Category: អន្តរជាតិ

“បើមិនពាក់ម៉ាស់ការពារទេ” មានការព្យាករថា កូវីដ-19 នឹងសម្លាប់ជីវិតជនជាតិអាមេរិក លើស 224,000នាក់ នាដើមខែវិច្ឆិកា
មហាវិទ្យាល័យវ៉ាស៊ីនតោន បានផ្សព្វផ្សាយរបាយការណ៍ដាស់តឿនថ្មីចុងក្រោយបំផុតមួយ ដោយបានប៉ាន់ប្រមាណថា ចំនួនអ្នកស្លាប់ដោយសារកូវីដ-19 នៅសហរដ្ឋអាមេរិក នឹងហក់ឡើងលើស 224,000នាក់ នៅថ្ងៃទី1 វិច្ឆិកា ជាកែសម្រួលពីការព្យាករកាលពីលើកមុន 16,000នាក់ ដោយសារតែចំនួនអ្នកឆ្លងមេរោគ និងអ្នកចូលព្យាបាលនៅក្នុងមន្ទីរពេទ្យបានកើនឡើងនៅក្នុងរដ្ឋជាច្រើនទូទាំងសហរដ្ឋអាមេរិក។
យ៉ាងណាក៏ដោយ ក្នុងការព្យាករចុងក្រោយបំផុត ស្ថាប័នវាស់វែង និងវាយតម្លៃផ្នែកសុខភាព នៃមហាវិទ្យាល័យវ៉ាស៊ីនតោន(IHME) ដែលបានផ្សព្វផ្សាយកាលពីពេលព្រលប់ថ្ងៃអង្គារ(ទី14កក្កដា) បានប៉ាន់ប្រមាណថា ចំនួនអ្នកស្លាប់អាចនឹងថយចុះ 40,000នាក់ បើសិនជាប្រជាជនអាមេរិកគ្រប់រូប រួមចិត្តរួមកាយគ្នា ពាក់ម៉ាស់ការពារក្នុងទីសាធារណៈ។
ស្ថាប័នវាស់វែង និងវាយតម្លៃផ្នែកសុខភាព នៃមហាវិទ្យាល័យវ៉ាស៊ីនតោន បានបញ្ជាក់នៅក្នុងសេចក្ដីថ្លែងការណ៍ថា “មានការនាំគ្នាពាក់ម៉ាស់អនាម័យការពារច្រើនជាងមុន តែក៏មិនច្រើនគ្រប់គ្រាន់ឡើយ។ បើសិន 95% នៃប្រជាជនអាមេរិក នាំគ្នាពាក់ម៉ាស់ការពារគ្រប់គ្រា ពេលដែលចេញទៅក្រៅផ្ទះ អត្រាការឆ្លងមេរោគ នឹងថយចុះ ចំនួនអ្នកចូលព្យាបាលនៅតាមមន្ទីរពេទ្យ នឹងថយចុះ និងរំពឹងថា ចំនួនអ្នកស្លាប់ ក៏នឹងថយចុះទៅតាមនោះដែរ”។
ការសន្និដ្ឋានជាថ្មី របស់ស្ថាប័នវាស់វែង និងវាយតម្លៃផ្នែកសុខភាព នៃមហាវិទ្យាល័យវ៉ាស៊ីនតោននេះ បានធ្វើឡើង ក្រោយពីរដ្ឋអាឡាបាម៉ា, ហ្វ្លរីដា និងណូស ខារ៉ូឡៃណា កាលពីថ្ងៃអង្គារ(ទី14កក្កដា) ដោយបានរាយការណ៍ពីការរកឃើញអ្នកស្លាប់ដោយសារកូវីដ-19 ប្រចាំថ្ងៃខ្ពស់បំផុត ចាប់តាំងពីមានការឆ្លងរាលដាល ក្លាយជាភាពជោគជ័យដ៏សែនសោកសៅ នៃការឆ្លងរាតត្បាតរលកទី2 ដែលកំពុងវាយលុកទីតាំងផ្សេងៗស្ទើរតែទូទាំងសហរដ្ឋអាមេរិក។
ក្នុងតួលេខព្យាករជាថ្មីនេះ ស្ថាប័នវាស់វែង និងវាយតម្លៃផ្នែកសុខភាព នៃមហាវិទ្យាល័យវ៉ាស៊ីនតោន បានសន្និដ្ឋានថា នឹងមានប្រជាជនអាមេរិកស្លាប់ដោយសារកូវីដ-19 កើនឡើងដល់ 224,089នាក់ នៅថ្ងៃទី1 ខែវិច្ឆិកា ពីចំនួនដើម 208,254នាក់ ដូចដែលធ្លាប់បានព្យាករទុកកាលពីថ្ងៃទី7 កក្កដា។
តាមរយៈការរាប់របស់ទីភ្នាក់ងារព័ត៌មានរ៉យទ័រ បានឱ្យដឹងថា រហូតមកដល់ពេលនេះ មានពលរដ្ឋអាមេរិកាំងយ៉ាងតិច 136,052នាក់រួចហើយ បានស្លាប់ដោយសារកូវីដ-19 ពីចំនួនអ្នកឆ្លងមេរោគនេះប្រមាណជា 3.4លាននាក់។
ទាំងអស់នេះ កាលពីពេលកន្លងមក តួលេខព្យាកររបស់ស្ថាប័នវាស់វែង និងវាយតម្លៃផ្នែកសុខភាព នៃមហាវិទ្យាល័យវ៉ាស៊ីនតោន ធ្លាប់ត្រូវបានមន្ទីរសេតវិមាន យកទៅអះអាងរួចមកហើយ និងបានទទួលការតាមសង្កេតមើលយ៉ាងជិតដិត ពីបណ្ដាក្រុមមន្ត្រីសុខភាពសាធារណៈ៕
ប្រភព៖ សារព័ត៌មានបរទេស
July 16, 2020
វៀតណាមវះកាត់ទារិកាភ្លោះជាប់គ្នាបានដោយជោគជ័យ! វេជ្ជបណ្ឌិតនិងជំនួយការ93នាក់ចូលរួមក្នុងករណីវះកាត់នេះ
ក្រុមវេជ្ជបណ្ឌិតនិងគ្រូពេទ្យចំនួន93នាក់ បានចូលរួមក្នុងការវះកាត់ផ្ដាច់រាងកាយជាប់គ្នារបស់ទារិកាភ្លោះមួយគូដោយជោគជ័យ បន្ទាប់ពីបានចំណាយពេល13ម៉ោងនិង40នាទីប្រកបដោយភាពតានតឹង និងសប្បាយរីករាយ។
កាលពីម្សិលមិញ (15កក្កដា) ទារិកា Dieu Nhi និង Truc Nhi អាយុ13ខែ ដែលមានរាងកាយជាប់គ្នានៅត្រង់ពោះ ទទួលបានការវះកាត់ផ្ដាច់រាងកាយចេញពីគ្នា នៅឯមន្ទីរពេទ្យកុមារក្រុងហូជីមិញ។ នៅទីនេះ ក្រុមវេជ្ជបណ្ឌិតនិងជំនួយការចំនួន93នាក់ មកពីមន្ទីរពេទ្យនានាក្នុងតំបន់ភាគខាងត្បូងប្រទេសវៀតណាម បានបែងចែកការវះកាត់នេះជា11វគ្គ ដើម្បីត្រៀមសម្រាប់ការវះកាត់នេះ។
ទារិកាភ្លោះជាប់គ្នានេះគឺជាប្រភេទ ischiopagus tetrapus ជាករណីកម្របំផុត ដោយមានប្រមាណជា6%ប៉ុណ្ណោះ ក្នុងចំណោមទារកមានរាងកាយជាប់គ្នានៅទូទាំងពិភពលោក។ អំពីប្រព័ន្ធរំលាយអាហារ ទារិកាភ្លោះនេះ មានពោះវៀនជាមួយគ្នា និងមានរន្ធគូទតែមួយគត់។ អំពីតម្រងនោមវិញ ទារិកាទាំងនេះមានក្រពះនោម (ប្លោកនោម) ចំនួន2 ស្ថិតនៅចំហៀងខាងឆ្វេងនិងខាងស្ដាំនៃពោះវៀនរួមរបស់ពួកគេ។ ក្រពះនោមនីមួយៗ ទទួលទឹកនោមពីបំពង់បង្ហូរទឹកនោមផ្សេងៗគ្នា។ ទារិកាភ្លោះនេះមានឆ្អឹងល្អាងត្រគាកតម្រៀបគ្នាជារង្វង់មូល។
ដើម្បីចៀសវាងការភាន់ច្រឡំសម្រាប់ក្រុមវេជ្ជបណ្ឌិត និងឧបករណ៍វះកាត់ ក្រុមជំនួយការបានបិទក្រដាសសម្គាល់ពណ៌ក្រហមលើទារិកាឈ្មោះ Truc Nhi (ឆ្វេង) និងក្រដាសពណ៌ខៀវទៅលើ Dieu Nhi។ ដំណាក់កាលនៃការសណ្ដំ បានអូសបន្លាយពេលជិត3ម៉ោង រាប់ចាប់ពីម៉ោង6និង30នាទីព្រឹក។
វេជ្ជបណ្ឌិត Truong Quang Dinh នាយកមន្ទីរពេទ្យកុមារក្រុង បានដឹកនាំការវះកាត់នេះ។ ម៉ោង7និង30នាទី ក្រុមវេជ្ជបណ្ឌិតបានពិគ្រោះគ្នាជាលើកចុងក្រោយដើម្បីកំណត់ឱ្យបានច្បាស់ឡើងវិញអំពីវិធីសាស្ត្រ និងដំណាក់កាលសហការគ្នាជាមួយនឹងក្រុមផ្សេងៗ មុននឹងចាប់ផ្ដើមវះកាត់។
ក្រុមវេជ្ជបណ្ឌិតមានការប្រុងប្រយ័ត្នខ្ពស់បំផុត នៅពេលដែលទារិកាឈ្មោះ Truc Nhi ជួបបញ្ហាបន្តិចបន្តួចក្នុងពេលសណ្ដំ។ សំណាងល្អ ក្នុងរយៈពេលជាង13ម៉ោងនៃការវះកាត់ ទារិកាភ្លោះនេះមិនមានបញ្ហាអ្វីនោះឡើយ ហើយសញ្ញានៃការរស់រានមានជីវិតគឺស្ថិតនៅក្នុង “តំបន់សុវត្ថិភាព”។
វេជ្ជបណ្ឌិតដែលទទួលភារកិច្ចជាអ្នកវះកាត់ផ្ទាល់ ត្រូវពាក់កែវពង្រីក ដើម្បីមើលឱ្យឃើញច្បាស់បំផុត និងដើម្បីធានាសុវត្ថិភាពដល់ទារិកាទាំងនេះ។
ការវះកាត់ដែលនឹងប្ដូរផ្លាស់វាសនារបស់ទារិកាភ្លោះនេះ ត្រូវបានចាប់ផ្ដើមដោយវេជ្ជបណ្ឌិត Truong Quang Dinh នៅវេលាម៉ោង9និង51នាទី។ ក្រោយមក វេជ្ជបណ្ឌិត Tran Van Duong មកពីមន្ទីរពេទ្យ Cho Ray ចាប់ផ្ដើមបើកពោះនិងផ្ដាច់រាងកាយចេញពីគ្នា។ ក្រុមវេជ្ជបណ្ឌិតជំនាញខាងវះកាត់ទូទៅបានចូលមកពិនិត្យគ្រឿងក្នុង និងចាប់ផ្ដើមវះកាត់ចែកពោះវៀនដែលជាប់គ្នាជា2ចំណែកទៅតាមការកំណត់មុននេះ។
នៅវេលាម៉ោង14និង07នាទី ក្រុមវេជ្ជបណ្ឌិតបានទទួលជោគជ័យក្នុងការវះកាត់ផ្ដាច់រាងកាយចេញពីគ្នា។ ទារិកាទាំងក៏ត្រូវបានដាក់នៅក្នុងគ្រែវះកាត់ផ្សេងៗគ្នា ហើយជីវិតដោយឡែក និងប្រកបដោយភាពធម្មតា បានចាប់ផ្ដើមជាផ្លូវការចាប់ពីវិនាទីនេះតទៅ។
ម៉ោង18និង45នាទី ករណីវះកាត់ជាប្រវត្តិសាស្ត្រនេះត្រូវបានបញ្ចប់ជាស្ថាពរ។ ក្រុមវេជ្ជបណ្ឌិតបានវះកាត់ផ្ដាច់រាងកាយ និងបង្កើតអវយវះខាងក្នុងថ្មីមួយចំនួន រួមនឹងការតម្រៀបគ្រឿងក្នុងឡើងវិញ និងដេរភ្ជាប់រាងកាយទាំងស្រុងដោយជោគជ័យ។
ប៉ុន្តែ “រយៈពេលនៃការព្យាបាល និងថែទាំ គឺត្រូវប្រើពេលយូរទៅមុខទៀត” នេះបើតាមវេជ្ជបណ្ឌិត Dinh។ សាស្ត្រាចារ្យ វេជ្ជបណ្ឌិត Tran Dong A ដែលធ្លាប់ធ្វើជាប្រធាននៃការវះកាត់ទារកភ្លោះជាប់គ្នាជាច្រើនករណីនៅវៀតណាម បានវាយតម្លៃខ្ពស់ទៅលើជោគជ័យនៃការវះកាត់លើកនេះផងដែរ៕
ប្រភព៖ សារព័ត៌មានបរទេស
July 16, 2020
រ៉ូបូតទំនើបបំផុតរបស់ NASA ជិតបានឡើងទៅកាន់ផ្កាយព្រះអង្គារដើម្បីស្វែងរកជីវិត(វីដេអូ)
រ៉ូបូតទំនើបបំផុតរបស់ NASA ឈ្មោះ Perseverance នឹងត្រូវបានបាញ់បង្ហោះចេញពីតំបន់ Cape Canaveral ក្នុងថ្ងៃទី30កក្កដាខាងមុខ ដើម្បីឆ្ពោះទៅកាន់ផ្កាយព្រះអង្គារ ក្នុងបំណងស្វែងរកបាក់តេរី និងជីវិតជំនាន់បុរាណ ហើយនាំសំណាកទាំងនោះមកកាន់ផែនដី។
រ៉ូបូតទំនើបបំផុតដែលមានឈ្មោះថា Perseverance នេះ គឺជាយានដែលដំណើរការដោយស្វ័យប្រវត្តិ និងមានភារកិច្ចស្វែងរកសញ្ញ ឬដាននៃជីវិតរបស់បាក់តេរី និងភាវមានជីវិតបុរាណបំផុតនៅលើពិភពព្រះអង្គារ។ តំបន់ដែល Perseverance ត្រូវធ្វើដំណើរទៅកាន់ និងរុករក នោះគឺតំបន់ដែនដីសណ្ដរដែលមានទន្លេកាលពី3.5ពាន់លានឆ្នាំមុន។
ការហោះហើរឆ្លងភពនេះនឹងត្រូវចំណាយពេល6ខែទើបទៅដល់គោលដៅ។ នៅពេលរ៉ូបូតដែលមានទំហំប៉ុនរថយន្ត SUV នេះបានចុះចតដោយសុវត្ថិភាព វានឹងចាប់ផ្ដើមប្រមូល និងរក្សាទុកសំណាកដីរបស់ពិភពព្រះអង្គារ ដើម្បីនាំត្រលប់មកកាន់ផែនដីនៅឆ្នាំ2031។
ក្រុមអ្នកវិទ្យាសាស្ត្រនឹងធ្វើការពិនិត្យទៅលើសំណាកដីនៃពិភពព្រះអង្គារដែល Perseverance បាននាំមកកាន់ផែនដី ក្នុងបំណងស្វែងរកហ្វូស៊ីលបាក់តេរីជាដើម ដើម្បីបញ្ជាក់ថា តើផ្កាយព្រះអង្គារនេះធ្លាប់មានភាវមានជីវិតដែរ ឬអត់។
NASA បានធ្វើការពីចម្ងាយអស់ជាច្រើនខែមកហើយ ដោយសារតែCOVID-19 ប៉ុន្តែកាលបរិច្ឆេទបាញ់បង្ហោះយាននៅក្នុងគម្រោងដែលមានតម្លៃ2.7ពាន់លានដុល្លារនេះ មិនរងផលប៉ះពាល់៕
ប្រភព៖ សារព័ត៌មានបរទេស
July 15, 2020
ក្រុមអ្នកមានលំដាប់កំពូលចំនួន80នាក់ ដាក់សំណើសុំដំឡើងពន្ធលើពួកគេជាបន្ទាន់ ដើម្បីទប់ទល់នឹងCOVID-19
សេដ្ឋី និងមហាសេដ្ឋីជាង80នាក់របស់សហរដ្ឋអាមេរិក និងប្រទេសចំនួន6ផ្សេងទៀត បានផ្ញើលិខិតស្នើសុំឱ្យមានការដំឡើងអត្រាពន្ធបន្ថែមទៀតទៅលើអ្នកមាន ដើម្បីយកប្រាក់ដែលបានបង់ពន្ធនោះទៅជួយដោះស្រាយបញ្ហាវិបត្តិដោយសារវីរុសCOVID-19។
ដោយហៅខ្លួនឯងថាជាសេដ្ឋីមនុស្សធម៌ ក្រុមអ្នកមានជាង80នាក់នៅសហរដ្ឋអាមេរិក និងប្រទេសចំនួន6ផ្សេងទៀត រួមមានទាំងលោកស្រី Abigail Disney (អ្នកស្នងមរតករបស់ Walt Ddisney) លោក Morris Pearl (អតីតនាយកប្រតិបត្តិរបស់ BlackRock) និងអ្នកជំនួញជនជាតិដាណឺម៉ាក Djaffar Shalchi ជាដើម កំពុងតែស្នើឱ្យមានការបន្ថែមពន្ធអាករទៅលើក្រុមអ្នកមាន ដើម្បីជួយដល់ជនរងគ្រោះ និងអ្នកក្រីក្ររាប់ពាន់លាននាក់ដែលកំពុងជួបបញ្ហាដោយសារCOVID-19 តាមរយៈកម្មវិធីជំនួយ និងសកម្មភាពមនុស្សធម៌ផ្សេងៗ។
នៅក្នុងលិខិតស្នើសុំខាងលើនេះ មានឃ្លាសរសេរថា “ថ្ងៃនេះ យើងខ្ញុំ ដែលជាសេដ្ឋី និងមហាសេដ្ឋីដែលចុះហត្ថលេខាខាងក្រោមនេះ ស្នើសុំឱ្យរដ្ឋាភិបាលធ្វើការដំឡើងពន្ធចំពោះក្រុមមនុស្សដូចយើងខ្ញុំ។ សូមធ្វើកិច្ចការនេះជាបន្ទាន់ លម្អិត និងជារៀងរហូត”។ លិខិតបន្តថា “យើងខ្ញុំមិនផ្ញើអំណោយទៅដាក់ក្នុងហាងទំនិញនានា ឬផ្ញើទៅដល់ផ្ទះនីមួយៗនោះទេ។ ប៉ុន្តែ យើងខ្ញុំមានប្រាក់ មានប្រាក់យ៉ាងច្រើន។ ប្រាក់គឺជារបស់ដែលអាចតម្រូវទៅតាមភាពជាក់ស្ដែងបំផុតនៅក្នុងកាលៈទេសៈនេះ”។
នេះមិនមែនជាលើកដំបូងដែលក្រុមអ្នកមាននេះបានលើកឡើងអំពីបញ្ហាខាងលើ នៅក្នុងពេលដែលវេទិកាក្រុមប្រទេស G20 រវាងបណ្ដាប្រទេសអ្នកមានលំដាប់ជួរមុខចំនួន19 ក្នុងពិភពលោក និងសហភាពអឺរ៉ុប ជិតនឹងត្រូវបានប្រារព្ធឡើងនាសប្ដាហ៍នេះនោះទេ។ ប៉ុន្តែ កាលពីអំឡុងពេលមុនCOVID-19 បង្ហាញខ្លួន ក្រុមអ្នកមានដែលមានសមាជិកចំនួន200នាក់ដែលហៅខ្លួនឯងថាជាសេដ្ឋីស្នេហាជាតិ រួមមាន Disney និង Pearl ជាដើម ក៏ធ្លាប់បានអំពាវនាវឱ្យបង្កើតប្រព័ន្ធពន្ធដាដែលមានលក្ខណៈទាន់សម័យជាងបច្ចុប្បន្នផងដែរ។
លោកស្រី Abigail Disney អ្នកស្នងមរតករបស់ Walt Ddisney
“សេដ្ឋីស្នេហាជាតិ” ជាច្រើនរូបបានឱ្យដឹងថា ពួកគេបានចុះហត្ថលេខាលើលិខិតស្នើខាងលើនេះ ក៏ព្រោះតែមានអារម្មណ៍ថា ខ្មាស់អៀនចំពោះប្រការមួយដែលថា នៅពេលពួកគេ “កើតមកភ្លាម ក៏បានបៀមស្លាបព្រាមាស” ទៅហើយ។ ចំណែកអ្នកមានមួយចំនួនផ្សេងទៀតយល់ថា ពួកគេត្រូវយល់អំពីស្ថានភាពរបស់សាធារណជនក្នុងសង្គមឱ្យបានច្រើនបន្ថែមទៀត។
នៅក្នុងលិខិតស្នើខាងលើ “ក្រុមអ្នកមានដើម្បីមនុស្សធម៌” នេះក៏បានព្រមានថា COVID-19 អាចរុញច្រានមនុស្សរាប់លាននាក់ឱ្យធ្លាក់ទៅក្នុងស្ថានភាពអត់ឃ្លាន និងបង្កើនទម្ងន់ទៅលើប្រព័ន្ធសុខាភិបាល ដែលភាគច្រើនត្រូវបានចាត់ចែងដោយក្រុមស្ត្រីដែលមានប្រាក់ខែទាប ខណៈដែលកិច្ចការមនុស្សធម៌មិនមែនជាដំណោះស្រាយដែលអាចបញ្ចប់បញ្ហាដល់ឫសគល់នោះឡើយ។
ដំណោះស្រាយដែលត្រូវបានក្រុមសេដ្ឋី និងមហាសេដ្ឋីនេះលើកឡើង នោះគឺ “ដំឡើងពន្ធមកលើយើងខ្ញុំ។ នេះគឺជាជម្រើសដ៏ត្រឹមត្រូវ និងតែមួយគត់”។
លិខិតស្នើបានបញ្ជាក់ថា “យើងជំពាក់បំណុលដ៏ធំសម្បើមចំពោះអ្នកដែលធ្វើការនៅជួរមុខ ក្នុងសង្គ្រាម (ប្រឆាំង COVID-19) នៅទូទាំងពិភពលោកមួយនេះ។ ភាគច្រើននៃពួកគេគឺជាកម្មករ ពលករដែលបម្រើការងារចាំបាច់ និងសុទ្ធតែទទួលបានប្រាក់ខែទាបហួសសម្រាប់កិច្ចការដ៏ធ្ងន់ធ្ងរដែលពួកគេត្រូវបំពេញ”។
អ្នកជំនួញជនជាតិដាណឺម៉ាក លោក Djaffar Shalchi
ការស្នើខាងលើនេះត្រូវបានក្រុមអ្នកមានលើកឡើង ក្រោយរយៈពេល2ឆ្នាំដែលរដ្ឋបាលលោក Trump បានអនុម័តលើច្បាប់ការងារ និងកាត់បន្ថយពន្ធ ដែលនេះបានកាត់បន្ថយប្រាក់ចំណូលយ៉ាងច្រើនដែលរដ្ឋប្រមូលបានពីការយកពន្ធលើក្រុមអ្នកមានលំដាប់កំពូលៗ។
ដោយសារតែច្បាប់មួយដែលរដ្ឋបាលរបស់លោក Trump បានអនុម័ត ក្រុមអ្នកមានលំដាប់កំពូលប្រមាណជា400នាក់នៅសហរដ្ឋអាមេរិក ត្រូវបង់ពន្ធក្នុងកម្រិតទាបជាងជាលើកដំបូងក្នុងអំឡុង100ឆ្នាំកន្លងទៅនេះ បើធៀបជាមួយនឹងក្រុមមនុស្សដែលស្ថិតក្នុងស្រទាប់អ្នកមានមធ្យម នេះបើតាមការវិភាគរបស់ក្រុមអ្នកសេដ្ឋសាស្ត្រ Emmanuel Saez និង Gabriel Zucman ដែលត្រូវបានប្រកាសឱ្យដឹងកាលពីឆ្នាំមុន។ ឆ្នាំ1970 ក្រុមអ្នកមានលំដាប់កំពូលរបស់សហរដ្ឋអាមេរិក ត្រូវបង់ពន្ធជាង50%នៃប្រាក់ចំណូលរបស់ពួកគេ គឺខ្ពស់ជាងទ្វេដងបើធៀបនឹងក្រុមអ្នកមានមធ្យម៕
ប្រភព៖ Aljazeera
July 15, 2020
រដ្ឋបាលលោកត្រាំ បង្កើនការវាយប្រហារចិន ដោយប្រកាសថា ចិនគ្មានសិទ្ធិរឹបយកសមុទ្រចិនខាងត្បូង ព្រមទាំងប្រកាសគាំទ្រប្រទេសគូវិវាទជាមួយចិន…
គណៈគ្រប់គ្រងរបស់លោកប្រធានាធិបតី ដូណាល់ ត្រាំ បានបង្កើនកម្រិតការប្រតិបត្តិការ តតាំងប្រទេសចិនបន្ថែមឡើងទៀតកាលពីថ្ងៃចន្ទ(ទី13កក្កដា) ដោយស្ដីបន្ទោសចិនថា បានធ្វើខុសច្បាប់ ក្នុងការអាងសិទ្ធិលើសមុទ្រចិនខាងត្បូងទាំងអស់ ព្រមទាំងប្រកាសគាំទ្រប្រទេសនៅក្នុងតំបន់អាស៊ីភាគអាគ្នេយ៍ ដែលអាងសិទ្ធិជាន់គ្នាជាមួយក្រុងប៉េកាំង ខណៈប្រទេសជប៉ុន ក៏ចេញរបាយការណ៍ការពារជាតិ វាយប្រហារចិនដែរថា បានព្យាយាមរុករានដែនទឹកក្នុងសមុទ្រចិនខាងកើត ដើម្បីផ្លាស់ប្ដូរឋានៈដើម។ ចំណែកចិន បានតបតអាមេរិកវិញថា គ្មានចំណែកពាក់ព័ន្ធដោយផ្ទាល់ទេ តែព្យាយាមឆ្កឹះឆ្កៀលឱ្យកើតភាពបែកបាក់ក្នុងតំបន់ ទាំងដែលធ្លាប់បានប្រកាសថា មិនប្រកាន់យកខាងណា នៅក្នុងទំនាស់មួយនេះ។
កាលពីថ្ងៃចន្ទ(ទី13កក្កដា) លោកម៉ៃក៍ ប៉ុមប៉េអូ រដ្ឋមន្ត្រីការបរទេសអាមេរិក បានចេញសេចក្ដីថ្លែងការណ៍បញ្ជាក់ថា ខណៈនេះ អាមេរិកមើលឃើញថា ការអាងសិទ្ធិខាងសមុទ្ររបស់ប្រទេសចិន ក្រៅដែនទឹកដែលបានទទួលការទទួលស្គាល់ពីអន្តរជាតិ គឺជាទង្វើខុសច្បាប់ ដូចគ្នានឹងការព្យាយាមគំរាមកំហែងប្រទេសដទៃទៀត ដើម្បីចូលទៅគ្រប់គ្រងដែនទឹកទាំងនោះ និងបានបញ្ជាក់ច្បាស់ទៀតថា ពិភពលោកនឹងមិនព្រមឱ្យក្រុងប៉េកាំងប្រតិបត្តិចំពោះសមុទ្រចិនខាងត្បូង ហាក់ដូចជាអាណាចក្រខាងសមុទ្ររបស់ខ្លួនឯងឡើយ។
កន្លងមក សហរដ្ឋអាមេរិក បានជំទាស់ការអាងសិទ្ធិរបស់ចិន លើសមុទ្រចិនខាងត្បូងទាំងអស់ ដែលជាប្រភពរ៉ែប្រេង និងហ្គាស និងថែមទាំងជាខ្សែផ្លូវពាណិជ្ជកម្មដ៏សំខាន់ទៀតផង ប៉ុន្តែ ពាក្យថ្លែងការណ៍របស់លោកប៉ុមប៉េអូ ក្នុងគ្រានេះ អាចហៅបានថា ជាការសាកល្បងចិន យ៉ាងច្បាស់លាស់បំផុតរបស់គណៈគ្រប់គ្រងលោកត្រាំ។
លោកប៉ុមប៉េអូ ថែមទាំងប្រកាសគាំទ្រប្រទេសក្នុងតំបន់អាស៊ីភាគអាគ្នេយ៍ ដែលរួមមាន ហ្វ៊ីលីពីន និងវៀតណាម ក្រោយពីច្រើនឆ្នាំកន្លងទៅ ក្រុងវ៉ាស៊ីនតោនបានអះអាងថា នឹងមិនប្រកាន់យកខាងណា ក្នុងករណីវិវាទផ្នែកអធិបតេយ្យភាពនៅក្នុងសមុទ្រចិនខាងត្បូងនេះ។
រដ្ឋមន្ត្រីការបរទេសសហរដ្ឋអាមេរិក បានបញ្ជាក់ថា អាមេរិកនឹងនៅក្បែរសម្ព័ន្ធមិត្ត និងភាគហ៊ុនរបស់ខ្លួននៅក្នុងតំបន់អាស៊ីភាគអាគ្នេយ៍ ក្នុងការការពារសិទ្ធិអធិបតេយ្យ ចំពោះធនធានធម្មជាតិក្រៅត្រើយសមុទ្រ ដែលត្រូវគ្នានឹងសិទ្ធិ និងតួនាទីក្រោមច្បាប់អន្តរជាតិ។
ក្រុងប៉េកាំង បានអាងសិទ្ធិលើសមុទ្រចិនខាងត្បូងដោយបានអះអាងលើផែនទីខ្សែ Dashed line 9ខ្សែ ដែលត្រូវបានរិះគន់វាយប្រហារថា ជាការកំណត់អាណាចក្រដែលមិនច្បាស់លាស់ ដោយយោងលើផែនទី កាលពីទសវត្សរ៍1940។ ខណៈពេលជាមួយគ្នា អំឡុងច្រើនឆ្នាំមកនេះ ចិនបានកសាងមូលដ្ឋានទ័ពនៅលើកោះសិប្បនិម្មិត ដែលកើតចេញពីការចាក់ដីក្នុងសមុទ្របរិវេណកោះផ្កាថ្មជាច្រើនកន្លែង ក្នុងតំបន់សមុទ្រចិនខាងត្បូង ដែលមានចំណុចវិវាទខាងកម្មសិទ្ធិ ជាមួយប្រទេសក្នុងអាស៊ីភាគអាគ្នេយ៍ គួបផ្សំនឹងការប្រទាញប្រទង់ខាងការទូត ដើម្បីដោះស្រាយចំណុចវិវាទដែលអូសបន្លាយពេលជិត 2ទសវត្សរ៍មួយនេះ។
លោកប៉ុមប៉េអូ ចេញសេចក្ដីថ្លែងការណ៍លើកនេះ ក្នុងឱកាសគម្រប់ខួប 4ឆ្នាំ ដែលសាលក្រមតុលាការក្នុងទីក្រុងឡាអេ បានសម្រេចក្ដីលើចំណុចវិវាទក្រោមអនុសញ្ញាអន្តរជាតិស្ដីពី ច្បាប់ខាងសមុទ្រ ឱ្យប្រទេសហ្វ៊ីលីពីនឈ្នះក្ដី និងជំទាស់ការអះអាងខ្សែ Dashed line 9ខ្សែរបស់ប្រទេសចិន ដើម្បីគ្រប់គ្រងជួរកោះផ្កាថ្មស្កាបូរ៉ូ និងបណ្ដុំកោះស្ព្រៀតលី ក្នុងសមុទ្រចិនខាងត្បូង ដែលទោះជាក្រុងប៉េកាំង ប្រកាសមិនព្រមទទួលយកសាលក្រមនោះ ដោយមិនដែលបានចូលរួមការតវ៉ារឿងក្ដីនេះតាំងពីដំបូងក៏ដោយ។
កាលពីថ្ងៃអង្គារ(ទី14កក្កដា) ស្ថានឯកអគ្គរដ្ឋទូតចិន ប្រចាំក្រុងវ៉ាស៊ីនតោន បានចេញមកតបត សេចក្ដីថ្លែងការណ៍របស់លោកប៉ុមប៉េអូ ដោយបានប្រាប់ថា គឺជាការចោទប្រកាន់ដែលគ្មានហេតុផលអ្វីទាំងអស់ និងថា អាមេរិក គ្មានចំណែកពាក់ព័ន្ធដោយផ្ទាល់ក្នុងចំណុចវិវាទនេះទេ តែបែរជាខិតខំជ្រៀតជ្រែកក្នុងរឿងនេះដោយមិនឈប់ឈរ ដោយប្រើលេសក្នុងការថែរក្សាស្ថិរភាព ដើម្បីពង្រីកឥទ្ធិពល ញុះញង់ឱ្យស្ថានការណ៍តានតឹង និងមានការប្រឈមមុខនៅក្នុងភូមិភាគ។
សេចក្ដីថ្លែងការណ៍របស់ចិន បានណែនាំឱ្យអាមេរិកធ្វើតាមអ្វីដែលខ្លួនធ្លាប់បាននិយាយថា នឹងមិនប្រកាន់យកខាងណា និងគោរពការព្យាយាមរបស់ប្រទេសក្នុងភូមិភាគ ក្នុងការថែរក្សាសុខសន្តិភាព និងស្ថិរភាពក្នុងសមុទ្រចិនខាងត្បូង។
ចំណែកលោក ជូ ហ្វឹង អគ្គនាយកមជ្ឈមណ្ឌលសិក្សាស្រាវជ្រាវផ្នែកសមុទ្រចិនខាងត្បូង របស់មហាវិទ្យាល័យណានគីង ក្នុងប្រទេសចិន មើលឃើញថា ការថ្លែងការណ៍ របស់លោកប៉ុមប៉េអូ គឺជាការផ្លាស់ប្ដូរដ៏ធំមួយក្នុងនយោបាយសមុទ្រចិនខាងត្បូង របស់ប្រទេសអាមេរិក ហើយលោកបានបន្ថែមថា ប្រទេសដទៃទៀត ដែលសាកល្បងនឹងការអាងសិទ្ធិរបស់ប្រទេសចិន នឹងប្រើវិធីរឹងត្អឹង កាន់តែខ្លាំងឡើង បន្ទាប់ពីអាមេរិកប្រកាសគាំទ្រប្រទេសទាំងនោះយ៉ាងបើកចំហ និងធ្វើឱ្យភូមិភាគនេះ តានតឹងឡើងជាថ្មីម្ដងទៀត។
យ៉ាងណាក៏ដោយ លោកមិនយល់ស្របទេ ដែលប្រទេសចិន នឹងតបតទៅវិញយ៉ាងខ្លាំងក្លានោះ ដោយលោកបានឱ្យហេតុផលថា នយោបាយបច្ចុប្បន្ន របស់សហរដ្ឋអាមេរិក ចំពោះប្រទេសចិន គ្មានសារៈខ្លឹមសារច្បាស់លាស់ទេ ដោយសារតែត្រូវដំណើរការ ចេញពីការព្យាយាមក្នុងការយកឈ្នះការបោះឆ្នោតរបស់លោកត្រាំ ដោយការពង្រីកបញ្ហាជាមួយចិន ឱ្យមើលទៅឃើញធំ លើសពីការពិត ដើម្បីបិទបាំងការបរាជ័យរបស់ខ្លួនក្នុងការការពារ រោគរាតត្បាត។
ខណៈពេលជាមួយគ្នា ក្នុងផ្នែកមួយទៀត ប្រទេសជប៉ុនក៏បានចេញមកវាយប្រហារប្រទេសចិន លើចំណុចវិវាទផ្នែកអធិបតេយ្យភាព ដូចគ្នាដែរ ដោយក្នុងរបាយការណ៍ការពារជាតិប្រចាំឆ្នាំបែបរំឭកឡើងវិញ ដែលបានផ្សព្វផ្សាយកាលពីថ្ងៃអង្គារ(ទី14កក្កដា) បានចោទប្រកាន់ថា ប្រទេសចិនបានបញ្ចេញទិន្នន័យកុហកពាក់ព័ន្ធនឹងមេរោគវីរុសកូរ៉ូណាប្រភេទថ្មី និងបានបញ្ជាក់ថា កិច្ចការងាររបស់កងទ័ពជើងទឹកចិន ជារឿងដែលគួរឱ្យកង្វល់យ៉ាងខ្លាំង។
ឯកសារដែលនិយាយអំពីនយោបាយការពារជាតិរបស់ប្រទេសជប៉ុន បានចោទប្រកាន់ប្រទេសចិនថា បានព្យាយាមឃោសនាឱ្យជឿជាក់ ដែលរួមទាំងការបញ្ចេញទិន្នន័យក្លែងក្លាយ ពាក់ព័ន្ធនឹងមេរោគវីរុសកូរ៉ូណា ដែលចាប់កំណើតឡើងនៅក្នុងទីក្រុងវូហាន កាលពីចុងឆ្នាំកន្លងទៅ ដូចជា ធ្វីតធើររបស់ក្រសួងការបរទេសចិន ដែលបានបញ្ជាក់ថា កងទ័ពអាមេរិក អាចជាអ្នកនាំមេរោគវីរុសទៅព្រលែងឱ្យឆ្លងនៅក្នុងទីក្រុងវូហាន និងការអះអាងថា ឱសថបុរាណចិន អាចព្យាបាលជំងឺកូវីដ-19 បាន ជាដើម។
ឯកសារនោះ នៅបានចោទប្រកាន់ទៀតថា ប្រទេសចិនបានខំព្យាយាមតែម្នាក់ឯង ជាបន្តបន្ទាប់ដើម្បីផ្លាស់ប្ដូរឋានៈដើម ដោយការរុករានដែនទឹកជុំវិញបណ្ដុំកោះ ក្នុងសមុទ្រចិនខាងកើត ដែលជប៉ុនហៅឈ្មោះថា សេងកាគុ តែចិនដែលអាងសិទ្ធិដូចគ្នានោះ ហៅឈ្មោះថា តៀវអ៊ី។ ឯកសារបញ្ជាក់ថា នេះគឺជារឿងដែលគួរឱ្យកង្វល់ខ្លាំងបំផុត ព្រមជាមួយនោះ ឯកសារនៅបានបញ្ជាក់បន្ថែមទៀតថា ក្រុងប៉េកាំង បានចំណាយថវិកាលើវិស័យការពារជាតិយ៉ាងលាក់បាំងមកជាង 30ឆ្នាំហើយ៕
ប្រភព៖ សាព័រ៌មានបរទេស
ប្រែសម្រួលដោយ តាវ៉ែនតា
July 15, 2020
ចិនត្រៀមដាក់ទណ្ឌកម្មក្រុមហ៊ុនអាមេរិក “ឡក់ហ៊ីត ម៉ាទីន” ព្រោះក្ដៅចិត្ត ដែលក្រុមហ៊ុននេះលក់អាវុធទៅឱ្យតៃវ៉ាន់
ចិននឹងដាក់ទណ្ឌកម្មទៅលើក្រុមហ៊ុន ឡក់ហ៊ីត ម៉ាទីន ពីបទមានចំណែកពាក់ព័ន្ធនឹងករណីដែលសហរដ្ឋអាមេរិកបានអនុម័តលក់អាវុធទៅឱ្យកោះតៃវ៉ាន់កាលពីពេលថ្មីៗនេះ បន្ថែមពីលើសម្ព័ន្ធភាពដ៏តានតឹងដែលកំពុងមានស្រាប់ រវាងប្រទេសទាំង2។ នេះបើតាមការបង្ហើបឱ្យដឹងរបស់ក្រសួងការបរទេសចិនកាលពីថ្ងៃអង្គារ(ទី14កក្កដា)។
ក្រុមហ៊ុនផលិតកម្មសញ្ជាតិអាមេរិកមួយនេះ គឺជាអ្នកម៉ៅការធំជាងគេរបស់គ្រោងការកែសម្រួលប្រព័ន្ធកាំជ្រួចបាញ់ពីផ្ទៃដីឆ្ពោះទៅអវកាស “ភែទ្រីអូត” ឱ្យតៃវ៉ាន់ ដែលមានតម្លៃសរុប 620លានដុល្លារ ដែលសហរដ្ឋអាមេរិកទើបតែអនុម័តកាលពីសប្ដាហ៍កន្លងទៅនេះឯង។
លោក ចាវ លីចៀន អ្នកនាំពាក្យ នៃក្រសួងការបរទេសចិន បានទាមទារឱ្យសហរដ្ឋអាមេរិក បញ្ឈប់ការលក់អាវុធទៅឱ្យកោះតៃវ៉ាន់ ដើម្បីចៀសវាងការធ្វើឱ្យខូចខាតដល់សម្ព័ន្ធភាពរវាងក្រុងប៉េកាំង និងក្រុងវ៉ាស៊ីនតោន រួមទាំងបំផ្លាញស្ថិរភាពក្នុងច្រកសមុទ្រតៃវ៉ាន់ផងដែរ។
លោកចាវ លីចៀនបានប្រាប់ទៅអ្នកសារព័ត៌មាន ដោយមិនបានរៀបរាប់លម្អិតថា “ដើម្បីការពារផលប្រយោជន៍របស់ប្រទេស ចិនបានសម្រេចចិត្តប្រើប្រាស់វិធានការផ្សេងៗដែលចាំបាច់ និងកំណត់វិធានការដាក់ទណ្ឌកម្មទៅលើអ្នកម៉ៅការធំជាងគេសម្រាប់ការលក់នេះ គឺក្រុមហ៊ុន ឡក់ហ៊ីត ម៉ាទីន”។
ក្រុមហ៊ុន ឡក់ហ៊ីត ម៉ាទីន មិនទាន់ចេញមកសម្ដែងពីការយល់ឃើញយ៉ាងណាចំពោះរឿងនេះនៅឡើយ។
សហរដ្ឋអាមេរិក ក៏ដូចជាប្រទេសភាគច្រើនដែរ គឺគ្មានសម្ព័ន្ធភាពខាងការទូតជាផ្លូវការជាមួយកោះតៃវ៉ាន់ឡើយ តែមានចំណងកិច្ចសន្យាខាងច្បាប់ សម្រាប់ប្រគល់កម្មវិធី ឬការណែនាំផ្សេងៗក្នុងការការពារខ្លួនដល់កោះប្រជាធិបតេយ្យមួយនេះ។
កាលពីពេលមុននេះ ចិនធ្លាប់បានថ្លែងដាក់ទណ្ឌកម្មបែបដូចគ្នានេះទៅលើក្រុមហ៊ុននានារបស់អាមេរិក ដែលលក់អាវុធទៅឱ្យតៃវ៉ាន់ តែមិនបានប្រាកដច្បាស់ថា វាជាវិធានការដាក់ទណ្ឌកម្មបែបណា ដែលពួកគេនឹងប្រើនោះទេ។
រដ្ឋបាលក្នុងកោះតៃវ៉ាន់ បានសម្ដែងការស្វាគមន៍ ចំពោះការបង្កើនសក្ដានុពលកាំជ្រួចរបស់ខ្លួនក្នុងគ្រានេះ ខណៈដែលពួកគេបានលើកកម្ពស់ការការពារខ្លួន ដើម្បីឆ្លើយតបនឹងអ្វីដែលពួកគេសម្លឹងមើលឃើញថា សកម្មភាពដែលបង្កគ្រោះថ្នាក់កាន់តែច្រើនឡើងជារឿយៗរបស់ចិន ក្នុងនោះរួមទាំងការធ្វើសមយុទ្ធខាងនាវាចម្បាំង និងខាងអាកាសជាញឹកញាប់នៅក្បែរកោះតៃវ៉ាន់ទៀតផង។
រដ្ឋមន្ត្រីការពារជាតិ របស់តៃវ៉ាន់ ដែលធ្វើដំណើរទៅពិនិត្យ និងសួរសុខទុក្ខបណ្ដានាយទាហានក្នុងអំឡុងពេលធ្វើសមយុទ្ធប្រចាំឆ្នាំ Han Kuang Exercise បានប្រាប់ទៅកងកម្លាំងទាំងនោះថា ពួកគេចាំបាច់ត្រូវតែរឹងមាំ ក្នុងការប្រឈមមុខនឹងការបង្កគ្រោះភ័យ និងការញុះញង់ពីសំណាក់ប្រទេសចិនគ្រប់រូបបែប។
ទោះជាកងទ័ពតៃវ៉ាន់ បានទទួលការហ្វឹកហាត់យ៉ាងល្អ និងមានអាវុធយុទ្ធោបករណ៍ទាន់សម័យ ដែលភាគច្រើនផលិតដោយសហរដ្ឋអាមេរិកក៏ដោយ តែប្រទេសចិន មានកម្លាំងទ័ពក្នុងចំនួនដ៏ច្រើនលើសលប់ ដូចគ្នានឹងអាវុធយុទ្ធភណ្ឌដ៏ទាន់សម័យរបស់ខ្លួន ដែលមានដូចជា យន្តហោះប្រដេញបំបាំងកាយ និងកាំជ្រួចស៊េរីថ្មីៗជាច្រើន៕
ប្រភព៖ សាព័ត៌មានបរទេស
July 15, 2020
ផ្លូវល្បឿនលឿនឆ្លងកាត់សមុទ្រខ្សាច់ធំជាងគេលំដាប់ទី4នៅប្រទេសចិន (វីដេអូ)
ផ្លូវល្បឿនលឿនតភ្ជាប់ពីខេត្ត Qinghai ទៅកាន់តំបន់ស្វយ័ត Inner Mongolia ដែលមានកំនាត់ផ្លូវប្រវែង18គីឡូម៉ែត្រត្រូវឆ្លងកាត់សមុទ្រខ្សាច់ Tengger តាមគម្រោងនឹងត្រូវបានដាក់ឱ្យដំណើរការចាប់ពិឆ្នាំ2021ខាងមុខនេះហើយ។
ផ្លូវមួយកំណាត់នៃផ្លូវល្បឿនលឿនតភ្ជាប់ខេត្ត Qinghai និងម៉ុងហ្គោលីខាងក្នុង (Inner Mongolia) កំពុងត្រូវបានសាងសង់យ៉ាងញាប់ដៃញាប់ជើង។
កំណាត់ផ្លូវប្រវែង18គីឡូម៉ែត្រនៅក្នុងខេត្ត Ningxia ឆ្លងកាត់តំបន់សមុទ្រខ្បាច់ Tengger ដែលមានផ្ទៃដីទំហំ36,700គីឡូម៉ែត្រក្រឡា។ នេះគឺជាផ្លូវល្បឿនលឿនដំបូងគេបង្អស់ដែលត្រូវបានស្ថាបនាឆ្លងកាត់តំបន់ Ningxia នេះ។
តាមគម្រោង ផ្លូវល្បឿនលឿននេះ នឹងត្រូវបានដាក់ឱ្យប្រើប្រាស់ចាប់ពីឆ្នាំ2021ខាងមុខ។ Tengger គឺជាសមុទ្រខ្សាច់ធំជាងគេលំដាប់ទី4នៅប្រទេសចិន ហើយវាក៏កំពុងតែបន្តពង្រីកមាឌផងដែរ។
ចំណែកសមុទ្រខ្សាច់ដែលធំជាងគេបង្អស់នៅប្រទេសចិនវិញ គឺសមុទ្រខ្សាច់ Taklamakan ដោយមានទំហំផ្ទៃដី 337,000គីឡូម៉ែត្រក្រឡា និងមានទីតាំងនៅភាគនិរតីនៃខេត្ត Xinjiang ភាគពាយព្យប្រទេសចិន៕

ប្រភព៖ សារព័ត៌មានបរទេស
July 14, 2020
ជិះជណ្ដើរប្រអប់តែ1នាទីសោះ ចម្លងCOVID-19 ទៅអ្នកផ្សេងបាន71នាក់
ស្ត្រីជនជាតិចិនម្នាក់នៅសហរដ្ឋអាមេរិកមានផ្ទុកវីរុសCOVID-19 ប៉ុន្តែមិនមានរោគសញ្ញា បានចម្លងវីរុសនេះទៅមនុស្សចំនួន71នាក់នៅក្នុងរយៈពេលត្រឹមតែ60វិនាទីនៃការជិះជណ្ដើរប្រអប់។
សេចក្ដីលម្អិតអំពីរឿងរ៉ាវដ៏គួរភ្ញាក់ផ្អើលនេះ ត្រូវបានបង្ហើបឱ្យដឹងនៅក្នុងសេចក្ដីប្រកាសអំពីលទ្ធផលនៃការសិក្សាស្រាវជ្រាវមួយដែលធ្វើឡើងដោយមជ្ឈមណ្ឌលគ្រប់គ្រងរោគឆ្លងនៃសហរដ្ឋអាមេរិក (CDC)។ បញ្ហានេះបាននាំឱ្យមានការព្រួយបារម្ភជាខ្លាំងទាក់ទិននឹងអ្នកផ្ទុកវីរុសប៉ុន្តែគ្មានរោគសញ្ញា រួមនឹងការជិះជណ្ដើរប្រអប់។
ស្ត្រីម្នាក់ខាងលើនេះបានចេញពីសហរដ្ឋអាមេរិក ត្រលប់ទៅផ្ទះរបស់ខ្លួននៅឯខេត្ត Heilongjiang ប្រទេសចិនកាលពីថ្ងៃទី19មីនា។ បើទោះជាមិនមានរោគសញ្ញា ប៉ុន្តែស្ត្រីម្នាក់នេះនៅតែនៅដាច់ដោយឡែកពីគេឯង។
ការធ្វើតេស្តបន្ទាប់នោះក៏បានរកឃើញថា នាងមានផ្ទុកវីរុសCOVID-19។ 3សប្ដាហ៍ក្រោយមក មនុស្សម្នាក់ក្នុងចំណោមអ្នកជិតខាង និងមនុស្សចំនួន4នាក់ផ្សេងទៀតដែលបានទាក់ទងផ្ទាល់ជាមួយនឹងអ្នកជិតខាង ក៏បានឆ្លងវីរុស។
ស្ត្រីម្នាក់ដែលទើបមកពីសហរដ្ឋអាមេរិកនោះ និងអ្នកជិតខាងទាំងនោះ មិនបានទាក់ទងផ្ទាល់នឹងគ្នានោះទេ ប៉ុន្តែពួកគេប្រើប្រាស់ជណ្ដើរប្រអប់តែមួយនៅក្នុងអំឡុងពេលខុសៗគ្នា។ ស្ត្រីមកពីសហរដ្ឋអាមេរិកជិះជណ្ដើរប្រអប់តែម្នាក់ឯងក្នុងរយៈពេលប្រហែល60វិនាទី ប៉ុន្តែមិនបានជួបអ្នកណាម្នាក់នោះទេ។
យោងតាមការស្រាវជ្រាវរបស់ CDC (អាមេរិក) អ្នកជិតខាងរបស់ស្ត្រីមកពីអាមេរិក ប្រហែលជាបានឆ្លងវីរុសនៅពេលប្រើប្រាស់ជណ្ដើរប្រអប់ក្នុងអគារដែលពួកគេនៅជាមួយគ្នា ក្រោយពីស្ត្រីមកពីអាមេរិកបានប្រើប្រាស់ជណ្ដើរនោះ។ CDC របស់សហរដ្ឋអាមេរិកយល់ថា ការឆ្លងរាលដាលនេះអាចកើតឡើងនៅពេលអ្នកជិតខាងបានប៉ះទៅលើផ្ទៃអ្វីមួយនៅក្នុងជណ្ដើរប្រអប់ ដូចជាជញ្ជាំង ឬគ្រាប់ចុចលេខរបស់ជណ្ដើរជាដើម។
ជណ្ដើរប្រអប់គឺជាទីកន្លែងដ៏សុខសាន្តសម្រាប់ COVID-19 រស់នៅ និងចម្លងទៅអ្នកផ្សេង
ក្រៅពីអ្នកដែលបានរៀបរាប់ខាងលើ មិនមានអ្នកណាម្នាក់ផ្សេងទៀតក្នុងអគារនោះបានឆ្លងវីរុសនោះទេ ប៉ុន្តែ ការស្រាវជ្រាវបន្ទាប់មក ក៏បានបង្ហាញថា អ្នកជិតខាងរបស់ស្ត្រីមកពីអាមេរិក គឺជាអ្នកជំងឺទី0នៅក្នុងក្រុមមនុស្ស71នាក់ដែលបានឆ្លងវីរុស។
ក្រុមអ្នកស្រាវជ្រាវបានឱ្យដឹងថា “លទ្ធផលនៃការស្រាវជ្រាវរបស់យើងបានបញ្ជាក់ថា មនុស្សម្នាក់ដែលមានផ្ទុកវីរុស អាចបង្កការឆ្លងរាលដាលនៅក្នុងសង្គម”។ អ្នកស្រាវជ្រាវបន្តថា ជណ្ដើរប្រអប់គឺជាទីកន្លងដ៏ល្អសម្រាប់ការចម្លងវីរុសCOVID-19 ព្រោះថា វាជាកន្លែងតូចចង្អៀត នាំឱ្យវីរុសដែលមាននៅក្នុងកម្ទេចទឹកតូចៗ ងាយស្រួលក្នុងការរក្សាជីវិត និងតោងជាប់ជញ្ជាំងជណ្ដើរប្រអប់ បន្ទាប់ពីអ្នកផ្ទុកវីរុសបានក្អក កណ្ដាស់ ឬនិយាយគ្នា។
ការស្រាវជ្រាវកន្លងមកបានបញ្ជាក់ថា COVID-19 អាចតោងជាប់នឹងផ្ទៃរបស់វត្ថុអ្វីមួយ ហើយរស់បានជាច្រើនថ្ងៃ ពិសេសគឺផ្ទៃរបស់ដែកអ៊ីណុក ឬជ័រជាដើម៕
ប្រភព៖ The Sun
July 14, 2020
ជិត575,000នាក់ស្លាប់ដោយសារCOVID-19! WHO ថាប្រទេសជាច្រើនកំពុងដើរខុសទិសដៅក្នុងការទប់ស្កាត់វីរុស
ពិភពលោកបានរកឃើញអ្នកផ្ទុកវីរុសCOVID-19 ជាង13.2លាននាក់ និងអ្នកស្លាប់ជិត575,000នាក់ ខណៈដែល WHO ព្រមានថា ស្ថានភាពជាក់ស្ដែង អាចអាក្រក់ជាងនេះ។
ក្នុងរយៈពេល24ម៉ោងកន្លងទៅនេះ ពិភពលោកទាំងមូលបានរកឃើញអ្នកផ្ទុកវីរុសCOVID-19 ចំនួន193,793នាក់ និងអ្នកស្លាប់ចំនួន3,754នាក់ ធ្វើឱ្យតួលេខអ្នកជំងឺសរុបកើនដល់13,216,112នាក់ និងអ្នកស្លាប់ក៏កើនដល់574,753នាក់។ អ្នកជំងឺដែលបានជាសះស្បើយ បានកើនដល់7,683,112នាក់។
សហរដ្ឋអាមេរិក គឺជាសម្បុកវីរុសធំជាងគេបង្អស់ក្នុងពិភពលោក ដោយចំនួនអ្នកជំងឺសរុបបានកើនដល់3,474,296នាក់ ខណៈចំនួនអ្នកស្លាប់កើនដល់138,182នាក់។ អ្នកជំងឺថ្មី និងអ្នកស្លាប់ថ្មី មានចំនួនបន្តបន្ទាប់គឺ 62,970នាក់ និង409នាក់។
តាមពីក្រោយសហរដ្ឋអាមេរិក គឺប្រទេសប្រស៊ីល ដោយមានអ្នកជំងឺសរុប1,884,967នាក់ និងអ្នកស្លាប់សរុប72,833នាក់។ ក្នុងរយៈពេល24ម៉ោងចុងក្រោយនេះ ប្រេស៊ីលរកឃើញអ្នកជំងឺ18,791នាក់ និងអ្នកស្លាប់682នាក់។
ចំណែកឥណ្ឌាវិញ គឺជាប្រទេសដែលបានរកឃើញអ្នកផ្ទុកវីរុសច្រើនជាងគេលំដាប់ទី3ក្នុងពិភពលោក។ ប្រទេសនេះមានអ្នកជំងឺសរុប878,254នាក់ និងអ្នកស្លាប់សរុប23,174នាក់។
ប្រធានអង្គការសុខភាពពិភពលោក (WHO) លោក Tedros Adhanom Ghebreyesus កាលពីម្សិលមិញបានព្រមានថា ស្ថានភាពវិបត្តិCOVID-19 នឹងកាន់តែអាក្រក់ឡើងៗ។ លោកថ្លែងថា “ខ្ញុំសូមនិយាយត្រង់ៗថា មានប្រទេសច្រើនណាស់ដែលកំពុងដើរខុសទិសដៅ។ COVID-19 នៅតែជាសត្រូវលំដាប់ទី1របស់ពិភពលោក។ បើសិនជាគោលការណ៍ជាមូលដ្ឋានមិនត្រូវបានគោរពតាម នោះស្ថានភាពមហារោគរាតត្បាតនឹងកាន់តែអាក្រក់ឡើងៗពីមួយថ្ងៃទៅមួយថ្ងៃជាក់ជាមិនខាន”៕
ប្រភព៖ សារព័ត៌មានបរទេស
July 14, 2020
លោក ត្រាំ ពាក់ម៉ាស់ការពារជាលើកដំបូង ខណៈអាមេរិកអ្នកឆ្លងជំងឺថ្មីនៅតែកើនឡើងខ្លាំង
លោកដូណាល់ ត្រាំ សុខចិត្តពាក់ម៉ាស់អនាម័យការពារនៅក្នុងទីសាធារណៈជាលើកដំបូង កាលពីថ្ងៃសៅរ៍(ទី11កក្កដា) ខណៈដែលរបាយការណ៍ចំនួនអ្នកឆ្លងមេរោគកូវីដ-19 ប្រចាំថ្ងៃ បានកើនឡើងឥតឈប់ឈរ ចំណែកសួនកម្សាន្ត វ៉លដ៍ ឌីស្នីយ៍ ក្នុងរដ្ឋហ្វ្លរីដា ដែលនៅតែរកឃើញការឆ្លងរាលដាលនោះ ចាប់ផ្ដើមបើកបម្រើសេវាកម្មជាថ្មីឡើងវិញកាលពីចុងសប្ដាហ៍កន្លងទៅ ខណៈដែលហុងកុង បានបញ្ជាឱ្យបិទសាលារៀនម្ដងទៀតចាប់តាំងពីថ្ងៃចន្ទ(ទី13កក្កដា) តទៅ ក្រោយពីរកឃើញការឆ្លងមេរោគក្នុងតំបន់កើនឡើងយ៉ាងឆាប់រហ័ស។
អ្នកជំនាញការរបស់មន្ទីរសេតវិមាន ដែលជាអ្នកដឹកនាំការប្រយុទ្ធប្រឆាំងនឹងវិបត្តិរោគរាតត្បាតនៅក្នុងប្រទេសអាមេរិក បានណែនាំមកជាយូរហើយ ឱ្យពាក់ម៉ាស់ការពារនៅក្នុងទីសាធារណៈ ដើម្បីការពារការឆ្លងសាយភាយ តែលោកប្រធានាធិបតី ដូណាល់ ត្រាំ បែរជាព្រងើយកន្តើយ ទោះបីជាមានមន្ត្រីមន្ទីរសេតវិមានជាច្រើននាក់ត្រូវបានពិនិត្យឃើញថា បានឆ្លងមេរោគកូវីដ-19 និងអ្នកជំនួយការជាច្រើននាក់ចាប់ផ្ដើមពាក់ម៉ាស់ការពារហើយក៏ដោយ។
ទោះជាយ៉ាងនោះក្ដី ប៉ុន្មានម៉ោងក្រោយពីអង្គការសុខភាពពិភពលោក(WHO)អំពាវនាវឱ្យប្រទេសផ្សេងៗលើកកម្ពស់ការគ្រប់គ្រងការឆ្លងរាលដាល លោកត្រាំ បានយល់ព្រមពាក់ម៉ាស់អនាម័យការពារដែលមានរូបត្រាប្រធានាធិបតី ក្នុងអំឡុងពេលចុះទៅសួរសុខទុក្ខអតីតយុទ្ធជនដែលរងរបួសនៅឯមន្ទីរពេទ្យយោធា វ៉ធើរីត ក្រៅទីក្រុងវ៉ាស៊ីនតោន។
ទាំងអស់នេះ ក្រោយពីធ្វើដំណើរចេញពីមន្ទីរសេតវិមាន លោកត្រាំ បានប្រាប់ទៅអ្នកយកព័ត៌មានថា លោកមិនបានប្រឆាំងនឹងការពាក់ម៉ាស់ការពារទេ គ្រាន់តែជឿថា គួរតែពាក់នៅក្នុងទីកន្លែងណាខ្លះ និងពេលណាខ្លះតែប៉ុណ្ណោះ។
លោកត្រាំ មានពិន្ទុនិយមតាមពីក្រោយលោក ចូ បៃឌិន អនាគតបេក្ខភាពមកពីគណបក្ស ដេម៉ូក្រេត ក្នុងការបោះឆ្នោតជ្រើសតាំងប្រធានាធិបតីសហរដ្ឋអាមេរិក ដែលនឹងធ្វើឡើងនៅដើមខែវិច្ឆិកាខាងមុខ ដោយការធ្វើប្រជាមតិ បានបញ្ជាក់ថា ប្រជាជនអាមេរិកាំងភាគច្រើន មិនពេញចិត្តនឹងវិធានការទប់ទល់វិបត្តិរោគរាតត្បាតរបស់លោកត្រាំឡើយ តែមេដឹកនាំសហរដ្ឋអាមេរិករូបនេះ នៅតែអួតអាងពីស្នាដៃក្នុងការចាត់ការវីរុសកូរ៉ូណារបស់ខ្លួន ទោះជាចំនួនអ្នកឆ្លងមេរោគនេះនៅក្នុងប្រទេសនៅតែកើនឡើងខ្ពស់ឥតឈប់ឈរក៏ដោយ។ របាយការណ៍ដែលចេញមកកាលពីរាត្រីថ្ងៃសៅរ៍(ទី11កក្កដា) បានបញ្ជាក់ថា ចំនួនអ្នកឆ្លងមេរោគថ្មីក្នុងជុំ 24ម៉ោង មាន 66,528នាក់ ដែលជាស្ថិតិខ្ពស់បំផុតជាថ្មី និងស្លាប់ជិត 800នាក់ សរុបទាំងអស់ជិត 135,000នាក់។
នៅឯរដ្ឋហ្វ្លរីដា បានរកឃើញករណីថ្មី 1ក្នុងចំណោម 6 របស់ប្រទេស ខណៈដែលសួនកម្សាន្ត វ៉លដ៍ ឌីស្នីយ៍ បានបើកបម្រើសេវាកម្មឡើងវិញ ក្រោយពីបិទអស់រយៈពេល 4ខែ ដោយសាររោគរាតត្បាតនេះ។ អ្នកទេសចរជាច្រើនរយនាក់ បានមកឈរតម្រង់ជួរ ដើម្បីចូលទៅកម្សាន្តនៅក្នុងធីមផាក ក្នុងទីក្រុងអ័រលែនដូមួយនេះ ដោយទាំងអស់គ្នាសុទ្ធតេពាក់ម៉ាស់អនាម័យការពារ រក្សាគម្លាតឆ្ងាយពីគ្នា និងប្រតិបត្តិតាមវិធានការសុខភាពអនាម័យនានា ដែលសួនកម្សាន្តនេះបានកំណត់។
កាលពីពេលមុននេះ លោកអាន់ថូនី ហ្វៅស៊ី អ្នកជំនាញការកំពូលផ្នែករោគឆ្លងរបស់សហរដ្ឋអាមេរិក បានបញ្ជាក់ថា រដ្ឋហ្វ្លរីដា ចាប់ផ្ដើមបើកទីក្រុងឡើងវិញមុនពេលកំណត់ សម្រាប់ការបន្ធូរបន្ថយវិធានការបិទទីក្រុងយ៉ាងសុវត្ថិភាព។
ខណៈនេះ មានអ្នកឆ្លងមេរោគកូវីដ-19 ទូទាំងពិភពលោកជិត 13លាននាក់ និងស្លាប់ 560,000នាក់ ហើយវិបត្តិរោគរាតត្បាតនេះ នៅតែបន្តសាងការខូចខាតយ៉ាងធំមហាសាលខាងសេដ្ឋកិច្ច ចាប់តាំងពីមេរោគនេះបានចាប់កំណើតឡើងនៅក្នុងប្រទេសចិនកាលពីចុងឆ្នាំកន្លងទៅ។
អាមេរិកជាប្រទេស ដែលមានការឆ្លងរាលដាលខ្លាំងក្លាបំផុត តាមពីក្រោយដោយប្រទេសប្រេស៊ីល ដែលមានអ្នកស្លាប់គិតត្រឹមថ្ងៃសុក្រសប្ដាហ៍មុនចំនួនជាង 70,000នាក់។
ក្នុងថ្ងៃជាមួយគ្នានោះ លោក ថេដ្រូស អាត់ហាណូម គេប្រេយេស៊ុស ប្រធានអង្គការសុខភាពពិភពលោក បានអំពាវនាវក្នុងអំឡុងការថ្លែងព័ត៌មាននៅឯទីក្រុងហ្សឺណែវ ប្រទេសស្វ៊ីស ឱ្យប្រទេសផ្សេងៗប្រើវិធានការម៉ឺងម៉ាត់ ដើម្បីចាត់ការមេរោគដ៏កំណាចនេះ ដោយបានលើកពីភាពជោគជ័យរបស់ប្រទេសអ៊ីតាលី កូរ៉េខាងត្បូង និងប្រទេសផ្សេងទៀត និងបានបន្ថែមថា វិធានការម៉ឺងម៉ាត់ រួមជាមួយការរួមដៃគ្នាកម្រិតប្រទេស និងទូទាំងពិភពលោក នឹងអាចក្រឡាស់ស្ថានការណ៍រោគរាតត្បាតនេះបាន។
លោកប្រធានាធិបតី នៃប្រទេសអ៊ីស្រាអែល បេនចាមីន នេតាន់យ៉ាហ៊ូ បានទទួលស្គាល់ថា ការសម្រេចចិត្តអនុញ្ញាតឱ្យរង្គសាល និងធុរកិច្ចផ្សេងៗបើកដំណើរការឡើងវិញនោះ អាចនឹង “ឆាប់រហ័សពេក” ក្រោយពីរកឃើញអ្នកឆ្លងមេរោគកើនឡើងដល់ទៅ 1,500នាក់ ក្នុងថ្ងៃសុក្រតែ 1ថ្ងៃ ចំណែកប្រទេសបារាំង រដ្ឋបាលបានប្រកាសដាស់តឿនថា ចំនួនអ្នកឆ្លងមេរោគ បានត្រឡប់មកកើនឡើងជាថ្មីម្ដងទៀត ខណៈដែលចំនួនអ្នកស្លាប់បានឡើងដល់ 30,000នាក់។
ឯប្រទេសអូស្ត្រាលី បានឱ្យដឹងថា នឹងកាត់បន្ថយចំនួនពលរដ្ឋ ដែលធ្វើដំណើរត្រឡប់ពីបរទេស ក្នុង 1ថ្ងៃឱ្យបានពាក់កណ្ដាល ក្រោយពីចំនួនអ្នកឆ្លងមេរោគ នៅតែហក់ឡើងខ្ពស់ក្នុងទីក្រុងមែលប៊ន ដែលត្រូវបិទម្ដងទៀតតាំងពីចុងសប្ដាហ៍ទីមួយ នៃខែកក្កដា។
នៅហុងកុង រកឃើញអ្នកឆ្លងមេរោគកើនឡើងដូចគ្នា ក្រោយពីប្រជាជននាំគ្នាត្រឡប់មកដំណើរការជិវិតរស់នៅដូចកាលពីពេលមុនច្រើនឡើង ដោយភោជនីយដ្ឋាន និងបារ៍ រួមទាំងមណ្ឌលទេសចរណ៍បែបវប្បធម៌ បានទទួលការអនុញ្ញាតឱ្យបើកឡើងវិញតាមប្រក្រតី។
យ៉ាងណាក៏ដោយ រដ្ឋបាលទីក្រុងហុងកុង មានបញ្ជាឱ្យបិទសាលារៀនទាំងអស់ជាថ្មីម្ដងទៀត តាំងពីថ្ងៃចន្ទ(ទី13កក្កដា)នេះ ក្រោយរកឃើញការឆ្លងមេរោគនៅក្នុងតំបន់កើនឡើងយ៉ាងឆាប់រហ័ស៕
ប្រភព៖ សារព័ត៌មានបរទេស
July 13, 2020