អន្តរជាតិ - La Reine Media

វ៉េណេស៊ុយអេឡា បាញ់ទម្លាក់យន្តហោះឯកជនមួយគ្រឿង ព្រោះបានរំលោភដែនអាកាស

កងទ័ពប្រទេសវ៉េណេស៊ុយអេឡា បានទទួលស្គាល់ថា បានបាញ់ទម្លាក់យន្តហោះឯកជនមួយគ្រឿងដែលមានលេខកូដបញ្ជាក់ថា មកពីសហរដ្ឋអាមេរិក ដោយសារថា យន្តហោះនេះបានរំលោភលើដែនអាកាសរបស់ប្រទេសអាមេរិកខាងត្បូងមួយនេះ។

សារព័ត៌មាន Sputnik បានរាយការណ៍ថា បញ្ជាការដ្ឋានយុទ្ធសាស្ត្ររបស់ក្រុមប្រដាប់អាវុធវ៉េណេស៊ុយអេឡា (CEOFANB) កាលពីថ្ងៃទី8កក្កដា បានប្រកាសថា ប្រទេសនេះកម្ចាត់យន្តហោះមួយគ្រឿងដែលមានលេខកូដបង្ហាញថាជាយន្តហោះមកពីសហរដ្ឋអាមេរិក ព្រោះតែយន្តហោះនេះបានរំលោភលើដែនអាកាសរបស់វ៉េណេស៊ុយអេឡា។

កងទ័ពវ៉េណេស៊ុយអេឡា បានបង្ហោះសារនៅលើទំព័រ Twitter ថា “CEOFANB សូមប្រកាសថា បញ្ជាការដ្ឋានកងទ័ពការពារដែនអាកាស បានរកឃើញយន្តហោះមួយគ្រឿងដែលមានលេខសម្គាល់មកពីសហរដ្ឋអាមេរិក រំលោភលើដែនអាកាសប្រទេសវ៉េណេស៊ុយអេឡានាយប់ថ្ងៃទី8កក្កដា។ យន្តហោះចម្បាំងរបស់វ៉េណេស៊ុយអេឡា បានកម្ចាត់យន្តហោះដែលបាននិយាយខាងដើមនេះ ទៅតាមការកំណត់”។

ទន្ទឹមនឹងសេចក្ដីប្រកាសនេះដែរ គេឃើញមានរូបភាពរបស់យន្តហោះដែលត្រូវបាន “កម្ទេច” កំពុងឆេះនៅលើដី។ រូបភាពមួយបានបង្ហាញអំពីលេខស៊េរី N339AV នៅលើកន្ទុយយន្តហោះ។

យោងតាមទំព័រ Flightradar នេះគឺជាយន្តហោះឯកជន Hawker 800។ មុនពេលត្រូវបានបាញ់ទម្លាក់មួយថ្ងៃ យន្តហោះនេះបានចុះឈ្មោះដើម្បីធ្វើការហោះហើរនៅក្នុងប្រទេសម៉ិកស៊ិក ពីរដ្ឋ Toluca ទៅកាន់កោះ Cozumel នៃតំបន់សមុទ្រ Caribbean។

បច្ចុប្បន្ន មិនទាន់មានព័ត៌មានផ្លូវការទាក់ទិននឹងទីតាំងដែលយន្តហោះនេះត្រូវបានបាញ់ទម្លាក់ ក៏ដូចជាមនុស្សនិងទំនិញនៅលើយន្តហោះនេះនៅឡើយ។ សារព័ត៌មាន Sputnik បានចេញផ្សាយថា ហេតុការណ៍ស្រដៀងនឹងករណីខាងលើ តែងតែកើតឡើងដោយមានជាប់ទាក់ទិននឹងសកម្មភាពជួញដូរគ្រឿងញៀនខុសច្បាប់។ កាលពីខែមុន កងទ័ពប្រទេសវ៉េណេស៊ុយអេឡាក៏ធ្លាប់បានបាញ់ទម្លាក់យន្តហោះមួយគ្រឿងដែរ ដោយសារតែយន្តហោះនេះដឹកគ្រឿងញៀន។

ឆ្នាំ2013 ប្រធានាធិបតីវ៉េណេស៊ុយអេឡា លោក Nicolas Maduro បានចុះហត្ថលេខាលើច្បាប់មួយដែលអនុញ្ញាតឱ្យកងទ័ពបាញ់ទម្លាក់យន្តហោះទាំងឡាយរបស់ក្រុមឈ្មួញគ្រឿងញៀនដែលហោះហើរឆ្លងកាត់ដែនអាកាសរបស់ប្រទេសនេះ។ នេះបើតាមសារព័ត៌មាន Sputnik៕

ប្រភព៖ សារព័ត៌មានបរទេស

July 9, 2020

អ្នកចម្រៀងរ៉ែប Kanye West ស្វាមីរបស់ Kim Kardashian ប្រកាសដណ្ដើមសន្លឹកឆ្នោតពីលោក Trump ដើម្បីធ្វើជាប្រធានាធិបតីក្នុងឆ្នាំនេះ

អ្នកចម្រៀងរ៉ែប Kanye West បានឱ្យដឹងថា ខ្លួនចូលរួមការប្រកួតប្រជែងដណ្ដើមតំណែងប្រធានាធិបតីសហរដ្ឋអាមេរិកដើម្បីជ័យជំនះ និងបានបង្ហាញអំពីការលែងគាំទ្រចំពោះលោក Donald Trump ដូចមុនទៀតហើយ។

“ជាមួយនឹងកិច្ចសម្ភាសនេះ ខ្ញុំនឹងយកមួកក្រហមចេញពីក្បាល” អ្នកចម្រៀងរ៉ែប Kayne West ថ្លែងបែបនេះនៅក្នុងកិច្ចសម្ភាសមួយដែលត្រូវបានចុះផ្សាយក្នុងថ្ងៃនេះ ដោយលោកនិយាយអំពីមួកកីឡាបេស្បលពណ៌ក្រហមដែលមានពាក្យស្លោក “នាំទឹកដីអាមេរិកដ៏មហាអស្ចារ្យត្រលប់មកវិញ” របស់លោកប្រធានាធិបតី Donald Trump កាលពីពេលឃោសនារកសំឡេងឆ្នោត។ លោក West ធ្លា់ប់ជាអ្នកគាំទ្ររបស់លោក Trump និងធ្លាប់ទទួលបានការអញ្ជើញឱ្យចូលមកធ្វើទស្សនកិច្ចនៅសេតវិមានផងដែរ។

West ថ្លែងថា “ខ្ញុំនឹងប្រជែងរកសំឡេងឆ្នោតក្នុងនាមជាបេក្ខភាពមកពីបក្សសាធារណរដ្ឋ បើសិនមិនមានលោក Trump។ ខ្ញុំនឹងប្រជែងយកតំណែងប្រធានាធិបតី ក្នុងនាមជាបេក្ខភាពឯករាជ្យ បើសិនមានលោក Trump”។

លោក West បានឱ្យដឹងថា លោកនឹងចូលរួមប្រកួតប្រជែងការបោះឆ្នោតសម្រាប់បក្ស Birthday Party និងបានច្រានចោលការចោទប្រកាន់ដែលថា លោកកំពុងបំបែកសំឡេងឆ្នោតរបស់ក្រុមជនជាតិអាមេរិកាំងស្បែកខ្មៅ ក៏ដូចជាការបង្កការខាតបង់ឱកាសជាប់ឆ្នោតរបស់លោក Joe Biden ដែលជាបេក្ខភាពប្រធានាធិបតីមកពីបក្សប្រជាធិបតេយ្យ និងជាគូប្រជែងសំខាន់របស់លោក Trump នៅក្នុងការបោះឆ្នោតនៅសហរដ្ឋអាមេរិកក្នុងឆ្នាំនេះ។

លោក West សង្កត់ធ្ងន់ថា “នឹងជារូបភាពប្រកាន់ពូជសាសន៍ និងលទ្ធិអភិជនស្បែកស” នៅពេលស្នើឱ្យជនជាតិស្បែកខ្មៅទាំងអស់ គាំទ្របក្សប្រជាធិបតេយ្យ។ បើសិនជាខ្ញុំឈ្នះឆ្នោតក្នុងឆ្នាំនេះ នោះគឺជាការចាត់ចែងរបស់ព្រះ។ ហើយបើខ្ញុំឈ្នះក្នុងឆ្នាំ2024 នោះក៏ជាការរៀបចំរបស់ព្រះ”។

នៅពេលត្រូវបានសួរអំពីគោលនយោបាយការបរទេសនៅពេលឈ្នះឆ្នោត អ្នកចម្រៀងរូបនេះថ្លែងថា មិនទាន់ផ្ដោតទៅលើបញ្ហានេះនៅឡើយ។ “ខ្ញុំនឹងផ្ដោតទៅលើការ ការពារទឹកដីអាមេរិកជាដំបូងគេបង្អស់ជាមួយនឹងកងទ័ពដ៏មហិមារបស់យើង។ ជាដំបូង យើងចូរយកចិត្តទុកដាក់ទៅលើខ្លួនយើងរាល់គ្នាជាមុនសិន”។

នៅពេលនិយាយដល់ប្រទេសចិន លោក West ថ្លែងថា “ខ្ញុំស្រលាញ់ប្រទេសចិន។ អាសន្នរោគនោះមិនមែនជាកំហុសរបស់ប្រទេសចិន និងមិនមែនជាកំហុសរបស់ជនជាតិចិនទេ។ ពួកគេក៏ជាមនុស្សរបស់ព្រះ។ សេចក្ដីស្នេហាប្រទេសចិន បានផ្លាស់ប្ដូរជីវិតខ្ញុំ និងផ្លាស់ប្ដូរការយល់ឃើញរបស់ខ្ញុំ។ ម្ដាយរបស់ខ្ញុំគឺជាសាស្ត្រាចារ្យភាសាអង់គ្លេសនៅប្រទេសចិន កាលពីខ្ញុំនៅរៀនថ្នាក់ទី5”។

មួយម៉ោងក្រោយពីកិច្ចសម្ភាស អ្នកចម្រៀងរ៉ែបរូបនេះ បានឱ្យដឹងថា ប្រាកដជាប្រជែងឆ្នោតក្នុងឆ្នាំ2020នេះ ដោយប្រើពាក្យស្លោក “YES” និងមិនរង់ចាំដល់ឆ្នាំ2024នោះឡើយ។ អ្នកដែលត្រូវបាន West ជ្រើសរើសជាដៃគូសម្រាប់អមការប្រជែងរកសំឡេងឆ្នោតរបស់លោក នោះគឺ Michelle Tedball ជាគ្រួអាចារ្យម្នាក់មកពីកាហ្សាក់ស្ថាន។ នៅពេលត្រូវបានសួរអំពីមូលហេតុដែលនាំឱ្យជ្រើសរើសឈ្មោះ Birthday Party ជាឈ្មោះរបស់បក្ស លោក West ឆ្លើយថា “ព្រោះថា នៅពេលយើងខ្ញុំឈ្នះ នោះនឹងជាថ្ងៃកំណើតរបស់អ្នកគ្រប់គ្នា”។

លោក Kanye West កើតឆ្នាំ1977 នៅក្នុងទីក្រុង Atlanta រដ្ឋ Georgia នៃសហរដ្ឋអាមេរិក។ បច្ចុប្បន្ន លោករស់នៅជាមួយភរិយាដែលជាកំពូលតារាទូរទស្សន៍ម្នាក់ គឺអ្នកស្រី Kim Kardashian នៅ Hidden Hills ក្នុងទីក្រុង Los Angeles។ ទស្សនាវដ្ដី Forbes កាលពីខែមេសា បានទទួលស្គាល់ថា តារាចម្រៀងរ៉ែប Kanye West នេះ គឺជាមហាសេដ្ឋីម្នាក់ដែលមានទ្រព្យប្រមាណជា 1.3ពាន់លានដុល្លារអាមេរិក។

នៅក្នុងដំណើរទស្សនកិច្ចទៅកាន់សេតវិមានកាលពីឆ្នាំ2018 លោក West បានឱបលោក Trump និងបាននិយាយថា “ខ្ញុំស្រលាញ់បុរសនេះ”។ នៅពេលត្រូវបានសួរថា តើចាត់ទុក West ជាបេក្ខភាពប្រធានាធិបតីដែលមានសក្ដានុពលទេ លោក Trump កាលណោះបានឆ្លើយថា អ្នកចម្រៀងរ៉ែបរូបនេះ អាច “ជាបេក្ខភាពល្អណាស់”។ ក៏ប៉ុន្តែ លោក West អះអាងថា ប្រការនោះអាចកើតឡើងលុះត្រាតែក្រោយឆ្នាំ2024 នៅពេលដែលលោក Trump បានបញ្ចប់អាណាត្តិកាលទី2របស់ខ្លួននៅសេតវិមាន៕

ប្រភព៖ សារព័ត៌មានបរទេស

July 8, 2020

ប្រធានាធិបតីប្រេស៊ីល ឆ្លងវីរុសCOVID-19

ប្រធានាធិបតីប្រទេសប្រេស៊ីល លោក Jair Bolsonaro បានប្រកាសថា លោកវិជ្ជមានជាមួយនឹងវីរុសCOVID-19 ក្រោយពីមានអាការអស់កម្លាំងនិងក្ដៅខ្លួន។

“លទ្ធផលគឺវិជ្ជមាន” ប្រធានាធិបតីប្រេស៊ីលមានប្រសាសន៍ជាមួយក្រុមអ្នកយកព័ត៌មានក្នុងពេលទទួលទានអាហារថ្ងៃត្រង់ នៅក្នុងកម្មវិធីទូរទស្សន៍ផ្សាយផ្ទាល់មួយកាលពីថ្ងៃទី7កក្កដាកន្លងទៅ ។

លោក Bolsonaro បានឆ្លងវីរុសនេះ បន្ទាប់ពីលោកបានអញ្ជើញទៅទទួលទានអាហារនៅឯគេហដ្ឋានរបស់លោក Todd Chapman ដែលជាឯកអគ្គរដ្ឋទូតសហរដ្ឋអាមេរិកនៅប្រេស៊ីល នារដ្ឋធានី Brasilia។ លោកចាប់ផ្ដើមមានអាការអស់កម្លាំងកាលពីព្រលប់ថ្ងៃទី4កក្កដា ហើយថ្ងៃបន្ទាប់ក៏នៅតែមានអារម្មណ៍ថាមិនស្រួលដដែល។

រដ្ឋាភិបាលប្រេស៊ីល បានឱ្យដឹងថា លោក Bolsonaro មានអារម្មណ៍ថាមិនស្រួលខ្លួន និងមានកម្ដៅខ្លួនឡើងដល់38អង្សា។ លោក Bolsonaro ក៏បានបញ្ជាក់ថា លោកបានធ្វើតេស្តរកមេរោគជាលើកទី4ហើយ រាប់ចាប់ពីខែមីនា និងបានថតកាំរស្មីអ៊ិចពិនិត្យមើលសួតនៅមន្ទីរពេទ្យយោធា ប៉ុន្តែមិនមានសញ្ញាខុសប្រក្រតីនោះទេ។

មេដឹកនាំប្រេស៊ីលវ័យ65ឆ្នាំរូបនេះ តែងតែវាយតម្លៃទាបទៅលើហានិភ័យក៏ដូចជាការគំរាមកំហែងរបស់វីរុសCOVID-19។ លោកធ្លាប់បានថ្លែងថា វីរុសនេះមិនខុសអ្វីទៅនឹងជំងឺផ្ដាសាយធម្មតាទេ។ លោក Bolsonaro ក៏ជឿថា ការដែលលោកធ្លាប់ជាអតីតអត្តពលិកនឹងជួយឱ្យលោកមានប្រព័ន្ធការពាររាងកាយល្អសម្រាប់ទប់ទល់នឹងអាការធ្ងន់ធ្ងរបំផុតរបស់COVID-19។

mainichi.jp Brazil's President Bolsonaro appears in protest — លោក Bolsonaro កន្លងមក ធ្លាប់បានចូលរួមធ្វើបាតុកម្មប្រឆាំងនឹងបម្រាមគោចរដែលបានដាក់ចេញដោយរដ្ឋមួយចំនួននៃប្រទេសនេះ

លោក Bolsonaro គឺជាសមាជិកទី2ដែលបានឆ្លងវីរុសCOVID-19 នៅក្នុងគ្រួសាររបស់លោក។ លោកយាយរបស់លោកជំទាវទី1 Michelle Bolsonaro ត្រូវបានគេរាយការណ៍ថា ត្រូវដាក់ម៉ាស៊ីនជំនួយដង្ហើម បន្ទាប់ពីបានចូលព្យាបាលនៅមន្ទីរពេទ្យដោយសារតែឆ្លងCOVID-19 កាលពីថ្ងៃទី1កក្កដា។

មុនករណីប្រធានាធិបតី អភិបាលក្រុង Manaus ដែលជាទីក្រុងធំបំផុតក្នុងតំបន់ Amazon ក៏បានចូលព្យាបាលនៅមន្ទីរពេទ្យនាទីក្រុង Sao Paulo ព្រោះតែឆ្លងវីរុសCOVID-19 នេះដែរ កាលពីសប្ដាហ៍មុន។

គិតមកដល់បច្ចុប្បន្ន COVID-19 បានសម្លាប់មនុស្ស ជាង482,100នាក់នៅក្នុងចំណោមអ្នកជំងឺសរុបជាង9,445,800នាក់ក្នុងពិភពលោក។ ប្រេស៊ីលគឺជាសម្បុកមេរោគធំជាងគេលំដាប់ទី2ក្នុងសកលលោក ដោយមានអ្នកជំងឺសរុប1,6លាននាក់ និងអ្នកស្លាប់សរុប52,951នាក់៕

ប្រភព៖ សារព័ត៌មានបរទេស

July 8, 2020

ទិដ្ឋភាពយន្តហោះនិងនាវាចម្បាំងអាមេរិក ធ្វើសមយុទ្ធកក្រើកមេឃរញ្ជួយទឹក នៅលើសមុទ្រចិនខាងត្បូង

បណ្ដាយន្តហោះយោធាអាមេរិកាំងត្រូវបានបញ្ជូនចេញពីរនាវាចម្បាំង USS Ronald Reagan និង USS Nimitz បានចូលរួមធ្វើសមយុទ្ធយោធារបស់ហរដ្ឋអាមេរិកនៅលើសមុទ្រចិនខាងត្បូង។

ក្រុមប្រយុទ្ធនៃនាវាចម្បាំងចំនួន2 គឺ USS Nimitz និង USS Ronald Reagan ដែលធ្វើសកម្មភាពក្រោមឈ្មោះ “កងកម្លាំងយុទ្ធសាស្ត្រនាវាផ្ទុកយន្តហោះ Nitmiz កំពុងធ្វើសមយុទ្ធយោធានៅលើសមុទ្រចិនខាងត្បូង ជាកន្លែងដែលកំពុងមានភាពតានតឹងព្រោះតែប្រទេសជាច្រើនដណ្ដើមគ្នាកាន់កាប់កោះ និងប្រជុំកោះនៅក្នុងតំបន់សមុទ្រនេះ។

ការធ្វើសមយុទ្ធយោធានៅសមុទ្រចិនខាងត្បូងរបស់កងទ័ពសហរដ្ឋអាមេរិក ត្រូវបានគេមើលឃើញថា សហរដ្ឋអាមេរិកចង់បញ្ជាក់ថា សមុទ្រចិនខាងត្បូងគឺជាដែនទឹកអន្តរជាតិ ហើយនេះក៏ជាការបង្ហាញសាច់ដុំដាក់ប្រទេសចិនផងដែរ ក្នុងបំណងការពារបណ្ដាប្រទេសតូចៗ និងការពារផលប្រយោជន៍សហរដ្ឋអាមេរិកនៅលើដែនសមុទ្រមួយនេះ ដោយសារតែចិនមានបំណងគ្រប់គ្រងផ្ដាច់ទៅលើសមុទ្រនេះ។

ខាងក្រោមនេះគឺជាបណ្ដារូបភាពដែលបង្ហាញអំពីសកម្មភាពធ្វើសមយុទ្ធរបស់កងទ័ពសហរដ្ឋអាមេរិកនៅលើសមុទ្រចិនខាងត្បូង៖

បណ្ដាយន្តហោះដែលមកពីក្រុមហោះហើររបស់ក្រុមនាវាផ្ទុកយន្តហោះ កំពុងហោះជា2ក្រុម នៅពីលើនាវាផ្ទុកយន្តហោះ USS Nimitz និង USS Ronald Reagan លើផ្ទៃសមុទ្រចិនខាងត្បូងកាលពីថ្ងៃទី6កក្កដា។

ក្រុមនាវិកនៅលើនាវាផ្ទុកយន្តហោះ USS Nimitz កំពុងរៀបចំឱ្យយន្តហោះចម្បាំងធ្វើសមយុទ្ធ

ក្រុមហ៊ុនយន្តដែលមកពីក្រុមទី11 នៃនាវាផ្ទុកយន្តហោះ កំពុងហោះពីលើនាវា

ប្រភព៖ សារព័ត៌មានបរទេស

July 7, 2020

ប្រទេសចំនួន3នឹងបញ្ជូនយានអវកាសទៅកាន់ផ្កាយព្រះអង្គារនៅក្នុងខែនេះ

សហរដ្ឋអាមេរិក ប្រទេសចិន និងអារ៉ាប់រួម កំពុងឆ្លៀតយកឱកាសដ៏ល្អបំផុតក្នុងឆ្នាំនេះដើម្បីបញ្ជូនយានអវកាសទៅស្រាវជ្រាវពិភពព្រះអង្គារ ដើម្បីត្រួសត្រាយផ្លូវសម្រាប់ការបញ្ជូនមនុស្សទៅរស់នៅលើភពក្រហមនេះ។

ទីតាំងនិងរយៈចម្ងាយពីផែនដីទៅកាន់ពិភពព្រះអង្គារមិនមែនសុទ្ធតែដូចគ្នាគ្រប់ពេលនោះទេ ដូច្នេះដំណាក់កាលដែលល្អបំផុតសម្រាប់ហោះពីផែនដីទៅកាន់ភពក្រហមនេះ គឺមានតែម្ដងគត់ក្នុងរយៈពេល26ខែ។ ចាប់ពីខែកក្កដាដល់ខែសីហាឆ្នាំនេះ គឹជាដំណាក់កាលល្អបំផុតដែលមិនអាចរំលងបាន។ យ៉ាងនេះហើយទើបសហរដ្ឋអាមេរិក ប្រទេសចិន និងអារ៉ាប់រួម សុទ្ធតែសម្រេចចិត្តបាញ់បង្ហោះយានអវកាសរបស់ខ្លួនទៅកាន់ផ្កាយព្រះអង្គារនៅក្នុងដំណាក់កាលនេះ។ ចំនួននិងកម្រិតនៃភាពស្មុគស្មាញរបស់បណ្ដាបេសកកម្ម បានបង្ហាញថា ពិភពព្រះអង្គារពិតជាមានសារសំខាន់ដ៏ធំធេងក្នុងការរុករកក្នុងទីអវកាសរបស់មនុស្សជាតិ។ នេះបើតាមការចេញផ្សាយកាលពីថ្ងៃទី6កក្កដារបស់សារព័ត៌មាន Futurism។

ទីភ្នាក់ងារអវកាសអាមេរិក (NASA) មានគម្រោងបញ្ជូនរ៉ូបូត Perseverance ទៅកាន់ឋានព្រះអង្គារនៅក្នុងដំណាក់កាលចាប់ពីថ្ងៃទី30កក្កដា ដល់ថ្ងៃទី15សីហាខាងមុខ។ Perseverance នឹងចុះចត់ត្រង់រណ្ដៅ Jezero ដែលមានទំហំ45គីឡូម៉ែត្រនៅថ្ងៃទី18កុម្ភៈ2021។ រ៉ូបូតនេះមានភារកិច្ចតាមរកដាននៃសភាវរស់នៅលើឋានព្រះអង្គារ ហើយប្រមូលយកសំណាកដី និងធ្វើការសិក្សាស្រាវជ្រាវមួយចំនួនផ្សេងទៀត។ រ៉ូបូតនេះក៏នឹងនាំយកឧទ្ធម្ភាគចក្រស្វ័យប្រវត្តិខ្នាតតូច Ingenuity ទៅជាមួយវាផងដែរ។ ឧទ្ធម្ភាគចក្រស្វ័យប្រវត្តិខ្នាតតូច Ingenuity នឹងក្លាយជាឧករណ៍ហោះហើរឡើងដំបូងគេបង្អស់នៅភពដទៃក្រៅពីផែនដី។

សហរដ្ឋអាមេរិកធ្លាប់បានបញ្ជូនយានទៅកាន់ពិភពព្រះអង្គារជាច្រើនលើកមកហើយ ក្នុងនោះ Mariner 4 គឺជាយានអវកាសដំបូងដែលបានធ្វើការហោះហើរទៅក្បែរពិភពក្រហមដោយជោគជ័យកាលពីឆ្នាំ1965។ ការបញ្ជូនយានទៅកាន់ភពព្រះអង្គារកន្លងមក រួមនឹងបេសកកម្មក្នុងឆ្នាំនេះ គឺជាការត្រៀមលក្ខណៈសម្រាប់បញ្ជូនមនុស្សឡើងទៅជាន់ដីផ្កាយព្រះអង្គារនាពេលខាងមុខ។ ក្រៅពី NASA ក៏មានក្រុមហ៊ុនឯកជនមួយកំពុងប្រឹងប្រែងដើម្បីសម្រេចគោលដៅខាងលើនេះដែរ នោះគឺក្រុមហ៊ុន SpaceX របស់ជនជាតិអាមេរិកាំងដើមកំណើតអាហ្វ្រិក លោក Elon Musk។

ចំណែកប្រទេសចិនឯណោះវិញ ក៏មិនព្រមចាញ់អាមេរិកាំងនោះឡើយ។ តាមគម្រោង បេសកកម្មស្រាវជ្រាវពិភពព្រះអង្គាររបស់ប្រទេសចិន ដែលមានឈ្មោះថា Tianwen 1 នឹងចាប់ផ្ដើមចេញដំណើរក្នុងអំឡុងពេលចាប់ពីថ្ងៃទី20កក្កដាដល់ថ្ងៃទី25កក្កដា2020នេះ។ Tianwen 1 រួមមានយានអវកាសហោះនៅលើគន្លងគោចរដើម្បីស្រាវជ្រាវពិភពព្រះអង្គារពីចម្ងាយ រួមនឹងយានសម្រាប់ចុះចត1គ្រឿង និងរ៉ូបូតរុករក1គ្រឿង។ Tianwen 1 នឹងជួយដល់ក្រុមអ្នកវិទ្យាសាស្ត្រចិន ស្វែងយល់អំពីដី ភូមិសាស្ត្រ បរិស្ថាន និងបរិយាកាសរបស់ភពក្រហមនេះ។

ឆ្នាំ2011 ប្រទេសចិនបានបញ្ជូនយានអវកាស Yinghuo-1 ទៅសិក្សាស្រាវជ្រាវឋានព្រះអង្គារ ប៉ុន្តែមិនបានសម្រេច។ យ៉ាងនេះក្ដី ប្រទេសចិនក៏ទទួលបានជោគជ័យច្រើនក្នុងវិស័យវិទ្យាសាស្ត្រអវកាសនៅក្នុងរយៈពេលប៉ុន្មានឆ្នាំកន្លងទៅថ្មីៗនេះ ក្នុងនោះ ប្រទេសចិនបានក្លាយជាប្រទេសដំបូងគេដែលបានបញ្ជូនយានទៅចុះចតនៅលើតំបន់ងងឹតអចិន្ត្រៃយ៍របស់ឋានព្រះចន្ទផងដែរ។

នៅអាស៊ីខាងលិចវិញ ក្នុងថ្ងៃទី14កក្កដាខាងមុខ ប្រទេសអារ៉ាប់រួម (UAE) នឹងបញ្ជូនយានអវកាសខ្នាតតូច Hope ទៅកាន់ពិភពព្រះអង្គារ។ Hope នឹងមិនចុះចតលើភពក្រហមនេះទេ ដោយវានឹងហោះជុំវិញឋានព្រះអង្គារ និងចំណាយពេលយ៉ាងតិច2ឆ្នាំ ដើម្បីសិក្សាស្រាវជ្រាវអំពីបរិយាកាសនៃស្រទាប់អូហ្សូន។

សម្រាប់អារ៉ាប់រួម Hope គឺជាបេសកកម្មស្រាវជ្រាវភពព្រះអង្គារដំបូងបំផុត។ នេះគឺជាផ្នែកមួយនឹងគោលដៅអភិវឌ្ឍវិស័យបច្ចេកវិទ្យាជាន់ខ្ពស់ ដូចជាបច្ចេកវិទ្យាអវកាសជាដើម។

រាល់ទិន្នន័យដែលប្រមូលបានពីបេសកកម្មទាំង3ខាងលើនេះ នឹងរួមចំណែកបង្កើតបានជាទិដ្ឋភាពទាំងមូល និងលម្អិតស្ដីអំពីពិភពព្រះអង្គារ។

ផ្កាយ ពិភព ឬឋានព្រះអង្គារនេះ មានរយៈចម្ងាយពីផែនដីមិនដូចគ្នានោះទេនៅក្នុងអំឡុងពេលខុសៗគ្នា។ ចម្ងាយជាមធ្យមពីផែនដីទៅឋានព្រះអង្គារគឺប្រមាណជា 225លានគីឡូម៉ែត្រ ខណៈចម្ងាយឆ្ងាយបំផុតស្មើ401លានគីឡូម៉ែត្រ ចំណែកចម្ងាយជិតបំផុតគឺប្រមាណជា 54.6លានគីឡូម៉ែត្រ។

ក្រុមអ្នកវិទ្យាសាស្ត្រមួយចំនួនធំ មានបំណងកែប្រែពិភពព្រះអង្គារឱ្យទៅជាទីឋានដែលអាចឱ្យមនុស្សរស់នៅបាននាអនាគតវែងឆ្ងាយខាងមុខ៕

ប្រភព៖ Futurism

July 7, 2020

លោកប្រធានាធិបតី ដូណាល់ ត្រាំ ស្ថិតក្នុងស្ថានភាព ស្ដារលែងឡើង…

លោក ដូណាល់ ត្រាំ មេដឹកនាំសេតវិមានដ៏មហាសែនក្លៀវក្លា កំពុងត្រូវបានវាយតម្លៃដោយអ្នកវិភាគថា កំពុងស្ថិតក្នុងស្ថានភាពអស់ក្បាច់ហក់…ឱកាសក្នុងការឈ្នះការបោះឆ្នោតជ្រើសតាំង ក្លាយជាប្រធានាធិបតីអាណត្តិទី2 មើលទៅកាន់តែស្រពេចស្រពិលខ្លាំងឡើងជារៀងរាល់ថ្ងៃ…ការនិយាយស្ដី ថ្លែងការប្រាស្រ័យនៅចំពោះមុខប្រជាជន មិនរញ្ជួយចិត្ត មិនដាច់ខាត និងមិនគួរឱ្យជឿជាក់ ដូចកាលពីអាណត្តិមុនឡើយ។

ទោះជាចង់ប្រើកាយវិការបែបណា ក៏មិនជំពប់ភ្នែក ឬត្រូវចិត្តអ្នកស្ដាប់ដែរ…រឹតតែជិតដល់ថ្ងៃបោះឆ្នោតជ្រើសតាំងផង ជនអាមេរិកាំងដែលធ្លាប់និយមពេញចិត្តលោកត្រាំ បានចាប់ផ្ដើមមើលឃើញថា លោកត្រាំ ជាមេដឹកនាំដែលមានបញ្ហាច្រើនណាស់ ទាំងផ្នែកការគិត នយោបាយ ទង្វើ និងតួនាទីផ្សេងៗ ក្នុងឋានៈជាអ្នកដឹកនាំប្រទេសមហាអំណាចលំដាប់លេខ1 របស់ពិភពលោក។

រឹតតែជាបញ្ហាដ៏ធ្ងន់មួយទៀត នៅពេលដែលមិត្តជិតស្និទ្ធ មិត្តយូរអង្វែង ដូចជាក្រុមប្រទេសអឺរ៉ុប ចាប់ផ្ដើមបែរខ្លួនចេញឆ្ងាយ និងមើលឃើញហើយថា លោកត្រាំ ដូចជាមិនមែនជាមិត្តភក្តិដែលគួរឱ្យសេពគប់ ទុកចិត្តមិនបាន និងថែមទាំងមិនអាចពឹងពាក់បានទៀតផង ហើយថែមទាំងសម្លឹងមើលមកពួកមិត្តភក្តិមេដឹកនាំប្រទេសក្នុងសហគមន៍អឺរ៉ុប ប្រៀបដូចជាកូនចៅ តួរង ឬខ្ញុំកញ្ជះទៀតផង។

ការបង្ហាញខ្លួនក្នុងអំឡុងពិធីជប់លៀងនៅថ្ងៃបុណ្យជាតិសហរដ្ឋអាមេរិក 4កក្កដា លោកត្រាំមិនបានបង្ហាញឱ្យប្រជាជនអាមេរិកាំង ជឿជាក់លើគុណភាពនៃការធ្វើជាមេដឹកនាំទាល់តែសោះ…ព្រោះជំនួសឱ្យការដែលត្រូវនិយាយឱ្យជនអាមេរិកាំង មានក្ដីសង្ឃឹមនាពេលអនាគត កណ្ដាលវិបត្តិធ្ងន់ធ្ងរផ្នែកសេដ្ឋកិច្ច នយោបាយ សង្គមនោះ លោកត្រាំមិនធ្វើ…តែបែរជាទៅនិយាយបំផុសបំផុលជនអាមេរិកាំង ឱ្យមើលឃើញពីគ្រោះភ័យដ៏កាចសាហាវរបស់ក្រុមឆ្វេងនិយម ក្រុមប្រឆាំងហ្វាស់ស៊ីស ក្រុមក្បាលរឹងផ្សេងៗទៀត ដែលចេញមកពីផលប៉ះពាល់របស់ការទាមទារតវ៉ាប្រឆាំងនឹងទង្វើរបស់ជនស្បែកស ដែលនៅមានគំនិតបង្កប់នៅក្នុងខួរក្បាល រឿងការរើសអើងជាតិសាសន៍ពណ៌សម្បុរ រហូតក្លាយជាវិបត្តិរបស់ប្រទេសជាតិនាពេលបច្ចុប្បន្នទៅវិញ។

ក្នុងសភាវប្រក្រតី ជនអាមេរិកាំងមានការបែកបាក់ខាងគំនិត រឿងនយោបាយពណ៌សម្បុរស្រាប់ទៅហើយ គ្រាន់តែរង់ចាំការផ្ទុះឡើងប៉ុណ្ណោះ ជួនកាល ការថ្លែងរបស់លោកត្រាំ ក្នុងអំឡុង 2-3ថ្ងៃ មុនថ្ងៃឈប់សម្រាកវែងកន្លងមកនេះ គ្រាន់តែជាការចាប់ផ្ដើមទេ តែវាត្រូវបានសំពងបន្ថែមឱ្យទំនាស់រឿងពណ៌សម្បុរនោះ រឹតតែបើកធំឡើងជាងអ្វីដែលកំពុងមាន ក្នុងខណៈពេលនេះ។

លោកត្រាំ និយាយរឿងការបង្កភេរវកម្ម អាងថា ក្រុមមនុស្សជំនាន់ថ្មី រង់ចាំតែបំផ្លាញប្រវត្តិសាស្ត្រ ពិធីសាសនា វប្បធម៌ ជាក្រុមឆ្វេងជ្រុល ជាក្រុមអ្នកត្រូវការកសាងសង្គមថ្មី ក្រុមនិយមអនាធិបតេយ្យ ក្រុមនិយមការរឹងរូស…អាងថា ក្រុមស្បែកខ្មៅចង់តែបំផ្លាញ និងចង់ផ្លាស់ប្ដូរប្រវត្តិសាស្ត្រ។

ការថ្លែងប្រាស្រ័យ សំឡេងវ៉េវវ៉ាវនៅក្នុងសួនច្បារផ្កាកុលាបខាងក្រោយមន្ទីរសេតវិមាន ដែលនិយាយអំពីរឿងប្រវត្តិសាស្ត្រនោះ អ្នកវិភាគមើលឃើញថា លោកត្រាំកំពុងស្ថិតក្នុងគំនិតតែលតោល មិនតភ្ជាប់នឹងសភាពការណ៍ពិតនាពេលបច្ចុប្បន្ន ព្យាយាមដាស់ខ្មោចស្នេហាជាតិ លើកតម្កើងវប្បធម៌របស់ជនជាតិអាមេរិក និងថែមទាំងធ្វើឱ្យគេឯងមើលឃើញទៀតថា លោកកំពុងស្ថិតក្នុងសភាព “ស្រមើស្រមៃ” វង្វេងវង្វាន់ ដូចការវិភាគនៅក្នុងអត្ថបទមួយរបស់សារព័ត៌មាន របស់ជនល្បីឈ្មោះ ខាល ប៊ើនស្ទីន ដែលបានគាស់កកាយលើករឿង វ៉តធើរ ហ្គេត មកនិយាយក្នុងយុគសម័យលោកប្រធានាធិបតី រីឆាដ និកសុន ដែលត្រូវលាឈប់ពីតំណែងយ៉ាងអាម៉ាស់។

នៅពេលប្រៀបធៀបជាមួយមេដឹកនាំប្រទេសមហាអំណាច 2ទៀត ដែលជាគូសងសឹករបស់លោកត្រាំ គឺលោក វ៉្លាឌីមៀរ ពូទីន មេដឹកនាំប្រទេសរុស្ស៊ី ក៏រឹតតែខុសគ្នាឆ្ងាយទៅទៀត…កម្រិតខុសគ្នាឆ្ងាយណាស់! ព្រោះលោកពូទីន បានឈ្នះការធ្វើប្រជានិយមឱ្យកែច្បាប់ ដោយកែសម្រួលឱ្យលោកពូទីន នៅធ្វើជាមេដឹកនាំប្រទេសរុស្ស៊ីបាន 2អាណត្តិទៀត រហូតដល់អាយុ 83ឆ្នាំ។

នឹងនៅបានឬអត់? វាអាស្រ័យលើលទ្ធផលការបោះឆ្នោតជ្រើសតាំងក្នុង 2អាណត្តិដែលកន្លងមក ហើយនឹងនៅបានឬអត់? អាស្រ័យលើគ្រូពេទ្យ ដែលនឹងត្រូវពិនិត្យរាងកាយលោកពូទីនថា នៅតែមាំមួនល្អ ព្រោះត្រូវឆ្លងកាត់ការបោះឆ្នោត បើប្រជាជនរុស្ស៊ី មិនជ្រើសយក ក៏មានន័យថា លោកពូទីន មានឱកាស តែធ្វើតទៅទៀតមិនបាន…។

តពីពេលនេះទៅ គឺ 16ឆ្នាំទៀត តើលោកត្រាំនឹងទៅជាអ្វី? ទៅនៅទីណាបាត់ហើយក៏មិនដឹង? បើនៅរស់ ក៏ស្ថិតក្នុងវ័យជាង 90ឆ្នាំ និងនៅក្នុងគុក ឬក្រៅគុក? ក៏នៅតែជាប្រធានបទឱ្យយើងសន្និដ្ឋានទៅ ព្រោះធ្លាប់ទៅលូកលាន់ពាក់ព័ន្ធនឹងកិច្ចការ ដែលត្រូវបានគេមើលឃើញថា មានផលប្រយោជន៍ ដែលមានទាំងដោយផ្ទាល់ និងមិនស្មុគស្មាញទៀតផង។

ហើយអ្នកជំនាញខាងវិភាគ លោក ខាល ប៊ើនស្ទីន មើលឃើញថា លោកត្រាំនៅស្ទើរភ្លើងណាស់ ពេលចរចានយោបាយជាមួយរុស្ស៊ី ដោយលោកពូទីនបានប្រើក្បាច់ជន្លផង មែនផងក្នុងការជជែកតវ៉ា ធ្វើឱ្យលោកត្រាំទៅលែងរួច ព្រោះខ្លួនឯងគិតតែពីនិយាយអួតអាងថា ជាមេដឹកនាំប្រទេសដែលមានសមត្ថភាព អច្ឆរិយៈ ស្ថិតស្ថេរ…ហើយប្រធានាធិបតីមុនៗ សុទ្ធតែប្រើការមិនកើតទាំងអស់!។

អ៊ីចឹងសួរថា បើលោកពូទីន នៅតទៅទៀតបានយូរ ឯលោកត្រាំ នៅបានតែ 1អាណត្តិ តើសហរដ្ឋអាមេរិក នឹងទៅជាយ៉ាងណា?

រឹតបើប្រៀបធៀបជាមួយលោកប្រធានាធិបតីនៃប្រទេសចិន ស៊ី ជីនភីង ដែលនឹងនៅបានយូរទៅទៀត ឬរហូតដល់ស្លាប់ផងនោះ រឹតតែធ្វើឱ្យលោកត្រាំមិនអាចប្រៀបធៀបបានទៅទៀត ហើយម្យ៉ាងទៀតមេដឹកនាំចិន និងរុស្ស៊ី មានសម្ព័ន្ធភាពដ៏ល្អនឹងគ្នាទៀតផង។ វាជាភាពខុសគ្នាយ៉ាងខ្លាំងផ្នែកប្រព័ន្ធនយោបាយ ទោះជាប្រទេសមហាអំណាចដូចគ្នាក៏ដោយ…។

ស្ថានភាពរបស់លោកត្រាំ មើលទៅទន់ជ្រាយ នៅពេលសហរដ្ឋអាមេរិក ក្លាយជាប្រភពធំរបស់ការឆ្លងរាលដាលមេរោគកូវីដ-19 ដែលធ្វើឱ្យជនអាមេរិកាំងឆ្លងមេរោគដល់ទៅជិត 3លាននាក់ និងស្លាប់ជិត 1.4សែននាក់ និងពេលនេះកំពុងឆ្លងយ៉ាងធ្ងន់ធ្ងរ ស្ទើរតែរកមើលវិធីទប់ស្កាត់មិនបានទៀតផង។ ទាំងអស់នេះ គឺលោកត្រាំមានចំណែកធ្វើឱ្យក្លាយទៅជាដូច្នោះ។

ការបណ្ដែតបណ្ដោយ ធ្វើព្រងើយចំពោះការណែនាំរបស់អ្នកជំនាញការ ភាពបែកបាក់ខាងគំនិតនយោបាយ ធ្វើឱ្យខ្វះភាពជាធ្លុងមួយផ្នែកនយោបាយ និងវិធានការការពារព្យាបាល ហើយថែមទាំងនៅមានវិបត្តិផ្នែករើសអើងជាតិសាសន៍ពណ៌សម្បុរ ជាបញ្ហាដែលលោកត្រាំធ្វើឱ្យរីកធំ និងសាងភាពបែកបាក់ក្នុងសង្គមទៀតផង។

និយាយប្រាស្រ័យរកសំឡេងឆ្នោត ក៏គិតតែសង្កត់ធ្ងន់លើការសាងភាពរ៉ៅឆាន ក្នុងក្រុមជនអាមេរិកាំង…។

លោកត្រាំ មើលទៅរាងឆ្លេឆ្លា មិនដឹងថា ត្រូវយកពីណា ទៅតនៅត្រង់ណា នៅពេលដែលជនស្បែកខ្មៅ នាំគ្នាបំផ្លាញស្ដូបអនុស្សាវរីយ៍ជនល្បីឈ្មោះសំខាន់ៗក្នុងប្រវត្តិសាស្ត្រ។ ចាប់ផ្ដើមពីរូបសំណាកលោក គ្រីស្ដូហ្វើរ ខូឡាំបាស់ អ្នកប្រមាញ់អាណានិគម ដែលរកឃើញប្រទេសអាមេរិក និងជាអតីតប្រធានាធិបតីសហរដ្ឋអាមេរិក ដែលមានឥរិយាបថក្នុងការធ្វើជំនួញទាសករ សាងសង្គ្រាមក្នុងស្រុក ធ្វើឱ្យរឿងរ៉ាវកាន់តែធំទៅ។

លោកត្រាំក៏គិតតែពីឆ្លៀតឱកាសវាយសំពងបន្ថែម សាងអារម្មណ៍បែកបាក់កាន់តែខ្លាំងចូលទៅទៀត។ ប្រជាជនអាមេរិកាំងមួយចំនួន មើលឃើញថា លោកត្រាំ នឹងធ្វើឱ្យប្រទេសមានបញ្ហារយៈពេលយូរ និងជាមេដឹកនាំដែលមានគ្រោះថ្នាក់ចំពោះសន្តិសុខជាតិ ដូចដែលអ្នកវិភាគ និងអ្នកធ្លាប់រួមការងារជាមួយលោកត្រាំកាលពីមុន ធ្លាប់បាននិយាយទុកពីមុនមកហើយ។

ក្នុងសភាវបែបនេះ សហរដ្ឋអាមេរិកកំពុងត្រូវក្រុមសម្ព័ន្ធមិត្តក្នុងអឺរ៉ុប មិនចង់ជិតស្និទ្ធជាមួយឡើយ ព្រោះវាមិនកើតប្រយោជន៍អ្វី ទើបពួកគេបែរទៅសេពគប់ជាមួយរុស្ស៊ី និងចិន ដែលមានផលល្អប្រសើរជាង ខាងផ្នែកពាណិជ្ជកម្ម នយោបាយ…លោកត្រាំ មិនអាចបន្ទោសនរណាបានទេ ក្រៅពីខ្លួនឯង ព្រោះធ្លាប់ទៅមើលងាយប្រជាជនអឺរ៉ុប តាំងពីពេលខ្លួនឯងឡើងធ្វើជាអ្នកដឹកនាំ។

ខែវិច្ឆិកា ជាវារៈសំខាន់ ដែលជនអាមេរិកាំង នឹងធ្វើការសម្រេចចិត្តថា តើនឹងជ្រើសយកលោកត្រាំ ធ្វើជាមេដឹកនាំ 1អាណត្តិទៀត ឬយ៉ាងណា? និងតើ ជនមហាកំពូលអហង្ការរូបនេះ នៅមានវិធីណាស្ដារភាពធ្លាក់ចុះ ដើម្បីយកឈ្នះចិត្តជនអាមេរិកាំងបានទេ?

ប្រភព៖ សាព័ត៌មានបរទេស
ប្រែសម្រួលដោយ តាវ៉ែនតា

July 7, 2020

អាជ្ញាធរក្រុងហុងកុង បញ្ជាឱ្យដកហូតសៀវភៅល្មើសច្បាប់សន្តិសុខថ្មី ចេញពីប្រព័ន្ធការសិក្សា

រដ្ឋបាលហុងកុង កាលពីថ្ងៃចន្ទ ទី6 កក្កដា បានចេញបញ្ជាឱ្យស្ថាប័នអប់រំសិក្សាធិការនានា ពិចារណាឡើងវិញ និងដកហូតនូវសៀវភៅណាក៏ដោយ ដែលអាចល្មើសនឹងច្បាប់សន្តិសុខថ្មី ដែលខាងក្រុងប៉េកាំង បានកំណត់ឱ្យប្រើនៅលើកោះមួយនេះ កាលពីសប្ដាហ៍កន្លងទៅ។

នាយកដ្ឋានការអប់រំសិក្សា បានថ្លែងថា “ដើម្បីឱ្យស៊ីចង្វាក់គ្នានឹងចំណុច 4ប្រការរបស់ការប្រព្រឹត្តកំហុសដែលច្បាប់បានកំណត់ទុកយ៉ាងច្បាស់នោះ គណៈគ្រប់គ្រងសាលា និងគ្រូបង្រៀន គួរពិចារណាឡើងវិញអំពីសារៈខ្លឹមសារការរៀន ការបង្រៀនផ្សេងៗ ក្នុងវិធីសាស្ត្រដែលស័ក្តិសម ក្នុងនោះរួមទាំងសៀវភៅមេរៀនទាំងឡាយផងដែរ”។

នាយកដ្ឋានខាងលើ បានបន្តទៀតថា “បើរកឃើញថា សៀវភៅមេរៀនទាំងនោះ មានសារៈខ្លឹមសារដែលហួសសម័យ ឬមានសារៈខ្លឹមសារដែលអាចបង្កភាពព្រួយកង្វល់ថា វាអាចជាប់ពាក់ព័ន្ធនឹងចំណុច 4ប្រការនៃការប្រព្រឹត្តខុសខាងលើ ពួកគេក៏គួរតែដកហូតសៀវភៅទាំងនោះ”។

កាលពីសប្ដាហ៍កន្លងទៅ ចិនបានចេញបទបញ្ជាដាក់ឱ្យប្រើប្រាស់ច្បាប់សន្តិសុខថ្មី ដើម្បីលើកកម្ពស់ការគ្រប់គ្រងកោះហុងកុង ដោយបានកំណត់ឱ្យអំពើឧក្រិដ្ឋកម្មផ្នែកសន្តិសុខជាតិ 4ប្រភេទ ជារឿងខុសច្បាប់ ដែលមានដូចជា ការផ្ដួលរំលំរបបគ្រប់គ្រង ការបែងចែកទឹកដី ការបង្កភេរវកម្ម និងការឃុបឃិតជាមួយកងកម្លាំងបរទេស ថាជារឿងខុសច្បាប់ ក្រោមច្បាប់សន្តិសុខថ្មីច្បាប់នោះ។

ក្រុមសកម្មជនសិទ្ធិមនុស្សទាំងឡាយ និងបណ្ដាអ្នកវិភាគខាងច្បាប់ បានព្រមានថា ពាក្យពេចន៍ដែលមានន័យធំទូលាយខ្លាំងពេករបស់ច្បាប់មួយនេះ ដែលត្រូវបានបិទបាំងជាការសម្ងាត់ រហូតទាល់តែទទួលបានការអនុម័តនោះ នឹងបង្កផលប៉ះពាល់ដ៏គួរឱ្យភ័យខ្លាច ដល់សេរីភាពខាងនយោបាយនៅក្នុងតំបន់គ្រប់គ្រងពិសេសមួយនេះ។

បទបញ្ជាឱ្យស្ថាប័នការសិក្សានានាពិចារណាឡើងវិញ និងដកហូតសៀវភៅដែលមានអត្ថន័យខុសនឹងច្បាប់នេះ បានកើតឡើង 2ថ្ងៃ បន្ទាប់ពីសៀវភៅរបស់ក្រុមអ្នកគាំទ្រប្រជាធិបតេយ្យនៅក្នុងក្រុងហុងកុង ចាប់ផ្ដើមត្រូវបានគេដកចេញពីបណ្ណាល័យសាធារណៈ និងប្រព័ន្ធស្វែងរកតាមអនឡាញ ក្នុងអំឡុងពេលកំពុងពិចារណាឡើងវិញថា តើសៀវភៅទាំងនោះ ល្មើសនឹងច្បាប់ផ្នែកសន្តិសុខថ្មីនេះ ឬក៏អត់?។

សៀវភៅមួយ ក្នុងចំណោមសៀវភៅដែលត្រូវបានដកចេញពីបណ្ណាល័យនោះគឺ សៀវភៅរបស់លោក ចូសួ វ៉ង់ សកម្មជនដ៏ល្បីល្បាញ រួមទាំងសៀវភៅរបស់អ្នកស្រី ថាន់យ៉ា ឆាន មេធាវីប្រកាន់លិទ្ធិប្រជាធិបតេយ្យ និងជាច្រើនក្បាលទៀតដែលសរសេរដោយលោក ឈិន វ៉ាន អ្នកជំនាញការល្បីឈ្មោះ ដែលត្រូវបានគេមើលឃើញថា ជាព្រះបរមគ្រូ របស់ក្រុមសកម្មជនក្នុងតំបន់ ដែលទាមទារសិទ្ធិក្នុងការកំណត់វាសនាអនាគតខ្លួនឯងនៅក្នុងក្រុងហុងកុង៕

ប្រភព៖ សារព័ត៌មានបរទេស

July 7, 2020

ស្ថានភាពCOVID-19នៅសហរដ្ឋអាមេរិកនិងប្រទេសមួយចំនួនពិតជាធ្ងន់ធ្ងរណាស់ ខណៈពិភពលោកទាំងមូលមានជាង11.7លាននាក់បានឆ្លងវីរុស

ពិភពលោកទាំងមូល បានរកឃើញអ្នកផ្ទុកវីរុសCOVID-19 សរុបចំនួន11,710,170នាក់ និងអ្នកស្លាប់សរុបចំនួន539,720នាក់ ក្នុងនោះមានអ្នកជំងឺថ្មីចំនួន172,717នាក់ និងអ្នកស្លាប់ថ្មីចំនួន3,396នាក់ ក្នុងពេលដែលស្ថានភាពវិបត្តិសុខភាពនៅសហរដ្ឋអាមេរិកនិងប្រទេសមួយចំនួន កាន់តែធ្ងន់ធ្ងរឡើងៗ។

យោងតាមតួលេខរបស់ Worldometers ក្នុងរយៈពេល24ម៉ោងចុងក្រោយនេះ សហរដ្ឋអាមេរិកបានរកឃើញអ្នកផ្ទុកវីរុសCOVID-19 ចំនួន41,500នាក់ ដែលនេះបាននាំឱ្យតួលេខអ្នកជំងឺសរុបកើនឡើងដល់ជាង3លាននាក់ ខណៈដែលអ្នកស្លាប់សរុបក៏កើនដល់ជិត133,000នាក់។

Channel News Asia បានរាយការណ៍ថា នៅក្នុងកិច្ចសម្ភាសកាលពីថ្ងៃទី6កក្កដាកន្លងទៅជាមួយបណ្ឌិត Anthony Fauci ដែលជាអ្នកជំនាញផ្នែករោគឆ្លងនៅសហរដ្ឋអាមេរិក និងជាសមាជិកនៃគណៈកម្មធិការប្រយុទ្ធប្រឆាំងនឹងCOVID-19 របស់រដ្ឋាភិបាលអាមេរិក បានព្រមានថា មហារោគរាតត្បាតនៅសហរដ្ឋអាមេរិក “ពិតជាធ្ងន់ធ្ងរណាស់” និង “ត្រូវការដោះស្រាយជាបន្ទាន់”។

ចំនួនអ្នកឆ្លងវីរុស មាននិន្នការកើនឡើងយ៉ាងឆាប់រហ័សនៅក្នុងរដ្ឋជាច្រើននាពេលថ្មីៗនេះ នៅពេលដែលតំបន់មួយចំនួនបានចាប់ផ្ដើមដំណើរការសេដ្ឋកិច្ចឡើងវិញ។ ចំណែកពលរដ្ឋអាមេរិកាំងនៅតែបន្តនាំគ្នាទៅកាន់ឆ្នេរសមុទ្រក្នុងពេលអាកាសធាតុក្ដៅ ដោយមិនយកចិត្តទុកដាក់ដល់ការព្រមានពីក្រុមអ្នកជំនាញផ្នែកសុខាភិបាល។

ពលរដ្ឋអាមេរិកាំងហាក់មិនបានចាប់អារម្មណ៍ចំពោះការព្រមានពីក្រុមអ្នកជំនាញផ្នែកសុខាភិបាល នៅពេលពួកគេហ៊ាននាំគ្នាទៅកាន់ឆ្នេរសមុទ្រ

លោក Rochelle Walensky ប្រធានផ្នែករោគឆ្លងនៅមន្ទីរពេទ្យ Massachusetts ថ្លែងថា “មហារោគរាតត្បាតនេះ មិនទាន់ថមថយកម្លាំងនៅឡើយ។

រីឯលោក Peter Hotez ប្រធានផ្នែកម្នាក់នៅសាកលវិទ្យាល័យវេជ្ជសាស្ត្រ Baylor នៅទីក្រុង Bouston ក៏បានសង្កត់ធ្ងន់ថា “យើងមានកំណត់ត្រាថ្មី (ស្ដីអំពីចំនួនអ្នកឆ្លងCOVID-19) ស្ទើរតែរាល់ថ្ងៃនៅក្នុងរដ្ឋ Texas។ ស្ថានភាពនេះកំពុងកើតឡើងនៅក្នុងរដ្ឋផ្សេងៗផងដែរនៃប្រទេសនេះផងដែរ។

ការព្រមានខាងលើ រួមនឹងការព្រមានជាច្រើនផ្សេងទៀត គឺផ្ទុយទាំងស្រុងទៅនឹងការអះអាងប្រកបដោយទំនុកចិត្តជ្រុលហួសរបស់ប្រធានាធិបតី Donald Drump និងក្រុមមន្ត្រីរបស់លោក។ កាលពីសប្ដាហ៍មុន ប្រធានាធិបតីសហរដ្ឋអាមេរិកថ្លែងថា “យុទ្ធសាស្ត្រទប់ទល់នឹង COVID-19 របស់សហរដ្ឋអាមេរិក កំពុងដើរលើផ្លូវត្រូវ”។

ម្ចាស់សេតវិមាននេះអះអាងថា “យើងបានធ្វើតេស្តជិត40លាននាក់។ តាមរយៈនេះ បានបង្ហាញថា 99% នៃអ្នកជំងឺ គឺមិនមានគ្រោះថ្នាក់ទេ។ ពុំមានប្រទេសណាមួយដែលមានលទ្ធផលបែបនេះឡើយ ព្រោះពួកគេមិនអាចធ្វើតេស្តដូចយើង ទាំងបរិមាណ និងគុណភាព”។

ស្ថានភាព COVID-19 នៅឥណ្ឌាក៏មានសភាពធ្ងន់ធ្ងរជាងមុន

ក្រៅពីសហរដ្ឋអាមេរិក ក៏មានប្រទេសជាច្រើនកំពុងជួបនឹងបញ្ហាកើនឡើងជាលើកទីពីរនៃតួលេខអ្នកជំងឺCOVID-19នេះដែរ។ ប្រទេសប្រេស៊ីលគឺជាសម្បុកមេរោគធំជាងគេទីពីរក្នុងពិភពលោក ដោយមានអ្នកជំងឺសរុប1,623,284នាក់ និងអ្នកស្លាប់ចំនួន65,487នាក់ ក្នុងនោះមានអ្នកជំងឺថ្មី18,669នាក់ និងអ្នកស្លាប់ថ្មីចំនួន587នាក់។ ចំណែកឥណ្ឌាដែលទើបតែបានក្លាយជាសម្បុកមេរោគCOVID-19ធំជាងគេលំដាប់ទី3ក្នុងពិភពលោក បានរកឃើញអ្នកជំងឺសរុបចំនួន720,346នាក់ និងអ្នកស្លាប់សរុបចំនួន20,174នាក់៕

ប្រភព៖ សារព័ត៌មានបរទេស

July 7, 2020

ហោះកាត់រណ្ដៅទឹកកកសក្បុស ទំហំ82គីឡូម៉ែត្រនៅលើផ្កាយព្រះអង្គារ (វីដេអូ)

អង្គការអវកាសអឺរ៉ុប (ESA) បានចែករំលែកវីដេអូប្រឌិតមួយដែលបង្ហាញអំពីការហោះហើររុករកពីខាងលើរណ្ដៅ Korolev ដ៏ធំ ដែលមានទឹកកកគ្របដណ្ដប់ពេញមួយឆ្នាំ។

ក្រុមអ្នកវិទ្យាសាស្ត្របានប្រើប្រាស់រូបភាពទាំងឡាយដែលបានមកពីកាមេរ៉ា HRSC នៅលើយានអវកាស Mars Express Orbiter របស់ ESA បូករួមជាមួយនឹងទិន្នន័យដែលប្រមូលបានកន្លងមក បង្កើតបានជាទិដ្ឋភាព 3D របស់រណ្ដៅ Korolev ដ៏ស្រស់ស្អាត គួរជាទីគយគន់។ នេះបើតាមទំព័រ IFL Science ដែលបានចេញផ្សាយកាលពីថ្ងៃទ3កក្កដាកន្លងទៅ។ ក្នុងវីដេអូនេះ រណ្ដៅ Korolev មានភាពលេចធ្លោនៅលើផ្ទៃរបស់ពិភពព្រះអង្គារ ដោយសារតែវាមានពណ៌សក្បុស។

រណ្ដៅ Korolev ដែលស្ថិតនៅក្នុងតំបន់ភាគខាងត្បូងនៃប៉ូលខាងជើងរបស់ពិភពព្រះអង្គារនេះ មានទំហំ82គីឡូម៉ែត្រ និងត្រូវបានគ្របដណ្ដប់ដោយស្រទាប់ទឹកកកដែលមានកម្រាស់1.8គីឡូម៉ែត្រពេញមួយឆ្នាំ។ មូលហេតុដែលនាំឱ្យរណ្ដៅនេះមានសភាពបែបនេះ គឺដោយសារបរិយាកាសនៅផ្នែកខាងលើនៃស្រទាប់ទឹកកកមានសីតុណ្ហភាពទាប ព្រោះតែបរិយាកាសរបស់ពិភពអង្គារមានសមត្ថភាពទាបក្នុងការចម្លងកម្ដៅពីបរិយាកាសផ្នែកខាងលើ ទៅបរិយាកាសខាងក្រោម ដូច្នេះ ស្រទាប់ទឹកកកមិនអាចរលាយបាន។

រណ្ដៅនេះត្រូវបានដាក់ឈ្មោះទៅតាម Sergei Pavlovich Korolev ដែលជាបុគ្គលដែលល្បីឈ្មោះថាជា “ម្ដាយបង្កើត” នៃបច្ចេកវិទ្យាអវកាសរបស់ប្រទេសរុស្ស៊ី។ លោក Sergei Pavlovich Korolev មានការរួមចំណែកយ៉ាងធំធេងទៅក្នុងដំណើរការអភិវឌ្ឍកាំជ្រួចរុញច្រាន R-7 ដែលជាជំនាន់ដើមរបស់កាំជ្រួច Soyuz រួមនឹងការហោះហើរជាលើកដំបូងរបស់មនុស្សទៅក្នុងអវកាសដែលត្រូវបានធ្វើឡើងដោយអវកាសចរ Yuri Gagarin កាលពីឆ្នាំ1961។

យានអវកាស Mars Express Orbiter ត្រូវបានបាញ់បង្ហោះចេញពីអាកាសយានដ្ឋាន Baikonur ប្រទេសកាហ្សាក់ស្ថាន កាលពីខែមិថុនា ឆ្នាំ2003 និងបានចំណាយពេល6ខែដើម្បីហោះទៅដល់ពិភពព្រះអង្គារ។

ក្នុងរយៈពេលជិត2ទសវត្សរ៍នៃការបំពេញបេសកកម្ម យាននេះបានបញ្ចូនទិន្នន័យសំខាន់ៗជាច្រើនមកកាន់ផែនដី ក្នុងនោះក៏មានការរកឃើញបឹងដែលមានទឹកមួយកន្លែងនៅប៉ូលខាងត្បូងនៃផ្កាយព្រះអង្គារផងដែរ៕

ប្រភព៖ IFL Science

July 6, 2020

យន្តហោះពីរគ្រឿងបុកគ្នាលើអាកាស ធ្លាក់ទៅក្នុងបឹង! មនុស្សយ៉ាងតិច8នាក់បានស្លាប់

មនុស្សយ៉ាងហោចណាស់8នាក់បានបាត់បង់ជីវិតនៅពេលយន្តហោះពីរគ្រឿងបានបុកគ្នានៅលើអាកាស និងធ្លាក់ចុះចូលទៅក្នុងបឹង Coeur d’Alene ក្នុងរដ្ឋ Idaho សហរដ្ឋអាមេរិក កាលពីវេលាម៉ោងប្រហែល14និង20នាទី នាថ្ងៃទី5កក្កដាកន្លងទៅ។

លោក Ryan Higgins អ្នកនាំពាក្យអធិការដ្ឋាននគរបាលតំបន់ Kootenai បានឱ្យដឹងថា ករណីគ្រោះថ្នាក់ចរាចរណ៍ផ្លូវអាកាសនេះបានកើតឡើងនៅលើអាកាសនៃបឹង Coeur d’Alene។ ប៉ុន្តែ បច្ចុប្បន្នសមត្ថកិច្ចនៅមិនទាន់រកឃើញមូលហេតុ ក៏ដូចជាចំនួនមនុស្សដែលបានជិះនៅលើយន្តហោះដែលជួបគ្រោះថ្នាក់នេះនៅឡើយ។ “នៅពេលនេះ យើងជឿថាមិនមានអ្នកណាម្នាក់នៅមានជីវិតឡើយ” នេះបើតាមលោក Ryan Higgins។

ជនរងគ្រោះពីរនាក់ត្រូវបាននាំចេញពីយន្តហោះ នៅមុនពេលមធ្យោបាយនេះលិចទៅក្នុងទឹកបឹង។ ចំណែកជនរងគ្រោះចំនួន6នាក់ផ្សេងទៀតដែលត្រូវបានគេជឿថា បានបាត់បង់ជីវិតនោះ រួមមានកុមារចំនួនពីរនាក់ផងដែរ។ ក្រៅពីនេះ មិនទាន់មានព័ត៌មានលម្អិតនៅឡើយ។

លោក Higgins ថ្លែងថា សាកសពយន្តហោះកំពុងស្ថិតក្រោមទឹកបឹងជម្រៅជាង38ម៉ែត្រ ហើយគេត្រូវរង់ចាំដល់ថ្ងៃទី6 ឬ7កក្កដា ទើបអាចស្រង់ឡើងបានទាំងស្រុង។ សាក្សីមួយចំនួនបានឃើញ ឬឮសំឡេងផ្ទុះនៃការបុកគ្នារបស់យន្តហោះ នៅពេលពួកគេកំពុងចែវទូកលេងនៅលើបឹង Coeur d’Alene កាលពីចុងសប្ដាហ៍ ខណៈមានថ្ងៃឈប់សម្រាក់ក្នុងឱកាសបុណ្យឯករាជ្យជាតិនៃសហរដ្ឋអាមេរិក នាថ្ងៃទី4កក្កដា។

អ្នកនាំពាក្យរបស់អង្គភាពគ្រប់គ្រងអាកាសចរណ៍សហរដ្ឋអាមេរិក (FAA) Ian Gregor បានឱ្យដឹងថា យន្តហោះមួយគ្រឿងក្នុងចំណោមយន្តហោះពីរគ្រឿងដែលបានជួបគ្រោះថ្នាក់នេះ គឺជាយន្តហោះ Cessna 206។ ចំណែកយន្តហោះមួយគ្រឿងទៀត មិនទាន់បានដឹងច្បាស់នៅឡើយ។ Gregor ថ្លែងថា FAA និងគណៈកម្មការសុវត្ថិភាពចរាចរណ៍អាមេរិកាំងកំពុងតែធ្វើការស៊ើបអង្កេតលើករណីនេះ៕

ប្រភព៖ CNN/NYTimes

July 6, 2020

Category: អន្តរជាតិ