អន្តរជាតិ - La Reine Media

ចិនកំពុងបង្ហើយការសាងសង់នាវាផ្ទុកយន្តហោះក្នុងស្រុកទីពីរ ខណៈនាវាបន្ទាប់កំពុងចាប់ផ្ដើមសាងសង់ ឯនាវាទីប្រាំនឹងដើរដោយថាមពលនុយក្លេអែ

ប្រទេសចិនអាចសាងសង់បង្ហើយនាវាផ្ទុកយន្តហោះក្នុងស្រុកទីពីរ នៅពាក់កណ្ដាលឆ្នាំ2021 និងកំពុងពន្លឿនការសាងសង់នាវាផ្ទុកយន្តហោះបន្ទាប់ទៀត។

Type-002 ដែលជានាវាផ្ទុកយន្តហោះចម្បាំងទីបីរបស់ប្រទេសចិន និងជានាវាផ្ទុកយន្តហោះទីពីរដែលផលិតឡើងដោយស្នាដៃវិស្វករក្នុងស្រុក បានឈានចូលដល់ដំណាក់កាលដំឡើងចុងក្រោយ នេះបើតាមប្រភពព័ត៌មានចំនួន2ដែលបានឱ្យដឹងកាលពីថ្ងៃទី17កក្កដា។

ប្រភពព័ត៌មានមួយបានឱ្យដឹងថា ដំណើរការនៃការដំឡើងនាវាផ្ទុកយន្តហោះជំនាន់ថ្មី Type-002 បានចាប់ផ្ដើម ហើយបើតាមគម្រោង កិច្ចការនេះនឹងរួចរាល់នៅពាក់កណ្ដាលដើមឆ្នាំក្រោយ។ បុគ្គលិកនៃក្រុមសាងសង់នាវានេះក៏កំពុងតែចាប់ផ្ដើមដំឡើងបាតនាវា និងបានធ្វើពិធីសម្ពោធបើកការសាងសង់នាវាផ្ទុកយន្តហោះបន្ទាប់ ដែលជា “បងប្អូនរបស់ Type-002។ រោងសាងសង់នាវា Jiangnan នៅជាយក្រុងសៀងហៃ គឺជាអ្នកផលិតនាវាទាំងពីរនេះ”។

គម្រោងអភិវឌ្ឍនាវាផ្ទុកយន្តហោះចម្បាំង Type-002 ត្រូវបានចាប់ផ្ដើមតាំងពីឆ្នាំ2015 និងផ្ដើមការសាងសង់ចាប់ពីឆ្នាំ2018 ប៉ុន្តែផែនការនេះបានជួបបញ្ហាច្រើនជាបន្តបន្ទាប់។ រហូតដល់ឆ្នាំ2019 ដំណើរការសាងសង់នាវានេះក៏ត្រូវបានផ្អាកដោយសារតែបញ្ហាបច្ចេកទេស ក៏ដូចជាខ្វះថវិកា ព្រោះតែឥទ្ធិពលនៃសង្គ្រាមពាណិជ្ជកម្មរវាងចិនជាមួយនឹងសហរដ្ឋអាមេរិក រួមនឹងសកម្មភាពកំណែទម្រង់កងទ័ពរបស់ប្រទេសចិន។ មកដល់ដើមឆ្នាំ2020 ដំណើរការសាងសង់ក៏ត្រូវកាត់បន្ថយ ដោយសារតែ COVID-19។

ប្រភពព័ត៌មានមួយផ្សេងទៀតបានឱ្យដឹងថា “នាវាផ្ទុកយន្តហោះ Type-002 បន្ទាប់ នឹងត្រូវបានសាងសង់ឆាប់រហ័សជាងនាវាទីមួយ ដោយសារបុគ្គលិកមានបទពិសោធន៍ច្រើនជាងមុន និងអាចដោះស្រាយបញ្ហាបានលឿន។ នេះគឺជាការងារប្រកបដោយឧបសគ្គ ព្រោះថា Type-002 គឺជានាវាផ្ទុកយន្តហោះដំបូងដែលផលិតដោយជនជាតិចិន”។

រូបភាពមួយចំនួនដែលត្រូវបានបង្ហោះនៅលើបណ្ដាញសង្គមចិន និងត្រូវបានបង្ហោះឡើងវិញកាលពីថ្ងៃទី15កក្កដាដោយគណនី Twitter RupprechtDeino បានបង្ហាញថា ផ្នែកដ៏ធំចំនួន2 ដែលត្រូវបានដំឡើងភ្ជាប់ពីគ្រោងសម្រាប់សាងសង់ដែលមានស្រាប់របស់នាវា Type-002 កំពុងស្ថិតនៅលើផែអណ្ដែត។ នៅខាងលើនោះគឺជាទីលានសម្រាប់យន្តហោះចុះចត ដែលវាមិនទាន់ត្រូវបានសាងសងរួចរាល់នៅឡើយ។

រូបភាពនានាបានបង្ហាញថា ដំណើរការសាងសង់ ត្រូវបានពន្លឿនជាងមុន បើធៀបជាមួយនឹងរូបភាពផ្កាយរណបដែលត្រូវបានមជ្ឈមណ្ឌលស្រាវជ្រាវយុទ្ធសាស្ត្រនិងអត្តរជាតិប្រកាសបង្ហាញកាលពីខែមេសា2019។

Type-002 នឹងក្លាយជានាវាផ្ទុកយន្តហោះទីបីរបស់ប្រទេសចិន បន្ទាប់ពីនាវា Liaoning ដែលស្ថិតក្នុងក្រុម Type-001 ដែលត្រូវបានជួសជុលកែលម្អពីនាវាផ្ទុកយន្តហោះ Varyag និងនាវា Shandong ដែលផលិតក្នុងស្រុក និងស្ថិតក្នុងក្រុម Type-001A។

Liang Gouliang អ្នកជំនាញផ្នែកយោធានៅហុងកុង បានអះអាងថា Type-002 មិនមានឡប្រតិកម្មនុយក្លេអែ (រ៉េអាក់ទ័រនុយក្លេអ៊ែរ) នោះទេ។ “បច្ចេកវិទ្យានេះនឹងប្រើប្រាស់នៅក្នុងនាវា Type-003 ជានាវាផ្ទុកយន្តហោះទីប្រាំរបស់ចិន ដែលវាអាចត្រូវបានផលិតឡើងនៅក្នុងរោងសាងសង់នាវា Dalian” នេះបើតាមសម្ដីរបស់លោក Liang Gouliang៕

ប្រភព៖ SCMP

July 18, 2020

រ៉ុកកែត Falcon 9 របស់លោក Elon Musk នឹងនាំមនុស្សទៅកាន់អវកាសជាលើកទី2 នាពេលដ៏ខ្លីខាងមុខ

ជាន់ទីមួយនៃរ៉ុកកែត Falcon 9 ដែលប្រើប្រាស់សម្រាប់ជើងហោះហើរ Crew-1 ត្រូវបានដឹកទៅកាន់រដ្ឋ Florida កាលពីថ្ងៃទី14កក្កដា2020 ដើម្បីត្រៀមសម្រាប់ជើងហោះហើរដឹកមនុស្សទៅកាន់អវកាសជាលើកទី2នាពេលខាងមុខ។

តាមគម្រោង Falcon 9 នឹងត្រូវបានបាញ់បង្ហោះចេញពីមជ្ឈមណ្ឌលអវកាស Kennedy (KSC) របស់ទីភ្នាក់ងារអវកាសអាមេរិក NASA នៅថ្ងៃទី30សីហា ឆ្នាំ2020។ ក្បាលរុញច្រានរបស់រ៉ុកកែតនេះត្រូវបានដឹកពីមូលដ្ឋានរបស់ SpaceX នៅតំបន់ McGregor ក្នុង Texas ដោយមានស្រទាប់ការពារពណ៌ខ្មៅដែលត្រូវបានគ្របដណ្ដប់ពីលើ។

រ៉ុកកែត Falcon 9 កំពុងស្ថិតក្នុងដំណាក់កាលរៀបចំខ្លួន នៅមុនពេលត្រូវបានបាញ់បង្ហោះចេញពីទីតាំងរបស់ SpaceX ស្ថិតនៅក្នុងមូលដ្ឋានទ័ពអាកាស Cape Canavera ក្បែរ KSC។ នៅក្នុងជើងហោះហើរ The Crew-1 នឹងមានវត្តមានរបស់ក្រុមអវកាសចរ NASA គឺលោក Victor Glover លោក Michael Hopkins និងលោកស្រី Shannon Walker រួមនឹងអវកាសចរជប៉ុន លោក Soichi Noguchi។ ពួកគេនឹងធ្វើដំណើរតាមយានអវកាស Crew Dragon របស់ក្រុមហ៊ុន SpaceX ឡើងទៅកាន់ស្ថានីយអវកាសអន្តរជាតិ (ISS)។

Crew-1 នឹងជាជើងហោះហើរដំបូងបង្អស់នៅក្នុងបេសកកម្មយ៉ាងតិចចំនួន6 ដែល SpaceX នឹងត្រូវដំណើរការទៅតាមកិច្ចសន្យាតម្លៃ2.6ពាន់លានដុល្លារ ដែលក្រុមហ៊ុននេះបានចុះហត្ថលេខាជាមួយ NASA កាលពីឆ្នាំ2014។ ក៏ប៉ុន្តែ នេះមិនមែនជាជើងហោះហើរដឹកអ្នកអវកាសឡើងទៅលើ “មេឃ” ជាលើកទី1របស់ក្រុមហ៊ុន SpaceX នោះទេ។ មុននេះ ជើងហោះហើរសាកល្បងដំបូងដែលហៅថា Demo-2 ក៏បាននាំអវកាសចរ2រូបរបស់ NASA គឺលោក Bob Behnken និងលោក Doug Hurley ឡើងទៅកាន់ ISS កាលពីចុងខែឧសភា2020ម្ដងរួចហើយ។ Demo-2 គឺជាជើងហោះហើរដែលមានដឹកមនុស្សហោះចេញពីទឹកដីសហរដ្ឋអាមេរិកជាលើកដំបូងបង្អស់ រាប់ចាប់ពីក្រោយសម័យយានអវកាស Space Shuttle របស់ NASA ដែលត្រូវបានដាក់ឱ្យចូលនិវត្តន៍កាលពីខែកក្កដា2011 ហើយចាប់ពីពេលនោះមក ការហោះហើរពីផែនដីទៅកាន់ស្ថានីយអវកាសអន្តរជាតិ គឺសុទ្ធតែពឹងទៅលើយានអវកាស Soyuz របស់រុស្ស៊ី។

យោងតាមកាលបរិច្ឆេទ អវកាសចរ Behnken និង Hurley នឹងត្រលប់មកកាន់ផែនដីក្នុងរយៈពេលប៉ុន្មានសប្ដាហ៍ទៀតប៉ុណ្ណោះ។ បើសិនជាជើងហោះហើរ Demo-2 ទទួលបានជោគជ័យ នោះ SpaceX នឹងត្រូវបានអនុម័តឱ្យបាញ់បង្ហោះយាន Crew-1 ជាក់ជាមិនខាន៕

ប្រភព៖ Space

July 18, 2020

ករណីឆ្លងCOVID-19 នៅទូទាំងពិភពលោក បានកើន1លាននាក់ក្នុងរយៈពេល100ម៉ោងចុងក្រោយនេះ

សារព័ត៌មាន Reuters បានរកឃើញជាលើកដំបូងថា ករណីឆ្លងវីរុសCOVID-19 នៅទូទាំងពិភពលោក បានកើន1លាននាក់ក្នុងរយៈពេលត្រឹមតែ100ម៉ោងប៉ុណ្ណោះ នៅពេលដែលតួលេខសរុបបានកើនលើសពី14លាននាក់ កាលពីថ្ងៃទី17កក្កដាកន្លងទៅ។

ក្រោយរយៈពេល3ខែ បន្ទាប់ពីករណីឆ្លងវីរុសCOVID-19 ត្រូវបានប្រកាសឱ្យដឹងជាលើកដំបូងនៅប្រទេសចិនកាលពីដើមខែមករា ពិភពលោកពេលនោះបានរកឃើញអ្នកផ្ទុកវីរុសត្រឹមតែ1លាននាក់ប៉ុណ្ណោះ។ ក៏ប៉ុន្តែ គិតចាប់ពីថ្ងៃទី13កក្កដាដល់ថ្ងៃទី17កក្កដា ពោលគឺរយៈពេល4ថ្ងៃ ពិភពលោកបានរកឃើញករណីផ្ទុកវីរុសថ្មីដល់ទៅ1លាននាក់ ដោយកើនពី13លាននាក់ ឡើងដល់14លាននាក់។

យោងតាមការស្រង់ស្ថិតិរបស់ Reuters ដែលបានដកស្រង់ពីរបាយការណ៍របស់រដ្ឋាភិបាលនានា បានបង្ហាញថា ការឆ្លងរាលដាលនៃវីរុសនេះ កំពុងតែកើនឡើងយ៉ាងឆាប់រហ័សនៅទ្វីបអាមេរិក ដោយមានករណីឆ្លងច្រើនជាងពាក់កណ្ដាលបើធៀបនឹងពិភពលោកទាំងមូល។

គិតមកដល់បច្ចុប្បន្ន សហរដ្ឋអាមេរិកបានរកឃើញអ្នកផ្ទុកវីរុសCOVID-19 សរុប3,770,012នាក់ និងអ្នកស្លាប់ដោយសារវីរុសនេះមានចំនួន142,064នាក់។

ប្រទេសប្រេស៊ីលឈរលំដាប់ទី2 បន្ទាប់ពីសហរដ្ឋអាមេរិក ដោយមានអ្នកជំងឺជាង2,048,600នាក់ ក្នុងនោះក៏មានប្រធានាធិបតី Jair Bolsonaro ផងដែរ។ ចំណែកតួលេខអ្នកស្លាប់ដោយសារCOVID-19 របស់ប្រទេសនេះ មានជាង78,000នាក់។

ឥណ្ឌាដែលជាសម្បុកវីរុសCOVID-19 ធំជាងគេលំដាប់ទី3ក្នុងពិភពលោក បានរកឃើញអ្នកផ្ទុកវីរុសចំនួន1,040,457នាក់ ក្នុងនោះមានអ្នកស្លាប់26,285នាក់។ ក្នុងរយៈពេល1សប្ដាហ៍កន្លងទៅ កំណើននៃអ្នកឆ្លងវីរុសបានកើនជាមធ្យម30,000នាក់ក្នុង1ថ្ងៃៗ នៅប្រទេសនេះ៕

ប្រភព៖ Reuters

July 18, 2020

ក្រុមតំណាងរាស្ត្រកោះតៃវ៉ាន់ វាយតប់គ្នាពេលកំពុងបោះឆ្នោតក្នុងសភា

តំណាងរាស្ត្ររបស់គណៈបក្សដែលមានអាសនៈនៅក្នុងសភាតៃវ៉ាន់ បានវាយតប់គ្នាជាលើកទីពីរនៅក្នុងរយៈពេល2សប្ដាហ៍កន្លងមកនេះ ទាក់ទិននឹងការតែងតាំងមេដឹកនាំអង្គភាពឃ្លាំមើលឯការាជ្យរបស់រដ្ឋាភិបាល។

ហេតុការណ៍វាយតប់គ្នានេះបានចាប់ផ្ដើមចេញពីករណីប្រធានាធិបតីតៃវ៉ាន់ លោកស្រី Tsai Ing-wen តែងតាំងលោកស្រី Chen Chu ដែលជាជំនួយការវ័យ70ឆ្នាំរបស់លោកស្រី ឱ្យធ្វើជាមេដឹកនាំអង្គភាពឃ្លាំមើលអាជ្ញាធរដែនដី ដែលជាស្ថាប័នឯករាជ្យរបស់រដ្ឋាភិបាល។ គណបក្សប្រឆាំង Kuomintang (“Kuomintang of China” ឬ “Chinese Nationalist Party”) ហៅកាត់ថា KMT បានជំទាស់ទៅនឹងការសម្រេចនេះ ហើយក៏បានចោទប្រកាន់មន្ត្រីចំនួន24នាក់ក្នុងចំណោម27នាក់ដែលត្រូវបានតែងតាំងជាសមាជិកនៃអង្គភាពនេះថា មានទំនាក់ទំនងជិតស្និទ្ធជាមួយបក្សប្រជាធិបតេយ្យជឿនលឿន DPP (Democratic Progressive Party) របស់លោកស្រី Tsai Ing-wen។

រូបភាពពីខាងក្នុងអគាររដ្ឋសភាបានបង្ហាញថា តំណាងរាស្ត្រម្នាក់របស់បក្ស DPP បានដាល់ទៅលើសមាជិកម្នាក់របស់ក្រុមប្រឆាំង នៅក្នុងពេលបោះឆ្នោតជ្រើសរើសលោកស្រី Chen Chu។ ក្រុមតំណាងរាស្ត្ររបស់បក្ស KMT ក៏បានគប់ប៉ោងប៉ោងទឹកទៅលើវេទិកា នាំឱ្យក្រុម DPP ត្រូវប្រើប្រាស់អាវភ្លៀង និងក្រដាសរឹងដើម្បីទប់ទល់។

បើទោះជាមានស្ថានភាពច្របូលច្របល់ក៏ដោយ ការបោះឆ្នោតនៅតែបន្តទៅមុខ និងបានអនុម័តដោយជោគជ័យក្នុងការជ្រើសរើសលោកស្រី Chen Chu ដែលជាអ្នកគាំទ្រប្រជាធិបតេយ្យ និងធ្លាប់ជាប់ពន្ធនាគារ6ឆ្នាំក្នុងអំឡុងពេលបក្ស KMT កាន់កាប់អំណាចនៅតៃវ៉ាន់។ លោកស្រី Chen Chu ប្រកាសថានឹងចាកចេញពីបក្ស DPP បន្ទាប់ពីការតែងតាំងត្រូវបានធ្វើឡើងរួចរាល់ ដើម្បីរក្សាភាពស្អាតស្អំ និងយុត្តិធម៌នៃតំណែងជាមេដឹកនាំអង្គភាពឃ្លាំមើលនេះ។ ទន្ទឹមនឹងនេះ លោកស្រី Chen Chu ក៏បានចោទប្រកាន់បក្សប្រឆាំងថា បានបរិហារកេរ្តិ៍លោកស្រី ដោយប្រើប្រាស់ការចោទប្រកាន់គ្មានមូលដ្ឋាន។

ក្រុមអ្នកគាំទ្របក្ស KMT រាប់រយនាក់ដែលនៅខាងក្រៅវិមានរដ្ឋសភាក៏បានវាយតប់គ្នាជាមួយនឹងក្រុមប៉ូលិស។ មនុស្សមួយចំនួនបានព្យាយាមឆ្លងកាត់របង និងអំពាវនាវឱ្យបក្ស DPP ដកការជ្រើសរើសនេះមកវិញ។ ប្រធានបក្ស KMT លោក Johnny Chiang ថ្លែងទៅកាន់ក្រុមអ្នកគាំទ្រថា “ចូរបោះបង់បក្សពួកនិយម ហើយដកការតែងតាំងនោះមកវិញ”។

ប្រធានបក្ស KMT លោក Johnny Chiang មាននិន្នាការគាំទ្រទំនាក់ទំនងរវាងតៃវ៉ាន់ និងចិនដីគោក

គណបក្ស KMT ដែលមានវប្បធម៌គាំទ្រចំពោះទំនាក់ទំនងជិតស្និទ្ធរវាងកោះតៃវ៉ាន់ជាមួយនឹងប្រទេសចិន ធ្លាប់បានទទួលបរាជ័យក្នុងការបោះឆ្នោតជ្រើសរើសមេដឹកនាំ និងស្ថាប័នតាក់តែងច្បាប់កាលពីខែមករា បណ្ដាលឱ្យអាសនៈភាគច្រើនបានធ្លាក់ទៅលើដៃបក្ស DPP។ ក្រោមការដឹកនាំរបស់លោក Johnny Chiang បក្ស KMT កំពុងតែធ្វើកំណែទម្រង់ដើម្បីទាក់ទាញការគាំទ្រពីសំណាក់ម្ចាស់ឆ្នោតនាពេលខាងមុខ។

https://www.youtube.com/watch?v=cnDHlFlNwwY

ការវាយតប់គ្នា និងបាតុកម្មដ៏កក្រើកនៅវិមានសភាតៃវ៉ាន់ លែងជារឿងចម្លែកទៀតហើយ។ ឆ្នាំ2014 ក៏ធ្លាប់មាននិស្សិតរាប់រយនាក់ នាំគ្នាចូលគ្រប់គ្រងវិមានរដ្ឋសភាអស់ជាច្រើនសប្ដាហ៍ ដើម្បីប្រឆាំងទៅនឹងចលនានិស្សិតផ្កាឈូករ័ត្ន (Sunflower Student Movement) ដោយស្នើឱ្យមានតម្លាភាពជាងនេះ ព្រមទាំងដើម្បីសម្ដែងការព្រួយបារម្ភចំពោះឥទ្ធិពលសេដ្ឋកិច្ច និងនយោបាយពីប្រទេសចិនដែលចេះតែកើនឡើងពីមួយថ្ងៃទៅមួយថ្ងៃមកលើកោះតៃវ៉ាន់៕

ប្រភព៖ Reuters, AFP

July 17, 2020

“យកមេរោគមកចម្លងពួកយើងធ្វើអី?!” ប្រជាជនជប៉ុនក្ដៅក្រហាយ រកឃើញទាហានអាមេរិកក្នុងមូលដ្ឋានទ័ពអូគីណាវ៉ា អាចចម្លងកូវីដចូលទីប្រជុំជន…

ស្ថានការណ៍ការឆ្លងរាលដាលរបស់មេរោគកូវីដ-19 ដែលកំពុងឆាបឆេះរាលដាលធំឡើង នៅក្នុងមូលដ្ឋានទ័ពអាមេរិកលើកោះអូគីណាវ៉ា ដែលរកឃើញមន្ត្រីខាងយោធារបស់អាមេរិក និងអ្នករួមការងារ បានឆ្លងមេរោគកំណាចនេះរួចទៅហើយយ៉ាងតិច 136នាក់នោះ បានបង្កនូវក្ដីមួម៉ៅក្ដៅក្រហាយយ៉ាងខ្លាំងដល់ក្រុមអ្នកស្រុកក្នុងតំបន់ ទាំងក្នុងរឿងបំផ្លាញការព្យាយាមគ្រប់គ្រងការឆ្លងរាលដាលរបស់ពួកគេ និងភាពអាចទៅរួច ដែលអាចមានការនាំមេរោគចូលទៅក្នុងទីប្រជុំជន ក្នុងខណៈដែលអភិបាលខេត្តរបស់កោះដែលស្ថិតនៅភាគខាងត្បូងរបស់ជប៉ុនមួយនេះ បានរអ៊ូរទាំថា ក្រុមមន្ត្រីអាមេរិក មិនព្រមផ្ដល់ព័ត៌មានលម្អិតអ្វីទាំងអស់ពាក់ព័ន្ធនឹងអ្នកផ្ទុកមេរោគ។

ពួកអ្នកស្រុកបានប្រាប់ថា ពួកគេមានអារម្មណ៍សោកសៅ និងខឹងសម្បាខ្លាំងណាស់ ដែលមានអ្នកឆ្លងមេរោគច្រើនមែនទែននៅក្នុងខេត្តរបស់ពួកគេ ដោយសារតែកាលពីពេលមុននេះ កាលពីខែកន្លងទៅ រកឃើញអ្នកឆ្លងមេរោគនៅក្នុងខេត្តត្រឹមតែ 1នាក់ប៉ុណ្ណោះ។

មានរបាយការណ៍ថា រកឃើញមន្ត្រីខាងយោធាអាមេរិកឆ្លងមេរោគថែមទៀត 36នាក់នៅក្នុងមូលដ្ឋាន ហ៊ែនសិន របស់កងនាវិកយោធិនកាលពីថ្ងៃពុធ(ទី15កក្កដា) ធ្វើឱ្យចំនួនអ្នកឆ្លងមេរោគនៅក្នុងមូលដ្ឋានមួយនេះ កើនឡើងដល់ 58នាក់ ក្រៅពីនេះ នៅរកឃើញ 71ករណីទៀត ដែលពាក់ព័ន្ធនឹងស្ថានីយខាងអាកាស ហ្វ៊ូតិនមៈ របស់កងនាវិកយោធិន និង 5នាក់ទៀតនៅឯមូលដ្ឋានទ័ពអាកាស ខាដេណៈ ចំណែកឯជំរំទ័ព ម៉េកធូរៀស និងឃីនស៊ើរ រកឃើញអ្នកឆ្លងមេរោគ ក្នុង1កន្លែង 1នាក់។

ទោះជាស្ថានីយខាងអាកាស ហ្វ៊ូតិនមៈ និងជំរំទ័ព ហ៊ែនសិន ស្ថិតក្រោមបទបញ្ជាឱ្យបិទទីតាំងក្ដី តែក៏នៅមានការកង្វល់បារម្ភ ចំពោះករណីដែលមន្ត្រីមកពីជំរំទ័ពផ្សេងៗទាំងនោះ ដែលបានចេញមកជប់លៀងរីករាយឆ្លងថ្ងៃបុណ្យជាតិសហរដ្ឋអាមេរិក នៅតាមរង្គសាល ផាប់ និងភោជនីយដ្ឋាននានាដែរ នៅក្នុងអំឡុងចុងសប្ដាហ៍ ថ្ងៃទី4 កក្កដា ដែលធ្វើឱ្យពួកគេមានការជួបជុំប៉ះពាល់គ្នាយ៉ាងជិតស្និទ្ធជាមួយពួកអ្នកស្រុកក្នុងតំបន់ ដោយនៅពេលនេះ ក្រុមមន្ត្រីសុខភាពសាធារណៈ បានព្យាយាមតាមដានប្រជាជនដែលអាចនឹងបានប៉ះពាល់ជិតដិតជាមួយមន្ត្រីយោធារបស់អាមេរិកទាំងនោះ ក្នុងអំឡុងប៉ុន្មានថ្ងៃកន្លងមកនេះ និងបង្ខំឱ្យពួកអ្នកស្រុកចេញមកពិនិត្យរកមេរោគកូវីដ-19 ជាបន្ទាន់។

លោក ដេននី ថាម៉ាគិ អភិបាលរដ្ឋអូគីណាវ៉ា បានសម្ដែងក្ដីខកចិត្តចំពោះការបរាជ័យក្នុងការព្យាយាមគ្រប់គ្រងការឆ្លងរាលដាលមេរោគរបស់កងទ័ពអាមេរិក ដោយលោកបានធ្វើដំណើរទៅទីក្រុងតូក្យូកាលពីថ្ងៃពុធ(ទី15កក្កដា) ដើម្បីជួបជាមួយតំណាងរបស់ស្ថានទូតសហរដ្ឋអាមេរិក និងរដ្ឋបាលជប៉ុន ដើម្បីពិភាក្សាពាក់ព័ន្ធនឹងក្ដីកង្វល់របស់លោក ដែលក្នុងនោះរួមទាំងករណីដែលកងទ័ពអាមេរិក បានបដិសេធប្រគល់ទិន្នន័យរបស់អ្នកឆ្លងមេរោគ ដោយអាងថា ជាការសម្ងាត់ខាងរដ្ឋការ និងមានភាពប្រថុយប្រថានក្នុងការត្រូវវាយប្រហារដោយភេរវកម្ម។

លោកថាម៉ាគិ បានថ្លែងថា “វាគួរឱ្យសោកសៅបំផុត ដែលមានមន្ត្រីរបស់កងទ័ពអាមេរិកឆ្លងមេរោគចំនួនដ៏ច្រើនក្នុងរយៈពេលដ៏ខ្លី” លោកថែមទាំងបានប្រាប់ទៀតថា ពួកអ្នកស្រុកក្នុងតំបន់មានអារម្មណ៍ស្រឡាំងកាំង បន្ទាប់ពីខំព្យាយាមការពារការឆ្លងរាលដាលរបស់មេរោគកូវីដ-19 នៅក្នុងអូគីណាវ៉ារបស់ពួកគេយ៉ាងខ្លាំងក្លា តែស្រាប់តែត្រូវមកដួលរលំគ្រាំងបែបនេះ ដោយរហូតមកដល់ពេលនេះ មានប្រជាជននៅក្នុងខេត្តអូគីណាវ៉ា ត្រឹមតែ 148នាក់ប៉ុណ្ណោះ ក្នុងចំនួនទាំងអស់ 1.5លាននាក់ ដែលឆ្លងមេរោគកូវីដ-19។

លោកថ្លែងទៀតថា “ខ្លាំងជាងហ្នឹងទៅទៀត វានៅបង្កឱ្យកើតចំណុចសង្ស័យយ៉ាងច្រើន ពាក់ព័ន្ធនឹងវិធានការគ្រប់គ្រងការឆ្លងរាលដាលនៃមេរោគរបស់អាមេរិក រហូតមកដល់ពេលនេះ”

មន្ត្រម្នាក់របស់ខេត្ត បានបង្ហើបឱ្យដឹងថា លោកអភិបាលខេត្ត បានជួបពិភាក្សាជាមួយរដ្ឋមន្ត្រីក្រសួងមហាផ្ទៃ និងរដ្ឋមន្ត្រីការបរទេស និងបានដាក់ញត្តិទាមទារ 2ចំណុច៖ “គាត់សុំឱ្យសហរដ្ឋអាមេរិក ផ្អាកសកម្មភាពរបស់កងកម្លាំងទាំងអស់ ពីផែនដីអាមេរិក មកអូគីណាវ៉ា និងត្រូវសើរើឡើងវិញយ៉ាងទូលំទូលាយនូវកិច្ចព្រមព្រៀងស្ដីពី ឋានៈរបស់កងកម្លាំងរវាងប្រទេសទាំង2 ជាពិសេសផ្នែកដែលពាក់ព័ន្ធនឹងការប្រើប្រាស់ច្បាប់បង្ខាំងពិនិត្យរកមេរោគរបស់ជប៉ុន”

សំណួរពាក់ព័ន្ធនឹងច្បាប់បង្ខាំងពិនិត្យរកមេរោគទាហានអាមេរិក និងក្រុមគ្រួសាររបស់ពួកគេ ជាប្រធានបទដែលត្រូវបានជជែកវែកញែកគ្នាយ៉ាងខ្លាំង ដោយទីភ្នាក់ងារសារព័ត៌មានក្នុងតំបន់ បានរាយការណ៍ថា ក្រុងតូក្យូ សឹងតែមិនមានការគ្រប់គ្រងពលរដ្ឋអាមេរិក ដែលធ្វើដំណើរចូលមកជប៉ុនសូម្បីតែបន្តិចផង និងសូម្បីតែជាមួយបុគ្គលដែលត្រូវធ្វើដំណើរឆ្លងកាត់អាកាសយានដ្ឋានខាងពាណិជ្ជកម្មក៏ដោយ។

កន្លងមក មន្ត្រីខាងយោធាអាមេរិក និងក្រុមគ្រសារបស់ពួកគេ ដែលមកប្រចាំការនៅក្នុងមូលដ្ឋានទ័ពក្នុងប្រទេសជប៉ុន មិនបានស្ថិតនៅក្រោមចំណុចហាមឃាត់ការធ្វើដំណើរទៅក្រៅប្រទេសឡើយ ដែលនេះជារឿងមួយដែលបណ្ដាលឱ្យលោកថាម៉ាគិ ទាមទារឱ្យរដ្ឋមន្ត្រីការបរទេស ត្រូវកែសម្រួលកិច្ចព្រមព្រៀងទ្វេភាគី អំពីឋានៈរបស់កងកម្លាំង ដោយបង្ខំឱ្យនាវិកយោធិនអាមេរិក និងក្រុមគ្រួសាររបស់ពួកគេ ត្រូវស្ថិតនៅក្រោមវិធានការកំណត់ការធ្វើដំណើរ ដូចគ្នានឹងប្រជាជាជនជប៉ុនដែរ។

លោក ថារ៉ូ ខូរ៉ូ រដ្ឋមន្ត្រីក្រសួងមហាផ្ទៃ បានបញ្ជាក់ថា កងទ័ពសហរដ្ឋអាមេរិក ចាំបាច់ត្រូវតែប្រើវិធានការផ្សេងៗដែលជារូបវន្ត ដើម្បីឱ្យមេរោគនៅក្នុងមូលដ្ឋានទ័ពនោះ មិនអាចចម្លងសាយភាយចូលមកក្នុងទីប្រជុំជន ហើយលោកបានសម្ដែងក្ដីកង្វល់ថា ការឆ្លងរាលដាលក្នុងគ្រានេះ អាចបង្កផលប៉ះពាល់ដល់ភាពត្រៀមខ្លួនជាស្រេចរបស់កងទ័ពអាមេរិក៕

ប្រភព៖ សារព័ត៌មានបរទេស

July 17, 2020

NASA ប្រកាសបង្ហាញរូបដែលថតព្រះអាទិត្យក្នុងរយៈចម្ងាយជិតបំផុតមិនធ្លាប់មានពីមុនមក

ទីភ្នាក់ងារអវកាសអាមេរិកនិងអឺរ៉ុប បានប្រកាសបង្ហាញរូបថតជាច្រើនសន្លឹកដែលត្រូវបានថតដោយយានអវកាស Solar Orbiter នៅពេលដែលវាបានហោះទៅក្បែរព្រះអាទិត្យបំផុតមិនធ្លាប់មានពីមុនមក។

យានអវកាស Solar Orbiter បានហោះទៅកៀកព្រះអាទិត្យក្នុងរយៈចម្ងាយ75.6លានគីឡូម៉ែត្រ កាលពីពាក់កណ្ដាលខែមិថុនា2020។ ចំណុចអណ្ដាតភ្លើងចែងចាំងនានាដែលត្រូវបានអ្នកវិទ្យាសាស្ត្រហៅថា “Campfire” នៅក្នុងរូបថត មានលក្ខណៈតូចជាង1ពាន់លានដងបើធៀបនឹងចំណុចអណ្ដាតភ្លើងចែងចាំងដែលគេអាចមើលឃើញពីផែនដី។ ប្រការនេះអាចរួមចំណែកក្នុងការបកស្រាយនូវសំណួរដែលសួរថា ហេតុអ្វីបានជាស្រទាប់បរិយាកាសខាងក្រៅរបស់ព្រះអាទិត្យ បែរជាក្ដៅជាងស្រទាប់បរិយាកាសខាងក្នុងទៅវិញ។ បរិយាកាសស្រទាប់ខាងក្រៅដែលព័ន្ធជុំវិញព្រះអាទិត្យមានកម្ដៅឡើងដល់ជាង1លានអង្សា ចំណែកបរិយាកាសស្រទាប់ខាងក្នុងមានកម្ដៅត្រឹមតែ5,500អង្សាប៉ុណ្ណោះ។ ការយល់អំពីមូលហេតុដែលនាំឱ្យមានភាពខុសគ្នាបែបនេះ នឹងជួយឱ្យអ្នកវិទ្យាសាស្ត្រអាចព្យាករអាកាសអវកាសបាន។

យានអវកាស Solar Orbiter ដែលស្ថិតក្នុងគម្រោងសហការរួមរបស់ទីភ្នាក់ងារអវកាសអាមេរិក (NASA) និងអឺរ៉ុប(ESA) ដែលត្រូវបានបាញ់បង្ហោះកាលពីខែកុម្ភៈ2020 ក្នុងបេសកកម្មរយៈពេល2ឆ្នាំនេះ គឺដើម្បីស្រាវជ្រាវអំពីប្រតិកម្មនានានៅផ្ទៃខាងលើរបស់ព្រះអាទិត្យ និងបាតុភូតអាកាសធាតុអវកាប្រកបដោយសគ្រោះថ្នាក់ ដែលកើតមានឡើងបន្ទាប់ពីប្រតិកម្មទាំងនោះ។ យានអវកាស Solar Orbiter ត្រូវបានផលិតឡើងនៅក្នុងរោងចក្ររបស់ក្រុមហ៊ុន Airbus នៅប្រទេសអង់គ្លេស។

បណ្ឌិត David Long សហប្រធាននៃគម្រោង Solar Orbiter មកពីអង្គការ NASA បានឱ្យដឹងថា “មិនធ្លាប់មានរូបថតណាមួយដែលថតព្រះអាទិត្យក្នុងរយៈចម្ងាយជិតបែបនេះនោះទេ ហើយកម្រិតនៃភាពល្អិតរបស់រូបថតទាំងនេះ គឺពិតជាគួរឱ្យចាប់អារម្មណ៍។ រូបថតទាំងនេះបានបង្ហាញអំពីចំណុចភ្លឺចែងចាំងតូចៗនៅពាសពេញផ្ទៃព្រះអាទិត្យ ដែលហាក់ដូចទៅនឹងភ្នក់ភ្លើងដែលគេដុតក្នុងពេលបោះជំរំដូច្នោះដែរ។ ចំណុចអណ្ដាតភ្លើងចែងចាំងខុសពីគេបែបនេះ អាចបង្ហើបឱ្យដឹងអំពីបាតុភូតអាថ៌កំបាំងដែលធ្វើឱ្យស្រទាប់បរិយាកាសខាងក្រៅរបស់ព្រះអាទិត្យ ក្ដៅជាង200ទៅ500ដង បើធៀបនឹងស្រទាប់បរិយាកាសខាងក្នុង”។

ការសិក្សាស្រាវជ្រាវអំពីព្រះអាទិត្យ មានសារសំខាន់ខ្លាំងណាស់ ដោយវានឹងជួយឱ្យអ្នកវិទ្យាសាស្ត្រអាចរៀបគម្រោងការទប់ទល់នឹងបាតុភូតអាកាសធាតុគ្រោះថ្នាក់ដែលបង្កឡើងដោយព្យុះព្រះអាទិត្យ CME (coronal mass ejection) ជាដើម ដែលវាអាចបំផ្លាញប្រព័ន្ធ GPS បណ្ដាញអគ្គិសនី និងនាំឱ្យមានបញ្ហាខ្វះស្បៀងអាហារ និងខ្វះភ្លើងអគ្គិសនីប្រើប្រាស់ជាដើម។ ទីភ្នាក់ងារអវកាសអង់គ្លេសបានឱ្យដឹងថា ការខូចខាតដែលបង្កឡើងដោយ CME នឹងធ្វើឱ្យមនុស្សត្រូវចំណាយពេលរាប់ខែ ឬរាប់ឆ្នាំក្នុងការដោះស្រាយបញ្ហា។ បច្ចុប្បន្ន អ្នកវិទ្យាសាស្ត្រមិនទាន់រកឃើញវិធីដើម្បីទប់ទល់នឹង CME នៅឡើយ។

តាមគម្រោង យានអវកាស Solar Orbiter នេះ នឹងហោះចូលទៅជិតព្រះអាទិត្យក្នុងរយៈចម្ងាយ48លានគីឡូម៉ែត្រ ដែលជិតជាងពិភពពុធទៅទៀត៕

ប្រភព៖ Telegraph

July 17, 2020

អ្នកជំនាញការបារម្ភ៖ ក្នុងរដូវរងាខាងមុខ វីរុសនឹងរាលដាលខ្លាំង ជីវិតបែបប្រក្រតី ស្ថិតនៅឆ្ងាយនៅឡើយ

ទីភ្នាក់ងាព័ត៌មានឆៃណាដេលី បានរាយការណ៍ថា អ្នកជំនាញការបាននិយាយថា វីរុសកូរ៉ូណាប្រភេទថ្មី អាចនឹងរាតត្បាតកាន់តែខ្លាំងឡើងនៅក្នុងរដូវរងាខាងមុខនេះ ធ្វើឱ្យទស្សនៈនៃការវិលត្រឡប់មករកជីវិតបែបប្រក្រតីវិញ កាន់តែពិបាក និងត្រូវបន្ថែមភាពចាំបាច់ក្នុងការត្រៀមខ្លួនឱ្យរួចរាល់សម្រាប់សង្គ្រាមប្រឆាំងមេរោគដ៏អូសបន្លាយមួយនេះ។

អ្នកជំនាញការបានរៀបរាប់ថា “ទោះជាមានភាពប្រថុយប្រថានកើនឡើង តែស្ថានការណ៍ជំងឺរាតត្បាតដែលកើតឡើងនៅក្នុងមណ្ឌលហ៊ូពេយ កាលពីដើមឆ្នាំនេះ នឹងមិនកើតឡើងម្ដងទៀតទេនៅក្នុងប្រទេសចិន ដោយសារតែប្រទេសនេះ បានពិសោធរួចហើយថា ការឆ្លងរាលដាលក្នុងភូមិភាគ អាចបង្ក្រាបបានដោយវិធានការគ្រប់គ្រងដែលឆាប់រហ័ស និងគ្រប់គ្រងចំមុខសញ្ញា”

តាមរយៈរបាយការណ៍របស់អង្គការសុខភាពពិភពលោក ការឆ្លងរាលដាលរបស់មេរោគ កាន់តែធ្ងន់ធ្ងរឡើងទូទាំងពិភពលោក ដោយមានរបាយការណ៍អ្នកជំងឺថ្មី កើនឡើងខ្ពស់ដល់ 230,370នាក់ ក្នុងថ្ងៃអាទិត្យ(ទី12កក្កដា)កន្លងមក។

លោក អ៊ូ ជុនយ៉ូវ៍ ប្រធានក្រុមជំនាញខាងជំងឺរាតត្បាត នៃមជ្ឈមណ្ឌលគ្រប់គ្រង និងការពាររោគ នៃប្រទេសចិន បានថ្លែងថា វីរុសបានចម្លងសាយភាយយ៉ាងឆាប់រហ័ស ទូទាំងពិភពលោកតាំងពីខែមីនាមក ហើយការឆ្លងមេរោគថ្មីចុងក្រោយបំផុតដែលកើនឡើងនៅសហរដ្ឋអាមេរិក ប្រេស៊ីល ឥណ្ឌា និងអាហ្វ្រិកខាងត្បូង មានចំណែកច្រើនជាងពាក់កណ្ដាល នៃចំនួនអ្នកឆ្លងមេរោគថ្មីទូទាំងពិភពលោក។

លោក អ៊ូ បានថ្លែងនៅក្នុងអំឡុងការប្រជុំអនឡាញដែលរៀបចំឡើងដោយទស្សនាវដ្តី ឆៃស៊ីន កាលពីល្ងាចថ្ងៃអាទិត្យ(12កក្កដា)កន្លងទៅថា “ការវិភាគបឋម បានបង្ហាញឱ្យឃើញថា ក្នុងរយៈពេលដ៏ខ្លីនេះ ការឆ្លងរាលដាលរបស់មេរោគវីរុសនៅតែស្ថិតក្នុងកម្រិតខ្លាំង និងថែមទាំងអាចនឹងកាចសាហាវខ្លាំងឡើងទៀត ក្នុងអំឡុងរដូវរងាដែលកំពុងជិតមកដល់នេះ”

“ប្រទេសចិនស្ថិតក្រោមសម្ពាធ 2ប្រការ នៃការទប់ទល់នឹងការឆ្លងរាតត្បាតយ៉ាងរហ័សភ្លាមៗ ដែលបណ្ដាលមកពីប្រភពដែលមិនបង្ហាញភ័ស្តុតាង ដូចជាថ្មីៗ ដែលពាក់ព័ន្ធនឹងផ្សារបោះដុំអាហារដ៏សំខាន់មួយក្នុងក្រុងប៉េកាំង រួមទាំងក្រុមអ្នកឆ្លងមេរោគដែលកើតចេញពីករណីនាំចូល ដូចដែលយើងបានឃើញនៅក្នុងទីក្រុងជាច្រើន ក្នុងមណ្ឌលភាគខាងកើតឆៀងខាងជើង ប៉ុន្មានខែកន្លងមកនេះ”

ទិន្នន័យ ពីទីស្នាក់ការគណៈកម្មការសុខភាព នៃប្រទេសចិនបានបញ្ជាក់ថា ការឆ្លងរាតត្បាតរបស់ជំងឺនៅក្នុងក្រុងប៉េកាំង ដែលបានរកឃើញកាលពីថ្ងៃទី11 មិថុនា ត្រូវបានគ្រប់គ្រប់យ៉ាងពេញលេញ ដោយមិនមានអ្នកជំងឺថ្មី អស់រយៈពេល 8ថ្ងៃ រាប់តាំងពីថ្ងៃចន្ទមក ហើយចំនួនអ្នកជំងឺនៅក្នុងការព្យាបាល ក៏ថយចុះ 297នាក់ដែរ។

លោកអ៊ូ បានថ្លែងទៀតថា “ការបង្ក្រាបមេរោគបានយ៉ាងឆាប់រហ័សនៅក្នុងទីក្រុងចម្បងនេះ ធ្វើឱ្យចិនមានភាពជឿជាក់លើវិធានការចៀសវាងការឆ្លងមេរោគជាថ្មីម្ដងទៀត”

លោកបន្តថា “វិធានការរបស់ទីក្រុងប៉េកាំង គឺជាគំរូ សម្រាប់ផ្នែកដែលនៅសេសសល់របស់ប្រទេសចិន និងអាចជាទិន្នន័យអះអាងសម្រាប់ពិភពលោក ដោយរឿងសំខាន់នោះ គឺការពិនិត្យរកឃើញដ៏ឆាប់រហ័ស ការឆ្លើយតបដោយវិធានការបង្ខាំងដ៏ម៉ឺងម៉ាត់ និងការពិសោធយ៉ាងទូលំទូលាយ”

ការតស៊ូ ដ៏យូរអង្វែងនៅខាងមុខ

លោក ឈឹន ជឹងមិង សាស្ត្រាចារ្យផ្នែកជំងឺរាតត្បាត នៃមហាវិទ្យាល័យ អុកស្វ៊ើត បានព្រមានថា “វីរុស ដូចជាមិនទាន់បាត់ទៅណាទេ”

លោកថា “ចំនួនអ្នកឆ្លងមេរោគទូទាំងពិភពលោកច្រើនដល់ទៅ 12.6លាននាក់ ដែលជាការវាយតម្លៃទាបជាងកម្រិតធ្ងន់ធ្ងរ ដោយសារតែការពិសោធដែលមានកំណត់នៅក្នុងភូមិភាគមួយចំនួនដែលមានអ្នកឆ្លងមេរោគ តែមិនបង្ហាញអាការ ដែលធ្វើឱ្យពិនិត្យរកមិនឃើញ”

“យើងមានការចំណាយខាងសេដ្ឋកិច្ចក្នុងតម្លៃខ្ពស់ខ្លាំងណាស់ សម្រាប់ការផ្លាស់ប្ដូរវិធីរស់នៅរបស់យើង និងការបិទទីក្រុង។ ប្រទេសខ្លះត្រូវសុខចិត្តបន្ធូរបន្ថយវិធានការ ដូចជាប្រទេសជប៉ុន សហរាជអាណាចក្រ និងអ៊ីស្រាអែល ជាដើម…រដូវស្លឹកឈើជ្រុះ និងរដូវរងាខាងមុខនេះ នឹងក្លាយជាការសាកល្បងដ៏សំខាន់”

យ៉ាងណាក្ដី ទោះជានៅក្នុងប្រទេសចិន ដែលមានស្នាដៃក្នុងការគ្រប់គ្រងការឆ្លងរាលដាលបានដាច់ខាតមែន តែក្នុងអំឡុងការប្រជុំដើម្បីឆ្លើយតបនឹងការឆ្លងរាលដាលរបស់ជំងឺ ការត្រឡប់ឆ្ពោះទៅរកជីវិតយ៉ាងពេញរូបបែប កណ្ដាលការឆ្លងរាលដាលដ៏ធំនេះ យើងទទួលស្គាល់ថា សឹងតែមិនអាចទៅរួចឡើយ និងត្រូវត្រៀមការទប់ទល់នឹងការឆ្លងមេរោគជាថ្មី ជាដំណាក់ៗទៀតផង”

កាលពីថ្ងៃចន្ទ(ទី13កក្កដា) កន្លងមក លោក ថេដ្រូស អាត់ហាណូម កេប្រេយេស៊ុស ប្រធានអង្គការសុខភាពពិភពលោក បានថ្លែងថា “…នឹងមិនអាចវិលត្រឡប់ទៅរកសភាវប្រក្រតី ក្នុងពេលអនាគតដ៏ខ្លីខាងមុខនេះបានទេ” ក្នុងខណៈដែលមេរោគវីរុសនៅតែឆ្លងរាលដាលនៅក្នុងប្រទេសភាគច្រើន ហើយវានៅតែជា “សត្រូវលេខ1” របស់ពិភពលោកនៅឡើយ៕

ប្រភព៖ សាព័ត៌មានបរទេស
ប្រែសម្រួលដោយ តាវ៉ែនតា

July 17, 2020

កូរ៉ខាងត្បូងបើកការស៊ើបអង្កេតមិនធ្លាប់មាន លើប្អូនស្រីរបស់លោក Kim Jong-un

រដ្ឋអាជ្ញានៃតុលាការកូរ៉េខាងត្បូង បានបើកការស៊ើបអង្កេតមិនធ្លាប់មានពីមុនមក ទៅលើប្អូនស្រីរបស់ប្រធានរដ្ឋកូរ៉េខាងជើង គឺលោកស្រី Kim Yo-jong បន្ទាប់ពីការិយាល័យទំនាក់ទំនងរវាងកូរ៉េទាំងពីរត្រូវបានកម្ទេចចោលកាលពីខែមុន។

ការិយាល័យរដ្ឋអាជ្ញានៅកណ្ដាលទីក្រុងសេអ៊ូល កាលពីម្សិលមិញបានប្រកាសថា ការិយាល័យនេះទទួលបានពាក្យបណ្ដឹងប្រឆាំងលោកស្រី Kim Yo-jong ពីមេធាវីម្នាក់នៅសេអ៊ូល។ កាលពីថ្ងៃទី16កក្កដា ស្ថាប័នខាងលើនេះ បានសម្រេចបើកការស៊ើបអង្កេតមិនធ្លាប់មាន សំដៅទៅលើលោកស្រី Kim Yo-jong ទាក់ទិននឹងករណីដែលកូរ៉េខាងជើងបានបំផ្ទុះកម្ទេចចោលអគារការិយាល័យទំនាក់ទំនងរវាងប្រទេសទាំងពីរកាលពីខែមីថុនា2020។

ការស៊ើបអង្កេតខាងលើត្រូវបានគេមើលឃើញថា នឹងធ្វើឱ្យភាពតានតឹងរវាងបងប្អូនសត្រូវទាំងពីរនៅលើឧបទ្វីបកូរ៉េ កាន់តែធ្លាក់ទៅក្នុងស្ថានភាពធ្ងន់ធ្ងរ។

សូមរំឭកថា កាលពីខែមុន ទីក្រុងព្យុងយ៉ាង បានបំផ្លាញចោលអគារការិយាល័យទំនាក់ទំនងមួយដែលស្ថិតនៅក្បែរព្រំដែននៃប្រទេសទាំងពីរ ក្រោយពីលោកស្រី Kim Yo-jong ដែលជាទីប្រឹក្សាជាន់ខ្ពស់របស់លោក Kim Jong-un បានប្រកាសថា អគារ “ឥតប្រយោជន៍” នេះ នឹងត្រូវបានបំផ្លាញចោលទាំងស្រុងនាពេលដ៏ខ្លីខាងមុខ។

មុនការលើកឡើងរបស់លោក Kim Yo-jong កូរ៉េខាងជើងក៏ធ្លាប់បានរិះគន់យ៉ាងចាស់ដៃទៅលើរដ្ឋាភិបាលទីក្រុងសេអ៊ូល ទាក់ទិននឹងក្រុមសកម្មជន និងអ្នករត់ចោលស្រុកកូរ៉េខាងជើងដែលបច្ចុប្បន្ននៅកូរ៉េខាងត្បូងតែងតែបង្ហោះខិត្តប័ណ្ណទៅលើទឹកដីកូរ៉េខាងជើង។ កូរ៉េខាងជើងក៏បានព្រមានថា នឹងចាត់វិធានការកងទ័ពប្រឆាំងកូរ៉េខាងត្បូង។ ក៏ប៉ុន្តែក្រោយមក ក៏បានផ្អាកផែនការខាងលើនេះដើម្បីកាត់បន្ថយភាពតានតឹង។

នៅក្នុងពាក្យបណ្ដឹងខាងលើ មេធាវី Lee Kyung-jae យល់ថា ការិយាល័យទំនាក់ទំនងរវាងកូរ៉េទាំងពីរ គឺជាទ្រព្យសម្បត្តិរបស់កូរ៉េខាងត្បូង ព្រោះវាប្រើប្រាស់ថវិការបស់កូរ៉េខាងត្បូងក្នុងការសាងសង់ បើទោះជាការិយាល័យនេះស្ថិតនៅលើទឹកដីកូរ៉េខាងជើងក៏ដោយ។

មេធាវី Lee Kyung-jae បានចោទប្រកាន់លោកស្រី Kim Yo-jong ដែលជាប្អូនស្រីបង្កើតរបស់លោក Kim Jong-un ថា “បានប្រើប្រាស់គ្រឿងផ្ទុះដើម្បីបំផ្លាញអគារដែលមានតួនាទីជាអ្នកបម្រើឱ្យកិច្ចការបរទេស ដែលនាំមកនូវផលប្រយោជន៍សម្រាប់ប្រទេសទាំងពីរ”។

ពាក្យបណ្ដឹងរបស់លោក Lee Kyung-jae ក៏ប្រឆាំងទៅនឹងលោក Pak Jong Chon ដែលជាអគ្គមេបញ្ជាការកងទ័ពកូរ៉េខាងជើងផងដែរ។

តាមជាក់ស្ដែង កូរ៉េខាងត្បូងពិបាកក្នុងការដាក់ទណ្ឌកម្មលើលោកស្រី Kim Yo-jong ឬលោក Pak Jong Chon បើទោះជាការស៊ើបអង្កេតបង្ហាញលទ្ធផលបែបណាក៏ដោយ។ ប៉ុន្តែ លោក Lee Kyung-jae បានថ្លែងថា លោក “ចង់ប្រើប្រាស់សកម្មភាពនេះដើម្បីបង្ហាញឱ្យជនជាតិកូរ៉េខាងជើង យល់អំពីមេដឹកនាំរបស់ពួកគេ”៕

ប្រភព៖ AFP

July 17, 2020

ប្រទេសចំនួន3រកឃើញអ្នកផ្ទុកCOVID-19 លើសពី1លាននាក់ ខណៈពិភពលោករកឃើញជិត14លាននាក់

ពិភពលោកទាំងមូលបានរកឃើញអ្នកផ្ទុកCOVID-19 ជិត14លាននាក់ និងអ្នកស្លាប់ដោយសារវីរុសនេះបានកើនដល់ជាង591,000នាក់។

ប្រទេសនិងដែនដីចំនួន221ក្នុងពិភពលោក ត្រូវបានរាយកាណ៍ថា បានរកឃើញផ្ទុកCOVID-19 សរុបចំនួន13,916,980នាក់ និងអ្នកស្លាប់សរុប591,556នាក់ ក្នុងនោះមានអ្នកជំងឺថ្មីចំនួន259,546នាក់ និងអ្នកស្លាប់ថ្មីចំនួន6,025នាក់ត្រូវបានរកឃើញក្នុងរយៈពេល24ម៉ោងចុងក្រោយនេះ។ ចំណែកអ្នកដែលបានជាសះស្បើយបានកើនដល់8,263,929នាក់។

ទ្វីបអាមេរិកបានរកឃើញអ្នកជំងឺសរុប7,439,963នាក់ ខណៈទ្វីបអាស៊ីរកឃើញ3,194,470នាក់ អឺរ៉ុបរកឃើញ2,628,873នាក់ និងអាហ្វ្រិករកឃើញ667,302នាក់។

ប្រទេសដែលបានរកឃើញអ្នកជំងឺCOVID-19 លើសពី1លាននាក់ រួមមាន សហរដ្ឋអាមេរិក (3,695,025នាក់) ប្រេស៊ីល (2,014,738នាក់) និងប្រទេសឥណ្ឌា (1,005,637នាក់)។

July 17, 2020

តារាចម្រៀងរ៉ែប Kanye West បានចុះឈ្មោះជាបេក្ខភាពសម្រាប់តំណែងប្រធានាធិបតីសហរដ្ឋអាមេរិកជាផ្លូវការរួចហើយ

លោក Kanye West ដែលជាតារាចម្រៀងរ៉ែបដ៏ល្បីឈ្មោះ មានលក្ខណគ្រប់គ្រាន់ក្នុងការបង្ហាញខ្លួនក្នុងការបោះឆ្នោតជ្រើសរើសប្រធានាធិបតីនៅក្នុងរដ្ឋ Oklahoma បន្ទាប់ពីបានចុះឈ្មោះក្នុងរដ្ឋនេះជាផ្លូវការ។

តំណាងម្នាក់របស់លោក West បានដាក់ពាក្យជាផ្លូវការ ព្រមទាំងបានបង់ប្រាក់ចំនួន35,000ដុល្លារកាលពីល្ងាចថ្ងៃទី15កក្កដា ដើម្បីឱ្យលោក West ក្លាយជាបេក្ខភាពសម្រាប់ការបោះឆ្នោតជ្រើសរើសប្រធានាធិបតីសហរដ្ឋអាមេរិក នៅក្នុងរដ្ឋ Oklahoma ដែលនឹងត្រូវបានធ្វើឡើងនាថ្ងៃទី3វិច្ឆិកា2020។ នេះបើតាម Misha Mohr អ្នកនាំពាក្យរបស់គណៈកម្មការរៀបចំការបោះឆ្នោតរបស់រដ្ឋ Oklahoma។

លោកស្រី Misha Mohr បន្តថា លោក West អាយុ43ឆ្នាំ គឺជាមនុស្សម្នាក់ក្នុងចំណោមបេក្ខភាពប្រធានាធិបតីឯករាជ្យ3រូបដែលបានបង់ប្រាក់មុនកាលកំណត់។ ចំណែកបេក្ខភាព2រូបផ្សេងទៀត គឺលោកស្រី Jade Simmons ដែលជាអ្នកលេងព្យាណូ និងលោក Brock Pierce ជាអ្នកជំនួញ។

ការដាក់ពាក្យចុះឈ្មោះខាងលើនេះ ត្រូវបានធ្វើឡើង1ថ្ងៃបន្ទាប់ពីសារព័ត៌មាន New York Magazin’s Intelligencer ដកស្រង់សម្ដីរបស់ Steve Kramer ដែលជាសមាជិកម្នាក់នៃក្រុមគ្រប់គ្រងយុទ្ធនាការឃោសនារកសំឡេងឆ្នោតរបស់លោក West បានឱ្យដឹងថា តារាចម្រៀងរ៉ែមរូបនេះបានបោះបង់ការប្រកួតប្រជែងដណ្ដើមតំណែងប្រធានាធិបតីទៅហើយ ដោយសារតែអត្រានៃអ្នកគាំទ្រមានចំនួនតិចពេក។ យោងតាមការស្ទង់មតិកាលពីថ្ងៃទី17កក្កដាបានបង្ហាញថា លោក West ទទួលបានការគាំទ្រត្រឹមតែ2%ប៉ុណ្ណោះ។

លោកស្រី Jade Simmons ជាបេក្ខភាពប្រធានាធិបតីអាមេរិក

ប៉ុន្តែ ទំព័រTMZ បានចេញផ្សាយថា មេដឹកនាំយុទ្ធនាការរកសំឡេងឆ្នោតរបស់លោក West កាលពីថ្ងៃទី15កក្កដា បានដាក់ពាក្យចុះឈ្មោះទៅកាន់គណៈកម្មការរៀបចំការបោះឆ្នោតរួចហើយ ដោយបានឱ្យដឹងថា គណកម្មការ Kanye 2020 នឹងធ្វើសកម្មភាពដូចទៅនឹងគណៈកម្មការឃោសនារកសំឡេងឆ្នោតផ្លូវការសម្រាប់បេក្ខភាព Kanye West។

លោក West ដែលធ្លាប់បាននិយាយថា ខ្លួនត្រូវបានគ្រូពេទ្យធ្វើរោគវិនិច្ឆ័យថា មានជំងឺផ្លូវចិត្តបាយប៉ូឡា (ជំងឺបាយប៉ូឡា គឺជាប្រភេទនៃជំងឺអារម្មណ៍ ដែលមានបណ្តុំរោគសញ្ញាចំនួន2ឆ្លាស់គ្នាគឺ ជំងឺមេនៀ (Mania) និងជំងឺបាក់ទឹកចិត្ត (depression)។ បច្ចុប្បន្ន មិនទាន់ដឹងច្បាស់ថា អ្នកចម្រៀងរូបនេះបានត្រៀមខ្លួនរួចរាល់ហើយឬនៅ ក្នុងការប្រមូលស្នាមមេដៃអ្នកគាំទ្រឱ្យបានគ្រប់ចំនួនតាមលក្ខណកំណត់ ក៏ដូចជាយុទ្ធនាការឃោសនារកសំឡេងឆ្នោត ឬយ៉ាងណានៅឡើយ។

តារាចម្រៀងរ៉ែប Kanye West ចុះឈ្មោះជាបេក្ខភាពប្រធានាធិបតីសហរដ្ឋអាមេរិកជាផ្លូវការរួចហើយ — លោកស្រី Kim Kardashian និងលោក Kanye West

លោក Kanye West កើតនៅឆ្នាំ1977 នៅក្នុងទីក្រុង Atlanta រដ្ឋ Georgia សហរដ្ឋអាមេរិក។ បច្ចុប្បន្ន លោករស់នៅជាមួយភរិយាជាតារាទូរទ្សន៍ដ៏ល្បីល្បាញម្នាក់ គឺលោកស្រី Kim Kardashian នៅតំបន់ Hidden Hills ក្នុងទីក្រុង Los Angeles។ ទស្សនាវដ្ដី Forbes កាលពីខែមេសា2020 បានទទួលស្គាល់ថា លោក West គឺជាមហាសេដ្ឋីម្នាក់ដែលមានទ្រព្យសរុបប្រមាណជា1.3ពាន់លានដុល្លារអាមេរិក៕

អត្ថបទទាក់ទង៖

>ទ្រព្យសម្បត្តិពាន់លានដុល្លាររបស់ Kanye West គូប្រជែងថ្មីរបស់លោក Trump សម្រាប់ការបោះឆ្នោតជ្រើសរើសប្រធានាធិបតីឆ្នាំនេះ

>អ្នកចម្រៀងរ៉ែប Kanye West ស្វាមីរបស់ Kim Kardashian ប្រកាសដណ្ដើមសន្លឹកឆ្នោតពីលោក Trump ដើម្បីធ្វើជាប្រធានាធិបតីក្នុងឆ្នាំនេះ

>តើការចូលរួមប្រជែងយកតំណែងប្រធានាធិបតីសហរដ្ឋអាមេរិករបស់ Kanye West គឺពិតជាអាចប៉ះពាល់ដល់សំឡេងឆ្នោត?

July 16, 2020

Category: អន្តរជាតិ