Category: អន្តរជាតិ

បែកធ្លាយតម្លៃព្យាបាលCOVID-19 របស់ប្រធានាធិបតី Trump! ពលរដ្ឋធម្មតា បើមិនត្រូវជាប់បំណុល ក៏ត្រូវធ្លាក់ខ្លួនក្រដែរ
ប្រធានាធិបតីអាមេរិក បានចំណាយពេល3ថ្ងៃក្នុងការព្យាបាលនៅមន្ទីរពេទ្យ។ លោក Trump ត្រូវបានធ្វើតេស្តរកវីរុសជាច្រើនលើក រួមនឹងការប្រើប្រាស់អ៊ីកស៊ីហ្សែនជំនួយដង្ហើម ការប្រើថ្នាំ steroid និងព្យាបាលដោយវិធីសាស្ត្រសាកល្បងដែលមិនធ្លាប់មានពីមុនមក។
សម្រាប់ពលរដ្ឋសាមញ្ញ ការព្យាបាលដូចខាងលើនឹងត្រូវចំណាយប្រាក់យ៉ាងតិចជាង100,000ដុល្លារ។ អ្នកជំងឺធម្មតាអាចត្រូវធ្លាក់ទៅក្នុងវិបត្តិបំណុល បើទោះជាសេវាកម្មធានារ៉ាប់រងបានទូទាត់ជំនួសមួយផ្នែកធំក៏ដោយ។
ការចំណាយធំបំផុត មិនមែនស្ថិតក្នុងរយៈពេលនៃការសម្រាកព្យាបាលនៅមន្ទីរពេទ្យនោះទេ ប៉ុន្តែវាកើតឡើងដោយសារសេវាកម្មផ្សេងៗ ដូចជាការធ្វើដំណើរតាមឧទ្ធម្ភាគចក្រ ឬការធ្វើតេស្តរកវីរុសជាបន្តបន្ទាប់ជាដើម។
លោក Trump បានសរសើរចំពោះគុណភាពនៃការថែទាំផ្នែកសុខាភិបាលដែលលោកបានទទួលពីមន្ទីរពេទ្យ Walter Reed ហើយលោកក៏បានបន្ទាបកម្រិតនៃគ្រោះថ្នាក់របស់COVID-19 ផងដែរ។
ពលរដ្ឋអាមេរិកាំងជិតកន្លះលាននាក់បានចូលពេទ្យ។ ការធ្វើតេស្តរកវីរុសដែលត្រូវធ្វើឡើងតាមកាលកំណត់ អាចត្រូវចំណាយប្រាក់រាប់ពាន់ដុល្លារដោយមិនមានធានារាប់រងណាទូទាត់ជំនួស។ មានអ្នកជំងឺខ្លះត្រូវរ៉ាប់រងទៅលើការចំណាយឡើងដល់400,000ដុល្លារសម្រាប់ការព្យាបាលនៅមន្ទីរពេទ្យ។
លោក Trump មិនត្រូវព្រួយបារម្ភអំពីការចំណាយទៅលើការព្យាបាលនោះទេ ព្រោះរដ្ឋជាអ្នកទូទាត់ជំនួស។ ក៏ប៉ុន្តែសម្រាប់ពលរដ្ឋធម្មតាវិញ នេះគឺជាបញ្ហាធំដែលគួរឱ្យព្រួយបារម្ភជាទីបំផុត។
សម្រាប់ពលរដ្ឋធម្មតា បើមិនត្រូវជាប់បំណុល ក៏ធ្លាក់ខ្លួនក្រដែរ នៅពេលត្រូវព្យាបាលដូចលោក Trump
ក្រុមហ៊ុនធានារ៉ាប់រង តែងទូទាត់ប្រាក់កាសទៅលើការធ្វើតេស្តរកវីរុសនៅពេលមានការស្នើពីវេជ្ជបណ្ឌិត ប៉ុន្តែពួកគេអាចបដិសេធ ប្រសិនបើម្ចាស់ប័ណ្ណធានារ៉ាប់រងជាអ្នកស្នើ។
រដ្ឋាភិបាលរបស់លោក Trump កាលពីខែមិថុនា បានចេញបទបញ្ជាមួយដែលបញ្ជាក់ថា បណ្ដាក្រុមហ៊ុនធានារ៉ាប់រង មិនចាំបាច់ទូទាត់ប្រាក់ចំពោះ “ការធ្វើតេស្តដើម្បីចម្រាញ់ផ្នែកសុខាភាព និងធានាសុវត្ថិភាពទូទៅនៅកន្លែងធ្វើការ”។ ជំនួសមកវិញ អ្នកជំងឺ ឬអ្នកត្រូវសង្ស័យថាអាចមានផ្ទុកវីរុស ត្រូវតែបង់ថ្លៃសេវាកម្មដូចខាងលើដោយខ្លួនឯង។
ការធ្វើតេស្តរកវីរុសCOVID-19 ពេលខ្លះពិតជាថ្លៃខ្លាំងណាស់។ បើទោះវាតែងមានតម្លៃត្រឹម100ដុល្លារ ប៉ុន្តែ មានករណីធ្វើតេស្តមួយនៅក្នុងរដ្ឋ Texas បានគិតថ្លៃដល់ទៅ6,408ដុល្លារសម្រាប់ការធ្វើតេស្តលឿន1ដង នៅក្នុងរថយន្ត។
ចំណែកថ្នាំ Remdesivir ដែលជាថ្នាំព្យាបាល COVID-19 ថ្មីមួយប្រភេទ មានតម្លៃ3,120ដុល្លារ នៅពេលទិញពីបណ្ដាក្រុមហ៊ុនធានារ៉ាប់រងឯកជន និងតម្លៃ2,340ដុល្លារបើទិញពីកម្មវិធីសាធារណៈ ដូចជា Medicare ឬ Medicaid ជាដើម។
លោក Trump ក៏ត្រូវព្យាបាលដោយថ្នាំអង្គបដិប្រាណរបស់ក្រុមហ៊ុន Regeneron ដែលបច្ចុប្បន្នស្ថិតក្នុងការប្រើប្រាស់សាកល្បង ឬប្រើប្រាស់បន្ទាន់។ ទាំង2ទម្រង់នេះ សុទ្ធតែមិនត្រូវបានគិតថ្លៃ។ ប៉ុន្តែ វានឹងផ្លាស់ប្ដូរ នៅពេលដំណាក់កាលសាកល្បងបានបញ្ចប់។ ថ្នាំទាំងនេះ ពិតជាពិបាកក្នុងការផលិត ខណៈដែលថ្នាំអង្គបដិប្រាណប្រភេទ monoclonal antibodies តែងមានតម្លៃឡើងដល់រាប់ពាន់ដុល្លារឯណោះ៕
ប្រភព៖ RT
October 9, 2020
តម្លៃវ៉ាក់សាំង Sputnik-V សម្រាប់ការពារ COVID-19 ត្រូវបានរុស្ស៊ីបង្ហើបឱ្យដឹងជាសាធារណៈ
វ៉ាក់សាំងទប់ស្កាត់វីរុសCOVID-19 ដែលផលិតដោយប្រទេសរុស្ស៊ី តាមគម្រោងនឹងមានតម្លៃទាបជាង បើធៀបនឹងវ៉ាក់សាំងដែលផលិតដោយបណ្ដាប្រទេសនៅអឺរ៉ុប។
Igor Artemyev មេដឹកនាំនៃអង្គភាពទប់ស្កាត់ពាណិជ្ជកម្មផ្ដាច់មុខរបស់រុស្ស៊ី (FAS) បានបង្ហើបឱ្យដឹងថា វ៉ាក់សាំងប្រឆាំង COVID-19 របស់រុស្ស៊ី នឹងមានតម្លៃទាបជាង1,000រូប (ប្រហែល13ដុល្លារអាមេរិក)។ បើទោះ វាមានតម្លៃថ្លៃជាងស្ដង់ដារបស់អឺរ៉ុប ប៉ុន្តែ FAS យល់ថា តម្លៃបច្ចុប្បន្នរបស់វ៉ាក់សាំងរុស្ស៊ីនេះ នៅតែខ្ពស់នៅឡើយ។
មេដឹកនាំ FAS ឱ្យដងឹងថា៖ “យើងយល់ថា តម្លៃ (វ៉ាក់សាំងរុស្ស៊ី) បច្ចុប្បន្ននៅតែខ្ពស់។ វ៉ាក់សាំងថ្មីត្រូវបានផលិតឈុតតូចៗម្ដង1ឈុតៗ ហើយពួកគេត្រូវការទុនដើម្បីបង្កើនចង្វាក់ផលិតកម្ម”។
យោងតាម FAS តម្លៃរបស់វ៉ាក់សាំងនេះនឹងថយចុះនៅពេលផលិតផលបានកើនឡើង។ ពេលនោះ វ៉ាក់សាំងនេះនឹងត្រូវបានប្រើប្រាស់ទូលំទូលាយ។ រុស្ស៊ីក៏នឹងពិនិត្យទៅលើតម្លៃវ៉ាក់សាំងរបស់ខ្លួនឡើងវិញ នៅពេលប្រទេសផ្សេងៗ អាចផលិតវ៉ាក់សាំងផ្ទាល់ខ្លួន។
វ៉ាក់សាំងCOVID-19 របស់រុស្ស៊ី ត្រូវបានគេជឿថា មានតម្លៃទាបជាងវ៉ាក់សាំងរបស់លោកខាងលិច។ កាលពីខែសីហា Moderna ដែលជាក្រុមហ៊ុនបច្ចេកវិទ្យាជីវសាស្ត្រ មានទីស្នាក់ការនៅសហរដ្ឋអាមេរិក បានឱ្យដឹងថា វ៉ាក់សាំងរបស់ក្រុមហ៊ុននេះនឹងមានតម្លៃចាប់ពី32-37ដុល្លារក្នុង1អំពូល។ ចំណែក វ៉ាក់សាំងដែលផលិតដោយក្រុមហ៊ុនអាមេរិក Pfizer មានតម្លៃប្រហែល20ដុល្លារ។
កាលពីថ្ងៃទី11សីហា រុស្ស៊ីបានក្លាយជាប្រទេសដំបូងគេក្នុងពិភពលោកដោយបានចុះឈ្មោះវ៉ាក់សាំងCOVID-19 ដែលមានឈ្មោះថា Sputnik-V។ នេះគឺជាវ៉ាក់សាំងដែលត្រូវបានស្រាវជ្រាវ និងអាភិវឌ្ឍដោយមជ្ឈមណ្ឌលស្រាវជ្រាវរោគឆ្លង និងមីក្រូជីវសាស្ត្ររបស់ប្រទេសរុស្ស៊ី។
Igor Artemyev មេដឹកនាំនៃអង្គភាពទប់ស្កាត់ពាណិជ្ជកម្មផ្ដាច់មុខរបស់រុស្ស៊ី (FAS)
បើទោះជាមិនទាន់ឆ្លងផុតដំណាក់កាលនៃការប្រើប្រាស់សាកល្បងលើកទីបី ប៉ុន្តែ រុស្ស៊ីបានអះអាងថា វ៉ាក់សាំងរបស់ប្រទេសនេះមានសុវត្ថិភាពនិងប្រសិទ្ធភាព។ លោក Putin បានថ្លែងថា កូនស្រីរបស់លោក បានចាក់វ៉ាក់សាំងនេះរួចហើយ និងនៅតែមានសុខភាពល្អ មាំមួន។
ក្រុមមន្ត្រីរុស្ស៊ីបានឱ្យដឹងថា ប្រទេសនេះទទួលបានការស្នើទិញវ៉ាក់សាំងទប់ស្កាត់ COVID-19 ប្រមាណជា1.2ពាន់លានអំពូល ពីប្រទេសនានា ព្រមទាំងកំពុងចរចាជាមួយប្រទេសជាង10នៅមជ្ឈិមបូព៌ា អាមេរិកកណ្ដាល និងនៅអាស៊ីផងដែរ។
រុស្ស៊ីមានគោលដៅផលិតវ៉ាក់សាំង Sputnik V ឱ្យបាន30លានអំពូលនៅចុងឆ្នាំនេះ ដើម្បីឆ្លើយតបនឹងតម្រូវការក្នុងប្រទេស។
ក្រៅពី Sputnik-V វ៉ាក់សាំងប្រឆាំង COVID-19 ទីពីររបស់រុស្ស៊ី ដែលអភិវឌ្ឍដោយវិទ្យាស្ថាន Vector តាមគម្រោងនឹងត្រូវបានចុះឈ្មោះនៅពាក់កណ្ដាលខែតុលានេះ។ តម្លៃដែលខ្ពស់បំផុតរបស់វ៉ាក់សាំងនេះ គឺប្រហែល1,000រូប៕
ប្រភព៖ RT
October 9, 2020
ឆេះអគារស្នាក់នៅ33ជាន់នៅកូរ៉េខាងត្បូង (វីដេអូ)
អគារស្នាក់នៅនិងមជ្ឈមណ្ឌលពាណិជ្ជកម្ម Samwhan Art-Nouveau ក្នុងទីក្រុង UIsan បានឆាបឆេះយ៉ាងសន្ធោសន្ធៅកាលពីយប់ថ្ងៃទី8តុលា បណ្ដាលឱ្យមនុស្សយ៉ាងតិច15នាក់រងរបួស។
អណ្ដាតភ្លើងបានចាប់ផ្ដើមឆេះចេញពីជាន់ទី12របស់អគារនេះនៅវេលាម៉ោង23យប់ ក្រោយមកក៏បានរាលដាលដោយសារខ្យល់ខ្លាំង ធ្វើឱ្យមួយផ្នែកធំនៃអគារស្ថិតក្នុងអណ្ដាតភ្លើង។ អគារ Samwhan Art-Nouveau ដែលមាន33ជាន់នេះ មានកម្ពស់102ម៉ែត្រ ស្ថិតនៅក្នុងខណ្ឌ Dal-dong ក្នុងទីក្រុង UIsan ភាគអាគ្នេយ៍នៃប្រទេសកូរ៉េខាងត្បូង។
ពលរដ្ឋរាប់រយនាក់ដែលស្នាក់នៅទីនោះ ត្រូវបានជម្លៀសខ្លួន ក្នុងនោះមានមនុស្សជាច្រើនបានឡើងទៅកាន់ជាន់លើបង្អស់ក្នុងដំណាក់កាលដំបូងនៃអគ្គិភ័យ។ សារព័ត៌មាន Yonhap បានឱ្យដឹងថា ក្នុងហេតុការណ៍នេះ មានមនុស្សយ៉ាងតិច15នាក់បានរងរបួស ខណៈមនុស្សជាង88នាក់ផ្សេងទៀតត្រូវចូលពេទ្យដោយសារផ្សែង។
សាក្សីម្នាក់នៅកន្លែងកើតហេតុបានឱ្យដឹងថា៖ “អណ្ដាតភ្លើងស្រាប់តែឆាបឆេះ។ បង្អូចនានាត្រូវបែកខ្ទេច ខណៈដែលបន្ទប់គេង និងបន្ទប់ទទួលភ្ញៀវរបស់ខ្ញុំឡើងភ្លឺ (ដោយសារអណ្ដាតភ្លើង)”។
កម្លាំងពន្លត់អគ្គិភ័យបានពន្លត់អណ្ដាតភ្លើងនៅផ្នែកខាងក្រៅនៃអគារ និងកំពុងធ្វើអន្តរាគមន៍នៅផ្នែកខាងក្នុងអគារ។ អគ្គិភ័យនេះ ក៏បានរាលដាលដល់ផ្សារមួយនៅក្បែរនោះដែរ ប៉ុន្តែត្រូវបានពន្លត់ទាន់ពេល។
មកដល់បច្ចុប្បន្ន មូលហេតុនៃករណីអគ្គិភ័យនេះ មិនទាន់ត្រូវបានរកឃើញនៅឡើយ៕
ប្រភព៖ Yonhap
October 9, 2020
CNN ពន្យាករថា Joe Biden នឹងជាប់ឆ្នោតជាប្រធានាធិបតីសហរដ្ឋអាមេរិកក្នុងអាណត្តិនេះ
សារព័ត៌មាន CNN បានចេញផ្សាយអំពីការព្យាករថ្មីបំផុតដែលបង្ហាញថា បេក្ខភាពប្រធានាធិបតីមកពីបក្សប្រជាធិបតេយ្យអាមេរិក គឺលោក Joe Biden នឹងឈ្នះឆ្នោតនាពេលខាងមុខ ដោយនឹងទទួលបានសំឡេងឆ្នោតគាំទ្រពីតំណាងម្ចាស់ឆ្នោត លើសពី270សំឡេង។
យោងតាមការព្យាករដែលត្រូវបានចុះផ្សាយដោយ CNN កាលពីថ្ងៃទី7តុលា តួលេខនៃសន្លឹកឆ្នោតដែលលោក Biden នឹងទទួលបាន បច្ចុប្បន្នឡើងដល់290សន្លឹក រួមមាន203សំឡេងប្រាកដជានឹងបោះជូន និង87សំឡេងកំពុងមានទំនោរទៅរករូបលោក។ តាមការព្យាករនេះ សំឡេងគាំទ្ររបស់លោក Biden បានលើសពី270សំឡេង ដែលតួលេខនេះអាចធានាបានថា លោកនឹងទទួលជ័យជំនះនៅក្នុងការប្រកួតប្រជែងចូលសេតវិមានក្នុងខែវិច្ឆិកាមិនខាន។
សារព័ត៌មាន CNN បានឱ្យដឹងថា ប្រធានាធិបតីអាមេរិក លោក Donald Trump នៅតែវិជ្ជមានជាមួយនឹងCOVID-19 និងអវត្តមាននៅក្នុងព្រឹត្តិការណ៍ឃោសនារកសំឡេងឆ្នោត ហើយយុទ្ធនាការរបស់លោកកំពុងស្ថិតក្នុងស្ថានភាព “អាក្រក់បំផុត”។
CNN ពន្យាករថា Joe Biden នឹងជាប់ឆ្នោតជាប្រធានាធិបតីសហរដ្ឋអាមេរិកក្នុងអាណត្តិនេះ
នៅក្នុងការតតាំងទល់មុខគ្នាលើកទីមួយជាមួយនឹងលោក Biden លោក Trump ក៏ត្រូវបានគេមើលឃើញថា បានធ្វើមិនបានល្អ និងបានបាត់បង់ឱកាសមាសសម្រាប់បង្វែរស្ថានការណ៍នៅមុនការបោះឆ្នោតជាតិ។ ការអធិប្បាយរបស់លោក Trump ស្ដីអំពី COVID-19 កាលពីពេលថ្មីៗនេះក៏ធ្វើឱ្យមានការរិះគន់យ៉ាងខ្លាំងក្លាផងដែរ ក្នុងនោះមានឃ្លាមួយចំនួនដែលលោកបានពោលឡើង ដូចជា “កុំខ្លាច COVID-19” ឬ “ការឆ្លងCOVID-19 គឺជាពរជ័យពីព្រះ” ជាដើម។
ចំណែកបេក្ខភាព Joe Biden វិញ ទន្ទឹមនឹងការបង្កើនឥទ្ធិពលទៅលើម្ចាស់ឆ្នោតជាស្ត្រីភេទ ម្ចាស់ឆ្នោតឯករាជ្យ ម្ចាស់ឆ្នោតមានចំណេះដឹងខ្ពស់ និងម្ចាស់ឆ្នោតជាជនជាតិស្បែកខ្មៅ លោក Biden ក៏កំពុងប្រជែងជាមួយលោក Trump ដើម្បីទាក់ទាញការគាំទ្រពីម្ចាស់បុរស ម្ចាស់ឆ្នោតជាជនជាតិស្បែកស និងម្ចាស់ឆ្នោតវ័យចំណាស់ ដែលត្រូវបានគេចាត់ទុកថាជាក្រុមដែលជួយឱ្យលោក Trump មានប្រៀបជាងគេកាលពីការបោះឆ្នោតឆ្នាំ2016។
យោងតាមផែនទីព្យាកររបស់ CNN រដ្ឋ Pennsylvania, Michigan និង Wisconsin ដែលជា “សមរភូមិយុទ្ធសាស្ត្រសំខាន់ក្នុងឆ្នាំនេះ ក៏កំពុងតែលំអៀងទៅរកក្រុមប្រជាធិបតេយ្យ។
CNN បានបញ្ជាក់ថា ការព្យាកររបស់ពួកខ្លួន គឺយោងទៅតាមការស្ទង់មតិជាសាធារណៈ និងឯកជននានា លទ្ធផលនៃកិច្ចសម្ភាសជាមួយក្រុមមន្ត្រីជាន់ខ្ពស់ រួមនឹងក្រុមមន្ត្រីជាទីប្រឹក្សានៃយុទ្ធនាការឃោសនារកសំឡេងឆ្នោតរបស់ភាគីទាំងពីរផងដែរ៕
ប្រភព៖ CNN

October 8, 2020
បុគ្គលិក34នាក់នៅសេតវិមាន បានឆ្លងCOVID-19
បុគ្គលិកនៅសេតវិមាន និងក្រុមមនុស្សដែលពាក់ព័ន្ធផ្សេងទៀត បានឆ្លងវីរុសCOVID-19 នៅក្នុងប៉ុន្មានថ្ងៃកន្លងទៅថ្មីៗនេះ ដែលតួលេខនេះមានអត្រាខ្ពស់ជាង បើធៀបនឹងរបាយការណ៍កន្លងមកទៅទៀត។
ដំណឹងខាងលើនេះ ត្រូវបានទីភ្នាក់ងារសារព័ត៌មាន ABC News ទទួលបាន និងដកស្រង់ពីកំណត់ហេតុមួយកាលពីថ្ងៃទី7តុលារបស់អង្គភាពគ្រប់គ្រងស្ថានភាពអាសន្នថ្នាក់រដ្ឋ។ ព័ត៌មានដែល ABC News ទទួលបាន បង្ហាញថា តួលេខស្ដីអំពីបុគ្គលិកសេតវិមានឆ្លងវីរុសCOVID-19 ថ្មីនេះ មានចំនួនច្រើនជាង10នាក់ បើធៀបនឹងរបាយការណ៍មុន។ ក៏ប៉ុន្តែ កំណត់ហេតុខាងលើ មិនបានសរសេរឱ្យបានច្បាស់អំពី “ក្រុមមនុស្សដែលពាក់ព័ន្ធដទៃទៀត” នោះទេ។
កំណត់ហេតុបានឱ្យដឹងថា ទីប្រឹក្សាជាន់ខ្ពស់ម្នាក់របស់ប្រធានាធិបតី Donald Trump ក៏ស្ថិតក្នុងចំណោមក្រុមបុគ្គលិកនៅសេតវិមានដែលបានឆ្លងCOVID-19 នេះដែរ។ បើទោះជាមិនបានបង្ហាញអត្តសញ្ញាណ ប៉ុន្តែជាក់ស្ដែងគ្រប់គ្នាបានដឹងហើយថា ជំនួយការផ្ទាល់ និងទីប្រឹក្សា2រូបរបស់លោក Trump នោះគឺលោកស្រី Hope Hicks (ជំនួយការប្រធានាធិបតី) និងលោក Stephen Miller (ទីប្រឹក្សាគោលនយោបាយ) បានឆ្លងវីរុស។
ក្រៅពីនេះ មនុស្សជាច្រើននាក់ផ្សេងទៀតដែលបានចូលរួមក្នុងព្រឹត្តិការណ៍ជ្រើសតាំងលោកស្រី Amy Coney Barrett ជាសមាជិកថ្មីនៃតុលាការកំពូលរបស់សហរដ្ឋអាមេរិក ដែលបានធ្វើឡើងកាលពីថ្ងៃទី26កញ្ញា បានទទួលលទ្ធផលវិជ្ជមានជាមួយនឹងCOVID-19 បន្ទាប់ពីបានធ្វើតេស្ត។ ក្នុងចំណោមនោះក៏មានលោក Trump (ប្រធានាធិបតីអាមេរិក) លោក Chris Christie (អតីតអភិបាលរដ្ឋ New Jersey) លោកស្រី Kellyanne Conway (អតីតទីប្រឹក្សាប្រធានាធិបតី) រួមនឹងតំណាងរាស្ត្រសភាជាន់ខ្ពស់2រូបទៀត គឺលោក Mike Lee និងលោក Thom Tillis។ល។
ក្រោយពីប្រធានាធិបតីអាមេរិក បានឆ្លងវីរុសCOVID-19 ការចេញចូលសេតវិមាន ពិសេសគឺបន្ទប់រាងពងក្រពើ (ការិយាល័យប្រធានាធិបតី) ត្រូវបានរឹតបន្តឹងយ៉ាងម៉ត់ចត់ជាទីបំផុត៕
Bloomberg, Hill
October 8, 2020
លោក Trump ថា “ការឆ្លង COVID-19 គឺជាពរជ័យដែលព្រះប្រទាន” (វីដេអូ)
ប្រធានាធិបតីសហរដ្ឋអាមេរិក លោក Donald Trump បានថ្លែងថា ការឆ្លងវីរុសCOVID-19 គឺជា “ពរជ័យពីព្រះ” ព្រោះថា វាជួយឱ្យលោកក្ដាប់បាននូវកម្រិតនៃប្រសិទ្ធភាពរបស់ថ្នាំដែលកំពុងត្រូវបានប្រើប្រាស់សាកល្បង។
កាលពីថ្ងៃទី7តុលា លោក Trump បានបង្ហោះវីដេអូមួយនៅលើ Twitter បង្ហាញអំពីរូបភាពរបស់លោកនៅក្នុងសួនផ្កាកុលាប(Rose Garden) របស់សេតវិមាន។ ប្រធានាធិបតីអាមេរិក មានស្មារតីល្អ ប៉ុន្តែពេលខ្លះ លោកហាក់ពិបាកដកដង្ហើម ហើយលោកក៏ទំនងជាត្រូវបានគេតុបតែងខ្លួនប្រាណមុខមាត់ឱ្យផងដែរ។
“ខ្ញុំគិតថា នេះគឺជាពរជ័យពីព្រះដែលខ្ញុំមានឱកាសទទួលបាន។ នៅក្នុងហានិភ័យ តែងតែមានឱកាស” លោក Trump ថ្លែងដូច្នេះសំដៅទៅលើការដែលលោកបានប្រើប្រាស់ថ្នាំមួយចំនួនក្នុងការព្យាបាល COVID-19។ លោក Trump បានប្រាប់អំពីប្រសិទ្ធភាពរបស់ថ្នាំដែលកំពុងសាកល្បងរបស់ក្រុមហ៊ុន Regeneron ដោយថ្លែងថា លោកបានស្នើឱ្យក្រុមវេជ្ជបណ្ឌិតប្រើប្រាស់ថ្នាំនេះ និងយល់ថា ការប្រសើរឡើងវិញរបស់លោក ក៏ដោយសារប្រសិទ្ធភាពរបស់ថ្នាំ។
ម្ចាស់សេតវិមានបានសន្យាថា នឹងជំរុញឱ្យមានការផ្ដល់ថ្នាំនេះជូនដល់ពលរដ្ឋអាមេរិកាំងដទៃទៀតផងដែរ។ “ខ្ញុំចង់ឱ្យគ្រប់គ្នាទទួលបានការប្រព្រឹត្តដោយភាពស្មើគ្នាដូចប្រធានាធិបតីរបស់អ្នករាល់គ្នា” លោក Trump បាននិយាយបែបនេះ និងបានបង្ហាញអំពីការជឿជាក់ដែលថា នឹងមានវ៉ាក់សាំងនៅមុនថ្ងៃបោះឆ្នោត។
កាលពីថ្ងៃទី7តុលា ប្រធានាធិបតីអាមេរិកបានវិលមកកាន់បន្ទប់ការិយាល័យរាងពងក្រពើ (The Oval Office) នៅសេតវិមាន ដើម្បីបន្តដឹកនាំប្រទេស ក្រោយពីបានត្រលប់មកពីមន្ទីរពេទ្យយោធា Walter Reed នៅក្នុងរដ្ឋ Maryland។
នៅក្នុងសេចក្ដីប្រកាសមួយកាលពីថ្ងៃទី7តុលា ក្រុមវេជ្ជបណ្ឌិតរបស់លោក Trump បាននិយាយថា ប្រធានាធិបតីអាមេរិកលែងមានរោគសញ្ញារបស់COVID-19 ទៀតហើយ នៅក្នុងរយៈពេល24ម៉ោង។ ប៉ុន្តែសេចក្ដីប្រកាសនេះមិនបាននិយាយលម្អិតអំពីស្ថានភាពសុខភាព និងការប្រើប្រាស់ថ្នាំរបស់លោក Trump នោះទេ។
នៅឯសេតវិមាន ជំនួយការ និងសមាជិករដ្ឋាភិបាលជាច្រើនរូបរបស់លោក Trump បានឆ្លងវីរុសCOVID-19 ក្នុងនោះមានដូចជា លោក Bill Stepien (ប្រធានយុទ្ធនាការឃោសនាបោះឆ្នោត) លោកស្រី Ronna McDaniel (ប្រធានគណៈកម្មការជាតិរបស់បក្សសាធារណរដ្ឋ) លោកស្រី Kayleigh McEnany (លេខាផ្នែកសារព័ត៌មានរបស់សេតវិមាន) លោកស្រី Hope Hicks (ជំនួយការប្រធានាធិបតី) លោក Stephen Miller (ទីប្រឹក្សាគោលនយោបាយ) រួមនឹងបុគ្គលិកសារព័ត៌មានរបស់សេតវិមានជាច្រើនរូបទៀតក៏បានឆ្លងវីរុសនេះដែរ៕
ប្រភព៖ Reuters, AFP, CNN
October 8, 2020
Bill Gates៖ ប្រទេសអ្នកមាននឹងត្រលប់មករកសភាពធម្មតាវិញ នៅចុងឆ្នាំ2021
មហាសេដ្ឋី Bill Gates បានថ្លែងថា បណ្ដាប្រទេសអភិវឌ្ឍ អាចត្រលប់មករកភាពដើមវិញនៅចុងឆ្នាំ2021 បើសិនជាវ៉ាក់សាំងប្រឆាំងCOVID-19 ត្រូវបានចែកចាយក្នុងទ្រង់ទ្រាយធំ និងប្រើប្រាស់ទូលំទូលាយ។
“នៅចុងឆ្នាំក្រោយនេះ គ្រប់យ៉ាងនឹងអាចត្រលប់មករកស្ថានភាពដើមទាំងស្រុងវិញបានហើយ។ នោះគឺជាករណីល្អបំផុត” លោក Bill Gates បានប្រាប់សារព័ត៌មាន The Wall Street Journal ដូច្នេះ។
សហស្ថាបនិករបស់ Microsoft រូបនេះ ឱ្យដឹងថា៖ “បច្ចុប្បន្ន យើងមិនទាន់ដឹងថា ពេលណាទើបការអភិវឌ្ឍវ៉ាក់សាំងទទួលបានជោគជ័យនោះទេ។ ការផលិតក្នុងបរិមាណច្រើន ក៏ទាមទារឱ្យមានការចំណាយពេលច្រើនផងដែរ”។
នៅតំបន់អឺរ៉ុប វ៉ាក់សាំងចំនួន2ប្រភេទដែលត្រូវបានអភិវឌ្ឍដោយក្រុមហ៊ុន Pfizer/BioNTech និង AstraZeneca/សាកលវិទ្យាល័យ Oxford គឺជាបេក្ខភាពកំពូលក្នុងការប្រជែងគ្នាដើម្បីផលិតវ៉ាក់សាំងទប់ស្កាត់COVID-19។
លោក Bill Gates មានសុទិដ្ឋិនិយមចំពោះសេដ្ឋកិច្ចពិភពលោក តាមរយៈវ៉ាក់សាំងប្រឆាំងCOVID-19
បច្ចុប្បន្ន ប្រទេសរុស្ស៊ី និងចិន សុទ្ធតែបានផ្ដល់អាជ្ញាបណ្ណដល់វ៉ាក់សាំងCOVID-19 បើទោះជាកំពុងស្ថិតក្នុងការសាកល្បងដំណាក់កាលទីបីក៏ដោយ។
កាលពីដើមឆ្នាំនេះ មូលនិធីមនុស្សធម៌របស់គ្រួសារលោក Bill Gates បានប្រកាសអំពីខ្ទង់ជំនួយបន្ថែមដែលមានតម្លៃ150លានដុល្លារសម្រាប់កិច្ចប្រឹងប្រែងក្នុងការទប់ទល់នឹងCOVID-19 ក្នុងនោះ ការជំរុញលើកទឹកចិត្តដល់គម្រោងផលិតវ៉ាក់សាំងគឺជាបញ្ហាអាទិភាព។
អំពីយន្តការនៃការចែកចាយវ៉ាក់សាំង បច្ចុប្បន្នមានប្រទេសអ្នកមានជាង70 បានសន្យាចូលរួមអនុវត្តគម្រោងចែកចាយវ៉ាក់សាំងCOVID-19 នៅទូទាំងពិភពលោក ដែលត្រូវបានបង្កើតឡើងដោយអង្គការសុខភាពពិភពលោក ក្នុងបំណងជួយដល់ការទិញ និងចែកចាយវ៉ាក់សាំងប្រកបដោយយុត្តិធម៌។
លោក Seth Berkley នាយកប្រតិបត្តិរបស់សម្ព័ន្ធវ៉ាក់សាំងសកល Gavi បានឱ្យដឹង បច្ចុប្បន្ន ប្រទេសជប៉ុន អាល្លឺម៉ង់ ន័រវេស និងប្រទេសជាង70ផ្សេងទៀងបានចូលរួមក្នុងយន្តការ COVAX ដែលយល់ព្រមចំពោះគោលការណ៍ទិញវ៉ាក់សាំងCOVID-19 តាមរយៈគម្រោងចែកចាយវ៉ាក់សាំងនៅទូទាំងពិភពលោក។
COVAX នឹងជួយឱ្យពលរដ្ឋក្នុងពិភពលោក អាចទទួលបានការចាក់វ៉ាក់សាំងដោយការចំណាយប្រាក់តិចជាងធម្មតា
COVAX ត្រូវបានសហការដឹកនាំដោយ Gavi អង្គការសុខភាពពិភពលោក (WHO) និងសម្ព័ន្ធប្ដូរផ្លាស់សម្រាប់ការទប់ទល់នឹងអាសន្នរោគ (CEPI)។ យន្តការនេះត្រូវបានបង្កើតឡើងដើម្បីលើកទឹកចិត្តឱ្យបណ្ដារដ្ឋាភិបាលជំរុញការអភិវឌ្ឍវ៉ាក់សាំងCOVID-19 ការផ្ដោតទៅលើការចាក់វ៉ាក់សាំងទៅឱ្យក្រុមមនុស្សដែលមានហានិភ័យខ្ពស់នៅគ្រប់ប្រទេស រួមចំណែកជួយផ្គត់ផ្គង់វ៉ាក់សាំងដល់បណ្ដាប្រទេសដែលមានចំណូលទាប និងមធ្យម។ COVAX នឹងជួយឱ្យពលរដ្ឋក្នុងពិភពលោក អាចទទួលបានការចាក់វ៉ាក់សាំងដោយការចំណាយប្រាក់តិចជាងធម្មតា។
តាមរយៈ COVAX រួមនឹងកត្តាជាច្រើនទៀតដែលទាក់ទងនឹងការដោះស្រាយបញ្ហាសុខាភិបាល មហារោគរាតត្បាតCOVID-19 ដែលបានសម្លាប់មនុស្សជាង1លាននាក់នេះ នឹងត្រូវបានលប់បំបាត់នាពេលខាងមុខ៕
ប្រភព៖ Dailymail
October 7, 2020
សិង្ហបុរីផ្ដល់ប្រាក់ជំនួយដល់ពលរដ្ឋដែលចង់យកកូននៅក្នុងសម័យCOVID-19
រដ្ឋាភិបាលសិង្ហបុរីនឹងផ្ដល់ប្រាក់ឧបត្ថម្ភមួយចំនួនដល់ក្រុមគ្រួសារណាដែលចង់បង្កើតកូននៅក្នុងសម័យវិបត្តិសុខភាពដែលបង្កឡើងដោយវីរុសCOVID-19 ដើម្បីជួយបន្ធូរបន្ថយសម្ពាធផ្នែកហិរញ្ញវត្ថុរបស់ពលរដ្ឋ។
“យើងបានទទួលដំណឹងថា COVID-19 ធ្វើឱ្យមនុស្សមួយចំនួនដែលមានបំណងយកកូន ត្រូវពន្យារគម្រោងរបស់ខ្លួន” នេះបើតាមប្រសាសន៍កាលពីថ្ងៃទី5តុលារបស់លោក Heng Swee Keat ឧបនាយករដ្ឋមន្ត្រីនៃប្រទេសសិង្ហបុរី។
“ប្រការនេះ ពិតជាអាចយល់បាន ពិសេសគឺនៅពេលពួកគេត្រូវប្រឈមនឹងបញ្ហាប្រាក់ចំណូល” លោក Heng ថ្លែងដូច្នេះ និងបានបន្តថា ខ្ទង់ប្រាក់ដែលទូទាត់មួយលើកនេះនឹងជួយសម្រួលដល់ការចាយវាយរបស់អាណាព្យាបាល ក៏ប៉ុន្តែ លោកមិនបាននិយាយអំពីចំនួនទឹកប្រាក់សម្រាប់គ្រួសារដែលចង់មានកូននោះទេ។
បើទោះជាទទួលបានជោគជ័យក្នុងការទប់ស្កាត់ការឆ្លងរាលដាលរបស់វីរុសCOVID-19 សេដ្ឋកិច្ចរបស់សិង្ហបុរីនៅតែធ្លាក់ទៅក្នុងស្ថានភាពវិបត្តិដដែល។ GDP របស់ប្រទេសនេះបានថយចុះ12.6% នៅក្នុងត្រីមាសទីពីរ បើធៀបនឹងអំឡុងពេលដូចគ្នាកាលពីឆ្នាំ2019 ដែលនេះគឺជាការធ្លាក់ចុះដល់កម្រិតទាបបំផុត “មិនធ្លាប់មានក្នុងប្រវត្តិសាស្ត្រ” របស់ប្រទេសនេះ។
ទារកម្នាក់ដែលបានចាប់កំណើតនៅសិង្ហបុរី កាលពីឆ្នាំ2014
សិង្ហបុរីគឺជាប្រទេសមួយក្នុងចំណោមប្រទេសដែលមានកំណើនពលរដ្ឋក្នុងស្រុកទាបជាងគេក្នុងពិភពលោក។ រដ្ឋាភិបាលបានព្យាយាមកែប្រែស្ថានការណ៍ ប៉ុន្តែមិនបានសម្រេច។ កំណើននៃទារកថ្មីរបស់ប្រទេសនេះស្ថិតក្នុងអត្រា1.14នាក់នៅលើស្ត្រីម្នាក់ក្នុងឆ្នាំ2018 ពោលគឺប្រហាក់ប្រហែលនឹងទីក្រុងហុងកុង។ នេះបើតាមធនាគារពិភពលោក។ នៅទូទាំងពិភពលោក មានតែប្រទេសចំនួន2ប៉ុណ្ណោះ ដែលមានកំណើនទារកថ្មី តិចជាងសិង្ហបុរី នោះគឺកូរ៉េខាងត្បូង និងដែនដី Puerto Rico របស់សហរដ្ឋអាមេរិក។
អត្រាកំណើតកូនដែលល្អបំផុតគឺ2.1នាក់ សម្រាប់ស្ត្រី1រូប។ ក៏ប៉ុន្តែ ភាគច្រើននៃប្រទេសរីកចម្រើន សុទ្ធតែស្ថិតក្រោមកម្រិតនេះ ដោយសារអត្រានៃការរៀបការបានថយចុះច្រើន និងដោយសារការប្រកាន់ភេទបែបបុរាណបានប្ដូរផ្លាស់។
សិង្ហបុរីបានធ្វើការលើកទឹកចិត្តឱ្យមានការបង្កើតកូនចាប់ពីទសវត្សរ៍ឆ្នាំ1980។ យុទ្ធនាការលើកទឹកចិត្តចំពោះការបង្កើតកូន រួមនឹងការផ្ដល់ផលប្រយោជន៍ផ្នែកហិរញ្ញវត្ថុ និងពន្ធដារជាច្រើនត្រូវបានធ្វើឡើង ប៉ុន្តែមិនអាចទប់ស្កាត់ការថយចុះនៃអត្រាបង្កើតកូននេះបាន។ បច្ចុប្បន្ន សម្រាប់ស្ត្រីម្នាក់នៅសិង្ហបុរីដែលមានលក្ខណគ្រប់គ្រាន់ នឹងទទួលបានប្រាក់ឧបត្ថម្ភឡើងដល់7,330ដុល្លារអាមេរិកនៅពេលពួកគេបង្កើតបានកូនមួយនាក់។
សិង្ហបុរីគឺជាប្រទេសមួយក្នុងចំណោមប្រទេសដែលមានកំណើនពលរដ្ឋក្នុងស្រុកទាបជាងគេក្នុងពិភពលោក
របាយការណ៍កាលពីឆ្នាំ2011របស់រដ្ឋាភិបាល បានឱ្យដឹងថា៖ “ដូចទៅនឹងប្រទេសរីកចម្រើនដទៃ មូលហេតុនៃការថយចុះនៃចំនួនប្រជាជននៅសិង្ហបុរី នោះគឺអត្រានៃការបង្កើតកូនទាប និងពលរដ្ឋវ័យចំណាស់មានចំនួនច្រើន។
សិង្ហបុរីបានទទួលជោគជ័យក្នុងការទប់ស្កាត់ការឆ្លងរាលដាលនៃវីរុសCOVID-19 ដោយមានការចាត់វិធានការយ៉ាងឆាប់រហ័សនានា ដូចជាការដាក់ឱ្យនៅដាច់ដោយឡែកចំពោះពលរដ្ឋណាដែលត្រូវសង្ស័យថាឆ្លងវីរុស ការអនុវត្តបំរាមគោចរយ៉ាងតឹងរឹងនៅពេលរកឃើញសម្បុកមេរោគ រួមនឹងការប្រើប្រាស់បច្ចេកវិទ្យាដើម្បីតាមដានក្រុមមនុស្សដែលពាក់ព័ន្ធនៃករណីឆ្លងនីមួយៗ។
គិតមកដល់បច្ចុប្បន្ន សិង្ហបុរីបានរកឃើញអ្នកឆ្លងវីរុសCOVID-19 សរុប 57,840នាក់ និងមានអ្នកជំងឺតែ27នាក់ប៉ុណ្ណោះដែលបានបាត់បង់ជីវិតដោយសារវីរុសនេះ៕
ប្រភព៖ CNN
October 7, 2020
លោក Trump លែងមានរោគសញ្ញារបស់ COVID-19 ហើយ
វេជ្ជបណ្ឌិតប្រចាំសេតវិមាន បានឱ្យដឹងថា ប្រធានាធិបតី “លែងមានរោគសញ្ញា” របស់វីរុសCOVID-19 ហើយ ក្រោយពីបានចេញពីមន្ទីរពេទ្យ និងឆ្លងកាត់ការសម្រាកមួយយប់ដំបូងនៅឯផ្ទះ។
“ព្រឹកនេះ ក្រុមវេជ្ជបណ្ឌិតរបស់ប្រធានាធិបតី បានជួបលោកនៅឯភូមិគ្រឹះ។ ប្រធានាធិបតីបានសម្រាកប្រកបដោយផាសុខភាពមួយយប់ដំបូងនៅឯផ្ទះ ហើយថ្ងៃនេះ លោកលែងមានរោគសញ្ញាណាមួយទៀតហើយ” នេះបើតាមវេជ្ជបណ្ឌិតប្រចាំការនៅសេតវិមាន លោក Sean Conley ដែលបានថ្លែងកាលពីថ្ងៃទី6តុលា។ លោកបន្តថា៖ “សញ្ញានៃការរស់រាន និងការពិនិត្យសុខភាព បង្ហាញថា នៅតែធម្មតា ដោយកំហាប់អ៊ុកស៊ីហ្សែនស្ថិតក្នុងកម្រិតចន្លោះពី95ទៅ97%។ និយាយរួម ស្ថានភាពសុខភាពរបស់ប្រធានាធិបតីនៅតែល្អប្រសើរ ខ្ញុំនឹងផ្ដល់ព័ត៌មានបន្ថែមនៅពេលមានដំណឹងថ្មី”។
ដំណឹងខាងលើនេះ ត្រូវបានលើកឡើងក្រោយរយៈពេល1ថ្ងៃបន្ទាប់ពីលោក Trump បានចេញពីមន្ទីរពេទ្យយោធា Walter Reed ក្រោយពីបានទទួលការព្យាបាល4ថ្ងៃដោយសារឆ្លងវីរុសCOVID-19។
ព្រឹត្តិការណ៍ជជែកតតាំងគ្នាលើកទីពីរ រវាងលោក Trump និងលោក Biden តាមគម្រោងនឹងត្រូវធ្វើឡើងនៅក្នុងថ្ងៃទី15តុលា នៅសាលមហោស្រព Adrienne Arsht ក្នុងទីក្រុង Miami រដ្ឋ Florida។ យោងតាមគណៈកម្មការរៀបចំព្រឹត្តិការណ៍ជជែកតតាំងសម្រាប់បេក្ខភាពប្រធានាធិបតីអាមេរិក នឹងត្រូវធ្វើឡើងក្រោមរូបភាព “ប្រជាជនដាក់សំណួរទៅកាន់បេក្ខភាព” ពោលគឺមិនដូចទៅនឹងការជជែកតតាំងលើកទីមួយនោះទេ៕
ប្រភព៖ CNBC, Fox

October 7, 2020
Biden ប្រកាសមិនជជែកតតាំង បើសិន Trump នៅតែវិមានជានឹងCOVID-19
លោក Joe Biden បានឱ្យដឹងថា លោកជាមួយនឹងលោក Trump “មិនគួរចូលរួមជជែកតតាំងគ្នា” នោះឡើយ ប្រសិនបើប្រធានាធិបតីអាមេរិកនៅតែវិជ្ជមានជាមួយនឹងវីរុសCOVID-19។
ឆ្លើយតបនឹងក្រុមអ្នកសារព័ត៌មានកាលពីថ្ងៃទី6តុលា បេក្ខភាពប្រធានាធិបតីមកពីបក្សប្រជាធិបតេយ្យ លោក Joe Biden បានសម្ដែងអំពីបំណងធ្វើការជជែកតតាំងជាមួយនឹងប្រធានាធិបតី Donald Trump ជាលើកទី2 ក៏ប៉ុន្តែ លោកបញ្ជាក់ថា ពួកគេត្រូវតែ “អនុវត្តតាមការណែនាំប្រកបដោយភាពតឹងតែងបំផុត”។
អតីតអនុប្រធានាធិបតីអាមេរិករូបនេះ បានបន្ថែមថា លោកមិនបានទទួលដំណឹងអ្វីអំពីស្ថានភាពសុខភាពរបស់លោក Trump ចាប់ពីពេលប្រធានាធិបតីបានត្រលប់មកសេតវិមានវិញ។
សូមបញ្ជាក់ថា លោក Trump បានប្រកាសថា លោកបានឆ្លងវីរុសCOVID-19 កាលពីថ្ងៃទី2តុលា ហើយត្រូវបានបញ្ជូនទៅកាន់មន្ទីរពេទ្យយោធា Walter Reed ក្នុងរដ្ឋ Maryland និងទទួលការព្យាបាលនៅទីនោះចំនួន3ថ្ងៃ មុនពេលវិលទៅកាន់សេតវិមាន។
ព្រឹត្តិការណ៍ជជែកតតាំងគ្នាលើកទី2រវាងលោក Trump និងលោក Biden តាមគម្រោងនឹងត្រូវធ្វើឡើងនៅក្នុងថ្ងៃទី15តុលា នៅសាលមហោស្រព Adrienne Arsht ក្នុងទីក្រុង Miami រដ្ឋ Florida៕
ប្រភព៖ AP
October 7, 2020