Category: អន្តរជាតិ

ប្រភពព័ត៌មានរបស់សារព័ត៌មាន WSJ បានឱ្យដឹងថា Oracle ទើបតែទទួលបានជ័យជំនះក្នុងការដណ្ដើមទិញផ្នែកសកម្មភាពនៅសហរដ្ឋអាម៉េរិករបស់ក្រុមហ៊ុន TikTok។

អ្នកជំនាញអំពីស្ថានការណ៍ទាក់ទិននឹងបញ្ហាខាងលើបានឱ្យដឹងថា Oracle នឹងត្រូវបានគេប្រកាសនៅពេលដ៏ខ្លីខាងមុខនេះថា នឹងក្លាយជាដៃគូដ៏គួរឱ្យជឿជាក់ របស់ TikTok នៅសហរដ្ឋអាម៉េរិក រួមនឹងកិច្ចព្រមព្រៀងរវាងក្រុមហ៊ុន Oracle ជាមួយនឹង ByteDance ដែលជាក្រុមហ៊ុនមេរបស់បណ្ដាញសង្គមវីដេអូខ្លី TikTok។ កិច្ចព្រមព្រៀងទិញលក់ខាងលើ ទំនងជាត្រូវបានធ្វើឡើងក្រោមរូបភាពលក់ផ្ដាច់ទាំងស្រុង។ កាលពីខែសីហា Oracle និង Microsoft គឺជាក្រុមហ៊ុនធំៗដែលបានចរចាជាមួយក្រុមហ៊ុន ByteDance ក្នុងការទិញនិងលក់ក្រុមហ៊ុនបុត្រសម្ព័ន្ធ TikTok។

ព័ត៌មានខាងលើត្រូវបានចេញផ្សាយភ្លាមៗ ក្រោយពី Microsoft ចេញសេចក្ដីប្រកាសថា កាលពីថ្ងៃទី13កញ្ញា ក្រុមហ៊ុន ByteDance បានបដិសេធសំណើរបស់ Microsoft ក្នុងការទិញដូរបណ្ដាញសង្គម TikTok។

ទាក់ទិននឹងបញ្ហា TikTok កាលពីខែសីហា លោក Trump ដែលប្រធានាធិបតីសហរដ្ឋអាម៉េរិក បានប្រកាសថា បើសិនមិនលក់ ឬមិនមានកិច្ចព្រមព្រៀងណាមួយជាមួយនឹងក្រុមហ៊ុនដទៃទៀត នោះ TikTok នឹងត្រូវបានបិទមិនឱ្យធ្វើសកម្មភាពនៅក្នុងទីផ្សារសហរដ្ឋអាម៉េរិក ចាប់ពីថ្ងៃទី15កញ្ញា។ កាលពីប៉ុន្មានថ្ងៃមុននេះ លោក Trump ថែមទាំងបានថ្លែងថា នឹងមិនពន្យារពេលឱ្យ TikTok នោះឡើយ។

កាលពីម្សិលមិញ (13កញ្ញា) SCMP ដកស្រង់ព័ត៌មានពីក្រុមហ៊ុន ByteDance បានឱ្យដឹងថា ក្រុមហ៊ុនេះនឹងមិនប្រគល់បច្ចេកវិទ្យារបស់ TikTok ក្នុងករណីមានកិច្ចព្រមព្រៀងណាមួយនោះទេ។ ByteDance បានជូនដំណឹងនេះទៅកាន់ក្រុមមន្ត្រីសហរដ្ឋអាម៉េរិក និងក្រុមអ្នកវិនិយោគរួចហើយអំពីការសម្រេចចិត្តរបស់ខ្លួន។

នៅពេលដែលការទិញដូរក្រុមហ៊ុននៅសហរដ្ឋអាម៉េរិកមិនទាន់បានបញ្ចប់ គេឃើញមានដំណឹងចចាមអារ៉ាមមួយនិយាយថា រដ្ឋាភិបាលចិននឹងបិទផ្លូវរបស់ TikTok និងបញ្ចប់ការទិញដូរដ៏ចម្រូងចម្រាសជាមួយសហរដ្ឋអាម៉េរិក។ ក៏ប៉ុន្តែ ភ្លាមៗនោះ ភាគី TikTok ក៏បានចេញមុខមកបដិសេធពាក្យចចាមអារ៉ាមនេះ៕

ប្រភព៖ WSJ

កាលពី19ឆ្នាំមុន ភេរវកររបស់ក្រុម al-Qaeda ចំនួន19នាក់ បានប្លន់យន្តហោះដឹកអ្នកដំណើរចំនួន4គ្រឿង ហើយបានប្រព្រឹត្តអំពើភេរវកម្មដ៏ធំមួយនៅលើទឹកដីសហរដ្ឋអាម៉េរិក នាំឱ្យកក្រើកពិភពលោក និងបណ្ដាលឱ្យមនុស្សរាប់ពាន់នាក់បានស្លាប់។

ខាងលើ​នេះ​គឺជា​ទិដ្ឋភាពយន្តហោះ Boeing 767 ដែលមានលេខសម្គាល់ជើងហោះហើរ11 របស់ American Airlines បានហោះទៅបុកអគារផ្នែកខាងជើងនៃមជ្ឈមណ្ឌលពាណិជ្ជកម្មពិភពលោក (WTC) ក្នុងទីក្រុង New York នៅវេលាម៉ោង8និង45នាទីថ្ងៃទី11កញ្ញា2001។

ដុំភ្លើងដ៏ធំដែលបានផ្ទុះឡើងនៅក្នុងករណីវាយប្រហេរភេរវកម្មនេះ គឺជាសោកនាដកម្មក្នុងប្រទេសដ៏ធ្ងន់ធ្ងរបំផុតមួយក្នុងប្រវត្តិសាស្ត្ររបស់សហរដ្ឋអាម៉េរិក។ នេះគឺជាការវាយប្រហារបែបភេរវកម្មរបស់ក្រុម al-Qaeda ដែលដឹកនាំដោយលោក Osama bin Laden។

អ្នកដំណើរនៅតាមដងផ្លូវ ចង្អុលទៅលើមជ្ឈមណ្ឌលពាណិជ្ជកម្មពិភពលោក ដែលកំពុងហុយផ្សែងទ្រលោម បន្ទាប់ពីមានយន្តហោះមួយគ្រឿង ហោះមកបុក។

ក្រុមសមត្ថកិច្ចដែលគ្រប់គ្រងស្ថានីយឆ្លើយឆ្លងលេខ911 ទទួលបានទូរស័ព្ទជាបន្តបន្ទាប់ពីជនរងគ្រោះដែលកំពុងជាប់គាំងក្នុងអគារ។ ដំបូងឡើយ គេយល់ថា នេះគ្រាន់តែជារឿងគ្រោះថ្នាក់ដោយចៃដន់តែប៉ុណ្ណោះ។

រហូតដល់ម៉ោង9និង3នាទី យន្តហោះ Boeing 767 មួយគ្រឿងដែលមានលេខសម្គាល់ជើងហោះហើរ 175 របស់ក្រុមហ៊ុនអាកាសចរណ៍ United Airlines បានហោះមកបុកចំជាន់ទី60 នៃអគារផ្នែកខាងត្បូងរបស់មជ្ឈមណ្ឌលពាណិជ្ជកម្មពិភពលោក ពេលនោះទើបគេដឹងច្បាស់ថា សហរដ្ឋអាម៉េរិកកំពុងរងការវាយប្រហារពីក្រុមភេរវករ។

ប្រធានាធិបតី George W. Bush កំពុងស្ដាប់ការរាយការណ៍របស់ Andrew Card ដែលជាប្រធានការិយាល័យនៃសេតវិមាន អំពីករណីវាយប្រហារភេរវកម្ម ក្នុងគ្រាដែលយន្តហោះទី2បានហោះមកបុកអគារ WTC ខណៈដែលលោកកំពុងធ្វើជាអធិបតីនៅក្នុងសិក្ខាសាលាមួយនៅសាលាបឋមសិក្សា Emma E. Booker ដែលមានទីតាំងនៅក្នុងតំបន់ Sarasota ក្នុងរដ្ឋ Florida។

ក្រុមមនុស្សដែលជាប់គាំងនៅក្នុងអគារភាគខាងជើងនៃមជ្ឈមណ្ឌលពាណិជ្ជកម្មពិភពលោក នាំគ្នាមើលមកខាងក្រៅ ខណៈដែលអគារនេះកំពុងឆេះ។

ឧត្ថម្ភាគចក្រមួយគ្រឿងកំពុងហោះក្បែរ WTC ក្រោយពីយន្តហោះដឹកអ្នកដំណើរមួយគ្រឿងត្រូវគេប្លន់ និងហោះទៅបុកអគារនេះ។

ផ្សែងខ្មៅខ្មួលខ្មាញ់ ហុយចេញពីអគារទាំង2របស់ WTC បន្ទាប់ពីត្រូវបានវាយប្រហារ។

ឧត្ថម្ភាគចក្រ ហោះហើរត្រួតពិនិត្យការខូចខាតរបស់មន្ទីរបញ្ចកោណ ចំណែកកងកម្លាំងពន្លត់អគ្គិសភ័យកំពុងព្យាយាមគ្រប់គ្រងអណ្ដាតភ្លើង ក្រោយពីក្រុមភេរវករបានប្លន់យកយន្តហោះ Boeing 757 ដែលមានស្លាកសម្គាល់ជើងហោះហើរលេខ77 របស់ក្រុមហ៊ុនអាកាសចរណ៍American Airlines និងបញ្ជាឱ្យហោះទៅបុកមន្ទីរបញ្ចក្រោណនៅវេលាម៉ោង9និង37នាទីក្នុងថ្ងៃដដែល (11កញ្ញា)។

ផ្នែកដែលនៅសេះសល់របស់ WTC ដែលជាអគារទី2 នៃមជ្ឈមណ្ឌលពាណិជ្ជកម្មពិភពលោក ត្រូវបានកម្ទេចនៅក្នុងពពកផ្សែងធូលី សល់ត្រឹមតែគំនរបាក់បែក ក្រោយពីអគារមួយទៀត រលំរលាយបានប្រហែលកន្លះម៉ោង។

អ្នកពន្លត់អគ្គិភ័យមួយក្រុម ដើរនៅលើគំនរបាក់បែកដែលស្ថិតនៅក្បែរជើងអគារខាងត្បូងរបស់ WTC កាលពីថ្ងៃទី11កញ្ញា2001។

បន្ទាប់ពីបានឆេះអស់រយៈពេល1ម៉ោងនិង42នាទី អគារពាណិជ្ជពិភពលោកទាំង2នេះ ក៏បានដួលរលំរលាយ។ ការដួលរលំរបស់អគារទាំង2នេះ ក៏បានធ្វើឱ្យអគារទាបៗដែលនៅក្បែរនោះត្រូវរងការខូចខាតមួយផ្នែកធំ ឬទាំងស្រុងក៏មាន។ អគារ WTC លេខ7 បានដួលរលំនៅវេលាម៉ោង17និង21នាទី។

ក្រុមមន្ត្រីស៊ើបអង្កេត មកកាន់កន្លែងកើតហេតុនៃការធ្លាក់យន្តហោះនៅក្បែរតំបន់ Shanksville ក្នុងរដ្ឋ Pennyslvania កាលពីថ្ងៃទី11កញ្ញា2001។

យន្តហោះ Boeing 757 មានស្លាកសម្គាល់ជើងហោះហើរលេខ93 របស់ក្រុមហ៊ុន United Airlines បានធ្លាក់នៅតំបន់ Shanksville វេលាម៉ោង10និង3នាទី ក្រោយពីក្រុមអ្នកដំណើរបានព្យាយាមគ្រប់គ្រងក្រុមភេរវករដែលកំពុងប្លន់យន្តហោះនេះ។

ករណីវាយប្រហារភេរវកម្មក្នុងថ្ងៃទី11 ខែកញ្ញា ឆ្នាំ2001 នៅសហរដ្ឋអាម៉េរិក បានសម្លាប់មនុស្សជិត3,000នាក់៕

ប្រភព៖ RT

ករណីផ្ទុះនេះ បានកើតឡើងនៅក្នុងឃ្លាំងអាវុធមួយនៅទីក្រុង Zarqa ដែលមានចម្ងាយពីរដ្ឋធានី Amman ប្រមាណ​ជា​​20​គីឡូម៉ែត្រ កាលពីវេលាទៀបភ្លឺថ្ងៃនេះ។

“ហេតុការណ៍នេះ បានកើតឡើងនៅវេលាទៀបភ្លឺ ថ្ងៃទី11កញ្ញា នៅក្នុងឃ្លាំងផ្ទុកអាវុធអស់សុពលភាពប្រើប្រាស់នៅក្នុងទីក្រុង Zarqa។ ឃ្លាំងនេះស្ថិតនៅក្នុងតំបន់ដាច់ពីគេ មិនមានមនុស្សរស់នៅ និងមានការឃ្លាំមើលជាប្រចាំ។ ការផ្ទុះនេះទំនងជាកើតឡើងដោយសារទុសេខ្សែភ្លើង។ អគ្គបញ្ជាការដ្ឋាននៃកងទ័ពបានឱ្យដឹងថា មិនទាន់មានស្ថិតិអំពីករណីរងរបួស និងស្លាប់នៅឡើយ” នេះបើតាម Amjad Odeh Al-Adaileh អ្នកនាំពាក្យរបស់រដ្ឋាភិបាលហ្សកដានី។

សារព័ត៌មាន Sky New Arabia មុននេះ បានដកស្រង់ដំណឹងពីប្រភពព័ត៌មាននៅឯអគ្គនាយកដ្ឋានសន្តិសុខរបស់ប្រទេសហ្សកដានី បានឱ្យដឹងថា ហេតុការណ៍ខាងលើនេះបានសម្លាប់មនុស្សយ៉ាងតិច2នាក់ និង3នាក់ផ្សេងទៀតរងរបួសធ្ងន់។

វីដេអូដែលត្រូវបានបង្ហោះនៅលើបណ្ដាញសង្គមបង្ហាញថា ករណីផ្ទុះនេះបង្កឱ្យមានអណ្ដាតភ្លើងដ៏ធំមហិមា និងផ្សែងខ្ពស់ស្ទើរកប់ពពក ធ្វើឱ្យផ្ទៃមេឃក្នុងទីក្រុង Zarqa និងរដ្ឋធានី Amman មានពន្លឺសព្វទីកន្លែង។ អណ្ដាតភ្លើង និងដុំភ្លើងនានាក៏បានខ្ទាតចេញពីកន្លែងកើតហេតុ ដែលនេះអាចបណ្ដាលមកពីការផ្ទុះគ្រាប់ផ្លោង។ ទន្ទឹមនឹងអណ្ដាតភ្លើង គេក៏បានឮសំឡេងផ្ទុះយ៉ាងកក្រើកមេឃរញ្ជួយដីជាបន្តបន្ទាប់ គួរឱ្យតក់ស្លុតផងដែរ៕

ប្រភព៖ Reuters

កងទ័ពអាកាសឥណ្ឌាបានប្រារព្ធពិធីបួងសួង និងបញ្ជូនយន្តហោះចម្បាំងទៅហោះសម្ដែងក្នុងពេលប្រគល់យន្តហោះចម្បាំង Rafale 5គ្រឿងទៅឱ្យក្រុមហោះហើរដែលមានមូលដ្ឋាននៅក្បែរព្រំដែនជាប់ជាមួយចិន។

ថ្ងៃទី10កញ្ញានេះ កងទ័ពឥណ្ឌាបានប្រារព្ធពិធីប្រគល់យន្តហោះចម្បាំង Rafale ចំនួន5គ្រឿងទៅឱ្យក្រុមហោះហើរការពារដែនអាកាសលេខ17 ដែលស្ថិតក្នុងមូលដ្ឋានទ័ព Ambala ក្នុងរដ្ឋ Haryana ក្បែរតំបន់ព្រំដែនជាប់ជាមួយប៉ាគីស្ថាន និងចិន។ កងកម្លាំងហោះហើរលេខ17 ដែលមានរហ័សនាមថា “ព្រួញមាស” គឺជាអង្គភាពដំបូងរបស់ទ័ពអាកាសឥណ្ឌា ដែលទទួលបានយន្តហោះ Rafale។

នៅក្នុងពិធីខាងលើនេះ ក៏មានការចូលរួមជាអធិបតីពីសំណាក់រដ្ឋមន្ត្រីក្រសួងការពារជាតិឥណ្ឌា Rajnath Singh រួមនឹងមន្ត្រីជាន់ខ្ពស់ជាច្រើនរូបទៀត។ ក្នុងពិធីនេះ ក្រុមអ្នកបួសបានធ្វើពិធីបួងសួងសុំសេចក្ដីសុខដល់យន្តហោះចម្បាំង Rafale ដែលទើបតែទទួលបាន។ បន្ទាប់មក យន្តហោះចម្បាំង Rafale រួមនឹងយន្តហោះចម្បាំង Tejas និងឧត្ថម្ភាគចក្រ Dhruv ក៏បានហោះហើរសម្ដែងនៅលើអាកាសផងដែរ។

ឥណ្ឌាបានទទួលយន្តហោះចម្បាំង Rafale ចំនួន5គ្រឿងជាលើកដំបូងពីប្រទេសបារាំងកាលពីថ្ងៃទី29កក្កដា ហើយក្រោយមកយន្តហោះទាំងនេះត្រូវបានបញ្ជូនទៅចូលរួមធ្វើការហ្វឹកហាត់នៅតំបន់ភ្នំក្នុងរដ្ឋ Himachal Pradesh និងតំបន់ Ladakh។ យន្តហោះចម្បាំងខាងលើនេះ ស្ថិតក្នុងចំណោមយន្តហោះចម្បាំង Rafale ចំនួន36គ្រឿងដែលឥណ្ឌាបញ្ជាទិញពីក្រុមហ៊ុន Dassault Aviation របស់បារាំងកាលពីឆ្នាំ2016 ក្នុងតម្លៃសរុបឡើងដល់8.7ពាន់លានដុល្លារ។ តាមផែនការ ឥណ្ឌានឹងទទួលបានយន្តហោះទាំងនេះនៅដំណាច់ឆ្នាំ2021។

សកម្មភាពហោះហើរនៃក្រុមយន្តហោះ Rafale របស់ឥណ្ឌានេះ ត្រូវបានធ្វើឡើងនៅក្នុងគ្រាដែលភាពតានតឹងរវាងចិននិងឥណ្ឌាកំពុងមានការកើនឡើងដោយសារតែជម្លោះនៅព្រំដែន។

ហេតុការណ៍ប៉ះទង្គិចគ្នារវាងទាហានចិន និងទាហានឥណ្ឌានៅតាមបន្ទាត់ព្រំដែន LAC បានកើតឡើងជាបន្តបន្ទាប់ ក្នុងនោះក៏មានហេតុការណ៍វាយតប់គ្នាកាលពីថ្ងៃទី15មិថុនា បណ្ដាលឱ្យទាហានឥណ្ឌា20នាក់ និងទាហានចិនជាច្រើនាក់បានបាត់បង់ជីវិត។

ឥណ្ឌា និងចិនបានចរចាជាមួយគ្នាជាច្រើនលើកដើម្បីកាត់បន្ថយកម្ដៅនៅតាមបន្ទាត់ព្រំដែន LAC ដែលមិនទាន់បានកំណត់ច្បាស់លាស់។ ប៉ុន្តែ ភាពតានតឹងបានកើតឡើងជាថ្មី បន្ទាប់ពីប្រទេសទាំងពីរបានចោទគ្នាថា បានរំលោភលើកិច្ចព្រមព្រៀងមិនប្រើកាំភ្លើង ក្រោយពីមានការប៉ះទង្គិចគ្នាមួយករណី នៅក្បែរបឹង Pangong Tso៕

ប្រភព៖ Sputnik

យន្តហោះចម្បាំង និងយន្តហោះដឹកគ្រឿងសព្វាវុធជាច្រើនគ្រឿងរបស់ទីក្រុងប៉េកាំង បានហោះទៅក្បែរកោះតៃវ៉ាន់ បន្ទាប់ពីកោះនេះបាញ់សាកល្បងកាំជ្រួចថ្មី។

កងទ័ពរំដោះប្រជាជនចិន (PLA) បានបញ្ជូនយន្តហោះចម្បាំង Su-30 និង J-10 រួមនឹងយន្តហោះដឹកគ្រឿងអាវុធ Y-8 ជាច្រើនគ្រឿងទៅកាន់តំបន់កំណត់អត្តសញ្ញាណការពារដែនអាកាស (ADIZ) នៅភាគនិរតីនៃកោះតៃវ៉ាន់។ ព័ត៌មាននេះត្រូវបានប្រកាសឱ្យដឹងពីអង្គភាពការពារជាតិរបស់កោះតៃវ៉ាន់ កាលពីថ្ងៃទី9 និងទី10 ខែកញ្ញា។

កងទ័ពការពារដែនអាកាសរបស់កោះតៃវ៉ាន់ បានបញ្ជូនយន្តហោះចម្បាំងជាច្រើនគ្រឿងទៅរារាំង និងបណ្ដេញយន្តហោះចិនឱ្យចាកចេញ្ពីតំបន់ ADIZ របស់កោះនេះ។

អង្គភាពការពារជាតិរបស់តៃវ៉ាន់បានសម្ដែងការព្រួយបារម្ភយ៉ាងខ្លាំងចំពោះសកម្មភាពរបស់យន្តហោះចម្បាំងចិន និងបានចោទទីក្រុងប៉េកាំងថា បាន “ធ្វើសកម្មភាពជាឯកតោភាគី” និង “បំផ្លាញសន្តិភាព ស្ថិរភាពក្នុងតំបន់”។

ចំណែកភាគីខាងក្រសួងការពារជាតិចិនឯណោះវិញ មិនទាន់មានប្រតិកម្មណាមួយចំពោះព័ត៌មានដែលប្រកាសដោយភាគីតៃវ៉ាន់នៅឡើយ។ ប៉ុន្តែ កន្លងមក ទីក្រុងប៉េកាំងធ្លាប់បានប្រកាសជាច្រើនលើកហើយថា ខ្លួននឹងបញ្ជូនយន្តហោះទៅក្បែរកោះតៃវ៉ាន់ដើម្បី “ការពារអធិបតេយ្យជាតិ”។

សារព័ត៌មានតៃវ៉ាន់បានចុះផ្សាយថា យន្តហោះចម្បាំងរបស់ PLA បានហោះក្បែរតំបន់ភាគនិរតីនៃកោះនេះ យ៉ាងតិច24លើក នៅលើកម្ពស់ចាប់ពី1,500-9,000ម៉ែត្រ ចន្លោះពីម៉ោង7និង7នាទី ទៅម៉ោង9និង30នាទីនៃថ្ងៃទី9កញ្ញា។ សកម្មភាពនេះត្រូវបានធ្វើឡើងភ្លាមៗ បន្ទាប់ពីកោះតៃវ៉ាន់បាញ់សាកល្បងកាំជ្រួចថ្មីដែលមិនទាន់ស្គាល់អត្តសញ្ញាណ នៅវេលាចន្លោះពីម៉ោង5ដល់ម៉ោង7ក្នុងថ្ងៃទី9កញ្ញា។

កោះតៃវ៉ាន់បានប្រកាសថា នឹងបាញ់សាកល្បងកាំជ្រួចជាបន្តបន្ទាប់ទៀតនៅលើលម្ហសមុទ្រភាគខាងត្បូង ភាគខាងកើត និងភាគឦសាននៃកោះនេះ។ យ៉ាងណាក៏ដោយ ទីក្រុងតៃប៉ិ មិនបានបង្ហើបឱ្យដឹងលម្អិតអំពីការបាញ់សាកល្បងអាវុធនេះទេ។

សារព័ត៌មានតៃវ៉ាន់យល់ថា សកម្មភាពរបស់ PLA គឺមានបំណងប្រមូលព័ត៌មានចារកម្មទាក់ទិននឹងការបាញ់សាកល្បងអាវុធនានារបស់កោះតៃវ៉ាន់ ខណៈ Chieh Chung ដែលជាអ្នកជំនាញផ្នែកការពារជាតិនៅទីក្រុងតៃប៉ិ បានអះអាងថា នេះគឺជា “សកម្មភាពបង្ហាញកម្លាំង” របស់ PLA។

ប្រទេសចិន ចាត់ទុកកោះតៃវ៉ាន់ថាជាផ្នែកមួយនៃទឹកដីរបស់ខ្លួន និងត្រៀមខ្លួនជានិច្ចសម្រាប់ការបង្រួបបង្រួមទឹកដីនាពេលខាងមុខ ទោះជាត្រូវប្រើកម្លាំងបាយក៏ដោយ បើសិនជាចាំបាច់។ ប្រទេសចិន ថ្មីៗនេះក៏បានបង្កើនសម្ពាធទៅលើកោះតៃវ៉ាន់ជាបន្តបន្ទាប់ ដោយការធ្វើលំហាត់សមយុទ្ធយោធាទ្រង់ទ្រាយធំនៅក្បែរៗកោះតៃវ៉ាន់ ជាមួយនឹងគ្រឿងសព្វាវុធទំនើបៗបំផុតក្នុងជួរកងទ័ពរបស់ប្រទេសនេះ៕

ប្រភព៖ SCMP, Reuters

លោកប្រធានាធិបតីសហរដ្ឋអាមេរិក ដូណាល់ ត្រាំ បានសារភាពកាលពីខែកុម្ភៈថា លោកបានដឹងពីភាពធ្ងន់ធ្ងរ និងការឆ្លងរាលដាលបានយ៉ាងងាយ របស់មេរោគវីរុសកូរ៉ូណាប្រភេទថ្មី ឬកូវីដ-19 តែមិនព្រមបញ្ជូនសារនេះទៅដល់ប្រជាជនអាមេរិកទេ ព្រោះលោកមិនត្រូវការបង្កភាពភ័យភ្ញាក់ផ្អើល។ នេះបើយោងតាមសៀវភៅទើបតែបោះពុម្ពផ្សាយថ្មីមួយ ដែលអះអាងពីបទសម្ភាសរបស់លោកត្រាំ។

កំណត់ត្រាកិច្ចសម្ភាសន៍ ដែលខាង CNN ទទួលបាន និងសៀវភៅថ្មី “Rage” របស់អ្នកឆ្លើយឆ្លងព័ត៌មាន បប់ វូដវើដ ត្រូវបានផ្សព្វផ្សាយចេញមក មិនប៉ុន្មានសប្ដាហ៍ មុននឹងដល់ថ្ងៃបោះឆ្នោតជ្រើសតាំងប្រធានាធិបតី នៅថ្ងៃទី3 វិច្ឆិកា 2020។ ក្នុងពេលជាមួយគ្នា វាថែមទាំងត្រូវបានផ្សព្វផ្សាយចេញមកខណៈពេលដែលក្ដីព្យាយាមក្នុងការតស៊ូប្រឆាំងនឹងមេរោគកូវីដ-19 របស់លោកត្រាំ កំពុងត្រូវរងការរិះគន់យ៉ាងខ្លាំងថា តិចតួចពេក និងយឺតពេលទៅហើយ។

លោក ដូណាល់ ត្រាំ បេក្ខភាពមកពីគណបក្សសាធារណរដ្ឋ ក្នុងការដណ្ដើមកៅអីប្រធានាធិបតី បានបដិសេធភាពធ្ងន់ធ្ងររបស់មេរោគកូវីដ-19 អស់ជាច្រើនខែមកហើយ ទោះជាមេរោគមរណៈនេះកំពុងឆ្លងរាលដាលយ៉ាងឆាប់រហ័សទូទាំងប្រទេស រហូតដល់ត្រូវលោក ចូ បៃឌិន បេក្ខភាពមកពីគណបក្សដេម៉ូក្រេត វាយប្រហាររដ្ឋបាលរបស់លោកត្រាំថា ឆ្លើយតបនឹងការឆ្លងរាលដាលរបស់មេរោគកូវីដ-19 យឺតយ៉ាវជ្រុលពេក។

លោកត្រាំ បានប្រាប់ទៅលោក វូដវើដ កាលពីថ្ងៃទី19 មីនា ឬមិនប៉ុន្មានថ្ងៃក្រោយលោកប្រកាសស្ថានការណ៍គ្រាអាសន្នកម្រិតជាតិថា “ខ្ញុំត្រូវការបដិសេធភាពធ្ងន់ធ្ងររបស់វា ខ្ញុំបដិសេធភាពធ្ងន់ធ្ងររបស់វា ព្រោះថា ខ្ញុំមិនត្រូវការសាងភាពភ័យភ្ញាក់ផ្អើល”

ក្នុងអំឡុងកិច្ចសន្ទនា លោកត្រាំថែមទាំងបានប្រាប់ទៅលោកវូដវើដទៀតផងថា មានចំណុចជាក់ច្បាស់ដ៏គួរឱ្យភ្ញាក់ផ្អើលម្យ៉ាង ដែលទើបតែបង្ហាញខ្លួនឡើង ពាក់ព័ន្ធនឹងមុខសញ្ញារបស់មេរោគវីរុស។ “វាមិនមែនត្រឹមតែមនុស្សចាស់ជរាប៉ុណ្ណោះទេ តែរួមទាំងមនុស្សវ័យកំលោះក្រមុំទៀតផង ហើយយើងមានមនុស្សវ័យកំលោះក្រមុំច្រើនណាស់”។

លោកប្រធានាធិបតី ត្រាំ កាលពីថ្ងៃពុធ(ទី9កញ្ញា) បានការពារដំណើរផ្លូវរបស់ខ្លួនឯងក្នុងការទប់ទល់នឹងជំងឺឆ្លងរាលដាលដ៏ធំនេះ ដែលរហូតមកដល់ពេលនេះ បានសម្លាប់ជីវិតមនុស្សនៅក្នុងសហរដ្ឋអាមេរិកអស់ជាង 190,000នាក់ទៅហើយ និងរកឃើញចំនួនអ្នកឆ្លងមេរោគថ្មីកើនឡើងយ៉ាងច្រើននៅភាគខាងលិចរបស់ប្រទេស។

លោកត្រាំ ថ្លែងនៅក្នុងការធ្វើកិច្ចការងារមួយនៅមន្ទីរសេតវិមានថា “ចំណុចជាក់ច្បាស់គឺ ខ្ញុំជាអ្នកដឹកនាំការសាទររបស់ប្រទេសមួយនេះ ខ្ញុំស្រឡាញ់ប្រទេសរបស់យើង ហើយខ្ញុំមិនត្រូវការឱ្យប្រជាជនភ័យភ្ញាក់ផ្អើលទេ យើងទាំងអស់គ្នា ធ្វើបានល្អហើយ មិនថាតាមស្តង់ដាណាក៏ដោយ”

CNN និង Washinton Post បានរាយការណ៍ថា តាមរយៈពាក្យសម្ភាសន៍ជាមួយលោកវូដវើដ លោកត្រាំបានដឹងរឿងពាក់ព័ន្ធនឹងកូវីដ-19 ជាពិសេស ភាពកាចសាហាវរបស់វា តាំងពីអំឡុងដើមខែកុម្ភៈ។ “វាបំភាយមេរោគតាមរយៈខ្យល់អាកាស” លោកត្រាំ ថ្លែងក្នុងអំឡុងកិច្ចសម្ភាសន៍កាលពីថ្ងៃទី7កុម្ភៈ។

“ការសាយភាយមេរោគទាំងនោះ ធ្ងន់ធ្ងរជាងការប៉ះពាល់ដោយផ្ទាល់ទៅទៀត លោកអ្នកមិនចាំបាច់ប៉ះពាល់វត្ថុផ្សេងៗទេ មែនទេ? តែជាមួយខ្យល់អាកាស លោកអ្នកគ្រាន់តែដកដង្ហើមចូលទៅប៉ុណ្ណោះ ហើយអាហ្នឹងឯង គឺវិធីចម្លងមេរោគរបស់វា ដូច្នេះទើបវាជាមេរោគវីរុសដែលមានល្បិចកលច្រើនណាស់ ជាវីរុសដែលស្មុគស្មាញ និងវាថែមទាំងជាវីរុសដែលកាចសាហាវជាងគេ ទោះជាលោកអ្នករឹងមាំក៏ដោយ”។

យ៉ាងណាក៏ដោយ 1សប្ដាហ៍បន្ទាប់ពីការផ្ដល់សម្ភាស លោកត្រាំបានថ្លែងក្នុងអំឡុងពេលថ្លែងការណ៍សរុបនៅមន្ទីរសេតវិមានថា ចំនួនករណីអ្នកឆ្លងមេរោគវីរុសកូរ៉ូណាប្រភេទថ្មីនៅក្នុងសហរដ្ឋអាមេរិក នឹងថយចុះឆ្ពោះទៅរកកម្រិតក្បែរសូន្យក្នុងអំឡុង 2សប្ដាហ៍ទៀត។

លោកវូដវើដ បានធ្វើការសម្ភាសលោកដូណាល់ ត្រាំ ចំនួន 18លើក ដើម្បីរួបរួមចងក្រងជាសៀវភៅ ដែលមានកំណត់ចេញផ្សព្វផ្សាយនៅថ្ងៃទី15 កញ្ញា។

ចំណែកការបកអាក្រាតផ្សេងៗទៀតនៅក្នុងសៀវភៅ ក្នុងនោះរួមមានទាំងពាក្យសម្ដីដែលមើលងាយ មើលថោកបណ្ដាមេដឹកនាំកងទ័ពសហរដ្ឋអាមេរិករបស់លោកត្រាំ ខណៈដែលសប្ដាហ៍នេះ លោកត្រាំ ទើបតែត្រូវរងការរិះគន់យ៉ាងធ្ងន់ធ្ងរ ក្រោយមានរបាយការណ៍ព័ត៌មានថា លោកបានប្រមាថមើលងាយកិត្តិយសរបស់ធនធានមនុស្សខាងយោធា និងអតីតយុទ្ធជនដែលបានស្លាប់ទៅហើយផង៕

ប្រភព៖ សារព័ត៌មានបរទេស

វីដេអូបង្ហាញអំពីសកម្មភាពនៃទាហានឥណ្ឌា និងទាហានចិន ប៉ះទង្គិចគ្នានៅជិតទន្លេក្បែរព្រំដែន ទំនងជាត្រូវបានថតកាលពីប៉ុន្មានខែមុន ហើយបច្ចុប្បន្នកំពុងត្រូវបានចែករំលែកតៗគ្នាក្នុងបណ្ដាញសង្គមនៅប្រទេសចិន។

វីដេអូនេះបានបង្ហាញថា ការប៉ះទង្គិចដោយការប្រើដៃ ជើង និងដំបងនេះ បានកើតឡើងនៅលើគំនរថ្មក្បែរទន្លេ និង​ប្រហែល​ជា​នៅលើបន្ទាត់ព្រំដែនគ្រប់គ្រងជាក់ស្ដែង (LAC) ដែលជា​តំបន់​មិនទាន់ត្រូវបានកំណត់ច្បាស់លាស់។ ក៏ប៉ុន្តែ គេនៅមិនទាន់បានដឹងថា ហេតុការណ៍ក្នុងវីដេអូនេះ កើតឡើងនៅទីណា និងពេលណាឱ្យបានប្រាកដនៅ​ឡើយ។

នៅក្នុងវីដេអូនេះ ក្រុមទាហានចិនដែលមានកាន់ដំបង និងខែលការពារ ព្រមទាំងមានគ្នា​ច្រើន​ផងនោះ បានរុញច្រានក្រុមទាហានឥណ្ឌា បណ្ដាលឱ្យពួកគេត្រូវថយក្រោយ ក្នុងនោះមានអ្នកខ្លះត្រូវបានច្រានទម្លាក់ចូលក្នុងទន្លេទៀតផង។ ទាហានឥណ្ឌាមួយចំនួន ស្ពាយកាំភ្លើងពីក្រោយខ្នង ប៉ុន្តែមិនបានប្រើប្រាស់ទេ។ រូបសញ្ញានៅក្នុងវីដេអូនេះបង្ហាញថា វាត្រូវបានថតដោយទូរស័ព្ទចិន។

ភាគីខាងឥណ្ឌា និងចិន មិនទាន់បញ្ចេញយោបល់អ្វីទាក់​ទិន​នឹង​​វីដេអូនេះខាងលើ​នេះ​នៅឡើយ។

ប្រភពព័ត៌មានពីយោធាចិនបានឱ្យដឹងថា វីដេអូខាងលើនេះ ត្រូវបានបង្ហោះលើបណ្ដាញសង្គមចិនកាលពីថ្ងៃទី8កញ្ញា និងត្រូវបានថតកាលពីប៉ុន្មានខែមុនមកម៉្លេះ​។ អ្នកជំនាញខាងយោធាម្នាក់បានអះអាងថា ទិដ្ឋភាពក្នុងវីដេអូនេះមិនមែនជាការប៉ះទង្គិចគ្នាដែលបានបណ្ដាលឱ្យមានអ្នកស្លាប់រាប់សិបនាក់កាលពីថ្ងៃទី15មិថុនានោះទេ ប៉ុន្តែវាជាការប៉ះទង្គិចគ្នាដែលកើតឡើងនៅតាមបណ្ដោយទន្លេ Galwan កាលពីខែឧសភា។

ភាពតានតឹងនៅព្រំដែនឥណ្ឌា-ចិន បានឡើងកម្ដៅខ្លាំងចាប់ពីចុងខែមេសា និងដើមខែឧសភា ឆ្នាំ2020។ ក្រោយមក នៅពាក់កណ្ដាលខែមិថុនា ហេតុការណ៍ប្រើអំពើហិង្សាដាក់គ្នាមួយប្រាវក៏បានកើតឡើង បណ្ដាលឱ្យទាហានឥណ្ឌាចំនួន20នាក់ និងទាហានចិនជាច្រើននាក់បានបាត់បង់ជីត។ ហេតុការណ៍នេះបាននាំឱ្យចិន និងឥណ្ឌាបញ្ជូនទាហានយ៉ាងច្រើនទៅកាន់ព្រំដែន។ កងទ័ពឥណ្ឌា ក៏បានអនុញ្ញាតឱ្យមេបញ្ជាការនៅតាមព្រំដែន មានសិទ្ធិបញ្ជាឱ្យបាញ់ប្រហារនៅពេលចាំបាច់ ក្រោយពីហេតុការណ៍ប៉ះទង្គិចគ្នាកន្លងមកបានកើតឡើង៕

>ទាហានចិនត្រូវបានចោទប្រកាន់ថា បាននាំគ្នាកាន់ដាវ លំពែង និងកាំបិតផ្គាក់ ប្រមូលផ្ដុំគ្នានៅក្បែរព្រំដែនឥណ្ឌា

ប្រភព៖ Sputnik, SCMP

3 . ចង់ក្លាយជាមនុស្សជោគជ័យ ត្រូវស្គាល់វិធីការដាក់ខ្លួន និងការប្រឈមមុខក្នុងសង្គមយ៉ាងស័ក្តិសម

កូនៗរបស់គាត់តែងប្រាប់ថា ពួកគេបានរៀនសូត្រអ្វីៗច្រើនណាស់ពីឪពុក អ្វីដែលសំខាន់បំផុតដែលឪពុកតែងសង្កត់ធ្ងន់នោះគឺ ត្រូវធ្វើជាអ្នកជំនួញស្មោះត្រង់ ត្រូវចេះដាក់ខ្លួន និងសាងសម្ព័ន្ធភាពល្អៗជាមួយនឹងអ្នករួមហ៊ុន។

លីតែងបង្រៀនកូនថា ត្រូវនឹកដល់ផលប្រយោជន៍អ្នកដទៃជានិច្ច និងមិនយកប្រៀបលើគេ។ តាំងពីកូនទាំងពីរនៅក្មេង ពេលមានការប្រជុំរបស់អ្នកគ្រប់គ្រងក្រុមហ៊ុនម្ដងៗ គាត់តែងរៀបចំកន្លែងអង្គុយពិសេសឱ្យកូនៗអង្គុយស្ដាប់មនុស្សធំគេប្រជុំជជែកពិភាក្សាគ្នា។ ពេលខ្លះអាចមានចំណុចប្រកែកគ្នាខ្លាំងៗក្នុងបន្ទប់ប្រជុំរហូតដល់កូនៗភ្ញាក់ផ្អើល និងភិតភ័យ តែគាត់អធិប្បាយឱ្យកូនៗបានដឹងបន្ទាប់ពីនោះមកថា “ដែលត្រូវប្រកែកប្រណាំងគ្នានេះ គឺដើម្បីផលប្រយោជន៍ខ្ពស់បំផុតរបស់ក្រុមហ៊ុន វាជារឿងប្រក្រតី ប្រៀបដូចជា ឈើបើយើងមិនចោះ យើងក៏ទម្លុះវាមិនបានដែរ ហេតុផលគឺ បើមិនប្រកែកគ្នា ក៏មិនយល់ពីគ្នាដែរ”។

លីប្រាប់កូនៗថា វិធីការគ្រប់គ្រងចាត់ចែងធុរកិច្ចត្រូវសិក្សាយកគំរូតាមបែបលោកខាងលិច គេមានគោលការណ៍ដែលមានរបៀបរបប តែការរៀបចំខ្លួនចំពោះសង្គម ចំពោះមិត្តមនុស្សដូចគ្នា ត្រូវសិក្សាគោលប្រាជ្ញាដ៏ស៊ីជម្រៅរបស់ចិន ព្រោះវាបង្រៀនឱ្យបណ្ដុះឧបនិស្ស័យឱ្យចេះដាក់ខ្លួន ឱនលំទោន ឧស្សាហ៍ អត់ធន់ និងតស៊ូមិនរាថយ។ បើចង់ធ្វើខ្លួនឱ្យអ្នកដទៃជឿជាក់លើយើង យើងត្រូវជាមនុស្សមានសច្ចៈ រក្សាពាក្យសន្យា។ មុននឹងសន្យាត្រូវសិក្សាឱ្យល្អិតល្អន់ នៅពេលសន្យាហើយ ទោះជាជួបឧបសគ្គលំបាកលំបិនប៉ុនណា ក៏ត្រូវតែរក្សាពាក្យសន្យានោះឱ្យដល់ទីបំផុតដែរ។

4 . កុំតាមចិត្តកូនរហូតដល់ខូចមនុស្ស បង្រៀនឱ្យកូនឈរដោយខ្លួនឯង

លីបញ្ជូនកូនទាំងពីរទៅរៀនតនៅឯក្រៅប្រទេសតាំងពីអាយុត្រឹមតែ 15 និង 13 ឆ្នាំ។ ក្មេងទាំងពីរត្រូវហ្វឹកហាត់មើលថែទាំខ្លួនឯង មិនចេះធ្វើម្ហូបញ៉ាំក៏ត្រូវសិក្សាពីកម្មវិធីក្នុងទូរទស្សន៍ រហូតដល់ទាំងពីរនាក់អាចធ្វើម្ហូបអាហារញ៉ាំដោយខ្លួនឯងដើម្បីឱ្យជីវិតរស់នៅបាន។

នៅពេលគ្រប់យ៉ាងស្រួលបួលហើយ កូនៗត្រូវចេញទៅរកការងារស៊ីឈ្នួលទូទៅធ្វើ។ ធ្វើ Part time នៅថ្ងៃឈប់សម្រាក ជីវិតដូចជាបុថុជ្ជនទូទៅ។ អ្នកដែលដឹងពីប្រវត្តិរបស់គ្រួសារនេះនិយាយថា “ឪពុកមានកប់ពពក ហេតុអីត្រូវមកលំបាកបែបនេះ” តែបងប្អូនទាំងពីរនាក់បានត្រឹមតែញញឹម ហើយឆ្លើយថា “មិនអីទេបាទ”។

5 . រៀនចប់ហើយ ឪពុកមិនជួយឧបត្ថម្ភ ឬនៅពីក្រោយខ្នងឡើយ “ចូរទៅសាងមុខជំនួញដោយខ្លួនឯង”

ភាពដាច់ខាតរបស់ លី កាស៊ីង ដែលមានចំពោះកូន គឺជាការសម្រេចចិត្តដែលត្រឹមត្រូវបំផុត។ លុះកូនទាំងពីររៀនចប់មហាវិទ្យាល័យ ស្ទែមហ្វ៉ត ដោយហ្រ្កេតមធ្យមភាគល្អបំផុត ក៏តាំងចិត្តត្រឡប់មកហុងកុងវិញដើម្បីចូលធ្វើការនៅក្នុងក្រុមហ៊ុនរបស់ឪពុក តែលីបដិសេធក្នុងការឱ្យកូនចូលមកធ្វើការ គាត់ឱ្យកូនទៅដើររកការងារធ្វើការរកស៊ីខ្លួនឯង។

ទាំងពីរនាក់ចាកចេញពីហុងកុង ធ្វើដំណើរទៅប្រទេសកាណាដា ហើយចាប់ផ្ដើមធុរកិច្ចពីចំណុចសូន្យ។ ដោយក្ដីព្យាយាមមិនព្រមចុះចាញ់ ទីបំផុតកូនប្រុសច្បងក៏ទទួលជោគជ័យផ្នែកជំនួញអចលនវត្ថុ ចំណែកកូនប្អូនក៏ក្លាយជាអ្នកវិនិយោគទុនផ្នែកធុរកិច្ចហិរញ្ញវត្ថុ។ ទាំងពីរនាក់សុទ្ធតែទទួលបានភាពជោគជ័យរហូតក្លាយជាបុគ្គលដែលមនុស្សនៅក្នុងពិភពធុរកិច្ចតាមសង្កេតមើល និងយកធ្វើជាគំរូ…ព្រោះតែភាពដាច់ខាតរបស់ឪពុក ទើបកូនទាំងពីរនាក់អាចឈរឡើងបានដោយខ្លួនឯង និងសុទ្ធតែដំណើរការទៅបានយ៉ាងល្អនៅលើដំណើរផ្លូវខាងធុរកិច្ច។

6 . កូនរបស់​លី កាស៊ីង ធ្លាប់ត្រូវជនពាលចាប់ជំរិតទារប្រាក់ តែទម្រាំប៉ូលិសដឹង គឺដប់ឆ្នាំក្រោយ

ដប់ឆ្នាំដែលកន្លងមក មនុស្សនៅក្នុងត្រកូលនេះមិនដែលមាននរណាម្នាក់ធ្វើឱ្យលេចឮដំណឹងនេះឱ្យអ្នកក្រៅបានដឹងឡើយ តែរឿងចាប់ផ្ដើមផ្ទុះឡើងដោយសារតែជនល្មើសដែលចាប់ជំរិតកូនប្រុសរបស់ លី កាស៊ីង ត្រូវបានចាប់ខ្លួនក្នុងបទល្មើសចាប់ជំរិតអ្នកដទៃនៅឯទីក្រុងម៉ាកាវ។ ក្នុងអំឡុងពេលដែលប៉ូលិសកំពុងស៊ើបសួរជនល្មើស ប៉ូលិសបានសួរថា “ក្នុងជីវិតឧក្រិដ្ឋកម្មនេះ ធ្លាប់បង្កបទល្មើសអ្វីដែលធំៗបំផុតខ្លះ?”។ ជនល្មើសឆ្លើយថា “កាលពីដប់ឆ្នាំមុន ធ្លាប់ហាមាត់សុំលុយ លី កាស៊ីងមកចាយមួយពាន់លានដុល្លារ(ហុងកុង) លី កាស៊ីង ឆ្លើយអូខេភ្លាម” អ្នកសារព័ត៌មានសួរ លី ថា ហេតុអីបានមិនប្ដឹងប៉ូលិសពេលកើតរឿង?។ លី ប្រាប់ទៅវិញថា ក្នុងហេតុការណ៍នោះ គាត់ និងជនល្មើសទំនាក់ទំនងគ្នាក្នុងបរិយាកាសមិត្តភាព គាត់សន្យានឹងជនល្មើសថា នឹងមិនប្ដឹងប៉ូលិសជាដាច់ខាត។ នោះគឺជាហេតុផលដែលគាត់រក្សាពាក្យសន្យារហូតមក។ លី កាស៊ីងប្រាប់ថា ការរក្សាពាក្យសម្ដីជាជីវិតទីពីររបស់គាត់។ អ្នកសារព័ត៌មានសួរទៀតថា ខឹងនឹងជនល្មើសដែរឬទេ? លីឆ្លើយទៅវិញថា “ខ្ញុំតែងតែបង្រៀនកូនថា មនុស្សយើងត្រូវមានបេះដូងដែលពុះពារព្យាយាមដូចបេះដូងរាជសីហ៍ តែត្រូវមានទឹកចិត្តដែលពេញប្រៀបដោយក្ដីមេត្តាដូចព្រះពោធិសត្វ”។

លី កាស៊ីងជាមនុស្សស្រឡាញ់កូន ជាសេចក្ដីស្រឡាញ់ដូចឪពុកទាំងឡាយដែលមានចំពោះកូន

តែសម្រាប់វិធីការចិញ្ចឹមមើលថែអប់រំប្រដៅកូនវិញនោះ លី កាស៊ីងជាមនុស្សមានសតិស្មារតី តែដាច់ខាត។ ភាពមានសតិស្មារតី តែដាច់ខាតរបស់គាត់គឺដើម្បីបង្កប់លុបសេចក្ដីស្រឡាញ់ដ៏ធំធេងរបស់គាត់ដែលមានចំពោះកូន តែអ្វីដែលគាត់បង្ហាត់បង្រៀនកូនវិញ សុទ្ធតែស៊ីជម្រៅបែបមានទស្សនៈដែលបង្កប់ជ្រៅ នេះគឺ វិធីការចិញ្ចឹមមើលថែកូនដែលគួរឱ្យគោរពរបស់មហាសេដ្ឋីលំដាប់ពិភពលោក លី កាស៊ីង។

“ទោះជាអ្នកទទួលជោគជ័យលើផ្នែកជំនួញខ្លាំងប៉ុនណាក៏ដោយ តែបើអ្នកមិនអាចបណ្ដុះបណ្ដាលកូនឱ្យក្លាយជាមនុស្សល្អបានទេនោះ វាគ្មានអ្វីអាចមកជំនួសភាពខុសឆ្គងមួយនេះបានឡើយ”   -លី កាស៊ីង-  

ប្រែសម្រួល និងរៀបរៀងដោយ អ្នកគ្រូ ឆវី

សារព័ត៌មានឥណ្ឌាបានចុះផ្សាយរូបភាពដែលបង្ហាញថា មនុស្សរាប់សិបនាក់ដែលស្លៀកឈុតទាហានចិន ដៃកាន់ដាវលំពែង នាំគ្នាឈរត្រៀមត្រានៅលើជម្រាលភ្នំក្បែរព្រំដែននៃប្រទេសទាំងពីរ។

នៅក្នុងរូបភាពដែលត្រូវបានសារព័ត៌មានឥណ្ឌាចុះផ្សាយកាលពីម្សិលមិញ បង្ហាញថា មនុស្សមួយក្រុមដែលត្រូវបានគេជឿថាជាទាហានចិននោះ ម្នាក់ៗសុទ្ធតែកាន់ដាវ លំពែង ដំបង កាំបិតផ្គាក់ និងកាំភ្លើង ឈរតាមបណ្ដោយលេណដ្ឋានធ្វើអំពីថ្ម នៅលើជម្រាលភ្នំ កាលពីថ្ងៃទី7កញ្ញា។

ប្រភពព័ត៌មាននានាពីរដ្ឋាភិបាលឥណ្ឌាបានឱ្យដឹងថា ទាហានចិនប្រមាណពី40-60នាក់ បានបង្ហាញខ្លួននៅក្នុងតំបន់ Mukhpari ភាគខាងត្បូង Ladahk ដែលជាតំបន់កំពុងមានជម្លោះរវាងប្រទេសចិននិងឥណ្ឌា។ ក្រុមទាហានចិនខាងលើនេះ បានរកវិធីចូលទៅជិតទីតាំងដែលកងទ័ពឥណ្ឌាកំពុងកាន់កាប់ នៅវេលាម៉ោងប្រមាណជា18 ក្នុងថ្ងៃទី7កញ្ញា។

អាវុធនៅក្នុងរូបភាពដែលត្រូវបានចុះផ្សាយដោយសារព័ត៌មានឥណ្ឌា ស្រដៀងទៅនឹងប្រភេទអាវុធដែលត្រូវបានប្រើប្រាស់ក្នុងករណីប្រើកម្លាំងបាយដាក់គ្នាកាលពីថ្ងៃទី15មិថុនានៅជ្រលងភ្នំ Galwan បណ្ដាលឱ្យទាហានឥណ្ឌា20នាក់ និងទាហានចិនជាច្រើននាក់បានបាត់បង់ជីវិត។

ប្រភពព័ត៌មានបានឱ្យដឹងថា “ទាហានចិនទំនងជាចង់វាយប្រហារទៅលើទាហានឥណ្ឌា ដូចទៅនឹងករណីហិង្សានៅជ្រលងភ្នំ Galwan ព្រោះពួកគេយកដំបង ផ្គាក់ ដំបងឆក់ និងដាវទៅតាមខ្លួន”។

“នៅពេលកងទ័ពជើងគោកឥណ្ឌា រុញច្រានទាហានចិន ពួកគេ (ទាហានចិន) បានបាញ់កាំភ្លើងឡើងលើប្រមាណពី10ទៅ15គ្រាប់ដើម្បីគំរាមទាហានឥណ្ឌា។ នេះគឺជាលើកដំបូងហើយដែលចិនបានផ្ទុះអាវុធតាមបន្ទាត់ព្រំដែនគ្រប់គ្រងជាក់ស្ដែង LAC (Line of Actual Control) ក្រោយរយៈពេល45ឆ្នាំ។ ការផ្ទុះអាវុធដាក់គ្នាលើកមុន បានកើតឡើងកាលពីឆ្នាំ1975។ ទាហានឥណ្ឌាមិនបានបាញ់តបតនោះទេ” នេះបើតាមប្រភពព័ត៌មានពីឥណ្ឌា។

សារព័ត៌មានឥណ្ឌាក៏បានឱ្យដឹងថា ស្ថានភាពនៅតាមបន្ទាត់ព្រំដែនគ្រប់គ្រងជាក់ស្ដែង LAC ជាកន្លែងដែលមិនទាន់មានការបែងចែកច្បាស់លាស់រវាងចិននិងឥណ្ឌា កំពុងមានភាពតានតឹងខ្លាំង និងមិនមានស្ថិរភាព។ ទាហានចិនព្យាយាមរកវិធីដើម្បីរុញច្រានទាហានឥណ្ឌាឱ្យចេញឆ្ងាយពីទីតាំងខ្ពស់ៗ ជាកន្លែងយុទ្ធសាស្ត្រនៅចន្លោះកំពូលភ្នំ Mukhpari និងតំបន់ Rezang La។

“ទាហានចិនបានកាត់ផ្ដាច់របងបន្លាលួសរបស់ឥណ្ឌា កាលពីថ្ងៃទី7កញ្ញា។ កងទ័ពឥណ្ឌាបន្តគ្រប់គ្រងទីតាំងខ្ពស់ៗជាយុទ្ធសាស្ត្រនៅក្នុងតំបន់ភាគខាងត្បូងនៃបឹង Pangong Tso និងកំពុងតាមដានសកម្មភាពរបស់ទាហារចិនក្នុងតំបន់ Moldo” ប្រភពព័ត៌មានបានឱ្យដឹងដូច្នេះ។

ក៏ប៉ុន្តែ ទាំងរដ្ឋាភិបាលឥណ្ឌា ទាំងរដ្ឋាភិបាលចិន សុទ្ធតែមិនទាន់មានប្រតិកម្មអ្វីអំពីព័ត៌មានខាងលើនេះនៅឡើយ។

ភាពតានតឹងនៅព្រំដែនឥណ្ឌា-ចិន បានឡើងកម្ដៅខ្លាំងចាប់ពីចុងខែមេសា និងដើមខែឧសភា ឆ្នាំ2020។ ក្រោយមក នៅពាក់កណ្ដាលខែមិថុនា ហេតុការណ៍ប្រើអំពើហិង្សាដាក់គ្នាមួយប្រាវក៏បានកើតឡើង បណ្ដាលឱ្យទាហានឥណ្ឌាចំនួន20នាក់ និងទាហានចិនជាច្រើននាក់បានបាត់បង់ជីត។ ហេតុការណ៍នេះបាននាំឱ្យចិន និងឥណ្ឌាបញ្ជូនទាហានយ៉ាងច្រើនទៅកាន់ព្រំដែន។ កងទ័ពឥណ្ឌា ក៏បានអនុញ្ញាតឱ្យមេបញ្ជាការនៅតាមព្រំដែន មានសិទ្ធិបញ្ជាឱ្យបាញ់ប្រហារនៅពេលចាំបាច់ ក្រោយពីហេតុការណ៍ប៉ះទង្គិចគ្នាកន្លងមកបានកើតឡើង។

រដ្ឋាភិបាលនៃប្រទេសឥណ្ឌា និងរដ្ឋាភិបាលចិន ក្រោយមកក៏បានចោទប្រកាន់គ្នាជាបន្តបន្ទាប់ ទាក់ទិននឹងហេតុការណ៍នានានៅព្រំដែន និងរកតែចំណុចត្រូវរៀងៗខ្លួន៕

ប្រភព៖ Sputnik, Times of India