អន្តរជាតិ - La Reine Media

ឥណ្ឌូនេស៊ីប្រកាសអាសន្នទូទាំងប្រទេស និងបញ្ចេញវិធានការជំនួយ សម្រាប់ពលរដ្ឋមានចំណូលទាប

ប្រធានាធិបតីឥណ្ឌូនេស៊ី បានប្រកាសអាសន្នទូទាំងប្រទេសអំពីវិបត្តិសុខភាពសាធារណៈ ដោយសារតែ COVID-19 ព្រមទាំងបានប្រកាសអំពីវិធានការនានា ដើម្បីជួយដល់ពលរដ្ឋដែលមានចំណូលទាបផងដែរ។

“យើងសម្រេចរឹតបន្តឹងទៅលើវិធានការនានាក្នុងសង្គមជាទ្រង់ទ្រាយធំ ដោយយោងទៅតាមមាត្រាទី6 នៃច្បាប់ស្ដីអំពីការត្រួតពិនិត្យផ្នែកសុខាភិបាលឆ្នាំ2018។ យើងក៏បានចេញបទបញ្ជារបស់រដ្ឋាភិបាលស្ដីអំពីការកំណត់មួយចំនួនក្នុងសង្គម ក៏ដូចជាបទបញ្ជារបស់ប្រធានាធិបតីអំពីស្ថានភាពអាសន្ន” ប្រធានាធិបតីឥណ្ឌូនេស៊ី Joko Widodo មានប្រសាសន៍បែបនេះ នៅក្នុងពេលប្រកាសអាសន្នទូទាំងប្រទេស ទៅលើ COVID-19 ក្នុងថ្ងៃនេះ។

ប្រធានាធិបតីឥណ្ឌូនេស៊ី អំពាវនាវឱ្យមេដឹកនាំតំបន់ និងមូលដ្ឋានទាំងអស់ ត្រូវគោរពទៅតាមការកំណត់ដែលកំពុងមានសុពលភាព ចៀសវាងការចេញបទបញ្ចេញដោយឡែកបន្ថែមទៀត។ លោកប្រធានាធិបតី Widodo ក៏បានឱ្យដឹងថា លោកបានបញ្ជាឱ្យកងកម្លាំងនគរបាល ចាប់ផ្ដើមអនុវត្តដោយស្របច្បាប់នូវបទបញ្ជានេះ ប៉ុន្តែលោកមិនបានបកស្រាយអំពីវិធានការដែលសមត្ថកិច្ចអាចនឹងអនុវត្តនោះដែរ។

លោក Widodo ក៏បានប្រកាសអំពីវិធានការជំនួយដល់ពលរដ្ឋមានប្រាក់ចំណូលទាប ដែលរងផលប៉ះពាល់ពី COVID-19 ក៏ដូចជាពីបទបញ្ជារបស់រដ្ឋាភិបាលផងដែរ ក្នុងនោះមានដូចជាការបង្កើនសេវាសុខុមាលភាពសង្គម ជំនួយជាស្បៀងអាហារ បញ្ចុះតម្លៃអគ្គិសនី និងលើកលែងពន្ធជាដើម។

ឥណ្ឌូនេស៊ី គឺជាសម្បុកមេរោគ COVID-19 ធំជាងគេលំដាប់ទី4 នៅក្នុងតំបន់អាស៊ីអាគ្នេយ៍ ដោយមានមនុស្សជាង1,400នាក់បានឆ្លងមេរោគ ប៉ុន្តែ ប្រទេសនេះ ក៏ជាទឹកដីដែលមានអ្នកស្លាប់ដោយសារវីរុសកូរ៉ូណា ច្រើនជាងគេបង្អស់ក្នុងតំបន់នេះផងដែរ ដោយមានអ្នកស្លាប់ដល់ទៅ122នាក់៕

ប្រភព៖ សារព័ត៌មានបរទេស

March 31, 2020

COVID-19! វៀតណាបិទច្រកព្រំដែនជាមួយកម្ពុជា និងឡាវ ខណៈតំបន់ឥណ្ឌូចិនមានអ្នកឆ្លងមេរោគកូរ៉ូណាជាង300ករណី

ប្រទេសវៀតណាមបានសម្រេចបិទច្រកព្រំដែនទៅ-មកជាបណ្ដោះអាសន្ន រវាងវៀតណាម-ប្រទេសកម្ពុជា និងវៀតណាម-ឡាវ ចាប់ពីថ្ងៃទី1មេសាខាងមុខ ដើម្បីរឹតបន្តឹងវិធានការទប់ស្កាត់វីរុសCOVID-19។

ការសម្រេចចិត្តខាងលើនេះ នឹងអនុវត្តទៅលើអ្នកដំណើរដែលឆ្លងកាត់ច្រកព្រំដែនអន្តរជាតិ ច្រករបៀង ផ្លូវលំ រួមនឹងផ្លូវផ្សេងៗទៀតនៅតាមតំបន់ព្រំដែនជាប់ជាមួយកម្ពុជា និងឡាវ ដោយចាប់ផ្ដើមបិទពីម៉ោង00:00:00នាទី ថ្ងៃទី1មេសាខាងមុខ។

សេចក្ដីប្រកាសរបស់ក្រសួងការបរទេសវៀតណាមខាងលើនេះ ត្រូវបានធ្វើឡើងកាលពីថ្ងៃទី31មីនាកន្លងទៅ និងបានផ្ញើមកកាន់ឯកអគ្គរាជទូតកម្ពុជាប្រចាំនៅប្រទេសវៀតណាមហើយដែរ។ នេះបើតាមសារព័ត៌មាន វៀតណាម VNEXPRESS។

សេចក្ដីប្រកាសខាងលើក៏បានឱ្យដឹងថា វៀតណាមមានបំណងចង់បានកិច្ចសហការពីប្រទេសកម្ពុជា និងឡាវ ដើម្បីអាចគ្រប់គ្រងវីរុសCOVID-19 បានឆាប់រហ័ស។

គួររំឭកថា ចាប់ពីថ្ងៃទី20មីនា ប្រទេសកម្ពុជាក៏បានផ្អាកការផ្ដល់ទិដ្ឋាការចំពោះពលរដ្ឋវៀតណាម រីឯប្រទេសឡាវក៏បានផ្អាកការផ្ដល់ទិដ្ឋាការចំពោះអ្នកដំណើរដែលមកពីគ្រប់ច្រកព្រំដែនទូទាំងប្រទេសនេះ ចាប់ពីថ្ងៃទី30មីនាដល់ថ្ងៃទី19មេសា។ ប្រទេសឡាវក៏បានបិទច្រកព្រំដែនជាមួយវៀតណាម ចាប់ពីថ្ងៃទី19មីនា ដល់ថ្ងៃទី20មេសាផងដែរ។

គិតមកដល់បច្ចុប្បន្ន វៀតណាមបានរកឃើញអ្នកផ្ទុកមេរោគCOVID-19 ចំនួន204ករណី ខណៈដែលកម្ពុជាមានចំនួន109ករណី និងឡាវមានចំនួន9ករណី។

COVID-19 បានបង្ហាញខ្លួននៅក្នុងប្រទេស និងដែនដីចំនួន200នៅទូទាំងពិភពលោក បណ្ដាលឱ្យមនុស្ស 786,608នាក់បានឆ្លងមេរោគ ក្នុងនោះមានអ្នកជំងឺ37,832បានស្លាប់ 166,088នាក់បានជាសះស្បើយ និង
អ្នកជំងឺប្រមាណជា29,513នាក់កំពុងប្រឈមនឹងការស្លាប់ នៅទូទាំងពិភពលោក៕

ប្រភព៖ សារព័ត៌មានបរទេស

March 31, 2020

មេរៀនដែលពិភពលោកមិនចងចាំ!! ពីចិន ឆ្ពោះទៅអ៊ីតាលី, បង្ខាំងជំងឺ “កូវីដ-19” ខុសឆ្គង ប្រទេសជាតិអាចរលំរលាយ…

ចំនួនអ្នកឆ្លងមេរោគកូវីដ-19 កើនធ្លុះដល់រាប់សែននាក់ ក្នុងរយៈពេលត្រឹមតែ 2ខែប៉ុណ្ណោះ ការណ៍នេះបញ្ជាក់បានយ៉ាងច្បាស់ថា ប្រទេសអ៊ីតាលីកំពុងបានទទួលមេរៀនដ៏សែនឈឺចាប់ ពីការឆ្លងរាលដាលរបស់មេរោគវីរុសកូរ៉ូណាប្រភេទថ្មី ហើយអ្នកជំនាញការជនជាតិចិន ដែលធ្លាប់ជួបនឹងវាសនាកម្មបែបដូចគ្នានេះពីមុនមក បានចេញមកចង្អុលបង្ហាញថា អ៊ីតាលីត្រូវងាកមកបង្ខាំងអ្នកជំងឺគ្រប់រូប ទោះជាមានអាការបន្តិចបន្តួចក៏ដោយ និងមិនគួរអនុញ្ញាតឱ្យពួកគេត្រឡប់ទៅបង្ខាំងខ្លួនឯងនៅឯផ្ទះឡើយ ព្រោះនេះជាទង្វើដែលមហានាគចិនធ្លាប់បានខុសឆ្គងពីមុនមក រហូតដល់ត្រូវខាតបង់យ៉ាងសែនធ្ងន់ធ្ងរ។

លោកវេជ្ជបណ្ឌិត លៀង សុង អាន់ ប្រធានផ្នែកប្រព័ន្ធផ្លូវដង្ហើម នៃមន្ទីពេទ្យ សេឈួន បានទទួលស្គាល់ថា ក្រុមគណៈគ្រូពេទ្យនៅក្នុងទីក្រុងវូហាន ធ្លាប់បានធ្វើខុសឆ្គងបែបដូចគ្នានេះរួចមកហើយ ក្នុងអំឡុងពេលដំបូងៗរបស់ការឆ្លងរាលដាល។ ដោយពីដំបូង មន្ទីរពេទ្យផ្សេងៗ នឹងទទួលតែអ្នកជំងឺដែលមានអាការធ្ងន់ធ្ងរប៉ុណ្ណោះ ចំណែកអ្នកជំងឺដែលមានអាការបន្តិចបន្តួច គណៈគ្រូពេទ្យនឹងណែនាំឱ្យត្រឡប់ទៅបង្ខាំងខ្លួនឯងនៅឯផ្ទះ ដើម្បីកាត់បន្ថយភាពតានតឹងខាងប្រព័ន្ធសាធារណៈសុខាភិបាលរបស់ទីក្រុងវូហាន ដែលទ្រាំទ្របន្ទុកលែងរួច។

នៅពេលនោះនៅមិនទាន់បានដឹងជាទូទៅគ្រប់គ្នាថា អ្នកឆ្លងមេរោគមួយចំនួន ស្ទើរតែគ្មានបង្ហាញអាការជំងឺអ្វីទាំងអស់ តែពេលនេះពួកអ្នកវិទ្យាសាស្ត្របានដឹងហើយថា អ្នកដែលមានអាការបន្តិចបន្តួច និងបានទទួលការណែនាំឱ្យទៅបង្ខាំងខ្លួននៅតែក្នុងផ្ទះនោះ បានក្លាយជាបុគ្គលដែលប្រថុយប្រថានក្នុងការចម្លងមេរោគទៅសមាជិកក្នុងគ្រួសារដោយខ្លួនឯង ដូចគ្នានឹងអ្នកឯទៀតដែលនៅក្រៅផ្ទះដែរ បើសិនជាអ្នកផ្ទុកមេរោគមួយចំនួននៅតែធ្វើដំណើរទៅណាមកណាតាមប្រក្រតីនោះ។

លោក ម៉ៃ រ៉ៃអាន់ នាយកគ្រប់គ្រងផ្នែកគ្រោងការក្នុងគ្រាអាសន្នរបស់អង្គការសុខភាពពិភពលោក បានប្រាប់ថា “ដោយសារតែវិធានការបិទទីក្រុង ករណីការចម្លងមេរោគភាគច្រើនដែលកើតឡើងមែនទែនក្នុងប្រទេសជាច្រើនក្នុងពេលនេះ វាកើតឡើងក្នុងកម្រិតគ្រួសារ” លោកបន្តថា “យើងចាំបាច់ត្រូវតែចុះទៅមើលនៅតាមផ្ទះគ្រួសារនីមួយៗ ដើម្បីស្វែងរកអ្នកសង្ស័យថាបានឆ្លងមេរោគ និងនាំមនុស្សទាំងនោះទៅបង្ខាំងជំងឺនៅកន្លែងដែលមានសុវត្ថិភាព និងមានកិត្តិយស”។

Corriere della sera សារព័ត៌មានប្រចាំថ្ងៃរបស់អ៊ីតាលី បានរាយការណ៍កាលពីថ្ងៃចន្ទ(ទី30មីនា)ថា តាមរយៈការចូលបង្ក្រាបកាលពីថ្ងៃសៅរ៍(ទី28មីនា)បានរកឃើញប្រជាជនប្រពឹត្តល្មើសនឹងវិធានការបិទទីក្រុងក្នុងចំនួនដ៏ច្រើន ក្នុងនោះរួមទាំងអ្នកឆ្លងមេរោគប្រមាណជា 50នាក់ទៀតផង ដែលការពិតទៅ មនុស្សទាំងនោះ គួរតែមានការបង្ខាំងខ្លួនឯងនៅតែក្នុងផ្ទះ មិនមែនដើរលេងតាមផ្លូវថ្នល់សេរីបែបនេះទេ។

វូហាន ចាប់ផ្ដើមបង្ខាំងអ្នកឆ្លងមេរោគដែលមានអាការបន្តិចបន្តួច គ្រប់ករណីនៅតាមទីស្នាក់ការ ទីលានបាល់ទាត់ និងកន្លែងហាត់ប្រាណធំៗ ដែលកែច្នៃទៅជាមន្ទីរពេទ្យបណ្ដោះអាសន្នក្នុងអំឡុងដើមខែកុម្ភៈ។ ជាសកម្មភាពដែលជួយកាត់បន្ថយការឆ្លងរាលដាលមេរោគបានយ៉ាងឆាប់រហ័ស រហូតទាល់តែគ្រប់គ្រងការឆ្លងរាលដាលបានសម្រេច។ ព័ត៌មានជាផ្លូវការចុងក្រោយបំផុត៖ បានរកឃើញអ្នកឆ្លងមេរោគថ្មី ត្រឹមតែបន្តិចបន្តួចប៉ុណ្ណោះ ខុសពីប្រទេសផ្សេងៗ ដែលមានចំនួនកាន់តែកើនឡើងជារឿយៗ។

លោកវេជ្ជបណ្ឌិត លៀង ប្រាប់ថា ក្រុមការងាររបស់លោក បានណែនាំឱ្យប្រទេសអ៊ីតាលីធ្វើតាមចិន ក្នុងការបង្ខំអ្នកជំងឺដែលមានអាការរោគបន្តិចបន្តួចឱ្យចាកចេញពីគ្រួសារ ព្រោះនៅក្នុងប្រទេសចិន លទ្ធផលនៃការសិក្សាស្រាវជ្រាវ បានរកឃើញថា នៅក្នុងមណ្ឌលមួយ 80%នៃក្រុមឆ្លងមេរោគ មានប្រភពឆ្លងពីអ្នកជំងឺដែលបានទទួលការណែនាំឱ្យត្រឡប់ទៅបង្ខាំងជំងឺនៅផ្ទះ។

ទោះជាក្រុមគ្រួសាររបស់ប្រជាជនទូទៅនៅក្នុងប្រទេសអ៊ីតាលី ស្នាក់អាស្រ័យនៅក្នុងអគារអាផាតមិនត៍ដែលមានភាពធំទូលាយជាងនៅក្នុងទីក្រុងវូហានមែនក៏ដោយ តែលោកវេជ្ជបណ្ឌិត លៀង បានប្រាប់ថា វាចាប់ផ្ដើមបង្ហាញភ័ស្តុតាងកាន់តែច្បាស់ឡើងៗជារឿយៗថា ទូទាំងគ្រួសារច្រើនតែឆ្លងមេរោគពីអ្នកជំងឺត្រឹមតែម្នាក់គត់ ដែលស្ថិតនៅកណ្ដាលពួកគេ ទោះជាព្យាយាមបង្ខាំងខ្លួនឯងនៅក្នុងបន្ទប់ដាច់ដោយឡែកតែឯងក៏ដោយ។

“យើងមិនអាចនិយាយបានថា វិធានការបង្ខាំងជំងឺនៅផ្ទះរបស់អ៊ីតាលីជារឿងត្រូវ ឬខុសឡើយ ព្រោះប្រទេសនីមួយៗមានយន្តការរបស់ខ្លួនឯង តែយើងបានរកឃើញបញ្ហាខ្លះៗ” លោក លៀវ នីង អ្នកវិភាគមកពីមជ្ឈមណ្ឌលគ្រប់គ្រង និងការពាររោគឆ្លងរបស់ចិន ជាផ្នែកមួយរបស់ក្រុមការងារ បានថ្លែង និងបង្ហើបឱ្យដឹងថា ពួកអ្នកជំនាញការអ៊ីតាលីខ្លួនឯង ក៏មិនអាចឆ្លើយបានដែរថា មានក្រុមអ្នកឆ្លងមេរោគច្រើន-តិចប៉ុនណា ដែលមានប្រភពកំណើតមកពីការបង្ខាំងជំងឺនៅក្នុងផ្ទះ។

ទីក្រុងមីឡាន ចាប់ផ្ដើមកែច្នៃសណ្ឋាគារជាច្រើនឱ្យទៅជាមជ្ឈមណ្ឌលបង្ខាំងជំងឺ សម្រាប់អ្នកជំងឺដែលមានអាការបន្តិចបន្តួច មួយនៅក្នុងចំណោមនោះ គឺជាសណ្ឋាគារខ្នាត 306បន្ទប់ ដែលត្រៀមនឹងប្រើការបានក្នុងសប្ដាហ៍នេះ និងត្រូវបានកែច្នៃទុកឱ្យអ្នកជំងឺ បំបែកខ្លួនចេញពីក្រុមគ្រួសារក្នុងអំឡុងការបង្ខាំងជំងឺ។

តួលេខអ្នកស្លាប់របស់ប្រទេសអ៊ីតាលីហក់ឡើងហួស 11,000នាក់ ខ្ពស់បំផុតក្នុងពិភពលោក និងមានអត្រាស្លាប់ច្រើនស្លាប់ជាងចិនជាង 2ដង ទោះជាមានការសង្ស័យថា តួលេខជាផ្លូវការរបស់ចិននេះ ជាព័ត៌មានពិតមែន ឬយ៉ាងណាក៏ដោយ។

ប្រធានគណៈកម្មការគ្រាអាសន្នរបស់ប្រទេសអ៊ីតាលី ប្រាប់ថា ចំនួនអ្នកឆ្លងមេរោគនៅក្នុងប្រទេស អាចច្រើនជាងតួលេខផ្លូវការ 10ដង តែខណៈពេលជាមួយគ្នា វាក៏ទាញឱ្យអត្រាការស្លាប់របស់ប្រទេស មានភាពស្មើគ្នានឹងប្រទេសផ្សេងៗដែរ។

លោកវេជ្ជបណ្ឌិត លៀង យល់ឃើញថា ចំនួនអ្នកស្លាប់ដែលខ្ពស់ ភាគច្រើនដោយសារតែអ៊ីតាលី ជាប្រទេសដែលមានចំណែកពលរដ្ឋវ័យចំណាស់ស្ថិតក្នុងកម្រិតខ្ពស់។ អ្នកខ្លះមិនព្រមទៅជួបគ្រូពេទ្យ ក្រោយមានលទ្ធផលពិនិត្យចេញមកថា វិជ្ជមាន និងបានស្លាប់នៅក្នុងផ្ទះ។ ចំណែកនៅឯប្រទេសចិន អ្នកស្លាប់ចំនួនដ៏ច្រើន មិនបានរាយកាណ៍ ដោយសារតែមន្ទីរពេទ្យនានាដែលណែនតាន់តាប់នៅក្នុងតំបន់ហ៊ូពេយ លែងអាចទទួលអ្នកជំងឺឱ្យដេកព្យាបាលបាន ទោះជាមនុស្សទាំងនោះ មានលទ្ធផលពិនិត្យកូវីដ-19 ចេញមក “វិជ្ជមាន” ក៏ដោយ៕

ប្រភព៖ សារព័ត៌មានបរទេស

March 31, 2020

New York សុំជំនួយបន្ទាន់! ព្រោះតែCOVID-19

អភិបាលរដ្ឋ New York លោក Cuomo អំពាវនាវសុំជំនួយផ្នែកសុខាភិបាលជាបន្ទាន់ ខណៈដែលចំនួនអ្នកស្លាប់ដោយសារ COVID-19 នៅទីនេះ បានកើនឡើងលើស1,200ករណី។

“សូមមេត្តាចូលមកជួយ New York ជាបន្ទាន់។ យើងបានបាត់បង់មនុស្សជាង1,000នាក់ហើយ។ ចំពោះខ្ញុំ គឺយើងបានឆ្លងមកដល់ចំណុចដែលលើសពីការគួរឱ្យខ្លាចទៅហើយ” អភិបាលរដ្ឋ New York លោក Andrew Cuomo មានប្រសាសន៍កាលពីថ្ងៃទី30មីនាកន្លងទៅ។

លោកអភិបាលរូបនេះបានឱ្យដឹងថា ចំនួនអ្នកស្លាប់ដោយសារវីរុសCOVID-19 នៅក្នុងរដ្ឋដែលលោកកាន់កាប់ គឺបានកើនជាង250នាក់បន្ថែមទៀតក្នុងរយៈពេលតែមួយថ្ងៃ ធ្វើឱ្យអ្នកស្លាប់សរុបឡើងដល់ជាង1,200នាក់។ លោក Cuomo ថ្លែងថា រដ្ឋ New York ត្រូវការបុគ្គលិកសុខាភិបាលប្រមាណជាង1លាននាក់បន្ថែមទៀត ដើម្បីដោះស្រាយបញ្ហាវិបត្តិសុខភាពនាបច្ចុប្បន្ន។ មន្ត្រីអាមេរិកាំងជាច្រើនរូបក៏បានព្រមានថា ស្ថានភាពនៅ New York នាពេលនេះ អាចជាសេណារីយ៉ោមួយដែលរដ្ឋផ្សេងៗទៀតនឹងត្រូវជួបប្រទះនាពេលដ៏ខ្លីខាងមុខ។

នៅមុនពេលអភិបាលរដ្ឋ New York បានអំពាវនាវដូចខាងលើ ក្រុមអ្នកជំនាញ រួមនឹងក្រុមវេជ្ជបណ្ឌិត និងបុគ្គលិកសុខាភិបាលជិត80,000នាក់នៅ New York បានស្ម័គ្រចិត្តចូលរួមធ្វើ “សង្គ្រាម” ប្រឆាំងនឹង COVID-19។ នាវាមន្ទីរពេទ្យ USNS Comfort ដែលមានគ្រែសម្រាប់អ្នកជំងឺចំនួន1,000គ្រែ ក៏ត្រូវបានបញ្ជូនទៅកាន់រដ្ឋនេះ កាលពីថ្ងៃទី30មីនាកន្លងទៅ ដើម្បីជួយកាត់បន្ថយស្ថានភាពលើសចំណុះរបស់បណ្ដាមន្ទីរពេទ្យក្នុងតំបន់។

នៅឯរដ្ឋ California វិញ ក្រុមមន្ត្រីក៏បានស្នើសុំដូចខាងលើនេះដែរ ដើម្បីដោះស្រាយបញ្ហា នៅពេលដែលចំនួនអ្នកជំងឺត្រូវចូលព្យាបាល បានកើនឡើងទ្វេដងក្នុងរយៈពេលត្រឹម4ថ្ងៃមកនេះ ហើយអ្នកជំងឺដែលត្រូវព្យាបាលជាពិសេស បន្ទាន់ក៏បានកើនឡើងជាង3ដងផងដែរ។

នេះគឺជាសញ្ញាបង្ហាញថា “សង្គ្រាម” ប្រឆាំងនឹង COVID-19 នឹងបន្តអូសសន្លាយពេលយូរតទៅទៀត ខណៈដែលវីរុសនេះបានរាលដាលដល់ប្រទេស និងដែនដីចំនួន200 នៅទូទាំងពិភពលោក ក្នុងនោះសហរដ្ឋអាមេរិកគឺជាសម្បុកមេរោគធំបំផុត។ ពលរដ្ឋអាមេរិកាំងប្រមាណជា235លាននាក់ ស្មើនឹង2/3នៃប្រជាជនសរុប កំពុងរស់នៅក្នុងបម្រាមគោចរ៕

ប្រភព៖ សារព័ត៌មានបរទេស

March 31, 2020

CDC ចិន និយាយថា ពលរដ្ឋ “អាមេរិក និងអឺរ៉ុប” ខុសធ្ងន់ណាស់ ដែលមិនពាក់ម៉ាស់អនាម័យការពារ…

អគ្គនាយកមជ្ឈមណ្ឌលគ្រប់គ្រង និងការពារជំងឺរបស់ប្រទេសចិន(CDC) បានថ្លែងថា ការជំរុញឱ្យប្រជាជនពាក់ម៉ាស់អនាម័យការពារ ពេលចេញទៅក្រៅផ្ទះ មានចំណែកជួយទប់ស្កាត់ការចម្លងសាយភាយរបស់មេរោគវីរុសកូរ៉ូណាប្រភេទថ្មីបានច្រើនណាស់ ហើយការដែលពលរដ្ឋនៅក្នុងប្រទេសអាមេរិក និងអឺរ៉ុប មើលរំលងវិធានការដ៏ងាយៗនេះ គឺជា “ភាពខុសឆ្គងដ៏ធ្ងន់ធ្ងរ” ដែលបានធ្វើឱ្យចំនួនអ្នកឆ្លងមេរោគនៅទីនោះ កើនឡើងយ៉ាងឆាប់រហ័ស។

សារព័ត៌មាន សៅ ឆាយណា ម៉រនីង ផូស្ត បានអះអាងពីការយល់ឃើញរបស់លោក កៅ ហ៊្វូ អគ្គនាយក CDC របស់ចិន ដែលបានផ្ដល់បទសម្ភាសជាមួយទស្សនាវដ្តី Science Magazine ថា “កំហុសឆ្គងដ៏ធ្ងន់ធ្ងររបស់ប្រទេសអាមេរិក និងអឺរ៉ុប នៅក្នុងទស្សនៈរបស់ខ្ញុំ គឺការដែលប្រជាជន មិននាំគ្នានិយមពាក់ម៉ាស់អនាម័យការពារ”។

លោក កៅ អធិប្បាយថា លម្អងទឹកតូចល្អិតៗដែលចេញពីប្រព័ន្ធដកដង្ហើមរបស់មនុស្ស និងការប៉ះពាល់ជិតស្និទ្ធ គឺជាបច្ច័យចម្បងក្នុងការចម្លងរោគ “លម្អងទឹកតូចល្អិតៗមានតួនាទីក្នុងការចម្លងមេរោគអាក្រក់ណាស់ ដូច្នេះពួកអ្នក ត្រូវពាក់ម៉ាស់អនាម័យការពារ ព្រោះពេលដែលអ្នកនិយាយ នឹងមានលម្អងទឹកតូចល្អិតៗចេញមកពីក្នុងមាត់របស់អ្នកគ្រប់ពេលវេលា”។

លោក កៅ បន្ថែមថា អ្នកខ្លះ អាចនឹងមានមេរោគវីរុសនៅក្នុងខ្លួនដោយមិនបានឈឺថ្កាត់ ឬមិនទាន់បង្ហាញអាការឈឺថ្កាត់ ដូច្នេះ ម៉ាស់អនាម័យអាចជួយការពារលម្អងទឹកតូចល្អិតៗពីមនុស្សទាំងនោះ ដែលអាចធ្វើឱ្យមេរោគអាចចម្លងទៅបុគ្គលដទៃទៀតបាន។

ទោះជាស្ថានការណ៍ការឆ្លងរាលដាលនៅក្នុងប្រទេសចិន ពេលនេះអាចនិយាយបានថា ល្អប្រសើរឡើងច្រើនហើយក្ដី តែ CDC របស់ចិន នៅតែអំពាវនាវ និងណែនាំកាលពីថ្ងៃទី22 មីនាកន្លងទៅ ឱ្យប្រជាជនត្រូវតែពាក់ម៉ាស់អនាម័យការពារបន្តទៀត មិនថានៅក្នុងអូហ្វ៊ីស ក្នុងបន្ទប់ប្រជុំ ក្នុងបន្ទប់ជណ្ដើរយន្ត ឬខណៈពេលប្រើសេវាកម្មដឹកជញ្ជូនសាធារណៈក៏ដោយ តែមិនចាំបាច់ពាក់ពេលនៅក្នុងផ្ទះ នៅក្នុងទីកន្លែងដែលធំស្រឡះៗ ឬក្នុងស្ថានភាពបរិស្ថានដែលមានខ្យល់អាកាសបក់ចេញចូលល្អ និងមិនមានមនុស្សច្រើនកុះករក៏បាន។

យ៉ាងណាក៏ដោយ ពាក្យណែនាំទាំងនេះ ហាក់ដូចជាផ្ទុយគ្នាពីការយល់ឃើញរបស់អង្គការសុខភាពពិភពលោក(WHO) ដែលបានបញ្ជាក់ថា ឱ្យមនុស្សពាក់ម៉ាស់អនាម័យការពារតែនៅពេលណាដែលមានអាការក្អក ឬកណ្ដាស់ ឬនៅពេលត្រូវនៅមើលថែទាំជិតអ្នកដែលត្រូវបានសង្ស័យថា ឆ្លងមេរោគកូវីដ-19 តែប៉ុណ្ណោះ។

ចំណែកឯក្រសួងសាធារណៈសុខាភិបាលរបស់ប្រទេសសិង្ហបុរី ក៏បានណែនាំដល់ប្រជាជនរបស់ខ្លួនដែរថា មិនចាំបាច់ត្រូវពាក់ម៉ាស់អនាម័យការពារជាប់ជានិច្ចនោះទេ លើកលែងតែ ពេលមានអាការមិនស្រួលខ្លួន មានគ្រុនក្ដៅខ្លួន ក្អក ហៀរសម្បោរ ឬទើបនឹងជាសះស្បើយពីជំងឺផ្សេងៗតែប៉ុណ្ណោះ៕

ប្រភព៖ សារព័ត៌មានបរទេស

March 31, 2020

មនុស្សជាង784,000នាក់បានឆ្លងវីរុសCOVID-19 នៅទូទាំងពិភពលោក

COVID-19 នៅតែបន្តឆ្លងរាលដាលខ្លាំងនៅទូទាំងពិភពលោក ពិសេសគឺអឺរ៉ុប និងសហរដ្ឋអាមេរិក ធ្វើឱ្យតួលេខនៃករណីឆ្លងសរុបឡើងដល់ជិត800,000នាក់ ក្នុងនោះមានជិត38,000នាក់បានបាត់បង់ជីវិត។

ពិភពលោកទាំងមូល មានអ្នកឆ្លងមេរោគCOVID-19 ចំនួន784,314ករណី និងស្លាប់ចំនួន37,638ករណី។ ទ្វីបអឺរ៉ុបមានអ្នកស្លាប់26,674ករណី គឺប្រមាណជា2/3 នៃអ្នកស្លាប់សរុប។ អ៊ីតាលីគឺជាប្រទេសដែលមានអ្នកស្លាប់ច្រើនជាងគេបង្អស់ក្នុងពិភពលោក។

សហរដ្ឋអាមេរិក៖ ប្រទេសនេះបានរកឃើញអ្នកជំងឺកូរ៉ូណាថ្មី 18,089ករណី និងស្លាប់412ករណីបន្ថែមទៀត ធ្វើឱ្យអ្នកជំងឺសរុបឡើងដល់163,807ករណី និងស្លាប់ឡើងដល់3,008ករណី។ ប្រទេសនេះ នៅតែបន្តជាសម្បុកមេរោគធំជាងគេក្នុងពិភពលោក។

អ៊ីតាលី៖ ប្រទេសនេះទើបបានរកឃើញអ្នកជំងឺថ្មី4,050ករណី និងស្លាប់812ករណីបន្ថែមទៀត។ ចំនួនអ្នកជំងឺសរុប101,739នាក់ និងស្លាប់សរុប11,591នាក់។ អត្រានៃការស្លាប់ដោយសារCOVID-19 នៅអ៊ីតាលី ជិតស្មើនឹង11.4% គឺខ្ពស់ជាងទ្វេដងបើធៀបនឹងអត្រានៃការស្លាប់ដោយសារវីរុសកូរ៉ូណានៅទូទាំងពិភពលោក។

អេស្ប៉ាញ៖ អ្នកជំងឺថ្មី7,846នាក់ អ្នកជំងឺសរុប87,956 នាក់ អ្នកស្លាប់ថ្មី913នាក់ អ្នកស្លាប់សរុប7,716នាក់។ តួលេខនេះបានធ្វើឱ្យអេស្ប៉ាញលោតរលងប្រទេសចិន ដើម្បីក្លាយជាសម្បុកមេរោគធំបំផុតទី3ក្នុងពិភពលោក។

អាល្លឺម៉ង់៖ អ្នកជំងឺថ្មី4,450នាក់ និងជំងឺសរុប66,885នាក់ អ្នកស្លាប់ថ្មី104នាក់ អ្នកស្លាប់សរុប645នាក់។ ប្រទេសនេះគឺជាសម្បុកមេរោគធំទី3នៅអឺរ៉ុប បន្ទាប់ពីអ៊ីតាលី និងអេស្ប៉ាញ។

អ៊ីរ៉ង់៖ ប្រទេសនេះបន្តជាសម្បុកមេរោគធំជាងគេលំដាប់ទី2នៅអាស៊ី ដោយមានអ្នកជំងឺថ្មី3,186នាក់ អ្នកជំងឺសរុប41,495នាក់ អ្នកស្លាប់ថ្មី117នាក់ និងអ្នកស្លាប់សរុប2,757នាក់។

ប្រទេសចិន និងកូរ៉េខាងត្បូង មិនទាន់ប្រកាសអំពីតួលេខពាក់ព័ន្ធនឹងវីរុសកូរ៉ូណានេះនៅឡើយ ប៉ុន្តែ តួលេខចុងក្រោយរបស់ចិនបង្ហាញថា មានអ្នកជំងឺសរុប81,518ករណី និងស្លាប់សរុប3,305ករណី។ ចំណែកប្រទេសកូរ៉េខាងត្បូងវិញ មានអ្នកជំងឺសរុបមាន9.661នាក់ និងអ្នកស្លាប់សរុប158នាក់។

តំបន់អាស៊ីអាគ្នេយ៍៖ ម៉ាឡេស៊ីជាសម្បុកមេរោគធំទី1ក្នុងតំបន់នេះ ដោយមានអ្នកជំងឺសរុប2,626នាក់ និងស្លាប់សរុប37នាក់។ ចំណែកឥណ្ឌូនេស៊ីវិញ បានក្លាយជា ”វាលពិឃាត” របស់ COVID-19 ធំបំផុតនៅក្នុងតំបន់នេះ ដោយមានអ្នកស្លាប់សរុប122នាក់ ក្នុងចំណោមអ្នកជំងឺ1,414នាក់ ហើយអត្រានៃការស្លាប់ដោយសារវីរុសនេះគឺ 8.6%។

ហ្វីលីពីន និងប្រទេសថៃ សុទ្ធតែមានអ្នកឆ្លងមេរោគលើសពី1,500នាក់ ប៉ុន្តែ ចំនួនករណីស្លាប់នៅប្រទេសទាំង2នេះ ខុសគ្នាឆ្ងាយណាស់ ពោលគឺហ្វីលីពីនមានអ្នកស្លាប់78នាក់ ចំណែកប្រទេសថៃមានតែ9នាក់។ COVID-19 បានបង្ហាញខ្លួននៅក្នុងប្រទេសទាំង11 នៃតំបន់អាស៊ីអាគ្នេយ៍នេះ៕

ប្រភព៖ សារព័ត៌មានបរទេស

March 31, 2020

មេដឹកនាំសង្គ្រាមប្រឆាំង COVID-19 បានឆ្លងវីរុស ខណៈអេស្ប៉ាញក្លាយជា “វាលពិឃាត” ទី2ក្នុងលោក របស់មេរោគបង្កជំងឺរលាកសួតថ្មី

មេដឹកនាំក្នុងសង្គ្រាមប្រឆាំង COVID-19 របស់អេស្ប៉ាញ បានឆ្លងវីរុសបង្កជំងឺរលាកសួតប្រភេទថ្មី ក្នុងខណៈដែលចំនួនអ្នកឆ្លងមេរោគសរុបនៅប្រទេសនេះ បានកើនឡើងលើសពីប្រទេសចិន។

“ប្រធានមជ្ឈមណ្ឌលចាត់ចែងករណីបន្ទាន់របស់ក្រសួងសុខាភិបាលអេស្ប៉ាញ លោក Fernando Simon វិជ្ជមានជាមួយនឹង COVID-19 បន្ទាប់ពីបានធ្វើតេស្ត” Maria Jose Sierra ដែលជាអនុប្រធានរបស់លោក Simon ថ្លែងបែបនេះ នៅក្នុងសន្និសីទសារព័ត៌មានមួយនៅឯរាជធានី Madrid កាលពីម្សិលមិញ។

លោកប្រធាន Simon គឺជាអ្នកដឹកនាំយុទ្ធនាការប្រយុទ្ធប្រឆាំងនឹង COVID-19 របស់រាជាណាចក្រអេស្ប៉ាញ និងជាអ្នកដែលតែងតែរក្សាទំនាក់ទំនងជាមួយនាយករដ្ឋមន្ត្រី Pedro Sanchez។ ប្រភពព័ត៌មានមិនបានឱ្យដឹងថា បច្ចុប្បន្នសុខភាពរបស់លោកយ៉ាងណាហើយនោះទេ។

អនុប្រធាន Sierra បានប្រកាសថា បុគ្គលិកពេទ្យចំនួន12,298នាក់បានឆ្លងមេរោគCOVID-19 គឺស្មើនឹង14% នៃចំនួនអ្នកឆ្លងមេរោគសរុបរបស់ប្រទេសអេស្ប៉ាញ។ ក្រុមគ្រូពេទ្យបានឱ្យដឹងថា ពួកគេកំពុងខ្វះសម្ភារការពារខ្លួន។

អេស្ប៉ាញ បច្ចុប្បន្នបានក្លាយជាប្រទេសដែលមានអ្នកស្លាប់ដោយសារមេរោគCOVID-19 ច្រើនជាគេបង្អស់លំដាប់ទី2ក្នុងពិភពលោក បន្ទាប់ពីប្រទេសអ៊ីតាលី ដោយមានអ្នកស្លាប់ដល់ទៅ7,340នាក់។

COVID-19 បានចាប់ផ្ដើមឆ្លងរាលដាលពីប្រទេសចិន កាលពីខែធ្នូ ឆ្នាំ2019 ហើយបានបង្ហាញខ្លួននៅក្នុងប្រទេស និងដែនដីចំនួន199 នៅទូទាំងពិភពលោក បណ្ដាលឱ្យមនុស្សចំនួន 741,030នាក់បានឆ្លងមេរោគ ក្នុងនោះមានអ្នកជំងឺ 35,114នាក់បានស្លាប់ និងជាង 28.000នាក់កំពុងប្រឈមនឹងការស្លាប់៕

ប្រភព៖ Reuters

March 30, 2020

បុគ្គលិកពេទ្យអាមេរិកាំង បានជួយឱ្យអ្នកជំងឺCOVID-19ជិតស្លាប់ម្នាក់ និងកូនចៅ បានលាគ្នាជាលើកចុងក្រោយ តាមរយៈទូរស័ព្ទ

គិលានុដ្ឋាយិកាម្នាក់នៅក្នុងរដ្ឋ Washington បានយកទូរស័ព្ទរបស់ខ្លួនភ្ជាប់ទៅកាន់កូនរបស់អ្នកជំងឺ COVID-19 ដើម្បីឱ្យពួកគេបានជួបមុខគ្នាជាលើកចុងក្រោយបង្អស់។

អ៊ំស្រី Carolann Gann អាយុ75ឆ្នាំ ធ្លាប់ធ្វើជាគិលានុបដ្ឋាកជាង30ឆ្នាំ បានធ្លាក់ខ្លួនឈឺនៅឯមជ្ឈមណ្ឌលចាស់ជរាមួយនៅ Issaquah ជាយក្រុង Seattle កាលពីសប្ដាហ៍មុន។ អ៊ំស្រីរូបនេះ បានទូរស័ព្ទទៅកូនស្រី ឈ្មោះ Michelle Bennett ដែលជានគរបាលជាន់ខ្ពស់ម្នាក់ ដើម្បីប្រាប់ថា បុគ្គលិកពេទ្យកំពុងធ្វើតេស្តរកមេរោគឱ្យគាត់។

បន្ទាប់មក គាត់ក៏ត្រូវបាននាំទៅកាន់មន្ទីរពេទ្យ ប៉ុន្តែសុខភាពរបស់គាត់ កាន់តែដុនដាបទៅៗ។ អ៊ំស្រី Gann បានបាត់បង់ជីវិតកាលពីថ្ងៃទី27មីនា ដោយពុំមានកូនចៅណាម្នាក់នៅក្បែរទាល់តែសោះ ព្រោះតែពួកគេមិនត្រូវបានអនុញ្ញាតឱ្យចូលក្នុងមន្ទីរពេទ្យ ដោយសារ COVID-19។

Bennett និយាយថា “ពិតជាមិនគួរឱ្យជឿសោះថា កាលពីសប្ដាហ៍មុន ម្ដាយរបស់ខ្ញុំនៅឯមជ្ឈមណ្ឌលថែទាំចាស់ជរា ហើយ7ថ្ងៃក្រោយ គាត់បែរជាទៅចោលខ្ញុំដូច្នេះសោះ។ ហេតុអីក៏រឿងនេះអាចកើតឡើងបាន?។ ម្ដាយខ្ញុំ បានទូរស័ព្ទប្រាប់ថា គាត់បានឆ្លង COVID-19។ ពេលនោះ ពិភពលោកហាក់ត្រូវបាក់រលំមកលើរូបខ្ញុំដូច្នោះដែរ”។

Bennett ដែលជាស្ត្រីភេទទី3ម្នាក់ ហើយប្រពន្ធរបស់នាងឈ្មោះ Brand Gordon Bennet បាននិយាយថា បុគ្គលិកពេទ្យបានធ្វើរឿងគ្រប់យ៉ាងដើម្បីឱ្យម្ដាយពួកគេបានស្ងប់ចិត្ត។

“ពួកយើងទាំងអស់គ្នា បាននិយាយគ្នាតាមទូរស័ព្ទដើម្បីលាគ្នាជាលើកចុងក្រោយ។ ពិតជាគួរឱ្យស្លុតចិត្តខ្លាំងណាស់។ ចៅៗរបស់គាត់ យំបណ្ដើរ និយាយលាគាត់បណ្ដើរ។ គាត់អាចស្ដាប់ និងនិយាយជាមួយពួកគេបាន។ គាត់និយាយជាមួយក្មេងៗថា គាត់ពិតជាមានមោទនភាពចំពោះពួកគេខ្លាំងណាស់” Bennett និយាយបណ្ដើរស្រក់ទឹកភ្នែកបណ្ដើរ។

នៅពេលដែលស្ថានភាពជំងឺរបស់អ៊ំស្រី Gann កាន់តែអាក្រក់ទៅៗ បុគ្គលិកពេទ្យម្នាក់បានយកទូរស័ព្ទរបស់ខ្លួន ភ្ជាប់ទៅកាន់កូនរបស់អ្នកជំងឺនេះ ដោយឱ្យពួកគេបានជួបគ្នាជាលើកទី2 ដែលជាលើកចុងក្រោយបង្អស់។

Bennett និយាយថា “បុគ្គលិកពេទ្យម្នាក់នោះ បានលើកទូរស័ព្ទនៅចំពោះមុខម្ដាយខ្ញុំ ហើយខ្ញុំអាចមើលឃើញ និងដឹងអំពីដង្ហើមរបស់គាត់។ ពេលនោះ ខ្ញុំអាចនិយាយពាក្យថា “លា” ទៅកាន់ម្ដាយខ្ញុំ ហើយថា ខ្ញុំស្រឡាញ់ និងអាណិតម្ដាយខ្លាំងណាស់”។

បន្ទាប់ពីអ៊ំស្រី Gann បានលាចាកលោកនេះទៅ គិលានុបដ្ឋាកម្នាក់ក៏បានទូរស័ព្ទមកកាន់គ្រួសារ Bennett។ បុគ្គលិកពេទ្យម្នាក់នេះបានប្រាប់ថា នាងបានចាប់ដៃ និងយកដៃច្បូតសក់ជូនគាត់ នៅពេលគាត់កំពុងបញ្ចប់ដង្ហើមចុងក្រោយ។

COVID-19 បានបង្ហាញខ្លួននៅក្នុងប្រទេស និងដែនដីចំនួន199 នៅក្នុងពិភពលោក បណ្ដាលឱ្យមនុស្សចំនួន 737,929នាក់បានបាត់បង់ជីវិត និងអ្នកជំងឺប្រមាណជា28,400នាក់កំពុងប្រឈមនឹងការស្លាប់ ខណៈដែលអ្នកជំងឺ156,507នាក់ទៀតបានជាសះស្បើយ។ ចំណែកសហរដ្ឋអាមេរិក បច្ចុប្បន្ន ជាសម្បុកមេរោគកូរ៉ូណាធំបំផុតក្នុងពិភពលោក ដោយមានអ្នកឆ្លងមេរោគនេះសរុបឡើងដល់143,055នាក់ ក្នុងនោះមាន2,513នាក់បានបាត់បង់ជីវិត និង4,865នាក់បានជាសះស្បើយ៕

ប្រភព៖ សារព័ត៌មានបរទេស

March 30, 2020

ពិភពលោក កាលពីសប្ដាហ៍មុន…(បណ្ដុំរូបភាព)

-ព្រះអង្គម្ចាស់ ឆារ៍លស៍ នៃរាជវង្សអង់គ្លេស ទ្រង់មានលទ្ធផល “វិជ្ជមាន” ពីការពិនិត្យរកមេរោគកូវីដ-19 ដោយនៅក្នុងសេចក្ដីថ្លែងការណ៍ពីព្រះរាជដំណាក់ ឃ្លែរេនស៍ បានបញ្ជាក់កាលពីថ្ងៃទី25 ថា ព្រះអង្គ ទ្រង់នៅតែមានព្រះរាជសុខភាពល្អដូចមុនជាធម្មតា និងព្រះអង្គទ្រង់បានបង្ខាំងព្រះកាយនៅក្នុងប្រទេសស្កុតលែនដ៍

ខាងក្រោមនេះ គឺបណ្ដុំរូបភាពព័ត៌មានអន្តរជាតិជុំវិញពិភពលោក កាលពីសប្ដាហ៍កន្លងទៅ…

-អ្នកជំនាញការនៃកងទ័ពរុស្ស៊ី កំពុងឈរនៅខាងក្រៅកន្លែងសម្រាកថែទាំ នើសស៊ីង ហូម(Honneger) ដែលមានអ្នកស្លាប់ដោយសារមេរោគកូវីដ-19 មិនតិចជាង 35នាក់ឡើយ នៅក្នុងតំបន់ Albino អ៊ីតាលី(រូបភាពកាលពីថ្ងៃសៅរ៍ ទី28មីនា របស់ AFP)

-ស្លាកសញ្ញាណែនាំពីការរក្សាគម្លាតឆ្ងាយពីគ្នា នៅក្នុងប្រទេសសហរដ្ឋអាមេរិក(AP)

-លោកប្រធានាធិបតីនៃសហរដ្ឋអាមេរិក ដូណាល់ ត្រាំ ក្នុងពិធីចុះហត្ថលេខាលើបទបញ្ជាប្រកាសឱ្យប្រើច្បាប់ The CARES act ដែលជាច្បាប់ប្រើប្រាស់ថវិកាគ្រាអាសន្ន ដើម្បីជួយដល់ផ្នែកសេដ្ឋកិច្ចរបស់ពលរដ្ឋអាមេរិកាំង ក្នុងស្ថានការណ៍វិបត្តិកូវីដ-19 ចំនួន 2លានលានដុល្លារ នៅក្នុងបន្ទប់ធ្វើការរាងពងក្រពើ ប្រចាំសេតវិមាន កាលពីថ្ងៃសុក្រ ទី27 មីនា(AFP)

-អាជ្ញាធរ និងមន្ត្រីយោធា នេសឹននែល ហ្គាដ ក្នុងទីក្រុងនីវយ៉ក ដើរនៅពីមុខតង់កៅស៊ូ ដែលសាងឡើង សម្រាប់ធ្វើជាកន្លែងតម្កល់សាកសពបណ្ដោះអាសន្ន នៅបរិវេណខាងក្រៅមន្ទីរពេទ្យ Bellevue ក្នុងទីក្រុងនីវយ៉ក កាលពីថ្ងៃពុធ ទី25 មីនា(AFP)

-រូបភាពបង្ហាញពីជីវិតរស់នៅប្រចាំថ្ងៃរបស់អ្នកទីក្រុងវូហាន…បុគ្គលិកអ្នកបញ្ជូនម្ហូបអាហារម្នាក់ កំពុងឈររង់ចាំហុចកញ្ចប់ចំណីអាហារពីលើរបារបាំងឃាំងផ្លូវចូលតំបន់ស្នាក់អាស្រ័យមួយក្នុងទីក្រុង។ រូបភាពកាលពីថ្ងៃអាទិត្យ ទី29 មីនា(រ៉យទ័រ)

-ពលករចំណាកស្រុកជនជាតិមីយ៉ាន់ម៉ា កំពុងប្រជ្រៀតគ្នាដើរឆ្លងស្ពានមិត្តភាពថៃ-មីយ៉ាន់ម៉ា ដើម្បីត្រឡប់ចូលទៅក្នុងខេត្ត មៀវ៉ាឌី ប្រទេសកំណើតរបស់ពួកគេវិញ ក្រោយវីរុសកូវីដ-19 រាតត្បាតនៅក្នុងប្រទេសថៃ ហើយរដ្ឋបាលថៃបានប្រកាសប្រើច្បាប់ស្ថានការណ៍អាសន្ននៅក្នុងសប្ដាហ៍នេះ។ រូបភាពកាលពីថ្ងៃពុធ ទី25 មីនា(រ៉យទ័រ)

-សម្ដេចសង្ឃ សាន់តាប៉ាប៉ា ហ្វ្រានស៊ីស ប្រារព្ធពិធីជូនពរ Urbi et Orbi ជាភាសាឡាទីន ឬប្រែថា “ជូនចំពោះទីក្រុងនេះ និងពិភពលោកទាំងមូល” នៅផ្នែកខាងលើបំផុតនៃជណ្ដើររបស់ព្រះមហាវិហារអ្នកឆ្លងបុណ្យ ប៉េត្រូ តែព្រះអង្គឯង។ រូបភាពកាលពីថ្ងៃសុក្រ ទី27 មីនា(AFP)

-លោកនាយករដ្ឋមន្ត្រីនៃប្រទេសអង់គ្លេស បូរីស ចនសុន កំពុងអ្គុយនៅក្នុងបន្ទប់ធ្វើការ ក្នុងផ្ទះលេខ10 ផ្លូវ ដាវនីង ក្នុងអំឡុងពេលចូលរួមក្នុង វីដេអូ ខន់ហ្វ៊ើរេនស៍ ជាមួយមេដឹកនាំក្រុមប្រទេសG-20 ដទៃទៀត។ កាលពីពេលមុនហ្នឹង លោក ចនសុន បានចេញសេចក្ដីថ្លែងការណ៍ តាមរយៈប្រព័ន្ធធ្វីតធើរថា លោកបានកើតជំងឺដោយសារមេរោគវីរុសកូរ៉ូណាប្រភេទថ្មីហើយ។ រូបភាពកាលពីថ្ងៃព្រហស្បតិ៍ ទី27 មីនា(រ៉យទ័រ)

-បុគ្គលិកពេទ្យផ្នែកសង្គ្រោះបន្ទាន់បារាំង កំពុងនាំខ្លួនអ្នកជំងឺកូវីដ-19 ឡើងជិះរថភ្លើងល្បឿនលឿន TGV ក្នុងតំបន់ Mullhouse ភាគខាងកើត ដើម្បីធ្វើការជម្លៀសទៅកាន់មន្ទីរពេទ្យក្នុងភូមិភាគផ្សេងទៀតនៃប្រទេស។ រូបភាពកាលពីថ្ងៃអាទិត្យ ទី29 មីនា(AFP)

ប្រភព ៖ សារព័ត៌មានបរទេស

March 30, 2020

សហរដ្ឋអាមេរិក អនុញ្ញាតឱ្យពលរដ្ឋយកសំណាកវត្ថុវិភាគដោយខ្លួនឯង ហើយផ្ញើទៅកាន់មន្ទីរពិសោធន៍ដើម្បីធ្វើតេស្តរកមេរោគCOVID-19

ពលរដ្ឋអាមេរិកាំងដែលសង្ស័យថាបានឆ្លងវីរុសCOVID-19 អាចយកសំណាកវត្ថុវិភាគរបស់ខ្លួនដោយខ្លួនឯង ហើយផ្ញើទៅកាន់មន្ទីរពិសោធន៍ ដែលប្រការនេះនឹងជួយបង្កើនល្បឿននៃការធ្វើតេស្តរកមេរោគCOVID-19។

នាយកដ្ឋានគ្រប់គ្រងអាហារ និងឱសថនៃសហរដ្ឋអាមេរិក បានអនុញ្ញាតឱ្យមានការយកសំណាកវត្ថុវិភាគដោយខ្លួនឯង ចំពោះរាល់ពលរដ្ឋដែលសង្ស័យថាខ្លួនបានឆ្លងCOVID-19 ដោយវិធានការនេះនឹងត្រូវបានអនុវត្តចាប់ពីសប្ដាហ៍នេះតទៅ។ នេះបើតាមការឱ្យដឹងរបស់ជំនួយការរដ្ឋមន្ត្រីក្រសួងសុខាភិបាល Brett Giroir កាលពីថ្ងៃទី29មីនាឆ្នាំ2020។

អ្នកដែលសង្ស័យថាខ្លួនបានឆ្លងCOVID-19 នឹងតម្រូវឱ្យប្រើប្រាស់សម្លីកប្បាសដើម្បីផ្ដិតយកសំណាកវត្ថុវិភាគក្នុងច្រមុះ(ទឹកសម្បោរ) ក្រោយមកដាក់វានៅក្នុងកូនថង់ផ្លាស្ទិក រួចផ្ញើទៅកាន់មន្ទីរពិសោធន៍។ ប្រការនេះនឹងជួយឱ្យពលរដ្ឋ និងក្រុមគ្រូពេទ្យ អាចកាត់បន្ថយបានភាពតានតឹងយ៉ាងច្រើន។

ជំនួយការរដ្ឋមន្ត្រីក្រសួងសុខាភិបាល Brett Giroir (រូបខាងស្ដាំគេបង្អស់)

ជំនួយការរដ្ឋមន្ត្រីក្រសួងសុខាភិបាលអាមេរិកាំង លោក Brett Giroir ថ្លែងថា “ដំណើរការនេះនឹងជួយបន្ថែមល្បឿននៃការធ្វើតេស្ត កាត់បន្ថយចំនួនលើកនៃការប្ដូរផ្លាស់ឈុតការពារចាំបាច់របស់ក្រុមគ្រូពេទ្យ។ វាក៏ជួយសន្សំសំចៃកម្លាំងធនធានដ៏មានតម្លៃ ដើម្បីទុកសម្រាប់មន្ទីរពេទ្យផ្សេងៗទៀតផងដែរ”។

យោងតាមស្ថិតិរបស់សាកលវិទ្យាល័យ Johns Hopskins នៅសហរដ្ឋអាមេរិក កាលពីថ្ងៃទី29មីនា បានឱ្យដឹងថា ចំនួនអ្នកឆ្លងមេរោគថ្មីបានកើនជិត18,000ករណីបន្ថែមទៀត នាំឱ្យតួលេខនៃអ្នកបានឆ្លងមេរោគCOVID-19 ទូទាំងប្រទេស ឡើងដល់ជាង141,000ករណី។ រីឯចំនួនអ្នកស្លាប់ថ្មីមានចំនួន247ករណី ធ្វើឱ្យតួលេខនៃអ្នកស្លាប់ដោយសារវីរុសនេះ កើនដល់2,458ករណី។

មន្ត្រីរដ្ឋាភិបាលសហរដ្ឋអាមេរិក បានឱ្យដឹងថា ប្រទេសនេះបានធ្វើតេស្តទៅលើមនុស្សប្រមាណជា894,000ករណី ចាប់តាំងពីCOVID-19 បានបង្ហាញខ្លួននៅសហរដ្ឋអាមេរិក។

ក្រុមអ្នកជំនាញការបានព្រមានថា ទីក្រុង New York នឹងរងផលប៉ះពាល់ធ្ងន់ធ្ងរជាងទីក្រុង Wuhan របស់ប្រទេសចិន ឬតំបន់ Lombardy របស់ប្រទេសអ៊ីតាលីទៅទៀត បើសិនជាល្បឿននៃការឆ្លងមេរោគនេះនៅតែបន្តកើនឡើងដូចសព្វថ្ងៃ។

សហរដ្ឋអាមេរិក អនុញ្ញាតឱ្យពលរដ្ឋយកសំណាកវត្ថុវិភាគដោយខ្លួនឯង ហើយផ្ញើទៅកាន់មន្ទីរពិសោធន៍ — អ្នកដែលសង្ស័យថាខ្លួនបានឆ្លងCOVID-19 នឹងតម្រូវឱ្យប្រើប្រាស់សម្លីកប្បាសដើម្បីផ្ដិតយកសំណាកវត្ថុវិភាគក្នុងច្រមុះ(ទឹកសម្បោរ) ក្រោយមកដាក់វានៅក្នុងកូនថង់ផ្លាស្ទិក រួចផ្ញើទៅកាន់មន្ទីរពិសោធន៍

គិតមកដល់ពេលនេះ នៅទូទាំងពិភពលោក មានអ្នកស្លាប់ដោយសារ COVID-19 ចំនួន33,976នាក់ និងអ្នកកំពុងប្រឈមនឹងការស្លាប់មានចំនួន26,681នាក់ ក្នុងចំណោមអ្នកបានឆ្លងវីរុសសរុប 722,196នាក់៕

ប្រភព៖ សារព័ត៌មានបរទេស

March 30, 2020

Category: អន្តរជាតិ