អន្តរជាតិ - La Reine Media

Trump បញ្ជាឱ្យកងទ័ពអាមេរិកាំង ជួយអ៊ីតាលីប្រឆាំងCOVID-19

ប្រធានាធិបតីសហរដ្ឋអាមេរិកបានចេញបញ្ជាឱ្យមន្ត្រីរដ្ឋាភិបាល និងកងទ័ពអាមេរិកាំង ជួយប្រទេសអ៊ីតាលីក្នុងការប្រយុទ្ធប្រឆាំងនឹងវីរុសCOVID-19 ដោយការផ្គត់ផ្គង់សម្ភារវេជ្ជសាស្ត្រ និងជំនួយមនុស្សធម៌។

នៅក្នុងលិខិតមួយដែលបានផ្ញើទៅកាន់ក្រុមមន្ត្រីក្នុងគណៈរដ្ឋមន្ត្រីសហរដ្ឋអាមេរិកកាលពីម្សិលមិញ ប្រធានាធិបតី Donald Trump ស្នើឱ្យកងទ័ពអាមេរិកាំងនៅអ៊ីតាលី ចាប់ផ្ដើមធ្វើយុទ្ធនាការព្យាបាលអ្នកជំងឺ និងជួយដល់ការសាងសង់មន្ទីរពេទ្យបណ្ដោះអាសន្ន រួមនឹងការដឹកជញ្ជូនសម្ភារផ្នែកសុខាភិបាល។ល។

លោក Trump ក៏បានស្នើឱ្យរដ្ឋមន្ត្រីក្រសួងពាណិជ្ជកម្ម Wilbur Ross ជំរុញឱ្យបណ្ដាក្រុមហ៊ុន លក់សម្ភារសុខាភិបាលទៅតាមការស្នើរបស់ក្រុមមន្ត្រីនៃប្រទេសអ៊ីតាលី លើកលែងតែផលិតផលដែលសហរដ្ឋអាមេរិកកំពុងខ្វះខាតក្នុងការទប់ទល់នឹងCOVID-19។ ក្រសួងការបរទេស ទីភ្នាក់ងារអភិវឌ្ឍអន្តរជាតិរបស់សហរដ្ឋអាមេរិក និងធនាគារអាហរ័ណនីហរ័ណអាមេរិក ក៏ទទួលបានសិទ្ធិប្រើប្រាស់រាល់ធនធានដើម្បីជួយសង្គ្រោះខឿនសេដ្ឋកិច្ចនៃប្រទេសអ៊ីតាលីផងដែរ។

លោក Trump ថ្លែងថា “អ៊ីតាលី ដែលជាប្រទេសសម្ព័ន្ធមិត្តមួយដ៏ជិតស្និទ្ធ និងយូរអង្វែងបំផុតរបស់សហរដ្ឋអាំមេរិក កំពុងត្រូវបានវាយប្រហារដែល COVID-19 និងបានរាយការណ៍ថាមានអ្នកស្លាប់ដល់ទៅ18,000នាក់។ មេរោគរាតត្របាតសកលនេះ បានបណ្ដាលឱ្យប្រព័ន្ធសុខាភិបាលរបស់ពួកគេ ស្ថិតក្បែរមាត់ជ្រោះ និងអាចរុញច្រានសេដ្ឋកិច្ចប្រទេសនេះធ្លាប់ទៅក្នុងវិបត្តិ”។ នេះបើតាមសារព័ត៌មាន Reuters។

គិតមកដល់ពេលនេះ ប្រទេសអ៊ីតាលីបានរកឃើញអ្នកផ្ទុកវីរុសCOVID-19 ជាង147,500នាក់ ក្នុងនោះមានអ្នកជំងឺជិត19,000នាក់បានបាត់បង់ជីវិត។ ក្រុមអ្នកជំនាញយល់ថា តួលេខនៃករណីឆ្លងវីរុស និងស្លាប់ លែងកើនឡើងយ៉ាងគំហុកដូចមុន ប៉ុន្តែវាក៏មិនទាន់ថយចុះខ្លាំងនោះដែរ ហើយអ៊ីតាលីនៅតែជា “វាលពិឃាត” របស់វីរុសCOVID-19 ធំជាងគេបង្អស់នៅក្នុងពិភពលោក។ រដ្ឋាភិបាលអ៊ីតាលីបានចេញបម្រាមគោចរទូទាំងប្រទេសចាប់ពីថ្ងៃទី9មីនា ដោយស្នើឱ្យប្រជាជននៅតែក្នុងផ្ទះ ព្រមទាំងបានផ្អាកដំណើរការរាល់អាជីវកម្មមិនចាំបាច់ផងដែរ។

នៅទូទាំងពិភពលោក មកដល់បច្ចុប្បន្ន មានអ្នកស្លាប់ដោយសារវីរុសCOVID-19 ជាង102,780នាក់ ក្នុងចំំណោមអ្នកផ្ទុកវីរុសជាង1,699,400នាក់ ខណៈអ្នកជំងឺបានជាសះស្បើយមានចំនួន 377,040នាក់៕

ប្រភព៖ សារព័ត៌មានបរទេស

April 11, 2020

ចិនប្រកាសរកអ្នកស្ម័គ្រចិត្ត500នាក់ ដើម្បីពិសោធវ៉ាក់សាំងCOVID-19 ដំណាក់កាលទី2

ក្រុមហ៊ុនជីវសាស្ត្រ CanSino Biologics ជ្រើសរើសអ្នកស្ម័គ្រចិត្ត500នាក់ ដើម្បីពិសោធវ៉ាក់សាំងCOVID-19 ដំណាក់កាលទី2។

ក្រុមហ៊ុនខាងលើនេះ សហការជាមួយមន្ទីរបច្ចេកវិទ្យាជីវសាស្ត្រនៅវិទ្យាស្ថានវិទ្យាសាស្ត្រនៃពេទ្យយោធាចិន ចាប់ផ្ដើមដំណាក់កាលទី2នៃការពិសោធន៍វ៉ាក់សាំងនៅលើមនុស្ស បន្ទាប់ពីទិន្នន័យប្រមូលបានពីការសាកល្បងដំណាក់កាលដំបូងបង្ហាញថាមានសុវត្ថិភាព។ នេះបើតាមរបាយការណ៍របស់ CanSino Biologics ដែលចេញផ្សាយកាលពីថ្ងៃទី9មេសា។

រយៈពេលនៃការអភិវឌ្ឍវ៉ាក់សាំង តែងតែត្រូវចំណាយពេលជាច្រើនឆ្នាំទើបអាចទទួលបានជោគជ័យ។ អ្នកវិទ្យាសាស្ត្រជាច្រើនប្រទេសនៅក្នុងពិភពលោក កំពុងប្រជែងគ្នាធ្វើការអភិវឌ្ឍជាច្រើនដែលមានសក្ដានុពល ក្នុងអំឡុង COVID-19 កំពុងសម្លាប់មនុស្សជារៀងរាល់ថ្ងៃ។

នៅប្រទេសចិនដំណាក់កាលដំបូងនៃការពិសោធ ក្រុមហ៊ុន CanSino បានចាក់វ៉ាក់់សាំងការពារវីរុសCOVID-19 ទៅលើអ្នកស្ម័គ្រចិត្តចំនួន108នាក់ នៅទីក្រុងWuhan ចាប់ពីថ្ងៃទី18មីនាដល់ថ្ងៃទី2មេសា។ ពួកគេត្រូវចែកជា3ក្រុម និងត្រូវបានចាក់វ៉ាក់សាំងពីបរិមាណទាបទៅខ្ពស់ ដើម្បីវាយតម្លៃប្រសិទ្ធភាព និងសុវត្ថិភាព។

ក្រុមអ្នកវិទ្យាសាស្ត្របានឱ្យដឹងថា ការពិសោធដំណាក់កាលដំបូង មានផលវិបាកខ្លះៗនៅលើក្រុមដែលប្រើបរិមាណខ្ពស់ ដោយពួកគេត្រូវក្ដៅខ្លួន38.5អង្សាសេ។ អាការគ្រុនក្ដៅនេះកើតឡើងបន្ទាប់ពីបានចាក់វ៉ាក់សាំង តែវាបាត់ទៅវិញក្រោយរយៈពេល24ម៉ោង។

ក្នុងដំណាក់កាលទី2នេះ ក្រុមអ្នកវិទ្យាសាស្ត្រនឹងសាកល្បងចាក់វ៉ាក់សាំងក្នុងបរិមាណទាប និងមធ្យម។ អ្នកស្ម័គ្រចិត្ត250នាក់នឹងត្រូវចាក់វ៉ាក់សាំងក្នុងបរិមាណមធ្យម ខណៈដែល125នាក់ទៀតត្រូវចាក់ក្នុងបរិមាណទាប ចំណែក125នាក់ផ្សេងទៀតនឹងត្រូវចាក់ថ្នាំវ៉ាក់សាំងក្លែងក្លាយ Placebo(Placebo គឺជាថ្នាំដែលមិនមានប្រសិទ្ធភាពអ្វីទាំងអស់ទៅលើជំងឺ ដោយសារវាមិនមានផ្ទុកសារធាតុជាឱសថអ្វីនោះទេ។ គេប្រើថ្នាំនេះទៅលើអ្នកជំងឺ/អ្នកស្ម័គ្រចិត្តក្នុងការពិសោធឱសថថ្មី ក្នុងលក្ខខណ្ឌអ្នកជំងឺ/ស្ម័គ្រចិត្តមិនដឹងថាខ្លួនត្រូវចាក់ថ្នាំក្លែងក្លាយ Placeboនេះនោះឡើយ)។

ការពិសោធវ៉ាក់សាំងនៅលើមនុស្សមាន3ដំណាក់កាល។ ដំណាក់កាលដំបូង គឺពិសោធទៅលើក្រុមមនុស្សដែលមានចំនួនតិចដើម្បីបញ្ជាក់ថាផលិតផលមានសុវត្ថិភាព។ ដំណាក់កាលទី2 គឺគេត្រូវពិសោធទៅលើអ្នកស្ម័គ្រចិត្តច្រើនជាងដំណាក់កាលដំបូង ដែលជាទូទៅគឺរាប់រយនាក់ ដើម្បីពិនិត្យទៅលើសុវត្ថិភាព ប្រសិទ្ធភាព និងកំណត់ផែនការចាក់វ៉ាក់សាំង។ ដំណាក់កាលទី3 គេត្រូវពិសោធលើមនុស្សច្រើនជាងដំណាក់កាលទី2 ដើម្បីបានយល់កាន់តែច្បាស់អំពីប្រសិទ្ធភាពក្នុងការការពារការឆ្លងវីរុសនៅលើរាងកាយមនុស្ស។

អ្នកស្ម័គ្រចិត្តក្នុងដំណាក់កាលទី2នេះ ត្រូវមានអាយុពី18ដល់60ឆ្នាំ និងមិនធ្លាប់ឆ្លងវីរុសCOVID-19 ឬប្រតិកម្មជាមួយវ៉ាក់សាំង។

កាលពីថ្ងៃទី16មីនា វិទ្យាស្ថានសុខាភិបាលជាតិអាមេរិកាំង សហការជាមួយក្រុមហ៊ុនបច្ចេកវិទ្យាជីវសាស្ត្រ Moderna បានធ្វើការសាកល្បងវ៉ាក់សាំងរបស់ពួកគេនៅលើអ្នកស្ម័គ្រចិត្ត45នាក់ដែលមានអាយុចាប់ពី18ដល់55ឆ្នាំ ដោយចំណាយពេល6សប្ដាហ៍។ ចំណែកក្រុមហ៊ុនមួយទៀតរបស់សហរដ្ឋអាមេរិក គឺក្រុមហ៊ុន Inovio ក៏បានឱ្យដឹងថា ពួកគេនឹងធ្វើការពិសោធវ៉ាក់សាំងCOVID-19 នៅលើអ្នកស្ម័គ្រចិត្ត40នាក់ នៅក្នុងសប្ដាហ៍នេះផងដែរ៕

ប្រភព៖ SCMP

April 11, 2020

COVID-19! មនុស្សជាង102,000នាក់បានស្លាប់ និងជិត1.7លាននាក់បានឆ្លងវីរុសនៅទូទាំងពិភពលោក

នៅក្នុងពិភពលោកទាំងមូល មានអ្នកឆ្លងវីរុសCOVID-19 ជិត1.7លាននាក់ និងជាង102,000នាក់បានបាត់បង់ជីវិត ក្នុងនោះសហរដ្ឋអាមេរិក និងអឺរ៉ុបបន្តជាសម្បុកមេរោគធំជាងគេ។

យោងតាមស្ថិតិរបស់សាកលវិទ្យាល័យ Johns Hopkins ពិភពលោកបានរកឃើញអ្នកជំងឺCOVID-19 ចំនួន1,691,719នាក់ និងអ្នកស្លាប់102,136នាក់នៅក្នុងប្រទេស និងដែនដីចំនួន210 ក្នុងនោះ អ្នកជំងឺថ្មីមានចំនួន104,510នាក់ និងអ្នកស្លាប់ថ្មីមាន7,286នាក់។ ចំណែកអ្នកដែលបានជាសះស្បើយ មានចំនួន375,499នាក់។

សហរដ្ឋអាមេរិក៖ ប្រទេសនេះជាសម្បុកមេរោគធំទី1ក្នុងពិភពលោក ដោយមានអ្នកជំងឺ492,240នាក់ កើន30,803នាក់បើធៀបនឹងម្សិលមិញ(10មេសា)។ អ្នកស្លាប់ថ្មី1,602នាក់ និងអ្នកស្លាប់សរុប18,350នាក់។

ទ្វីបអឺរ៉ុប៖ អ្នកជំងឺសរុប820,109នាក់ និងអ្នកស្លាប់សរុប70,094នាក់

ប្រទេសអេស្ប៉ាញ៖ អ្នកជំងឺថ្មី5,051នាក់ និងអ្នកស្លាប់ថ្មី634នាក់។ អ្នកជំងឺសរុប158,273នាក់ និងអ្នកស្លាប់សរុប16,081នាក់។ ប្រទេសនេះជាសម្បុកមេរោគធំជាងគេទី2ក្នុងពិភពលោក។

ប្រទេសអ៊ីតាលី៖ អ្នកជំងឺថ្មី3,951នាក់ អ្នកជំងឺសរុប147,577នាក់។ អ្នកស្លាប់ថ្មី570នាក់ និងអ្នកស្លាប់សរុប18,849នាក់។ ប្រទេសនេះបន្តជា “វាលពិឃាត” របស់វីរុសCOVID-19 ធំជាងគេក្នុងពិភពលោក។

ប្រទេសបារាំង៖ អ្នកជំងឺថ្មី7,120នាក់ និងអ្នកស្លាប់ថ្មី987នាក់។ អ្នកជំងឺសរុប124,869នាក់ និងអ្នកស្លាប់សរុប13,197នាក់។ ប្រទេសនេះជាសម្បុកមេរោគធំជាងគេលំដាប់ទី4ក្នុងពិភពលោក។

ទ្វីបអាស៊ី៖ អ្នកជំងឺសរុប275,087នាក់ និងអ្នកស្លាប់សរុប10,227នាក់

ប្រទេសចិន៖ ប្រទេសនេះមិនទាន់ប្រកាសតួលេខថ្មីសម្រាប់ថ្ងៃនេះ ប៉ុន្តែតួលេខចុងក្រោយបង្ហាញថា មានអ្នកជំងឺសរុប81,953នាក់ និងអ្នកស្លាប់សរុប3,339នាក់។

ប្រទេសអ៊ីរ៉ង់៖ ប្រទេសនេះជាសម្បុកមេរោគធំជាងគេទី2នៅអាស៊ី បន្ទាប់ពីប្រទេសចិន ដោយមានអ្នកជំងឺសរុប68,192នាក់ និងអ្នកស្លាប់សរុប4,232នាក់៕

ប្រភព៖ សារព័ត៌មានបរទេស

April 11, 2020

ទីក្រុង New York បញ្ចុះសពអ្នកជំងឺCOVID-19ជាក្រុម លើកោះដែលធ្លាប់បញ្ចុះសពអ្នកជំងឺអាសន្នរោគផ្ដាសាយអេស្ប៉ាញកាលពីឆ្នាំ1919

មឈូសចំនួន45ដែលមានដាក់សាកសពអ្នកជំងឺCOVID-19 ត្រូវបានគេបញ្ចុះជាក្រុមនៅលើកោះ Hart ក្នុងរដ្ឋ New York ព្រោះតែពុំមានអ្នកផ្ទះមកទទួល។

មឈូសជាច្រើនដែលមានដាក់ឈ្មោះ ដូចជា “Abraham” និង “Rogers” ជាដើម ត្រូវបានអ្នកទោសនៅពន្ធនាគារ Riker’s Island លើកោះ Hart ស្រុក Bronx នៅភាគខាងកើតទីក្រុង New York លើកចេញពីរថយន្តដឹកទំនិញក្លាសេត្រជាក់ រួចហើយក៏បានបញ្ចុះនៅលើវាលបញ្ចុះសពថ្មីមួយនៅលើកោះ កាលពីថ្ងៃទី9មេសាកន្លងទៅ។

សូមរំឭកថា កោះ Hart ធ្លាប់ជាកន្លែងបញ្ចុះសាកសពរបស់ជនរងគ្រោះក្នុងអាសន្នរោគផ្ដាសាយអេស្ប៉ាញ កាលពីឆ្នាំ1919។ យោងតាមនាយកដ្ឋានកែសម្រួល ដែលជាអ្នកត្រួតពិនិត្យសកម្មភាពបញ្ចុះសពនៅលើកោះនេះអស់រយៈ150ឆ្នាំកន្លងទៅហើយនោះ បានឱ្យដឹងថា សាកសពប្រមាណជា25នាក់ ត្រូវបានបញ្ចុះជារៀងរាល់ថ្ងៃព្រហស្បតិ៍នៅលើកោះ Hart។ ក៏ប៉ុន្តែ តួលេខនេះបានកើនឡើង3ដងនៅក្នុងប៉ុន្មានសប្ដាហ៍ចុងក្រោយនេះ។

លេខាផ្នែកសារព័ត៌មានរបស់អភិបាលក្រុង New York អ្នកស្រី Freddi Goldstein បានឱ្យដឹងថា បើសិនជាអាជ្ញាធរទាក់ទងទៅកាន់អ្នកផ្ទះរបស់សាកសពបានក្នុងអំឡុង14ថ្ងៃ នោះសាកសពនឹងមិនត្រូវបានបញ្ជូនទៅកាន់កោះ Hart នោះទេ។ ប៉ុន្តែ បើសិនជាផ្ទុយពីនេះ នោះសាកសពនឹងត្រូវបានដឹកទៅកាន់កោះ ហើយបញ្ចុះនៅទីនោះ។

“គោលដៅរបស់យើងគឺដើម្បីបញ្ចៀសស្ថានភាពដូចនៅប្រទេសអ៊ីតាលី ជាកន្លែងដែលកងទ័ពត្រូវប្រមូលសាកសពពីវិហារ និងតាមដងផ្លូវក្នុងក្រុង” នេះបើតាមលោក Mark Levine ប្រធានគណៈកម្មការសុខាភិបាលក្រុង New York។

រដ្ឋ New York គឺជាសម្បុកមេរោគធំបំផុតរបស់សហរដ្ឋអាមេរិក ដោយមានអ្នកជំងឺជិត160,000នាក់ និងស្លាប់ជាង7,000នាក់ដោយសារវីរុសCOVID-19 ដែលចំនួនអ្នកស្លាប់នេះជិតស្មើនឹងពាក់កណ្ដាលនៃអ្នកស្លាប់ទូទាំងសហរដ្ឋអាមេរិក។ ដោយឡែកនៅទីក្រុង New Yorkវិញ មានអ្នកជំងឺជាង87,000នាក់ (ច្រើនជាងប្រទេសចិនទៅទៀត) ក្នុងនោះមានអ្នកស្លាប់ជាង4,700នាក់៕

ប្រភព៖ សារព័ត៌មានបរទេស

April 11, 2020

COVID-19 បានជួយឱ្យអ្នកស្រុកឥណ្ឌាមើលឃើញភ្នំហ៊ីម៉ាឡាយ៉ាបានច្បាស់ជាលើកដំបូង ក្នុងអំឡុង30ឆ្នាំមកនេះ

“ខ្ញុំមិនដែលបានស្រមៃដល់ទិដ្ឋភាពបែបនេះនោះទេ” អ្នកស្រុកឥណ្ឌាម្នាក់បាននិយាយបែបនេះ នៅពេលបានឃើញជួរភ្នំហ៊ីម៉ាឡាយ៉ាដ៏មហិមា នៅឯនាយជើងមេឃ បើទោះវាមានចម្ងាយ200គីឡូម៉ែត្រពីទីនេះ។

ប្រការដ៏ចម្លែកនេះ បានកើតឡើងនៅពេលដែលវិស័យឧស្សាហកម្មរបស់ពិភពលោក បានផ្អាក ឬកាត់បន្ថយសកម្មភាព ព្រោះតែវីរុសCOVID-19។ មូលហេតុនេះហើយដែលបានជួយដល់ការកាត់បន្ថយផ្សែងពុលនៅក្នុងបរិស្ថាន និងបរិយាកាសទាំងមូលររបស់ពិភពលោក។

អ្នកស្រុកនៅតំបន់ Jalandhar រដ្ឋ Punjab ភាគខាងជើងប្រទេសឥណ្ឌា ដែលមានចម្ងាយជាង200គីឡូម៉ែត្រពីភ្នំហ៊ីម៉ាឡាយ៉ា សុទ្ធតែមានការសប្បាយរីករាយ និងនាំគ្នាបង្អួតទិដ្ឋភាពដែលកម្របានឃើញនេះនៅលើបណ្ដាញសង្គម Facebook ក៏ដូចជានិយាយអំពីស្ថានភាពបរិស្ថាននៅប្រទេសឥណ្ឌា។

ឥណ្ឌកំពុងតែអនុវត្តបម្រាមគោចរនៅទូទាំងប្រទេសក្នុងរយៈពេល21ថ្ងៃ ដើម្បីទប់ស្កាត់វីរុសCOVID-19។ នៅលើដងផ្លូវនានា គេសម្គាល់ឃើញថា ហាក់មិនមានមនុស្សធ្វើដំណើរទាល់តែសោះ។ ក្រុមហ៊ុន និងរោងចក្រតិចតួចប៉ុណ្ណោះដែលនៅដំណើរការ ដែលកត្តានេះហើយបានរួមចំណែកកាត់បន្ថយផ្សែងពុលនៅក្នុងបរិយាកាស។

គណៈកម្មធិការជាតិគ្រប់គ្រងផ្សែងពុលនៃប្រទេសឥណ្ឌា បានបញ្ជាក់ថា បទបញ្ជាបម្រាមគោចរបានជួយឱ្យកម្រិតនៃផ្សែងពុលត្រូវថយចុះ។ ចំណែកអង្គភាពស៊ើបការណ៍សម្ងាត់របស់ទីភ្នាក់ងារសារព័ត៌មានឥណ្ឌា India Today បានរកឃើញថា គុណភាពខ្យល់បានល្អប្រសើរឡើងវិញដល់ទៅ33% ក្នុងអំឡុងពីថ្ងៃទី16ដល់27មីនា ឆ្នាំ2020។

ប្រទេសឥណ្ឌាដែលមានប្រជាជនជាង1.3ពាន់លាននាក់ ត្រូវបានអង្គការសុខភាពពិភពលោក WHO ប្រកាសថា មានពលរដ្ឋប្រមាណជា1.5លាននាក់បានស្លាប់ដោយសារខ្យល់ពុលក្នុងបរិយាកាសកាលពីឆ្នាំ2012។ កម្រិតនៃខ្យល់ពុលនៅឥណ្ឌាខ្ពស់ជាង5ដងបើធៀបនឹងកម្រិតសុវត្ថិភាពរបស់ WHO។

គិតមកដល់បច្ចុប្បន្ន ប្រទេសឥណ្ឌាទាំងមូលមានអ្នកជំងឺសរុបជាង6,500នាក់ ក្នុងនោះមាន199នាក់បានបាត់បង់ជីវិតដោយសារវីរុសCOVID-19៕

ប្រភព៖ សារព័ត៌មានបរទេស

April 10, 2020

រន្ធត់រដ្ឋនីវយ៉ក! ឆ្លងកូវីដ-19 ជាង 1.6សែននាក់ គ្រងស្ថិតិរដ្ឋតែមួយ មានអ្នកឆ្លងមេរោគ វ៉ាដាច់ប្រទេសអេស្ប៉ាញទាំងមូល

រដ្ឋនីវយ៉ក រងវិបត្តិធ្ងន់ធ្ងរ ចំនួនអ្នកឆ្លងមេរោគកូវីដ-19 នៅតែហក់ឡើងឥតឈប់ ដល់ជាង 1.6សែននាក់ហើយ គ្រងស្ថិតិជារដ្ឋតែមួយគត់ដែលមានអ្នកឆ្លងមេរោគច្រើនជាងប្រទេសអេស្ប៉ាញ និងអ៊ីតាលីទាំងមូលទៅទៀត។

នៅថ្ងៃទី10 មេសានេះ វេបសាយ ដឹ សាន់ បានឱ្យដឹងថា មហាវិទ្យាល័យ ចន ហប់គីនស៍ នៅក្នុងសហរដ្ឋអាមេរិក បានរាយការណ៍ពីស្ថានការណ៍មេរោគវីរុសកូរ៉ូណាប្រភេទថ្មី ឬកូវីដ-19 រាតត្បាត ដែលនៅក្នុងរដ្ឋនីវយ៉ក កំពុងរងវិបត្តិកាន់តែធ្ងន់ធ្ងរឡើង គ្រងស្ថិតិជារដ្ឋតែមួយ ដែលមានចំនួនអ្នកឆ្លងមេរោគច្រើនជាងប្រទេសណាៗទាំងអស់លើពិភពលោក ព្រោះរហូតមកដល់ខណៈពេលនេះ បានរកឃើញអ្នកឆ្លងមេរោគក្នុងរដ្ឋមួយនេះរួចហើយដល់ទៅ 160,000នាក់ និងស្លាប់ជាង 7,000នាក់ ដែលនៅពេលប្រៀបធៀបជាមួយនឹងប្រទេសអេស្ប៉ាញ ជាប្រទេសដែលមានអ្នកឆ្លងមេរោគច្រើនបំផុតលំដាប់លេខ2 របស់ពិភពលោក មានអ្នកឆ្លងមេរោគប្រមាណ 150,000នាក់ និងអ៊ីតាលី មានអ្នកឆ្លងមេរោគកូវីដ-19 ច្រើនលំដាប់លេខ3 ក្នុងពិភពលោក ក្នុងចំនួនប្រមាណជា 140,000នាក់។

លោក អ៊ែនឌ្រូវ៍ ខូអូម៉ូ អភិបាលរដ្ឋនីវយ៉ក ដែលកំពុងធ្វើការយ៉ាងធ្ងន់ធ្ងរ ដើម្បីរិះរកវិធីទប់ទល់នឹងការរាតត្បាតរបស់មេរោគកូវីដ-19 ក្នុងរដ្ឋនីវយ៉ក បានថ្លែងកាលពីថ្ងៃព្រហស្បតិ៍កន្លងទៅ ដោយបានរិះគន់លោកប្រធានាធិបតី ដូណាល់ ត្រាំ នៃសហរដ្ឋអាមេរិក និងលោក ប៊ីល ដឹ ប្លាស៊ីអូ អភិបាលទីក្រុងនីវយ៉ក ដែលប្រកាសក្នុងថាមឡាញ អំពីការវិលត្រឡប់មកបើកមហានគរនីវយ៉កឡើងជាថ្មីម្ដងទៀត។

លោក អ៊ែនឌ្រូវ៍ ខូអូម៉ូ អភិបាលរដ្ឋនីវយ៉ក“ហេតុអ្វីបានជាពួកគេទស្សន៍ទាយថា ពលរដ្ឋនីវយ៉ក អាចបញ្ឈប់ការឆ្លងរាតត្បាតរបស់មេរោគកូវីដ-19បាននៅពេលណានោះ? ខណៈដែលប្រធានាធិបតី ត្រាំ ថែមទាំងទស្សន៍ទាយថា ប្រទេសអាមេរិក នឹងអាចវិលមកដំណើរការធុរកិច្ចបានដូចកាលពីដើម ក្នុងអំឡុងពិធីបុណ្យអ៊ីស្ទើរ៍ទៀតផង…ហេតុអីបានពួកលោកនិយាយបែបហ្នឹង?” លោក ខូអូម៉ូ ថ្លែងរិះគន់លោកប្រធានាធិបតី ត្រាំ និងបានចង្អុលបង្ហាញថា សូម្បីតែអ្នកជំនាញការផ្នែករោគឆ្លង ក៏នៅមិនទាន់ហ៊ានទស្សន៍ទាយបានផងថា តើការឆ្លងរាតត្បាតរបស់កូវីដ-19 នឹងចប់នៅពេលណានោះ?! តើអ្នកណាអាចនៅរង់ចាំមើលស្ថានការណ៍ និងនិយាយបានថា ពួកយើងកំពុងតែឆ្ពោះទៅកាន់ចំណុចណានោះ?។

ក្រៅពីនោះ លោកខូអូម៉ូ អភិបាលរដ្ឋនីវយ៉ក នៅបានថ្លែងយ៉ាងត្រង់ទៅត្រង់មកទៀតផងថា សម្រាប់ខ្លួនលោក គ្មានការគិតថា ការរាតត្បាតរបស់មេរោគកូវីដ-19 នឹងចប់នៅពេលណាឡើយ…មិនដឹងថា ក្រាហ្វិករបស់អ្នកឆ្លងមេរោគថ្មីក្នុងរដ្ឋនីវយ៉ក នឹងនៅតែហក់ឡើងខ្ពស់តទៅទៀត ឬក៏ចាប់ផ្ដើមថយចុះ ឬយ៉ាងណានោះឡើយ? ព្រោះពេលនេះ ពួកយើងនឹងដឹង ក៏នៅពេលដែលទៅដល់ចំណុចនោះហើយប៉ុណ្ណោះ។ ពួកយើងតាមដានព័ត៌មានតួលេខរៀងរាល់ថ្ងៃ។ លោកខូអូម៉ូ នៅបានថ្លែងអះអាងពីចំនួនអ្នកស្លាប់ដោយសារមេរោគកូវីដ-19 ក្នុងរដ្ឋនីវយ៉ក ថា មានចំនួន 7,067ហើយ ដែលនេះគឺជាចំនួនដែលច្រើនជាងចំនួនអ្នកស្លាប់ដោយសារហេតុការណ៍វិនាសកម្ម 9/11(យន្តហោះភេរវករបើកបំបុកអគារ វើល ថ្រេត សេនធើរ កាលពីឆ្នាំ2001) ក្រៅពីនោះ តួលេខនៃអ្នកស្លាប់ថ្មីៗ ក្នុងអំឡុង 24ម៉ោង នៅតែកើនឡើងខ្ពស់ដល់ទៅ 799នាក់ម្ដងទៀតដដែល កាលពីថ្ងៃទី8 មេសា កន្លងទៅ។

ទាំងអស់នេះ ចំនួនសរុបនៃអ្នកឆ្លងមេរោគវីរុសកូវីដ-19 នៅក្នុងសហរដ្ឋអាមេរិក បានកើនឡើងដល់ចំនួន 452,135នាក់ និងមានអ្នកស្លាប់ 16,513នាក់ រហូតជាប់លំដាប់ជាប្រទេសដែលមានអ្នកឆ្លងមេរោគកូវីដ-19 ច្រើនបំផុតលំដាប់លេខ1 របស់ពិភពលោក រួមទាំងមានចំនួនអ្នកស្លាប់ច្រើនជាងគេបំផុត លំដាប់លេខ2 ក្នុងពិភពលោក បន្ទាប់ពីអ៊ីតាលី ដែលមានអ្នកឆ្លងមេរោគ 143,626នាក់ និងស្លាប់ 18,279នាក់៕

ប្រភព៖ សារព័ត៌មានបរទេស

April 10, 2020

វៀតណាមបញ្ចេញកញ្ចប់ថវិកា 62លានលានដុងជាផ្លូវការ ដើម្បីជួយដល់អ្នកក្រខ្សត់ និងអាជីវករទន់ខ្សោយ

អ្នកក្រខ្សត់ចំនួន20លាននាក់ដែលទទួលរងផលប៉ះពាល់ពី COVID-19 នឹងទទួលបានជំនួយ1ផ្នែកពីកញ្ចប់ថវិកា 62,000,000,000,000ដុង ដោយយោងទៅតាមសេចក្ដីសម្រេចរបស់រដ្ឋាភិបាលដែលទើបតែបានអនុម័តនាពេលថ្មីៗនេះ។

សេចក្ដីសម្រេចដែលត្រូវបានធ្វើឡើងនៅក្នុងថ្ងៃទី10មេសានេះ នឹងផ្ដល់ជំនួយផ្ទាល់ដល់ពលរដ្ឋរងផលវិបាកដោយសារ COVID-19។ ពលរដ្ឋដែលនឹងទទួលបានជំនួយផ្ទាល់នេះ ត្រូវបានចែកចេញជា6ប្រភេទ រួមមាន៖

ទំហំទឹកប្រាក់ជំនួយរបស់រដ្ឋាភិបាលសម្រាប់ពលករ និងអាជីវករដែលទទួលរងផលប៉ះពាល់ពី COVID-19 សរុប 62លានលានដុង(ប្រមាណជា 2,660,000,000ដុល្លារអាមេរិក)។ ក្នុងនោះ ថវិការដ្ឋមានចំនួន 36លានលានដុង។ ក្រៅពីនេះក៏មានជំនួយជាលក្ខណៈប្រយោលជាច្រើនទៀតផងដែរ។

ក្នុងបទបញ្ជាខាងលើ រដ្ឋាភិបាលកំណត់ច្បាស់ថា ភាគីរដ្ឋ ក្រុមហ៊ុន និងសង្គមទាំងមូល ត្រូវចូលរួមចំណែកទទួលខុសត្រូវដើម្បីធានាដល់ជីវភាពរបស់ពលករ៕

ប្រភព៖ Vnexpress

April 10, 2020

ប្រៀបធៀប “មុន និងក្រោយ” ទិដ្ឋភាពក្នុងទីក្រុងវូហាន ដោយរូបភាព

សារព័ត៌មានស៊ីនហួ សូមនាំមិត្តអ្នកអានទាំងអស់ទៅទស្សនាទិដ្ឋភាពនៃបរិយាកាសក្នុងថ្ងៃដំបូង ក្រោយពីទីក្រុងវូហានលុបចោលបទបញ្ជា ហាមចេញក្រៅផ្ទះកាលពីថ្ងៃពុធ(ទី8មេសា) ធៀបនឹងទិដ្ឋភាពខណៈដែលទីក្រុងមួយនេះនៅបិទជិតនៅឡើយ ដែលមិនថាតែក្បួនរថយន្តដែលចតបន្តគ្នាជាជួររង់ចាំបង់ថ្លៃឆ្លងកាត់ផ្លូវហាយវេយ៍ អ្នកដំណើរដែលម្នាក់ៗពាក់ម៉ាស់ការពារ ខណៈជិះរថភ្លើង ជាដើម ដែលទាំងអស់នោះសុទ្ធតែបង្ហាញឱ្យឃើញថា មហាទីក្រុងនៃមណ្ឌលហ៊ូពេយ ភាគកណ្ដាលរបស់ប្រទេសចិនមួយនេះ បានចាប់ផ្ដើមវិលត្រឡប់មកមានជីវិតជីវ៉ាជាថ្មីម្ដងទៀត ក្រោយពីបានបិទទីក្រុង ដើម្បីទប់ទល់នឹងជំងឺឆ្លងដោយសារមេរោគវីរុសកូរ៉ូណាប្រភេទថ្មី ឬកូវីដ-19 អស់ជិត 11សប្ដាហ៍រួចមក។

ថ្ងៃពុធ(ទី8មេសា) អ្នកដំណើរនៅក្នុងស្ថានីយរថភ្លើង អ៊ូឆាង ទាំងអស់ 442នាក់ បានឡើងជិះរថភ្លើងលេខ សម្គាល់ K81 ដែលនឹងចេញដំណើរឆ្ពោះទៅទីក្រុងក្វាងចូវ ទីក្រុងឯករបស់មណ្ឌលក្វាងទុង ភាគខាងត្បូងប្រទេសចិន។

មានការប៉ាន់ប្រមាណទុកថា នឹងមានអ្នកដំណើរ ធ្វើដំណើរចេញពីទីក្រុងវូហានតាមរថភ្លើងច្រើនជាង 55,000 នាក់ ដែលប្រមាណ 40%នឹងធ្វើដំណើរឆ្ពោះទៅតំបន់ត្រីកោណតាមដងទន្លេជូចៀង ហើយនឹងមានក្បួនរថភ្លើង ដឹកអ្នកដំណើរ ដែលនឹងចេញដំណើរពីវូហាន ឆ្ពោះទៅមហានគរស៊ាងហៃ លើនជឹន និងទីក្រុងផ្សេងៗទៀតទាំងអស់ 276ក្បួនរថភ្លើង។

អង្គភាពអយស្ម័យយាន បានកំណត់ឱ្យអ្នកដំណើរត្រូវស្គែនលេខកូដសុខភាព និងពិនិត្យសីតុណ្ហភាពរាងកាយ ពេលចូលទៅក្នុងស្ថានីយ និងត្រូវពាក់ម៉ាស់អនាម័យការពារ ដើម្បីកាត់បន្ថយការប្រថុយប្រថានក្នុងការឆ្លងមេរោគ ខណៈដែលអាជ្ញាធរបានធ្វើការបាញ់ថ្នាំសម្លាប់មេរោគតាមទូរថភ្លើង តាមមាត់ទ្វារ ផ្លូវចូល ផ្លូវចេញ និងនៅតាមកន្លែងរង់ចាំមុននឹងឡើងជិះរថភ្លើង ទុកមុនរួចជាស្រេចហើយ។

ក្រៅពីនេះ នៅអាកាសយានដ្ឋានអន្តរជាតិវូហាន ធៀនហ៊ើ បានចាប់ផ្ដើមត្រឡប់មកផ្ដល់សេវាកម្មជើងហោះហើរក្នុងប្រទេសឡើងវិញ ដោយបានប៉ាន់ប្រមាណថា នឹងមានជើងហោះហើរចូល-ចេញ ក្នុងថ្ងៃពុធ(ទី8មេសា) ច្រើនជាង 200ជើង។

ទាំងអស់នេះ កាលពីថ្ងៃទី23 មករា វូហានបានប្រកាសប្រើបទបញ្ជា ហាមធ្វើដំណើរ ដែលអាចនិយាយបានថា ជាការបិទទីក្រុង គ្រាប្រវត្តិសាស្ត្រមួយ ដែលគ្របដណ្ដប់លើការផ្អាកប្រព័ន្ធដឹកជញ្ជូនសាធារណៈរបស់ទីក្រុងទាំងមូល រួមទាំងជើងហោះហើរ និងខ្សែរថភ្លើងចេញ-ចូលទាំងអស់ ដែលទាំងអស់នេះ ជាការព្យាយាមក្នុងការការពារការឆ្លងរាលដាលរបស់មេរោគ៕

ប្រភព៖សារព័ត៌មានបរទេស

April 10, 2020

អាមេរិកាំងបន្តចោទ WHO ថា “កាន់ជើងចិន” ព្រោះមិនអើពើដល់មតិតៃវ៉ាន់ ខណៈចិនចោទតៃវ៉ាន់ថាចង់បានឯករាជតាមរយៈ COVID-19

សហរដ្ឋអាមេរិកបានចោទប្រកាន់ថា អង្គការសុខភាពពិភពលោក(WHO) បានមើលបញ្ហានយោបាយធំជាងបញ្ហាសុខភាពសាធារណៈ នៅពេលអង្គការនេះមិនបានយកចិត្តទុកដាក់ទៅលើការព្រមានដំបូងរបស់កោះតៃវ៉ាន់អំពីវីរុសCOVID-19។

សហរដ្ឋអាមេរិក “មានការព្រួយបារម្ភខ្លាំងណាស់អំពីបញ្ហាព័ត៌មានរបស់តៃវ៉ាន់ដែលត្រូវបានគេលាក់បាំងពីសហគមន៍សុខាភិបាលសកល។ ប្រការនេះត្រូវបានបង្ហាញដោយការប្រកាសកាលពីថ្ងៃទី14មករា របស់ WHO ថា មិនមានសញ្ញា COVID-19 ដែលឆ្លងពីមនុស្សទៅមនុស្ស” នេះបើតាមសម្ដីរបស់អ្នកនាំពាក្យក្រសួងការបរទេសសហរដ្ឋអាមេរិក កាលពីថ្ងៃទី9មេសា។

ក្រសួងការបរទេសអាមេរិកាំងយល់ថា WHO ធ្វើសកម្មភាពយឺតយ៉ាវខ្លាំងពេកក្នុងការប្រកាសព្រមានអំពី COVID-19 ព្រមទាំងការពារប្រទេសចិនដោយហួសហេតុ។ ទន្ទឹមនឹងនេះ អាមេរិកាំងក៏បានដាក់ជាសំណួរទាក់ទិននឹងមូលហេតុដែល WHO មិនយកចិត្តទុកដាក់លើការព្រមានកាលពីដំបូងរបស់កោះតៃវ៉ាន់ផងដែរ។

អ្នកនាំពាក្យរបស់ក្រសួងការបរទេសសហរដ្ឋអាមេរិកថ្លែងថា “WHO សាជាថ្មីម្ដងទៀត បានយកបញ្ហានយោបាយធំជាងបញ្ហាសុខាភិបាលសាធារណៈ”។ អ្នកនាំពាក្យរូបនេះក៏បានរិះគន់ WHO ផងដែរ ព្រោះតែបានបដិសេធតួនាទីជាអ្នកសង្កេតការណ៍របស់តៃវ៉ាន់នៅក្នុងអង្គការសុខភាពពិភពលោកតាំងពីឆ្នាំ2016។ “សកម្មភាពរបស់ WHO បានធ្វើឱ្យខាតបង់ពេលវេលា និងអាយុជីវិតមនុស្សយ៉ាងច្រើន”។

កោះតៃវ៉ាន់ ដែលជាដែនដីដែលទទួលបានជោគជ័យច្រើនក្នុងការទប់ស្កាត់COVID-19 ដោយមានអ្នកឆ្លងមេរោគត្រឹមតែ380នាក់ និងស្លាប់5នាក់បើទោះជាមានទីតាំងភូមិសាស្ត្រក្បែរប្រទេសចិន បានព្រមាន WHO កាលពីថ្ងៃទី31ធ្នូរ2019 អំពីលទ្ធភាពឆ្លងពីមនុស្សទៅមនុស្សរបស់វីរុសCOVID-19។ នេះបើតាមការឱ្យដឹងពីមន្ត្រីជាន់ខ្ពស់របស់តៃវ៉ាន់ Chen Chien-Jen។

លោក Chen Chien-Jen ដែលជាអ្នកជំនាញផ្នែកជំងឺឆ្លង ធ្លាប់បានប្រាប់សារព័ត៌មាន Financial Times ថា ក្រុមវេជ្ជបណ្ឌិតតៃវ៉ាន់ដឹងថា អ្នករួមអាជីពរបស់ពួកគេនៅឯទីក្រុង Wuhan បានឆ្លងវីរុស ក៏ប៉ុន្តែ WHO មិនបានធ្វើសកម្មភាពដើម្បីបញ្ជាក់អំពីការរកឃើញនេះនោះទេ។

ប្រទេសចិន តែងតែចាត់ទុកកោះតៃវ៉ាន់ជាចំណែកមួយនៃដែនដីរបស់ខ្លួនដែលរង់ចាំតែការបង្រួបបង្រួមប៉ុណ្ណោះ បើទោះត្រូវប្រើកម្លាំងទ័ព។ កោះតៃវ៉ាន់ធ្លាប់មានតួនាទីជាអ្នកសង្កេតការណ៍នៅក្នុងសន្និបាតប្រចាំឆ្នាំរបស់ WHO។ ក៏ប៉ុន្តែ ឥទ្ធិពលពីទីក្រុងប៉េកាំងក្នុងរយៈពេលច្រើនឆ្នាំចុងក្រោយនេះ បានរុញកោះតៃវ៉ាន់ចេញពីអង្គការអន្តរជាតិធំៗរបស់ពិភពលោក។

ប្រធាន WHO លោក Tedros Adhanom Ghebreyesus កាលពីថ្ងៃទី8មេសា បានចោទប្រកាន់តៃវ៉ាន់ថាជាអ្នកនាំអាទិ៍ក្នុងការរិះគន់មកលើរូបលោក។ ប៉ុន្តែ កោះតៃវ៉ាន់បានបដិសេធការចោទប្រកាន់នេះ ហើយស្នើឱ្យ Tedros បកស្រាយ និងសុំទោស។

នៅក្នុងអត្ថបទដែលបង្ហោះលើបណ្ដាញសង្គម Facebook កាលពីម្សិលមិញ មេដឹកនាំកោះតៃវ៉ាន់ Tsai Ing-wen បានអញ្ជើញ Tedros មកកាន់កោះតៃវ៉ាន់ និងរៀនសូត្រអំពីវិធីទប់ទល់នឹងមេរោគរាតត្បាតពីកោះនេះ។ លោកស្រី Tsai Ing-wen ថ្លែងថា “យើងត្រូវបានរុញច្រានចេញពីអង្គការអន្តរជាតិនានាក្នុងរយៈពេលជាច្រើនឆ្នាំមកនេះ ដូច្នេះ យើងដឹងច្បាស់អំពីអារម្មណ៍ដែលត្រូវគេរើសអើង និងដាក់ឱ្យនៅឯកោច្រើនជាងអ្នកណាៗទាំងអស់”។

ចំណែកប្រទេសចិនឯណេះវិញ បានប្រតិកម្ម និងបដិសេធការបញ្ចេញមតិរបស់មេដឹកនាំកោះតៃវ៉ាន់ ហើយចោទកោះនេះថា បានចូលរួម “ឧបាយកលនយោបាយ” ដែលធ្វើទៅលើ WHO។ “គោលបំណងរបស់ពួកគេ គឺស្វែងរកឯករាជតាមរយៈអាសន្នរោគ។ យើងប្ដេជ្ញាបដិសេធចោលប្រការនេះ ហើយផែនការរបស់ពួកគេនឹងមិនបានសម្រេចនោះទេ” នេះបើតាមសម្ដីរបស់អ្នកនាំពាក្យក្រសួងការបរទេសចិន។

មនុស្សជាច្រើន រួមទាំងមន្ត្រីជាន់ខ្ពស់នានារបស់សហរដ្ឋអាមេរិក យល់ថា ក្រោមការដឹកនាំរបស់ Tedros អង្គការ WHO មានភាពជិតស្និទ្ធខ្លាំងពេកជាមួយនឹងប្រទេសចិន។ ប្រធានាធិបតី Donald Trump ថែមទាំងបាននិយាយថា WHO “លម្អៀងទៅរកប្រទេសចិន” ទៀតផង។

ទោះជាយ៉ាងណាក៏ដោយ លោក Tedros បានបដិសេធការចោទប្រកាន់នេះ។ ប្រធានអង្គការសុខភាពពិភពលោករូបនេះក៏បានអំពាវនាវពិភពលោកទាំងមូល ឱ្យសាមគ្គីគ្នាដើម្បីប្រយុទ្ធប្រឆាំងនឹងវីរុស និងមិនគួរយករឿងសុខភាពទៅភ្ជាប់ជាមួយរឿងនយោបាយនោះទេ៕

ប្រភព៖ AFP

April 10, 2020

តឹងរ៉ឹងបំផុតហើយ នៅតែទប់មិនឈ្នះ! 1ថ្ងៃ សិង្ហបុរីរកឃើញអ្នកឆ្លងវីរុសថ្មី 287នាក់ ជាចំនួនខ្ពស់បំផុតតាំងពីមានកូវីដ-19

ប្រទេសសិង្ហបុរី បានអះអាងថា រកឃើញអ្នកឆ្លងមេរោគវីរុសកូរ៉ូណាប្រភេទថ្មី ឬកូវីដ-19 ថែមទៀត 287នាក់ កាលពីថ្ងៃព្រហស្បតិ៍(ទី9មេសា)ម្សិលមិញ គឺជាចំនួនអ្នកឆ្លងមេរោគប្រចាំថ្ងៃដែលខ្ពស់បំផុត រាប់ចាប់ពីមេរោគកូវីដ-19 ចាប់ផ្ដើមឆ្លងរាតត្បាតនៅក្នុងប្រទេសមួយនេះ ដែលបណ្ដាលឱ្យចំនួនអ្នកឆ្លងមេរោគកំណាចនេះកើនដល់ 1,910នាក់ បើទោះជាសិង្ហបុរីជាប្រទេសមួយក្នុងចំណោមប្រទេសដែលប្រើវិធានការបែបតឹងរ៉ឹងបំផុតក្នុងការទប់ទល់នឹងឆ្លងរាលដាលក៏ដោយ។

ក្នុងចំណោមអ្នកឆ្លងមេរោគថ្មីទាំងនោះ មានជាង 200នាក់ ពាក់ព័ន្ធនឹងការឆ្លងរាលដាលនៅក្នុងបន្ទប់ស្នាក់នៅរបស់ពលករចំណាកស្រុកបរទេស ដោយសិង្ហបុរី បានបង្ខាំងពលករចំនួនរាប់ពាន់ឱ្យនៅដាច់ដោយឡែកនៅតាមបន្ទប់ស្នាក់ផ្សេងៗ ក្រោយពីមនុស្សទាំងអស់នោះ មានការពាក់ព័ន្ធនឹងអ្នកឆ្លងមេរោគកូវីដ-19 ជាច្រើនករណី។

រហូតមកដល់ពេលនេះ មានអ្នកស្លាប់ដោយសារមេរោគកូវីដ-19 នេះរួចហើយ 6នាក់ ហើយអាជ្ញាធរក៏កំពុងតែស៊ើបអង្កេតករណីការស្លាប់របស់មនុស្សទី7 ដែលឆ្លងមេរោគនេះ តែក៏មានអាការជ្រៀតជ្រែកពីរោគផ្សេងៗទៀតផងដែរ។

តួលេខអ្នកឆ្លងមេរោគថ្មីក្នុងប្រទេសសិង្ហបុរី ក្នុងថ្ងៃព្រហស្បតិ៍(ទី9មេសា) កើនឡើងជាងទ្វេដងពីមួយថ្ងៃមុនហ្នឹង ដោយនៅថ្ងៃពុធ(ទី8មេសា) សិង្ហបុរីបានរាយការណ៍អំពីការរកឃើញអ្នកឆ្លងមេរោគថ្មីត្រឹមតែ 142នាក់ប៉ុណ្ណោះ។

សិង្ហបុរី ជាប្រទេសមួយ ដែលទទួលបានការកោតសរសើរ ក្នុងរឿងការចាត់វិធានការទប់ស្កាត់មេរោគវីរុសដ៏មានប្រសិទ្ធភាព ទាំងការត្រួតពិនិត្យលម្អិតពលរដ្ឋចំនួនដ៏ច្រើន រួមទាំងការតាមដានអ្នកដែលធ្លាប់ប៉ះពាល់ជិតស្និទ្ធជាមួយអ្នកជំងឺកូវីដ-19 ទៀតផង។

កាលពីអំឡុងចុងសប្ដាហ៍កន្លងទៅ រដ្ឋបាលសិង្ហបុរីបានបញ្ជាបិទសាលារៀនគ្រប់កន្លែង និងទីកន្លែងធ្វើការភាគច្រើន ព្រមទាំងបញ្ជាឱ្យប្រជាជនសម្ងំនៅតែក្នុងផ្ទះ ដើម្បីកាត់បន្ថយចំនួនអ្នកឆ្លងមេរោគវីរុសកូរ៉ូណាប្រភេទថ្មី ឬកូវីដ-19 តែយ៉ាងណាក៏ដោយ ទីបំផុត តួលេខអ្នកឆ្លងជំងឺ ក៏កើនឡើងខ្ពស់បំផុត លុបស្ថិតិកាលពីពេលកន្លងទៅ កាលពីថ្ងៃព្រហស្បតិ៍ម្សិលមិញ។

កាលពីពេលមុនហ្នឹង រដ្ឋបាលសិង្ហបុរី បានចេញបញ្ជាជាថ្មី ឱ្យប្រជាជនស្ថិតនៅឆ្ងាយពីគ្នានៅក្នុងទីសាធារណៈ យ៉ាងហោចណាស់ 1ម៉ែត្រ។ ចាប់តាំងពីថ្ងៃសុក្រ ទី27 មីនារហូតមក មួយផ្នែកនៃវិធានការការពារការឆ្លងរាលដាលមេរោគកូវីដ-19 និងនរណាក៏ដោយដែលល្មើសបទបញ្ជារក្សាគម្លាតឆ្ងាយពីគ្នានេះ អាចនឹងដល់ថ្នាក់ត្រូវជាប់ពន្ធនាគារ។

អ្នកល្មើសបទបញ្ជា នឹងមានទោសពិន័យប្រាក់ខ្ពស់បំផុត 20,000ដុល្លារសិង្ហបុរី(ប្រហែល 7,000ដុល្លារអាមេរិក) ឬជាប់ពន្ធនាគារ 6ខែ ឬទាំងពិន័យ និងជាប់ពន្ធនាគារ ដោយបទបញ្ជានេះ មានប្រសិទ្ធភាពរហូតដល់ថ្ងៃទី30 ខែមេសានេះ សម្រាប់ប្រជាជនគ្រប់រូប៕

ប្រភព៖ សារព័ត៌មានបរទេស

April 10, 2020

Category: អន្តរជាតិ