Category: អន្តរជាតិ

ជាង 64 លាននាក់បានឆ្លង Covid-19 នៅទូទាំងពិភពលោក! WHO ព្រមានអំពីមហារោគរាតត្បតនាពេលអនគត
នៅក្នុងពិភពលោកទាំងមូល ករណីឆ្លងវីរុស Covid-19 បានកើនដល់ 64 លាននាក់ និងជិត 1.5 លាននាក់បានស្លាប់ ស្របពេលដែល WHO បានព្រមានអំពីមហារោគរាតត្បាតផ្សេងទៀត បើសិនជាមិនដកបទពិសោធន៍នាបច្ចុប្បន្ន។
គិតមកដល់ព្រឹកថ្ងៃទី 2ធ្នូនេះ ពិភពលោកបានរកឃើញអ្នកឆ្លងវីរុស Covid-19 សរុបចំនួន 64,169,941 នាក់ ក្នុងនោះមានអ្នកជាសះស្បើយចំនួន 44,428,048 នាក់ អ្នកស្លាប់ចំនួន 1,485,672 នាក់ អ្នកដែលកំពុងសម្រាកព្យាបាលមានចំនួន 18,256,167 នាក់ ដែលក្នុងនេះដែរមានអ្នកជំងឺចំនួន 105,687 នាក់កំពុងប្រឈមនឹងការបាត់បង់ជីវិតដោយសារមានអាការធ្ងន់ធ្ងរ។ នេះបើតាមស្ថិតិ Worldometers ដែលជាគេហទំព័រធ្វើបច្ចុប្បន្នភាពតួលេខ Covid-19 លឿងជាងគេបំផុត។
នៅក្នុងសន្និសីទសារព័ត៌មានមួយកាលពីថ្ងៃទី 30 ខែវិច្ឆិកា លោក Mike Ryan ប្រធានកម្មវិធីសុខាភិបាលបន្ទាន់របស់អង្គការសុខភាពពិភពលោក បានឱ្យដឹងថា ពិភពលោកមានហានិភ័យប្រឈមនឹងរោគរាតត្បាតផ្សេងទៀតនៅថ្ងៃអនាគត បើសិនជា «ភ្លេចស្មារតី» និងមិនបានដកបទពិសោធន៍ពីវិបត្តិសុខភាពដែលបង្កឡើងដោយ Covid-19 នាពេលនេះ។
លោក Ryan ព្រមានថា៖ «ខ្ញុំធ្លាប់បានឃើញនឹងភ្នែកនូវការភ្លេចខ្លួន ក្រោយពីព្រឹត្តិការណ៍ដ៏ឈឺចាប់មួយបានកន្លងផុតទៅ។ ប្រការនេះ គេអាចយល់បាន។ ប៉ុន្តែ ក្រោយវិបត្តិសុខភាពដែលបង្កឡើងដោយវីរុស SARS, H5N1, H1N1 បើសិនជាយើងនៅតែធ្វើព្រងើយចំពោះហានិភ័យពីប្រភពមេរោគគ្រោះថ្នាក់ដែលកំពុងងើបឡើង យើងនឹងត្រូវឆ្លងកាត់ស្ថានភាពប្រហាក់ប្រហែលនេះ ឬក៏អាក្រក់ជាងនេះ សាជាថ្មីម្ដងទៀតមិនខាន»៕
ប្រភព៖ AFP, Reuters, Worldometers
December 2, 2020
មេបញ្ជាការជាន់ខ្ពស់ម្នាក់នៃកងកម្លាំងឆ្មាំបដិវត្តន៍អ៊ីរ៉ង់ ត្រូវបានបាញ់សម្លាប់ដោយយន្តហោះគ្មានមនុស្សបើក
Muslim Shahdan មេបញ្ជាការជាន់ខ្ពស់របស់កងកម្លាំងឆ្មាំបដិវត្តន៍អ៊ីរ៉ង់ បានបាត់បង់ជីវិតនៅក្នុងករណីវាយប្រហារដោយយន្តហោះគ្មានមនុស្សបើក ក្នុងតំបន់ព្រំដែនស៊ីរី។
ប្រភពពីកងសន្តិសុខអ៊ីរ៉ាក់បានឱ្យដឹងថា ករណីវាយប្រហារសំដៅលើក្បួនរថយន្តដែលមានដឹក Shahdan បានកើតឡើងនៅយប់ថ្ងៃទី 28វិច្ឆិកា ឬទៀបភ្លឺថ្ងៃទី 29វិច្ឆិកា បានសម្លាប់មេបញ្ជាការនៃកងកម្លាំងឆ្មាំបដិវត្តន៍អ៊ីស្លាមអ៊ីរ៉ង់ (IRGC) រួមនឹងមនុស្ស 3នាក់ផ្សេងទៀតដែលរួមដំណើរជាមួយលោក។
មន្ត្រីសន្តិសុខអ៊ីរ៉ាក់ 2នាក់ផ្សេងទៀតបាននិយាយថា ក្បួនរថយន្តរបស់ Shahdan មានដឹកអាវុធ និងត្រូវបានយន្តហោះគ្មានមនុស្សបើក (UAV) បាញ់ប្រហារភ្លាមៗក្រោយពីបានឆ្លងពីព្រំដែនអ៊ីរ៉ាក់ ចូលដល់ទឹកដីស៊ីរី។ ករណីនេះមិនទាន់មានភាគីណាមួយចេញមុខមកទទួលខុសត្រូវនៅឡើយ។
ករណីនេះបានកើតមានឡើង បន្ទាប់ពីអ្នកជំនាញខាងនុយក្លេអែរដ៏កំពូលរបស់អ៊ីរ៉ង់ លោក Mohsen Fakhrizadeh ត្រូវបានធ្វើឃាតកាលពីថ្ងៃទី 27វិច្ឆិកា។ ការធ្វើឃាតនេះ ត្រូវបានអ៊ីរ៉ង់ចោទថា ជាស្នាដៃរបស់ប្រទេសអ៊ីស្រាអែល។
ចំណែកអ៊ីស្រាអែល និងសហរដ្ឋអាមេរិកវិញ បានចោទអ៊ីរ៉ង់ រួមនឹងក្រុមទាហានដែលប្រទេសគាំទ្រថា បានព្យាយាមដឹកអាវុធខុសច្បាប់ពីប្រទេសអ៊ីរ៉ាក់ ទៅកាន់ប្រទេសស៊ីរី និងលីបង់។ អាវុធទាំងនោះ ក្រោយមកនឹងត្រូវបានក្រុមទាហានប្រើប្រាស់ដើម្បីប្រឆាំងនឹងអ៊ីស្រាអែល។
ឧត្តមសេនី Aviv Kochavi មេបញ្ជាការកងទ័ពការពារជាតិអ៊ីស្រាអែល (IDF) បានអះអាងថា ប្រទេសនេះមិនបោះបង់យុទ្ធនាការទប់ស្កាត់កងទាហានដែលគាំទ្រដោយអ៊ីរ៉ង់ ធ្វើសកម្មភាពស្វែងរកកន្លែងឈរជើងនៅស៊ីរីឡើយ៕
ប្រភព៖ Time of Israel
December 1, 2020
អ្នកស្លាប់ដោយសារ Covid-19 កើនដល់ជិត 1.5លាននាក់ នៅទូទាំងពិភពលោក! WHO ថានឹងរកឱ្យឃើញប្រភពរបស់វីរុសនេះ
ពិភពលោកទាំងមូលបានរកឃើញអ្នកឆ្លងវីរុស Covid-19 សរុបឡើងដល់ 63,584,784នាក់ ក្នុងនោះអ្នកដែលបានបាត់បង់ជីវិត មានចំនួន 1,473,741នាក់ និង 43,980,097នាក់ផ្សេងទៀតបានជាសះស្បើយ ខណៈដែលអង្គការសុខភាពពិភពលោកបានសន្យាថា នឹង “ធ្វើគ្រប់យ៉ាង” ដើម្បីស្វែងរកប្រភពរបស់វីរុសនេះ។
សហរដ្ឋអាមេរិកនៅតែជាសម្បុកវីរុសធំជាងគេបង្អស់ក្នុងពិភពលោក ដោយបានរកឃើញអ្នកឆ្លងវីរុស Covid-19 ចំនួន 13,919,870នាក់ និងអ្នកស្លាប់ចំនួន 274,332នាក់។
បន្ទាប់ពីសហរដ្ឋអាមេរិក ក៏នៅមានប្រទេសចំនួន 11ផ្សេងទៀតដែលមានអ្នកជំងឺ Covid-19 លើសពី 1លាននាក់ រួមមាន៖ ឥណ្ឌា ប្រេស៊ីល រុស្ស៊ី បារាំង អេស្ប៉ាញ អង់គ្លេស អ៊ីតាលី អាហ្សង់ទីន កូឡុំប៊ី ម៉ិកស៊ិក និងអាល្លឺម៉ង់។
ចំណែកប្រទេសដែលមានអ្នកស្លាប់លើសពី 1សែននាក់ដោយសារវីរុសនេះ មានចំនួន 4ប្រទេស រួមមាន សហរដ្ឋអាមេរិក ប្រេស៊ីល ឥណ្ឌា និងប្រទេសម៉ិកស៊ិក។
ប្រធានអង្គការសុខភាពពិភពលោក (WHO) បានអះអាងថានឹងធ្វើគ្រប់យ៉ាងដើម្បីរកឱ្យឃើញប្រភពនៃសត្វដែលបានចម្លងវីរុស Covid-19 មកមនុស្ស។ លោកថ្លែងថា ការយល់ដឹងអំពីវា គឺជាគន្លឹះដើម្បីទប់ស្កាត់រោគរាតត្បាតនៅថ្ងៃអនាគត។ ក្រៅពីនេះ លោក Tedros ក៏បានអំពាវនាវឱ្យគ្រប់ភាគី បញ្ឈប់ការលាបពណ៌គ្នា ឬការចោទប្រកាន់ទៅលើការដែល WHO ស្វែងរកជំនួយពីចិនដើម្បីស៊ើបអង្កេតលើប្រភព Covid-19៕
ប្រភព៖ Reuters, Worldometers
December 1, 2020
Trump ប្រើប្រាស់តុប្រជុំខ្នាតតូចខុសពីធម្មតា ធ្វើឱ្យសាធារណជនមានការភ្ញាក់ផ្អើល
ប្រធានាធិបតីអាមេរិក បានក្លាយជាប្រធានបទជជែកគ្នានៅលើបណ្ដាញសង្គម បន្ទាប់ពីលោកបង្ហាញខ្លួនជាមួយនឹងតុខ្នាតតូចមិនគួរឱ្យជឿកាលពីព្រលប់ថ្ងៃទី26វិច្ឆិកា។
ថ្លែងការណ៍នៅក្នុងសន្និសីទសារព័ត៌មានផ្សាយផ្ទាល់ពីសេតវិមានកាលពីយប់ថ្ងៃទី26វិច្ឆិកា ប្រធានាធិបតី Donald Trump បានឱ្យដឹងថា លោកនឹងចាកចេញពីតំណែង បើសិនលោក Joe Biden ដណ្ដើមបានជ័យជំនះនៅក្នុងការបោះឆ្នោតនៃក្រុមប្រតិភូតំណាងម្ចាស់ឆ្នោត នៅថ្ងៃទី14ធ្នូខាងមុខ។
ក្នុងគ្រាដែលប្រធានាធិបតីបានលើកឡើងអំពីការបោះឆ្នោតប្រកបដោយការលួចបន្លំ អ្នកលេងបណ្ដាញសង្គមបែរជាចាប់អារម្មណ៍ទៅលើតុដ៏តូចខុសពីធម្មតាដែលលោក Trump កំពុងប្រើប្រាស់នៅក្នុងសន្និសីទរបស់លោក។
អ្នកលេងបណ្ដាញសង្គមមួយចំនួនយល់ថា តុដែលមានខ្នាតដ៏តូចនេះ បង្ហាញអំពីអំណាចនៃប្រធានាធីបតីកំពុងថមថយ ប៉ុន្តែ អ្នកលេងបណ្ដាញសង្គមមួយចំនួនទៀតគិតថា វាអាចជាស្នាដៃនៃការកាត់តរូបភាព។
តារាសម្ដែង Mark Hamill បានសរសេរនៅលើបណ្ដាញសង្គម Twitter ថា ៖ “បើសិនជាលោកប្រព្រឹត្តត្រឹមត្រូវ ឈប់និយាយកុហកដើម្បីធ្វើឱ្យការបោះឆ្នោតមានបញ្ហា និងគិតអំពីប្រការល្អៗសម្រាប់ប្រទេសជាតិជំនួសឱ្យការត្អូញត្អែរថាអយុត្តិធម៌ នោះប្រហែលជាលោកទទួលបានការអញ្ជើញឱ្យឡើងអង្គុយនៅលើកៅអីនិងតុធំជាងនេះ។
អ្នកលេងបណ្ដាញសង្គមម្នាក់ទៀត សរសេរថា៖ “មិនគួរឱ្យជឿសោះថា ប្រការនេះបានកើតឡើងនៅក្នុងថ្ងៃនេះ។ អរគុណដល់អ្នកដែលមានគំនិតអំពីតុនេះ។
លោក Trump ក្រោយមកបានបង្ហោះសារនៅលើ Twitter ដោយចោទបណ្ដាញផ្សព្វផ្សាយថា បានចុះផ្សាយព័ត៌មានមិនពិតអំពីការអធិប្បាយរបស់លោក និងបានចោទ Twitter ថា បានបង្កើត “ខ្លឹមសារអវិជ្ជមាន” សម្រាប់អ្វីដែលកំពុងពេញនិយមរបស់បណ្ដាញសង្គម។
រាប់ចាប់ពីលោក Joe Biden ត្រូវបានគេព្យាករថា បានជាប់ឆ្នោតដោយមានសំឡេងឆ្នោតចំនួន 306 សំឡេងពីតំណាងម្ចាស់ឆ្នោត លោក Trump ក៏បានចោទប្រកាន់ថា មានការលួចបន្លំសន្លឹកឆ្នោត និងធ្វើការប្ដឹងតវ៉ាជាបន្តបន្ទាប់ដើម្បីកែប្រែស្ថានការណ៍នៅក្នុងរដ្ឋមួយចំនួន ដូចជា Georgia, Michigan, Nevada, Arizona និង Pennsylvania។ ប៉ុន្តែ បច្ចុប្បន្ន មិនទាន់មានរដ្ឋណាមួយទទួលស្គាល់ការប្ដឹងតវ៉ារបស់លោក Trump និងក្រុមរបស់លោកនៅឡើយ៕
ប្រភព៖ Guardian
November 28, 2020
ទីតាំងនៃបង្គោលលោហធាតុដ៏អាថ៌កំបាំងនៅកណ្ដាលសមុទ្រខ្សាច់ ត្រូវបានគេរកឃើញហើយ!
ក្រុមអ្នកជំនាញផ្នែកស្វែងរកទីតាំងនៅលើប្រព័ន្ធអ៊ីនធើណិត បានរុករកឃើញទីតាំងរបស់បង្គោលលោហធាតុដ៏ចម្លែកដែលត្រូវបានគេប្រទះឃើញនៅលើសមុទ្រខ្សាច់កាលពីប៉ុន្មានថ្ងៃមុននេះ នាំឱ្យមានមនុស្សកាន់តែច្រើន នាំគ្នាធ្វើដំណើរទៅកាន់កន្លែងកើតហេតុ បើទោះជាមានការព្រមានអំពីសុវត្ថិភាពពីអាជ្ញាធរ។
នៅពេលមានព័ត៌មានទាក់ទងនឹងបង្គោលលោហធាតុខាងលើ កាលពីថ្ងៃទី23វិច្ឆិកា ក្រុមមន្ត្រីនៅរដ្ឋ Utah បានបដិសេធមិនប្រាប់អំពីទីតាំងរបស់បង្គោលនេះទេ ដោយសារបារម្ភអំពីសុវត្ថិភាព។
ប៉ុន្តែ ក្នុងរយៈពេលតែ48ម៉ោង ក្រោយពីមានព័ត៌មានខាងលើ មនុស្សដំបូងគេបានរុករកឃើញទីតាំងរបស់បង្គោលនេះ ហើយក៏បានមកដល់ទីតាំងនោះផ្ទាល់ដើម្បីពិនិត្យមើល បើទោះជាមានការបារម្ភថា គេអាចវង្វេងផ្លូវ។ មកដល់ថ្ងៃទី25វិច្ឆិកា នៅលើ Instagram គេក៏ឃើញមានរូបថតជាច្រើនសន្លឹក បង្ហាញអំពីទិដ្ឋភាពមនុស្សមួយចំនួនដែលបានទៅដល់ទីតាំងនៃបង្គោលលោហធាតុនោះ។
អ្នកទាំងនេះ ទទួលបានជំនួយពីក្រុមអ្នកលេងអ៊ីនធើណិត ដែលជាក្រុមមនុស្សបានស្វែងរកឃើញទីតាំងរបស់បង្គោល តាមរយៈកម្មវិធី Google Earth។
សូមរំលឹកថា ក្រុមបុគ្គលិកនៅអង្គភាពសុវត្ថិភាពសាធារណៈនៃរដ្ឋ Utah (DPS) សហរដ្ឋអាមេរិក កាលពីថ្ងៃទី18វិច្ឆិកា បានប្រើប្រាស់ឧទ្ធម្ភាគចក្រជួយដល់នាយកដ្ឋានការពារធនធានសត្វព្រៃ ដើម្បីរាប់សត្វចៀមស្នែងធំនៅលើសមុទ្រខ្សាច់ភាគអាគ្នេយ៍របស់រដ្ឋនេះ។ ពួកគេស្រាប់តែបានប្រទះឃើញវត្ថុមួយដែលដូចទៅនឹងដុំថ្មអាថ៌កំបាំងដែលមាននៅក្នុងខ្សែភាពយន្តរឿង “2001: A Space Odyssey” ដែលផលិតឆ្នាំ1968។
អ្នកបើកបរឧទ្ធម្ភាគចក្រ Bret Hutchings បានរៀបរាប់ថា៖ “អ្នកជំនាញខាងជីវសាស្ត្រម្នាក់នៅក្នុងក្រុមហោះហើរបានប្រទះឃើញវា នៅពេលយើងហោះពីលើវត្ថុនោះ។ គាត់បានស្រែកឡើង “អូ! អូ! ត្រលប់ក្រោយ!។ ខ្ញុំក៏សួរថា “ថីហ្នឹង?។ ហើយគាត់ក៏ប្រាប់ថា “ត្រលប់ក្រោយសិនៗ មានអ្វីនៅខាងក្រោយ យើងត្រូវតែទៅមើល!។ វានៅទីនោះ! នៅកណ្ដាលដុំថ្មធំៗពណ៌ក្រហម គឺជាបង្គោលលោហធាតុពណ៌ប្រាក់ រលោកផ្លេកដែលផុសឡើងផុតពីដី។
Hutchings ប៉ាន់ប្រមាណដឹងថា បង្គោលលោហធាតុនោះមានកម្ពស់ប្រហែលពី3-3.6ម៉ែត្រ ហើយវាមិនដូចទៅនឹងករណីធ្លាក់ពីលើអាកាសនោះទេ វាទំនងជាមានអ្នកយកមកដាំ៕
ប្រភព៖ BBC
November 27, 2020
យីហោរបស់អតីតប្រធានាធិបតី Barack Obama រកប្រាក់បានច្រើនសន្ធឹក តាមវីធីណាខ្លះ?
ពេលទើបតែឈានជើងចូលសេតវិមាន ទ្រព្យសម្បត្តិរបស់គ្រួសារអតីតប្រធានាធិបតី Barack Obama កាលណោះមានតែ 1.3លានដុល្លារប៉ុណ្ណោះ។ ដល់ឆ្នាំ2018 តួលេខនេះបានឡើងដល់40លានដុល្លារ ហើយនាពេលបន្តបន្ទាប់ទៀត កំពុងតែកើនយ៉ាងឆាប់រហ័ស។
បន្ទាប់ពីចាកចេញពីសេតវិមាន លោក Obama បានកសាង “អនាចក្រទូរគមនាគមន៍” មួយដោយខ្លួនឯង ប្រកបដោយជោគជ័យ។
អ្នកជំនាញការម្នាក់អះអាងថា៖ “ដោយសារតែសង្គមអាមេរិកបែកបាក់គ្នាយ៉ាងធ្ងន់ធ្ងរ យីហោ Obama នឹងនៅតែត្រូវបានគេនិយមចូលចិត្ត។
“យីហោចម្លងអាជីវកម្ម (Franchise) Obama
គេហទំព័រ Le Figaro បានចុះផ្សាយអត្ថបទស្ដីអំពីប្រព័ន្ធទូរគមនាគមន៍របស់ស្វាមីភរិយាលោកអតីតប្រធានាធិបតីអាមេរិក Barack Obama ដែលជា “ប្រភពថាមពល” អាចជួយឱ្យទ្រព្យរបស់លោកកើនឡើងយ៉ាងឆាប់រហ័ស រហូតជីតដល់240លានដុល្លារអាមេរិក។
ដោយត្រូវបានបង្កើតឡើងក្នុងពេលតែមួយនៅក្នុងប្រទេសចំនួន23 កាលពីថ្ងៃទី17វិច្ឆិកា ទៅតាមបែបបទនៃការចាក់បញ្ចាំងខ្សែភាពយន្តកំពូលៗរបស់ Hollywood សៀវភៅភាគទីមួយនៃកំណត់ហេតុរបស់ប្រធានាធិបតីទី44របស់សហរដ្ឋអាមេរិក បានក្លាយជា “បាតុភូត” ដ៏អស្ចារ្យមួយ។ នៅសហរដ្ឋអាមេរិក និងកាណាដា សៀវភៅនេះត្រូវបានលក់ដាច់ជាង890,000ក្បាលនៅក្នុងថ្ងៃចេញផ្សាយដំបូង។ សៀវភៅ Becoming របស់ស្ត្រីទីមួយរបស់អាមេរិកដែលបានបោះពុម្ភក្នុងឆ្នាំ2018 ក៏លក់បាន724,000ក្បាលប៉ុណ្ណោះក្នុងថ្ងៃដំបូង ហើយមកដល់ពេលនេះ វាបានឡើងដល់14លានក្បាលទៅហើយ។
គូស្វាមីភរិយា Barack Obama និង Michelle Obama បានក្លាយជាយីហោមួយដែលមានផលិតផលជាច្រើន នាំមកនូវប្រាក់ចំណេញច្រើនសន្ធឹក។ តួលេខដែលគេត្រូវលើកយកមកនិយាយពេលនេះ មានដូចជា ខ្ទង់ប្រាក់ចំណូលជិត65លានដុល្លារបានមកពីកិច្ចព្រមព្រៀងជាមួយនឹងម្ចាស់រោងពុម្ភ Penguin Random House និងជាង50លានដុល្លារបានមកពីកិច្ចព្រមព្រៀងជាមួយនឹង Netflix បូករួមនឹងមូលប្បទានប័ត្រ20លានដុល្លារពី Spotify ដើម្បីទទួលបាន postcast ផ្ដាច់មុខពីលោក Obama ជាដើម។ល។
ប៉ុន្តែ បញ្ជីរាយនាម “ផលិតផល” របស់គ្រួសារ Obama ខាងលើនេះ នឹងមានច្រើនជាងនេះទៀតនាពេលខាងមុខ។ ក្នុងនោះមានដូចជា កិច្ចពិភាក្សាគ្នាដែលមានតម្លៃ 400,000ដុល្លារ/មួយពេល ហើយសូម្បីតែប៉ានតែដែលមានផ្ដិចឃ្លាដែលទាក់ទងនឹងសេចក្ដីថ្លែងការប្រកបដោយការច្នៃប្រឌិតរបស់លោក Obama ក៏មានតម្លៃដល់ទៅ20ដុល្លារផងដែរក្នុងប៉ាន់ចំនួនមួយ។
Obama ហាក់ដូចជា “ប៉ះត្រង់ណា ត្រង់នោះក៏ក្លាយជាមាស”
នៅសហរដ្ឋអាមេរិក ការដែលប្រធានាធិបតីចេញផ្សាយសៀវភៅ ឬបង្កើតមូលនិធិឯកជន បានក្លាយជារឿងទំនៀមទម្លាប់ទៅហើយ បន្ទាប់ពីពួកគេបានចាកចេញពីសេតវិមាន។ អតីតប្រធានាធិបតី Bush, Bill Clinton ជាដើម សុទ្ធតែបានធ្វើដូច្នេះ។ ប៉ុន្តែ Louis Morales-Chanard ដែលជានាយកផ្នែកយុទ្ធសាស្ត្ររបស់ក្រុមហ៊ុនទូរគមនាគមន៍ Dentsu និយាយថា លោក Obama គឺជាមនុស្សដំបូងគេដែលទទួលបានជោគជ័យខ្លាំង ហើយលទ្ធផលនេះបានកើតឡើងដំណាលគ្នានឹងការរីកចម្រើនរបស់បណ្ដាញសង្គម ដូចជា Facebook, Twitter, Youtube ព្រោះគ្រួសារលោក Obama បានចាប់យកឥទ្ធិពលនេះបានយ៉ាងឆាប់រហ័ស។
មួយវិញទៀត ជោគជ័យរបស់លោក Obama មួយផ្នែកក៏ដោយសារលោកគឺជាប្រធានាធិបតីអាមេរិកស្បែកខ្មៅដំបូងគេ។ ក្រៅពីនេះ លោក Obama ក៏ត្រូវបានគេចាត់ទុកដូចជាតំណាងរបស់ក្រុមភាគតិចផងដែរ។ ហើយដើម្បីរក្សាមុខមាត់ និងកេរ្ដិ៍ឈ្មោះនេះ លោក Obama តែងតែធ្វើខ្លួនឱ្យជាប្រធានាធិបតី និងអតីតប្រធានាធិបតីដែលមានលក្ខណសាមញ្ញ និងងាយស្រួលរាប់អាន។
ជាងនេះ លោក Obama កំពុងតែចាត់ទុកលោក Trump ជាឥន្ធនៈដ៏ល្អឯកសម្រាប់ប្រព័ន្ធដំណើរការរបស់ខ្លួន។ ក្នុងពេលដែលស្ដង់ដា និងតម្លៃនៃសហរដ្ឋអាមេរិកត្រូវបានថយចុះ ក្នុងនោះសង្គមត្រូវបែកបាក់ លោក Obama គឺជាតំណាងនៃសេចក្ដីសុខ និងសុវត្ថិភាពរបស់ពិភពបុរាណ នេះបើតាមអ្នកវិភាគ Jean-Emmanuel Cortade de la Saussay ស្ថាបនិករបស់ Story Mind ដែលជាក្រុមហ៊ុនស្រាវជ្រាវអំពីយីហោ និងប្រព័ន្ធផ្សព្វផ្សាយ។
មកដល់បច្ចុប្បន្ន គូស្វាមីភរិយាលោក Obama ហាក់ដូចជា “ប៉ះត្រង់ណា ត្រង់នោះក៏ក្លាយជាមាស។ ពេលទើបតែឈានជើងចូលសេតវិមាន ទ្រព្យសម្បត្តិរបស់គ្រួសារអតីតប្រធានាធិបតី Barack Obama កាលណោះត្រូវបានប្រកាសថា មានតែ 1.3លានដុល្លារប៉ុណ្ណោះ។ ដល់ឆ្នាំ2018 តួលេខនេះបានឡើងដល់40លានដុល្លារ នេះបើតាម GoBankingRates។ ចំណែក New York Post ថ្មីៗនេះ បានគន់គូរឃើញថា ទ្រព្យរបស់គ្រួសារ Obama មានដល់ទៅ135លានដុល្លារអាមេរិក ខណៈដែលស្ថិតិរបស់សាកលវិទ្យាល័យវ៉ាស៊ីងតោនបានព្យាករថា នាពេលខាងមុខ តួលេខនេះនឹងកើនដល់242លានដុល្លារអាមេរិក៕
ប្រភព៖ BI, Le Figaro,RFI

November 27, 2020
Trump ថានឹងចាកចេញពីសេតវិមាន ប៉ុន្តែត្រូវមានលក្ខខណ្ឌ
ប្រធានាធិបតី Donald Trump បានឱ្យដឹងថា នឹងចុះចេញពីសេតវិមាន បើសិនជាគូប្រជែង Joe Biden ឈ្នះក្នុងការបោះឆ្នោតរបស់តំណាងម្ចាស់ឆ្នោតដែលនឹងត្រូវធ្វើឡើងនៅថ្ងៃទី14ធ្នូខាងមុខ។
កាលពីថ្ងៃទី 26វិច្ឆិកា លោក Donald Trump បានអះអាងថា លោកនឹងចុះចេញពីសេតវិមាន បើសិនជាបេក្ខភាពមកពីបក្សប្រជាធិបតេយ្យ លោក Joe Biden ត្រូវបានប្រតិភូតំណាងម្ចាស់ឆ្នោតទទួលស្គាល់ថាជាអ្នកឈ្នះ នៅក្នុងការបោះឆ្នោតនាថ្ងៃទី14ធ្នូខាងមុខ ប៉ុន្តែបានបន្ថែមថា នឹងពិបាកខ្លាំងដើម្បីឱ្យលោកទទួលស្គាល់បរាជ័យ នៅក្នុងស្ថានការណ៍បច្ចុប្បន្ន ហើយតំណាងម្ចាស់ឆ្នោតនឹង “បង្កឱ្យមានកំហុសឆ្គង” បើសិនជាបោះឆ្នោតឱ្យ Biden។
នេះគឺជាឥរិយាបថចុងក្រោយ និងទំនងជាការទទួលស្គាល់បរាជ័យថ្មីបំផុតរបស់ខ្លួន ដែលលោក Trump បានលើកឡើងនៅក្នុងរយៈពេលប៉ុន្មានសប្ដាហ៍ចុងក្រោយនេះ។
នៅក្នុងសន្និសីទសារព័ត៌មានមួយនៅសេតវិមាន លោក Trump ថ្លែងថា “ការបោះឆ្នោតនេះ គឺជាករណីបោកប្រាស់” ក៏ប៉ុន្តែ លោកមិនបានលើកឡើងអំពីភ័ស្តុតាងនោះទេ។
ចាប់ពីថ្ងៃទី7វិច្ឆិកា សារព័ត៌មានអាមេរិកាំង បានទទួលស្គាល់ថា លោក Joe Biden គឺជាប្រធានាធិបតីជាប់ឆ្នោត។ ចំនួនសន្លឹកឆ្នោតនៃប្រតិភូតំណាងម្ចាស់ឆ្នោតដែលលោក Biden កំពុងកាន់កាប់ មានចំនួន 306សំឡេង ខណៈលោក Trump កាន់កាប់ 232សំឡេង នេះបើតាមលទ្ធផលនៃការព្យាករដែលត្រូវបានប្រកាសដោយបណ្ដាស្ថាប័នសារព័ត៌មានធំៗនៅសហរដ្ឋអាមេរិក។
ក៏ប៉ុន្តែ Trump មិនទាន់ទទួលស្គាល់ថាចាញ់នៅឡើយ ហើយបច្ចុប្បន្ន លោកកំពុងធ្វើ “សង្គ្រាម” ផ្នែកច្បាប់នៅឯបណ្ដារដ្ឋសំខាន់ៗ រួមមាន Pennsylvania, Georgia និង Michigan ដើម្បីប្រឆាំងនឹងលទ្ធផលនៃការរាប់សន្លឹកឆ្នោត បើទោះជារដ្ឋទាំងនេះ បានទទួលស្គាល់ជ័យជំនះរបស់លោក Biden ក៏ដោយ៕
ប្រភព៖ Reuters
November 27, 2020
អតីតនាយករដ្ឋមន្ត្រីស៊ូដង់ បង់ជីវិតនៅ UAE ដោយសារCovid-19
ក្រោយរយៈពេល3សប្ដាហ៍ដែលបានចូលសម្រាកព្យាបាលនៅមន្ទីរពេទ្យក្នុងប្រទេសអារ៉ាប់រួម (UAE) អតីតនាយករដ្ឋមន្ត្រីនៃប្រទេសស៊ូដង់ លោក Sadiq al-Mahdi បានទទួលមរណភាព ព្រោះតែបានឆ្លងវីរុសCovid-19។
កាលពីខែមុន គ្រួសាររបស់អតីតនាយករដ្ឋមន្ត្រីស៊ូដង់ Sadiq al-Mahdi បានឱ្យដឹងថា លោកបានធ្វើតេស្តរកឃើញថា វិជ្ជមានជាមួយនឹងCovid-19។ ក្រោយការព្យាបាលរយៈពេលខ្លីនៅប្រទេសស៊ូដង់មិនទទួលបានផលល្អ លោក Sadiq al-Mahdi ក៏ត្រូវបានបញ្ជូនទៅកាន់ប្រទេសអារ៉ាប់រួម។
ថ្ងៃទី26វិច្ឆិកានេះ គ្រួសារ និងបក្ស Umma បានប្រកាសថា លោក Sadiq al-Mahdi បានទទួលមរណភាព។ សាកសពអតីតនាយករដ្ឋមន្ត្រីស៊ូដង់រូបនេះ នឹងត្រូវបានបញ្ចុះនៅព្រឹកថ្ងៃទី27វិច្ឆិកានៅក្នុងទីក្រុង Omdurman នៃប្រទេសស៊ូដង់។ នេះបើតាមសារព័ត៌មាន Reuters។
លោក Sadiq al-Mahdi ឆ្នាំនេះ មានវ័យ84ឆ្នាំ។ លោកគឺជាអ្នកនយោបាយកំពូលមួយរូបនៅប្រទេសស៊ូដង់។ លោកធ្លាប់បានកាន់កាប់តំណែងនាយករដ្ឋមន្ត្រីស៊ូដង់ក្នុងដំណាក់កាលពីឆ្នាំ1966-1967 និងឆ្នាំ1986-1989។ ឆ្នាំ1989 លោកត្រូវបានគេធ្វើរដ្ឋប្រហារយោធាទម្លាក់ពីតំណែង ហើយអតីតប្រធានាធិបតី Omar al-Bashir បានឡើងកាន់កាប់តំណែងនាយករដ្ឋមន្ត្រីជំនួសលោករូប។
ក្រោយការរស់នៅនិរទេសខ្លួនបានមួយឆ្នាំ លោក Sadiq al-Mahdi ក៏ត្រលប់មកកាន់ស៊ូដង់វិញនៅចុងឆ្នាំ2018 ខណៈដែលរដ្ឋាភិបាលរបស់លោក Bashir កំពុងប្រឈមនឹងការប្រឆាំងតវ៉ាយ៉ាងខ្លាំងក្លា។ កូនស្រីរបស់លោក Sadiq al-Mahdi ឈ្មោះ Mariam Sadiq al-Mahdi ដែលគ្រប់គ្រងតំណែងជាអនុប្រធាននៃគណបក្សប្រឆាំង Umma ក៏ធ្លាប់ត្រូវបានឃុំខ្លួននៅក្នុងគ្រាដែលមានបាតុកម្មកើតឡើងផងដែរ។
ក្នុងកាលៈទេសៈដែលបក្សប្រឆាំងនានាសុទ្ធតែចុះខ្សោយក្រោមរបបលោក Bashir គណបក្ស Umma ក៏បានសាមគ្គីគ្នា និងដើរតួនាទីសំខាន់ដើម្បីរក្សាតុល្យភាពអំណាចនៅស៊ូដង់។ ក្រោយពីកងទ័ពបានបង្ខំឱ្យអតីតប្រធានាធិបតី al-Bashir ចាកចេញពីអំណាច លោក Sadiq al-Mahdi ក៏បន្តជំរុញឱ្យប្រទេសជាតិងាកមករករបបប្រជាធិបតេយ្យវិញ៕
ប្រភព៖ Reuters
November 26, 2020
ក្រុមបាតុករថៃ ជាង10,000នាក់ នាំគ្នាតវ៉ានៅមុខធនាគារដែលមានភាគហ៊ុនរបស់ស្ដេច
ប្រជាជនថៃប្រមាណជាង10,000នាក់ បានលើកគ្នាមកតវ៉ានៅខាងមុខធនាគារពាណិជ្ជសៀម ដើម្បីស្នើឱ្យមានការស៊ើបអង្កេតលើទ្រព្យសម្បត្តិ ក៏ដូចជាការចំណាយរបស់មហាក្សត្រ Vajiralongkorn។
បាតុកម្មនេះត្រូវបានធ្វើឡើងចាប់ពីវេលាម៉ោងប្រហែល15 ក្នុងថ្ងៃទី25វិច្ឆិកា នៅខាងក្រៅការិយាល័យកណ្ដាលរបស់ធនាគារពាណិជ្ជសៀម (SCB) នៅភាគខាងជើងទីក្រុងបាងកក បណ្ដាលឱ្យមានការកកស្ទះចរាចរណ៍នៅក្នុងតំបន់នេះ។ ការិយាល័យកណ្ដាលរបស់ SCB នៅទីក្រុងបាងកកបានបិទទ្វារកាលពីម្សិលមិញ ប៉ុន្តែសាខារបស់ធនាគារនេះនៅតែដំណើរការជាធម្មតា។
មហាក្សត្រថៃ Vajiralongkorn គឺជាភាគហ៊ុនិកធំបំផុតរបស់ធនាគារ SCB ហើយកន្លងមក ក្រុមបាតុករក៏ធ្លាប់បានអំពាវនាវឱ្យប្រជាជនបិទគណនីនៅធនាគារនេះដើម្បីសម្ដែងការជំទាស់។
មេដឹកនាំក្រុមបាតុករ Parit “Penguin” Chiwarak បានស្នើឱ្យបើកការស៊ើបអង្កេតទៅលើទ្រព្យសម្បត្តិ និងការចាយវាយរបស់មហាក្សត្រថៃផងដែរ។ Penguin បានស្នើឱ្យក្រុមបាតុករច្រៀងរួមគ្នានូវចម្រៀងមួយបទមុននឹងបញ្ចប់ការតវ៉ាដោយសន្តិវិធីដើម្បីទប់ស្កាត់ករណីត្រូវចាប់ខ្លួនដែលអាចនាំឱ្យពួកគេមិនអាចធ្វើបាតុកម្មនៅថ្ងៃទី27វិច្ឆិកា។
មេដឹកនាំម្នាក់ទៀតរបស់ក្រុមបាតុករ នោះគឺ Panusaya “Ruang” Sithijirawattanakul បានឱ្យដឹងថា បាតុកម្មបន្ទាប់នឹងត្រូវធ្វើឡើងនៅក្នុងថ្ងៃទី27វិច្ឆិកាខាងមុខ ក៏ប៉ុន្តែមេដឹកនាំរូបនេះមិនបានបង្ហើបឱ្យដឹងអំពីទីតាំងជាក់លាក់នោះទេ។
Penguin បានសរសេរនៅទំព័រ Facebook កាលពីថ្ងៃទី24វិច្ឆិកាថា ខ្លួនត្រូវបានប៉ូលិសស្នើឱ្យចូលខ្លួនបំភ្លឺនៅឯនាយកដ្ឋានប្រឆាំងបទល្មើសបច្ចេកវិទ្យានៅថ្ងៃទី1ធ្នូ។ ដីកាកោះនេះក៏ត្រូវបានធ្វើឡើងចំពោះក្រុមសកម្មជនចំនួន12នាក់ផ្សេងទៀតផងដែរ។
ក្រុមបាតុករនេះ ដំបូងឡើយមានផែនការប្រមូលផ្ដុំគ្នានៅទីលានប្រជាធិបតេយ្យ ហើយបន្ទាប់មកនឹងឆ្ពោះទៅកាន់នាយកដ្ឋានរាជសម្បត្តិ (CBP) នៅកណ្ដាលរាជធានីដើម្បីស្នើឱ្យមានការស៊ើបអង្កេតលើទ្រព្យសម្បត្តិ និងការចំណាយរបស់មហាក្សត្រ។ ប៉ុន្តែ ក្រុមប៉ូលិសបានរារាំងនៅតំបន់ CBP ដោយប្រើប្រាស់កុងតឺន័រ របងបេតុង និងបន្លាលួស។ ប៉ូលិសព្រមានក្រុមបាតុករមិនឱ្យចូលដល់រង្វង់150ជុំវិញ CBP។
ក្រុមបាតុករ ក្រោយមកក៏បានប្ដូរទិសដៅទៅកាន់ធនាគារ SCB ដើម្បីកាត់បន្ថយភាពតានតឹងដែលអាចប្រឈមមុខដាក់គ្នា ឬការប៉ះទង្គិចជាមួយក្រុមប៉ូលិសដែលអាចនាំឱ្យពួកគេធ្លាក់ចូលក្នុងអន្ទាក់។ អាជ្ញាធរបានបំពាក់កាមេរ៉ានៅជុំវិញ SCB កាលពីព្រឹកថ្ងៃទី25វិច្ឆិកា។
មហាក្សត្រថៃ Vajiralongkorn គឺជាភាគហ៊ុនិកធំជាងគេបង្អស់របស់ SCB ដែលជាធនាគារធំលំដាប់ទីពីរនៅប្រទេសថៃ និងកាន់កាប់ភាគហ៊ុនប្រមាណ 23.4% ដោយព្រះអង្គជាអ្នកឈរព្រះនាមផ្ទាល់។
ក្រោយពីបានឡើងគ្រងរាជ មហាក្សត្រ Vajiralongkorn ក៏បានកាន់កាប់សិទ្ធិគ្រប់គ្រង CPB និងឈរព្រះនាមក្ដោបក្ដាប់ទ្រព្យសម្បត្តិដែលមានតម្លៃសរុបប្រមាណជាង 60ពាន់លានដុល្លារអាមេរិកកាលពីឆ្នាំ2016 រួមមាន អចលនទ្រព្យកំពូលៗនៅទីក្រុងបាងកក និងមូលបត្រនៅ SCP។ CPB ត្រូវបានបង្កើតឡើងកាលពីទសវត្សរ៍ឆ្នាំ1930 ដើម្បីគ្រប់គ្រងរាជសម្បត្តិ ប៉ុន្តែ នៅឆ្នាំ2017 វាបានក្លាយជាទ្រព្យឯកជនរបស់មហាក្សត្រ។
សូមរំលឹកថា បាតុករថៃបានចេញធ្វើបាតុកម្មអស់ជាច្រើនខែមកហើយ ដើម្បីទាមទារឱ្យមានការកែសម្រួលរដ្ឋធម្មនុញ្ញ ឬកែទម្រង់របបយោធានិយម ដែលប្រការនេះត្រូវបានគេចាប់អារម្មណ៍យ៉ាងខ្លាំង ដោយសារតែថៃជាប្រទេសមួយដែលមានទំនៀមទម្លាប់គោរពរាជវង្សយ៉ាងខ្ជាប់ខ្ជួន។ យោងតាមច្បាប់ប្រមាទព្រះមហាក្សត្រ ដែលត្រូវគេចាត់ទុកថាមានលក្ខណតឹងរ៉ឹងបំផុតក្នុងពិភពលោក ជនល្មើសអាចត្រូវបានកាត់ទោសឱ្យជាប់ពន្ធនាគារដល់ទៅ15ឆ្នាំឯណោះ។
នាយករដ្ឋមន្ត្រីថៃ Prayuth Chan-ocha កាលពីសប្ដាហ៍មុន បានប្រកាសថា រាជរដ្ឋាភិបាលថៃ និងស្ថាប័នសន្តិសុខ “នឹងប្រើប្រាស់ច្បាប់ដែលមានស្រាប់ ដើម្បីទប់ទល់នឹងក្រុមបាតុករ” ដែលលោកបានហៅថា ជាក្រុមល្មើសច្បាប់៕
ប្រភព៖ Nikkei
November 26, 2020
អាមេរិកចេញគោលនយោបាយថ្មី៖ អ្នកទេសចរណ៍មកពីប្រទេសចំនួន23 នឹងត្រូវដាក់ប្រាក់កក់ធានាខ្លួនរហូតដល់15,000ដុល្លារ
គោលនយោបាយថ្មីរបស់ក្រសួងការបរទេសអាមេរិក តម្រូវឱ្យអ្នកទេសចរណ៍បរទេសមកពីប្រទេសចំនួន23 ដាក់ប្រាក់កក់ជាមុនរហូតដល់15,000ដុល្លារ នៅពេលសុំទិដ្ឋាការចូលទឹកដីអាមេរិក។ ខ្ទង់ប្រាក់កក់នេះនឹងត្រូវបានអាជ្ញាធរដកហូត បើសិនជាអ្នកទេសចរណ៍ស្នាក់នៅលើសថ្ងៃកំណត់នៅលើទឹកដីអាមេរិក។
ក្រសួងការបរទេសអាមេរិក កាលពីថ្ងៃទី23វិច្ឆិកា បានឱ្យដឹងថា គោលនយោបាយថ្មីនេះនឹងមានសុពលភាពចាប់ពីថ្ងៃទី24ធ្នូ ឆ្នាំ2020ខាងមុខ រហូតដល់ថ្ងៃទី24មិថុនា ឆ្នាំ2021។ ការកំណត់ថ្មីនេះ ភាគច្រើនសំដៅទៅលើបណ្ដាប្រទេសដែលមានអត្រាពលរដ្ឋទៅស្នាក់នៅហួសកាលកំណត់លើទឹកដីអាមេរិកខ្ពស់ជាងគេ ដោយប្រើប្រាស់ប្រភេទទិដ្ឋាការ B-2 (សម្រាប់គោលដៅទេសចរណ៍) និង B-1 (សម្រាប់គោលដៅការងារ)។ ព័ត៌មានខាងលើនេះ ត្រូវបានចុះផ្សាយលើបណ្ដាញព័ត៌មានរបស់នាយកដ្ឋានចុះឈ្មោះជាតិសហរដ្ឋអាមេរិក កាលពីថ្ងៃទី24វិច្ឆិកា។
គោលនយោបាយថ្មីនេះ បញ្ជាក់ថា អ្នកទេសចរណ៍ដែលសុំទិដ្ឋាការប្រភេទ B ទៅកាន់សហរដ្ឋអាមេរិក នឹងត្រូវកក់ប្រាក់ចំនួន 5,000ដុល្លារ ឬ 10,000ដុល្លារ ឬ 15,000ដុល្លារ។ ខ្ទង់ប្រាក់នេះនឹងត្រូវនាយកដ្ឋានអន្តោប្រវេសន៍ដកហូត បើសិនស្នាក់នៅហួសថ្ងៃកំណត់។
ប្រទេសដែលមានឈ្មោះក្នុងបញ្ជីនៃគោលនយោបាយខាងលើ មានចំនួន23ប្រទេស ដែលសុទ្ធសឹងតែជាប្រទេសដែលមានអត្រាពលរដ្ឋទៅស្នាក់នៅអាមេរិកខ្ពស់ជាង10% ហើយភាគច្រើនគឺជាប្រទេសនៅទ្វីបអាហ្វ្រិក (15ប្រទេស)។ ក្រៅពីនេះក៏មានប្រទេសមួយចំនួននៅអាស៊ីផងដែរ។ ក៏ប៉ុន្តែ ការកំណត់ថ្មីខាងលើ មិនប៉ះពាល់ដល់និស្សិត ឬទេសចរមកពីបណ្ដាប្រទេសអភិវឌ្ឍន៍ផ្សេងទៀតដែលទទួលបានការលើកលែងទិដ្ឋាការចូលទឹកដីអាមេរិក។
អាមេរិកចេញគោលនយោបាយថ្មី៖ អ្នកទេសចរណ៍មកពីប្រទេសចំនួន23 នឹងត្រូវដាក់ប្រាក់កក់រហូតដល់15,000ដុល្លារ
គោលនយោបាយសាកល្បងដែលមានសុពលភាពរយៈពេល 6ខែនេះរបស់រដ្ឋាភិបាលលោក Trump ត្រូវបានធ្វើឡើងដើម្បីកាត់បន្ថយស្ថានភាពទេសចរស្នាក់នៅហួសកាលកំណត់ ដែលនេះនឹងជួយឱ្យរដ្ឋាភិបាលបន្ថយបានការចំណាយទាក់ទងនឹងការបណ្ដេញចេញជនបរទេសដែលស្នាក់នៅលើសថ្ងៃកំណត់នៅលើទឹកដីអាមេរិក។
បណ្ដាប្រទេសដែលរងផលប៉ះពាល់ពីគោលនយោបាយថ្មីរបស់សហរដ្ឋអាមេរិក រួមមាន៖ អាហ្វហ្គានីស្ថាន អ៊ីរ៉ង់ ស៊ីរី យេមែន លីប៊ី ម៉ូរីតានី អ៊ីរីទ្រា ស៊ូដង់ អង់ហ្គោឡា ប៊ូតាន បួគីណាហ្វាសូ បួរុនឌី កាបវែរ ឆាត សាធារណរដ្ឋកុងហ្គោ ជីប៊ូទី ហ្គាមប៊ី ហ្គីណេប៊ីសូ ឡាវ មីយ៉ានម៉ារ ប៉ាពួញ៉ូវហ្គីណេ និងប្រទេស សៅតូម៉េប្រាំងស៊ីប៕
ប្រភព៖ AFP
November 26, 2020