អន្តរជាតិ - La Reine Media

អាស៊ីអាគ្នេយ៍បានរកឃើញអ្នកផ្ទុកCOVID-19 ជាង1សែននាក់ ក្នុងនោះមាន4ប្រទេសមិនទាន់មានអ្នកស្លាប់ដោយសារវីរុសនេះនៅឡើយ

ពិភពលោកទាំងមូល បានរកឃើញអ្នកផ្ទុកវីរុសCOVID-19 សរុបចំនួន 13,036,587នាក់ ក្នុងនោះមានអ្នកស្លាប់សរុប571,574នាក់ ខណៈអាស៊ីអាគ្នេយ៍បានរកឃើញអ្នកជំងឺសរុប106,480នាក់។

នៅតំបន់អាស៊ីអាគ្នេយ៍ ប្រទេសឥណ្ឌូនេស៊ីគឺជាសម្បុកវីរុសCOVID-19 ធំជាងគេបង្អស់ ដោយមានអ្នកឆ្លងវីរុសចំនួន75,699នាក់ និងអ្នកស្លាប់សរុបចំនួន3,606នាក់ ក្នុងនោះមានអ្នកជំងឺថ្មី1,681នាក់ និងអ្នកស្លាប់ថ្មីមានចំនួន71នាក់។ ក្នុងចំណោមអ្នកជំងឺសរុប ក៏មានអ្នកជំងឺជិត1,300នាក់ដែលមានជាប់ទាក់ទិននឹងសាលាយោធាឥណ្ឌូនេស៊ីផងដែរ។

Achmad Yurianto មន្ត្រីម្នាក់នៃក្រសួងសុខាភិបាលឥណ្ឌូនេស៊ី យល់ថា ការកើនឡើងយ៉ាងឆាប់រហ័សនៃករណីឆ្លងវីរុសCOVID-19 គឺដោយសារប្រជាជនមានការធ្វេសប្រហែសនៅពេលប្រទេសនេះបានបើកច្រកព្រំដែន និងបន្ធូរបន្ថយការរឹតត្បិតលើការដើរហើរ។

ហ្វីលីពីនគឺជាសម្បុកវីរុសCOVID-19 ធំជាងគេលំដាប់ទី2នៅអាស៊ីអាគ្នេយ៍ ដោយមានអ្នកជំងឺសរុប56,259នាក់ និងអ្នកស្លាប់សរុបចំនួន1,372នាក់។

សិង្ហបុរី ដែលជាសម្បុកមេរោគធំជាងគេទី3ក្នុងតំបន់ បានរកឃើញអ្នកផ្ទុកវីរុសសរុបចំនួន45,961នាក់ គឺកើន178នាក់បើធៀបនឹងម្សិលមិញ ក្នុងនោះមានអ្នកស្លាប់ចំនួន26នាក់។

ប្រទេសថៃ មានអ្នកជំងឺសរុប3,217នាក់ ក្នុងនោះមានអ្នកស្លាប់សរុប58នាក់ ខណៈប្រទេសវៀតណាមមានអ្នកជំងឺសរុប372នាក់ ប្រទេសមីយ៉ានម៉ាមានអ្នកជំងឺ331 (ស្លាប់6នាក់) ប្រទេសកម្ពុជាមាន156នាក់ ប្រទេសប៊្រុយណេមានអ្នកជំងឺ141នាក់ (ស្លាប់3នាក់) ប្រទេសទីម័រខាងកើតមានចំនួន24នាក់ និងប្រទេសឡាវមាន19នាក់។

ប្រទេសកម្ពុជា ឡាវ វៀតណាម និងទីម័រខាងកើត គឺជាបណ្ដាប្រទេសនៅតំបន់អាស៊ីអាគ្នេយ៍ដែលមិនទាន់មានករណីស្លាប់ដោយសារវីរុសCOVID-19នេះនៅឡើយ។

ប្រធានអង្គការសុខភាពពិភពលោក (WHO) លោក Tedros Adhanom Ghebreyesus កាលពីចុងសប្ដាហ៍កន្លងទៅ បានអំពាវនាវឱ្យបណ្ដាប្រទេសដែលកំពុងទទួលរងផលប៉ះពាល់ធ្ងន់ធ្ងរពីCOVID-19 បន្តរក្សាវិធានការគ្រប់គ្រងយ៉ាងខ្លាំងក្លាដើម្បីទប់ស្កាត់វីរុសនេះ៕

ប្រភព៖ សារព័ត៌មានបរទេស

July 13, 2020

រថយន្តដឹកអ្នកដំណើរ38នាក់ ធ្លាក់ពីចង្កេះភ្នំ បណ្ដាលឱ្យមនុស្សយ៉ាងតិច6នាក់បានបាត់បង់ជីវិត

រថយន្តក្រុងពីរជាន់មួយគ្រឿងដែលមានដឹកអ្នកដំណើរ38នាក់ ធ្វើដំណើរពីភាគខាងជើងទៅកាន់ភាគខាងត្បូងនៃប្រទេសវៀតណាម បានធ្លាក់ចូលជ្រោះជម្រៅប្រហែល20ម៉ែត្រ បណ្ដាលឱ្យមនុស្សស្លាប់យ៉ាងតិច6នាក់ និងរងរបួសធ្ងន់ជាច្រើននាក់ផងដែរ។

នៅវេលាម៉ោងប្រហែល4ទៀបភ្លឺ ថ្ងៃទី11កក្កដានេះ រថយន្តដឹកអ្នកដំណើរប្រភេទ48កៅអីមួយគ្រឿង ធ្វើដំណើរពីតំបន់ភាគខាងជើង ទៅកាន់តំបន់ភាគខាងត្បូងប្រទេសវៀតណាម។ នៅពេលឆ្លងកាត់តំបន់ភ្នំក្នុងខេត្ត Kon Tum ស្រាប់តែរថយន្តនេះបានរអិលចេញពីផ្លូវ និងធ្លាក់ចូលទៅក្នុងជ្រោះដែលមានជម្រៅប្រហែល20ម៉ែត្រ ធ្វើឱ្យរថយន្តនោះបាក់ជាពីរកំណាត់។

អាជ្ញាធរខេត្ត Kon Tum បានឱ្យដឹងថា គិតដល់ម៉ោង9និង35នាទីព្រឹកនេះ មានជនរងគ្រោះចំនួន6នាក់ហើយដែលបានបាត់បង់ជីវិត និង28នាក់ផ្សេងទៀតរងរបួសធ្ងន់។ ក្នុងចំណោមជនរងគ្រោះ មាន26នាក់ត្រូវបានបញ្ជូនទៅកាន់មន្ទីរបង្អែក ចំណែក2នាក់ទៀតដែលមានរបួសធ្ងន់ ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យក្រុង Kon Tum។

កន្លែងកើតហេតុខាងលើនេះ គឺជាតំបន់ក្បែរព្រំដែនជាប់ជាមួយនឹងកម្ពុជា។ ក្រុមអ្នកជួយសង្គ្រោះកំពុងរំដោះជនរងគ្រោះដែលនៅជាប់ក្នុងរថយន្ត យ៉ាងញាប់ដៃញាប់ជើងបំផុត។

ប្រភពព័ត៌មានបានឱ្យដឹងថា ដំណឹងបឋមបានបញ្ជាក់ថា នៅលើរថយន្តខាងលើនេះ មានដឹកអ្នកដំណើរចំនួន38នាក់ ក្នុងនោះមានកុមារចំនួន6នាក់ផងដែរ។

ប្រជាជននៅក្បែរកន្លែងកើតហេតុបានឱ្យដឹងថា រថយន្តនេះប្រហែលជាដឹកអ្នកដំណើរពីខេត្ត Thanh Hoa មកកាន់ខេត្ត Kon Tum និងខេត្ត Gia Lai ដើម្បីរកស៊ី។

ឧបនាយករដ្ឋមន្ត្រីវៀតណាម លោក Truong Hoa Binh ដែលជាប្រធានគណកម្មសុវត្ថិភាពចរាចរណ៍ជាតិនៃប្រទេសនេះ បានស្នើឱ្យថ្នាក់ដឹកនាំខេត្ត Kon Tum និងអាជ្ញាធរពាក់ព័ន្ធ យកចិត្តទុកដាក់ខ្ពស់បំផុតលើបញ្ហានេះផងដែរ៕

ប្រភព៖ សារព័ត៌មានបរទេស

July 11, 2020

ជាង12.6លាននាក់បានឆ្លងCOVID-19! WHO បញ្ជូនក្រុមអ្នកជំនាញទៅកាន់ប្រទេសចិនដើម្បីស្រាវជ្រាវរកប្រភពវីរុស

ប្រទេសនិងដែនដីចំនួន221ក្នុងពិភពលោក បានរកឃើញអ្នកផ្ទុកវីរុសCOVID-19 ចំនួន12,614,315នាក់ និងអ្នកស្លាប់ដោយសារវីរុសនេះមានចំនួន561,987នាក់ ខណៈអ្នកជំងឺដែលបានជាសះស្បើយ មានចំនួន 7,319,888នាក់។

ទ្វីបអាមេរិករកឃើញអ្នកជំងឺសរុប6,645,257នាក់ ខណៈទ្វីបអាស៊ីរកឃើញ2,848,060នាក់ អឺរ៉ុបរកឃើញ2,546,899នាក់ និងអាហ្វ្រិករកឃើញ562,357នាក់។

អ្នកនាំពាក្យរបស់អង្គការសុខភាពពិភពលោក (WHO) លោកស្រី Margaret Harris កាលពីថ្ងៃទី10កក្កដា បានប្រកាសថា អ្នកជំនាញការរបស់ WHO ចំនួន2រូប ដែលរួមមានអ្នកជំនាញផ្នែកសុខភាពសត្វ និងជំងឺឆ្លង នឹងធ្វើការជាមួយក្រុមអ្នកវិទ្យាសាស្ត្រចិនដើម្បីកំណត់ទំហំនិងផែនការសម្រាប់ការស្រាវជ្រាវស្វែងរកប្រភពរបស់COVID-19។

លោកស្រី Harris ថ្លែងថា “មួយក្នុងចំណោមបញ្ហាដែលគ្រប់គ្នាចាប់អារម្មណ៍ និងជាមូលហេតុដែលយើងបញ្ជូនអ្នកជំនាញផ្នែកសុខភាពសត្វទៅកាន់ប្រទេសចិន នោះគឺការកំណត់ឱ្យដឹងច្បាប់ថា តើវីរុសនេះអាចឆ្លងពីសត្វមកមនុស្សដែរឬទេ ហើយតើវាមានប្រភពពីសត្វអ្វី”។

អ្នកនាំពាក្យរូបនេះបន្តថា “យើងដឹងហើយថា វាពិតជាដូចទៅនឹងប្រភេទវីរុសដែលរកឃើញនៅលើសត្វប្រចៀវខ្លាំងណាស់ ប៉ុន្តែ តើវាឆ្លងតាមរយៈភ្នាក់ងារចម្លងណាមួយ? នេះគឺជាសំណួរដែលយើងត្រូវផ្ដល់ចម្លើយ”។

ក្រុមមន្ត្រីរបស់ WHO ធ្លាប់យល់ថា វីរុសCOVID-19 អាចមានប្រភពចេញពីផ្សារលក់សត្វព្រៃមួយកន្លែងនៅក្នុងទីក្រុង Wuhan ខេត្ត Hubei ប្រទេសចិន។ ពួកគេយល់ថា វាឆ្លងពីសត្វប្រចៀវទៅកាន់ “ភ្នាក់ងារចម្លងកណ្ដាល” មួយ មុននឹងបានឆ្លងមកមនុស្ស។

ប្រធានាធិបតី និងរដ្ឋមន្ត្រីការបរទេសសហរដ្ឋអាមេរិក ធ្លាប់បានលើកឡើងអំពីសម្មតិកម្មមួយដែលថា COVID-19 មានប្រភពចេញពីបន្ទប់ពិសោធន៍មួយនៅក្នុងទីក្រុង Wuhan ជាកន្លែងដែលវីរុសនេះផ្ទុះឆ្លងរាលដាលមុនគេបង្អស់។ ប៉ុន្តែ ក្រុមមន្ត្រីអាមេរិកាំងមិនទាន់បានលើកឡើងអំពីភ័ស្តុតាងជាក់លាក់ណាមួយនៅឡើយ ខណៈដែលចិនបានប្រឆាំង និងទាត់ចោលការ “ចោទប្រកាន់” នេះ។

ប្រធានអង្គការ WHO លោក Tedros ធ្លាប់បានដឹកនាំប្រតិភូមួយក្រុមទៅកាន់ប្រទេសចិនកាលពីខែមករា។ លោក Tedros បានជួបពិភាក្សាជាមួយលោក Xi Jinping ដើម្បីស្វែងយល់បន្ថែមអំពីវិធីដែលទីក្រុងប៉េកាំងប្រើប្រាស់ក្នុងការទប់ទល់នឹងCOVID-19។

ក្រោយដំណើរទស្សនាកិច្ចរបស់លោក Tedros អ្នកវិទ្យាសាស្ត្រអន្តរជាតិមួយក្រុមផ្សេងទៀតក៏បានទៅកាន់ប្រទេសចិនកាលពីខែកុម្ភៈ ដើម្បីពិនិត្យមើលស្ថានភាព ក្នុងនោះក៏មានក្រុមអ្នកជំនាញមកពីអាល្លឺម៉ង់ ជប៉ុន កូរ៉េខាងត្បូង រុស្ស៊ី សឹង្ហបុរី សហរដ្ឋអាមេរិក និងនីហ្សេរីយ៉ាផងដែរ៕

ប្រភព៖ Reuters

July 11, 2020

អតីតប្រធានាធិបតីកូរ៉េខាងត្បូង ត្រូវបានកាត់ទោសដាក់ពន្ធនាគារ20ឆ្នាំ

អតីតប្រធានាធិបតីកូរ៉េខាងត្បូង លោកស្រី Park Geun-hye ទើបតែត្រូវបានកាត់ទោសដាក់ពន្ធនាគាររយៈពេល20ឆ្នាំ ដោយសារអំពើពុករលួយនិងប្រើអំណាចខុសច្បាប់។

តុលាការកំពូលរបស់កូរ៉េខាងត្បូង កាលពីម្សិលមិញ (10កក្កដា) បានសម្រេចកាត់បន្ថយទោសជាប់ពន្ធនាគារ30ឆ្នាំ មកនៅត្រឹម20ឆ្នាំ ចំពោះអតីតប្រធានាធិបតី Park Geun-hye។ សាលក្រមចុងក្រោយនេះ បានបញ្ចប់រឿងក្ដីដែលបានអូសបន្លាយជាច្រើនឆ្នាំរបស់លោកស្រី Park ដែលជាប្រធានាធិបតីភេទស្រីដំបូងគេរបស់ប្រទេសកូរ៉េខាងត្បូង។

ទោសជាប់ពន្ធនាគារ20ឆ្នាំរបស់លោកស្រី Park រួមមាន 15ឆ្នាំជាទោសទទួលសំណូក និង5ឆ្នាំជាទោសរំលោភអំណាច(ប្រើប្រាស់អំណាចខុសច្បាប់) រួមជាមួយនឹងទោសព្រហ្មទណ្ឌមួយចំនួនទៀត។ លោកស្រី Park អាយុ68 ក៏ត្រូវបង់ប្រាក់ពិន័យចំនួន18ពាន់លានវ៉ុន (ប្រហែល15លានដុល្លារ) និងត្រូវបានរឹបអូសទ្រព្យសម្បត្តិចំនួន3.5ពាន់លានវ៉ុនផងដែរ។

លោកស្រី Park ត្រូវបានទម្លាក់ពីតំណែងប្រធានាធិបតីកាលពីឆ្នាំ2017 និងត្រូវបានកាត់ទោសទាក់ទិននឹងការឃុបឃិតជាមួយមិត្តជិតស្និទ្ធម្នាក់ឈ្មោះ Choi Soon-sil នៅក្នុងករណីបង្ខំបណ្ដាក្រុមហ៊ុនធំៗដែលក្នុងនោះក៏មាន Samsung ផងដែរ ដើម្បីឱ្យឧបត្ថម្ភប្រាក់ចំនួន77.4ពាន់លានវ៉ុនទៅឱ្យអង្គការចំនួន2ដែលអ្នកស្រី Choi កាន់កាប់។

ក្រោយមក លោកស្រី Park ក៏ត្រូវបានប្ដឹងកាលពីឆ្នាំ2018 ទាក់ទងនឹងការទទួលសំណូក3.5ពាន់លានវ៉ុន ពីមេដឹកនាំ3រូបនៃអង្គភាពយកការណ៍សម្ងាត់កូរ៉េខាងត្បូង ចាប់ពីឆ្នាំ2013ដល់ឆ្នាំ2016។

នៅកូរ៉េខាងត្បូង ក្រៅពីលោកស្រី Park Geun-hye ក៏មានប្រធានាធិបតីមួយចំនួនផ្សេងទៀត ត្រូវជាប់ពន្ធនាគារក្រោយពីបានបញ្ចប់តំណែង។ នេះភាគច្រើនគឺជាលទ្ធផលនៃការស៊ើបអង្កេតដែលចាប់ផ្ដើមដោយបណ្ដាគូប្រជែងនយោបាយក្នុងប្រទេស។

អ្នកកាន់តំណែងជំនាន់មុនរបស់លោកស្រី Park គឺអតីតប្រធានាធិបតី Lee Myung-bak ក៏ត្រូវបានកាត់ទោសឱ្យជាប់ពន្ធនាគារ17ឆ្នាំ ចាប់ពីថ្ងៃទី19កុម្ភៈ ក្រោមបទចោទប្រកាន់ថាបានកេងបន្លំថវិកាជាតិ និងស៊ីសំណូក។ លោក Lee Myung-bak ត្រូវបានកាត់ទោសពីបទបង្កើត “មូលនិធីខ្មៅ” តម្លៃរាប់សិបលានដុល្លារ និងទទួលសំណូកពីក្រុមហ៊ុន Samsung Electronics ជាថ្នូរនឹងការលើកលែងការចោទប្រកាន់ចំពោះលោក Lee Kun-hee ដែលជាប្រធានក្រុមហ៊ុននេះ។ លោក Lee Kun-hee ក៏ត្រូវជាប់ពន្ធនាគារផងដែរ ដោយសារទោសគេចពន្ធ។

អតីតមេដឹកនាំមួយរូបផ្សេងទៀតរបស់កូរ៉េខាងត្បូង នោះគឺលោក Roh Moo-hyun ក៏បានធ្វើអត្តឃាត ក្រោយពីត្រូវបានសួរចម្លើយនៅក្នុងការស៊ើបអង្កេតមួយលើបញ្ហាពុករលួយដែលជាប់ទាក់ទិននឹងគ្រួសាររបស់លោក៕

ប្រភព៖ Yonhap

July 11, 2020

សហរដ្ឋអាមេរិកយល់ព្រមលក់អាវុធទំនើបដែលមានតម្លៃជាង600លានដុល្លារទៅឱ្យតៃវ៉ាន់

សហរដ្ឋអាមេរិកបានអនុម័តយល់ព្រមក្នុងការចុះហត្ថលេខាលើកិច្ចព្រមព្រៀងមួយដែលមានតម្លៃ620លានដុល្លារដើម្បីបន្ទាន់សម័យទៅលើប្រភេទមីស៊ីលការពារដែនអាកាសសម្រាប់កោះតៃវ៉ាន់។

សារព័ត៌មាន Reuters ដកស្រង់សេចក្ដីប្រកាសរបស់ក្រសួងការបរទេសសហរដ្ឋអាមេរិក កាលពីថ្ងៃទី9កក្កដាកន្លងទៅនេះ បានឱ្យដឹងថា កោះតៃវ៉ាន់បានស្នើទិញគ្រឿងបន្លាស់របស់សហរដ្ឋអាមេរិកដើម្បីបន្ទាន់សម័យមីស៊ីលការពារដែនអាកាស Patriot របស់ខ្លួន ក្នុងបំណង “ជួយដល់សកម្មភាពការពារជាតិក្នុងរយៈពេល30ឆ្នាំទៅមុខ”។

ក្រុមហ៊ុនបច្ចេកវិទ្យាការពារជាតិ Lockheed Martin (សហរដ្ឋអាមេរិក) នឹងក្លាយជាអ្នកម៉ៅការសំខាន់បំផុតនៅក្នុងកិច្ចព្រមព្រៀងដែលមានតម្លៃជាទឹកប្រាក់ 620លានដុល្លារនេះ។ សេចក្ដីប្រកាសរបស់ក្រសួងការបរទេសសហរដ្ឋអាមេរិកបានបន្ថែមដូច្នេះ។

សេចក្ដីប្រកាសបន្តថា “កិច្ចព្រមព្រៀងទិញដូចសព្វាវុធនេះគឺដើម្បីផលប្រយោជន៍ផ្នែកសន្តិសុខ និងសេដ្ឋកិច្ចជាតិរបស់សហរដ្ឋអាមេរិក និងដើម្បីបន្តការគាំទ្រដល់ការរក្សាសមត្ថភាពការពារខ្លួនរបស់តៃវ៉ាន់។ ភាគីដែលទទួលបានការផ្គត់ផ្គង់នេះនឹងប្រើប្រាស់សមត្ថភាពនេះដើម្បីទប់ស្កាត់ការគំរាមកំហែងនានានៅក្នុងតំបន់ និងដើម្បីកែលម្អសមត្ថភាពការពារខ្លួន”។

ចំណែកភាគីខាងតៃវ៉ាន់វិញ ស្ថាប័នការពារជាតិរបស់កោះនេះបាននិយាយថា ពួកគេសង្ឃឹមថា កិច្ចព្រមព្រៀងទិញដូរនេះនឹងចាប់ផ្ដើមមានសុពលភាពក្នុងអំឡុងខែសីហាខាងមុខ។ នេះគឺជាកិច្ចព្រមព្រៀងទិញដូរសព្វាវុធលើកទី7 រវាងកោះតៃវ៉ាន់ជាមួយនឹងសហរដ្ឋអាមេរិក រាប់ចាប់ពីលោក Trump បានចូលកាន់តំណែងជាប្រធានាធិបតីកាលពីដើមឆ្នាំ2017។

សូមបញ្ជាក់ថា សហរដ្ឋអាមេរិកនិងបណ្ដាប្រទេសភាគច្រើនក្នុងពិភពលោក មិនមានទំនាក់ទំនងការទូតជាផ្លវការជាមួយកោះតៃវ៉ាន់នោះទេ។ ប៉ុន្តែ ទីក្រុងវ៉ាស៊ីងតោននៅតែលក់អាវុធឱ្យតៃវ៉ាន់ ដោយមិនអើពើដល់ការប្រឆាំងតវ៉ាពីទីក្រុងប៉េកាំង។ កោះតៃវ៉ាន់ត្រូវបានគេមើលឃើញថា កំពុងតែបង្កើនសមត្ថភាពការពារខ្លួននៅចំពោះមុខការគំរាមកំហែងកាន់តែខ្លាំងឡើងពីទីក្រុងប៉េកាំង។ ប្រទេសចិន តែងតែចាត់ទុកកោះតៃវ៉ាន់ជាផ្នែកមួយនៃទឹកដីរបស់ខ្លួន និងត្រៀមខ្លួនរួចជាស្រេចដើម្បីបង្រួបបង្រួមទឹកដី បើទោះជាត្រូវប្រើកម្លាំងបាយក៏ដោយ។

នៅពេលដែលកងទ័ពតៃវ៉ាន់ ត្រូវបានហ្វឹកហាត់យ៉ាងខ្លាំងក្លា និងទទួលបានការបំពាក់សព្វាវុធទំនើបៗ ពិសេសពីសហរដ្ឋអាមេរិក ប្រទេសចិនឯណោះវិញក៏កាន់តែបង្ហាញសាច់ដុំយ៉ាងច្បាស់ពីមួយថ្ងៃ ទៅមួយថ្ងៃផងដែរ ដោយការបន្ថែមអាវុធមហាទំនើបទៅក្នុងជួរកងទ័ព មានដូចជាយន្តហោះចម្បាំងបំបាំងកាយជាដើម។ល។

ប្រភព៖ Reuter

July 10, 2020

ប្រធានាធិបតីនិងរដ្ឋមន្ត្រី7រូបរបស់ប្រទេសបូលីវី បានឆ្លងCOVID-19 ខណៈពិភពលោកមានអ្នកជំងឹរលាកសួតប្រភេទថ្មីឡើងដល់ជិត9.5លាននាក់

ប្រធានាធិបតី Jeanine Anez របស់ប្រទេសបូលីវី កាលពីម្សិលមិញ(9កក្កដា) បានប្រកាសថា ទទួលបានលទ្ធផលវិជ្ជមានជាមួយនឹងCOVID-19 ក្រោយពីបានធ្វើតេស្ត។

លោកស្រីប្រធានាធិបតី Jeanine Anez ប្រកាសនៅលើ Twitter ថា លោកស្រីនៅមានសុខភាពល្អ។ លោកស្រីបន្តថា នឹងនៅតែបំពេញការងារជាបន្តដូចធម្មតាក្នុងអំឡុងពេលនៅដាច់ដោយឡែកពីគេឯង។ លោកស្រី Jeanine Anez ឱ្យដឹងថា “សាមគ្គីគ្នា យើងនឹងឆ្លងផុតរោគរាតត្បាតនេះ”។

លោកស្រី Jeanine Anez បានថ្លែងថា លោកស្រីបានទៅធ្វើតេស្តរកវីរុសCOVID-19 ក្រោយពីសមាជិកក្រោមឱវាទរបស់លោកជាច្រើនរូប បានធ្លាក់ខ្លួនឈឺ។

រដ្ឋាភិបាលប្រទេសបូលីវីបានប្រកាសថា យ៉ាងហោចណាស់ក៏មានរដ្ឋមន្ត្រីចំនួន7រូប រួមទាំងរដ្ឋមន្ត្រីក្រសួងសុខាភិបាលផងដែរ បានទទួលលទ្ធផលវិជ្ជមានជាមួយនឹងCOVID-19។ ក្រុមមន្ត្រីទាំងនេះកំពុងទទួលការព្យាបាលនៅមន្ទីរពេទ្យ ខ្លះទៀតសម្រាកព្យាបាលនៅឯគេហដ្ឋានផ្ទាល់ខ្លូន។

គិតមកដល់បច្ចុប្បន្ន ពិភពលោកទាំងមូលបានរកឃើញអ្នកផ្ទុកវីរុសCOVID-19 ជិត9.5លាននាក់ និងអ្នកស្លាប់ជិត5សែននាក់។ ប្រទេសបូលីវីមានប្រជាជនសរុបជាង11.5លាននាក់ ក្នុងនោះមានជាង42,000នាក់បានឆ្លងវីរុសCOVID-19 និងជាង1,500នាក់បានបាត់បង់ជីវិតដោយសារវីរុសនេះ។

នៅមុនករណីប្រធានាធិបតីបូលីវី ក៏មានមន្ត្រីជាន់ខ្ពស់ជាច្រើនផ្សេងទៀតរបស់បណ្ដាប្រទេស បានឆ្លងមេរោគរាតត្បាតCOVID-19នេះ ក្នុងនោះក៏មាននាយករដ្ឋមន្ត្រីអង់គ្លេស លោក Boris Johnson និងប្រធានាធិបតីប្រេស៊ីល លោក Jair Bolsonaro ផងដែរ៕

ប្រភព៖ សារព័ត៌មានបរទេស

July 10, 2020

អ៊ីរ៉ង់ជួបហេតុការណ៍ផ្ទុះដ៏ធំមួយនៅក្បែរមូលដ្ឋានយោធាក្នុងរដ្ឋធានី

ការផ្ទុះដ៏ខ្លាំងក្លាមួយបានកើតឡើងនៅក្បែរឃ្លាំងរបស់កងទ័ពបដិវត្តអ៊ីរ៉ង់ នៅក្នុងរដ្ឋធានីតេហេរ៉ង់ (Tehran) នៅវេលាទៀបភ្លឺថ្ងៃនេះ បណ្ដាលឱ្យតំបន់ជុំវិញត្រូវដាច់ភ្លើង ប៉ុន្តែគេមិនទាន់ដឹងអំពីមូលហេតុនៅឡើយ។

ទីភ្នាក់ងារសារព័ត៌មានអ៊ីរ៉ង់ IRIB បានចេញ្ផ្សាយថា សំឡេងផ្ទុះយ៉ាងកងរំពងដែលគេស្ដាប់ឮនៅភាគខាងលិចនៃរដ្ឋធានីតេហេរ៉ង់ កាលពីវេលាទៀបភ្លឺក្នុងថ្ងៃទី10កក្កដានេះ។ ក៏ប៉ុន្តែ ប្រភពព័ណ៌មាននេះមិនបាននិយាយអំពីមូលហេតុក៏ដូចជាការខូចខាតដែលកើតឡើងដោយសារករណីផ្ទះនេះទេ។ ពលរដ្ឋដែលរស់នៅក្បែរតំបន់កើតហេតុបានឱ្យដឹងថា តំបន់ជាច្រើននៅទីក្រុងតេហេរ៉ង់ ត្រូវបានគេផ្ដាច់ចរន្តអគ្គិសនីទាំងស្រុង។

ការផ្ទុះដ៏ខ្លាំងក្លានេះ ហាក់កើតឡើងនៅជិតឃ្លាំងរបស់មូលដ្ឋានមីស៊ីលនៃកងកម្លាំងឆ្មាំបដិវត្តឥស្លាមអ៊ីរ៉ង់ ប៉ុន្តែក្រុមមន្ត្រីអ៊ីរ៉ង់ក៏មិនទាន់បានបញ្ចេញមតិអ្វីជុំវិញករណីនេះនៅឡើយ។

ប្រទេសអ៊ីរ៉ង់បានជួបហេតុការណ៍ផ្ទុះជាច្រើនលើកនៅក្នុងមូលដ្ឋានទ័ព នុយក្លេអែរ និងឧស្សាហកម្ម ក្នុងប៉ុន្មានសប្ដាហ៍កន្លងទៅថ្មីៗនេះ។ ការផ្ទុះមួយដ៏ធំបានបំផ្លាញរោងចក្រផលិតម៉ាស៊ីនចម្រាញ់អ៊ុយរ៉ាញ៉ូមដែលមានទីតាំងស្ថិតក្នុងតំបន់ Natanz ភាគកណ្ដាលប្រទេសនេះកាលពីសប្ដាហ៍មុន។ ក្រៅពីនេះ ក៏មានការផ្ទុះធុងឧស្ម័នដ៏ធំមួយនៅក្នុងតំបន់ Parchin ជាយក្រុងតេហេរ៉ង់ផងដែរ កាលពីថ្ងៃទី26មិថុនា បណ្ដាលឱ្យផ្ទៃមេឃរបស់រដ្ឋធានីនេះភ្លឺចិញ្ចាចក្នុងរាត្រី និងបង្កើតជាផ្សែងពេញផ្ទៃមេឃ៕

ប្រភព៖ សារព័ត៌មានបរទេស

July 10, 2020

ប្រជាជនចិនទាមទារទឹកដីតំបន់ Vladivostok ពីប្រទេសរុស្ស៊ី

មន្ត្រី និងអ្នកប្រើប្រាស់បណ្ដាញសង្គមចិន បានប្ដេជ្ញាទាមទារតំបន់ Vladivostok ពីប្រទេសរុស្ស៊ីមកវិញឱ្យបាន ព្រោះពួកគេយល់ថានេះគឺជាទឹកដីដែលត្រូវបានរុស្ស៊ីចូលកាន់កាប់ដោយបង្ខំកាលពីសតវត្សរ៍ទី19។

ឯកអគ្គរដ្ឋទូតរុស្ស៊ីប្រចាំនៅប្រទេសចិន កាលពីថ្ងៃទី2កក្កដា បានបង្ហោះសារលើបណ្ដាញសង្គម Weibo ដើម្បីអបអរខួបលើកទី160ឆ្នាំនៃការបង្កើតទីក្រុង Vladimostok ដែលស្ថិតក្នុងតំបន់ Primorsky របស់ប្រទេសរុស្ស៊ី។ ប៉ុន្តែ សារនេះ ភា្លមនោះបានក្លាយជាគោលដៅនៃការរិះគន់ដោយការបញ្ចេញមតិ និងសារទាមទារបូរណភាពទឹកដីរបស់ក្រុមមន្ត្រីការទូត អ្នកសារព័ត៌មាន និងអ្នកលេងអ៊ីនធើណិតនៅប្រទេសចិន។

លោក Zhang Heqing អ្នកការទូតចិន និងជាប្រធានមជ្ឈមណ្ឌលវប្បធម៌ចិនប្រចាំប្រទេសប៉ាគិស្ថាន បានបញ្ចេញមតិនៅខាងក្រោមសាររបស់ឯកអគ្គរដ្ឋទូតរុស្ស៊ីប្រចាំប្រទេសចិនថា “តើនេះមិនមែនជាតំបន់ Haishenwai របស់យើងកាលពីមុនទេឬអី?”។

អ្នកប្រើប្រាស់បណ្ដាញសង្គមចិន Weibo បន្ទាប់នោះក៏បានគាំទ្រដល់ការបញ្ចេញមតិរបស់អ្នកការទូតចិនរូបនេះ ដែលយល់ថា រុស្ស៊ីបានចូលកាន់កាប់តំបន់ Vladivostok ដោយ “សន្ធិសញ្ញាមិនស្មើភាពគ្នា” កាលពីសតវត្សរ៍ទី19។

“ថ្ងៃនេះយើងបានត្រឹមតែទទួលរងទុក្ខ ប៉ុន្តែ ជនជាតិចិននឹងចងចាំពីសតវត្សរ៍មួយ ទៅសតវត្សរ៍មួយ” ម្ចាស់គណនី Weibo មួយបានសរសេរដូច្នេះ។ អ្នកលេងបណ្ដាញសង្គមម្នាក់ទៀតបញ្ចេញមតិថា “យើងត្រូវជឿជាក់ថា តំបន់ដីដូនតារបស់យើងមួយនេះនឹងវិលត្រលប់មកវិញនៅក្នុងថ្ងៃអនាគត”។

Shen Shiwei អ្នកសារព័ត៌មានម្នាក់របស់បណ្ដាញទូរទស្សន៍អន្តរជាតិចិន (CGTN) ក៏បានចូលរួមបញ្ចេញមតិនេះដែរ ដោយបានយល់ថា សារអបអររបស់ឯកអគ្គរដ្ឋទូតរុស្ស៊ីនៅប្រទេសចិន មិនទទួលបានការគាំទ្រនៅលើ Weibo នោះទេ។

“ប្រវត្តិសាស្ត្ររបស់ Vladivostok ចាប់ផ្ដើមពីឆ្នាំ1860 នៅពេលរុស្ស៊ីបានបង្កើតកំពង់ផែយោធាមួយនៅទីនេះ។ ប៉ុន្តែ ទីក្រុងនេះ ធ្លាប់ជា Haishenwai របស់ប្រទេសចិន នៅមុនពេលត្រូវបានរុស្ស៊ីកាន់កាប់ តាមរយៈសន្ធិសញ្ញាមិនមានភាពស្មើគ្នា” អ្នកសារព័ត៌មាន Shen Shiwei បញ្ចេញមតិដូច្នេះ។

តំបន់ Primorsky របស់រុស្ស៊ី ដែលមាន Vladivostok ជាទីក្រុងធំ ធ្លាប់ជាផ្នែកមួយនៃតំបន់ Manchuria របស់អាណាចក្រចិនក្នុងរាជវង្សឈិញ (Qing Empire) ប៉ុន្តែ ត្រូវបានចក្រភពរុស្ស៊ីគ្រប់គ្រងចាប់ពីឆ្នាំ1860 ក្រោយពីចិនបានចាញ់សង្គ្រាមអាភៀនជាលើកទី2 នៅកក្រោមដៃអង់គ្លេសនិងបារាំង។

តំបន់ខាងលើនេះ ត្រូវបានប្រគល់ឱ្យរុស្ស៊ី ក្រោយពីមានសន្ធិសញ្ញាចំនួន3លើក ដែលចិនចាត់ទុកថា ជា “វិសមភាព” ដែលរាជវង្សឈិងបានចុះហត្ថលេខាជាមួយរុស្ស៊ី អង់គ្លេស និងបារាំង កាលពីឆ្នាំ1860។ ក្នុងចំណោមសន្ធិសញ្ញាទាំង3ខាងលើនេះ ក៏មានសន្ធិសញ្ញាជួលឧបទ្វីប Kowloon (ដែលបច្ចុប្បន្នស្ថិតក្នុងតំបន់រដ្ឋបាលពិសេសហុងកុង) ដែលត្រូវបានចុះហត្ថលេខាដោយតំណាងរបស់អង់គ្លេស និងរាជវង្សឈិងរបស់ប្រទេសចិនផងដែរ។

នៅមានភាគបន្តទៀត…

July 9, 2020

តើការចូលរួមប្រជែងយកតំណែងប្រធានាធិបតីសហរដ្ឋអាមេរិករបស់ Kanye West គឺពិតជាអាចប៉ះពាល់ដល់សំឡេងឆ្នោត?

បើទោះជាបេក្ខភាពឯករាជ្យ ឬជាសមាជិករបស់បក្សសាធារណរដ្ឋ លោក Kanye West បានធ្វើឱ្យឱកាសចុងក្រោយជាច្រើនកន្លងផុតទៅហើយ ទាក់ទិននឹងការចុះបញ្ជីឈ្មោះដើម្បីបានធ្វើសកម្មភាពឃោសនារកសំឡេងឆ្នោត ក៏ដូចជាការប្រកួតប្រជែកក្នុងការបោះឆ្នោតឆ្នាំ2020 នេះ។

តារាចម្រៀងរ៉ែប លោក Kanye West បានបញ្ជាក់កាលពីថ្ងៃទី8កក្កដាថា លោកពិតជាសម្រេចចិត្តចូលរួមប្រជែងដណ្ដើមយកតំណែងជាម្ចាស់សេតវិមានពិតមែន។ អ្នកចម្រៀងនេះនឹងចូលរួមប្រជែងយកសន្លឹកឆ្នោតក្នុងនាមជាបេក្ខភាពឯករាជ្យ តំណាងឱ្យគណបក្ស Birthday Party បើសិនលោក Trump មិនបោះបង់ការប្រកួត។ តែបើសិនជាលោក Trump បោះបង់ការប្រកួត លោក West ចង់ក្លាយជាតំណាងរបស់បក្សសាធារណរដ្ឋ។ ក៏ប៉ុន្តែ លទ្ធភាពនៃការបោះបង់របស់លោក Trump ហាក់ស្មើនឹងសូន្យទៅហើយ ដូច្នេះប្រាកដណាស់ថា លោក West នឹងចូលរួមប្រកួតប្រជែងក្នុងនាមជាបេក្ខភាពឯករាជ្យ។

ការសម្រេចរបស់លោក West ត្រូវបានធ្វើឡើងដោយយឺតពេលណស់ទៅហើយ ខណៈដែលនៅសល់តែ4ខែទៀតប៉ុណ្ណោះ នឹងដល់ថ្ងៃបោះឆ្នោត (3វិច្ឆិកា) ហើយគាត់នៅមានបែបបទជាច្រើនត្រូវបំពេញឱ្យបានស្របច្បាប់។

កាលពីថ្ងៃទី7កក្កដា អ្នកនាំពាក្យម្នាក់របស់គណៈកម្មការរៀបចំការបោះឆ្នោតសហរដ្ឋ( FEC/ Federal Election Commission) បានឱ្យដឹងថា លោក West ហាក់មិនទាន់បានធ្វើបែបបទចាំបាច់ដើម្បីបានចូលរួមឃោសនារកសំឡេងឆ្នោតជាផ្លូវការនៅឡើយ។

អ្នកនាំពាក្យរបស់ FEC ថ្លែងថា “បេក្ខភាពដែលធ្លាប់បានជាប់ឆ្នោតជាប្រធានាធិបតីកន្លងមក តែងចូលរួមការប្រកួតបានឆាប់ជាងនេះឆ្ងាយណាស់។ បើសិនជាអ្នកចូលរួមប្រកួតដណ្ដើមតំណែងណាមួយក្នុងរដ្ឋាភិបាលសហរដ្ឋ នោះរយៈពេល4ខែគឺវាហាក់ដូចជាយឺតពេលពេកហើយ នេះបើតាមបទពិសោធន៍របស់ខ្ញុំ”។

បេក្ខភាពឯករាជ្យដែលបានចាប់ផ្ដើមដើម្បីការប្រកួតយឺតយ៉ាវដូចជាលោក West តែងតែមានលទ្ធផលមិនបានល្អ។ កាលពីឆ្នាំ2016 ក្នុងខែសីហា អតីតបុគ្គលិកអង្គភាពយកការណ៍សម្ងាត់អាមេរិក (CIA) លោក Evan McMullin បានប្រកាសចូលរួមដណ្ដើមសិទ្ធិចូលគ្រប់គ្រងសេតវិមាន។ ក្រោយរយៈពេល3ខែ លោកទទួលបានប្រាក់ឧបត្ថម្ភចំនួន 1.6លានដុល្លារ និងរកបានសំឡេងឆ្នោតត្រឹមតែ 0.53% ប៉ុណ្ណោះ។

ចំណែកលោក West ពេលនេះបានខកខានការចុះឈ្មោះជាបេក្ខភាពឯករាជ្យនៅក្នុងរដ្ឋជាច្រើន ដូចជា Alabama, Illinois, Montana, Nevada, New Hampshire, New Mexico, New York, North Carolina និង Texas ជាដើម។ នេះបើតាម FEC។

“បើសិនជាការប្រកួតប្រជែងរវាងលោក Trump និង Joe Biden បានដើរដល់ចំណុចប្រកៀកប្រកិតគ្នា នោះរាល់កត្តានឹងសុទ្ធតែមានសារសំខាន់” លោក Nathan L Gonzales អ្នកវិភាគការបោះឆ្នោតវាយតម្លៃដូច្នេះ។

យោងតាម John Pudner អតីតសមាជិកបក្សសាធារណរដ្ឋ និងជានាយកប្រតិបត្តិនៃអង្គការមិនស្វែងរកប្រាក់ចំណេញ Take Back Our Republic (TBOR) យល់ថា លោកមើលមិនឃើញបញ្ហាអ្វីនោះទេនៅពេល West ប្រជែងយកតំណែងប្រធានាធិបតី។

លោក John Pudner ថ្លែងថា “ពលរដ្ឋអាមេរិកាំងត្រូវការជម្រើសបន្ថែម មិនមែនតិចជាងនេះនោះទេ។ ម្ចាស់ឆ្នោតមានជម្រើសកាន់តែច្រើន នោះលទ្ធភាពនៃការប្រាកដក្នុងការទទួលបានសំឡេងគាំទ្រពីក្រុមណាមួយរបស់បេក្ខភាពប្រធានាធិបតី នឹងកាន់តែទាប”។

ក៏ប៉ុន្តែ Matt Klink ប្រធានក្រុមហ៊ុនផ្ដល់ប្រឹក្សាយោបល់ផ្នែកយុទ្ធសាស្ត្រទូរគមនាគមន៍និងទំនាក់ទំនងសាធារណៈ Klink Campaigns Inc., យល់ថា លោកមិនជឿថា West ធ្វើការដោយម៉ឺងម៉ាត់ជាមួយនឹងគោលដៅនយោបាយរបស់ខ្លួន ហើយអ្នកចម្រៀងរ៉ែបរូបនេះក៏ពិបាកក្នុងការបង្កើតការគំរាមកំហែងដល់លោក Trump ឬ Biden នោះដែរ។

Klink មានយោបល់ថា “លោក West មិនមានលក្ខណគ្រប់គ្រាន់ដើម្បីមានឈ្មោះនៅក្នុងសន្លឹកឆ្នោតនៅគ្រប់រដ្ឋ។ គាត់ក៏មិនទាន់មានមូលដ្ឋានយុទ្ធសាស្ត្ររឹងមាំ មិនមានក្រុមអ្នកគាំទ្រនៅមូលដ្ឋាន និងមិនទាន់បានបង្ហាញអំពីគំនិតច្បាស់លាស់នៅលើគ្រប់បញ្ហានៅឡើយ។ គាត់គ្រាន់តែល្បីឈ្មោះក្នុងស្រទាប់ម្ចាស់ឆ្នោតវ័យក្មេង ប៉ុន្តែប្រការនេះមិនទាន់គ្រប់គ្រាន់សម្រាប់ឱ្យ West ក្លាយជាបេក្ខភាពដែលគួរឱ្យសង្ឃឹមនៅឡើយដែរ ហើយប្រាកដណាស់ថា គាត់មិនមែនជាឧបសគ្គដែលអាចគំរាមកំហែងដល់បេក្ខភាពប្រធានាធិបតីកំពូលៗ2រូប (Trump និង Biden) នេះឡើយ”។

នេះមិនមែនជាលើកទីមួយដែល West បានបង្ហើបអំពីបំណងក្នុងការឈរឈ្មោះជាបេក្ខភាពប្រធានាធិបតីសហរដ្ឋនោះទេ។ កាលពីឆ្នាំ2015 នៅក្នុងពិធីទទួលពានរង្វាន់តន្ត្រី MTV លោកក៏ធ្លាប់បាននិយាយថា លោកនឹងប្រជែងយកសិទ្ធិចូលគ្រប់គ្រងសេតវិមាននៅក្នុងឆ្នាំ2020។ ប៉ុន្តែ កាលពីខែមករា2019 លោក West បានបង្ហោះសារនៅលើ Twitter ថា “ឆ្នាំ2024” ដែលនេះចង់បញ្ជាក់ថា លោកពន្យារពេលក្នុងការឈរឈ្មោះ។

ម្យ៉ាងវិញទៀត ថ្មីៗនេះ លោក West ទើបតែបានចេញអាល់ប៊ូមចម្រៀងថ្មី។ មនុស្សមិនតិចទេដែលគិតថា ការដែលលោកប្រកាសចង់ឈរឈ្មោះជាបេក្ខភាពប្រធានាធិបតី គឺគ្រាន់តែជាល្បិចដើម្បីទាក់ទាញចំណាប់អារម្មណ៍ពីសារព័ត៌មាន ដើម្បីរកចំណេញក្នុងការរកស៊ីតែប៉ុណ្ណោះ។

Larry Sabato នាយកមជ្ឈមណ្ឌលនយោបាយនៅសាកលវិទ្យាល័យ Virginia ព្យាករថា West អាចទទួលបានការគាំទ្រមិនដល់1%ផងនៅក្នុងចំណោមសន្លឹកឆ្នោតផ្លូវការទាំងអស់។ “West ត្រូវការពេលវេលាវែងឆ្ងាយទៀតដើម្បីបញ្ជាក់ថា គាត់ពិតជាមានភាពម៉ឺងម៉ាត់”។

ចំណែក David Smith ដែលជាសាស្ត្រាចារ្យផ្នែកវិទ្យាសាស្ត្រនយោបាយនៅសាកលវិទ្យាល័យ Sydney ប្រទេសអូស្ត្រាលី យល់ថា “គាត់គឺជាបុរសស្មុគស្មាញគួរសម។ West ទទួលបានជោគជ័យច្រើន ប៉ុន្តែការធ្វើយុទ្ធនាការឃោសនារកសំឡេងឆ្នោតមួយដូចទៅនឹងលោក Trump ខ្ញុំគិតថា គាត់មិនអាចទៅរួចទេ”។

បើទោះត្រូវបានវាយតម្លៃថា មិនមានលទ្ធភាពខ្ពស់ ប៉ុន្តែ ក្រុមអ្នកវិភាគនិយាយថា ការចូលរួមរបស់លោក West ពិតជាអាចប៉ះពាល់ដល់លទ្ធផលនៃការបោះឆ្នោត។ ឧទាហរណ៍៖ ឆ្នាំ1992 បេក្ខភាពឯករាជ្យម្នាក់ គឺមហាសេដ្ឋី Ross Perot ទទួលបានសំឡេងឆ្នោត19% បណ្ដាលឱ្យសំឡេងឆ្នោតរបស់បក្សសាធារណរដ្ឋត្រូវថយចុះច្រើន។ ឆ្នាំនោះ បេក្ខភាពប្រធានាធិបតិមកពីបក្សប្រជាធិបតេយ្យ គឺលោក Bill Clinton បានទទួលជ័យជំនះជាមួយនឹងលទ្ធផលប្រកៀកប្រកិតគ្នាគួរឱ្យព្រួយបារម្ភ។

មានឧទាហរណ៍មួយទៀតបង្ហាញថា សំឡេងឆ្នោតតិចតួចក៏អាចសម្រេចជោគវាសនាចុងក្រោយរបស់បេក្ខជនផងដែរ។ ឆ្នាំ2000 Ralph Nader ដែលជាបេក្ខភាពប្រធានាធិបតីមកពីបក្សបៃតង GPUS (Green Party of the United States) ទទួលបានសំឡេងឆ្នោតគាំទ្រចំនួន10,000សន្លឹកនៅក្នុងរដ្ឋ Florida ដែលនេះគឺច្រើនជាងបេក្ខជនបន្ទាប់ចំនួន500សំឡេងប៉ុណ្ណោះ។ បើសិនជាមិនមានលទ្ធផលនេះទេ នោះបេក្ខភាពមកពីបក្សប្រជាធិបតេយ្យបានក្លាយជាប្រជាធានាធិបតីជំនួសលោក George W. Bush បាត់ទៅហើយ៕

ប្រភព៖ សារព័ត៌មានបរទេស

July 9, 2020

ស្ថានភាព COVID-19 នៅតំបន់អាស៊ីអាគ្នេយ៍

ពិភពលោកបានរកឃើញអ្នកជំងឺចំនួន12,134,926នាក់ និងអ្នកស្លាប់ជិត551,000នាក់ដោយសារតែវីរុសCOVID-19។ តំបន់អាស៊ីអាគ្នេយ៍ មានប្រទេសចំនួនជិតពាក់កណ្ដាលដែលរងគ្រោះធ្ងន់ធ្ងរជាងគេព្រោះតែវិបត្តិសុខភាពនេះ។

ឥណ្ឌូនេស៊ីគឺជាសម្បុកវីរុសCOVID-19 ធំជាងគេបង្អស់នៅក្នុងតំបន់អាស៊ីអាគ្នេយ៍ ដោយមានអ្នកឆ្លងវីរុសចំនួន 68,079នាក់ ក្នុងនោះមានអ្នកស្លាប់ចំនួន3,359នាក់។ ចំនួនអ្នកជំងឺបានកើន1,853នាក់ និងអ្នកស្លាប់កើន50នាក់ បើធៀបនឹងម្សិលមិញ។ សាលារៀនត្រូវបន្តបិទទ្វាររហូតដល់ថ្ងៃទី13កក្កដា ខណៈដែលភោជនីយដ្ឋាននិងបារទាំងអស់ត្រូវផ្អាកដំណើរការទាំងស្រុងបន្តទៀត។

ហ្វីលីពីន ដែលជាសម្បុកមេរោគធំជាងគេលំដាប់ទី2ក្នុងតំបន់ បានរាយការណ៍ថា ក្នុងរយៈពេល24ម៉ោងចុងក្រោយនេះ ហ្វីលីពីនបានរកឃើញអ្នកជំងឺថ្មីចំនួន2,486នាក់ និងអ្នកស្លាប់ចំនួន6នាក់បន្ថែមទៀត ដែលនេះបានធ្វើឱ្យចំនួនអ្នកបានឆ្លងវីរុស កើនឡើងដល់50,359នាក់ និងស្លាប់1,853នាក់។

ក្រសួងសុខាភិបាលហ្វីលីពីនបានឱ្យដឹងថា អត្រានៃការឆ្លងនេះអាចបណ្ដាលមកពីប្រជាជនចាប់ផ្ដើមជួបជុំគ្នាច្រើនជាងមុន ក្រោយពីរដ្ឋាភិបាលបានចាប់ផ្ដើមបន្ធូរបន្ថយវិធានការនៃបម្រាមគោចរ ក្នុងបំណងកាត់បន្ថយផលប៉ះពាល់ខ្លាំងដល់សេដ្ឋកិច្ចជាតិ។

ចំណែកប្រទេសសិង្ហបុរីវិញ គឺជាសម្បុកមេរោគCOVID-19 ធំជាងគេលំដាប់ទី3ក្នុងតំបន់អាស៊ីអាគ្នេយ៍នេះ ដោយបានរកឃើញអ្នកផ្ទុកវីរុសសរុបចំនួន45,298នាក់ ដែលកើន158នាក់បើធៀបនឹងម្សិលមិញ ក្នុងនោះមានអ្នកស្លាប់ចំនួន26នាក់។ ប្រទេសនេះកំពុងបន្ធូរបន្ថយការរឹតត្បិតលើការដើរហើរទៅតាមដំណាក់កាល ខណៈដែលការបោះឆ្នោតសកលនៅតែត្រូវបានធ្វើឡើងនៅថ្ងៃទី10កក្កដាខាងមុខនេះ។ នាយករដ្ឋមន្ត្រី Lee Hsien Loong បានសម្រេចធ្វើការបោះឆ្នោតនៅពេលនេះ ព្រោះថា មិនប្រាកដថា បញ្ហា COVID-19 អាចត្រូវបានបញ្ចប់នៅក្នុងឆ្នាំក្រោយ ឬយ៉ាងណានោះទេ។

ប្រទេសម៉ាឡេស៊ី បានរកឃើញអ្នកជំងឺចំនួន 8,596នាក់ និងអ្នកស្លាប់121នាក់ ខណៈដែលប្រទេសថៃមានអ្នកជំងឺ3,157នាក់និងអ្នកស្លាប់58នាក់ វៀតណាមរកឃើញអ្នកជំងឺ352នាក់ មីយ៉ានម៉ាមានអ្នកជំងឺ293នាក់និងស្លាប់6នាក់ ប្រទេសប៊្រុយណេមានអ្នកជំងឺ141និងស្លាប់3នាក់ កម្ពុជាបានរកឃើញអ្នកជំងឺ141នាក់ ទីម័រខាងកើតមានអ្នកជំងឺ24នាក់ និងប្រទេសឡាវមានអ្នកជំងឺសរុបយ៉ាងតិច19នាក់។

ប្រទេសកម្ពុជា ឡាវ វៀតណាម និងទីម័រខាងកើត គឺជាបណ្ដាប្រទេសក្នុងតំបន់អាស៊ីដែលមិនទាន់មានករណីបាត់បង់ជីវិតដោយសារឆ្លងវីរុសCOVID-19 នៅឡើយ៕

ប្រភព៖ សារព័ត៌មានបរទេស

July 9, 2020

Category: អន្តរជាតិ