Category: អន្តរជាតិ

វិបត្តិហុងកុង និងភាពច្របូកច្របល់ របស់ការរៀបចំរបៀបរបបពិភពលោកជាថ្មី
គ្រាន់តែចិនអនុម័តច្បាប់សន្តិសុខសម្រាប់ក្រុងហុងកុងច្បាប់ថ្មីភ្លាម សហរាជអាណាចក្រ(United Kingdom) ក៏ប្រកាសបើកទ្វារស្វាគមន៍ពលរដ្ឋហុងកុងចំនួន 3លាននាក់ឱ្យចូលមកធ្វើការ និងពំនាក់អាស្រ័យ។
នយោបាយនេះ បានធ្វើឱ្យមានសំឡេងឆ្លើយតបពីមហាអំណាចនៃទ្វីបអាស៊ីមួយនេះ(ចិន) ដោយបានប្រកាសថា នឹងឆ្លើយតបវិញយ៉ាងខ្លាំងក្លាចំពោះទង្វើដែលខ្លួនយល់ថា ជាការជ្រៀតជ្រែកផ្ទៃក្នុងរបស់ប្រទេសខ្លួន។
សកម្មភាពថ្មីៗចុងក្រោយបំផុតនេះ បានធ្វើឱ្យវិបត្តិក្នុងទីក្រុងហុងកុង ក្លាយជាបទសាកល្បងកិច្ចការងារការទូតរបស់ពិភពលោកដ៏សំខាន់មួយ ក្នុងយុគសម័យដែលប្រទេសនានាកំពុងផ្ដោតចំណាប់អារម្មណ៍លើការប្រយុទ្ធប្រឆាំងនឹងវិបត្តិរោគរាតត្បាត។
សួរថា តើបញ្ហាក្នុងក្រុងហុងកុង បានប្រាប់អ្វីដល់យើងខ្លះ ពាក់ព័ន្ធនឹងការដែលចិនកំពុងតែងើបឈរឡើងក្នុងលំដាប់ថ្នាក់នៃបណ្ដាប្រទេសមហាអំណាចរបស់ពិភពលោក និងតើ វានឹងហុចផលយ៉ាងណា ចំពោះការដំណើរការនយោបាយផ្នែកការបរទេសរបស់សហរាជអាណាចក្រ ក្នុងយុគសម័យ Brexit?។
“អ្នកមានចំណែកខាត-ចំណេញ ដែលលេងតាមច្បាប់កតិកា”
អង់គ្លេស បានប្រគល់កោះហុងកុងទៅឱ្យចិនវិញនៅឆ្នាំ1997 ក្រោមកិច្ចព្រមព្រៀងពិសេសមួយថា រដ្ឋាភិបាលចិន នឹងគ្រប់គ្រងក្រុងហុងកុងបែប “ប្រទេស1 ប្រព័ន្ធ2”
អំឡុងជាង 2ទសវត្សរ៍កន្លងមកនេះ ក្រុមមេដឹកនាំប្រទេសលោកខាងលិចភាគច្រើនសង្ឃឹមថា ការងើបឈរឡើងឆ្ពោះទៅរកអំណាចរបស់ចិន នឹងដំណើរការទៅមុខតាមបែបដែលពួកគេនឹកសង្ឃឹម គឺចិននឹងធ្វើជា “អ្នកដែលមានចំណែកខាត-ចំណេញដែលលេងតាមច្បាប់កតិកា” ក្នុងសហគមន៍ពិភពលោក ឬនិយាយមួយបែបទៀតថា ចិនសន្យាថា នឹងប្រតិបត្តិតាមកិច្ចព្រមព្រៀង និងស្តង់ដាអន្តរជាតិ ដែលបើសិនជាចិន នៅតែប្រកាន់ខ្ជាប់គោលការណ៍ដែលថានេះ កិច្ចព្រមព្រៀងរឿងអនាគតរបស់ហុងកុង ដែលអង់គ្លេសបានធ្វើជាមួយចិនក្នុងការប្រគល់កោះមួយនេះ ក៏នឹងនៅតែដំណើរការតទៅទៀត។
ប៉ុន្តែការពិត វាបែរជាមិនបានចេញមកក្នុងរូបភាពបែបនោះឡើយ ចិនពង្រីកអំណាចក្នុងវេទិកាពិភពលោកយ៉ាងឆាប់រហ័ស និងមានភាពព្យាយាមយ៉ាងខ្លាំង រហូតក្លាយជាមហាអំណាចផ្នែកយោធាក្នុងអាស៊ី ដែលទោះជា “បងធំ” ដូចជាសហរដ្ឋអាមេរិក ក៏អាចពិបាកនឹងតតាំងបានដែរ។
ការស្ទុះងើបឡើងឆ្ពោះទៅរកអំណាចរបស់ចិននេះ ថែមទាំងកើតឡើងក្នុងអំឡុងពេលដែលប្រទេសលោកខាងលិច ជាពិសេសសហរដ្ឋអាមេរិក កំពុងបែរចំណាប់អារម្មណ៍ទៅរកចំណុចផ្សេងៗទៀត ដូចជា សង្គ្រាមបង្ក្រាបភេរវកម្ម និងវិបត្តិការណ៍នៅក្នុងប្រទេសស៊ីរី ខណៈដែលបណ្ដាប្រទេសនៅអឺរ៉ុបនាំគ្នាផ្ចង់ចំណាប់អារម្មណ៍ទៅលើរឿង Brexit។
ភាពធ្លាក់ចុះរបស់រដ្ឋបាលសហរដ្ឋអាមេរិក
ក្រៅពីនេះ រដ្ឋាភិបាលសហរដ្ឋអាមេរិក ក្រោមការដឹកនាំរបស់លោកប្រធានាធិបតី ដូណាល់ ត្រាំ ថែមទាំងស្ទើរតែមិនបានដំណើរការនយោបាយពាក់ព័ន្ធនឹងចិន ឱ្យបានជាប់លាប់ទៀតផង និងមើលទៅដូចជាថា រដ្ឋាភិបាលឈុតនេះ គ្មានផែនការយុទ្ធសាស្ត្រផ្នែកការបរទេសសោះឡើយ។
ការងើបលេចធ្លោឡើងរបស់ចិនក្នុងអំឡុងពេល 5ឆ្នាំកន្លងទៅនេះ ថែមទាំងបានកើតឡើងក្នុងអំឡុងពេលដែលឋានៈរបស់រដ្ឋបាលសហរដ្ឋអាមេរិកក្នុងវេទិកាពិភពលោក កំពុងធ្លាក់ចុះយ៉ាងខ្លាំង រហូតធ្វើឱ្យយន្តការការរួមសហការរបស់សហរដ្ឋអាមេរិកនៅក្នុងអាស៊ី អឺរ៉ុប និងមជ្ឈិមបូព៌ា ធ្លាក់ចូលក្នុងវិបត្តិទៀតផង។
ក្នុងខណៈពេលដែលពិភពលោកកំពុងប្រឈមនឹងវិបត្តិកូវីដ-19 ដែលមានដើមកំណើតមកពីប្រទេសចិន និងធ្វើឱ្យរដ្ឋបាលត្រូវប្រឈមនឹងបញ្ហាដ៏ធំ នាអំឡុងពេលដំបូងៗក្ដី តែក៏គេនៅតែមើលឃើញយ៉ាងច្បាស់ដែរថា ចិនបានក្រឡះឱ្យស្ថានការណ៍វិបត្តិក្នុងគ្រានោះ ក្លាយជាឱកាសដែលកើតជាប្រយោជន៍ដល់ខ្លួនបានដែរ។
នេះមិនមែនជារឿងចៃដន្យនោះទេ ដែលចិនឆក់ឱកាសពីស្ថានការណ៍វិបត្តិនេះ ក្នុងការដំណើរការនយោបាយដែលមានភាពជាតិនិយមខ្លាំងឡើង តាំងពីរឿងការប្រឈមមុខតានតឹងដាក់គ្នាជាមួយសហរដ្ឋអាមេរិក និងអូស្ត្រាលី រួមទាំងទំនាស់រឿងព្រំដែនដែលមានចំណុចវិវាទជាមួយប្រទេសឥណ្ឌា និងចុងក្រោយបំផុត ការសម្រេចចិត្តក្នុងការទាត់ចោលកិច្ចព្រមព្រៀងមូលដ្ឋាន ដែលចិនធ្លាប់បានធ្វើជាមួយអង់គ្លេសក្នុងរឿងកោះហុងកុងទៀតផង។
ភាពម៉ឺងម៉ាត់ច្បាស់លាស់របស់ចិនរឿងកោះហុងកុង
លោកនាយករដ្ឋមន្ត្រីនៃប្រទេសអង់គ្លេស ត្រៀមស្នើឱ្យពលរដ្ឋហុងកុងច្រើនដល់ទៅ 3លាននាក់ សុំផ្លាស់ទីលំនៅមករស់នៅក្នុងសហរាជអាណាចក្រ និងតទៅមុខទៀត ក៏នឹងអាចដាក់ពាក្យសុំប្ដូរសញ្ជាតិបានទៀតផង
វិបត្តិកូវីដ-19 ថែមទាំងបានធ្វើឱ្យចិនមានឱកាសចូលទៅចាត់ការវិបត្តិនយោបាយក្នុងក្រុងហុងកុងទៀតផង។
មិនថារោគរាតត្បាតនេះ នឹងដំណើរការតទៅយូរប៉ុនណាទៀតក៏ដោយ តែលទ្ធផលមួយដែលគេមើលឃើញយ៉ាងច្បាស់នោះគឺ ការដែលចិននឹងមិនផ្លាស់ប្ដូរនយោបាយដ៏ច្បាស់លាស់ម៉ឺងម៉ាត់ ពាក់ព័ន្ធនឹងក្រុងហុងកុងជាដាច់ខាត លើកលែងតែកើតមានកម្លាំងគាបសង្កត់ដែលពិតប្រាកដ និងខ្លាំងក្លា រហូតហួសនឹងតតាំងបានប៉ុណ្ណោះ។
នេះហើយ ទើបធ្វើឱ្យរដ្ឋបាលអង់គ្លេស ដែលដឹកនាំដោយលោកនាយករដ្ឋមន្ត្រី បូរីស ចនសុន ត្រូវធ្លាក់ក្នុងស្ថានភាពលេបមិនចូល ខ្ជាក់មិនចេញ។
ក្នុងខណៈដែលកំពុងសម្រុកកម្លាំងទៅលើការចាត់ការជំងឺរាតត្បាតនោះ រដ្ឋបាលរបស់លោកចនសុន ក៏កំពុងត្រូវរងការរិះគន់យ៉ាងធ្ងន់ធ្ងរ អំពីរឿងចំណាត់ការលើកោះហុងកុង ហើយរឿងនេះ អាចនិយាយបានថា ជាបទសាកល្បងដ៏ធំបំផុតលើកដំបូងរបស់ Global Britain គោលនយោបាយថ្មី ផ្នែកការបរទេសរបស់ប្រទេសអង់គ្លេស។
ពាក្យសម្ដី និងទង្វើ
អង់គ្លេស កំពុងប្រឈមនឹងភាពសាកល្បងថ្មីក្នុងពិភពយុគសម័យក្រោយកូវីដ-19 និងក្រោយ Brexit
ទោះជាហាក់ដូចជាលឿនពេក ក្នុងការឱ្យពិន្ទុរឿងភាពជោគជ័យរបស់នយោបាយខាងលើនោះក្ដី តែទំនាស់ជាមួយចិនក្នុងរឿងហុងកុង បានបង្ហាញឱ្យឃើញពីភាពរឹងមាំ និងភាពទន់ខ្សោយលើគោលជំហរផ្នែកការទូតក្នុងពេលបច្ចុប្បន្នរបស់សហរាជអាណាចក្រ។
ហុងកុង ជាផ្នែកមួយរបស់ចិន ក្នុងខណៈអង់គ្លេស ដែលជាអតីតម្ចាស់អាណានិគម បែរជាគ្មានឥទ្ធិពលអ្វីក្នុងការបញ្ចុះបញ្ចូលចិត្តរដ្ឋបាលចិនបានច្រើនឡើយ។
តើរដ្ឋាភិបាលរបស់លោក ចនសុន នឹងអាចធ្វើអ្វីបានខ្លះទៅ? បណ្ដាអ្នកជំនាញវិភាគស្ថានការណ៍ ប្រហែលជានឹងលើកអំពើល្អ ទៅឱ្យលោកចនសុន ដែលបានស្នើឱ្យបើកប្រទេស ផ្ដល់ទីពំនាក់អាស្រ័យដល់ពលរដ្ឋហុងកុង 3លាននាក់នោះឯង។
នេះជាតួលេខដែលច្រើន និងអាចនិយាយបានថា ច្រើនជាពិសេសទៀតផង សម្រាប់គណបក្ស ខន់ស៊ើវេធីហ្វ ដែលមានផ្នត់គំនិតអភិរក្សនិយម និងមានចំណុចសង្ស័យពាក់ព័ន្ធនឹងជនភៀសខ្លួនស្រាប់ហើយ។
ទោះជាឥរិយាបថរបស់លោកចនសុនទៅជាយ៉ាងណាក៏ដោយ តែរឿងការទូត វាប្រកបទៅដោយបច្ច័យជាច្រើន និងការធ្វើឱ្យជោគជ័យរឿងនយោបាយការបរទេស គឺជារឿងដែលកើតចេញពីការធ្វើការងារជាក្រុម។
ចំណែកសហរដ្ឋអាមេរិក នឹងឆ្លើយតបរឿងដែលកើតឡើងនេះ ដោយការកាត់សិទ្ធិពិសេសខាងពាណិជ្ជកម្មមួយចំនួនចំពោះកោះហុងកុង តែពេលនេះ ជាឆ្នាំដែលលោកត្រាំ កំពុងប្រកួតប្រជែងក្នុងការបោះឆ្នោតជ្រើសតាំងប្រធានាធិបតីអាណត្តិទី2 ហើយការដែលលោកសម្ដែងឥរិយាបថ រឹងត្អឹងចំពោះរដ្ឋបាលចិន ក៏ជាផ្នែកមួយនៃការដែលនឹងធ្វើឱ្យរូបលោក បានគ្រងតំណែងបន្តទៀតដែរ។
ក្រៅពីនេះ បញ្ហាជំងឺរាតត្បាត ថែមទាំងធ្វើឱ្យមើលឃើញទិដ្ឋភាពដែលកាន់តែច្បាស់ឡើងរបស់នយោបាយ “អាមេរិក មុនគេ!” ឬAmerica First បន្ទាប់ពីលោកប្រធានាធិបតីត្រាំ បញ្ជាឱ្យប្រមូលទិញថ្នាំ រេមដេស៊ីវៀរ(ថ្នាំព្យាបាលអ្នកជំងឺកូវីដ-19) ពីអ្នកផលិតនៅក្នុងប្រទេសអាមេរិក រហូតសឹងតែអាចនិយាយបានថា “ប្រមូលទិញឱ្យអស់ពីពិភពលោក” ទៀតផង។
ក្នុងខណៈដែលសហភាពអឺរ៉ុបបានរួមគ្នាចរចារឿងការទិញថ្នាំមួយនេះមកឱ្យប្រទេសសមាជិករបស់ខ្លួន តែក៏នៅមិនទាន់ប្រាកដច្បាស់ថា សហរាជអាណាចក្រ នឹងស្ថិតក្នុងគោលជំហរណានៅឡើយដែរក្នុងរឿងនេះ ដែលរឿងនេះ បានបញ្ជាក់កាន់តែច្បាស់ឱ្យឃើញពីគោលជំហរដែលឯកោរបស់សហរាជអាណាចក្រក្នុងពេលបច្ចុប្បន្ន។
ក្នុងអំឡុងទសវត្សរ៍កន្លងទៅ រថក្រោះ និងអាវុធនុយក្លេអ៊ែរ គឺជាឧបករណ៍បង្ហាញពីភាពជាមហាអំណាចនៅក្នុងវេទិកាពិភពលោក តែវាជាការវាយតម្លៃបែបរាក់ៗប៉ុណ្ណោះ…ហេតុផលពិតប្រាកដដែលសហរដ្ឋអាមេរិក នៅតែជាអ្នកដឹកនាំពិភពលោកក្នុងអំឡុងពេលក្រោយសង្គ្រាមលោកលើកទី2 និងសង្គ្រាមត្រជាក់នោះ គឺដោយសារតែមានសេដ្ឋកិច្ច និងឫសគល់ផ្នែកការស្រាវជ្រាវដែលរឹងប៉ឹង។
តែ បច្ចុប្បន្ន ចិនក៏មានគុណសម្បត្តិទាំងនោះដូចគ្នា ហើយនេះក៏ជាដំណើរផ្លូវដែលនាវា Global Britain របស់អង់គ្លេស នឹងត្រូវឆ្ពោះទៅរកដូចគ្នា។
ទោះជាបច្ចុប្បន្ន អង់គ្លេសនឹងនៅតែជាប្រទេសអ្នកមាន និងស្ថិតនៅក្នុងក្រុមប្រទេសអ្នកដឹកនាំក្នុងពិភពកិច្ចការនយោបាយអន្តរជាតិមែន តែក៏ត្រូវតែរិះរកវិធីសាស្ត្រថ្មីក្នុងការដំណើរការនយោបាយផ្នែកនេះក្នុងយុគសម័យក្រោយកូវីដ-19 និងក្រោយ Brexit ដែរ។
ការធ្លាប់ធ្វើជាម្ចាស់អាណានិគមលើហុងកុង ធ្វើឱ្យអង់គ្លេសមានតួនាទីសំខាន់ក្នុងការដោះស្រាយវិបត្តិនេះ ហើយពេលនេះ ក៏រឹតតែចាំបាច់បំផុត ក្នុងការធ្វើជាអ្នកនាំមុខគេក្នុងការសាងមតិឯកច្ឆន្ទអន្តរជាតិថ្មីមួយ ដែលនឹងប្រើវាសម្រាប់ចាប់ដៃជាមួយចិន ដើម្បីឱ្យអាចតតាំងបានជាមួយឥទ្ធិពល និងសម្ពាធអំពីចិន ដំណាលគ្នានឹងការរិះរកវិធីរួមសហការយ៉ាងរីកចម្រើនជាមួយបណ្ដាអ្នកដឹកនាំចិនក្នុងប្រធានបទលំដាប់ពិភពលោកដែលសំខាន់ៗបន្តទៅទៀត៕
ប្រភព៖ សារព័ត៌មានបរទេស
ប្រែសម្រួលដោយ តាវ៉ែនតា
July 6, 2020
ស្រាយចម្ងល់៖ តើ “មូស-រុយ” អាចចម្លងវីរុស កូវីដ-19 បានឬទេ?
ក្នុងពេលដែលជំងឺឆ្លងមេរោគវីរុសកូរ៉ូណាប្រភេទថ្មី ឬកូវីដ-19 នៅតែវាយប្រហារយ៉ាងឥតឈប់ឈរទូទាំងពិភពលោក ព្រមជាមួយការមកដល់នៃរដូវក្ដៅនៅឯតំបន់ប៉ូលផែនដីប៉ែកខាងជើង បានធ្វើឱ្យកើតមានចរន្តវិតក្កកង្វល់ដ៏ធំមួយឡើងថា “មូស និងរុយ” អាចជាភ្នាក់ងារចម្លងមេរោគវីរុសកូរ៉ូណាចូលមកមនុស្សបាន…។
លោក វ៉ាង លីភឹង អ្នកស្រាវជ្រាវនៅមជ្ឈមណ្ឌលគ្រប់គ្រង និងការពាររោគក្រុងប៉េកាំង បានថ្លែងកាលពីថ្ងៃទី30 មិថុនាថា ក្ដីភ័យខ្លាចទាំងនោះ មិនមែនកើតឡើងដោយគ្មានហេតុផលនោះទេ ដោយសារតែមូស និងរុយ អាចជាភ្នាក់ងារចម្លងមេរោគឆ្លងមួយចំនួន ដូចជាគ្រុនចាញ់ និងគ្រុនឈាម ជាដើម។
តែយ៉ាងណាក៏ដោយ លោកវ៉ាង បានចង្អុលបង្ហាញថា មូស និងរុយ មិនមានគ្រឹះខាងជីវវិទ្យារបស់ការចម្លងមេរោគវីរុសកូរ៉ូណាឡើយ ដោយសារទូទាំងពិភពលោកមិនបានរកឃើញភ័ស្តុតាងថា ពួកវា ជាដើមកំណើតនៃការឆ្លងមេរោគកូវីដ-19នោះទេ តែ សូមណែនាំប្រជាជន ឱ្យការពារខ្លួនពីការត្រូវមូសខាំ និងរក្សាទុកដាក់ចំណីអាហារឱ្យផុតពីសត្វរុយនៅក្នុងរដូវក្ដៅ។
រូបភាពអ៊ីនហ្វូក្រាហ្វ៊ិក របស់អង្គការសុខភាពពិភពលោក បានបញ្ជាក់ថា មេរោគកូវីដ-19 មិនអាចចម្លងសាយភាយតាមរយៈការខាំរបស់សត្វមូសបានទេ
ក្រៅពីនោះ អង្គការសុខភាពពិភពលោក(WHO) បានជូនដំណឹងថា វីរុសកូរ៉ូណាប្រភេទថ្មី មិនអាចចម្លងសាយភាយតាមរយៈការខាំរបស់សត្វមូសបានទេ ដោយបច្ចុប្បន្នមិនមានទិន្នន័យ ឬភ័ស្តុតាងបង្ហាញថា វីរុសកូរ៉ូណាប្រភេទថ្មីសាយភាយតាមរយៈសត្វមូសទេ។
អង្គការនេះ បានបញ្ជាក់ទៀតថា វីរុសកូរ៉ូណាប្រភេទថ្មី ជាវីរុសប្រព័ន្ធដង្ហើម ដែលចម្លងសាយភាយតាមរយៈ “លម្អងទឹកល្អិតៗដែលកើតចេញពីអ្នកឆ្លងមេរោគពេលកណ្ដាស់ ឬក្អក ឬល្អងទឹកសំបោរ” ជាចម្បង។
លោក អាចេ ម៉ុនហ្គោមេរី នាយកផ្នែកគ្រប់គ្រងការកម្ចាត់សត្វមូសនៅក្នុងទីក្រុង ហ៊ីលបូរ៉ូ រដ្ឋហ្វ្លរីដា បានប្រាប់ទៅសារព័ត៌មានប្រចាំតំបន់ថា “រាប់មកដល់ថ្ងៃនេះ មិនមានភ័ស្តុតាងខាងវិទ្យាសាស្ត្រណាមួយបញ្ជាក់ថា សត្វមូសអាចចម្លងសាយភាយមេរោគកូវីដ-19 ពីសត្វមូស ទៅសត្វមូសផ្សេងទៀតបានឡើយ”
មន្ត្រីសុខាភិបាលសាធារណៈកំពុងបាញ់ថ្នាំកម្ចាត់សត្វល្អិត នៅក្នុងផ្សារមួយ របស់ទីក្រុងកាំប៉ាឡា ទីក្រុងធំរបស់ប្រទេសអ៊ូហ្គាន់ដា កាលពីថ្ងៃទី17 មេសា ឆ្នាំ2020
លោកម៉ុនហ្គោមេរី បានថ្លែងប្រាប់ស្ថានីយទូរទស្សន៍ WTSP ថា សត្វមូស “គឺជាភ្នាក់ងារនាំអតិសុខុមប្រាណបង្កជំងឺយ៉ាងច្រើន តែតាមរយៈអ្វីដែលយើងដឹងក្នុងថ្ងៃនេះគឺ កូវីដ-19 មិនមែនជាអតិសុខុមប្រាណដែលមូសនឹងធ្វើជាភ្នាក់ងារចម្លងសាយភាយមកមនុស្សបានទេ”
WHO បានណែនាំថា គួរលាងសម្អាតដៃដោយជេលអាល់កុល ឬលាងដៃដោយសាប៊ូ និងទឹកជាប្រចាំ រហូតដល់ចៀសវាងការទំនាក់ទំនងជិតស្និទ្ធជាមួយបុគ្គលដែលកំពុងក្អក ឬកណ្ដាស់ ដើម្បីការពារខ្លួនឯងពីរោគរាតត្បាត៕
ប្រភព៖ សារព័ត៌មានបរទេស
July 6, 2020
ជាង11.5លាននាក់ឆ្លងCOVID-19 នៅទូទាំងពិភពលោក! WHO ព្រមានអំពីការកើនឡើងយ៉ាងឆាប់រហ័សនៃវីរុសនេះ
ពិភពលោកបានរកឃើញអ្នកផ្ទុកវីរុសCOVID-19 ជាង11.5លាននាក់ ក្នុងនោះមានជាង536,000នាក់បានបាត់បង់ជីវិត។
ប្រទេសនិងដែនដីចំនួន 221ក្នុងពិភពលោកបានរាយការណ៍ថា មានមនុស្សចំនួន 11,537,453នាក់បានឆ្លងវីរុសCOVID-19 និង 536,324នាក់បានស្លាប់ដោយសារវីរុសនេះ។ អ្នកជំងឺថ្មីនិងអ្នកស្លាប់ថ្មីត្រូវបានរកឃើញក្នុងរយៈពេល24ម៉ោងចុងក្រោយនេះមានចំនួន172,228នាក់ និង3,631នាក់ ខណៈដែល6,526,361នាក់បានជាសះស្បើយ។
នៅទ្វីបអាមេរិក អ្នកជំងឺបានកើនដល់ 4,726,407នាក់ ខណៈនៅអឺរ៉ុបមាន2,354,391នាក់ អាស៊ីមាន2,025,200នាក់ និងអាហ្វ្រិកមាន330,003នាក់។
សហរដ្ឋអាមេរិក និងប្រេស៊ីលមានអ្នកជំងឺច្រើនជាងគេក្នុងពិភពលោក ក្នុងនោះសហរដ្ឋអាមេរិកមានអ្នកជំងឺសរុប 2,447,441នាក់ អ្នកស្លាប់សរុប123,934នាក់ ចំណែកប្រេស៊ីលមានអ្នកជំងឺសរុប1,157,451នាក់ និងអ្នកស្លាប់សរុបមាន52,951នាក់។
នៅអាស៊ីអាគ្នេយ៍ ឥណ្ឌូនេស៊ីគឺជាសម្បុកមេរោគធំជាងគេបង្អស់ ដោយមានអ្នកជំងឺសរុប63,749នាក់ និងអ្នកស្លាប់សរុប3,171នាក់។ ចំណែកកម្ពុជា វៀតណាម ឡាវ និងទីម័រខាងកើតគឺជាបណ្ដាប្រទេសក្នុងតំបន់ដែលមិនទាន់មានករណីស្លាប់ដោយសារCOVID-19នៅឡើយ។
អង្គការសុខភាពពិភពលោក (WHO) បានព្រមានថា មហារោគរាតត្បាតកំពុងតែមានការឆ្លងរាលដាលកាន់តែខ្លាំងជាងមុន ដោយចំនួនជាងពាក់កណ្ដាលនៃអ្នកជំងឺសរុបនៅទូទាំងពិភពលោក ត្រូវបានរកឃើញក្នុងរយៈពេលត្រឹមតែ6ខែចុងក្រោយនេះប៉ុណ្ណោះ៕
ប្រភព៖ សារព័ត៌មានបរទេស
July 6, 2020
អីយ៉ា!! ចិនតែងតាំងជើងខ្លាំងខាងបង្ក្រាបបាតុកម្ម ជាអគ្គនាយកស្ថាប័នគ្រប់គ្រងសន្តិសុខថ្មីនៅហុងកុង
ក្រុងប៉េកាំង បានតែងតាំងមន្ត្រីម្នាក់ ដែលមានឈ្មោះល្បីល្បាញក្នុងអំឡុងពេលបង្ក្រាបហេតុការណ៍បាតុកម្មតវ៉ានៅក្នុងតំបន់មួយរបស់ចិន ឱ្យធ្វើជាអគ្គនាយកស្ថាប័នសន្តិសុខជាតិថ្មី ដែលទើបរៀបចំឡើងថ្មីនៅក្នុងទីក្រុងហុងកុង។ នេះបើតាមរបាយការណ៍របស់ទីភ្នាក់ងារព័ត៌មានស៊ីនហួ កាលពីថ្ងៃទី3 កក្កដា ម្សិលមិញ។
លោក ជឹង យ៉ាងស៊ាង អាយុ 56ឆ្នាំ ដែលកាលពីពេលថ្មីៗនេះ គ្រងតំណែងជាអគ្គលេខាធិការ នៃគណៈកម្មការបក្សកុម្មុយនីស្ត ប្រចាំ ក្វាងទុង មណ្ឌលដែលមានឥទ្ធិពលខាងសេដ្ឋកិច្ច ដែលមានព្រំដែនជាប់គ្នានឹងហុងកុង ដោយលោក គឺជាមន្ត្រីម្នាក់ ក្នុងចំណោមមន្ត្រីជាច្រើនដែលបានទទួលការតែងតាំងពីក្រុងប៉េកាំងក្នុងអំឡុងប៉ុន្មានខែកន្លងមកនេះ ខណៈដែលចិន បាននិងកំពុងរឹតបន្តឹងការគ្រប់គ្រងលើអតីតដែនកោះអាណានិគមរបស់អង់គ្លេសមួយនេះ។
ស្ថាប័នសន្តិសុខថ្មី ត្រូវបានរៀបចំឡើងក្រោមច្បាប់សន្តិសុខជាតិថ្មី ដែលចិនចាប់ផ្ដើមដាក់ឱ្យប្រើប្រាស់ទៅលើកោះហុងកុង កាលពីអំឡុងដើមសប្ដាហ៍នេះ ដែលមានកំណត់ការដាក់ទោសទណ្ឌលើ ឧក្រិដ្ឋជនបំបែកទឹកដី ការប៉ុនប៉ងផ្ដួលរំលំការគ្រប់គ្រង បង្កភេរវកម្ម និងឃុបឃិតជាមួយកងកម្លាំងបរទេស ដែលមានកម្រិតខ្ពស់បំផុត គឺជាប់គុកអស់មួយជីវិត។
លោក ជឹង យ៉ាងស៊ាង កាលពីនៅគ្រងតំណែងជាលេខាធិការបក្សកុម្មុយនីស្ត ប្រចាំក្រុងសានវើយ កំពុងផ្ដល់សម្ភាសជាមួយអ្នកយកព័ត៌មាន ពាក់ព័ន្ធនឹងហេតុការណ៍បាតុកម្មនៅតំបន់អ៊ូខាន កាលឆ្នាំ2011។
ក្រោមច្បាប់សន្តិសុខជាតិថ្មីនេះ ស្ថាប័នសន្តិសុខប្រចាំក្រុងហុងកុង អាចដំណើរការចេញបទបញ្ជាប្រើច្បាប់ បានលើសពីច្បាប់សន្តិសុខក្នុងតំបន់ដែលមានស្រាប់នាពេលបច្ចុប្បន្ន ក្នុងរឿងក្ដីធ្ងន់ធ្ងរផ្សេងៗបាន។
ច្បាប់នេះ អនុញ្ញាតឱ្យមន្ត្រី របស់អង្គភាពសន្តិសុខ អាចនាំជនសង្ស័យឆ្លងព្រំដែន ចូលទៅជម្រះក្ដីដោយតុលាការដែលគ្រប់គ្រងដោយបក្សកុម្មយនីស្ត និងកំណត់ឯកសិទ្ធិឃុំគ្រងពិសេសដល់មន្ត្រីរបស់អង្គភាពមួយនេះ ដែលក្នុងនោះរួមទាំង ហាមអាជ្ញាធរក្នុងតំបន់ ត្រួតពិនិត្យឆែកឆេរយានជំនិះរបស់ពួកគេទៀតផង។
កាលពីគ្រាដែលលោក ជឹង នៅគ្រងតំណែងលេខាធិការបក្សកុម្មុយនីស្តប្រចាំក្រុងសានវើយ មន្ត្រីរបស់លោកបានបង្ក្រាបបាតុកម្មតវ៉ាមួយនៅក្នុងទីប្រជុំជនអ៊ូខាន កាលឆ្នាំ2011 ក្រោមអំណាចតុលាការ។ ប្រជាជនជាច្រើនពាន់នាក់ ត្រូវការប្រាក់សំណង ពីករណីដែលពួកគេត្រូវរដ្ឋបាលរឹបអូសយកដី និងបានបង្កើតគណៈកម្មការមួយឡើង ដើម្បីធ្វើជាតំណាងទាមទារសិទ្ធិរបស់ពួកគេ ដោយក្នុងអំឡុងពេលនៃការតវ៉ាទាមទារនោះ ពួកគេបានរៀបរាប់ប្រាប់ពីភាពលំបាក និងការមិនសប្បាយចិត្ត ទៅអ្នកយកព័ត៌មានបរទេសទៀតផង។
ឃ្លីបវីដេអូ នៃការប្រជុំផ្ទៃក្នុងរបស់រដ្ឋបាលដែលបែកធ្លាយចេញមក ដោយបានបង្ហាញឱ្យឃើញពីរូបភាពលោក ជឹង ដែលនិយាយឡូឡា រិះគន់ពួកអ្នកស្រុកខ្លាំងៗយ៉ាងក្រេវក្រោធ និងប្រើពាក្យសម្ដីអាក្រក់ៗ រិះគន់អ្នកសារព័ត៌មានបរទេសទៀតផង។
ទីក្រុងហុងកុង ដែលត្រូវញ័ររញ្ជួយ ដោយសារហេតុការណ៍ប្រឆាំងតវ៉ារដ្ឋាភិបាល ដែលអូសបន្លាយពេលជាច្រើនខែ និងជាញឹកញាប់បានធ្លាក់ចូលទៅក្នុងអំពើហិង្សាកាលពីឆ្នាំទៅនោះ បានជំរុញឱ្យក្រុងប៉េកាំងចេញច្បាប់សន្តិសុខជាតិថ្មី ដែលពួកសកម្មជនប្រជាធិបតេយ្យនៅក្នុងក្រុងហុងកុង និងរដ្ឋាភិបាលបរទេសមួយចំនួន និយាយថា ជាការព្យាយាមបំផ្លាញអំណាចគ្រប់គ្រងខ្លួនឯងរបស់ទីក្រុងហុងកុង ដែលចិនធ្លាប់បានសន្យាក្រោមរូបមន្ត ប្រទេស1 ប្រព័ន្ធ2 កាលពីពេលមុន៕
ប្រភព៖ សារព័ត៌មានបរទេស
July 4, 2020
ទឹកជំនន់នៅប្រទេសចិន! មនុស្សជាង100នាក់បានស្លាប់និងបាត់ខ្លួន ខណៈសេដ្ឋកិច្ចជាតិត្រូវខាតបង់25ពាន់លានយន់
ទឹកជំនន់ដ៏ធ្ងន់ធ្ងរនៅភាគខាងត្បូងប្រទេសចិន បានទាញរំលំអគារជាច្រើនកន្លែង និងបានធ្វើឱ្យប៉ះពាល់ដល់ពលរដ្ឋប្រមាណជា15លាននាក់ ព្រមទាំងបានបណ្ដាលឱ្យមនុស្សជាង100នាក់ត្រូវបាត់បង់ជីវិតនិងបាត់ខ្លួន។
នៅក្នុងទីក្រុង Yichang ខេត្ត Hubei ទឹកជំនន់បានឡើងដល់ត្រឹមចង្កេះ នាំឱ្យអ្នកដំណើរនិងមធ្យោបាយធ្វើដំណើរត្រូវជាប់គាំងនៅតាមដងផ្លូវ។ នៅក្បែរទីក្រុង Chongqing លំហូរទឹកជំនន់ហាក់បានកួចយកកំណាត់ផ្លូវនានា ខណៈដែលទីរួមស្រុកទេសចរណ៍ Yangshuo នៃតំបន់ Guangxi ក៏មានភ្លៀងធ្លាក់ខ្លាំង ដែលនេះត្រូវបានអាជ្ញាធរពណ៌នាថា ជាព្រឹត្តិការណ៍ “រយឆ្នាំ” ទើបមានម្ដង។
ជាច្រើនសប្ដាហ៍មកនេះ ភ្លៀងធ្លាក់ខ្លាំងខុសពីធម្មតា បានបំផ្លិចបំផ្លាញគ្រប់តំបន់នៅភាគខាងត្បូងប្រទេសចិន បណ្ដាលមនុស្សមនុស្សយ៉ាងតិច106នាក់បានស្លាប់និងបាត់ខ្លួន ព្រមទាំងបង្កផលប៉ះពាល់អាក្រក់ដល់ពលរដ្ឋរាប់សិបលាននាក់។ នេះគឺជាគ្រោះទឹកជំនន់ដែលមានសភាពអាក្រក់បំផុតក្នុងអំឡុងប៉ុន្មានទសវត្សរ៍កន្លងមកនេះ។
តំបន់មួយក្នុងចំណោមតំបន់ដែលទទួលរងគ្រោះធ្ងន់ធ្ងរជាងគេបំផុត នោះគឺខេត្ត Hubei ដែលមាន Wuhan ជាទីរួមខេត្ត ជាកន្លែងដែលបានរងការខាតបង់ច្រើនបំផុតដោយសារតែវីរុសCOVID-19។
ក្រោយរយៈពេល31ថ្ងៃដែលបានព្រមានអំពីភ្លៀងនិងទឹកជំនន់ មជ្ឈមណ្ឌលជាតិឧតុនិយមចិន កាលពីថ្ងៃទី3កក្កដាកន្លងទៅក៏បានព្យាករថា នឹងមានភ្លៀងធំជាច្រើនមេមេទៀតកើតឡើងនៅតំបន់ភាគនិរតី ដែលចាប់ផ្ដើមពីថ្ងៃទី4កក្កដានេះ។ ក្រុមមន្ត្រីឧតុនិយមក៏បានព្រមានអំពីហានិភ័យនៃការបាក់ដីនិងបាក់ទំនប់ទឹកផងដែរ។
គ្រោះទឹកជំនន់នេះបាននាំឱ្យប្រជាជនមានការព្រួយបារម្ភអំពីស្ថានភាពទំនប់ Three Gorges Dam នៅលើទន្លេ Yangtze នៅពេលដែលវាកំពុងប្រឈមនឹងគ្រោះធំបំផុតរាប់ចាប់ពីពេលត្រូវបានដំណើរការកាលពីឆ្នាំ2003។
ស្ថានភាពទំនប់ Three Gorges Dam នៅលើទន្លេ Yangtze
ក្រុមមន្ត្រីចិនបានអះអាងជាច្រើនដងថា ការព្រួយបារម្ភខាងលើនេះគឺ “គ្មានន័យ” នោះទេ ខណៈដែលសារព័ត៌មានរដ្ឋចិន Xinhua ក៏បានបញ្ជាក់ថា ទំនប់ទឹក Three Gorges Dam នេះបានជួយកាត់បន្ថយទឹកជំនន់នៃទន្លេ Yangtze។ ក៏ប៉ុន្តែ តំបន់នេះនៅតែបន្តរងការបំផ្លិចបំផ្លាញដោយសារទឹកជំនន់និងបាក់ដី ព្រមទាំងមានគ្រោះរញ្ជួយដីកាលពីពេលថ្មីៗនេះទៀតផង។
យោងតាមក្រសួងគ្រប់គ្រងគ្រោះអាសន្នចិន ទឹកជំនន់នេះបានបង្កផលប៉ះពាល់ដល់ខេត្តចំនួន26នៃប្រទេសនេះ ក្នុងនោះមានផ្ទះរាប់សែនខ្នងត្រូវខូចខាត ចំណែកសេដ្ឋកិច្ចវិញក៏ត្រូវខាតបង់ប្រមាណជា25ពាន់លានយន់ (3.6ពាន់លានដុល្លារអាមេរិក)៕
ប្រភព៖ NY Times
July 4, 2020
ឥណ្ឌាទិញយន្តហោះចម្បាំង33គ្រឿងពីបរទេស ខណៈមានជម្លោះព្រំដែនជាមួយចិន
រដ្ឋាភិបាលឥណ្ឌា កាលពីថ្ងៃទី2កក្កដាកន្លងទៅ បានអនុម័តយល់ព្រមទិញយន្តហោះចម្បាំងចំនួន33គ្រឿងពីប្រទេសរុស្ស៊ី ព្រមទាំងធ្វើការបន្ទាន់សម័យទៅលើយន្តហោះចម្បាំងចំនួន59គ្រឿងផ្សេងទៀត ក្នុងគ្រាដែលភាពតានតឹងកំពុងឡើងកម្ដៅនៅតាមព្រំដែនដែលមានជម្លោះជាមួយប្រទេសចិន។
សារព័ត៌មាន Reuters ដកស្រង់ប្រភពព័ត៌មានពីក្រសួងការពារជាតិឥណ្ឌា បានឱ្យដឹងថា រដ្ឋាភិបាលប្រទេសនេះបានអនុម័តយល់ព្រមទិញយន្តហោះចម្បាំង MiG-29 ចំនួន21គ្រឿង និង Su-30 ចំនួន12គ្រឿង ដែលមានតម្លៃសរុប 2.43ពាន់លានដុល្លារអាមេរិក។ ការទិញយន្តហោះចម្បាំង ក៏ដូចជាការបន្ទាន់សម័យយន្តហោះចម្បាំងផ្សេងទៀតរបស់កងទ័ពឥណ្ឌា គឺជាផ្នែកមួយដើម្បីឆ្លើយតបទៅនឹងតម្រូវការក្នុងការពង្រីកឥទ្ធិពលនៃទ័ពអាកាសរបស់ឥណ្ឌា។
ការអនុម័តទិញយន្តហោះចម្បាំងខាងលើនេះ ត្រូវបានធ្វើឡើងក្រោយពីដំណើរទស្សនកិច្ចរបស់រដ្ឋមន្ត្រីក្រសួងការពារជាតិឥណ្ឌា លោក Rajnath Singh ទៅកាន់ប្រទេសរុស្ស៊ី កាលពីចុងខែមិថុនាកន្លងទៅ។ ក្នុងដំណើរទស្សនកិច្ចនេះដែរ ទីក្រុងនីវដេលី (New Delhi) ក៏បានតឿនឱ្យទីក្រុងមូស្គូបង្កើនល្បឿនក្នុងការប្រគល់ប្រព័ន្ធមីស៊ីលការពារដែនអាកាសដែលឥណ្ឌាបានបញ្ជាទិញនោះផងដែរ។
យន្តហោះចម្បាំង MiG-29
ឥរិយាបថខាងលើរបស់ឥណ្ឌា បានកើនឡើងក្នុងកាលៈទេសៈដែលប្រទេសចិននិងឥណ្ឌាកំពុងមានជម្លោះនៅតាមបន្ទាត់ព្រំដែន ក្រោយពីមានហេតុការណ៍ប៉ះទង្គិចគ្នាប្រកបដោយភាពឃោរឃៅកាលពីពេលថ្មីៗនេះនៅក្នុងតំបន់ជ្រលងភ្នំ Galwan ដែលហេតុការណ៍នេះបានបណ្ដាលឱ្យទាហានឥណ្ឌាយ៉ាងតិច20នាក់បាត់បង់ជីវិត។
ក្រោយកិច្ចចរចាក្នុងសប្ដាហ៍នេះ ក្រុមមន្ត្រីនៃប្រទេសទាំងពីរបានយល់ព្រមដកកងទ័ពចេញពីតំបន់ព្រំដែនដែលកំពុងមានជម្លោះទៅតាមដំណាក់កាលនីមួយៗ ក្នុងបំណងកាត់បន្ថយភាពតានតឹង។ ប្រភពព័ត៌មានមួយចំនួន មុននេះ បានរាយការណ៍ថា ទាំងឥណ្ឌា ទាំងចិន នៅតែបន្តបង្កើនវត្តមានកងទ័ពរៀងៗខ្លួននៅតាមបន្ទាត់ព្រំដែន សូម្បីតែនៅពេលប្រទេសទាំងពីរបានព្រមព្រៀងគ្នាក្នុងការដកកងទ័ពដ៏ដោយ៕
ប្រភព៖ Reuters
July 3, 2020
ប្រទេសដែលមានអ្នកជំងឺCOVID-19 ច្រើនជាង100,000នាក់ បានកើនដល់19ប្រទេស
ពិភពលោកបានរកឃើញអ្នកផ្ទុកវីរុសCOVID-19 ចំនួនជិត11លាននាក់ ក្នុងនោះមានអ្នកជំងឺជិត523,000នាក់បានបាត់បង់ជីវិត។ ក្នុងចំណោមមនុស្ស1លាននាក់គឺមាន1,212នាក់បានឆ្លងវីរុសCOVID-19នេះ។
ប្រទេសនិងដែនដីចំនួន221ក្នុងពិភពលោក ត្រូវបានរាយការណ៍ថា បានរកឃើញអ្នកផ្ទុកវីរុសCOVID-19 សរុប 10,960,668នាក់ និងអ្នកស្លាប់ដោយសារវីរុសនេះមានចំនួន522,979នាក់ ក្នុងនោះមានអ្នកជំងឺថ្មី182,899នាក់ និងអ្នកស្លាប់ថ្មីចំនួន5,169នាក់ត្រូវបានរកឃើញក្នុងរយៈពេល24ម៉ោងចុងក្រោយនេះ។ ចំនួនអ្នកជំងឺដែលបានជាសះស្បើយ បានកើនឡើងដល់ 6,127,637នាក់។
ប្រទេសដែលមានអ្នកជំងឺច្រើនជាង1លាននាក់មានចំនួន2ប្រទេស គឺសហរដ្ឋអាមេរិក (អ្នកជំងឺសរុប 2,830,523នាក់ អ្នកស្លាប់សរុប 131,490នាក់) និងប្រទេសប្រេស៊ីល (អ្នកជំងឺសរុប 1,157,451នាក់ និងអ្នកស្លាប់សរុប 52,951
នាក់)។
ចំណែកប្រទេសដែលមានអ្នកជំងឺCOVID-19ចាប់ពី100,000នាក់ឡើងទៅ បានកើនដល់19ប្រទេស រួមមាន សហរដ្ឋអាមេរិក ប្រេស៊ីល រុស្ស៊ី ឥណ្ឌា អង់គ្លេស អេស្ប៉ាញ ប៉េរូ ឈីលី អ៊ីតាលី អ៊ីរ៉ង់ អាល្លឺម៉ង់ ទួរគី ម៉ិកស៊ិក ប៉ាគីស្ថាន អារ៉ាប់ប៊ីសាអូឌីត បារាំង បង់ក្លាដែស ប្រទេសអាហ្វ្រិកខាងត្បូង និងប្រទេសកាណាដា។
បើគិតទៅតាមចំនួនប្រជាជនសរុបនៅទូទាំងពិភពលោក គេរកឃើញថា ក្នុងចំណោមមនុស្ស1លាននាក់គឺមាន1,212នាក់បានឆ្លងCOVID-19 និង61.9នាក់ត្រូវបាត់បង់ជីវិតដោយសារវីរុសនេះ៕
ប្រភព៖ សារព័ត៌មានបរទេស
July 3, 2020
ចំនួនមហាសេដ្ឋីពិភពលោកកើនឡើងមិនធ្លាប់មាន! អឺរ៉ុបមានច្រើនជាងគេ រីឯអាស៊ីជាកន្លែង “ផលិត” មហាសេដ្ឋីថ្មីច្រើនបំផុត
នៅទូទាំងសកលលោកមានមនុស្សជិត2,900នាក់ មានទ្រព្យច្រើនជាងពាន់លានដុល្លារអាមេរិកនៅក្នុងឆ្នាំ2019 ដែលភាគច្រើនគឺជាក្រុមមនុស្សដែលរកស៊ីក្នុងវិស័យហិរញ្ញវត្ថុ ធនាគារ ឧស្សាហកម្ម និងអចលនទ្រព្យ។
ក្រុមហ៊ុនស្រាវជ្រាវទ្រព្យសម្បត្តិ Wealth-X ដែលទើបតែបានបញ្ចេញរបាយការណ៍មួយដែលមានឈ្មោះថា Biilionaire Census បានបង្ហាញថា ពិភពលោកមានមហាសេដ្ឋីសរុបចំនួន2,825នាក់នៅក្នុងឆ្នាំ2019 គឺកើន 8.5% បើធៀបនឹងឆ្នាំ2018។ នេះគឺជាចំនួនច្រើនបំផុត រាប់ចាប់ពី Wealth-X បានចាប់ផ្ដើមតាមដានទិន្នន័យនេះតាំងពីឆ្នាំ2010។ ទ្រព្យសរុបរបស់ក្រុមមហាសេដ្ឋីនេះ គឺប្រមាណជា 9.4 (9,400,000,000,000.00 USD) លានលានដុល្លារអាមេរិក គឺកើនឡើងច្រើនបើធៀបនឹង 8.6 (8,600,000,000,000.00 USD) លានលានដុល្លារកាលពីឆ្នាំ2018។
ក្នុងចំណោមមហាសេដ្ឋីទាំងអស់ក្នុងពិភពលោក គឺមានបុរសចំនួន 88% និងមានវ័យជាមធ្យម 66ឆ្នាំ។ ចំណែកមហាសេដ្ឋិនីវិញ គឺមានតែ 12% ប៉ុណ្ណោះ។ ជាងពាក់កណ្ដាលនៃមហាសេដ្ឋីសរុប គឺជាអ្នកមានដោយសារការប្រឹងប្រែងផ្ទាល់ខ្លួន ហើយពួកគេមានវ័យជាមធ្យមក្រោម 50ឆ្នាំ។
ភាគច្រើននៃមហាសេដ្ឋីខាងលើ គឺរកស៊ីមានបាននៅក្នុងវិស័យហិរញ្ញវត្ថុ ធនាគារ ឧស្សាហកម្ម និងអចលនទ្រព្យ។ ទោះជាយ៉ាងនេះក្ដី ចំនួនមហាសេដ្ឋីក្នុងវិស័យបច្ចេកវិទ្យាក៏កំពុងតែកើនឡើងយ៉ាងលឿនផងដែរ។
អឺរ៉ុបគឺជាទ្វីបដែលមានមហាសេដ្ឋីច្រើនជាងគេបង្អស់ក្នុងពិភពលោក ដោយមានដល់ទៅ 847នាក់។ ឈរលំដាប់ទី2គឺអាមេរិកខាងជើង ដោយមាន 834នាក់។ ប៉ុន្តែបើគិតអំពីទ្រព្យសរុបវិញ អាមេរិកខាងជើងមានច្រើនជាង (3.5លានលានដុល្លារ)។
រីឯអាស៊ីវិញ បែរជាតំបន់ដែលបាន “ផលិត” មហាសេដ្ឋីច្រើនជាងគេបង្អស់ក្នុងឆ្នាំ2019 ដោយមានមហាសេដ្ឋីថ្មីចំនួន80នាក់ ក្នុងចំណោមមហាសេដ្ឋីសរុប 758នាក់។ ទ្រព្យសរុបនៃមហាសេដ្ឋីទាំងនេះ មានចំនួន 2.4លានលានដុល្លារអាមេរិក គឺកើន 11% បើធៀបនឹងឆ្នាំ2018។ ដោយឡែក ប្រទេសចិនមានមហាសេដ្ឋីសរុបចំនួន 342នាក់៕
ប្រភព៖ CNBC
July 2, 2020
កូនកំលោះម្នាក់បានចម្លងCOVID-19 ទៅភ្ញៀវការជាង100នាក់ ព្រោះតែមិនចង់ខាត…
កូនកំលោះម្នាក់នៅទីក្រុង Paliganj បានបាត់ជីវិតក្រោយពីបានចម្លងវីរុសCOVID-19 ទៅមនុស្សជាង100នាក់ដែលបានចូលរួមពិធីរៀបអាពាហ៍ពិពាហ៍របស់ខ្លួនកាលពីថ្ងៃទី15មីថុនាកន្លងទៅ។
បុរសជាវិស្វករផ្នែកទន់ម្នាក់ អាយុ30ឆ្នាំ មានអាការរាកនិងក្ដៅខ្លួនខ្លាំងនៅមុនថ្ងៃចូលរោងការ ក៏ប៉ុន្តែក្រុមគ្រួសារមិនបានអើពើដល់ការណែនាំរបស់ក្រុមគ្រូពេទ្យនោះឡើយ ដោយកូនកំលោះគ្រាន់តែលេបថ្នាំបន្ថយការឈឺចាប់និងបន្ថយកម្ដៅ និងបានប្រារព្ធពិធីរៀបមង្គលការដ៏ធំ ដែលមានមនុស្សចូលរួមចំនួនជាង360នាក់។
ពីរថ្ងៃបន្ទាប់ពីពិធីរៀបអាពាហ៍ពិពាហ៍នៅទីក្រុង Paliganj រដ្ឋ Bibar ភាគឦសានប្រទេសឥណ្ឌា ស្ថានភាពសុខភាពរបស់កូនកំលោះក៏កាន់តែធ្ងន់ធ្ងរជាងមុន។ មិនយូរប៉ុន្មាន កូនកំលោះនេះក៏បានស្លាប់នៅតាមផ្លូវបញ្ជូនទៅកាន់មន្ទីរពេទ្យ។ សាកសពត្រូវបានបូជាយ៉ាងឆាប់រហ័សដោយមិនទាន់មានការធ្វើតេស្តរកវីរុសCOVID-19។
កាលពីថ្ងៃទី19មិថុនា មនុស្សដែលមានទំនាក់ទំនងជិតស្និទ្ធជាមួយនឹងកូនកំលោះ សុទ្ធតែត្រូវបានពិនិត្យសុខភាព ក្នុងនោះមានមនុស្សចំនួន16នាក់ ទទួលបានលទ្ធផលវិជ្ជមានជាមួយនឹងCOVID-19។ ការធ្វើតេស្តលើភ្ញៀវទាំងអស់ដែលបានចូលរួមពិធីមង្គលការខាងលើនៅតែបន្ត ហើយបានរកឃើញអ្នកផ្ទុកវីរុសចំនួន86នាក់បន្ថែមទៀត នាំឱ្យតួលេខសរុបកើនឡើងលើសពី100នាក់ ខណៈដែលកូនក្រមុំទទួលបានលទ្ធផលអវិជ្ជមាន។
សាច់ញាតិម្នាក់របស់កូនកំលោះ និយាយថា “កាលពីថ្ងៃទី14មិថុនា បើទោះជាគាត់បានប្រាប់ថា មិនស្រួលខ្លួន ហើយចង់ពន្យារពេលរៀបការ ប៉ុន្តែមេបាទាំងសងខាងបានផ្ដល់យោបល់ថា មិនគួរធ្វើបែបនេះ ព្រោះថា នឹងខាតបង់ប្រាក់យ៉ាងច្រើន បើសិនជាលុបចោលពិធីរៀបការនេះ”។
សាច់ញាតិម្នាក់ផ្សេងទៀតឱ្យដឹងថា គ្មានអ្នកណាម្នាក់គិតថា កូនកំលោះមានផ្ទុកវីរុសCOVID-19នោះឡើយ។ “នៅតំបន់ជនបទដែលហាក់មិនមានស្រមោលរបស់COVID-19 យើងមានភាពងាយស្រួលក្នុងការដើរហើរ”។
ប្រភពព័ត៌មានបានឱ្យដឹងថា នៅក្នុងថ្ងៃរៀបការ កូនកំលោះមានអាការក្ដៅខ្លួនខ្លាំង ធ្វើឱ្យសាច់ញាតិក្នុងគ្រួសារមានការព្រួយបារម្ភ ព្រមទាំងបាន “បួងសួងសូមឱ្យCOVID-19 បរវាសចៀសឆ្ងាយ”។ ញាតិម្នាក់បាននិយាយថា “គាត់នៅតែធ្វើកិច្ចទាំងអស់ក្នុងពិធីអាពាហ៍ពិពាហ៍ ក្រោយពីបានលេបថ្នាំប៉ារ៉ា”។
Chiranjeev Pandey ដែលជាមន្ត្រីម្នាក់នៅមូលដ្ឋានបានឱ្យដឹងថា អាជ្ញាធរបានដាក់បម្រាមគោចរតំបន់មួយចំនួននៅ Paliganj, Meetha Kuan និង Khagari។
គិតមកដល់បច្ចុប្បន្ន ពិភពលោកទាំងមូលមានអ្នកឆ្លងវីរុសCOVID-19 សរុប 10,777,769នាក់ ខណៈដែលអ្នកស្លាប់ដោយសារវីរុសនេះបានកើនឡើងដល់517,810នាក់។ ឥណ្ឌាគឺជាសម្បុកមេរោគCOVID-19 ធំជាងគេលំដាប់ទី4ក្នុងពិភពលោក និងធំជាងគេបង្អស់នៅទ្វីបអាស៊ី ដោយមានអ្នកជំងឺជាង600,000នាក់ និងអ្នកស្លាប់ដោយសារវីរុសនេះ មានចំនួនជាង 17,800នាក់៕
ប្រភព៖ សារព័ត៌មានបរទេស
July 2, 2020
លោក Trump ជឿថា COVID-19 នឹងបាត់ខ្លួនទៅវិញ ខណៈដែលមនុស្សជាង130,000នាក់ស្លាប់នៅសហរដ្ឋអាមេរិក!
ប្រធានាធិបតីសហរដ្ឋអាមេរិកជឿថា វីរុសCOVID-19 ចុងក្រោយនឹងបាត់ខ្លួនទៅវិញ ខណៈដែលតួលេខអ្នកឆ្លងវីរុសនេះនៅតែបន្តកើនឡើងនៅក្នុងរដ្ឋជាច្រើននៅសហរដ្ឋអាមេរិកនាសប្ដាហ៍នេះ។
ក្នុងកិច្ចសម្ភាសមួយជាមួយ Fox Business កាលពីថ្ងៃទី1កក្កដា ប្រធានាធិបតី Donald Trump ថ្លែងថា លោកមានសុទិដ្ឋិនិយមចំពោះក្ដីសង្ឃឹមដែលថាសេដ្ឋកិច្ចនឹងងើបឡើងវិញក្រោយពីបានបទទ្វារអស់មួយរយៈពេលដោយសារតែCOVID-19។ ម្ចាស់សេតវិមានបានលើកឡើងអំពីទិន្នន័យដ៏ល្អប្រសើរនាពេលថ្មីៗនេះទាក់ទិននឹងចំនួនការងារ និងប្រាក់ចំណូលនៃការលក់រាយ។
លោក Trump បានថ្លែងថា “ខ្ញុំគិតថា យើងកំពុងតែវិលត្រលប់មកវិញទៅតាមវិធីដ៏ខ្លាំងក្លា។ ហើយខ្ញុំក៏គិតថា យើងនៅតែទប់ទល់ទៅនឹងវីរុសCOVID-19 បានយ៉ាងល្អ។
នៅពេលត្រូវបានសួរអំពីថា តើលោកជឿទេថា COVID-19 នឹងបាត់ខ្លួន លោក Trump អះអាងថា “ខ្ញុំយល់ថា នៅក្នុងអំឡុងពេលណាមួយនោះ វីរុសនឹងបាត់ខ្លួន។ ខ្ញុំសង្ឃឹមបែបនេះ។ ខ្ញុំជឿថា ប្រាកដជាបែបនេះ។ ដល់ពេលកំណត់ណាមួយនោះ វានឹងទៅជាយ៉ាងនេះ ហើយយើងនឹងមានវ៉ាក់សាំងក្នុងពេលឆាប់ៗខាងមុខ”។
ក្នុងរយៈពេលប៉ុន្មានខែចុងក្រោយនេះ លោក Trump ធ្លាប់បានអះអាងជាច្រើនលើកថា លោកជឿថា វីរុសCOVID-19 នឹង “បាត់ខ្លួន” ខណៈដែលរដ្ឋជាច្រើននៅសហរដ្ឋអាមេរិកនៅតែបន្តរកឃើញអ្នកផ្ទុកវីរុសកាន់តែច្រើនឡើងៗ។
កាលពីចុងខែកុម្ភៈ លោក Trump ប្រកាសថា COVID-19 នឹងបាត់ខ្លួន “ដូចជាប្រការដ៏អស្ចារ្យមួយ”។ កាលពីខែឧសភា លោកក៏ធ្លាប់បានថ្លែងថា វីរុសCOVID-19 នឹងបាត់ខ្លួនទៅវិញ ដោយ “មិនចាំបាច់មានវ៉ាក់សាំង” ផងដែរ។
ក៏ប៉ុន្តែ ក្រុមអ្នកវិទ្យាសាស្ត្រ និងមន្ត្រីសុខាភិបាលរបស់លោក Trump បានព្យាករថា ពលរដ្ឋអាមេរិកាំងនឹងត្រូវរស់នៅជាមួយវីរុសនេះក្នុងរយៈពេលវែងតទៅមុខទៀត ដែលយ៉ាងហោចណាស់ក៏រហូតដល់មានវ៉ាក់សាំងដែលត្រូវបានប្រើប្រាស់ជាទូលំទូលាយ។
ចំនួនករណីឆ្លងវីរុសនៅបណ្ដារដ្ឋដូចជា Texas, Arizona, Florida, California និងរដ្ឋផ្សេងៗជាច្រើនទៀតនៅសហរដ្ឋអាមេរិក គឺជាសញ្ញាដែលបង្ហាញថា COVID-19 នៅតែឆ្លងរាលដាលខ្លាំងនៅទឹកដីនេះ។
គិតមកដល់បច្ចុប្បន្ន ពិភពលោកទាំងមូលមានអ្នកឆ្លងវីរុសCOVID-19 សរុប 10,777,769នាក់ ខណៈដែលអ្នកស្លាប់ដោយសារវីរុសនេះបានកើនឡើងដល់517,810នាក់ ក្នុងនោះសហរដ្ឋអាមេរិកមានអ្នកស្លាប់130,746 នាក់ និងអ្នកជំងឺសរុបមានចំនួន 2.773.269នាក់៕
ប្រភព៖ Guardian
July 2, 2020