អន្តរជាតិ - La Reine Media

យានអវកាសមានមនុស្សបើកបរដំបូងគេបង្អស់របស់ SpaceX នឹងហោះទៅកាន់ស្ថានីយអវកាស ISS នៅសប្ដាហ៍ក្រោយ

ជើងហោះហើរជាប្រវត្តិសាស្ត្ររបស់រ៉ុកកែត Falcon 9 នាថ្ងៃទី27ឧសភាខាងមុខនឹងក្លាយជាលើកដំបូងបង្អស់ដែលទីភ្នាក់ងារអវកាសអាមេរិកាំង NASA បាញ់បង្ហោះយានអវកាសដឹកអវកាសយានិកពីទឹកដីសហរដ្ឋអាមេរិក ក្រោយរយៈពេលជិត1ទសវត្សរ៍មកនេះ។

រ៉ុកកែត Falcon 9 របស់ក្រុមហ៊ុន SpaceX នឹងត្រូវបានបាញ់បង្ហោះពីមជ្ឈមណ្ឌលអវកាស Dennedy ក្នុងរដ្ឋ Florida សហរដ្ឋអាមេរិក។ នៅក្នុងយានអវកាស Crew Dragon របស់ក្រុមហ៊ុន SpaceX នោះ នឹងមានអវកាសយានិកជនជាតិអាមេរិកាំង2រូប។ គោលដៅរបស់ពួកគេគឺស្ថានីយអវកាសអន្តរជាតិ(ISS) ជាកន្លែងដែលពួកគេត្រូវចំណាយពេលចាប់ពី1ខែទៅ4ខែ នៅលើកម្ពស់400គីឡូម៉ែត្រពីលើផែនដី។

ជើងហោះហើរនេះ មិនត្រឹមតែជាសញ្ញានៃជោគជ័យផ្នែកបច្ចេកវិទ្យានោះទេ ប៉ុន្តែវាក៏មានអត្ថន័យធំធេងទាក់ទងនឹងភូមិសាស្ត្រនយោបាយរបស់អាមេរិកាំងផងដែរ។

NASA នឹងលែងពឹងផ្អែកទៅលើកាំជ្រួច Soyuz របស់រុស្ស៊ីដូចមុនទៀតហើយក្នុងការហោះហើរទៅកាន់ស្ថានីយអវកាសអន្តរជាតិ ISS ដោយពួកគេនឹងអាចបញ្ជូនអវកាសចរឡើងទៅទីអវកាសពីសហរដ្ឋអាមេរិកផ្ទាល់។
នេះនឹងជាបេសកកម្មឡើងទៅកាន់អវកាសដែលមានមនុស្សបើកបរដំបូងបង្អស់ដែលត្រូវបានបាញ់បង្ហោះពីទឹកដីសហរដ្ឋអាមេរិកក្នុងរយៈពេលជិត1ទសវត្សរ៍មកនេះ។

ក្រុមហ៊ុន SpaceX របស់មហាសេដ្ឋី Elon Musk បានទទួលជោគជ័យក្នុងការហោះហើរលក្ខណៈហ្វឹកហាត់មួយដោយប្រើអវកាសយានិកសិប្បនិម្មិតកាលពីខែមីនា ឆ្នាំ2019។

https://www.youtube.com/watch?v=FLP5EGO-RzU

ពួកគេក៏បានដឹកជញ្ជូនទំនិញឡើងទៅកាន់ស្ថានីយអវកាសអន្តរជាតិ ចំនួន19លើក ចាប់ពីឆ្នាំ2012 រហូតមកដល់បច្ចុប្បន្ន ដោយប្រើប្រាស់យានអវកាស Crew Dragon៕

ប្រភព៖ សារព័ត៌មានបរទេស

May 20, 2020

ធ្លាក់យន្តហោះទៀតហើយ! 5ថ្ងៃចុងក្រោយនេះ យន្តហោះចម្បាំងបំបាំងកាយអាមេរិកពីរគ្រឿង បានជួបគ្រោះថ្នាក់

យន្តហោះចម្បាំងបំបាំងកាយ F-35A ដែលទើបតែបានជួបឧបទ្ទវហេតុនៅពេលកំពុងហ្វឹកហាត់នៅក្នុងរដ្ឋ Florida បានក្លាយជាជាយន្តហោះចម្បាំងបំបាំងកាយទីពីររបស់សហរដ្ឋអាមេរិកដែលបានធ្លាក់ ក្នុងអំឡុងពេលមិនដល់មួយសប្ដាហ៍កន្លងទៅនេះ។

“F-35A ស្ថិតក្រោមការគ្រប់គ្រងរបស់ក្រុមយន្តហោះចម្បាំងលេខ58 បានធ្លាក់នៅពេលកំពុងចុះចតនាវេលាម៉ោង21និង30នាទី ក្នុងថ្ងៃទី19ឧសភា។ អ្នកបើកបរយន្តហោះបានចុចគន្លឹះបាញ់កៅអីចេញពីយន្តហោះទាន់ពេលដោយសុវត្ថិភាព និងត្រូវបានបញ្ជូនទៅកាន់មន្ទីរពេទ្យដើម្បីពិនិត្យ និងព្យាបាលរបួស។ គ្រោះថ្នាក់ធ្លាក់យន្តហោះនេះបានកើតឡើងនៅពេលយន្តហោះនេះកំពុងចូលរួមក្នុងការហ្វឹកហាត់នៅពេលយប់។ ប៉ុន្តែ ហេតុការណ៍នេះមិនបានធ្វើឱ្យមានអ្នកស្លាប់ ឬរបួស និងខូចខាតទ្រព្យសម្បត្តិនៅលើដីនោះទេ” នេះបើតាមសម្ដីមេបញ្ជាការនៃជំរំទ័ពអាកាស Eglin ក្នុងរដ្ឋ Florida នៃសហរដ្ឋអាមេរិក ដែលបានប្រកាសឱ្យដឹងក្នុងថ្ងៃទី20ឧសភានេះ។

នេះគឺជាយន្តហោះចម្បាំងបំបាំងកាយទីពីររបស់កងកម្លាំងនៅមូលដ្ឋានទ័ព Eglin ដែលបានជួបគ្រោះថ្នាក់ក្នុងអំឡុងពេលត្រឹមតែ5ថ្ងៃប៉ុណ្ណោះ បន្ទាប់ពីយន្តហោះ F-22 មួយគ្រឿងបានធ្លាក់នៅពេលកំពុងហ្វឹកហាត់កាលពីថ្ងៃទី15ឧសភាកន្លងទៅ៕

ប្រភព៖ សារព័ត៌មានបរទេស

May 20, 2020

Hot News! ចិនថាមិនអត់ឱនឱ្យក្រុមណាដែលចង់ “ផ្ដាច់ខ្លួន” នោះឡើយ បន្ទាប់ពីតៃវ៉ាន់ប្រកាសបដិសេធគោលការណ៍ “ប្រទេសមួយ របបពីរ”

ប្រទេសចិនបានប្រកាសអំពីគោលនយោបាយ “ប្រទេសមួយ របបពីរ” តាំងពីយូរយារមកហើយ និងបានប្រកាសជាថ្មីថានឹងមិនលើកលែងទោសឱ្យក្រុម “ផ្ដាច់ខ្លួន” ណាមួយនៅកោះតៃវ៉ាន់នោះឡើយ។

Ma Xiaoguang ដែលជាអ្នកនាំពាក្យរបស់ការិយាល័យទទួលបន្ទុកកិច្ចការតៃវ៉ាន់របស់ប្រទេសចិន ថ្ងៃនេះបានថ្លែងថា រូបមន្ត “ប្រទេសមួយ របបពីរ” គឺជាគោលការណ៍ស្នូលក្នុងគោលនយោបាយសម្រាប់តៃវ៉ាន់របស់ប្រធានាធិបតីចិន លោក ស៊ី ជីនភីង។ ប្រទេសចិននឹងប្រកាន់ខ្ជាប់នូវរូបមន្តនេះ។

“បង្រួបបង្រួមគឺជាប្រការដែលមិនអាចគេចរួចនៅក្នុងប្រវត្តិរីកចម្រើនដ៏មហិមារបស់ប្រទេសចិន” លោក Ma Xiaoguang ថ្លែងបែបនេះ។ លោកបន្តថា “យើងមានការប្ដេជ្ញាចិត្តខ្ពស់ ប្រកបដោយភាពជឿជាក់ និងសមត្ថភាពពេញលេញដើម្បីការពារអធិបតេយ្យភាពរបស់ប្រទេសជាតិ។ យើងនឹងមិនលើកលែងទោសឱ្យក្រុមណាមួយដែលធ្វើសកម្មភាពផ្ដាច់ខ្លួន ឬកម្លាំងបរទេសណាដែលជ្រៀតជ្រែកកិច្ចការផ្ទៃក្នុងរបស់ចិនជាដាច់ខាត”។

ចិនថាមិនអត់ឱនឱ្យក្រុមណាដែលចង់ "ផ្ដាច់ខ្លួន" នោះឡើយ បន្ទាប់ពីតៃវ៉ាន់ប្រកាសបដិសេធគោលការណ៍ "ប្រទេសមួយ របបពីរ" — លោក Ma Xiaoguang អ្នកនាំពាក្យរបស់ការិយាល័យទទួលបន្ទុកកិច្ចការតៃវ៉ាន់របស់ប្រទេសចិន

អ្នកនាំពាក្យរបស់ការិយាល័យទទួលបន្ទុកកិច្ចការតៃវ៉ាន់របស់ប្រទេសចិន បានសង្កត់ធ្ងន់ថា “តៃវ៉ាន់ឯករាជ” គឺជាការដើរបញ្ច្រាសនិន្នាការសម័យថ្មី និងជាផ្លូវដែលមិនអាចនាំទៅណាបាននោះទេ។ “យើងត្រៀមខ្លួនជាស្រេចក្នុងការបង្កើតវិសាលភាពធំទូលាយសម្រាប់បង្រួបបង្រួមជាតិដោយសន្តិភាព ប៉ុន្តែដាច់ខាតមិនទុកចន្លោះប្រហោងណាមួយសម្រាប់សកម្មភាពផ្ដាច់ខ្លួននៃក្រុម “តៃវ៉ាន់ឯករាជ” នោះទេ បើទោះក្នុងរូបភាពណាក៏ដោយ”។

ការប្រកាសរបស់ Ma Xiaoguang ខាងលើនេះ ត្រូវបានធ្វើឡើងបន្ទាប់ពីសុន្ទរកថាដំបូងនៃការឡើងកាន់អំណាចជាថ្មីរបស់មេដឹកនាំតៃវ៉ាន់ លោកស្រី Tsai Ing-wen។ លោកស្រីថ្លែងថា តៃវ៉ាន់ត្រៀមខ្លួនជាស្រេចក្នុងការចរចាជាមួយភាគីចិន ប៉ុន្តែមិនយល់ព្រមឱ្យទីក្រុងប៉េកាំងប្រើប្រាស់រូបមន្ត “ប្រទេសមួយ របបពីរ” ដើម្បីទម្លាក់តួនាទីរបស់តៃវ៉ាន់នោះឡើយ។

ប្រទេសចិន (ដីគោក) តែងតែចាត់ទុកកោះតៃវ៉ាន់ជាផ្នែកមួយនៃទឹកដីរបស់ខ្លួន ដែលរង់ចាំតែការបង្រួបបង្រួមប៉ុណ្ណោះ រាប់ទាំងការប្រើប្រាស់កម្លាំងបាយផងដែរ។ ទំនាក់ទំនងរវាងចិនដីគោក និងកោះតៃវ៉ាន់ បានប្រែទៅជាល្អក់កករជាថ្មីចាប់តាំងពីលោកស្រី Tsai Ing-wen ដែលជាអ្នកប្រឆាំងនឹងគោលនយោបាយ “ប្រទេសមួយ របបពីរ” បានជាប់ឆ្នោតកាលពីឆ្នាំ2016។

មេដឹកនាំកោះតៃវ៉ាន់ លោកស្រី Tsai Ing-wen និងថ្នាក់ដឹកនាំកោះតៃវ៉ាន់ — មេដឹកនាំកោះតៃវ៉ាន់ លោកស្រី Tsai Ing-wen និងថ្នាក់ដឹកនាំ

នៅក្នុងអាណត្តិដំបូង លោកស្រី Tsai Ing-wen បានប្រកាសជាច្រើនដងថាមិនទទួលយករូបមន្ត “ប្រទេសមួយ របបពីរ” ដែលប្រទេសចិនបានលើកឡើង។ លោកស្រីថា តៃវ៉ាន់ “គឺជាប្រទេសឯករាជ្យ”។ ទន្ទឹមនឹងនេះ “ភាពផ្អែមល្ហែម” រវាងកោះតៃវ៉ាន់ និងអាមេរិកាំង ក៏បានធ្វើឱ្យប្រទេសចិនខឹងសម្បាខ្លាំងផងដែរ។ ប្រទេសចិនបានបញ្ជុះបញ្ចូលឱ្យសម្ព័ន្ធមិត្តចំនួន7របស់កោះតៃវ៉ាន់ កាត់ផ្ដាច់ទំនាក់ទំនងការទូតជាមួយកោះនេះ ហើយងាកមកបង្កើតទំនាក់ទំនងជាមួយទីក្រុងប៉េកាំង។ បច្ចុប្បន្ន កោះតៃវ៉ាន់ត្រូវបានទទួលស្គាល់ដោយប្រទេសចំនួន15 ដែលភាគច្រើនជាបណ្ដាប្រទេសតូចៗនៅអាមេរិកខាងត្បូង និងប្រទេសនៅជាប់មហាសមុទ្រប៉ាស៊ីហ្វីក។ តៃវ៉ាន់ក៏មានទំនាក់ទំនងពិសេសជាមួយបណ្ដាប្រទេសដូចជា អូស្ត្រាលី កាណាដា បណ្ដាប្រទេសនៅក្នុងសហភាពអឺរ៉ុប ជប៉ុន នូវែលហ្សេឡង់ និងសហរដ្ឋអាមេរិកផងដែរ៕

ប្រភព៖ សារព័ត៌មានបរទេស

May 20, 2020

អាមេរិក-ចិន “សង្គ្រាមពាក្យសម្ដី” ដើមកំណើតកូវីដ-19 នឹងធ្វើឱ្យបែកបាក់ ប្រេះឆាពី 1ជំនាន់ ទៅ1ជំនាន់…

សម្ព័ន្ធភាពរវាង “មហានាគ” និង “មហាឥន្ទ្រី” កំពុងត្រូវធ្វើឱ្យញ័ររញ្ជួយជាថ្មីម្ដងទៀត បន្ទាប់ពី “សង្គ្រាមពាណិជ្ជកម្ម” ដែលទាំង 2នាក់ធ្លាប់បើកឆាកប្ដូរកណ្ដាប់ដៃគ្នាម្នាក់ 1ដៃកាលពីពេលមុនរួចមកហើយ និងកំពុងស្ថិតក្នុងអំឡុងពេលសម្រាកឱ្យទឹកនោះ ក៏ស្រាប់តែមានកម្លាំងជំរុញជាថ្មីម្ដងទៀត ពីអ្វីដែល “មនុស្សមិនអាចមើលឃើញបានដោយភ្នែកទទេ” តែបានសម្លាប់ជីវិតមនុស្សរួចទៅហើយអស់រាប់សែននាក់ និងថែមទាំងធ្វើឱ្យមនុស្សជាច្រើនត្រូវរងទុក្ខវេទនា ដោយសារតែត្រូវអស់ការងារធ្វើ ជាច្រើនលាននាក់ទៀត ទូទាំងពិភពលោក។

1.Chinese Virus!!
2.ឧប្បត្តិហេតុក្នុងបន្ទប់ពិសោធន៍ទីក្រុងវូហាន ធ្វើឱ្យកូវីដ-19 ដែលឆ្លងកាត់ការបង្កាត់ពូជរួចហើយ របូតធ្លាយចេញមក!!
3.ដោយសារតែរដ្ឋបាលចិន បិទបាំងព័ត៌មាន ធ្វើឱ្យកូវីដ-19 រាលដាលឆាបឆេះពេញសហរដ្ឋអាមេរិក!!
4.WHO កាន់ជើងរដ្ឋបាលចិន ជាហេតុបណ្ដាលឱ្យការធ្វើការងារកើតការខុសឆ្គង រហូតធ្វើឱ្យសហរដ្ឋអាមេរិករងផលប៉ះពាល់!!
5.វីរុសកូវីដ-19 កើតឡើងនៅក្នុងប្រទេសចិន ដូច្នេះ ចិនត្រូវតែទទួលខុសត្រូវ និងចេញថ្លៃខូចខាតឱ្យពលរដ្ឋអាមេរិកាំងដែលរងផលប៉ះពាល់!!

នេះគ្រាន់តែជា “ការបើកឆាក” ដែលលោកប្រធានាធិបតី ដូណាល់ ត្រាំ និងលោក ម៉ៃក៍ ប៉ុមប៉េអូ រដ្ឋមន្ត្រីការបរទេសអាមេរិក គាស់ឡើងយកមកសំពង “មហានាគ” ក្រោយពីកូវីដ-19 សម្លាប់ជីវិតពលរដ្ឋអាមេរិកាំងអស់ 91,981នាក់ និងឆ្លងមេរោគ 1,550,294នាក់(សម្រាប់ថ្ងៃទី19 ឧសភា ដោយទីភ្នាក់ងារព័ត៌មាន Worldmeter) និងអស់ការងារធ្វើ ប្រមាណជា 36.6លាននាក់(ប្រភព Financial Times កាលពីថ្ងៃទី14 ឧសភា)។

នៅពេលត្រូវសំពងមកយ៉ាងធ្ងន់ៗបែបនេះ តើមានដែរឬ ដែល “មហានាគនៃអាស៊ី” នៅធ្វើព្រងើយបាននោះ? ដូច្នេះបាតុភូត China strikes back ក៏ចាប់កំណើតឡើង!!

“អ្នកអាចកុហកមនុស្សគ្រប់គ្នាបាននៅពេលខ្លះ និងអាចកុហកអ្នកខ្លះបាន
នៅគ្រប់ពេល តែអ្នកមិនអាចកុហកមនុស្សគ្រប់គ្នាបានគ្រប់ពេលនោះទេ”

សម្ដីមាស របស់លោកប្រធានាធិបតី “អាប្រាហាម លិនខន់” អ្នករំដោះប្រទេសសហរដ្ឋអាមេរិកចេញពីការ “ជិះជាន់ខាងវណ្ណៈ” ត្រូវបានព្រលែងចេញមកពីមាត់របស់លោក “ចាវ លី ចៀន” អ្នកនាំពាក្យក្រសួងការបរទេសរបស់ចិន។ បន្ទាប់ពីនោះ ក៏បន្តទៀតដោយ “មុខកាំបិត លាបទឹកឃ្មុំ” វះចាក់ដោតបន្ថែម ដោយការហៅអ្វីគ្រប់យ៉ាងដែលរដ្ឋបាលសហរដ្ឋអាមេរិកលាបពណ៌នោះថា ជា “ភាពកុហកបោកប្រាស់ 24ចំណុច”។

តើអ្វីដែលធ្វើឱ្យសម្ព័ន្ធភាពរវាងរដ្ឋាភិបាលទាំង 2ប្រទេស ដើរមកដល់ “ចំណុចទាស់ទែង” រហូតដល់ថ្នាក់បើកសង្គ្រាមជះពាក្យសម្ដីដាក់គ្នា និងពាក្យសម្ដីដែលថានេះ កំពុងតែនាំឆ្ពោះទៅកាន់បញ្ហាទំនាស់រវាងជនជាតិ ដែលអាចនឹងធ្លាក់បន្តពី “1ជំនាន់ ទៅ1ជំនាន់” នៅទីបំផុត…

តើការបើកឆាកសង្គ្រាម “ថ្ងៃប្រកួតពាក្យសម្ដី” នេះ វាកើតឡើងនៅពេលណា?

ក្នុងអំឡុងពេលដំបូងៗ រដ្ឋបាលចិន ត្រូវរងការរិះគន់យ៉ាងធ្ងន់ធ្ងរទាំងខាងក្នុង និងខាងក្រៅ ក្នុងរឿងការចាត់ការកែបញ្ហាការឆ្លងរាលដាលនៃមេរោគកូវីដ-19 ហើយវាចាប់ផ្ដើមធ្ងន់ធ្ងរឡើងៗ នៅពេលដែលសហរដ្ឋអាមេរិកបានចូលមកប្រឡូកជាមួយដែរ តែយ៉ាងណាក៏ដោយ ក្នុងអំឡុងពេលនោះ រដ្ឋបាលប៉េកាំង នៅតែព្យាយាម “ខាំមាត់អត់ធ្មត់” មិនសូវចេញមកបង្ហាញឥរិយាបថឆ្លើយតបការចោទប្រកាន់ទាំងនោះប៉ុន្មានឡើយ។

តែទីបំផុត នៅពេលចូលដល់ខែមីនា ស្ថានការណ៍នៅក្នុងប្រទេសចិន “ចាប់ល្អប្រសើរឡើង” តែ “វីរុស” មហាកំណាចនោះ បែរជាឆ្លងរាលដាល និងរាតត្បាតចេញទៅទូទាំងពិភពលោក ជាពិសេសសហរដ្ឋអាមេរិក និងប្រទេសក្នុងទ្វីបអឺរ៉ុប បានរងផលប៉ះពាល់យ៉ាងធ្ងន់ធ្ងរខ្លាំងក្លាបំផុត។ ពេលនោះហើយ “មហានាគ” ក៏ចាប់ផ្ដើមវែកវាំងននសន្សឹមៗ ចេញមកឆ្លើយតប “មហាឥន្ទ្រី” ប្រភពកំណើតនៃពហុ “ការចោទប្រកាន់” និង “មហាព័ត៌មានចចាមអារ៉ាម” ទាំងឡាយ។

ដោយអ្នកនាំពាក្យក្រសួងការបរទេសរបស់ចិន “ដណ្ដើមវាយលុកមុន” ដោយការព្រលែងសារក្នុងធ្វីតធើរ “បង្កើតទ្រឹស្ដីសមគំនិត” ឡើងមកថ្មីមួយថា វីរុសកូវីដ-19 ការពិតទៅ ប្រហែលជា “អាវុធជីវសាស្ត្រ” ដែលត្រូវបានផលិតឡើងដោយ “កងទ័ពអាមេរិក” ច្រើនជាង ដោយការនាំយក “ឃ្លីប” ពាក្យសម្ដីផ្ដល់ដំណឹង នៅក្នុងសភាកុងហ្ក្រេសរបស់លោក “រ៉ូប៊ើត រេដហ្វ៉ដ” អគ្គនាយកមជ្ឈមណ្ឌលការគ្រប់គ្រងរោគ និងការការពាររបស់សហរដ្ឋអាមេរិក ឬ CDC ដែលបានបញ្ជាក់ថា រកឃើញថា មានអ្នកស្លាប់មួយចំនួននៅក្នុងសហរដ្ឋអាមេរិក បណ្ដាលមកពីការឆ្លងមេរោគវីរុសកូរ៉ូណាប្រភេទថ្មី(ដែលក្រោយមកគឺ កូវីដ-19) មកប្រើប្រកបជាមួយការអះអាង រហូតធ្វើឱ្យសារនៅក្នុងធ្វីតធើរនោះ ត្រូវបានចែកចាយបន្តជាង 300,000ដង។

តែភ្លាមៗនោះ លោកមហាមេដឹកនាំ ដូណាល់ ត្រាំ ក៏ចេញមកឆ្លើយតបវិញដោយការ “អារ-ក បែបទន់ភ្លន់” អំពីទ្រឹស្ដីសមគំនិតនេះ ដោយការហៅ “មេរោគកំណាច” នេះ ស្ទើរតែគ្រប់ពេលក្នុងការធ្វើសម្ភាសថា “Chinese Virus” ភ្លាមៗតែម្ដង!! ដោយមានគោលបំណង ដើម្បីបញ្ជាក់ប្រាប់ពលរដ្ឋអាមេរិកាំង មនុស្សលើពិភពលោកថា ដើមកំណើតរបស់ “វា” គឺនៅក្នុងប្រទេសចិន!!។

សូមរង់ចាំអាននៅថ្ងៃស្អែក
ប្រភព៖ សារព័ត៌មានបរទេស
ប្រែសម្រួលដោយ តាវ៉ែនតា

May 20, 2020

បារាំងបញ្ជាឱ្យបិទសាលារៀនវិញហើយ នៅក្នុងទីក្រុងចំនួន8 ក្រោយរកឃើញកូនសិស្សឆ្លងមេរោគ 70នាក់

កាលពីថ្ងៃទី19 ឧសភាម្សិលមិញ ទីភ្នាក់ងារព័ត៌មាន ដេលីមែល បានរាយការណ៍ថា រដ្ឋបាលក្នុងតំបន់នៃទីក្រុងរូបេហ្ស៍ ក្នុងខេត្តន័រ ភាគខាងជើងរបស់ប្រទេសបារាំង ជាប់នឹងព្រំដែនប្រទេសបែលហ្ស៊ិក បានបញ្ជាឱ្យបិទសាលារៀនវិញចំនួន 8កន្លែងជាបន្ទាន់ ជាសាលារៀនរបស់រដ្ឋ 7កន្លែង និងសាលាឯកជន 1កន្លែងទៀត ដោយសារតែបានរកឃើញកូនសិស្សថ្នាក់មត្តេយ្យ 1នាក់ ជាភ្នាក់ងារចម្លងមេរោគកូវីដ-19 បន្ទាប់ពីពួកគេបានបើកទ្វារបង្រៀនឡើងវិញកាលពីសប្ដាហ៍កន្លងទៅ។

ក្នុងរបាយការណ៍ បានបញ្ជាក់ថា បទបញ្ជាឱ្យបិទសាលារៀនទាំង 8កន្លែងនោះវិញជាបន្ទាន់ គឺជាវិធានការការពារការចម្លងសាយភាយមេរោគ ដោយសារតែនៅមិនទាន់រកឃើញកូនសិស្សដទៃទៀតកើតជំងឺកូវីដ-19 ដោយអាជ្ញាធរនឹងប្រញាប់ប្រញាល់ស៊ើបអង្កេតលើករណីនេះ រួមទាំងស្វែងរកបុគ្គលដែលក្មេងៗបានប៉ះពាល់ និងនៅជិតស្និទ្ធជាមួយ ក្នុងអំឡុងពេលបើកសាលារៀនឡើងវិញកាលពីរយៈពេល 1សប្ដាហ៍កន្លងមក និងរំពឹងថា សាលារៀនអាចនឹងបើកទ្វារឡើងវិញបាន នោថ្ងៃទី25 ឧសភាខាងមុខ។

សម្រាប់សាលារៀន ដែលបានពិនិត្យរកឃើញមានការឆ្លងរាលដាលនៃមេរោគកូវីដ-19 និងត្រូវបញ្ជាឱ្យបិទទ្វារជាបណ្ដោះអាសន្នវិញនោះ ស្ថិតនៅក្នុងទីតាំងខេត្តម៉ាយែន មណ្ឌលប៉េអ៊ី ដឺ ឡា លួរ , ខេត្តហ្វ៊ីនីស្ទែរ មណ្ឌលប្រឺតាញ , ខេត្តកុងតាល់ មណ្ឌលអូវែញ-រ៉ូណាល , ខេត្តអូ-ហ្គារ៉ុង និងខេត្តអេរ៉ូ មណ្ឌលអុកស៊ីតានី , ខេត្តអង់ដ្រេលួរ មណ្ឌលហ្សង់-វ៉ាល់ ដឺ លួរ និងទីក្រុងនីស មណ្ឌលប្រូវ៉ង់ សាល កូតដាហ្សួរ៕

A teacher teaches to schoolchildren in a classroom at a private school during its reopening in Saint-Sebastien-sur-Loire near Nantes during the outbreak of the COVID-19 in France, May 12, 2020. REUTERS

A disinfection squad cleans the school canteen of Saint Exupery primary school as France prepares for the gradual lifting of lockdown restrictions during the outbreak of the COVID-19 in Cannes, France. REUTERS

A shelf with books and games which could not be used by children is protected by tape in a classroom in a private school on the eve ot its reopening in Saint-Sebastien-sur-Loire near Nantes in France, May 11, 2020. REUTERS

A school staff member cleans school supplies in a classroom at a primary school during its reopening in Paris, France. REUTERS

Primary school reopening in Nice as a small part of French children head back to their schools in France. REUTERS

Schoolchildren listen to their teacher at the primary school Simone Veil during its reopening in Nice, France. REUTERS

A teacher, wearing a protective face mask, teaches to schoolchildren in a classroom at a private school in Saint-Sebastien-sur-Loire, France, May 12, 2020. REUTERS

Employees install signs on the floor to help children to respect social distancing at a primary school on the eve of its reopening in Nice as France softens its strict lockdown. REUTERS

ប្រភព៖ សារព័ត៌មានបរទេស

May 20, 2020

ចាំមើលមើល៍…តើលោកត្រាំ នឹងពាក់ម៉ាស់ការពារវីរុសឬអត់ ពេលទៅមើលរោងចក្រផលិតរថយន្ត Ford?

Ford Motor Co កាលពីថ្ងៃអង្គារ(ទី19ឧសភា) បានបញ្ជាក់ពីគោលការណ៍របស់ក្រុមហ៊ុន ដែលបានកំណត់ឱ្យភ្ញៀវគ្រប់រូបដែលមកទស្សនារោងចក្ររបស់ខ្លួន ត្រូវតែពាក់ម៉ាស់អនាម័យការពារការឆ្លងមេរោគកូវីដ-19 ប៉ុន្តែមិនបានបញ្ជាក់ថា ខ្លួននឹងបង្ខំឱ្យលោកប្រធានាធិបតី ដូណាល់ ត្រាំ ប្រតិបត្តិតាមគោលការណ៍ខាងលើ ឬក៏អត់នោះទេ…ខណៈដែលមេដឹកនាំសហរដ្ឋអាមេរិករូបនេះ មានកំណត់ការទៅទស្សនារោងចក្រផលិតរថយន្ត នៅក្នុងរដ្ឋមីឈិហ្គែន មួយនេះ ក្នុងអំឡុងចុងសប្ដាហ៍នេះ។

លោក ដូណាល់ ត្រាំ មានផែនការទៅមើលរោងចក្រមួយកន្លែងរបស់ Ford នៅក្នុងទីក្រុងអ៊ិបស៊ីលែនធី រដ្ឋមិឈិហ្គែន នៅថ្ងៃព្រហស្បតិ៍(ទី21 ឧសភា) ដែលបច្ចុប្បន្នត្រូវបានប្រើប្រាស់ធ្វើជាកន្លែងផលិតម៉ាស៊ីនជួយការដកដង្ហើម តែយ៉ាងណាក៏ដោយ គេនៅមិនទាន់ដឹងច្បាស់នៅឡើយថា តើក្រុមហ៊ុនផលិតរថយន្តដ៏ធំបំផុតលំដាប់ទី2 របស់សហរដ្ឋអាមេរិកមួយនេះ នឹងអនុញ្ញាតឱ្យលោកត្រាំ ល្មើសគោលការណ៍ផ្សេងៗដែលពួកគេបានកំណត់មកជាច្រើនសប្ដាហ៍ហើយនោះ ឬយ៉ាងណាឡើយ?។

អ្នកនាំពាក្យរបស់ក្រុមហ៊ុន Ford បានថ្លែងកាលពីថ្ងៃអង្គារ(ទី19ឧសភា)ម្សិលមិញថា “គោលការណ៍របស់យើង គឺគ្រប់គ្នាត្រូវតែពាក់ឧបករណ៍ការពារ ដើម្បីការពារការឆ្លងរាលដាលរបស់កូវីដ-19។ យើងបានចែករំលែករបៀបវិន័យសុវត្ថិភាពទាំងអស់របស់ Ford ទៅឱ្យសេតវិមានជាមុនរួចអស់ហើយ នៅក្នុងរួមមានទាំងសៀវភៅណែនាំអំពីខ្សែចង្វាក់ផលិតកម្មរបស់យើង ផែនទីបត់ណែនាំបុគ្គលិក និងបែបបទពិនិត្យវាយតម្លៃខ្លួនឯង សម្រាប់ត្រៀមការក្នុងដំណើរទស្សនានេះ”

នៅក្នុងសៀវភៅគោលការណ៍របស់ក្រុមហ៊ុន ពាក់ព័ន្ធនឹងរោគរាតត្បាតដ៏ធំពីវីរុសកូរ៉ូណាប្រភេទថ្មី ដែលបានផ្សព្វផ្សាយកាលពីថ្ងៃទី1 ឧសភា បានបញ្ជាក់ថា បុគ្គលិក និងភ្ញៀវដែលមកទស្សនាគ្រប់រូប ចាំបាច់ត្រូវតែពាក់ម៉ាស់អនាម័យការពារគ្រប់ពេលវេលា ពេលស្ថិតនៅក្នុងរោងចក្រផលិតកម្មរបស់ Ford នៅក្នុងសហរដ្ឋអាមេរិក។

សេតវិមាន បានបដិសេធការផ្ដល់ចម្លើយថា តើលោកត្រាំ នឹងពាក់ម៉ាស់ការពារដែរឬទេ? ខណៈដែលកាលពីពេលមុននេះ លោកត្រាំ ធ្លាប់បានប្រាប់ថា លោកនឹងពាក់ម៉ាស់ការពារ បើសិនជាចាំបាច់ តែកាលពីសប្ដាហ៍កន្លងទៅ លោកត្រាំបានធ្វើដំណើរទៅពិនិត្យមើលមជ្ឈមណ្ឌលចែកចាយម៉ាស់អនាម័យមួយកន្លែងនៅក្នុងរដ្ឋ ផេនស៊ីលវេនៀ ពេលនោះលោកត្រាំមិនបានពាក់ម៉ាស់ការពារមេរោគឡើយ។

សហភាពពលករ ឬ United Auto Workers ឬ UAW និងបណ្ដាអ្នកផលិតរថយន្ត ប៊ិកទ្រី បានពិភាក្សាគ្នាអស់ជាច្រើនសប្ដាហ៍ ពាក់ព័ន្ធនឹងរបៀបវិន័យផ្នែកសុវត្ថិភាពផ្សេងៗដែលត្រូវដាក់បញ្ជាឱ្យអនុវត្ត ដើម្បីបើកផ្លូវសម្រាប់ការវិលត្រឡប់មកដំណើរការគ្រឿងចក្រផលិតរថយន្តឡើងវិញ កាលពីថ្ងៃចន្ទ(ទី18ឧសភា) ក្រោយពីបានបិទប្រតិបត្តិការទាំងស្រុងតាំងពីចុងខែមីនា។

កាលពីខែកន្លងទៅ លោកអនុប្រធានាធិបតី ម៉ៃក៍ ផេនស៍ បានពាក់ម៉ាស់អនាម័យការពារ ក្នុងអំឡុងពេលទស្សនារោងចក្រមួយកន្លែងរបស់ ជេនេរ៉ាល ម៉ូទ័រស៍ ដែលត្រូវបានប្រើប្រាស់ធ្វើជាកន្លែងផលិតម៉ាស៊ីនជួយការដកដង្ហើម ដូចគ្នានឹងលោកស្រី មែរី បារ៉ា CEO របស់ក្រុមហ៊ុន ជីអឹម
ដែរ តែលោកស្រីបានប្រាប់ទៅអ្នកចូលរួមក្នុងអំឡុងកិច្ចប្រជុំតុមូល ក្រោយចប់ការដើរទស្សនារោងចក្រថា អ្នកទាំងអស់គ្នា អាចដោះម៉ាស់ចេញបាន៕

ប្រភព៖ សារព័ត៌មានបរទេស

May 20, 2020

ធ្លាក់ឧទ្ធម្ភាគចក្រយោធានៅរុស្ស៊ី បណ្ដាលឱ្យមនុស្សច្រើននាក់បាត់បង់ជីវិត

ឧទ្ធម្ភាគចក្រ Mi-8 មួយគ្រឿងរបស់ទ័ពអាកាសប្រទេសរុស្ស៊ី បានធ្លាក់នៅឯជាយក្រុងម៉ូស្គូ ក្នុងពេលហ្វិកហាត់កាលពីម្សិលមិញ ធ្វើឱ្យមនុស្សចំនួន3នាក់បានស្លាប់។

“ក្នុងពេលហោះហើរហ្វឹកហាត់នៅក្នុងរយៈចម្ងាយប្រហែល20គីឡូម៉ែត្រពីភូមិ Klin ក្នុងខេត្តម៉ូស្គូ (Moscow Province) ឧទ្ធម្ភាគចក្រ Mi-8 របស់ទ័ពអាកាសរុស្ស៊ី បានជួបបញ្ហានៅពេលចុះចតជាបន្ទាន់នៅលើវាលធំមួយកន្លែង។ ហេតុការណ៍គ្រោះថ្នាក់នេះបានសម្លាប់សមាជិកនៃក្រុមហោះហើរទាំងអស់នៅក្នុងឧទ្ធម្ភាគចក្រ” នេះបើតាមក្រសួងការពារជាតិរុស្ស៊ី។ ក្រសួងនេះបានឱ្យដឹងថា “មូលហេតុនៃការធ្លាក់នេះអាចបណ្ដាលមកពីកំហុសបច្ចេកទេស”។

ក្រសួងការពារជាតិរុស្ស៊ីប្រកាសថា ឧទ្ធមភាគចក្រនេះ ជួបឧបទ្ទវហេតុនៅវេលាម៉ោងប្រហែល20 ក្នុងថ្ងៃទី19ឧសភា (ម៉ោង12យប់ ថ្ងៃទី20ឧសភា នៅកម្ពុជា) និងមិនមានបំពាក់អាវុធតាមខ្លួននោះទេ។ អ្នកនាំពាក្យរបស់ក្រសួងការពារជាតិរុស្ស៊ី បដិសេធការបញ្ជាក់អំពីចំនួនជនរងគ្រោះក្នុងហេតុការណ៍នេះ ប៉ុន្តែសារព័ត៌មានរុស្ស៊ីបានចេញផ្សាយថា អ្នកស្លាប់មានចំនួន3នាក់។ កងកម្លាំងជួយសង្គ្រោះ បានរកឃើញប្រអប់ខ្មៅចំនួន2របស់ឧទ្ធម្ភាគចក្រខាងលើនេះ។

Mi-8 គឺជាឧទ្ធម្ភាគចក្រដែលត្រូវបានផលិតឡើងដោយសហភាពសូវៀត ចាប់ពីទសវត្សរ៍1960 ដោយមានជាង17,000គ្រឿងត្រូវបានលក់ចេញ។ កាលពីឆ្នាំ2018 ឧទ្ធម្ភាគចក្រ Mi-8 មួយគ្រឿងបានធ្លាក់បន្ទាប់ពីហោះឡើងក្នុងតំបន់ Siberia បណ្ដាលឱ្យមនុស្ស18នាក់បានស្លាប់ ក្នុងនោះមានសមាជិកក្រុមហោះហើរចំនួន3នាក់ផងដែរ៕

ប្រភព៖ សារព័ត៌មានបរទេស

May 20, 2020

អ្នកជំងឺCOVID-19 កើនជិតដល់ 5លាននាក់នៅទូទាំងពិភពលោក

ពិភពលោកទាំងមូលត្រូវបានរាយការណ៍ថា មានមនុស្សជាង324,000នាក់បានស្លាប់ ក្នុងចំណោមអ្នកជំងឺCOVID-19 ជិត5លាននាក់ ខណៈប្រទេសដែលមានអ្នកជំងឺកូរ៉ូណាលើសពី100,000នាក់បានកើនដល់11ប្រទេស។

យោងតាមគេហទំព័រ Worldometer ប្រទេសនិងដែនដីចំនួន213ក្នុងពិភពលោកមានអ្នកជំងឺកូរ៉ូណាសរុប4,980,533នាក់ និងអ្នកស្លាប់សរុប324,445នាក់ ក្នុងនោះមានអ្នកជំងឺថ្មី95,495នាក់ និងអ្នកស្លាប់ថ្មី4,666នាក់។ ចំណែកអ្នកជំងឺដែលបានជាសះស្បើយបានកើនដល់1,957,884នាក់។

ទ្វីបអាមេរិកនៅតែជាសម្បុកមេរោគកូរ៉ូណាធំជាងគេក្នុងពិភពលោក ដោយមានអ្នកជំងឺសរុប2,226,468នាក់ ក្នុងនោះអាមេរិកខាងជើងមាន1,738,811នាក់ អាមេរិកខាងត្បូងមាន487,657នាក់ ខណៈទ្វីបអឺរ៉ុបមាន1,815,438នាក់ អាស៊ីមាន841,131នាក់ និងអាហ្វ្រិកមាន93,229នាក់។

ប្រទេសដែលមានអ្នកជំងឺច្រើនជាង100,000នាក់ បានកើនឡើងដល់11ប្រទេស រួមមាន សហរដ្ឋអាមេរិក រុស្ស៊ី អេស្ប៉ាញ ប្រេស៊ីល អង់គ្លេស អ៊ីតាលី បារាំង អាល្លឺម៉ង់ ទួរគី អ៊ីរ៉ង់ និងឥណ្ឌា៕

ប្រភព៖ សារព័ត៌មានបរទេស

May 20, 2020

ជិត1.6លាននាក់ឆ្លង COVID-19 នៅអាមេរិក! លោក Trump ថា នេះជា “មេដាយកិត្តិយស”

អ្នកជំងឺ COVID-19 សរុប នៅសហរដ្ឋអាមេរិក បានឡើងដល់ជិត1.6លាននាក់ ក្នុងនោះមានជាង93,000នាក់បានបាត់បង់ជីវិត ប៉ុន្តែប្រធានាធិបតីអាមេរិកាំង លោក Donald Trump យល់ថា តួលេខខ្ពស់បែបនេះបង្ហាញថា សហរដ្ឋអាមេរិកធ្វើបានល្អជាងប្រទេសដទៃក្នុងការធ្វើតេស្តរកវីរុស។

តួលេខសរុបអំពីអ្នកឆ្លងវីរុសCOVID-19 នៅសហរដ្ឋអាមេរិកបានកើនឡើងដល់1,569,659នាក់ និងអ្នកស្លាប់សរុបមានចំនួន93,473នាក់ ក្រោយពីបានរកឃើញអ្នកជំងឺថ្មី20,829នាក់ និងអ្នកស្លាប់ថ្មី16,000នាក់បន្ថែមទៀតក្នុងរយៈពេល24ម៉ោងចុងក្រោយនេះ។ អ្នកជំងឺដែលបានជាសះស្បើយមានចំនួន 362.984នាក់។ នេះបើតាម Worldometer ដែលជាគេហទំព័រធ្វើបច្ចុប្បន្នភាពតួលេខ COVID-19 ទាន់ហេតុការណ៍បំផុត។

យោងតាម Politco នៅក្នុងសន្និសីទសារព័ត៌មាននៅសេតវិមានកាលពីថ្ងៃទី19កន្លងទៅ ប្រធានាធិបតី Donald Trump ថ្លែងថា មូលហេតុដែលនាំឱ្យសហរដ្ឋអាមេរិកមានអ្នកឆ្លងវីរុសCOVID-19 ច្រើនជាងគេក្នុងពិភពលោក គឺដោយសារសហរដ្ឋអាមេរិកធ្វើតេស្តរកមេរោគបានច្រើនជាងបណ្ដាប្រទេសផ្សេងៗទៀត ហេតុនេះវាអាចត្រូវបានចាត់ទុកថាជា “មេដាយកិត្តិយស”។

“នៅពេលយើងមានអ្នកឆ្លងវីរុសCOVID-19ច្រើន ខ្ញុំមិនចាត់ទុកថាជារឿងអាក្រក់នោះទេ ហើយបើគេពិនិត្យទៅលើជ្រុងណាមួយនោះ នេះគឺជាប្រការល្អមួយ។ ព្រោះថា វាមានន័យថា សមត្ថភាពក្នុងការធ្វើតេស្តរកមេរោគរបស់យើង បានល្អជាងគេ” លោក Trump ថ្លែងប្រាប់អ្នកយកព័ត៌មានបែបនេះ។ ប្រធានាធិបតីសង្កត់ធ្ងន់បន្ថែមថា “ខ្ញុំចាត់ទុកប្រកាសនេះជាមេដាយកិត្តិយសមួយ ពិតណាស់វាគឺជាមេដាយកិត្តិយស”។

យោងតាមលោក Trump គិតមកដល់បច្ចុប្បន្ន សហរដ្ឋអាមេរិកបានធ្វើតេស្តរកមេរោគជូនពលរដ្ឋជិត14លានលើក គឺខុសគ្នាប្រហែល3លានលើកបើធៀបជាមួយនឹងទិន្នន័យនៅលើគេហទំព័រ Covid Tracking Project។ លោក Trump បន្តថា “បើយើងធ្វើតេស្ត1លាននាក់ជំនួសឱ្យ14លាននាក់ នោះចំនួនអ្នកជំងឺដែលយើងរកឃើញនឹងមានចំនួនតិច តើមែនឬអត់?”។

សហរដ្ឋអាមេរិក បច្ចុប្បន្នគឺជាសម្បុកមេរោគCOVID-19 ធំជាងគេបង្អស់ក្នុងពិភពលោក រាប់ទាំងចំនួនអ្នកឆ្លងវីរុស និងអ្នកស្លាប់ដោយសារវីរុស។ អ្នកជំនាញបានព្យាករថា តួលេខអ្នកស្លាប់ដោយសារ COVID-19 នៅប្រទេសនេះនឹងកើនដល់147,000នាក់នៅដើមខែសីហាខាងមុខ៕

ប្រភព៖ សារព័ត៌មានបរទេស

May 20, 2020

អាចម៍ផ្កាយប្រវែង1,500ម៉ែត្រ នឹងហោះមកជិតផែនដីនៅក្នុងសប្ដាហ៍នេះ

ទីភ្នាក់ងារអវកាសអាមេរិកាំង NASA បានប្រកាសឱ្យដឹងថា អាចម៍ផ្កាយដ៏ធំមួយដែលមានឈ្មោះថា 1997 BQ នឹងហោះកាត់ទទឹងក្បែរផែនដីរបស់យើងនាយប់ថ្ងៃទី21ឧសភាខាងមុខ។

ជាមួយនឹងល្បឿន11.2គីឡូម៉ែត្រក្នុង1វិនាទី អាចម៍ផ្កាយ1997 BQ ដែលមានប្រវែងវែងជាងអគារ Empire State (កម្ពស់443ម៉ែត្រ) នៅសហរដ្ឋអាមេរិកដល់ទៅជាង3ដងនេះ នឹងហោះកាត់ក្បែរផែនដីក្នុងរយៈចម្ងាយមិនគួរឱ្យព្រួយបារម្ភនោះទេ។ ប៉ុន្តែ ដោយសារ 1997 BQ មានទំហំធំ វាក៏ត្រូវបាន NASA ចាត់ចូលក្នុងក្រុម “ដែលអាចបង្កគ្រោះថ្នាក់” និងត្រូវបានតាមដានជាប្រចាំ។ 1997 BQ នឹងហោះមកក្បែរផែនដីក្នុងរយៈចម្ងាយ6.1លានគីឡូម៉ែត្រ ដែលឆ្ងាយជាងរយៈចម្ងាយពីផែនដីទៅព្រះចន្ទចំនួន16ដង។ NEO ដែលជាស្ថានីយតាមដានវត្ថុអវកាសដែលហោះក្បែរផែនដីរបស់អង្គការ NASA បានឱ្យដឹងថា អាចម៍ផ្កាយ 1997 BQ នេះ នឹងហោះមកជិតផែនដីបំផុតនៅវេលាម៉ោង3និង45នាទី នៃថ្ងៃទី22ឧសភា(ម៉ោងនៅកម្ពុជា) ខាងមុខ។

បច្ចុប្បន្ន ក្រុមតារាវិទូកំពុងតែតាមដានវត្ថុអវកាសចំនួនជិត2,000 ដែលអាចបង្កគ្រោះថ្នាក់ដល់ផែនដី ក្នុងនោះមានអាចម៍ផ្កាយ ផ្កាយដុះកន្ទុយ និងដុំថ្មអវកាសផ្សេងៗ។ អ្នកវិទ្យាសាស្ត្របានឱ្យដឹងថា រាប់ចាប់តាំងពីអាចម៍ផ្កាយដែលបានធ្វើឱ្យដាយណូស័រដាច់ពូជកាលពី66លានឆ្នាំមុន ផែនដីរបស់យើងមិនទាន់ជួបគ្រោះមហន្តរាយប្រហាក់ប្រហែលគ្នានេះនៅឡើយ។ ក៏ប៉ុន្តែ អាចម៍ផ្កាយតូចៗនៅតែធ្លាក់មកលើផែនដីជាញឹកញាប់។

NASA បានអះអាងថា ចាប់ពីពេលនេះរហូតដល់រាប់រយឆ្នាំទៅមុខទៀត នឹងមិនមានអាចម៍ផ្កាយ ឬផ្កាយដុះកន្ទុយធំណាមួយដែលមានលទ្ធភាពហោះមកបុកផែនដីនោះទេ។ ទីភ្នាក់ងារអវកាសអាមេរិកនៅតែបន្តត្រួតពិនិត្យឡើងវិញនូវគន្លងគោចររបស់បណ្ដាវត្ថុអវកាសធំៗដែលត្រូវបានអង្គការនេះព្យាករទុកជាមុននាពេលកន្លងមក៕

ប្រភព៖សារព័ត៌មានបរទេស

May 19, 2020

Category: អន្តរជាតិ