ប្រធានាធិបតីអ៊ុយក្រែន លោក ហ្សេឡែនស្គី និងក្រុមមន្ត្រីបរទេសមួយចំនួន បានរិះគន់ អ៊ីឡុន ម៉ាស បន្ទាប់ពីមហាសេដ្ឋីរូបនេះបានបង្ហោះសារលើ Twitter ស្នើឱ្យធ្វើសាធារណមតិចំពោះសន្តិភាពសម្រាប់ អ៊ុយក្រែន។
មហាសេដ្ឋីអាម៉េរិកដើមកំណើតអាហ្វ្រិកខាងត្បូង លោក អ៊ីឡុន ម៉ាស (Elon Musk) កាលពីថ្ងៃទី ០៣ តុលា បានបង្ហោះសារលើ Twitter ស្នើឱ្យទទួលស្គាល់ថា ឧបទ្វីបគ្រីមៀ គឺជាទឹកដីរបស់ រុស្ស៊ី និងយល់ថា អ៊ុយក្រែន គួរតែរក្សាអព្យាក្រឹតភាព ហើយក្រោយមកក៏បានអំពាវនាវឱ្យអ្នកលេងបណ្ដាញសង្គម Twitter បោះឆ្នោត «យល់ព្រម» ឬ «ប្រឆាំង» ចំពោះដំណោះស្រាយនេះ។
ប្រធានាធិបតីអ៊ុយក្រែន លោក ហ្សេឡែនស្គី ក្រោយមកក៏បានរិះគន់ចំពោះលោក ម៉ាស នៅលើ Twitter។ «អស់លោកចូលចិត្ត អ៊ីឡុន ម៉ាស មួយណាជាង?» លោក ហ្សេឡែនស្គី សរសេរដូច្នេះ និងលើកជម្រើសពីរសម្រាប់ឱ្យជ្រើសរើស នោះគឺ «ម៉ាស គាំទ្រ រុស្ស៊ី» និង «ម៉ាស គាំទ្រ អ៊ុយក្រែន»។
លោក អ៊ីឡុន ម៉ាស បន្តស្នើឱ្យធ្វើប្រជាមតិដែលមានការត្រួតពិនិត្យរបស់ អង្គការសហប្រជាជាតិ នៅលើ ឧបទ្វីបគ្រីមៀ រួមនឹងខេត្តចំនួន ៤ ទៀតដែល រុស្ស៊ី ទើបតែរឹបអូសពី អ៊ុយក្រែន។ «ក្ដីប្រាថ្នារបស់ប្រជាជនរស់នៅក្នុងតំបន់ Donbass និង គ្រីមៀ (Crimea) នឹងសម្រេចថា ពួកគេគឺជាមួយផ្នែករបស់ រុស្ស៊ី ឬ អ៊ុយក្រែន។ រុស្ស៊ី នឹងចាកចេញ បើសិននោះគឺជាការចង់បានរបស់ប្រជាជន» លោក ម៉ាស សរសេរបន្ថែម។
«ទៅឱ្យបាត់ទៅគឺជាការឆ្លើយតបប្រកបដោយការទូតរបស់ខ្ញុំ ផ្ញើចំពោះ អ៊ីឡុន ម៉ាស» ឯកអគ្គរដ្ឋទូតអ៊ុយក្រែន ប្រចាំ ប្រទេសអាល្លឺម៉ង់ Andriy Melnyk ថ្លែងដូច្នេះ។
ប្រធានាធិបតីលីទុយអានី Gtanas Nauseda ឆ្លើយតបនឹង អ៊ីឡុន ម៉ាស ថា «ផ្ញើទៅកាន់លោក អ៊ីឡុន ម៉ាស នៅពេលអ្នកណាមួយលួចកង់ឡាន Tesla គេនោះមិនក្លាយជាម្ចាស់កម្មសិទ្ធិស្របច្បាប់របស់កង់ឡាន ឬឡាននោះឡើយ សូម្បីតែនៅពេលរបស់ទាំងពីរនេះបោះឆ្នោតគាំទ្រប្រកាសនោះ។ ខ្ញុំគ្រាន់តែនិយាយប៉ុណ្ណេះទេ»។
លោក អ៊ីឡុន ម៉ាស សរសេរថា «បើសិនជាយកចិត្តទុកដាក់ចំពោះជនជាតិអ៊ុយក្រែន ចូរតាមរកសន្តិភាព»។ លោកបន្តថា «SpaceX ចំណាយប្រាក់ផ្ទាល់ខ្លួន ៨០ លានដុល្លារ ដើម្បីដំឡើង និងផ្ដល់ជំនួយតាមរយៈប្រព័ន្ធ អ៊ីនធើរណិត Starlink នៅ អ៊ុយក្រែន។ កម្រិតជំនួយរបស់យើងខ្ញុំសម្រាប់ រុស្ស៊ី គឺ ០ ដុល្លារ។ ជាក់ច្បាស់ណាស់ថា យើងខ្ញុំគាំទ្រ អ៊ុយក្រែន»៕
