អន្តរជាតិ - La Reine Media

ពិភពលោកសម្រេចបាន «កិច្ចព្រមព្រៀងសន្តិភាពជាមួយធម្មជាតិ»

បណ្ដាប្រទេសបានយល់ព្រមចុះហត្ថលេខាលើ «កិច្ចព្រមព្រៀងសន្តិភាពជាមួយធម្មជាតិ» ដើម្បីប្រែត្រលប់ការបំផ្លិចបំផ្លាញចំពោះបរិស្ថាន និងប្រព័ន្ធជីវសាស្ត្រទូទាំងសកលលោកដែលបានកើតឡើងរាប់ទសវត្សរ៍កន្លង។

ក្រៅការចរចាប្រកបដោយភាពតានតឹង 4 ឆ្នាំ ប្រទេសជាង 190 បានជួបភិភាក្សាគ្នានៅក្នុងសន្និសីទកំពូលស្ដីពីជីវចម្រុះ COP15 របស់ អង្គការសហប្រជាជាតិ ដែលចិនធ្វើជាអ្នកសម្របសម្រួល និងត្រូវបានធ្វើឡើងនៅ ប្រទេសកាណាដា ដើម្បីសង្គ្រោះតំបន់ដីគោក មហាសមុទ្រ និងជីវិតនៅលើផែនដីពីការបំពុលបរិស្ថាន ឱនភាព និងវិបត្តិអាកាសធាតុ។

ក្នុងកិច្ចប្រជុំកំពូលកាលពីព្រឹកថ្ងៃទី 19 ធ្នូ 2022 រដ្ឋមន្ត្រីក្រសួងបរិស្ថាន និងអេកូឡូស៊ីចិន Huang Runqiu ប្រធាន COP15 ប្រកាសថា «សន្ធិសញ្ញាសន្តិភាពជាមួយធម្មជាតិ» ត្រូវបានអនុម័ត បើទោះមានការជំទាស់ពី សាធារណរដ្ឋកុងហ្កោ ជាប្រទេសដែលស្នើឱ្យមានការផ្ដល់ជំនួយបន្ថែមទៀតសម្រាប់បណ្ដាប្រទេសកំពុងអភិវឌ្ឍ។

មេដឹកនាំរបស់ សហភាពអឺរ៉ុប (EU) Ursul von der Leyen ឱ្យដឹងថា កិច្ចព្រមព្រៀងនេះគឺជា «គ្រឹះសម្រាប់សកម្មភាពសកលស្ដីពីជីវចម្រុះ ជាការបំពេញបន្ថែមពីលើកិច្ចព្រមព្រៀងទីក្រុងបារីស ស្ដីពីអាកាសធាតុ»។

ប្រធានាធិបតីអាម៉េរិក ចូ បៃដិន ក៏បានគាំទ្រកិច្ចព្រមព្រៀងនេះ ខណៈដែលអ្នកនាំពាក្យរបស់ ក្រសួងការបរទេសអាម៉េរិក Ned Price លើកសរសើរថា នេះគឹជាកិច្ចព្រមព្រៀងប្រកបដោយ «ភាពសកល និងមហិច្ឆតា»។

«សន្ធិសញ្ញាសន្តិភាពជាមួយធម្មជាតិ» នេះសន្យាថា ការពារផ្ទៃដីបៃតងចំនួន 30% នៅឆ្នាំ 2030 ដោយផ្ដល់ប្រាក់ជំនួយប្រចាំឆ្នាំចំនួន 30 ពាន់លានដុល្លារសម្រាប់ពិភពលោកដែលកំពុងអភិវឌ្ឍ និងទប់ស្កាត់ការផុតពូជរបស់ប្រភេទសត្វ រុក្ខជាតិដែលរងការគំរាមកំហែងដោយសារមនុស្ស។ កិច្ចព្រមព្រៀងនេះក៏សន្យាថា ការពារសិទ្ធិរបស់ប្រជាជនមូលដ្ឋានក្នុងនាមជាអ្នកគ្រប់គ្រងតំបន់ដីរបស់ពួកគេ។

គោលដៅដែលគួរឱ្យចាប់អារម្មណ៍ដទៃទៀតក្នុងកិច្ចព្រមព្រៀងនេះ រួមមាន ការសំច័យរាប់រយពាន់លានដុល្លារអាម៉េរិក តាមរយៈការកាត់បន្ថយជំនួយផ្នែកកសិកម្មដែលបង្កផលអាក្រក់ដល់បរិស្ថាន ការកាត់បន្ថយហានិភ័យពីថ្នាំការពារដំណាំ និងការដោះស្រាយបញ្ហាសត្វចង្រៃ។

អ្នកគ្រប់គ្រងរបស់ អង្គការយុទ្ធនាការសម្រាប់ធម្មជាតិ Brian O’Donnell បានហៅកិច្ចព្រមព្រៀងនេះថាជា «ការសន្យាការពារមហាសមុទ្រ និងដីគោកធំបំផុតក្នុងប្រវត្តិសាស្ត្រ»។

ក្រុមអ្នកជំនាញផ្នែកបរិស្ថានបានប្រៀបប្រដូចកិច្ចព្រមព្រៀងនេះទៅនឹងផែនការសម្រាប់របត់ថ្មីដើម្បីកាត់បន្ថយការកើនឡើងកម្ដៅនៅទូទាំងសកលលោកក្នុងកម្រិត 1.5 អង្សាសេ ទៅតាមកិច្ចព្រមព្រៀងទីក្រុងបារីសស្ដីពីអាកាសធាតុឆ្នាំ 2015 បើទោះអ្នកជំនាញខ្លះព្រមានថា វាមិនទាន់គ្រប់គ្រាន់៕

រដ្ឋមន្ត្រីក្រសួងបរិស្ថាន និងអេកូឡូស៊ីចិន Huang Runqiu ប្រធាន COP15

December 20, 2022

ដោយសារព្រឹលធ្លាក់ក្រាស់ខ្លាំងពេក ចរាចរណ៍នៅមូស្គូ ត្រូវកកស្ទះ

រដ្ឋធានីមូស្គូ កាលពីថ្ងៃទី 18 ធ្នូ បានរងផលប៉ះពាល់ធ្ងន់ធ្ងរដោយសារព្រឹលធ្លាក់ច្រើនជាងពេលណាៗទាំងអស់ នាំឱ្យជើងហោះហើរជាច្រើននៅតាមបណ្ដាព្រលានយន្តហោះត្រូវពន្យារពេល ឬលុបចោល បណ្ដាលឱ្យមានការកកស្ទះចរាចរណ៍។

នៅក្នុងតំបន់ជាច្រើននៃ រដ្ឋធានីមូស្គូ របស់ ប្រទេសរុស្ស៊ី ព្រឹលធ្លាក់ក្រាស់រហូតដល់ 40 សម ដែលជាកម្រិតខ្ពស់បំផុតរាប់ចាប់ពីឆ្នាំ 1989 រហូតដល់បច្ចុប្បន្ន។

ដើម្បីរក្សា និងធានាដល់រាល់សកម្មភាពប្រចាំថ្ងៃ អាជ្ញាធរក្រុងមូស្គូ បានប្រើប្រាស់កម្មករជិត 120,000 នាក់នៅក្នុងការដោះស្រាយបញ្ហាឈូសឆាយព្រឹល។

ប្រធាននាយកដ្ឋានឧតុនិយមរុស្ស៊ី Roman Vilfand បញ្ជាក់ថា នេះគឺជាការធ្លាក់ព្រឹលក្រាស់បំផុតក្នុងអំឡុង 80 ឆ្នាំមកនេះ។ កំណត់ត្រាមុននោះបានកើតឡើងកាលពីឆ្នាំ 1941 នៅពេលព្រឹលធ្លាក់កម្រាស់ដល់ 34 សមនៅ មូស្គូ។

ជើងហោះហើរជាង 100 ត្រូវបានពន្យារពេល ឬលុបចោលនៅតាមអាកាសយានដ្ឋានមួយចំនួន មានដូចជា Domodedovo, Sheremetyevo និង Nvukovo នៅ រដ្ឋធានីរបស់ រុស្ស៊ី៕

December 19, 2022

រាជធានីតូក្យូ ៖ ផ្ទះដែលសង់ថ្មីចាប់ពីឆ្នាំ 2025 ត្រូវតែបំពាក់ផ្ទាំងសូឡា

រាល់ផ្ទះថ្មីនៅ រាជធានីតូក្យូ ប្រទេសជប៉ុន ដែលសាងសង់ដោយក្រុមហ៊ុនធំៗ ក្រោយខែមេសា 2025 ត្រូវតែបំពាក់ផ្ទាំងសូឡាដើម្បីកាត់បន្ថយបរិមាណឧស្ម័នកាបូនរបស់គ្រួសារនានា។

នេះគឺជាខ្លឹមសារនៅក្នុងសេចក្ដីកំណត់ថ្មីដែលត្រូវបានក្រុមប្រឹក្សាភិបាលរាជធានីរបស់ ជប៉ុន អនុម័តកាលពីថ្ងៃទី 15 ធ្នូ 2022។

យោងតាមអាជ្ញាធរជប៉ុន ការកំណត់ថ្មីនេះតម្រូវឱ្យបណ្ដាក្រុមហ៊ុនសំណង់ធំៗប្រហែល 50 ស្ថាប័ន បំពាក់ប្រភពថាមពលកកើតឡើងវិញ (ភាគច្រើនគឺផ្ទាំងសូឡា) ទៅលើដំបូលផ្ទះ អគារថ្មីដែលមានទំហំចាប់ពី 2,000 ម៉ែត្រក្រឡា។

អភិបាលក្រុងតូក្យូ លោកស្រី Koike Yuriko បានឱ្យដឹងថា អាជ្ញាធរកំណត់គោលដៅកាត់បន្ថយការបំភាយឧស្ម័នផ្ទះកញ្ចក់ឱ្យបានពាក់កណ្ដាលនៅឆ្នាំ 2030 ធៀបនឹងឆ្នាំ 2020។

ជប៉ុន ដែលជាប្រទេសបំភាយឧស្ម័នកាបូនច្រើនជាងគេលំដាប់ទី 5 លើពិភពលោក បានសន្យាថា នឹងសម្រេចឱ្យបាននូវអព្យាក្រឹតភាពកាបូននៅឆ្នាំ 2050៕

December 19, 2022

(World Cup 2022)- មេដឹកនាំបណ្ដាប្រទេស ចូលរួមអបអរសាទរ ចំពោះ អាហ្សង់ទីន

មេដឹកនាំប្រទេសមួយចំនួនបានចូលរួមអបអរសាទរភ្លាមៗចំពោះ អាហ្សង់ទីន ដែលដណ្ដើមបានជ័យជម្នះនៅក្នុងការប្រកួតបាល់ទាត់ពិភពលោក World Cup នៅ កាតា និងលើកពានជើងឯក បន្ទាប់ពីបានយកឈ្នះ បារាំង។

«ប្រធានាធិបតី វ្ល៉ាឌីមៀ ពូទីន ទើបតែបានពិភាក្សាតាមទូរស័ព្ទជាមួយនឹង ប្រធានាធិបតីអាហ្សង់ទីន Alberto Fernandez និងអបអរសាទរដល់លោក នៅពេលក្រុមជម្រើសជាតិអាហ្សង់ទីន ក្លាយជាជើងឯក FIFA World Cup» អ្នកនាំពាក្យវិមានក្រឹមឡាំង Dmitry Peskov បានឱ្យដឹងដូច្នេះកាលពីថ្ងៃទី 18 ធ្នូ ក្នុងប្រកាសស្ដីពីការហៅទូរស័ព្ទទៅអបអររបស់ ប្រធានាធិបតីរុស្ស៊ី ចំពោះសមភាគីអាហ្សង់ទីន។

នាយករដ្ឋមន្ត្រីឥណ្ឌា Narendra Modi ក៏បាន tag ប្រធានាធិបតីអាហ្សង់ទីន Fernandez ទៅក្នុងសារអបអរសាទរនៅលើ Twitter ផងដែរ។ «…អបអរសាទរ អាហ្សង់ទីន ដែលបានក្លាយជាជើងឯក! …ពលរដ្ឋឥណ្ឌា រាប់លាននាក់ដែលជាអ្នកគាំទ្រ អាហ្សង់ទីន និង Messi សុទ្ធតែសប្បាយរីករាយជាមួយនឹងជ័យជម្នះដ៏អស្ចារ្យនេះ» លោក Modi សរសេរដូច្នេះ។

ប្រធានាធិបតីតួកគឺ Recep Tayyip Erdogan ក៏សម្ដែងការអបអរសាទរដល់ប្រជាជន និងក្រុមបាល់ទាត់ជម្រើសជាតិរបស់ អាហ្សង់ទីន។ លោកបានហៅការប្រកួតរវាង អាហ្សង់ទីន និង បារាំង ថាជា «ការប្រកួតវគ្គផ្ដាច់ព្រ័ត្រមួយដែលតានតឹងបំផុតក្នុងប្រវត្តិសាស្ត្រ»។

លោក Erdogan បានទៅទស្សនាការប្រកួតនេះដោយផ្ទាល់ តាមការអញ្ជើញរបស់ មហាក្សត្រកាតា។ លោក Erdogan អង្គុយទស្សនាការប្រកួតជាមួយនឹងក្សត្រា al-Thani, ប្រធានាធិបតីបារាំង Macron និងប្រធាន FIFA Gianni Infantino។

ប្រធានាធិបតិទើបជាប់ឆ្នោតរបស់ ប្រេស៊ីល Luiz Inacio Lula da Silva ក៏បានចូលរួមអបអរសាទរជ័យជម្នះរបស់ អាហ្សង់ទីន។ ចំណែក ប្រធានាធិបតីបារាំង វិញ ថ្វីបើស្រពោនចិត្តព្រោះតែ បារាំង ចាញ់ ប៉ុន្តែក៏បានអបអរសាទរចំពោះ អាហ្សង់ទីន ផងដែរ។

ក្រុមបាល់ទាត់ជម្រើសជាតិអាហ្សង់ទីន បានលើកពានជើងឯក World Cup 2022 ដោយបានយកឈ្នះលើ បារាំង 4-2 ក្នុងការប្រកួតទាត់ប៉េណាំងទី បន្ទាប់ពីមានលទ្ធផល 3-3 ក្នុង 2 តង់នៅវគ្គផ្ដាច់ព្រ័ត្រកាលពីយប់មិញ (18 ធ្នូ 2022)។ នេះគឺជាពានជើងឯកទីបីដែល អាហ្សង់ទីន ដណ្ដើមបាន បន្ទាប់ពីបានក្លាយជាជើងឯក World Cup 1978 និង 1986៕

December 19, 2022

ឥណ្ឌូណេស៊ី ផ្ដល់ជំនួយសម្រាប់ពលរដ្ឋដែលប្រើប្រាស់យានយន្តអគ្គិសនី

ការផ្ដល់ជំនួយសម្រាប់ពលរដ្ឋដែលប្រើប្រាស់យានយន្តអគ្គិសនីនេះ គឺជាផ្នែកមួយក្នុងគម្រោងកាត់បន្ថយការបំភាយឧស្ម័នកាបូនរបស់ប្រទេសអាស៊ីអាគ្នេយ៍មួយនេះ។

ដើម្បីលើកទឹកចិត្ត ក៏ដូចជាជំរុញឱ្យប្រជាពលរដ្ឋងាកទៅប្រើប្រាស់យានយន្តអគ្គិសនី រដ្ឋាភិបាលឥណ្ឌូណេស៊ី កំពុងមានផែនការផ្ដល់ជំនួយដល់អ្នកទាំងឡាយណាដែលទិញម៉ូតូអគ្គិសនីថ្មី និងរថយន្តអគ្គិសនីថ្មី។

ឥណ្ឌូណេស៊ី នឹងផ្ដល់ជំនួយ 80 លានរូពៀ ប្រហែលនឹង 5,000 ដុល្លារអាម៉េរិក សម្រាប់ពលរដ្ឋដែលទិញរថយន្តអគ្គិសនី, 40 លានរូពៀ ប្រហែលនឹង 2,500 ដុល្លារអាម៉េរិក សម្រាប់អ្នកទិញរថយន្តកូនកាត់ (អគ្គិសនី + សាំង) និង 8 លានរូពៀ ប្រហែលនឹង 500 ដុល្លារអាម៉េរិក សម្រាប់អ្នកទិញម៉ូតូអគ្គិសនី។

ក្រៅបីនេះ ឥណ្ឌូណេស៊ី ក៏នឹងផ្ដល់ជំនួយ 5 លានរូពៀ ប្រហែល 320 ដុល្លារអាម៉េរិក សម្រាប់អ្នកដែលព្រមប្ដូរម៉ូតូម៉ាស៊ីនចំហេះក្នុង ទៅជាម៉ូតូអគ្គិសនីផងដែរ។

កម្មវិធីខាងលើនេះអាចត្រូវបានចាប់ផ្ដើមអនុវត្តពីឆ្នាំ 2023។ ឥណ្ឌូណេស៊ី បានកំណត់គោលដៅមានម៉ូតូអគ្គិសនីយ៉ាងតិច 1.2 លានគ្រឿង និងរថយន្តអគ្គិសនី 35 ពាន់គ្រឿងនៅឆ្នាំ 2024៕

December 17, 2022

អាងតាំងបង្ហាញត្រីខ្នាតយក្សនៅ បែរឡាំង ផ្ទុះបែក បណ្ដាលឱ្យត្រីរាប់ពាន់ក្បាលលោតពេញផ្លូវ

អាងត្រីកម្ពស់ 14 ម៉ែត្រ និងមានត្រីកម្រប្រហែល 1,500 ក្បាលនៅ រដ្ឋធានីបែរឡាំង ប្រទេសអាល្លឺម៉ង់ បានបែកខ្ទេចកាលពីព្រឹកថ្ងៃទី 16 ធ្នូ ធ្វើឱ្យមនុស្សច្រើននាក់រងរបួស នេះបើតាមមន្ត្រីប៉ូលិស និងបុគ្គលិកពន្លត់អគ្គិភ័យនៅ បែរឡាំង។

អាងតាំងបង្ហាញត្រី AquaDom ស្ថិតនៅបរិវេណខាងមុខរបស់សណ្ឋាគារ Radisson Collection ក្នុងតំបន់កំសាន្ត និងពាណិជ្ជកម្ម DomAquaree។ ប៉ូលិសបានឱ្យដឹងថា ហេតុការណ៍នេះបានបណ្ដាលឱ្យមនុស្សយ៉ាងតិច 2 នាក់ត្រូវរងរបួស។

អង្គភាពពន្លត់អគ្គិភ័យរបស់សាលាក្រុង បានបង្ហោះនៅលើ Twitter ថា បុគ្គលិកពន្លត់អគ្គិភ័យ 100 នាក់ ត្រូវបានបញ្ជូនទៅកាន់កន្លែងកើតហេតុ។ ចំណែកអភិបាលក្រុងបែរឡាំង Franziska Giffey ក៏ឱ្យដឹងដែរថា ទឹកប្រហែល 1 លានលីត្រ បានខ្ចាយពីអាងត្រីនេះ។

អ្នកនាំពាក្យរបស់អង្គភាពពន្លត់អគ្គិភ័យ Adrian Wentzel និយាយថា ហេតុការណ៍ខាងលើបានកើតឡើងនៅវេលាម៉ោងជិត 06 ថ្ងៃទី 16 ធ្នូ 2022 (ម៉ោងក្នុងស្រុក)។

December 17, 2022

អាជ្ញាធរថៃ បំបែកសំបុកទទួលចាក់ភ្នាល់បាល់ទាត់ រឹបអូសបានប្រាក់រាប់លានដុល្លារ

ប៉ូលិសថៃ បានចាប់ខ្លួនមនុស្ស 31 នាក់ ដោយចោទថា គ្រប់គ្រងបណ្ដាគេហទំព័រចាក់ភ្នាល់បាល់ទាត់ឱ្យបណ្ដាញឧក្រិដ្ឋជនធំ ដោយមានប្រាក់ភ្នាល់ឡើងដល់ 1.2 ពាន់លានបាត។

អង្គភាពបង្ក្រាបឧក្រិដ្ឋកម្មបច្ចេកវិទ្យា (TCSD) នៃការិយាល័យជាតិស៊ើបអង្កេតរបស់ ប្រទេសថៃ បានឆែកឆេរទីតាំងចំនួន 2 នៅ បាងកក និង 5 ទីតាំងទៀតនៅខេត្តចន្ទបុរី បន្ទាប់ពីបានទទួលព័ត៌មានថា ទីតាំងទាំងនេះជាប់ពាក់ព័ន្ធនឹងបណ្ដាញចាក់ភ្នាល់បាល់ទាត់ខាងលើ។

មនុស្សចំនួន 31 នាក់ ក្នុងនោះមាន 22 នាក់ជាបុរស និង 9 នាក់ជាស្ត្រី ត្រូវបានចាប់ខ្លួននៅក្នុងការបង្ក្រាបរបស់អាជ្ញាធរនៅខណ្ឌ Bang Khen រាជធានីបាងកក និងស្រុក Muang របស់ខេត្តចន្ទបុរី។

ក្រុមមន្ត្រីថៃ បានឱ្យដឹងថា ក្រុមជនជាប់សង្ស័យខាងលើបានគ្រប់គ្រងគេហទំព័រទទួលចាក់ភ្នាល់បាល់ទាត់ខុសច្បាប់ចំនួន 20។ ប៉ូលិសក៏បានរឹបអូសកុំព្យូទ័រជាង 50 គ្រឿង និងរថយន្ត 3 គ្រឿង និងសាច់ប្រាក់ប្រហែល 70 លានបាត (ជាង 2 លានដុល្លារអាម៉េរិក)។

December 16, 2022

ស្ថានភាពអាសន្នផ្នែកសុខាភិបាលនៅទូទាំងសកលលោកដោយសារកូវីដ-19 អាចបញ្ចប់នៅឆ្នាំក្រោយ

នេះគឺជាប្រកាសដែលទើបត្រូវបានអង្គការសុខភាពពិភពលោកលើកឡើង នៅពេលជិតឈានចូលដល់ 3 ឆ្នាំ ដែលពិភពលោកបានប្រឈមនឹងការផ្ទុះឆ្លងរាលដាលជំងឺរលាកសួតកូវីដ-19 ដែលបង្កឡើងដោយវីរុស SARS-CoV-2។

ក្នុងសន្និសីទសារព័ត៌មានកាលពីម្សិលមិញនៅ ហ្សឺណែវ ប្រធានអង្គការសុខភាពពិភពលោក (WHO) លោក Tedros បានឱ្យដឹងថា តួលេខអ្នកស្លាប់ដោយសារកូវីដ-19 ប្រចាំសប្ដាហ៍ បើទោះជាស្ថិតនៅក្នុងកម្រិតខ្ពស់ ប៉ុន្តែ ស្មើនឹង 1/5 ប៉ុណ្ណោះ ធៀបនឹងមួយឆ្នាំមុន។ ប្រធាន WHO សង្ឃឹមថា អាចប្រកាសបញ្ចប់ស្ថានភាពអាសន្នផ្នែកសុខាភិបាលទូទាំងពិភពលោកដោយសារកូវីដ-19 នៅឆ្នាំក្រោយ។

តាមផែនការ គណៈកម្មាធិការគ្រាអាសន្នស្ដីពីកូវីដ-19 របស់ WHO នឹងពិភាក្សាអំពីគោលការណ៍ដើម្បីប្រកាសបញ្ចប់ស្ថានភាពអាសន្ននៅក្នុងកិច្ចប្រជុំរបស់ស្ថាប័ននេះនៅខែមករា 2023។

យោងតាម WHO បើទោះជាលទ្ធភាពនៃការផ្ទុះឆ្លងអាចនៅមានបន្ត ប៉ុន្តែ ជំងឺរាតត្បាតនេះនឹងមិនដូចគ្រាដំបូងទៀតឡើយ ដោយសារតែចំនួនអ្នកជំងឺត្រូវចូលពេទ្យ និងស្លាប់មានកម្រិតទាបជាងឆ្ងាយ៕

December 16, 2022

ឆេះអគារស្នាក់នៅក្នុងក្បែរទីក្រុង Lyon ប្រទេសបារាំង បណ្ដាលឱ្យមនុស្សច្រើននាក់ស្លាប់

យ៉ាងហោចណាស់មានមនុស្ស 10 នាក់ ក្នុងនោះមានកុមារ 5 នាក់ បានស្លាប់នៅក្នុងករណីអគ្គិភ័យឆាបឆេះអគារស្នាក់នៅមួយកន្លែងកាលពីព្រឹកថ្ងៃទី 16 ធ្នូ នៅតំបន់ Vaulx-en-Velin របស់ទីក្រុង Lyon ប្រទេសបារាំង។

សារព័ត៌មាន Reuters ដកស្រង់ប្រភពព័ត៌មានពីអាជ្ញាធរក្នុងតំបន់របស់ Lyon និង Rhone បានឱ្យដឹងថា មូលហេតុនៃអគ្គិភ័យនេះមិនទាន់ត្រូវបានដឹងនៅឡើយ។

ភ្លាមៗបន្ទាប់ពីមានអគ្គិភ័យ បុគ្គលិកសង្គ្រោះបន្ទាន់ និងក្រុមពន្លត់អគ្គិភ័យប្រហែល 170 នាក់ បានទៅដល់កន្លែងកើតហេតុ។

អគ្គិភ័យដែលបានកើតឡើងនៅវេលាព្រឹកព្រលឹមថ្ងៃទី 16 ធ្នូ នៅអគារស្នាក់នៅកម្ពស់ 7 ជាន់ ក្នុងតំបន់ Vaulx-en-Velin នេះ បានសម្លាប់មនុស្សយ៉ាងតិច 10 នាក់ ក្នុងនោះក៏មានកុមារ 5 នាក់។ ក្រៅពីនេះក៏មានអ្នករងរបួស 14 នាក់ផងដែរ។

December 16, 2022

យន្តហោះចម្បាំងបំបាំងកាយរបស់ អាម៉េរិក ដាំក្បាលចុះដី ពេលកំពុងចុះចត (វីដេអូ)

យន្តហោះចម្បាំង F-35 ជួបបញ្ហាពេលកំពុងសាកល្បងហោះបណ្ដែតខ្លួននៅឯរដ្ឋ Texas របស់ សហរដ្ឋអាម៉េរិក បណ្ដាលឱ្យក្បាលរបស់វាដាំចុះលើផ្លូវរត់ និងបាក់ឈ្នាន់កង់។

ហេតុការណ៍នេះបានកើតឡើងនៅឯមូលដ្ឋានទ័ពជើងទឹក Fort Worth ក្នុងរដ្ឋ Texas កាលពីថ្ងៃទី 15 ធ្នូ ពេលយន្តហោះបំបាំងកាយ F-35B ដែលផលិតដោយក្រុមហ៊ុនការពារជាតិ Lockheed Martin កំពុងហោះហើរសាកល្បង។

អំពីមូលហេតុដែលនាំឱ្យយន្តហោះនេះត្រូវជួបគ្រោះថ្នាក់ ក៏ដូចជាកម្រិតនៃការខូចខាតរបស់យន្តហោះនេះ មិនទាន់ត្រូវបានបង្ហើបឱ្យដឹងនៅឡើយ។

F-35B គឺជាកំណែដែលត្រូវបានអភិវឌ្ឍសម្រាប់កងម៉ារីនអាម៉េរិក។ យន្តហោះនេះអាចហោះឡើង និងចុះចតត្រង់ដូចទៅនឹងឧទ្ធម្ភាគចក្រ។ ក្រៅពីកងម៉ារីនអាម៉េរិក ប្រទេសមួយចំនួនដែលជាសម្ព័ន្ធមិត្តរបស់ ទីក្រុងវ៉ាស៊ីងតោន ក៏បានបញ្ជាទិញ និងកំពុងដាក់ឱ្យប្រើប្រាស់ F-35B នេះដែរ៕

December 16, 2022

Category: អន្តរជាតិ