Category: អន្តរជាតិ

លោក ត្រាំ ទទួលស្គាល់វិបត្តិកូវីដ-19 ថា ពិតជាអាក្រក់ខ្លាំងជាង “ភើល ហាប៊ើរ និង 9/11” និងក្រឡាស់សម្ដី មិនលុបចោលក្រុមប្រយុទ្ធប្រឆាំងវីរុស…
លោកប្រធានាធិបតី ដូណាល់ ត្រាំ នៃសហរដ្ឋអាមេរិក កាលពីថ្ងៃពុធ(ទី6 ឧសភា)ម្សិលមិញ បានទទួលស្គាល់ថា រោគរាតត្បាតដ៏ធំកូវីដ-19 បានធ្វើឱ្យកើតមានផលប៉ះពាល់ដល់ប្រទេសអាមេរិក ធ្ងន់ធ្ងរជាងហេតុការណ៍វាយប្រហារកោះ ភើល ហាប៊ើរ កាលពីសម័យសង្គ្រាមលោកទី2 ឬសូម្បីតែសោកនាដកម្ម 9/11 ទៅទៀត ព្រមទាំងបានបដិសេធព័ត៌មានដែលថា លោកត្រៀមរំលាយចោលក្រុមចំពោះកិច្ចប្រយុទ្ធប្រឆាំងវីរុសកូរ៉ូណារបស់សេតវិមាន និងតាំងគោលដៅ រីស្តាតសេដ្ឋកិច្ច។
លោកថ្លែងប្រាប់អ្នកយកព័ត៌មាននៅឯសេតវិមានថា “យើងកំពុងជួបប្រទះនឹងការវាយប្រហារក៏អាក្រក់បំផុត តាមដែលធ្លាប់កើតមានកន្លងមកនៅក្នុងប្រទេសរបស់យើង វាជាពិតជាការវាយប្រហារដ៏អាក្រក់បំផុត តាមដែលយើងធ្លាប់ប្រឈមកន្លងមក” លោកបន្តថា “វាអាក្រក់ជាង ភើល ហាប៊ើរ វាអាក្រក់ជាងហេតុការណ៍ វើលថ្រេដ សេនធើរ ទៅទៀត”
យុទ្ធនាការ ភើល ហាប៊ើរ គឺជាការវាយប្រហារខាងយោធាដ៏គួរឱ្យចម្លែកចិត្ត របស់កងកម្លាំងពិសេស(ស្ម័គ្រស្លាប់)ខាងផ្លូវអាកាស នៃកងទ័ពជើងទឹកចក្រពត្តិជប៉ុន ទៅលើមូលដ្ឋានកងទ័ពជើងទឹកសហរដ្ឋអាមេរិកនៅកំពង់ផែ ភើល ហាប៊ើរ កោះហាវ៉ៃ ក្នុងឆ្នាំ1941 ដែលហេតុការណ៍នេះ បានក្លាយជាការអូសប្រទេសអាមេរិកឱ្យធ្លាក់ចូលសង្គ្រាមលោកលើកទី2។
ខណៈដែលហេតុការណ៍វាយប្រហារភេរវកម្ម ថ្ងៃទី11 ខែកញ្ញា(ខែ9) ឆ្នាំ2001 ដែលបានសម្លាប់ជីវិតមនុស្សនៅក្នុងសហរដ្ឋអាមេរិកប្រមាណជា 3,000នាក់ ភាគច្រើនស្ថិតនៅក្នុងអគារ វើលថ្រេដ សេនធើរ ក្នុងទីក្រុងនីវយ៉ក គឺមានមូលហេតុមកពីសង្គ្រាមផ្សេងៗរបស់អាមេរិក និងប្រតិបត្តិការតតាំងប្រឆាំងការបង្កវិនាសកម្មនៅក្នុងប្រទេសអ៊ីរ៉ាក់ អាហ្វហ្គានីស្ថាន និងប្រទេសផ្សេងៗទៀត។
មកដល់ពេលនេះ មានពលរដ្ឋអាមេរិកាំងជាង 70,000នាក់ហើយ ដែលត្រូវអស់ជីវិតក្នុងអំឡុងការឆ្លងរាលដាលរបស់រោគរាតត្បាតដ៏ធំ ដែលមានអាការស្រដៀងនឹងជំងឺគ្រុនផ្ដាសាយធំ ក្នុងខណៈដែលការលុបចោលវិធានការរក្សាគម្លាតឆ្ងាយពីគ្នាខាងសង្គម អាចនឹងធ្វើឱ្យពលរដ្ឋអាមេរិកាំងកាន់តែស្លាប់ច្រើនឡើង…យ៉ាងណាក៏ដោយ កាលពីថ្ងៃពុធ(ទី6ឧសភា) មើលទៅលោក ត្រាំ ហាក់ដូចជាក្រឡាស់សម្ដីពីផែនការដែលបានថ្លែងកាលពីពេលមុននេះ។
កាលពីមុន សេតវិមានបានចង្អុលបង្ហាញថា ក្រុមការងារលំដាប់ខ្ពស់មួយ អាចនឹងត្រូវរំលាយចោលក្នុងអំឡុងប្រមាណជាដើមខែមិថុនា ខណៈដែលលោកត្រាំ បានបញ្ជូនសញ្ញាឱ្យដឹងថា វាដល់ពេលហើយ ដែលនឹងត្រូវងាកចេញពីវិបត្តិផ្នែកសាធារណៈសុខាភិបាល និងបែរតម្រង់ឆ្ពោះទៅរកការបើកសេដ្ឋកិច្ចឡើងវិញ។
តែយ៉ាងណាក៏ដោយ លោកត្រាំបានសរសេរនៅក្នុងធ្វីតធើរជាដំណាក់ៗ នៅក្នុងថ្ងៃពុធ(ទី6ឧសភា) ក្នុងអំឡុងពេលដែលក្រុមការងារចំពោះកិច្ចប្រយុទ្ធប្រឆាំងនឹងវីរុសកូរ៉ូណា បានទទួលជោគជ័យយ៉ាងធំធេង ថា “នឹងធ្វើការបន្តទៅមុខទៀតយ៉ាងគ្មានពេលកំណត់ ព្រមជាមួយគោលដៅបើកប្រទេសរបស់យើងឡើងវិញយ៉ាងមានសុវត្ថិភាព”។
…និងទោះជាយ៉ាងនេះក្ដី លោកប្រធានាធិបតីរូបនេះ បានប្រាប់ថា លោកអាចនឹង “បន្ថែម ឬបន្ថយចំនួនមនុស្ស” ក្នុងក្រុមការងារឈុតនេះ ដែលរឿងនេះបានបង្ហាញឱ្យឃើញថា ស្ថានការណ៍មិនទាន់នឹងនរនៅឡើយទេ…៕
ប្រភព៖ សាព័ត៌មានបរទេស
May 7, 2020
ប្រវត្តិសាស្ត្រ ដែលមនុស្សគួរតែដឹង…តើកូវីដ-19 និងការឆ្លងរាលដាលរបស់ជំងឺគ្រុនផ្ដាសាយធំអេស្ប៉ាញកាលពីអតីតកាល ផ្លាស់ប្ដូរពិភពលោកយ៉ាងណា?(តចប់)
រោគរាតត្បាតដែលត្រូវបានបំភ្លេចចោល?
ទោះជាបានផ្ដល់មេរៀនដល់មនុស្សក្នុងពិភពលោកយ៉ាងច្រើនហើយក៏ដោយ តែមើលទៅហាក់ដូចជាជំងឺគ្រុនផ្ដាសាយធំអេស្ប៉ាញ បានក្លាយជាជំងឺមួយដែលត្រូវបានគេបំភ្លេចចោល។
ដូចគ្នានឹងកូវីដ-19ដែរ ជំងឺគ្រុនផ្ដាសាយធំអេស្ប៉ាញបានធ្វើឱ្យកើតមានផលប៉ះពាល់ដល់បុគ្គលដែលមានកេរ្តិ៍ឈ្មោះល្បីល្បាញជាច្រើន ដូចជា ប្រធានាធិបតី អ៊ែនឌ្រូ វីលសុន របស់សហរដ្ឋអាមេរិក និងលោកនាយករដ្ឋមន្ត្រី ឡយដ៍ ចច របស់អង់គ្លេស ដែលទាំង 2នាក់សុទ្ធតែធ្លាក់ខ្លួនឈឺដោយសារជំងឺគ្រុនផ្ដាសាយធំអេស្ប៉ាញដូចគ្នា ខណៈដែលលោកប្រធានាធិបតី រូឌ្រីហ្គេស អាល់វីស របស់ប្រទេសប្រេស៊ីល បានស្លាប់ដោយសារជំងឺដ៏សាហាវនេះ។
យ៉ាងណាក៏ដោយ ជំងឺគ្រុនផ្ដាសាយធំអេស្ប៉ាញ បែរជាត្រូវបិទបាំងចំណាប់អារម្មណ៍របស់មនុស្សម្នាក្នុងពិភពលោកដោយសារសង្គ្រាមលោកលើកទី1…1ផ្នែក គឺដោយសារតែខណៈពេលនោះ រដ្ឋបាលនៃប្រទេសជាច្រើនបានប្រើវិធានការសិនស៊ើរ ឬកាត់ចោល មិនឱ្យសារព័ត៌មានរាយការណ៍អំពីផលប៉ះពាល់ដោយសារជំងឺរាតត្បាតនៅគ្រានោះក្នុងអំឡុងពេលសង្គ្រាម។
ក្រៅពីត្រូវបានរារាំងការរាយការណ៍ព័ត៌មានហើយ ការឆ្លងរាតត្បាតរបស់ជំងឺគ្រុនផ្ដាសាយធំអេស្ប៉ាញ ថែមទាំងស្ទើរតែមិនត្រូវបានកត់ត្រាទុកនៅក្នុងសៀវភៅប្រវត្តិសាស្ត្រ ឬវប្បធម៌សម័យនិយមផ្សេងៗ ដូចជា បទចម្រៀង ឬស្នាដៃសិល្បៈផ្សេងៗឡើយ។
រូបគំនូរអំពីខ្លួនឯងរបស់ អ៊ែដវើដ មុនហ្ស៍ ខណៈពេលកំពុងឈឺដោយជំងឺគ្រុនផ្ដាសាយធំអេស្ប៉ាញ គឺជាស្នាដៃសិល្បៈតែប៉ុន្មានផ្ទាំងប៉ុណ្ណោះដែលកត់ត្រារឿងរ៉ាវរបស់ជំងឺរាតត្បាតដែលបានកើតឡើង
តែមានម្នាក់ ក្នុងចំណោមសិល្បករដែលបានបង្កើតស្នាដៃទុកក្នុងអំឡុងពេលនោះគឺ លោក អ៊ែដវើដ មុនហ្ស៍ វិចិត្រករជនជាតិន័រវេយ៍ ដែលបានគូររូបរបស់ខ្លួនឯង ក្នុងខណៈពេលកំពុងឈឺដោយសារជំងឺគ្រុនផ្ដាសាយធំអេស្ប៉ាញ។
ទោះជាការឆ្លងរាលដាលរបស់ជំងឺគ្រុនផ្ដាសាយធំអេស្ប៉ាញ អាចត្រូវបានបំភ្លេច ឬរលុបបាត់ពីការចងចាំរបស់មនុស្សម្នា ឬបាត់ពីក្នុងទំព័រប្រវត្តិសាស្ត្រពិភពលោកក៏ពិតមែន តែការឆ្លងរាលដាលដ៏ធំរបស់មេរោគកូវីដ-19 ដែលកំពុងកើតឡើងនៅពេលនេះ បានរើកកាយការចងចាំ ដាស់ស្មារតី និងដាស់តឿនមនុស្សលោក ឱ្យដឹងពីភាពធ្ងន់ធ្ងររបស់រោគរាតត្បាតដែលបាននាំមហាហាយនៈមកឱ្យពិភពលោកកាលពីជាង 100ឆ្នាំមុនដែរ៕
ប្រភព៖ សារព័ត៌មានបរទេស
ប្រែសម្រួលដោយ តាវ៉ែនតា
May 7, 2020
កងទ័ពអាមេរិកាំងដកខ្លួនចូល “ពួនក្រោមដី” ដើម្បីគេចពីCOVID-19 បំណងការពារកម្លាំង ត្រៀមសម្រាប់ករណីអាក្រក់បំផុត
ឧត្តមសេនីយ៍ Pete Fesler កាលពីចុងខែកុម្ភៈ បានត្រៀមឱ្យទាហានរបស់ខ្លួនប្រមាណជា130នាក់ ចូលរួមក្នុងយុទ្ធនាការទាក់ទិននឹងវិធានការទប់ស្កាត់វីរុសCOVID-19 ដោយការដកថយចូលទៅធ្វើការក្រោមដី ដើម្បីការពារខ្លួន និងរក្សាកម្លាំងស្នូលរបស់ខ្លួន។
Pete Fesler គឺជាមេបញ្ជាការជាន់ខ្ពស់នៃបញ្ជាការដ្ឋានកងទ័ពការពារអវកាស និងដែនអាកាសអាមេរិកភាគខាងជើង ដែលហៅថា NORAD (North American Aerospace Defense Command) ដែលមានមូលដ្ឋាននៅតំបន់ Colorado Spring ក្នុងរដ្ឋ Colorado សហរដ្ឋអាមេរិក។ កងកម្លាំងរបស់ឧត្តមសេនីយ៍រូបនេះ កំពុងដកថយចូលទៅនៅក្រោមដី ដើម្បីបង្ខាំងខ្លួនពីពិភពខាងក្រៅ ក្នុងបំណងទប់ស្កាត់ការឆ្លងវីរុសCOVID-19។ NORAD មានភារកិច្ចការពារសហរដ្ឋអាមេរិកពីការវាយប្រហារដោយកាំជ្រួចផ្លោង ឬការគំរាមពីដែនអាកាស និងអវកាស។
មន្ទីរបញ្ចកោណសង្ឃឹមថា កាយវិការដូចជានៅបញ្ជាការដ្ឋានរបស់ Fesler នឹងជួយទប់ស្កាត់COVID-19 មិនឱ្យវាយលុកចូលក្នុងជួរកងទ័ពដែលត្រូវបានហ្វឹកហាត់ជាពិសេសរបស់កងទ័ពសហរដ្ឋអាមេរិក។
បើទោះជាមន្ទីរបញ្ចកោណដែលជាអគ្គបញ្ជាការដ្ឋាននៃកងទ័ពសហរដ្ឋអាមេរិក បានបញ្ចេញទាហានរាប់ម៉ឺននាក់ដើម្បីជួយដល់ការប្រយុទ្ធប្រឆាំងនឹងវីរុសកូរ៉ូណាក្នុងប្រទេស ប៉ុន្តែ COVID-19នេះ នៅតែបង្កឧបសគ្គដល់ការបំពេញភារកិច្ចស្នូលរបស់កងទ័ពអាមេរិកាំង។ វីរុសនេះបានធ្វើឱ្យនាវាផ្ទុកយន្តហោះចម្បាំងមួយគ្រឿងរបស់សហរដ្ឋអាមេរិកត្រូវគាំងដំណើរការដោយសារមានទាហានជាច្រើនបានឆ្លងមេរោគ ចំណែកទាហានថ្មីក៏ត្រូវថយចុះច្រើន បណ្ដាលឱ្យសមយុទ្ធអន្តរជាតិនានាត្រូវពន្យារពេល ឬកាត់បន្ថយទំហំ។ គិតមកដល់បច្ចុប្បន្ន ទាហានអាមេរិកាំងជិត5,000នាក់បានឆ្លងវីរុសCOVID-19 ក្នុងនោះមានទាហាន2នាក់បានបាត់បង់ជីវិត។
ដើម្បីកាត់បន្ថយឥទ្ធិពលរបស់វីរុសCOVID-19 មន្ទីរបញ្ចកោណបានចេញបញ្ជា ហាមមិនឱ្យកងទ័ពអាមេរិកាំងផ្លាស់ទីទូទាំងសកលលោក និងបានបញ្ចេញវិធានការផ្សេងៗទៀត។ ចំពោះអង្គភាពពិសេសដូចជា NORAD ជាដើម ថ្នាក់ដឹកនាំមានប្រតិកម្មដោយឡែក និងជាពិសេស។
បុគ្គលិកមួយផ្នែករបស់អង្គភាពដែលគ្រប់គ្រងដោយឧត្តមសេនីយ៍ Fesler ត្រូវបានបញ្ជូនទៅ “លាក់ខ្លួន” និងធ្វើការនៅក្នុងបន្ទប់ក្រោមដីនៅតំបន់ភ្នំ Cheyenne ដែលត្រូវបានសាងសង់ឡើងកាលពីសម័យសង្គ្រាមត្រជាក់ ដើម្បីគេចពីវីរុសកូរ៉ូណា។ ពួកគេត្រូវបានបញ្ជុនមកកាន់ទីនេះកាលពី2ខែមុខ ដើម្បីត្រៀមក្នុងករណីវីរុសបានធ្វើឱ្យគាំងដំណើរការនៅមូលដ្ឋាន Peterson ក្នុងរដ្ឋ Colorado។
លោក Fesler ថ្លែងថា “បន្ទាប់ពីបានដឹងថា COVID-19 ឆ្លងរាលដាលខ្លាំង យើងយល់ថា ត្រូវតែមានវិធានការដើម្បីត្រៀម និងការពារកម្លាំងក្នុងករណីធ្លាក់ចូលក្នុងស្ថានភាពអាក្រក់បំផុត”៕
ប្រភព៖ សារព័ត៌មានបរទេស
May 7, 2020
COVID-19 បានសម្លាប់មនុស្សជាង264,000នាក់នៅទូទាំងពិភពលោក
វីរុសកូរ៉ូណាប្រភេទថ្មី បានធ្វើឱ្យមនុស្សជាង3.8លាននាក់នៅពាស់ពេញសកលលោកត្រូវកើតជំងឺ ក្នុងនោះ វាបានសម្លាប់មនុស្សជាង264,000នាក់។
ប្រទេសនិងដែនដីចំនួន212ក្នុងពិភពលោក ត្រូវបានរាយការណ៍ថា មានអ្នកជំងឺCOVID-19 សរុប3,812,513នាក់ និងអ្នកស្លាប់ដោយសារវីរុសកូរ៉ូណានេះចំនួន264,109នាក់ ដោយនៅក្នុងអំឡុង24ម៉ោងចុងក្រោយនេះមានអ្នកជំងឺថ្មី91,120នាក់ និងអ្នកស្លាប់ថ្មីមាន6,242នាក់។ ក្នុងចំណោមអ្នកជំងឺសរុប មានអ្នកជំងឺ1,288,726នាក់បានជាសះស្បើយ។ នេះបើតាមស្ថិតិរបស់ WourldeMeters។
ទ្វីបអាមេរិកមានអ្នកជំងឺCOVID-19ច្រើនជាងទ្វីបណាៗទាំងអស់ ក្នុងនោះតំបន់អាមេរិកខាងជើងមានអ្នកជំងឺសរុប1,375,502នាក់ អាមេរិកខាងត្បូងមាន253,597នាក់ ខណៈទ្វីបអឺរ៉ុបមាន1,524,884នាក់ ទ្វីបអាស៊ីមាន603,065នាក់ និងទ្វីបអាហ្វ្រិកមាន52,341នាក់។
ប្រទេសដែលមានអ្នកស្លាប់ដោយសារជំងឺកូរ៉ូណាសរុបលើសពី25,000នាក់ មាន5ប្រទេស រួមមានសហរដ្ឋអាមេរិក អង់គ្លេស អ៊ីតាលី អេស្ប៉ាញ និងបារាំង។
ប្រទេសចំនួន10ដែលមានអ្នកជំងឺកូរ៉ូណាសរុបលើសពី100,000នាក់ រួមមានសហរដ្ឋអាមេរិក អេស្ប៉ាញ អ៊ីតាលី អង់គ្លេស បារាំង អាល្លឺម៉ង់ រុស្ស៊ី ទួរគី ប្រេស៊ីល និងប្រទេសអ៊ីរ៉ង់៕
ប្រភព៖ សារព័ត៌មានបរទេស
May 7, 2020
ប្រទេសចិន “បញ្ចេញលក្ខខណ្ឌ” បើសិនជាចង់ស៊ើបអង្កេតរកប្រភពCOVID-19
ឯកអគ្គរដ្ឋទូតចិនប្រចាំអង្គការសហប្រជាជាតិបានឱ្យដឹងថា ប្រទេសចិននឹងមិនអញ្ជើញអ្នកជំនាញអន្តរជាតិណាមួយមកស៊ើបអង្កេតបញ្ហាប្រភពរបស់វីរុសកូរ៉ូណានោះទេ រហូតដល់ប្រទេសនេះទទួលបាន “ជ័យជំនះចុងក្រោយ”។
WHO កាលពីចុងសប្ដាហ៍កន្លងបានឱ្យដឹងថា អង្គការនេះសង្ឃឹមថានឹងត្រូវបានអញ្ជើញឱ្យចូលរួមក្នុងការស្រាវជ្រាវលើប្រភពរបស់ COVID-19។ នៅពេលត្រូវបានសួរអំពីបញ្ហានេះ ឯកអគ្គរដ្ឋទូតចិន Chen Xu ថ្ងៃនេះបានឆ្លើយនៅក្នុងសន្និសីទសារព័ត៌មានតាមអនឡាញពីទីក្រុងហ្សឺណែវថា “អាទិភាពបច្ចុប្បន្នគឺផ្ដោតទៅលើការប្រយុទ្ធប្រឆាំងនឹងវីរុស រហូតដល់យើងបានទទួលជោគជ័យចុងក្រោយ”។
លោក Chen Xu បន្តថា “យើងត្រូវការផ្ដោតចំបញ្ហា និងបែងចែកកម្លាំងសមស្រប។ យើងមិនខ្លាចនឹងការស៊ើបអង្កេត និងវាយតម្លៃណាមួយនោះទេ ព្រោះថាវាអាចជួយដល់ការប្រឹងប្រែងរបស់ពិភពលោកដើម្បីត្រៀមសម្រាប់ទប់ទល់នឹងករណីបន្ទាន់អំពីសុខភាពសាធារណៈក្នុងពេលអនាគត”។
ក្រុមអ្នកវិទ្យាសាស្ត្រមួយចំនួនយល់ថា វីរុសCOVID-19 មានប្រភពពីសត្វប្រចៀវ និងបានឆ្លងពីសត្វមកមនុស្សនៅឯផ្សារលក់សត្វព្រៃរស់នៅក្នុងទីក្រុង Wuhan កាលពីចុងឆ្នាំ2019។ ប៉ុន្តែលោក Trump និងរដ្ឋមន្ត្រីការបរទេសសហរដ្ឋអាមេរិក លោក Mike Pompeo រួមនឹងមន្ត្រីអាមេរិកាំងជាច្រើនផ្សេងទៀត កំពុងតែជំរុញឱ្យស៊ើបអង្កេតលើសម្មតិកម្មដែលថា COVID-19 បានរួចចេញពីបន្ទប់ពិសោធន៍នៅទីក្រុង Wuhan ប្រទេសចិន។ អង្គភាពស៊ើបការណ៍សម្ងាត់អាមេរិកាំងកំពុងស្រាវជ្រាវលើបញ្ហានេះ បើទោះជាមានការអះអាងថា វីរុសនេះ “មិនមែនបង្កើតឡើងដោយមនុស្ស”។
ប្រទេសចិនបានអះអាងថា រដ្ឋមន្ត្រីការបរទេសអាមេរិកាំងមិនអាចបញ្ជាក់អំពីបញ្ហាដែលថា វីរុសCOVID-19 បានរួចចេញពីបន្ទប់ពិសោធន៍នៅ Wuhan នោះឡើយ ព្រោះថា លោក “មិនមានភ័ស្ដុតាំងណាមួយបញ្ជាក់អំពីរឿងនេះ”។
COVID-19 បានបង្ហាញខ្លួនក្នុងប្រទេសនិងដែនដីចំនួន210ក្នុងពិភពលោក បណ្ដាលឱ្យមនុស្សជិត3.8លាននាក់បានឆ្លងមេរោគ ក្នុងនោះមានជាង259,000នាក់បានបាត់បង់ជីវិត៕
ប្រភព៖ សារព័ត៌មានបរទេស
May 6, 2020
រដ្ឋមន្ត្រីក្រសួងវប្បធម៌របស់រុស្ស៊ី ឆ្លងវីរុសCOVID-19
រដ្ឋមន្ត្រីក្រសួងវប្បធម៌របស់ប្រទេសរុស្ស៊ី លោកស្រី Olga Lyubimova វិជ្ជមានជាមួយនឹងវីរុសCOVID-19 ធ្វើឱ្យលោកស្រីក្លាយជាសមាជិកគណៈរដ្ឋមន្ត្រីទី3របស់ប្រទេសរុស្ស៊ី ដែលបានឆ្លងវីរុសនេះ។
លោកស្រី Olga Lyubimova អាយុ39ឆ្នាំ មានរោគសញ្ញាស្រាល និងកំពុងបង្ខាំងខ្លួនដោយឡែកនៅឯផ្ទះ ប៉ុន្តែ លោកស្រីនៅតែបន្តបំពេញការងារពីចម្ងាយ ជាមួយនឹងកិច្ចប្រជុំតាមអនឡាញ។ នេះបើតាមការឱ្យដឹងពីជំនួយការផ្នែកសារព័ត៌មាន Anna Usacheva នាថ្ងៃនេះ។
លោកស្រី Olga Lyubimova ធ្លាប់ធ្វើជាអ្នកកាសែត និងជាអ្នកផលិតភាពយន្តឯកសារមួយរូបផងដែរ។ លោកស្រីត្រូវបានតែងតាំងជារដ្ឋមន្ត្រីក្រសួងវប្បធម៌កាលពីខែមករា2020 និងបានក្លាយជារដ្ឋមន្ត្រីម្នាក់ក្នុងចំណោមរដ្ឋមន្ត្រីដែលមានវ័យនៅក្មេងជាងគេក្នុងគណៈរដ្ឋមន្ត្រីរុស្ស៊ី។
កាលពីសប្ដាហ៍មុន នាយករដ្ឋមន្ត្រីរុស្ស៊ី Mikhail Mishustin បានប្រកាសថា លោកបានឆ្លងវីរុសCOVID-19 និងកំពុងព្យាបាលដាច់ដោយឡែក។ ឧបនាយករដ្ឋមន្ត្រីទី1 Andrei Belousov បានឡើងកាន់កាប់តំណែងជំនួយ នៅពេលនាយករដ្ឋមន្ត្រីអវត្តមាន។ រដ្ឋមន្ត្រីក្រសួងសំណង់នៃប្រទេសនេះ គឺលោក Vladimir Yakushev កាលពីសប្ដាហ៍មុនក៏បានចូលមន្ទីរពេទ្យដើម្បីព្យាបាលជំងឺកូរ៉ូណានេះដែរ ខណៈដែលអនុរដ្ឋមន្ត្រីម្នាក់របស់លោក ក៏បានឆ្លងមេរោគនេះ។
ប្រទេសរុស្ស៊ី គិតមកដល់បច្ចុប្បន្ន បានរកឃើញអ្នកជំងឺកូរ៉ូណាជិត166,000នាក់ និងអ្នកស្លាប់សរុបជាង1,500នាក់។ ក្នុងរយៈពេល4ថ្ងៃជាប់ៗគ្នានេះ ប្រទេសរុស្ស៊ីបានរកឃើញអ្នកជំងឺថ្មីជាង10,000នាក់រៀងរាល់ថ្ងៃ។ ប្រទេសនេះបានធ្វើតេស្តរកមេរោគជូនប្រជាជនប្រមាណជាជាង4.6លាននាក់ ក្នុងនោះក៏កំពុងតាមដានសុខភាពរបស់មនុស្សជាង227,000នាក់ផងដែរ៕
ប្រភព៖ សារព័ត៌មានបរទេស
May 6, 2020
អាមេរិកាំងសាកល្បងវ៉ាក់សាំងប្រឆាំងCOVID-19 លើមនុស្សជាង300នាក់
ក្រុមហ៊ុនផលិតឱសថ Pfizer និងក្រុមហ៊ុនបច្ចេកវិទ្យាជីវសាស្ត្រ BiNTech បានប្រកាសថា ពួកគេសាកល្បងវ៉ាក់សាំងទប់ស្កាត់វីរុសCOVID-19 លើមនុស្សចាប់ពីថ្ងៃទី4ឧសភា។
នេះគឺជាវ៉ាក់សាំងដែលត្រូវបានបង្កើតឡើងដោយយោងទៅតាមអាស៊ីត RNA(Ribonucleic acid) ដែលមានតួនាទី “ណែនាំ” ឱ្យកោសិការបស់មនុស្សបញ្ចេញប្រូតេអ៊ីនដើម្បីទប់ទល់នឹងវីរុសនានាដែលកំពុងឆ្លងមកមនុស្ស។ ខុសពីវ៉ាក់សាំងបុរាណ វ៉ាក់សាំងប្រភេទបច្ចេកវិទ្យាជីវសាស្ត្រថ្មីនេះ មិនបានប្រើប្រាស់វីរុសដែលត្រូវបានបន្ថយកម្លាំងដើម្បីចាក់បញ្ចូលទៅក្នុងរាងកាយនោះទេ ដូច្នេះវានឹងមានសុវត្ថិភាពខ្ពស់សម្រាប់ប្រើប្រាស់នៅលើមនុស្ស។
Moderna, Inovio, CanSino និងក្រុមហ៊ុនផលិតឱសថជាច្រើនផ្សេងទៀតក៏កំពុងតែអភិវឌ្ឍវ៉ាក់សាំងប្រភេទថ្មីដូចគ្នានេះដែរ ក្នុងនោះមានក្រុមហ៊ុនខ្លះបានចាប់ផ្ដើមសាកល្បងលើមនុស្សជាច្រើនសប្ដាហ៍មកហើយដែរ។ គិតមកដល់បច្ចុប្បន្ន វ៉ាក់សាំងប្រភេទថ្មីដែលប្រើប្រាស់បច្ចេកវិទ្យា RNA មិនទាន់មានវត្តមាននៅក្នុងទីផ្សារនៅឡើយ។
នៅក្នុងដំណាក់កាលសាកល្បងដំបូង ក្រុមហ៊ុន Pfizer និងក្រុមហ៊ុន BioNTech មានគម្រោងពិសោធលើអ្នកស្ម័គ្រចិត្តចំនួន360នាក់ ចំណែកដំណាក់កាលទី2 នឹងមានអ្នកស្ម័គ្រដល់ទៅ8,000នាក់។ ការសាកល្បងវ៉ាក់សាំងខាងលើនេះនឹងត្រូវបានធ្វើឡើងនៅសាលាវេជ្ជសាស្ត្រ Grossman នៃសាកលវិទ្យាល័យ New York រួមនឹងសាលាវេជ្ជសាស្ត្រនៃសាកលវិទ្យាល័យ Maryland និងមជ្ឈមណ្ឌលវេជ្ជសាស្ត្រនៃសាកលវិទ្យាល័យ Rochester ព្រមទាំងមជ្ឈមណ្ឌលវេជ្ជសាស្ត្ររបស់មន្ទីរពេទ្យ Nhi Cincinnati ផងដែរ។
ក្នុងករណីទទួលបានជោគជ័យទាំងស្រុង និងទទួលបានការអនុញ្ញាតឱ្យចាប់ផ្ដើមផលិត ក្រុមហ៊ុន Pfizer និងក្រុមហ៊ុន BioNTech អាចផ្គត់ផ្គង់វ៉ាក់សាំងនេះរាប់លានដបសម្រាប់ទីផ្សារពិភពលោក៕
ប្រភព៖ សារព័ត៌មានបរទេស
May 6, 2020
ភ័យរន្ធត់ជំនួស!! ឯកសារបែកធ្លាយ៖ មិនយូរប៉ុន្មានសហរដ្ឋអាមេរិកនឹងមានអ្នកឆ្លងមេរោគកូវីដ-19 1ថ្ងៃ 2សែននាក់-ស្លាប់ 1ថ្ងៃ 3ពាន់នាក់ ក្រោយបញ្ឈប់វិធានការបិទទីក្រុង
ម៉ូដែល1 របស់រដ្ឋបាលលោកប្រធានាធិបតី ដូណាល់ ត្រាំ បានប៉ាន់ប្រមាណថា ចំនួនអ្នកឆ្លង និងស្លាប់ដោយសារមេរោគវីរុសកូរ៉ូណាប្រភេទថ្មី ឬកូវីដ-19 ក្នុងសហរដ្ឋអាមេរិក នឹងកើនឡើងយ៉ាងច្រើន ក្នុងអំឡុងមិនប៉ុន្មានសប្ដាហ៍ខាងមុខទៀត ដោយអាចនឹងមានអ្នកស្លាប់ច្រើនដល់ទៅ 3,000នាក់ក្នុង 1ថ្ងៃ យ៉ាងលឿនបំផុតក្នុងអំឡុងដើមខែមិថុនា។ នេះបើតាមរយៈឯកសារផ្ទៃក្នុងដែលខាងទីភ្នាក់ងារសារព័ត៌មាននីវយ៉ក ថាមស៍ បានទទួល។
តួលេខប៉ាន់ប្រមាណនេះ គឺជាតំណាងរបស់ចំនួនអ្នកស្លាប់ដែលកើនឡើងយ៉ាងច្រើនក្នុងរយៈពេលក្រោយៗនេះ ដោយរហូតពេញ 1សប្ដាហ៍កន្លងទៅ មានជនជាតិអាមេរិកាំងស្លាប់ដោយសារកូវីដ-19 ប្រមាណជា 2,000នាក់ក្នុង 1ថ្ងៃ តាមរយៈព័ត៌មានរបស់មហាវិទ្យាល័យចន ហប់គីនស៍ ខណៈដែលការប៉ាន់ប្រមាណទាំងនោះ ស្ថិតលើមូលដ្ឋានគ្រឹះរបស់ម៉ូដែល1 របស់មជ្ឈមណ្ឌលគ្រប់គ្រង និងការពាររោគ នៃរដ្ឋបាលកណ្ដាលសហរដ្ឋអាមេរិក។
នៅក្នុងឯកសាររបស់រដ្ឋបាល បានប៉ាន់ប្រមាណថា តួលេខអ្នកឆ្លងមេរោគកូវីដ-19 នឹងកើនឡើងដល់ 200,000នាក់ក្នុង 1ថ្ងៃ យ៉ាងយូរបំផុតក្នុងថ្ងៃទី1 មិថុនា និងតួលេខអ្នកស្លាប់ នឹងកើនឡើងទៅដល់ 3,000នាក់ក្នុង 1ថ្ងៃ ប្រៀបធៀបនឹងកម្រិតបច្ចុប្បន្ន ដែលអ្នកឆ្លងមេរោគថ្មីៗជាមធ្យមស្ថិតក្នុងចំនួន 2,500 – 3,000នាក់ក្នុង 1ថ្ងៃ ស្លាប់ប្រមាណជា 1,500 ទៅ 2,000នាក់ក្នុង 1ថ្ងៃ។
អាជ្ញាធររបស់រដ្ឋបាលសហរដ្ឋអាមេរិកម្នាក់ បានអះអាងប្រាប់ CNN ថា ឯកសារដែលទីភ្នាក់ងារសារព័ត៌មាននីវយ៉ក ថាមស៍ ទទួលបានមកនោះ ជារបស់ពិត ដោយវាជាឯកសារដែលចែកចាយទៅអង្គភាពផ្សេងៗដែលពាក់ព័ន្ធកាលពីចុងសម្ដាហ៍មុន តែយ៉ាងណាក៏ដោយ មកដល់ចំណុចនេះ អាជ្ញាធរនៅតែប្រយ័ត្នប្រយែងពាក់ព័ន្ធនឹងតួលេខការប៉ាន់ប្រមាណទាំងឡាយនោះនៅឡើយ។
អ្នកយកព័ត៌មានរបស់ CNN បានទាក់ទងទៅសេតវិមាន ដើម្បីសាកសួរព័ត៌មានពាក់ព័ន្ធនឹងរបាយការណ៍ព័ត៌មាននោះ តែខាងសេតវិមាន បានប្រាប់ថា ក្រុមការងារចំពោះកិច្ច ផ្នែកវីរុសកូរ៉ូណាប្រភេទថ្មីរបស់លោកប្រធានាធិបតី ដូណាល់ ត្រាំ នៅមិនទាន់បានឃើញឯកសារដែលបែកធ្លាយដល់ដៃទីភ្នាក់ងារសារព័ត៌មាននីវយ៉កថាមស៍នោះនៅឡើយ។
លោកថ្លែងថា “វាមិនមែនជាឯកសាររបស់សេតវិមាន ឬជាតំណាងរបស់គណៈកម្មការចំពោះកិច្ចផ្នែកវីរុសកូរ៉ូណា ឬឯកសារដែលផ្ញើតាមរយៈអង្គភាពការងារណាមួយឡើយ។ ការណែនាំឱ្យបើកអាមេរិកឡើងវិញជាដំណាក់កាលៗរបស់លោកប្រធានាធិបតី ជាវិធានការដែលដំណើរការដោយគោលការណ៍ខាងវិទ្យាសាស្ត្រ ដែលពួកអ្នកជំនាញការផ្នែកសាធារណៈសុខាភិបាលលំដាប់ខ្ពស់ និងអ្នកជំនាញការខាងជំងឺឆ្លងរបស់រដ្ឋបាលកណ្ដាល ក៏បានឯកភាពផងដែរ។ លោកប្រធានាធិបតី ដូណាល់ ត្រាំ ថែមទាំងផ្ដល់ភាពសំខាន់ទៅលើសុខភាពរបស់ពលរដ្ឋអាមេរិកមុនអ្វីៗទាំងអស់ ហើយនឹងនៅតែជាដូច្នេះរហូតតទៅ ក្នុងខណៈដែលយើងកំពុងតាមដានសង្កេតសកម្មភាពការបន្ធូរបន្ថយវិធានការបិទទីក្រុងរបស់រដ្ឋផ្សេងៗ”
ការកែសម្រួលបន្ថែមការប៉ាន់ប្រមាណតួលេខអ្នកស្លាប់នេះ បានកើតឡើងក្នុងខណៈដែលរដ្ឋផ្សេងៗ បានបន្ធូរបន្ថយវិធានការបិទទីក្រុង ក្រោយពីអំឡុងពេលចុងសប្ដាហ៍កន្លងទៅ មានពលរដ្ឋអាមេរិកាំងចំនួនដ៏ច្រើន បាននាំគ្នាចេញមកក្រៅផ្ទះ ដើម្បីតវ៉ាទាមទារ ឬមកទទួលយកពន្លឺថ្ងៃ ក្នុងរដូវស្លឹកឈើលាស់នៅតាមសួនច្បារសាធារណៈនានា។
ទាំងអស់នេះ រដ្ឋហ្វ្លរីដា, ខូឡូរ៉ាដូ, អ៊ិនដៀណា, នេប្រាស្កា, សៅថ៍ឃែរ៉ូឡៃណា, វេស្ត វើជីនៀ ដូចគ្នានឹងរដ្ឋផ្សេងៗទៀតដែរ បានចាប់ផ្ដើមមានសកម្មភាពបន្ធូរបន្ថយការកំណត់ផ្សេងៗ ក្នុងការព្យាយាមស្ដារសេដ្ឋកិច្ចដែលបែកខ្ចាយជាបំណែកៗ និងបំបាត់អារម្មណ៍រសាប់រសល់របស់ប្រជាជន។
យ៉ាងណាក៏ដោយ ក្នុងការសន្និដ្ឋានច្បាស់លាស់ថា ការបើកសេដ្ឋកិច្ចរបស់រដ្ឋផ្សេងៗនោះ អាចត្រូវប្ដូរនឹងភាពប្រថុយប្រថានដល់ថ្នាក់ស្លាប់តែម្ដង។ “វាជាភាពល្ងង់ខ្លៅបែបងាយៗ” អ្នកស្រី អេលីហ្សាប៊ែត ខេហេន អ្នកយកព័ត៌មានផ្នែកសាធារណៈសុខាភិបាលរបស់ CNN បាននិយាយថា “ពេលអ្នកប្រាប់ប្រជាជនថា អេ៎! អ្នកអាចចេញទៅបារ៍ ទៅភោជនីយដ្ឋានបានហើយណា៎ នោះចំនួនអ្នកស្លាប់ នឹងកើនខ្ពស់ឡើង”
តាមរយៈព័ត៌មានរបស់មហាវិទ្យាល័យ ចន ហប់គីនស៍ បានរកឃើញថា វីរុសកូរ៉ូណាប្រភេទថ្មី បានធ្វើឱ្យមានអ្នកឆ្លងមេរោគនៅក្នុងសហរដ្ឋអាមេរិករួចបាត់ទៅហើយជាង 1,170,000នាក់ ក្នុងនោះ ស្លាប់ជាង 68,000នាក់។
កាលពីពេលមុនហ្នឹង លោកប្រធានាធិបតី ដូណាល់ ត្រាំ ធ្លាប់បានសន្និដ្ឋានថា នឹងមានពលរដ្ឋអាមេរិកាំងស្លាប់ដោយសាររោគរាតត្បាតដ៏ធំនេះប្រមាណជា 65,000នាក់ តែកាលពីយប់ថ្ងៃអាទិត្យ(ទី3ឧសភា) លោកបាន កែ សម្រួលបន្ថែមការប៉ាន់ស្មានដល់ទៅ 80,000 ឬ 90,000នាក់។ តែយ៉ាងណាក៏ដោយ ជួនកាលតួលេខនេះ វាអាចមិនមែនជាការកែសម្រួលបន្ថែមក្នុងការប៉ាន់ស្មានលើកចុងក្រោយនោះទេ។
វេជ្ជបណ្ឌិត Deborah Birx សមាជិកម្នាក់ក្នុងក្រុមការងារផ្នែកទប់ទល់នឹងមេរោគកូវីដ-19 របស់សេតវិមាន បានប្រាប់ថា តាមរយៈការប៉ាន់ប្រមាណផ្សេងៗ បានរកឃើញថា ទោះបីជានៅតែមានការណែនាំផ្នែករក្សាគម្លាតឆ្ងាយខាងសង្គមក៏ដោយ ក៏ប្រហែលជានៅតែមានពលរដ្ឋអាមេរិកាំងប្រមាណជា 100,000 ទៅ 240,000នាក់ នឹងត្រូវស្លាប់ដោយសារវិបត្តិក្នុងគ្រានេះដែរ៕
ប្រភព៖ សារព័ត៌មានបរទេស
May 6, 2020
អ្នកវីរុសវិទ្យាចិនម្នាក់ ដែលត្រូវគេចោទថា ដឹងរឿង “កូវីដ-19 បែកធ្លាយចេញពីបន្ទប់ពិសោធន៍វូហាន” បានបដិសេធរឿង “ក្បត់ឧត្ដមគតិ” នាំក្រុមគ្រួសារភៀសខ្លួនចេញពីចិន
របាយការណ៍ព័ត៌មានរបស់ចិន កាលពីថ្ងៃចុងសប្ដាហ៍មុន(ថ្ងៃទី2ឧសភា) បានឱ្យដឹងថា អ្នកវីរុសវិទ្យាល្បីឈ្មោះម្នាក់ នៃស្ថាប័នវីរុសវិទ្យាក្នុងទីក្រុងវូហាន លោកស្រី ស៊ឺ ជឹងលី ដែលបានធ្លាក់ខ្លួនក្លាយជាជនសង្ស័យពាក់ព័ន្ធនឹងប្រភពកំណើតនៃការឆ្លងរាលដាលរបស់វីរុសកូរ៉ូណាប្រភេទថ្មី ឬកូវីដ-19 ទូទាំងពិភពលោកនាពេលបច្ចុប្បន្ន បានចេញមកបដិសេធចំពោះព័ត៌មានចចាមអារ៉ាមដ៏ច្រើនសន្ធឹកដែលថា “លោកស្រីបានក្បត់ឧត្ដមគតិខ្លួនឯង និងបានរត់ភៀសខ្លួនចេញពីប្រទេសចិន”។
លោកស្រី ស៊ឺ អ្នកស្រាវជ្រាវវីរុសសត្វប្រចៀវល្បីឈ្មោះលំដាប់ពិភពលោក បានផូស្តសំណេរមួយផ្ញើទៅក្រុមមិត្តភក្តិក្នុងបណ្ដាញសង្គមចិន វីឆាត កាលពីថ្ងៃសៅរ៍(ទី2មេសា) ថា “មិនថាត្រូវប្រឈមនឹងបញ្ហាធ្ងន់ធ្ងរប៉ុនណាឡើយ គ្មានថ្ងៃដែលនឹងកើតហេតុការណ៍ក្បត់ឧត្ដមគតិខ្លួនឯង ដូចដែលពាក្យចចាមអារ៉ាមលេចឮនោះឡើយ”។
ដោយសារតែមានចរន្តព័ត៌មានចចាមអារ៉ាមកាលពីពេលថ្មីៗនេះ បញ្ជាក់ថា លោកស្រី ស៊ឺ ជឹងលី បាន “ក្បត់ឧត្ដមគតិ” នាំក្រុមគ្រួសារ និងប្រមូល “ឯកសារសម្ងាត់ប្រមាណជា 1ពាន់ឈុត” រត់ភៀសខ្លួនគេចទៅអឺរ៉ុប និងបានដាក់ពាក្យស្នើសុំការគាំពារពីស្ថានទូតសហរដ្ឋអាមេរិកនៅក្នុងប្រទេសបារាំង។
រហូតទាល់តែទីភ្នាក់ងារព័ត៌មានរបស់ចិន ដែលមានដូចជា វេបសាយព័ត៌មាននៅក្នុងប្រទេស Global Times និងទីភ្នាក់ងារព័ត៌មាននៅទីក្រុងហុងកុង សៅថ៍ ឆាយណា ម៉រនីង ផូស្ត បានចេញមករាយការណ៍ព័ត៌មាន(កាលពីថ្ងៃទី2 ឧសភា) បដិសេធរាល់ព័ត៌មានចចាមអារ៉ាមទាំងនោះ ដោយបានផ្សព្វផ្សាយសំណេររបស់លោកស្រី ស៊ឺ នៅក្នុងបណ្ដាញសង្គម WeChat ទៀតផង។
លោកស្រី ស៊ឺ ជឹងលី ផូស្តសំណេរនៅលើ WeChat បដិសេធព័ត៌មានចចាមអារ៉ាមរឿង “ក្បត់ឧត្ដមគតិ” និងនាំក្រុមគ្រួសាររត់គេចខ្លួនចេញពីប្រទេសចិន ទៅសុំការគាំពារពីស្ថានទូតសហរដ្ឋអាមេរិកនៅក្នុងប្រទេសបារាំង
សារព័ត៌មាន គ្លោបល ថាមស៍ របស់បក្សកុម្មុយនីស្តចិន បានអះអាងថា លោកស្រីស៊ឺ ជឹងលី ជាអ្នកសរសេរសំណេរ ផូស្តនៅលើបណ្ដាញសង្គម WeChat ពិតប្រាកដមែន ដោយសំណេរនោះបានសរសេរថា “មិត្តភក្តិជាទីស្រឡាញ់…ខ្ញុំ និងក្រុមគ្រួសារសុខសប្បាយជាទេ មិនថាត្រូវប្រឈមនឹងបញ្ហាធ្ងន់ធ្ងរប៉ុនណាក៏ដោយ គ្មានថ្ងៃដែលខ្ញុំនឹង “ក្បត់ឧត្ដមគតិខ្លួនឯង” ដូចដែលព័ត៌មានចចាមអារ៉ាមបានលេចឮនោះទេ។ ពួកយើងមិនបានធ្វើអ្វីខុសទេ ពួកយើងមានជំនឿដ៏គង់វង្សចំពោះវិទ្យាសាស្ត្រ នឹងត្រូវតែមានថ្ងៃដែលដុំមេឃខ្មៅរលាយបាត់អស់ និងដួងព្រះអាទិត្យចាំងចែងពន្លឺចេញមកមិនខាន”
លោកស្រី ស៊ឺ ជឹងលី អ្នកស្រាវជ្រាវប្រចាំស្ថាប័នវីរុសវិទ្យាទីក្រុងវូហាន បានធ្លាក់ខ្លួនក្លាយជាមុខសញ្ញាក្នុងការរិះគន់ និងក្លាយជាជនសង្ស័យថាបានដឹង បានឮរឿងការឆ្លងរាលដាលរបស់វីរុសកូរ៉ូណាប្រភេទថ្មី ដែលចាប់ផ្ដើមឆ្លងរាលដាលក្នុងវូហានកាលពីចុងឆ្នាំកន្លងទៅ។
លោកស្រី ស៊ឺ បានបំពេញការងារសិក្សាស្រាវជ្រាវជាមួយមេរោគវីរុសកូរ៉ូណាយូរជាង 10ឆ្នាំមកហើយ និងជាអ្នករកឃើញវីរុសកូរ៉ូណានៅក្នុងសត្វប្រចៀវ ដែលបង្កជាជំងឺ SARS (ជំងឺផ្លូវដង្ហើមធ្ងន់ធ្ងរ និងទាន់ហន់) នៅឆ្នាំ2002 ដល់ 2003។
ក្រុមអ្នកវិទ្យាសាស្ត្រនាំគ្នាជឿថា វីរុសកូរ៉ូណាប្រភេទថ្មី បានចម្លងមេរោគពីសត្វ មកមនុស្ស និងអាចជាសត្វប្រចៀវ ហើយនិងមើលទៅហាក់ដូចជាមិនអាចទៅរួចសោះឡើយ ដែលវាអាចរបូតធ្លាយចេញមកពីស្ថាប័នវីរុសវិទ្យានៅទីក្រុងវូហានដោយឧប្បត្តិហេតុ ឬដោយទង្វើដែលកើតចេញពីស្នាដៃមនុស្ស។
តែយ៉ាងណាក៏ដោយ នៅមិនទាន់មានអ្នកណាបានដឹងពីប្រភពកំណើតពិតប្រាកដនៃវីរុសមរណៈនេះនៅឡើយ ចំណែកប្រទេសចិន បានថ្លែងថា ខ្លួនកំពុងតែដំណើរការស៊ើបអង្កេតអំពីរឿងនេះ៕
ប្រភព៖ សារព័ត៌មានបរទេស
May 6, 2020
Donald Trump៖ សហរដ្ឋអាមេរិកនឹងប្រកាសអំពីប្រភពរបស់COVID-19
ប្រធានាធិបតីសហរដ្ឋអាមេរិក លោកDonald Trump បានឱ្យដឹងថា រដ្ឋាភិបាលរបស់លោកនឹងប្រកាសលម្អិតអំពីប្រភពរបស់ COVID-19 ដែលជាវីរុសបង្កជំងឺរលាកសួតប្រភេទថ្មី ទន្ទឹមនឹងការតឿនឱ្យប្រទេសចិន ធ្វើឱ្យមានតម្លាភាពលើបញ្ហានេះ។
សហរដ្ឋអាមេរិកនឹងប្រកាសសម្អិត
ថ្លែងទៅកាន់អ្នកយកព័ត៌មាននៅមុនពេលចាប់ផ្ដើមដំណើរទស្សនកិច្ចទៅកាន់រដ្ឋ Arizona នាថ្ងៃទី5ឧសភា ប្រធានាធិបតី Donald Trump ឱ្យដឹងថា “យើងប្រាកដជានឹងប្រកាស (ប្រភពរបស់វីរុស)”។ ម្ចាស់សេតវិមានរូបនេះ មិនបានបញ្ជាក់អំពីពេលវេលាជាក់លាក់ណាមួយក្នុងការប្រកាសលទ្ធផលនៃការស្រាវជ្រាវលើបញ្ហាប្រភពរបស់មេរោគCOVID-19នោះទេ។
ទន្ទឹមនឹងនេះ លោក Trump ក៏បានតឿនប្រទេសចិនឱ្យមានតម្លាភាពអំពីព័ត៌មានទាក់ទងនឹងរោគរាតត្បាតនេះផងដែរ។ ទីភ្នាក់ងារសារព័ត៌មាន Reuters ដកស្រង់សម្ដីលោក Trump ថ្លែងថា “យើងចង់ឱ្យពួកគេធ្វើឱ្យមានតម្លាភាព។ យើងចង់ស្វែងយល់ថាតើមានរឿងអ្វីកើតឡើង ដើម្បីកុំឱ្យបញ្ហានេះកើតមានសាជាថ្មី”។
លោក Trump និងមន្ត្រីជាច្រើននៅសហរដ្ឋអាមេរិក ធ្លាប់បានចោទប្រទេសចិនថាបានលាក់បាំងព័ត៌មាន ធ្វើឱ្យ COVID-19 ឆ្លងរាលដាលខ្លាំង និងក្លាយជារោគរាតត្បាតពេញសកលលោក។ លោក Trump ក៏បានបញ្ជាឱ្យក្រុមចារបុរសរបស់ខ្លួន ស៊ើបអង្កេតលើប្រភពរបស់វីរុសនេះផងដែរ។ កាលពីសប្ដាហ៍មុន ប្រធានាធិបតីសហរដ្ឋអាមេរិកបានថ្លែងថា មានភ័ស្តុតាងក្នុងការអះអាងថាវីរុសនេះមានប្រភពចេញពីបន្ទប់ពិសោធន៍មួយនៅទីក្រុង Wuhan ប្រទេសចិន។ ថ្ងៃទី3ឧសភា រដ្ឋមន្ត្រីការបរទេសសហរដ្ឋអាមេរិក លោក Mike Pompeo ក៏បានអះអាងថា “មានភ័ស្តុតាងធំ” ស្ដីអំពីវីរុសមានប្រភពពីបន្ទប់ពិសោធន៍នៅ Wuhan។
សហភាពអឺរ៉ុបគាំទ្រការស៊ើបអង្កេតលើប្រភពរបស់វីរុសកូរ៉ូណាថ្មីនេះដែរ
សហភាពអឺរ៉ុប EU កាលពីថ្ងៃទី5ឧសភា បានអំពាវនាវឱ្យមានការស៊ើបអង្កេតទូទាំងពិភពលោកអំពីប្រភពរបស់វីរុសCOVID-19។ EU ឱ្យដឹងថា នៅក្នុងមហាសន្និបាតសុខភាពពិភពលោកដែលនឹងត្រូវបានធ្វើឡើងនៅថ្ងៃទី18ឧសភា ក្រុមប្រទេសនេះនឹងលើកឡើងអំពីសេចក្ដីព្រាងលើសេចក្ដីសម្រេចមួយដើម្បីអំពាវនាវឱ្យមាន “ការស៊ើបអង្កេតឯករាជ្យ” ទៅលើប្រភពរបស់វីរុសដែលបាននិងកំពុងសម្លាប់មនុស្សរាប់ពាន់នាក់ក្នុង1ថ្ងៃៗ។
រីឯនាយករដ្ឋមន្ត្រីអូស្ត្រាលី លោក Scott Morrison កាលពីថ្ងៃទី5ឧសភាក៏បានថ្លែងថា លោកបានសរសេរសំបុត្រផ្ញើទៅកាន់បណ្ដាប្រទេស G20 ដើម្បីអំពាវនាវឱ្យមានការ “វាយតម្លៃត្រឹមត្រូវ” អំពីប្រភពរបស់ COVID-19។
ចំណែកប្រទេសចិនឯណោះវិញ មកដល់ពេលនេះមិនបានសន្យាថានឹងចូលរួមក្នុងការស៊ើបអង្កេតបញ្ហាខាងលើនេះនៅឡើយ ដោយបាននិយាយថា នេះនឹងជាយុទ្ធនាការ “ទម្លាក់កំហុស” ទៅលើទីក្រុងប៉េកាំងតែប៉ុណ្ណោះ។
គិតមកដល់បច្ចុប្បន្ន ប្រទេសនិងដែនដីចំនួន212ក្នុងពិភពលោក មានអ្នកជំងឺកូរ៉ូណាសរុបជាង 3,721,000នាក់ ចំណែកអ្នកស្លាប់សរុបមានជិត258,000នាក់៕
ប្រភព៖ សារព័ត៌មានបរទេស
May 6, 2020