស្អាត ប្រើស្លាបព្រាកណ្ដាល មិនបរិភោគម្ហូបអាហារដែលចម្អិនពីសាច់សត្វព្រៃ៕

ប្រភព៖ សារព័ត៌មានបរទេស

March 3, 2020

Covid-19៖ កូរ៉េខាងត្បូង មានអ្នកជំងឺកូរ៉ូណាជាង 4,800នាក់

កូរ៉េខាងត្បូង បានឱ្យដឹងនាព្រឹកនេះថា ប្រទេសនេះបានរកឃើញអ្នកផ្ទុកមេរោគកូរ៉ូណា Covid-19 បន្ថែម477នាក់ ធ្វើឱ្យចំនួនអ្នកជំងឺកូរ៉ូណាសរុបកើនដល់4,812នាក់។

មជ្ឈមណ្ឌលគ្រប់គ្រង និងទប់ស្កាត់រោគឆ្លងនៃកូរ៉េខាងត្បូង ថ្ងៃនេះបានប្រកាសនៅព្រឹកមិញនេះថា ប្រទេសនេះបានរកឃើញអ្នកផ្ទុកមេរោគកូរ៉ូណាបន្ថែម477នាក់ ធ្វើឱ្យអ្នកជំងឺសរុបទូទាំងប្រទេសកើនឡើងដល់4,812នាក់ និងអ្នកស្លាប់ឡើងដល់28នាក់។

ក្នុងចំណោមអ្នកដែលបានឆ្លងវីរុស Covid-19 គឺមាន60% ជាប់ទាក់ទិននឹងសាខាវិហារសាសនា Shincheonji ដែលដឹកនាំដោយលោកអាចារ្យ Lee Man-hee។ វិហារនេះ ស្ថិតនៅក្នុងទីក្រុង Daegu ដែលជាទីក្រុងធំទី4របស់កូរ៉េខាងត្បូង ដោយមានប្រជាជនចំនួន2,5នាក់កំពុងរស់នៅ។

សូមបញ្ជាក់ថា កាលពីសប្ដាហ៍មុន អាជ្ញាធរកូរ៉េខាងត្បូង បានស្នើឱ្យមានការស៊ើបអង្កេតទៅលើលោកអាចារ្យ Lee Man-hee ទាក់ទិននឹងការបណ្ដោយឱ្យមានការឆ្លងរាលដាលនៃមេរោគ Covid-19 ទៅលើក្រុមសាសនិកដែលជាសមាជិកនៃវិហារដែលគាត់គ្រប់គ្រង។ កាលពីម្សិលមិញ លោកអាចារ្យរូបនេះក៏បានចេញមុខមកសុំទោសចំពោះការឆ្លងរាលដាលនៃមេរោគ Covid-19 ទៅលើសមាជិកនៃវិហារ Shincheonji ដោយគាត់បានលុតជង្គង់ក្រាបសំពះសុំទោសអ្នករាល់គ្នា។

គិតមកដល់ពាក់កណ្ដាលយប់នៃថ្ងៃទី2មិនា ចំនួនអ្នកឆ្លងមេរោគបន្ថែមថ្មីនៅកូរ៉េខាងត្បូងដែលគេរាប់ចូលទៅក្នុងថ្ងៃទី2មិនា គឺមានចំនួន600នាក់ ក្នុងនោះ មាន519ករណីនៅក្នុងតំបន់ Daegu និង61ករណីនៅខេត្ត Gyeongsang ខាងជើង និងច្រើនករណីទៀតនៅក្នុងតំបន់ផ្សេងៗ។ ចំណែកទីក្រុង Seoul ក៏មានអ្នកឆ្លងរោគបន្ថែម7នាក់ផងដែរ។

នៅទូទាំងពិភពលោក គិតមកដល់ពេលនេះ មានអ្នកស្លាប់ដោយសាររោគរាតត្បាត Covid-19 មានចំនួន3,117នាក់ និងអ្នកបានឆ្លងមេរោគនេះ កើនឡើងដល់ជាង 90,912នាក់។ ចំណែកអ្នកដែលបានជាសះស្បើយពីជំងឺ មានចំនួនជិត48,000នាក់៕

ប្រភព៖ សារព័ត៌មានបរទេស

March 3, 2020

ប្រទេសជប៉ុន ក្នុងថ្ងៃដែលវីរុសវាយប្រហារ… JAPAN how are you?

ជប៉ុន អ្នកសុខសប្បាយទេ?

អ្នកយកព័ត៌មានបរទេសប្រចាំនៅប្រទេសជប៉ុនម្នាក់ បានធ្វើការអធិប្បាយ ព្រមជាមួយរូបភាពនៅតាមទីកន្លែងផ្សេងៗក្នុងទីក្រុងតូក្យូ ក្នុងថ្ងៃដែលវីរុសកូរ៉ូណាប្រភេទថ្មី ឬCOVID-19 វាយប្រហារ រហូតដល់ថ្នាក់រដ្ឋាភិបាលនៃប្រទេសជប៉ុនត្រូវប្រកាសឱ្យប្រជាជនរបស់ខ្លួនថែរក្សាជីវិតរបស់ពួកគេដោយការនៅតែក្នុងផ្ទះក្នុងអំឡុងពេល 2សប្ដាហ៍ ចាប់ពីពេលនេះតទៅ។

លោក ស៊ីនហ្សូ អាបេ នាយករដ្ឋមន្ត្រីនៃប្រទេសជប៉ុន បានថ្លែងកាលពីថ្ងៃទី29 ខែកុម្ភៈកន្លងទៅ ដោយសុំការសហការពីប្រជាជនក្នុងការទប់ស្កាត់ការឆ្លងរាលដាលរបស់មេរោគវីរុសកូរ៉ូណា ដោយលោកបានថ្លែងថា ការតស៊ូក្នុងគ្រានេះ នឹងមិនអាចយកឈ្នះមេរោគមរណៈនេះបានដោយរដ្ឋាភិបាលជប៉ុនតែម្នាក់ឯងបានឡើយ…។ លោកអាបេ បានសង្កត់ធ្ងន់ថា ក្នុងអំឡុង 1-2សប្ដាហ៍ខាងមុខនេះ នឹងក្លាយជាអំឡុងពេលដ៏សំខាន់បំផុតក្នុងការគ្រប់គ្រងការឆ្លងរាលដាល។ រដ្ឋាភិបាលជប៉ុន បានផ្ដល់នូវភាពសំខាន់ខ្ពស់បំផុតក្នុងការការពារអាយុជីវិត និងសុខភាពរបស់ជនជាតិជប៉ុនគ្រប់រូប ហើយនឹងដំណើរការវិធានការផ្សេងៗដែលចាំបាច់ ដោយអាស្រ័យលើស្ថានការណ៍ជាចម្បង។

រដ្ឋាភិបាលជប៉ុនបានចេញបញ្ជាជាបន្ទាន់មួយកាលពីយប់ថ្ងៃព្រហស្បតិ៍ ទី27 កុម្ភៈ ឱ្យសាលារៀនបឋម និងមធ្យមទូទាំងប្រទេស បិទទ្វា ផ្អាកការបង្រៀន តាំងពីថ្ងៃចន្ទ ទី2មីនាម្សិលមិញតទៅ។ មិនត្រឹមតែសាលារៀនត្រូវបិទប៉ុណ្ណោះទេ សារមន្ទីរ មណ្ឌលកម្សាន្ត ដូចជាឌីស្នីយ៍ លែនដ៍ យូនីវើរសល ស្ទូឌីយោ ក៏ត្រូវបិទទាំងអស់ដែរ។ កិច្ចការងារជួបជុំក្នុងសង្គម ឬពិធីបុណ្យផ្សេងៗទៀត ក៏ត្រូវលុបចោលដែរ។

អង្គភាពរាជការទាំងអស់សុទ្ធតែត្រូវចេញបញ្ជាឱ្យកាត់បន្ថយការប្រជុំ ការទាក់ទងដែលមិនប្រញាប់ និងមិនចាំបាច់ចោលទាំងអស់ ដោយមានគោលដៅតែមួយ គឺដើម្បីកាត់បន្ថយសកម្មភាពរបស់ប្រជាជន ដែលអាចហៅបានថា ជាការ “បិទទីក្រុង” ខាងផ្នែកប្រតិបត្តិ ហ្នឹងឯង។

អ្នកយកព័ត៌មានបរទេសប្រចាំនៅប្រទេសជប៉ុនរូបនោះ បានធ្វើដំណើរទៅស្ថានីយអ្នកដំណើរ “តូក្យូ” មជ្ឈមណ្ឌលកណ្ដាលខាងការដឹកជញ្ជូនរបស់ទីក្រុងនៃដែនដីសាមូរ៉ៃនេះ ដែលជាធម្មតានឹងមានមនុស្សម្នាដើរប្រជ្រៀតគ្នាយ៉ាងណែនណាន់តាន់តាប់ ទាំងអ្នកទេសចរ អ្នកដែលធ្វើដំណើរដោយរថភ្លើងទាំងក្នុងទីក្រុងតូក្យូ និងរថភ្លើងល្បឿនលឿន ឈិងកាន់ហ្សេន ទៅទូទាំងប្រទេស រួមទាំងអ្នកដែលមកដើរទិញទំនិញ ឬដើរលេងកម្សាន្តនៅតំបន់នេះផងដែរ។ តែកាលពីសប្ដាហ៍កន្លងទៅ មនុស្សម្នាដែលចេញមកក្រៅផ្ទះ បានថយចុះយ៉ាងឃើញច្បាស់តែម្ដង ផ្លូវថ្នល់ទាំងឡាយស្រឡះល្វឹង មនុស្សម្នាដែលដើរទៅមក សឹងតែគ្រប់គ្នា មានពាក់ម៉ាស់ការពារ លើកលែងតែជនបរទេសមួយចំនួនដែលគិតថា មិនចាំបាច់ប៉ុណ្ណោះ។

កន្លែងឈររង់ចាំរថភ្លើង សឹងតែគ្មានមនុស្សឈរចាំ កៅអីនៅក្នុងរថភ្លើង ក៏ទំនេរ យ៉ាងមិនដែលក្លាយជាបែបនេះពីមុនមកសោះ។ ទាំងពេលនេះ ជាពេលព្រលប់ៗ ជាអំឡុងពេលដែលមានមនុស្សម្នាធ្វើដំណើរច្រើនបំផុត។

ហាងលក់ទំនិញ និងហាងកាហ្វេ ក្នុងតំបន់ម៉ារុណូអ៊ុជិ ដែលធម្មតា នឹងមានមនុស្សម្នាដ៏ច្រើនក្នុងអំឡុងពេលដែលធាតុអាកាសល្អបែបនេះ តែពេលនេះបែរជាស្ងាត់ជ្រងំ គួរឱ្យស្រណោះ។

បុគ្គលិកហាងលក់ទំនិញនាំគ្នានិយាយថា អតិថិជនបានធ្លាក់ចុះយ៉ាងខ្លាំង។ ពួកគេមិនខា្លចវីរុសទេ តែខាងម្ចាស់ហាងបានបញ្ជាឱ្យបុគ្គលិកទាំងអស់ត្រូវតែពាក់ម៉ាស់ការពារ ដែលបើសិនជាស្ថិតក្នុងស្ថានការណ៍ប្រក្រតីវិញ បុគ្គលិកហាង មិនអាចពាក់ម៉ាស់បិទមុខបានទេ ព្រោះជាការគ្មានសុជីវធម៌ចំពោះអតិថិជន។

រថភ្លើងល្បឿនលឿនឈិងកាន់ហ្សេន កៅអីទំនេរសឹងតែទាំងអស់ ទោះជាស្ថិតនៅលើផ្លូវដែលពេញនិយម ដូចជា តូក្យូ-អូសាកា ដែលប្រក្រតី ត្រូវតែកក់សំបុត្រទុកមុនក៏ដោយ តែពេលនេះក៏ស្ទើរតែគ្មានអ្នកដំណើរ។

ចំណែកនៅតំបន់ ឈិប៊ូយ៉ា ដ៏ល្បីល្បាញ ពេលនេះក៏ស្ងាត់ជ្រងំ។ ស្ថានីយរថភ្លើងដែលធ្លាប់តែអ៊ូអរ ពេលនេះគ្មានមនុស្សម្នា…។

បន្ទប់ទឹកសាធារណៈ មានបិទប្រកាសណែនាំពីវិធីលាងដៃដែលត្រឹមត្រូវ ណែនាំឱ្យលាងដៃ ខ្ពុរមាត់ ដើម្បីការពារការឆ្លងមេរោគ។

ការឆ្លងរាលដាលរបស់មេរោគវីរុស COVID-19 ថែមទាំងហុចផលប៉ះពាល់ដល់ការធ្វើការងារ និងមុខជំនួញផ្សេងៗទៀតផងដែរ ដូចជាទស្សនាវដ្តីជាច្រើនយីហោ ប្រកាសពន្យារពេល ឬបញ្ឈប់ការចេញផ្សាយក្នុងខែមីនា។

និងថែមទាំងនៅមានព័ត៌មានចចាមអារ៉ាមជាច្រើនទៀតផងថា ក្រដាសអនាម័យ នឹងខ្វះនៅលើទីផ្សារដូចគ្នានឹងម៉ាស់ការពារដែរ ព្រោះនាំចូលមកពីប្រទេសចិន ធ្វើឱ្យជនជាតិជប៉ុននាំគ្នាសម្រុកទៅទិញក្រដាសអនាម័យទុកប្រើ រហូតនៅលើទីផ្សារលែងមានលក់ ទាំងការពិតទៅ សរសៃក្រដាសសឹងតែទាំងអស់ ផលិតនៅប្រទេសជប៉ុន ធ្វើឱ្យហាងលក់ទំនិញជាច្រើន ត្រូវកំណត់ឱ្យទិញបានតែក្នុង 1គ្រួសារ តែ 1យួរប៉ុណ្ណោះ។

បញ្ជាបន្ទាន់ឱ្យបិទសាលារៀន ធ្វើឱ្យបណ្ដាអាណាព្យាបាល ឪពុកម្ដាយ គ្រូបង្រៀន រហូតដល់ប្រជាជនជប៉ុនទាំងអស់ សឹងតែរៀបចំប្រុងប្រៀបអ្វីៗស្ទើរតែមិនទាន់…ឪពុកម្ដាយភាគច្រើន នៅត្រូវចេញទៅធ្វើការតាមធម្មតា…តើនរណានឹងមើលថែទាំកូននៅផ្ទះ?

ម្ហូបអាហារក្លាស្សេ ម្ហូបអាហារកំប៉ុង ត្រូវបានលក់ដាច់ខ្លាំង ព្រោះបណ្ដាឪពុកម្ដាយទាំងឡាយត្រូវទិញយកមកទុកឱ្យកូនៗដែលត្រូវឈប់សម្រាកនៅផ្ទះ តែការផលិត និងការដឹកជញ្ជូន បានទទួលរងផលប៉ះពាល់ដោយសារតែការឆ្លងរាលដាលរបស់មេរោគ រហូតដល់ទំនិញមួយចំនួនលែងមានលក់នៅលើទីផ្សារ។

ធាតុអាកាសនៅក្នុងប្រទេសជប៉ុន ឆ្នាំនេះកក់ក្ដៅល្អជាងឆ្នាំមុនៗ ធ្វើឱ្យផ្កាសាគូរ៉ា ឆាប់រីកជាងប្រក្រតី តែមេរោគវីរុសកំណាច ធ្វើឱ្យពិធីបុណ្យទស្សនាផ្កាសាគូរ៉ាភាគច្រើនត្រូវបានផ្អាក…អំឡុងពេលមាស អំឡុងពេលប្រាក់របស់វិស័យទេសចរណ៍ជប៉ុនឆ្នាំនេះ ត្រូវបានបញ្ចប់តាំងពីមិនទាន់បានចាប់ផ្ដើម។

ផ្កាសាគូរ៉ា នៅតែរីកស្គុះស្គាយយ៉ាងស្រស់ស្អាត តែឆ្នាំនេះគ្មានមនុស្សម្នាមកទស្សនា។ ជនជាតិជប៉ុនមួយចំនួននឹកឃើញទៅដល់ព្រឹត្តិការណ៍រញ្ជួយផែនដី និងមហារលកយក្ស ស៊ូណាមិវាយប្រហារកាលពីឆ្នាំ2011…ខុសគ្នាតែត្រង់ថា រញ្ជួយផែនដី កើតឡើងត្រឹមតែមិនប៉ុន្មានវិនាទីប៉ុណ្ណោះ និងកន្លែងរងគ្រោះមានព្រំដែនច្បាស់លាស់ តែមេរោគកំណាចនេះ វានឹងឆ្លងរាលដាលយូរតទៅទៀត និងពង្រីកអាណាចក្ររបស់វា រហូតមិនដឹងថា តើវានឹងចប់នៅទីណា និងនៅពេលណា???៕

ប្រភព ៖ ព័ត៌មានបរទេស

March 3, 2020

Covid-19៖ សហរដ្ឋអាមេរិកមានអ្នកស្លាប់6នាក់ហើយ ដោយសារឆ្លងមេរោគកូរ៉ូណា

សហរដ្ឋអាមេរិក ដែលជាមហាអំណាចពិភពលោក មានប្រព័ន្ធសុខាភិបាលល្អ ក៏មិនអាចគេចផុតពីអាសន្នរោគកូរ៉ូណា Covid-19 ខណៈមកដល់ថ្ងៃនេះមានអ្នកស្លាប់ចំនួន6នាក់ ដែលអ្នកទាំងនេះសុទ្ធតែនៅក្នុងរដ្ឋ Washington។

5នាក់ក្នុងចំណោមអ្នកស្លាប់ទាំង6នាក់នោះ សុទ្ធតែរស់នៅក្នុងតំបន់ King ដែលជាខណ្ឌមួយមានប្រជាជនច្រើនជាងគេរបស់រដ្ឋ Washington វាជាកន្លែងដែលមានទីក្រុង Seattle តាំងនៅ និងមានប្រជាជនចំនួន700,000នាក់កំពុងរស់នៅទីនោះ។ ចំណែកអ្នកស្លាប់ទី6 គឺពលរដ្ឋមកពីតំបន់ Snohomish។

រដ្ឋ Washington បានរកឃើញអ្នកផ្ទុកមេរោគកូរ៉ូណាថ្មីបន្ថែម4ករណី នាំឱ្យចំនួនអ្នកផ្ទុកមេរោគនេះកើនដល់18នាក់ ក្នុងនោះមាន3ករណីនៅក្នុងមន្ទីរថែទាំចាស់ជរាមួយកន្លែងក្នុងរដ្ឋនេះ។

បុគ្គលិកសុខាភិបាលនៅតំបន់ King ឈ្មោះ Jeff Duchin បានឱ្យដឹងថា “ហានិភ័យនៃការឆ្លងមេរោគនេះគឺកាន់តែមានច្រើនៗ”។

បច្ចុប្បន្ន អាមេរិកមានអ្នកជំងឺកូរ៉ូណា Covid-19 សរុបចំនួន99នាក់ ក្នុងនោះ ប្រមាណជា50% គឺជាអ្នកដែលបានត្រឡប់មកពីប្រទេសចិន និងមកពីនាវា Diamond Princess ដែលកំពុងចតនៅប្រទេសជប៉ុន។ អ្នកជំងឺមួយចំនួនទៀត មានជាប់ទាក់ទិននឹងអ៊ីរ៉ង់ និងអ៊ីតាលី ដែលជាប្រទេសកំពុងមានអ្នកស្លាប់ច្រើនដោយសារអាសន្នរោគនេះ៕

ប្រភព៖ សារព័ត៌មានបរទេស

March 3, 2020

ជាង90,000នាក់បានឆ្លងមេរោគ Covid-19 នៅទូទាំងពិភពលោក ខណៈអ្នកស្លាប់កើនដល់…

វីរុស Covid-19 បានបង្ហាញខ្លួននៅក្នុងប្រទេស និងដែនដីចំនួន76 នៅទូទាំងពិភពលោក ហើយបានឆ្លងទៅមនុស្សចំនួន90,433នាក់ ក្នុងនោះមាន3,118នាក់បានបាត់បង់ជីវិត គឺកើនឡើង66ករណីបើធៀបនឹងម្សិលមិញ។

ចំនួនអ្នកឆ្លងមេរោគ Covid-19 នៅកូរ៉េខាងត្បូង អ៊ីតាលី និងអ៊ីរ៉ង់ នៅតែបន្តកើនឡើង។ កូរ៉េខាងត្បូងមានអ្នកជំងឺកូរ៉ូណាចំនួន4,335នាក់ និង28នាក់បានបាត់បង់ជីវិត ខណៈអ្នកផ្ទុកមេរោគ Covid-19 នៅអ៊ីតាលី មានចំនួន2,036នាក់ និងអ៊ីរ៉ង់ 1,501នាក់។

គណៈកម្មការសុខាភិបាលចិន ថ្ងៃនេះបានឱ្យដឹងថា ប្រទេសនេះមានអ្នកជំងឺកូរ៉ូណាថ្មីចំនួន125នាក់ ដែលនេះជាតួលេខទាបបំផុតរាប់ចាប់តាំងពីថ្ងៃទី21មករាមកនេះ។ ប្រទេសចិនក៏មានអ្នកស្លាប់បន្ថែមចំនួន31នាក់ ដែលអ្នកទាំងនេះសុទ្ធតែនៅក្នុងតំបន់សម្បុកមេរោគ Hubei។

ប្រធានអង្គការសុខភាពពិភពលោក WHO លោក Tedros Adhanom Ghebreyesus បានឱ្យដឹងថា ចំនួនអ្នកឆ្លងមេរោគថ្មីនៅខាងក្រៅប្រទេសចិន “កើនឡើងខ្ពស់ជាង9ដង” បើធៀបនឹងករណីឆ្លងថ្មីដែលទើបរកឃើញនៅប្រទេសចិនក្នុងថ្ងៃទី3មិនាម្សិលមិញ។

អ៊ីរ៉ង់ គឺជាប្រទេសដែលមានអ្នកស្លាប់ដោយសារអាសន្នរោគកូរ៉ូណា ច្រើនជាងគេក្នុងលោក បន្ទាប់ពីប្រទេសចិន ដោយមានអ្នកស្លាប់66នាក់។

ចំណែកអ៊ីតាលីវិញ បានរកឃើញអ្នកផ្ទុកមេរោគ Covid-19 ដំបូងកាលពីថ្ងៃទី31មករា និងបានក្លាយជាសម្បុកមេរោគធំបំផុតនៅអឺរ៉ុបនាបច្ចុប្បន្ន។ ប្រទេសព័រទុយហ្គាល់ អ៊ីស្លង់ និងប្រទេសអង់ដូរ៉ា ក៏បានរកឃើញអ្នកឆ្លងមេរោគដំបូងកាលពីម្សិលមិញដែរ ដែលភាគច្រើនគឺជាអ្នកវិលត្រឡប់មកពីប្រទេសអ៊ីតាលី។

បច្ចុប្បន្ន ពិភពលោក មានអ្នកផ្ទុកមេរោគ Covid-19 សរុបចំនួន 90,433នាក់ និង 3,118នាក់បានបាត់បង់ជីវិត និង48,111នាក់បានជាសះស្បើយពីជំងឺ៕

ប្រភព៖ សារព័ត៌មានបរទេស

March 3, 2020

ហេតុផលដែលស្ត្រីភាគច្រើនមិនមានអារម្មណ៍ចង់រួមរ័ក

សព្វថ្ងៃនេះមាននារីមិនតិចនាក់នោះទេ ដែលកំពុងពិបាកចិត្ដពិបាកហារមាត់និយាយពីបញ្ហាមួយនេះ ពីព្រោះពួកគាត់រកមិនឃើញសោះនូវ “ភាពសប្បាយ ឬតម្រេកនៃតណ្ហា” នៃចំណងមេត្រីភាពរវាងប្ដី និងប្រពន្ធ។ និយាយរួមគឺ ជីវភាពសិចរបស់ពួកគាត់ ត្រូវបានជួបនូវភាពរអាក់រអួលស្ទើរតែមិនដែលស្គាល់ពាក្យថា “ស្រណុកសុខស្រួល” រហូតបង្កើតឱ្យមានភាពសោះអង្គើយជាមួយដៃគូរួមជីវិតរបស់ពួកគាត់ថែមទៀតផង។

កម្រនឹងមាននារីណាដែលនៅស្ងៀមៗស្រាប់តែនឹកឃើញដល់តម្រូវការផ្លូវភេទនោះណាស់ ជាពិសេសចំពោះអ្នកដែលតែងកើតមានបញ្ហាបែបសោះកក្រោះនៅពេលរួមដំណេកតែម្ដង។ តាមធម្មតាស្ថានភាពនៃការគ្មានអារម្មណ៍ស្រើបស្រាលក្នុងរឿងស្នេហារបស់នារី តែងកើតមានក្រោយពេលមានរឿងតក់ស្លុតភ័យរន្ធត់យ៉ាងខ្លាំងខាងចិត្ដសាស្ដ្រ ឬដោយសារជំងឺផ្សេងៗ។ ទោះបីជាដោយសារមូលហេតុអ្វីក៏ដោយ ការគ្មានអារម្មណ៍ក្នុងពេលរួមរ័ក នឹងបង្កើតជាបញ្ហានៅក្នុងជីវិតរបស់នារីៗទាំងនោះ ជាពិសេសគឺក្នុងការរស់នៅជាប្ដីប្រពន្ធដ៏យូរអង្វែងតែម្ដង។ ការគ្មានអារម្មណ៍នឹងធ្វើឱ្យបាត់បង់ភាពមានសម្រើបដល់កំពូលក្នុងការរួមរ័ករវាងប្រុស និងស្រី បានសេចក្ដីថា ពុំទាន់ឈានទៅដល់សម្រើបដ៏កំពូលដែលមនុស្សគ្រប់រូបតែងតែចង់បាន និងចង់ឱ្យកើតមាន។ ទោះជាក្នុងសម័យណាក៏ដោយ ជំងឺគ្មានអារម្មណ៍របស់នារី ហាក់មានលក្ខណៈស្រដៀងគ្នា ខុសគ្នាបន្តិចត្រង់ចំណុចថានារីសម័យនេះងាយនឹង “រអ៊ូរទាំ” និងមានលក្ខខណ្ឌជាច្រើនសម្រាប់ “កែខៃ” ជាងសម័យបូរាណដែលនារីចូលចិត្ដលាក់ទុកក្នុងចិត្ដ។

ជាមួយនឹងករណីឧបស័គ្គក្នុងពេលរួមរ័កនេះ លោកវេជ្ជបណ្ឌិតឯកទេសខាងរោគស្ដ្រី (Gynecology) ឈ្មោះ Joelle Bensimhon បានកត់សម្គាល់ថា ក្នុងមួយថ្ងៃៗកាន់តែមានស្ត្រីច្រើនឡើងៗទៅជួបពិគ្រោះជាមួយគ្រូពេទ្យ ដោយសារមូលហេតុខាងលើនេះ ហើយក៏ត្រូវបានលោកវេជ្ជបណ្ឌិតណែនាំបន្ដឱ្យទៅជួបជាមួយអ្នកជំនាញខាងបញ្ហានេះ(សម្ពន្ធភាពសិច)។ អ្នកជំងឺតែងតែនិយាយប្រាប់គ្រូពេទ្យថា “ខ្លួនខ្ញុំដូចជាធម្មតា ខ្ញុំមិនពេញចិត្ដក្នុងការរួមរ័កជាមួយប្ដី ខ្ញុំមានឧបស័គ្គក្នុងពេលស្នេហា…។ យ៉ាងណាក៏ដោយតាមធម្មតា នារីក៏ដូចជាបុរសដែរ គឺចង់បានជីវិតប្ដីប្រពន្ធប្រកបដោយសុភមង្គល និងជីវភាពរួមរ័កប្រកបដោយភាពល្អរលូន និងផ្អែមល្ហែម។ អ្នកសិក្សាខាងរឿងសិចបានយល់ច្បាស់អំពីបញ្ហានេះ។ ជាក់ស្ដែងគឺគេខំស្រាវជ្រាវរកឱសថថ្មីៗសម្ដៅរំញោចអារម្មណ៍ស្រើបស្រាលរបស់នារី ឬស្វែងរកវិធានការផ្សេងៗ ដើម្បីស្ដារឡើងវិញនូវសមត្ថភាពដែលទាក់ទិនដល់ការបង្កើនអារម្មណ៍របស់ស្រី។ គេពិបាកនឹងវាស់ស្ទង់បានកម្រិតសម្រើបដល់កំពូលនៃការរួមរ័ករបស់ស្ត្រីណាស់។ ប្រសិនបើជឿលើគំរូសម្ដែងតាមខ្សែភាពយន្ដ គឺសម្រើបកំពូលក្នុងពេលរួមរ័កតែងតែគួបផ្សំជាមួយសញ្ញាប្រែប្រួលរបស់ទឹកមុខ ឬសម្រែកថ្ងូរ។ អាស្រ័យហេតុនេះនារីខ្លះក៏ភាន់ច្រឡំថា ខ្លួនមិនដែលមានអារម្មណ៍បានសុខស្រួល ឬមិនធ្លាប់មានសម្រើបដល់កំពូល ពីព្រោះពេលខ្លួនមានសម្រើប គេមិនធ្លាប់បានស្រែកថ្ងូរអ្វីសោះដូចក្នុងសាច់រឿងនោះឡើយ។

ក្រុមអ្នកជំនាញបានបញ្ជាក់ច្បាស់ថា នារីភាគច្រើនមានចំណុចសម្រើបខ្លាំងនៅខាងលើបបូរមាត់យោនី និង សិ (Clitoris) ជាងនៅតាមទ្វារមាស (Vaginal) ។ សម្រើបរបស់ទ្វារមាសច្រើនតែកើតមាននៅពេលក្រោយពេលរួមរ័ក ជួនកាលនៅពេលវ័យឈានដល់ខ្ទង់40ឆ្នាំប្លាយទើបនារីបានដឹងច្បាស់ ខណៈដែលពួកគេមិនអាចបកស្រាយឱ្យច្បាស់ថាបណ្តាលមកពីហេតុអ្វីនោះទេ។ អាស្រ័យដោយខ្វះការយល់ដឹង ទើបគូស្វាមីភរិយាខ្លះបានខ្ជះខ្ជាយពេលវេលានៅក្នុងជីវភាពរួមរ័កដោយអចេតនា ដែលកាន់តែធ្វើឱ្យជីវភាពសិចសោះអង្គើយជារៀងរហូតទៅ។ បញ្ហាសំខាន់មិនមែនរបៀបសម្ដែងរបស់នារីដែលមានសម្រើបដល់កំពូលនោះទេ តែគឺជាការពេញចិត្ដដែលកើតចេញពីសម្រើបឈានដល់កម្រិតកំពូល។ នៅពេលដែលទីតាំងនៃសម្រើបបានឈានដល់កម្រិតកំពូលដែលស្ថិតនៅក្នុងខួរក្បាលត្រូវទទួលឥទ្ធិពល វានឹងបញ្ចេញជាតិ Endorphines ដែលជាវត្ថុពិសេសបង្កើតឱ្យមានភាពសុខក្សេមក្សាន្ដ។

ជំងឺគ្មានអារម្មណ៍រួមរ័កអាចកើតឡើងដោយមូលហេតុមួយចំនួនដូចជា អ្នកខ្លះធ្លាប់ជួបប្រទះនឹងបញ្ហា ខណៈពេលឈានចូលដល់ដំណាក់កាលយុវវ័យក៏ត្រូវបាត់បង់អស់សមត្ថភាពរួមរ័ក ហើយគ្រប់ការប៉ះពាល់រាងកាយក៏មិនបានបង្កើតឱ្យមានអារម្មណ៍ដែរ។ ក្នុងករណីនេះ រឿងរួមរ័កក៏ត្រូវចាត់ទុកថាជារឿងស្មោកគ្រោក និងគួរឱ្យមាក់ងាយ។ ជួនកាលជំងឺគ្មានអារម្មណ៍ ក៏កើតចេញពីការប៉ះពាល់គ្នាជាលើកដំបូង ហើយច្រើនតែត្រូវបកស្រាយថា ដោយសារអ្នកទាំងពីរខ្វះបទពិសោធ។ ពួកគេមិទាន់យល់ពីសារៈសំខាន់របស់ឥរិយាបថក្នុងពេលរួមរ័កជាលើកដំបូងនៅឡើយ។ នារីខ្លះកើតមានជំងឺគ្មានអារម្មណ៍ប្រភេទនេះក្រោយពេលសម្រាលកូន (ដែលអូសបន្លាយ និងដោយសារមានជំងឺផ្សេងៗ) និងអាស្រ័យដោយមានការប្រែប្រួលភ្លាមៗនៅម្ដុំឆ្អឹងត្រគាក ប៉ុន្ដែការគ្មានអារម្មណ៍ក្រោយពេលសម្រាលកូននេះវាមិនអាចស្ថិតស្ថេរយូរអង្វែងឡើយ។ វេជ្ជបណ្ឌិត Bensimhon មានមតិថា មុនដំបូងគេត្រូវគិតទៅដល់មូលហេតុច្របូកច្របល់របស់រាងកាយ។ មូលហេតុខ្លះដោយសារអ័រម៉ូន (Hormone) ឧទាហរណ៍ដូចជាដំណាក់កាលក្រោយពេលអស់រដូវ ដោយមានការប្រែប្រួលសរសៃប្រសាទ ឬដោយជំងឺទឹកនោមផ្អែម ឬក៏ការប្រើប្រាស់ឱសថខុស ឬច្រើនពេកដូចជា ការប្រើថ្នាំខាងសរសៃប្រសាទជាដើម។

យ៉ាងណាក៏ដោយ ជាដំណោះស្រាយ ស្ត្រីដែលបានជួបនឹងបញ្ហាខាងលើនេះ អាចព្យាយាមស្វែងយល់បន្ថែមពីខ្លួនឯងនូវចំណុច ក៏ដូចជាទីតាំងណាមួយជាតំបន់ផ្ដល់រំញោច និងសម្រើបដែលផ្ដល់ផលល្អក្នុងជីវិតសិច។ បន្ថែមពីនេះ ស្ត្រីទាំងអស់ក៏គួរតែមានភាពក្លាហានក្នុងការនិយាយដោយត្រង់ជាមួយដៃគូ ក៏ដូចជាស្វែងរកការប្រឹក្សាសុំយោបល់ល្អៗពីអ្នកជំនាញ ឬវេជ្ជបណ្ឌិតឯកទេសជាជំនួញ៕

March 2, 2020

Category: សុខភាព