Category: អន្តរជាតិ

ទិដ្ឋភាពគួរឱ្យភ្ញាក់ផ្អើល!! រថយន្តសង្គ្រោះចតបន្តកន្ទុយគ្នារាប់គីឡូម៉ែត្រ ព្រោះមេរោគកូវីដ-19 ធ្វើឱ្យមន្ទីរពេទ្យនៅរុស្ស៊ី ទទួលអ្នកជំងឺលែងទាន់… (មានឃ្លីប)
ក្នុងខណៈដែលបញ្ហាការចរាចរណែនណាន់តាន់តាប់នៅលើទ្រូងផ្លូវផ្សេងៗនៅក្នុងទីក្រុងមូស្គូលែងក្លាយជាបញ្ហាក្ដៅតទៅទៀត ដោយសារតែវិធានការបិទទីក្រុង ដើម្បីទប់ស្កាត់ការឆ្លងរាលដាលរបស់មេរោគវីរុសកូរ៉ូណាប្រភេទថ្មី ឬកូវីដ-19 ហើយនោះ អង្គភាពពេទ្យសង្គ្រោះបន្ទាន់របស់ទីក្រុងមួយនេះ ត្រូវជួបនឹងបញ្ហាមួយយ៉ាងមិននឹកស្មានដល់ នោះគឺ រថយន្តសង្គ្រោះបន្ទាន់ជាច្រើន ត្រូវចតបន្តកន្ទុយគ្នាជាជួរយ៉ាងវែងរាប់គីឡូម៉ែត្រ នៅខាងក្រៅមន្ទីរពេទ្យនានាដើម្បីដឹកជញ្ជូនអ្នកជំងឺ និងបុគ្គលដែលត្រូវសង្ស័យថា ឆ្លងមេរោគ។ នេះបើតាមសារព័ត៌មាន រុស្ស៊ី ធូដេយ៍ របស់ប្រទេសរុស្ស៊ី។
ទិដ្ឋភាពរថយន្តសង្គ្រោះបន្ទាន់ ចតបន្តកន្ទុយគ្នាជាជួរយ៉ាងវែង ត្រូវគេថតបាននៅបរិវេណខាងក្រៅរបស់មន្ទីរពេទ្យអតីតយុទ្ធជន ដែលស្ថិតនៅប៉ែកខាងជើងទីក្រុងមូស្គូកាលពីថ្ងៃសុក្រសប្ដាហ៍មុន ដោយនៅក្នុងខ្សែវីដេអូ ដែលបានផ្សព្វផ្សាយដោយអ្នកសារព័ត៌មានរុស្ស៊ីនោះ នៅបានបង្ហាញឱ្យឃើញថា មានរថយន្តដែលមានសញ្ញាកាកបាតទាំងនោះ មិនមែនគ្រាន់តែដណ្ដើមយកតែផ្លូវដែលតម្រង់ឆ្ពោះទៅមន្ទីរពេទ្យប៉ុណ្ណោះទេ តែនៅមានរថយន្តសង្គ្រោះចំនួនដ៏ច្រើនទៀត បានចតនៅលើផ្លូវខាងៗក្បែរនោះទៀតផង ខណៈដែលមន្ទីរពេទ្យមួយនេះ ត្រូវបានកែច្នៃទៅជាមណ្ឌលព្យាបាលថែទាំអ្នកជំងឺកូវីដ-19 កាលពីពេលថ្មីៗនេះ។
របាយការណ៍បានបញ្ជាក់ថា អ្នកជំងឺ និងអ្នកត្រូវសង្ស័យថា ឆ្លងមេរោគកូវីដ-19 ត្រូវរង់ចាំដល់ទៅ 15ម៉ោង ទម្រាំនឹងទៅដល់ដៃគ្រូពេទ្យ។
ស្ថានការណ៍នៅក្នុងមន្ទីរពេទ្យអតីតយុទ្ធជន មានមែនជាហេតុការណ៍តែមួយដែលបានកើតឡើងនោះទេ ដោយនៅក្នុងឃ្លីបវីដេអូ 1ទៀត គេបានឃើញរថយន្តសង្គ្រោះបន្ទាន់ជាច្រើនសិបគ្រឿងទៀត កំពុងចតបន្តកន្ទុយគ្នាយ៉ាងវែងរាប់គីឡូម៉ែត្រ នៅលើផ្លូវដែលតម្រង់ឆ្ពោះទៅមន្ទីរពេទ្យមួយ នៅក្នុងក្រុងឃីមគី ជិតព្រលានយន្តហោះសេរេមេតៀវ៉ូ ដែលនៅក្នុងរថយន្តនីមួយៗ សុទ្ធតែផ្ទុកអ្នកត្រូវសង្ស័យថា បានឆ្លងមេរោគកូវីដ-19 ហើយអ្នកត្រូវសង្ស័យទាំងនោះ ត្រូវរង់ចាំជាច្រើនម៉ោង ទម្រាំនឹងបានចូលទៅពិនិត្យរោគនៅក្នុងមន្ទីរពេទ្យ។
មន្ត្រីនៃមជ្ឈមណ្ឌលទប់ទល់វិបត្តិវេជ្ជសាស្ត្រ ដែលទទួលខុសត្រូវក្នុងការតស៊ូប្រឆាំងនឹងមេរោគវីរុសកូរ៉ូណាប្រភេទថ្មីនៅក្នុងប្រទេសរុស្ស៊ី បានបង្ហើបប្រាប់ទីភ្នាក់ងារព័ត៌មាន RT news របស់សារព័ត៌មាន រុស្ស៊ី ធូដេយ៍ ថា ជួររថយន្តសង្គ្រោះដែលតគ្នាវែងអន្លាយនៅខាងក្រៅមន្ទីរពេទ្យនានានោះ គឺបណ្ដាលមកពីស្ថានការណ៍រោគរាតត្បាតនាពេលបច្ចុប្បន្ន ដែលគេប្រទះឃើញ មានអ្នកជំងឺដ៏ច្រើននាំគ្នាសម្រុកចូលមកមន្ទីរពេទ្យ ក្នុងអំឡុងពេលប៉ុន្មានថ្ងៃកន្លងមកនេះ។
រឿងបែបនេះ ប្រហែលជារឿងដែលទទួលយកមិនបាននោះទេ បើសិនមណ្ឌលព្យាបាលទាំងឡាយធ្វើការក្រោមករណីប្រក្រតី តែយ៉ាងណាក៏ដោយ ក្រុមគ្រូពេទ្យបានប្រាប់ថា ពួកគេកំពុងស្ថិតក្រោមសម្ពាធដែលកើនឡើងក្នុងពេលបច្ចុប្បន្ន និងបានសូមទោសអ្នកជំងឺ សម្រាប់ភាពមិនងាយស្រួលដែលកើតឡើងទាំងប៉ុន្មាន។
https://www.youtube.com/watch?v=Rs5bLMB1NhQ&feature=emb_logo
រហូតមកដល់ថ្ងៃព្រហស្បតិ៍(ទី16 មេសា)ម្សិលមិញ ប្រទេសរុស្ស៊ី មានអ្នកឆ្លងមេរោគកូវីដ-19 សរុប 27,938នាក់ តែនៅក្នុងនោះ ស្លាប់ត្រឹមតែ 232នាក់ប៉ុណ្ណោះ ដែលចំនួននេះអាចរាប់បានថា តិចតួចខ្លាំងណាស់ បើធៀបនឹងប្រទេសផ្សេងៗទៀតនៅក្នុងទ្វីបអឺរ៉ុបដូចគ្នា៕
ប្រភព៖ សារព័ត៌មានបរទេស
April 17, 2020
COVID-19! កូនស្រី និងទីប្រឹក្សាជាន់ខ្ពស់របស់លោកTrump ទៅលម្ហែកាយ ខណៈបម្រាមគោចរកំពុងត្រូវបានអនុវត្ត
លោកស្រី Ivanka Trump និងស្វាមី (លោក Jared Kushner) បាននាំគ្នាទៅសម្រាកលម្ហែកាយនៅ New Jersey បើទោះជារដ្ឋាភិបាលអាមេរិកាំងបានចេញអនុសាសន៍កាត់បន្ថយការដើរហើរដើម្បីទប់ស្កាត់វីរុសCOVID-19។
ប្ដីប្រពន្ធដែលជាកូនរបស់ប្រធានាធិបតីអាមេរិកាំង បានធ្វើដំណើរពីទីក្រុង Washington D.C ទៅកាន់ទីតាំងលម្ហែកាយរបស់គ្រួសារ Trump នៅឯតំបន់ Bedminster ក្នុងរដ្ឋ New Jersey ដើម្បីអបអរបុណ្យ Passover (ជាថ្ងៃបុណ្យសាសនាដ៏ធំមួយរបស់ជនជាតិជ្វីហ្វ/Jewish) ដែលមានរយៈពេល1សប្ដាហ៍ ចាប់ផ្ដើមពីថ្ងៃទី8មេសា។ ព័ត៌មាននេះត្រូវបានទទួលស្គាល់កាលពីថ្ងៃទី16មេសាដោយសេតវិមាន។ ប៉ុន្តែ សេតវិមានបញ្ជាក់ថា ដំណើរទៅលម្ហែកាយនេះ មានតែសមាជិកក្រុមគ្រួសារតូចរបស់លោកស្រី Ivanka តែប៉ុណ្ណោះ។
សេតវិមានប្រកាសថា “លោកស្រី Ivanka និងគ្រួសារតួចរបស់ខ្លួនបានប្រារព្ធពិធីបុណ្យ Passover នៅក្នុងតំបន់លម្ហែកាយមួយដែលបានផ្អាកដំណើរការ ដែលត្រូវចាត់ទុកដូចជាផ្ទះ។ ដំណើររបស់លោកស្រី មិនខុសពីការទៅបំពេញការងារនោះទេ ហើយទីតាំងនោះមានមនុស្សតិចជាងនៅជុំវិញផ្ទះរបស់លោកស្រីដែលនៅឯរដ្ឋធានីទៅទៀត”។
“ពេលស្ថិតនៅឯ Bedminster លោកស្រី Iavnka អនុវត្តវិធានការរក្សាគម្លាតពីសហគមន៍ និងធ្វើការពីចម្ងាយ។ ដំណើរលម្ហែកាយរបស់នេះ មិនមែនសំដៅលើការធ្វើជំនួញនោះទេ ប៉ុន្តែជាការសម្រាកដោយឡែកជាមួយគ្រួសារ”។
ប្រជាជនក្នុងទីក្រុង Washington D.C និងតំបន់ជាច្រើនផ្សេងទៀតនៅសហរដ្ឋអាមេរិក ត្រូវបានស្នើឱ្យនៅក្នុងផ្ទះ ចៀសវាងការធ្វើដំណើរដែលមិនចាំបាច់ក្នុងស្ថានភាព COVID-19 កំពុងមានសភាពស្មុគស្មាញ។ សេតវិមានក៏បានចេញអនុសាសន៍ “ចៀសវាងការដើរហើរផ្ដេសផ្ដាស” ធ្វើឱ្យប្រជាជនអាមេរិកាំង ត្រូវប្រារព្ធពិធីចួបជុំគ្រួសារនៅក្នុងពិធីបុណ្យ Easter និងបុណ្យ Passover ក្នុងឆ្នាំនេះ ដោយវិធីសាស្ត្រអនឡាញ។
ក្នុងតួនាទីជាទីប្រឹក្សាផ្ទាល់របស់ប្រធានាធិបតីអាមេរិកាំង លោកស្រី Ivanka បានអំពាវនាវឱ្យពលរដ្ឋអាមេរិកាំង គោរពវិធានការរបស់រដ្ឋាភិបាលដើម្បីទប់ស្កាត់ COVID-19។
លោក Jared Kushner ដែលជាស្វាមីរបស់លោកស្រី Ivanka គឺជាជនជាតិជ្វីហ្វ និងកាន់សាសនាយូដា។ Passover គឺជាពិធីបុណ្យសំខាន់របស់សាសនាយូដា (Judaism) ដែលប្រារព្ធឡើងដើម្បីអបអរព្រះដែលបានរំដោះប្រជាជនអ៊ីស្រាអែលឱ្យរួចផុតពីនឹមត្រូតត្រានៅអេហ្ស៊ីប។ លោក Jared Kushner ក៏ជាទីប្រឹក្សាជាន់ខ្ពស់របស់ប្រធានាធិបតីអាមេរិកាំងផងដែរ។
COVID-19 បានបង្ហាញខ្លួនក្នុងប្រទេស និងដែនដីចំនួន210នៅទូទាំងពិភពលោក បណ្ដាលឱ្យមនុស្សជិត2.2លាននាក់បានឆ្លងវីរុស ក្នុងនោះមានជិត145,000នាក់បានស្លាប់។ ចំណែកសហរដ្ឋអាមេរិកវិញ គឺជាសម្បុកមេរោគធំជាងគេក្នុងពិភពលោក ដោយមានអ្នកជំងឺជិត678,000នាក់ ខណៈអ្នកស្លាប់បានកើនជិតដល់35,000នាក់៕
ប្រភព៖ សារព័ត៌មានបរទេស
April 17, 2020
ជប៉ុន ប្រកាសដាក់ប្រទេសក្នុងសភាវគ្រាអាសន្ន និងចែកប្រាក់ប្រជាជនម្នាក់ 100,000យ៉េន
ជនជាតិជប៉ុនចំនួនដ៏ច្រើនក្នុងទីក្រុងតូក្យូកំពុងធ្វើដំណើរមកស្ថានីយរថភ្លើង ឈីណាហ្កាវៈ ដើម្បីជិះរថភ្លើងទៅធ្វើការ ទោះជាមានការប្រកាសដាក់ប្រទេសក្នុងសភាវអាសន្ន កាលពីថ្ងៃម្សិលមិញ(ព្រហស្បតិ៍ ទី16 មេសា)ក៏ដោយ…
រដ្ឋភិបាលជប៉ុន បានសម្រេចចិត្តប្រកាសសភាវគ្រាអាសន្នទូទាំងប្រទេសហើយ ក្រោយមានការឆ្លងរាលដាលរបស់វីរុសកូវីដ-19 កាន់តែអាក្រក់ឡើងៗ ដោយលោកនាយករដ្ឋមន្ត្រីបានបង្ហើបឱ្យដឹងថា កំពុងត្រៀមចែកប្រាក់ដល់ប្រជាជនក្នុងម្នាក់ 100,000យ៉េន(ជិត 1,000ដុល្លារអាមេរិក)។
ទីភ្នាក់ងារព័ត៌មាន BBC បានរាយការណ៍ថា រដ្ឋាភិបាលជប៉ុន បានប្រកាសដាក់ប្រទេសក្នុងសភាវអាសន្នហើយ កាលពីថ្ងៃទី16 មេសា ម្សិលមិញ ដែលកាលពីមុន បានប្រកាសតែនៅក្នុងខេត្តចំនួន7 រួមទាំងទីក្រុងតូក្យូប៉ុណ្ណោះ ក្រោយពីស្ថានការណ៍ឆ្លងរាលដាលរបស់មេរោគកូវីដ-19 នៅក្នុងប្រទេសកាន់តែអាក្រក់ឡើង ដោយមានអ្នកឆ្លងមេរោគសរុបច្រើនជាង 9,000នាក់ ក្នុងចំនួននេះ មានអ្នកស្លាប់រួចហើយ 178នាក់ និងព្យាបាលជាសះស្បើយបានត្រឹមតែ 901នាក់ ដោយការប្រកាសនេះ នឹងមានសុពលភាពរហូតដល់ថ្ងៃទី6 ខែឧសភា ខាងមុខ។
ការប្រកាសសភាវគ្រាអាសន្នរបស់រដ្ឋាភិបាលជប៉ុន នឹងធ្វើឱ្យរដ្ឋបាលនៅក្នុងខេត្តនីមួយៗ អាចអំពាវនាវឱ្យប្រជាជនស្ថិតនៅតែក្នុងផ្ទះបាន តែនឹងមិនមានវិធានការដាក់ទោសអ្នកល្មើសក្នុងករណីចំនួនច្រើន ឬក៏ការបញ្ជាខាងច្បាប់ឡើយ។
លោកនាយករដ្ឋមន្ត្រី ស៊ីនហ្សូ អាបេ រួមប្រជុំជាមួយអ្នកជំនាញការផ្នែកវេជ្ជសាស្ត្រ
លោកនាយករដ្ឋមន្ត្រី ស៊ីនហ្សូ អាបេ នៃប្រទេសជប៉ុន បានថ្លែងក្នុងអំឡុងការប្រជុំលើរបៀបវារៈពិសេស ជាមួយអ្នកជំនាញការផ្នែកពេទ្យថា ទីតាំងដែលមានការប្រកាសសភាវអាសន្ន គួរតែពង្រីកចេញពី 7ខេត្ត ទៅជាគ្រប់ខេត្តទូទាំងប្រទេសតែម្ដង និងសូមអំពាវនាវឱ្យប្រជាជនកាត់បន្ថយការជួបជុំគ្នាឱ្យបានយ៉ាងតិច 80% ដើម្បីជួយបន្ថយការឆ្លងរាលដាលរបស់មេរោគវីរុសកូវីដ-19 ខណៈដែលធុរកិច្ចផ្សេងៗ ឱ្យបង្កើនការធ្វើការងារពីចម្ងាយរបស់បុគ្គលិកឱ្យបានយ៉ាងតិច 70%ទៀតផង។
ខណៈដែលទីភ្នាក់ងារព័ត៌មាន នីបប៉ុន របស់ជប៉ុនក៏បានបញ្ជាក់ដែរថា លោក អាបេ បានត្រៀមឱ្យរដ្ឋបាលចែកលុយសុទ្ធដល់ប្រជាពលរដ្ឋគ្រប់រូប ម្នាក់ៗ 100,000យ៉េន(ជិត 1,000ដុល្លារអាមេរិក) ដោយបញ្ជាឱ្យគណបក្សរដ្ឋាភិបាល “សេរីប្រជាធិបតេយ្យ” ពិចារណាពិនិត្យកែច្បាប់ថវិកាពិសេសសម្រាប់ឆ្នាំថវិកា2020 មិនប៉ុន្មានថ្ងៃមុន ដោយលោកនឹងដាក់ស្នើច្បាប់នេះទៅឱ្យរដ្ឋសភាពិចារណា និងមិនមានការកម្រិតប្រាក់ចំណូលសម្រាប់ការចែកប្រាក់នេះទេ គឺដើម្បីឃុំគ្រងសេដ្ឋកិច្ចពីផលប៉ះពាល់ដោយសារការឆ្លងរាតត្បាតរបស់វីរុស។ យ៉ាងណាក៏ដោយ ប្រភពព័ត៌មានបានបញ្ជាក់ថា រដ្ឋាភិបាលអាចលុបចោលផែនការចែកលុយសុទ្ធ 300,000យ៉េនទៅឱ្យគ្រួសារណាដែលមានបញ្ហាខាងហិរញ្ញវត្ថុ។
ចំណែកលោក យ៉ាស៊ុតូឈិ និឈិមូរៈ រដ្ឋមន្ត្រីទទួលបន្ទុកផ្នែកវិធានការបន្ទាន់របស់ជប៉ុន បានថ្លែងថា ការពង្រីកសភាវគ្រាអាសន្នឱ្យគ្របដណ្ដប់ទូទាំង 47ខេត្តក្នុងប្រទេសនេះ ជារឿងចាំបាច់ដែលត្រូវតែធ្វើ មុននឹងដល់អំឡុងពេល Golden week ជាអំឡុងពេលដែលមានថ្ងៃឈប់សម្រាកជាតិ ដល់ទៅ 4ថ្ងៃជាប់គ្នា ក្នុងសប្ដាហ៍តែមួយ ដោយសភាវគ្រាអាសន្ននឹងត្រូវប្រកាសឱ្យប្រើរហូតដល់ថ្ងៃទី6 ខែឧសភា ដែលជាថ្ងៃចុងក្រោយរបស់ Golden week។
មន្ត្រីសាលាក្រុង ហ្វ៊ូគូយ៉ៈ ក្នុងខេត្តសៃតាម៉ៈ ប្រើផ្ទាំងប្លាស្ទិកឃាំងតុធ្វើការ ដើម្បីការពារវីរុសឆ្លងសាយភាយ
ការប្រកាសសភាវគ្រាអាសន្នទូទាំងប្រទេស បានកើតឡើងក្នុងខណៈដែលមានសំឡេងរិះគន់ចំពោះលោក អាបេ ចាប់ផ្ដើមលាន់ឮខ្លាំងឡើងជារឿយៗ ដោយលទ្ធផលប្រជាមតិ និងការយល់ឃើញរបស់ប្រជាពលរដ្ឋជប៉ុន បានបង្ហាញថា មនុស្ស 75% គិតថា លោកនាយករដ្ឋមន្ត្រីម្នាក់នេះប្រើពេលវេលាយូរជ្រុលពេក ទម្រាំនឹងប្រកាសសភាវអាសន្នក្នុងទីក្រុងតូក្យូ ដោយត្រូវរង់ចាំឱ្យចំនួនអ្នកឆ្លងមេរោគហក់ឡើងខ្ពស់ កាលពីអំឡុងដើមខែកន្លងទៅ ទើបប្រកាស។
ក្រោយពីសភាវគ្រាអាសន្ន ត្រូវបានប្រកាសឱ្យប្រើនៅក្នុង 7ខេត្ត កាលពីថ្ងៃទី8 មេសាមក អភិបាលខេត្តផ្សេងៗទៀតរបស់ជប៉ុន ក៏ចេញមកអំពាវនាវឱ្យរដ្ឋាភិបាលប្រកាសសភាវគ្រាអាសន្ននៅក្នុងខេត្តរបស់ពួកគេផង ដោយសារតែចំនួនអ្នកឆ្លងមេរោគបានកើនឡើងយ៉ាងបន្តបន្ទាប់ ហើយក្រុមមន្ត្រីពេទ្យ ត្រូវទប់ទល់ជាមួយអ្នកជំងឺក្នុងចំនួនដ៏ច្រើន។ អភិបាលក្រុងអូសាកា ដល់ថ្នាក់ត្រូវសុំអង្វរឱ្យមានការបរិច្ចាគអាវភ្លៀងពីប្រជាជន ដើម្បីឱ្យបុគ្គលិកខាងផ្នែកពេទ្យ បានប្រើធ្វើជាឧបករណ៍ការពារ ដោយសារតែឧបករណ៍បែបនេះមានការខ្វះខាតខ្លាំង។
សាលហាត់ប្រាណមួយនៅក្នុងខេត្តខាណាហ្កាវៈ ត្រូវបានផ្លាស់ប្ដូរទៅជាកន្លែងស្នាក់នៅបណ្ដោះអាសន្ន សម្រាប់អ្នកដែលគ្មានថវិកាជួលបន្ទប់អាផាតមិនត៍នៅ ក្នុងអំឡុងវិបត្តិកូវីដ-19
ទាំងអស់នេះ ជប៉ុនបានរកឃើញអ្នកឆ្លងមេរោគកូវីដ-19 ដំបូងគេតាំងពី 3ខែមុន តែរហូតមកដល់ពេលនេះ ពួកគេបានធ្វើការត្រួតពិនិត្យរោគទៅលើប្រជាជន បានចំនួនត្រឹមតែបន្តិចបន្តួចប៉ុណ្ណោះ ខុសពីកូរ៉េខាងត្បូងដែលគ្រប់គ្រងការឆ្លងរាលដាលបានស្ទើរតែទាំងស្រុង ដោយការពិនិត្យប្រជាជនក្នុងចំនួនដ៏ច្រើន ដោយរដ្ឋាភិបាលជប៉ុនបានបញ្ជាក់ថា ការពិនិត្យជាទ្រង់ទ្រាយធំ គឺជាការខាតបង់ទ្រព្យធន និងខ្លាចថា មន្ទីរពេទ្យនឹងពេញទៅដោយអ្នកជំងឺដែលមានលទ្ធផលវិជ្ជមាន(ឆ្លងមេរោគ) តែមានអាការតែបន្តិចបន្តួច(មិនធ្ងន់ធ្ងរ)។
ក្រៅពីនេះ ការពិនិត្យរកមេរោគរបស់ជប៉ុន ថែមទាំងធ្វើឡើងនៅតាមមណ្ឌលសុខភាពកម្រិតតំបន់ មិនមែនលំដាប់ប្រទេសឡើយ ដោយមណ្ឌលសុខភាពក្នុងតំបន់មួយចំនួន ថែមទាំងមានឧបករណ៍មិនគ្រប់គ្រាន់ក្នុងការពិនិត្យមនុស្សម្នាក្នុងចំនួនច្រើនបានទៀតផង៕
ប្រភេព៖ សារព័ត៌មានបរទេស
April 17, 2020
COVID-19! វេជ្ជបណ្ឌិតឥណ្ឌូនេស៊ី ពាក់អាវភ្លៀងជំនួសឈុតការពារវីរុស
ដោយសារតែមានការខ្វះខាតឧបករណ៍វេជ្ជសាស្ត្រ និងសម្ភារការពារការឆ្លងវីរុស ក្រុមវេជ្ជបណ្ឌិតនៅប្រទេសឥណ្ឌូនេស៊ី កំពុងតែប្រថុយប្រថានជាមួយនឹងការប្រយុទ្ធប្រឆាំងវីរុសCOVID-19 ដែលអាចមានហានិភ័យខ្ពស់ក្នុងការឆ្លងមេរោគដល់ពួកគេ។
គិតមកដល់បច្ចុប្បន្ន វេជ្ជបណ្ឌិតចំនួន20រូបហើយដែលបានបាត់បង់ជីវិតចាប់តាំងពីCOVID-19 បានបង្ហាញខ្លួននៅឥណ្ឌូនេស៊ី។ តួលេខនៃអ្នកស្លាប់ចំនួន459នាក់ក្នុងប្រទេសនេះ ត្រូវបានក្រុមអ្នកវិភាគយល់ថា ជាតួលេខទាបបំផុត បើធៀបជាមួយនឹងស្ថានភាពជាក់ស្ដែង។
មន្ទីរពេទ្យនានា មិនមានសម្ភារការពារសុវត្ថិភាពគ្រប់គ្រាន់ ខណៈម៉ាស៊ីនជំនួយដង្ហើមក៏មានតម្លៃខ្ពស់ ធ្វើឱ្យក្រុមវេជ្ជបណ្ឌិតពិបាលក្នុងការទប់ទល់នឹងវីរុសCOVID-19នេះ។ ពួកគេក៏ត្រូវពាក់អាវភ្លៀងដែលមានតម្លៃទាប ជំនួសឈុតការពារសុវត្ថិភាពដែលមានតម្លៃថ្លៃ និងកំពុងខ្វះខាត។
Muhammad Farras Hadyan ដែលជាវេជ្ជបណ្ឌិតម្នាក់នៅទីក្រុង Jakarta បានឱ្យដឹងថា សម្ភារវេជ្ជសាស្ត្រកំពុងតែអស់ជាបណ្ដើរៗហើយនៅក្នុងមន្ទីរពេទ្យរបស់លោក រហូតដល់មានវេជ្ជបណ្ឌិតខ្លះ ត្រូវស្នើសុំជំនួយប្រាក់កាសពីគ្រួសាររបស់ពួកគេដើម្បីទិញឈុតការពារសុវត្ថិភាព។
Handoko Gunawan វេជ្ជបណ្ឌិតឯកទេសផ្នែករោគសួត វ័យ79ឆ្នាំ បាននៅជួរមុខរហូតដល់ថ្ងៃមួយគាត់ត្រូវបង្ខំចិត្តបង្ខាំងខ្លួនឯងដោយសារសង្ស័យថា បានឆ្លងវីរុសកូរ៉ូណា។
Handoko Gunawan និយាយថា “ខ្ញុំពិតជារន្ធត់ចិត្តខ្លាំងណាស់ ហើយក្រុមបុគ្គលិកពេទ្យផ្សេងៗទៀតក៏ដូចគ្នា។ វេជ្ជបណ្ឌិតក្មេងៗ មានប្ដី និងកូនៗនៅឯផ្ទះ ប៉ុន្តែពួកគេនៅតែប្រឹងប្រែងប្រឈមនឹងបញ្ហានេះ។ មានវេជ្ជបណ្ឌិតតិចណាស់នៅឥណ្ឌូនេស៊ី ហើយបើពួកគេស្លាប់ ពួកយើងនឹងមានវេជ្ជបណ្ឌិតកាន់តែតិចដើម្បីជួយព្យាបាលអ្នកជំងឺ”។
យោងតាមទិន្នន័យរបស់អង្គការសុខភាពពិភពលោក ប្រទេសឥណ្ឌូនេស៊ី មានវេជ្ជបណ្ឌិតមិនដល់4នាក់ផងក្នុងចំណោមមនុស្ស10,000នាក់។ តួលេខនេះ ទាបខ្លាំងណាស់បើធៀបនឹងចំនួន40នាក់នៅអ៊ីតាលី និង24នាក់នៅកូរ៉េខាងត្បូង។ សមាគមវេជ្ជបណ្ឌិតឥណ្ឌូនេស៊ីបានព្រមានថា វិបត្តិCOVID-19នេះ អាក្រក់ជាងអ្វីដែលបានរាយការណ៍ទៅទៀត ចំណែកប្រតិកម្មរបស់រដ្ឋាភិបាលវិញ ហាក់មានសភាព “ទន់ជ្រាយ”។
ស្ថិតិផ្លូវការថ្មីបំផុតបានឱ្យដឹងថា ឥណ្ឌូនេស៊ីបានរកឃើញអ្នកផ្ទុកវីរុសចំនួន 5,136នាក់ ក្នុងចំណោម36,000នាក់ដែលបានធ្វើតេស្ត ខណៈប្រជាជនរបស់ប្រទេសនេះ មានចំនួនដល់ទៅជាង260លាននាក់ (ច្រើនជាងគេលំដាប់ទី4ក្នុងពិភពលោក)។
COVID-19! វេជ្ជបណ្ឌិតឥណ្ឌូនេស៊ី ពាក់អាវភ្លៀងជំនួសឈុតការពារវីរុស
អ្នកនាំពាក្យរបស់សមាគមវេជ្ជបណ្ឌិតឥណ្ឌូនេស៊ីបានថ្លែងថា “តួលេខផ្លូវការរបស់រដ្ឋាភិបាល មិនបង្ហាញអំពីទិដ្ឋភាពពិតប្រាកដស្ដីអំពីចំនួនអ្នកឆ្លងមេរោគក្នុងប្រទេសនេះនោះទេ”។
តួលេខរបស់អាជ្ញាធរទីក្រុង Jakarta បានបង្ហាញថា មានអ្នកស្លាប់ដោយសារការឆ្លងមេរោគ ឬសង្ស័យថាបានឆ្លងមេរោគCOVID-19 ជាង1,000នាក់ ត្រូវបានបញ្ចុះនៅក្នុងទីបញ្ចុះសពនៅឯមូលដ្ឋាន ដែលតួលេខនេះ ខ្ពស់ជាង5ដង បើធៀបនឹងតួលេខដែលបង្ហាញដោយរដ្ឋាភិបាល។
ករណីបញ្ចុះសពនៅក្នុងទីក្រុង Ban Dung នៃខេត្ត Java ដែលជាប់ជាមួយនឹងទីក្រុង Jakarta បានកើនទ្វេដង ដោយមានប្រមាណជា400នាក់ក្នុងរយៈពេលតែ1ខែ រាប់ចាប់ពី COVID-19 បានឆ្លងរាលដាលក្នុងប្រទេសនេះ។ នេះបើតាមការឱ្យដឹងពីអភិបាលក្រុង Ban Dung លោក Ridwan Kamil។
លោក Ridwan Kamil បន្តថា “នេះគឺជាស្ថានភាពដែលដូចទៅនឹង Jakarta។ យើងមិនអាចប្រាកដថា អ្នកដែលបានស្លាប់ទាំងអស់នេះ គឺសុទ្ធតែបានឆ្លងវីរុសCOVID-19នោះទេ ប៉ុន្តែតួលេខនៃករណីស្លាប់ គឺវាខ្ពស់ជាងធម្មតា”៕
ប្រភព៖សារព័ត៌មានបរទេស
April 17, 2020
សិង្ហបុរី ទប់លែងឈ្នះ! ឆ្លងមេរោគ 1ថ្ងៃ 728នាក់ ចំណែកឥណ្ឌូនេស៊ី និងហ្វីលីពីន នៅតែធ្ងន់ធ្ងរ…
ក្រសួងសាធារណៈសុខាភិបាល របស់ប្រទេសសិង្ហបុរី កាលពីថ្ងៃព្រហស្បតិ៍(ទី16មេសា)ម្សិលមិញ បានអះអាងពីការរកឃើញអ្នកឆ្លងមេរោគវីរុសកូរ៉ូណាប្រភេទថ្មី ឬកូវីដ-19 បន្ថែមទៀតច្រើនដល់ទៅ 728នាក់ ដែលអាចនិយាយបានថា ជាស្ថិតិប្រចាំថ្ងៃដែលខ្ពស់បំផុត រាប់ចាប់តាំងពីមានការឆ្លងរាលដាលមក ខណៈដែលប្រទេសជាច្រើនទៀតនៅក្នុងតំបន់អាស៊ាន រកឃើញអ្នកឆ្លងមេរោគថ្មីខ្ទង់រយដូចគ្នា។ នេះបើតាមការរាយការណ៍របស់ទីភ្នាក់ងារសារព័ត៌មានរ៉យទ័រ។
តាមរយៈសេចក្ដីថ្លែងការណ៍របស់ក្រសួងសាធារណៈសុខាភិបាលសិង្ហបុរីនេះ បានធ្វើឱ្យចំនួនអ្នកឆ្លងមេរោគសរុបរបស់ប្រទេសមួយនេះ ស្ថិតក្នុងចំនួន 4,427នាក់ ដោយក្នុងចំណោមអ្នកឆ្លងមេរោគថ្មីទាំងនោះ មានច្រើនដល់ទៅ 654នាក់ ពាក់ព័ន្ធនឹងតំបន់ស្នាក់នៅរបស់ពលករចំណាកស្រុកបរទេស ចំណែកចំនួនដែលនៅសល់ ជាការឆ្លងរាលដាលក្នុងតំបន់។
តួលេខអ្នកឆ្លងមេរោគថ្មីក្នុងថ្ងៃព្រហស្បតិ៍(ទី16មេសា) អាចរាប់បានថា កើនឡើងយ៉ាងច្រើន ជាងស្ថិតិប្រចាំថ្ងៃខ្ពស់បំផុតកាលពីថ្ងៃមុន 447នាក់ ដែលចំនួននេះទើបតែកើតឡើងកាលពីថ្ងៃពុធ(ទី15មេសា)កន្លងទៅប៉ុណ្ណោះ…តែយ៉ាងណាក៏ដោយ ក្នុងថ្ងៃព្រហស្បតិ៍(ទី16មេសា) គ្មានរបាយការណ៍ពីអ្នកស្លាប់ឡើយ ដូច្នេះធ្វើឱ្យចំនួនអ្នកស្លាប់សរុបស្ថិតក្នុងតួលេខដដែលគឺ 10នាក់។
កាលពីពេលមុននេះ ការព្យាយាមយ៉ាងខ្លាំងក្លារបស់អាជ្ញាធរ ក្នុងការគ្រប់គ្រងការឆ្លងរាលដាលរបស់មេរោគកូវីដ-19 ក្នុងក្រុមពលរដ្ឋសិង្ហបុរី ដោយការតាមដានអ្នកប៉ះពាល់ជិតស្និទ្ធយ៉ាងតឹងរ៉ឹង និងប្រុងប្រយ័ត្នយ៉ាងម៉ឺងម៉ាត់នាពេលកន្លងមក បានទទួលការកោតសរសើរពីអង្គការសុខភាពពិភពលោក។
តែយ៉ាងណាក្ដី វីរុសកូរ៉ូណាប្រភេទថ្មី បានឆ្លងរាលដាលយ៉ាងឆាប់រហ័សនៅក្នុងទីប្រជុំជនពលករចំណាកស្រុកបរទេសខ្នាតធំមួយ បន្ថែមពីលើនូវអ្វីដែលពួកក្រុមសិទ្ធិមនុស្សបានបញ្ជាក់ថា ការព្យាយាមគ្រប់គ្រងការឆ្លងរាលដាលរបស់ប្រទេសមួយនេះ មានការទំនាក់ទំនងគ្នាមិនសូវជាល្អប៉ុន្មានឡើយ។
ព័ត៌មានចុងក្រោយបំផុតរបស់ប្រទេសសិង្ហបុរីនេះ បានធ្វើឱ្យពួកគេនៅតែស្ថិតជាប្រទេសមួយ ដែលរកឃើញអ្នកឆ្លងមេរោគកូវីដ-19 ច្រើនបំផុតលំដាប់លេខ4 ក្នុងភូមិភាគអាស៊ីភាគអាគ្នេយ៍ ដោយលំដាប់លេខ1 ជារបស់ប្រទេសហ្វីលីពីន ដែលមានចំនួនអ្នកឆ្លងមេរោគសរុប 5,660នាក់ ក្រោយរកឃើញអ្នកឆ្លងមេរោគថ្មី 207នាក់ ខណៈដែលការរកឃើញអ្នកស្លាប់បន្ថែមមានចំនួន 13នាក់ សរុប 362នាក់។
បន្ទាប់មកគឺ ប្រទេសឥណ្ឌូនេស៊ី ដែលស្ថានការណ៍នាពេលនេះ មើលទៅហាក់ដូចជាអាចវ៉ាប្រទេសហ្វីលីពីនក្នុងពេលឆាប់ៗនេះ ដោយឥណ្ឌូនេស៊ី រកឃើញអ្នកឆ្លងមេរោគថ្មី 380នាក់ សរុប 5,516នាក់ ចំណែកអ្នកស្លាប់បន្ថែមមាន 27នាក់ សរុប 496នាក់។
លំដាប់លេខ3 ជារបស់ប្រទេសម៉ាឡេស៊ី រកឃើញអ្នកឆ្លងមេរោគថ្មិ 10នាក់ សរុប 5,182នាក់ ឯអ្នកស្លាប់បន្ថែម មានតែ 1នាក់គត់ ធ្វើឱ្យចំនួនអ្នកស្លាប់សរុប មាន 84នាក់។ ចំណែកប្រទេសថៃ គ្រងលំដាប់លេខ5 ក្រោយរកឃើញអ្នកឆ្លងមេរោគថ្មីចំនួន 29នាក់ សរុប 2,672នាក់ និងមានអ្នកស្លាប់សរុប 46នាក់៕
ប្រភព៖ សារព័ត៌មានបរទេស
April 17, 2020
ជិត144,000នាក់ស្លាប់ដោយសារវីរុសCOVID-19 នៅទូទាំងពិភពលោក
ពិភពលោកមានអ្នកស្លាប់ជិត144,000នាក់ ក្នុងចំណោមអ្នកជំងឺCOVID-19 ជិត2.2លាននាក់ ដោយវាកំពុងរាតត្បាតយ៉ាងខ្លាំងក្លានៅសហរដ្ឋអាមេរិក និងអឺរ៉ុប។
ស្ថិតិពីសាកលវិទ្យាល័យ Johns Hopkins នៃសហរដ្ឋអាមេរិកបានឱ្យដឹងថា ពិភពលោកទាំងមូលបានរកឃើញអ្នកផ្ទុកមេរោគCOVID-19 សរុបឡើងដល់2,151,199នាក់ និងស្លាប់143,725នាក់ នៅក្នុងប្រទេស និងដែនដីចំនួន210។ អ្នកជំងឺដែលបានជាសះស្បើយ បានកើនដល់541,501នាក់។
សហរដ្ឋអាមេរិកគឺជាសម្បុកមេរោគធំជាងគេនៅក្នុងពិភពលោក ដោយមានអ្នកជំងឺសរុប667,225នាក់ និងស្លាប់សរុប32,686នាក់។ ប្រទេសនេះ បានធ្វើតេស្តរកមេរោគជាង3.4លាននាក់ ខ្ពស់ជាងប្រទេសណាៗទាំងអស់។
រដ្ឋ New York កំពុងរងផលវិបាកធ្ងន់ធ្ងរជាងគេ ដោយមានអ្នកជំងឺសរុប222,284នាក់ កើន8,505នាក់បើធៀបនឹងម្សិលមិញ។ អ្នកស្លាប់ដោយសារវីរុសCOVID-19 នៅក្នុងរដ្ឋនេះ បានកើនដល់ជាង10,000នាក់។
អេស្ប៉ាញទើបរកឃើញអ្នកជំងឺថ្មី4,289នាក់ និងស្លាប់ថ្មី502នាក់ ធ្វើឱ្យចំនួនអ្នកជំងឺសរុបឡើងដល់184,498នាក់ និងអ្នកស្លាប់សរុប19,135នាក់។ ប្រទេសនេះ គឺជាសម្បុកមេរោគធំជាងគេនៅអឺរ៉ុប និងទី2នៅក្នុងពិភពលោក។
អ៊ីតាលីរាយការណ៍ថា បានរកឃើញអ្នកជំងឺថ្មី3,786នាក់ និងអ្នកស្លាប់ថ្មី525នាក់។ អ្នកជំងឺសរុប168,941នាក់ និងអ្នកស្លាប់សរុប22,170នាក់។
បារាំងរកឃើញអ្នកជំងឺថ្មី17,164នាក់ និងអ្នកស្លាប់ថ្មី753នាក់។ អ្នកជំងឺសរុបមាន165,027នាក់ និងអ្នកស្លាប់សរុប17,920នាក់។ បារាំងបានពន្យារសុពលភាពនៃបម្រាមគោចរទូទាំងប្រទេសបន្ថែម1ខែទៀត ដើម្បីទប់ស្កាត់រោគរាតត្បាត ដែលនេះនឹងអូសបន្លាយពេលរហូតដល់ថ្ងៃទី11ឧសភា៕
ប្រភព៖ AFP, CNN
April 17, 2020
COVID-19! ជប៉ុនប្រកាសអាសន្នទូទាំងប្រទេស
នាយករដ្ឋមន្ត្រីជប៉ុន លោក Shinzo Abe ប្រកាសដាក់ប្រទេសទាំងមូលឱ្យស្ថិតក្នុងស្ថានភាពអាសន្ន ដែលនឹងអូសបន្លាយពេលដល់ថ្ងៃទី6ឧសភា ដោយសារតែ COVID-19។
“បណ្ដាតំបន់ដែលត្រូវបានដាក់ឱ្យស្ថិតក្នុងស្ថានភាពអាសន្ននឹងពង្រីកពី7ខេត្ត-ក្រុង ឡើងដល់បណ្ដាខេត្តទាំងអស់ក្នុងប្រទេស” នាយករដ្ឋមន្ត្រីជប៉ុន Shinzo Abe បានថ្លែងបែបនេះនៅក្នុងកិច្ចប្រជុំពិសេសមួយ ជាមួយក្រុមអ្នកជំនាញផ្នែកសុខាភិបាលដើម្បីពិភាក្សាអំពីCOVID-19។
លោក Abe កាលពីថ្ងៃទី7មេសាបានប្រកាសអាសន្នចំពោះទីក្រុងតូក្យូ និងទីក្រុងអូសាកា រួមនឹង5ខេត្តផ្សេងទៀត ដែលមានប្រជាជនសរុបប្រមាណជា44% ក្នុងចំណោមប្រជាជនសរុបទូទាំងប្រទេស។ សុពលភាពនៃបទបញ្ជាដាក់ប្រទេសក្នុងស្ថានភាពអាសន្ននេះនឹងអូសបន្លាយដល់ថ្ងៃទី6ឧសភាឆ្នាំ2020។
ការប្រកាសដាក់ប្រទេសឱ្យស្ថិតក្នុងស្ថានភាពអាសន្ននេះក៏នឹងអនុញ្ញាតឱ្យអភិបាលខេត្តក្រុងនានាអាចស្នើឱ្យពលរដ្ឋនៅតែក្នុងផ្ទះ ហើយអាចផ្អាកអាជីវកម្មនានាផងដែរ។ ក៏ប៉ុន្តែ មិនទាន់មានយន្តការជាក់លាក់ដើម្បីគាំទ្រដល់ការអនុវត្ត ឬពិន័យទៅលើអ្នកដែលមិនគោរពបទបញ្ជានៅឡើយ។
នៅក្នុងទីក្រុងតូក្យូ អភិបាលក្រុងបានស្នើឱ្យប្រជាជនធ្វើការនៅក្នុងផ្ទះ។ ចំនួនអ្នកចេញទៅធ្វើការ បានថយចុះច្រើនដែលគេអាចសង្កេតឃើញនៅតាមដងផ្លូវ។ ប៉ុន្តែ ស្ថានភាពមនុស្សជុំគ្នាច្រើននៅតែកើតមានឡើងក្នុងតំបន់ប្រជុំជន ធ្វើឱ្យមានការព្រួយបារម្ភថា វិធានការនានាមិនអាចទប់ស្កាត់ការឆ្លងវីរុសនេះបាន។
ជប៉ុន បានរកឃើញអ្នកជំងឺសរុបជាង8,600នាក់ ក្នុងនោះមានជិត180នាក់បានស្លាប់។ ក្រុមអ្នកជំនាញការព្រមានជាច្រើនលើកមកហើយថា COVID-19 នឹងបង្កផលវិបាកធ្ងន់ធ្ងរបំផុត បើសិនវាកើនឡើងរហូតដល់លែងគ្រប់គ្រងបាន ពិសេសគឺចំពោះប្រទេសដែលមានប្រជាជនចាស់ជរាច្រើនដូចប្រទេសជប៉ុននេះ៕
ប្រភព៖ សារព័ត៌មានបរទេស
April 16, 2020
ពលរដ្ឋជប៉ុន កំពុងខឹងរដ្ឋាភិបាលដែលបរាជ័យក្នុងការចាត់ការវិបត្តិកូវីដ-19 ដែលអាចធ្វើឱ្យមានអ្នកស្លាប់ដល់ 400,000នាក់
ចំនួនអ្នកស្លាប់ដោយសារមេរោគកូវីដ-19 នៅក្នុងប្រទេសជប៉ុន អាចកើនឡើងដល់ 400,000នាក់ បើនៅតែមិនកាត់បន្ថយការប៉ះពាល់គ្នាទៅវិញទៅមក និងគ្មានវិធានការបែបការពារក្នុងការព្យាយាមគ្រប់គ្រងការឆ្លងរាលដាលទេនោះ។ នេះបើយោងតាម ការដាស់តឿនរបស់ក្រុមមួយនៅក្នុងគណៈក្រុមការងារពិសេសរបស់ក្រសួងសាធារណៈសុខាភិបាល កាលពីថ្ងៃពុធ(ទី15មេសា)ដែលបានធ្វើឡើងក្រោមសំឡេងរិះគន់កាន់តែច្រើនឡើងៗ បណ្ដាលមកពីការមិនពេញចិត្តរបស់ប្រជាជនដែលមានចំពោះកម្មវិធីទប់ទល់នឹងវិបត្តិកូវីដ-19 របស់រដ្ឋាភិបាលរបស់ពួកគេ។
គណៈក្រុមការងារពិសេសរបស់ក្រសួងសាធារណៈសុខាភិបាល បានបញ្ជាក់ថា តាមរយៈការធ្វើរូបភាពចម្លងស្ថានការណ៍ បានបង្ហាញឱ្យឃើញថា វាមានលក្ខណៈសំខាន់ខ្លាំងប៉ុនណា ដែលពួកអាជ្ញាធរត្រូវប្រើប្រាស់វិធានការផ្សេងៗយ៉ាងមានប្រសិទ្ធភាព ក្នុងការកាត់បន្ថយការចម្លងមេរោគនៅក្នុងសង្គម ខណៈដែលការរួមសហការរបស់ប្រជាជនក្នុងការប្រតិបត្តិតាមពាក្យណែនាំផ្សេងៗទាំងនោះ ក៏មានភាពសំខាន់មិនតិចតួចជាងគ្នាឡើយ។
លោក ហ៊ីរ៉ូឈិ និឈិអ៊ុរ៉ៈ សាស្ត្រាចារ្យមកពីមហាវិទ្យាល័យហុកកៃដូ និងជាអ្នកជំនាញការផ្នែកជំងឺឆ្លងរបស់គណៈក្រុមការងារពិសេសនៃក្រសួងសាធារណៈសុខាភិបាល បានទាមទារឱ្យកាត់បន្ថយការទាក់ទងគ្នា រវាងបុគ្គលឱ្យបានក្នុងកម្រិត 80% ក្នុងអំឡុងពេលប្រកាសស្ថានការណ៍គ្រាអាសន្ន ដែលបានដាក់ឱ្យប្រើ នាពេលបច្ចុប្បន្ននៅក្នុងខេត្តជាច្រើន ដែលនៅក្នុងនោះ រួមទាំងទីក្រុងតូក្យូ និងអូសាកាផងដែរ។
“យើងអាចបញ្ឈប់ការចម្លងមេរោគបាន បើសិនជាយើងកាត់បន្ថយការទំនាក់ទំនងរវាងបុគ្គលឱ្យបានច្រើនបំផុត” លោកបានថ្លែង ព្រមទាំងបញ្ជាក់ថា រដ្ឋបាលរំពឹងថា ចំនួនអ្នកស្លាប់ ប្រហែលជាឡើងមិនដល់កម្រិត 400,000នាក់ឡើយ បើសិនវិធានការទាំងនេះត្រូវបាននាំយកទៅប្រតិបត្តិយ៉ាងម៉ឺងម៉ាត់។
ទីភ្នាក់ងារព័ត៌មាន NHK បានរាយការណ៍ថា រហូតមកដល់ថ្ងៃពុធ(ទី15មេសា) ចំនួនអ្នកឆ្លងមេរោគសរុបនៅក្នុងប្រទេសជប៉ុនមានច្រើនជាង 8,000នាក់ ក្នុងនោះមានអ្នកស្លាប់ 162នាក់។
តាមរយៈអ្នកឆ្លងមេរោគដែលកើនឡើងជារឿយៗ បានចាប់ផ្ដើមធ្វើឱ្យមើលឃើញពីសញ្ញាថា ប្រព័ន្ធសាធារណៈសុខាភិបាលរបស់ជប៉ុន កំពុងស្ថិតក្នុងសភាវតានតឹងយ៉ាងខ្លាំង ដោយ 9ខេត្ត ក្នុងចំណោម 47ខេត្តរបស់ជប៉ុន គ្រែអ្នកជំងឺសង្គ្រោះបន្ទាន់នៅតាមមន្ទីរពេទ្យផ្សេងៗដែលបានរៀបចំទុកសម្រាប់អ្នកជំងឺកូវីដ-19 នោះ កាន់តែជិតអស់មែនទែនហើយ។
ក្នុងពេលជាមួយគ្នា រដ្ឋបាលទីក្រុងអូសាកា ដល់ថ្នាក់ត្រូវសុំអង្វរប្រជាជនឱ្យជួយគ្នាបរិច្ចាគឈុតការពារទឹកភ្លៀង(អាវភ្លៀង)ដល់មន្ទីរពេទ្យនានា ខណៈដែលសម្លៀកបំពាក់ឈុតការពារមេរោគរបស់អាជ្ញាធរផ្នែកសាធារណៈសុខាភិបាលជិតអស់ពីស្តុកហើយ។
លោក អ៊ិឈិរ៉ូ ម៉ាត់ស៊ូអ៊ិ អភិបាលក្រុងអូសាកា បានបញ្ជាក់កាលពីថ្ងៃអង្គារ(ទី14មេសា)ថា ក្រុមគ្រូពេទ្យ និងគិលានុបដ្ឋាកនៅតាមមន្ទីរពេទ្យនានា ក្នុងទីក្រុងធំបំផុតលំដាប់លេខ2 របស់ប្រទេសមួយនេះ ចាំបាច់ត្រូវពាក់ថង់សំរាមពណ៌ខ្មៅធំៗ ជំនួសឱ្យឈុតការពារការឆ្លងមេរោគក្នុងអំឡុងពេលដែលត្រូវព្យាបាលអ្នកជំងឺ ហើយខាងសាលាក្រុងបានអង្វរសុំឱ្យក្រុមហ៊ុននៅក្នុងតំបន់ ដែលផលិតសម្លៀកបំពាក់ឈុតដែលមានភាពស្រដៀងគ្នានេះ ជួយលើកកម្ពស់ និងបង្កើនកម្លាំងផលិត និងលក់ឈុតទាំងនោះមកឱ្យខាងសាលាក្រុង។
ម៉ៃអូកូ ណាខាបាយ៉ាឈិ អតីតអ្នកនយោបាយរបស់គណបក្សប្រជាធិបតេយ្យនៃប្រទេសជប៉ុន ហើយពេលនេះ ជាសាស្ត្រាចារ្យប្រចាំមហាវិទ្យាល័យ សេដៈ បានប្រាប់ថា៖ “ពួកគ្រូពេទ្យកំពុងភ័យខ្លាចខ្លាំងណាស់ ព្រោះថា រដ្ឋាភិបាលមិនមានសកម្មភាពលឿនរហ័សគ្រប់គ្រាន់ និងមិនដាច់ខាតសោះ ហើយខ្ញុំដឹង ដោយសារថា ស្វាមីរបស់ខ្ញុំ ជាគ្រូពេទ្យនៅក្នុងគណៈកម្មការសមាគមមន្ទីរពេទ្យតូក្យូ”
ខេត្តជាច្រើន ក្នុងនោះ រួមទាំងខេត្ត ដែលមិនបានស្ថិតក្រោមសេចក្ដីប្រកាសស្ថានការណ៍គ្រាអាសន្ន បានអង្វរសុំឱ្យផ្នែកឯកជនផ្សេងៗ ផ្អាកប្រតិបត្តិការមួយផ្នែក គឺក្នុងវិធានការទប់ស្កាត់ការឆ្លងរាលដាលរបស់កូវីដ-19 តែខេត្តផ្សេងៗទាំងនោះ បានដាក់ទិសដៅឱ្យថ្ងៃទី6 ខែឧសភា ខាងមុខ ជាថ្ងៃវិលត្រឡប់មកបើកដំណើរការឡើងវិញរបស់ផ្នែកធុរកិច្ចបែបពាណិជ្ជ ដែលមិនមានភាពចាំបាច់ ខណៈដែលការប្រកាសស្ថានការណ៍គ្រាអាសន្ន បានហុចផលប៉ះពាល់យ៉ាងធ្ងន់ធ្ងរដល់ប្រព័ន្ធសេដ្ឋកិច្ច។
កាលពីដំបូង វិធីការតបស្នងទៅលើជំងឺរាតត្បាតដ៏ធំ របស់លោកនាយករដ្ឋមន្ត្រីស៊ីនហ្សូ អាបេ មិនមែនជារឿងត្រូវតវ៉ាគ្នាប៉ុន្មានឡើយ តែនៅពេលនេះ មើលទៅប្រជាជនហាក់ដូចជា ងាកមករិះគន់រដ្ឋាភិបាលរបស់ពួកគេដោយក្ដីក្ដៅក្រហាយ។
លទ្ធផលនៃការធ្វើប្រជាមតិរបស់សារព័ត៌មាន តូក្យូ នីវស៍ បានរកឃើញថា មានប្រជាជនដល់ទៅ 84% ដែលជឿថា ការប្រកាសស្ថានការណ៍គ្រាអាសន្ននៅតាមទីក្រុងចម្បងៗ របស់លោក អាបេ កាលពីថ្ងៃទី7 មេសាកន្លងទៅនោះ វាយឺតពេលជ្រុលពេក ខណៈពេលជាមួយគ្នា សំឡេងគាំទ្រដែលមានចំពោះរដ្ឋាភិបាល ក៏ថយចុះដល់ទៅ 5% នៅសល់តែប្រមាណជា 40%ប៉ុណ្ណោះ។
ក្រៅពីនេះ អ្នកឆ្លើយនៅក្នុងបែបបទសំណួរ-ចម្លើយ ថែមទាំងបានសម្ដែងការយល់ឃើញទៅក្នុងទិសដៅតែមួយដូចគ្នាយ៉ាងច្រើនលើសលប់ថា រដ្ឋាភិបាលចាំបាច់ត្រូវផ្ដល់ការជួយសង្គ្រោះផ្នែកហិរញ្ញវត្ថុដល់ក្រុមហ៊ុននានាដែលកំពុងជួបបញ្ហា ពីការដែលត្រូវបញ្ឈប់ប្រតិបត្តិការ ឬប្រតិបត្តិការបានដោយមានកម្រិត។
លោកស្រី ណូរិកូ ហាម៉ៈ សាស្ត្រាចារ្យផ្នែកសេដ្ឋកិច្ច របស់មហាវិទ្យាល័យដូឈិឆៈ ក្នុងទីក្រុងតូក្យូ បាននិយាយថា៖ “ប្រជាជនកំពុងខឹង យើងឃើញរូបលោកអាបេ នៅក្នុងធ្វីតធើរ កំពុងឱបសត្វឆ្កែ និងផឹកទឹកតែយ៉ាងរំភើយ វាធ្វើឱ្យប្រជាជនគិតឃើញថា គាត់មិនបានច្បាស់លាស់ ឬម៉ឺងម៉ាត់ចំពោះស្ថានការណ៍នេះឡើយ គាត់មិនយល់ពីភាពឈឺចាប់របស់ប្រជាជនទូទៅ ដែលរស់នៅក្នុងភាពព្រួយកង្វល់ និងកំពុងជួបនឹងទុក្ខវេទនាខាងសេដ្ឋកិច្ចយ៉ាងសែនធ្ងន់ធ្ងរដូចសព្វថ្ងៃនេះឡើយ”៕
ប្រភព៖ សារព័ត៌មានបរទេស
April 16, 2020
កូឡុំប៊ីដោះលែងអ្នកទោស4,000នាក់ដើម្បីទប់ស្កាត់ COVID-19
រដ្ឋមន្ត្រីក្រសួងយុត្តិធម៌ប្រទេសកូឡុំប៊ី Cabello បានប្រកាសថានឹងដោះលែងអ្នកទោសប្រមាណជា4,000នាក់ ឱ្យនៅក្រៅឃុំ ដើម្បីទប់ស្កាត់ការឆ្លងរាលដាលវីរុសCOVID-19។
“យើងបានវិភាគទៅលើការព្យាករជាច្រើន ហើយយើងនឹងជួយអ្នកទោសតាមដែលអាចធ្វើទៅបាន ដើម្បីឱ្យពួកគេទទួលបានផលប្រយោជន៍ពីគោលនយោបាយនេះ។ ប៉ុន្តែ ខ្ញុំទទួលស្គាល់ថា យើងមិនមានវិធានការណាមួយដែលអាចធានា100%ថា ពួកគេអាចគេចផុតពីការឆ្លងវីរុសនោះទេ” រដ្ឋមន្ត្រីក្រសួងយុត្តិធម៌របស់ប្រទេសកូឡុំប៊ី Margarita Cabello មានប្រសាសន៍នៅក្នុងសន្និសីទសារព័ត៌មានមួយកាលពីថ្ងៃទី15មេសា។ លោកបានអះអាងថា អ្នកទោសនឹងត្រូវបានដោះលែងនាពេលដ៏ខ្លីខាងមុខ។
ការប្រកាសខាងលើនេះ ត្រូវបានធ្វើឡើងបន្ទាប់ពីអ្នកទោស2នាក់ដែលត្រូវបានដោះលែងពីពន្ធនាគារមួយនៅទីក្រុង Villavicencio បានបាត់បង់ជីវិតដោយសារឆ្លង COVID-19។ អ្នកទោសចំនួន13នាក់ រួមនឹងឆ្មាំពន្ធនាគារ2រូប និងប្រធានពន្ធនាគារ1រូបទៀត នៅឯពន្ធនាគារនេះក៏បានឆ្លងវីរុសCOVID-19នេះដែរ។
គិតមកដល់បច្ចុប្បន្ន ប្រទេសកូឡុំប៊ី មានអ្នកជំងឺCOVID-19 សរុប3,105នាក់ និងស្លាប់131នាក់៕
ប្រភព៖ សារព័ត៌មានបរទេស
April 16, 2020
វៀតណាមថា Facebook លុបប្រជុំកោះ Spratly និង Paracel ចេញពីផែនទីវៀតណាម
នៅក្នុងផ្នែកនៃកម្មវិធីដំណើរការផ្សាយពាណិជ្ជកម្មរបស់ Facebook ប្រជុំកោះចំនួន2 គឺ Spratly និង Paracel ត្រូវបានលុបចេញពីផែនទីវៀតណាម ហើយប្រមូលវាទៅភ្ជាប់ជាមួយនឹងប្រទេសចិន។
កាលពីយប់ថ្ងៃទី15មេសា អ្នកលេងបណ្ដាញសង្គមបានប្រទះឃើញ Facebook បានប្រើប្រាស់ផែនទីមិនត្រឹមត្រូវស្ដីអំពីកម្មសិទ្ធិរបស់ប្រជុំកោះ Truong Sa, Hoang Sa (Spratly និង Paracel)។ ជាក់ស្ដែង ក្នុងផ្នែកបង្កើតការផ្សាយពាណិជ្ជកម្ម នៅពេលគេចុចកំណត់យកតំបន់វៀតណាម គេនឹងមិនបានឃើញប្រជុំកោះទាំង2ខាងលើនេះទេនៅលើផែនទី។ ប៉ុន្តែ នៅពេលគេកំណត់យកតំបន់ប្រទេសចិន គេឃើញមានប្រជុំកោះទាំង2នេះ។ នេះបើតាមសារព័ត៌មានវៀតណាម VNexpress ចេញផ្សាយក្នុងថ្ងៃនេះ។
វៀតណាមអះអាងថា Facebook លុបប្រជុំកោះ Spratly និង Paracel ចេញពីផែនទីវៀតណាម
លោក Le Quang Tu Do អនុប្រធាននាយកដ្ឋានផ្សព្វផ្សាយនិងព័ត៌មានអេឡិចត្រូនិកនៃក្រសួងព័ត៌មានវៀតណាម បានឱ្យដឹងថា នាយកដ្ឋាននេះបានស្នើឱ្យ Facebook កែប្រែឡើងវិញ។ លោកថ្លែងថា “ពួកគេ (Facebook) បានត្រួតពិនិត្យ និងបានរាយការណ៍ថា នេះគឺជាកំហុសនៅពេលធ្វើបច្ចុប្បន្នភាពផែនទី”។
អ្នកប្រើប្រាស់បណ្ដាញសង្គមនៅវៀតណាម កំពុងតែអំពាវនាវឱ្យ Facebook កែប្រែកំហុសនេះឱ្យបានត្រឹមត្រូវ។ អ្នកលេងអ៊ីនធើណិតខ្លះ បានចូលទៅកាន់ App Store និង CH Play ដើម្បីបញ្ចេញមតិត្រឡប់ (Feedback) លើបញ្ហានេះ។ សាធារណៈមតិនៅប្រទេសវៀតណាមកំពុងតែអំពាវនាវគ្នា ឱ្យចូលទៅដាក់ចំណាត់ថ្នាក់ (vote) ផ្កាយ1ឱ្យ Facebook ផងដែរ។
វៀតណាមក៏បានអះអាងពីភាពជាម្ចាស់នៃប្រជុំកោះ Spratly និង Paracel នេះផងដែរ
“Facebook កំពុងតែប្រើប្រាស់ផែនទី Openstreetmap ដែលអភិវឌ្ឍដោយក្រុមទី3។ នេះគឺជាផែនទីប្រភេទបើក ចំហ (Open source) ដែលគេអាចកែប្រែទិន្នន័យបាន។ ផែនទីខាងលើនេះ ត្រូវបានកែប្រែកាលពី4ថ្ងៃមុន ដោយគណនីឈ្មោះ Kalc” នេះបើតាមការឱ្យដឹងពីអ្នកលេងបណ្ដាញសង្គម ឈ្មោះ Cuong Nguyen។
ក្រោយមកបន្តិច អ្នកលេង Facebook ម្នាក់ទៀត បានចូលទៅកាន់ផែនទី និងបាន “យក” Spratly និង Paracel ត្រឡប់មកជាកម្មសិទ្ធិរបស់វៀតណាមវិញ។ ប៉ុន្តែ មកដល់ព្រឹកថ្ងៃទី16មេសានេះ ម្ចាស់កម្មសិទ្ធិលើ Spratly និង Paracel លែងជារបស់វៀតណាមម្ដងទៀត នៅពេលគេកំណត់តំបន់វៀតណាម ដោយសារតែមានមនុស្សម្នាក់បានចូលទៅកែប្រែចំណុចនេះ។
បច្ចុប្បន្ន តំណាង Facebook ប្រចាំនៅប្រទេសវៀតណាម មិនទាន់បានបញ្ចេញមតិជុំវិញបញ្ហានេះនៅឡើយ។ កាលពីឆ្នាំ2018 អ្នកលេង Facebook នៅវៀតណាមក៏បានរកឃើញករណីដូចគ្នានេះដែរ ប៉ុន្តែ តំណាង Facebook បាននិយាយថា នេះជាកំហុសបច្ចេកទេស ហើយក៏បានកែឡើងវិញ។
ប្រទេសចិនក៏ទាមទារភាពជាម្ចាស់កម្មសិទ្ធិលើប្រជុំកោះ Spratly និង Paracel
នាយករដ្ឋមន្ត្រីវៀតណាម លោក Nguyen Xuan Phuc ធ្លាប់បានស្នើឱ្យក្រសួងព័ត៌មានប្រទេសនេះ គ្រប់គ្រងឱ្យបានត្រឹមត្រូវលើបញ្ហាខាងលើរបស់ Facebook។
សូមបញ្ជាក់ថា បច្ចុប្បន្ន ប្រជុំកោះ Spratly និង Paracel កំពុងត្រូវបានទាមទារជាកម្មសិទ្ធិដោយបណ្ដាប្រទេសដែលនៅជុំវិញប្រជុំកោះទាំងនេះ មានដូចជាប្រទេសចិន វៀតណាម ហ្វីលីពីន និងប៊្រុយណេ ជាដើម៕
ប្រភព៖ សារព័ត៌មានបរទេស
April 16, 2020