អន្តរជាតិ - La Reine Media

ផ្ទុះធំនៅអ៊ីតាលី មន្ទីរពេទ្យព្យាបាល Covid-19 ត្រូវជម្លៀសអ្នកជំងឺ

«រណ្ដៅយក្ស» មួយបានបង្ហាញខ្លួនក្រោយពីមានករណីផ្ទុះដ៏ធំមួយនៅក្បែរមន្ទីរពេទ្យក្នុងទីក្រុង Naples ប្រទេសអ៊ីតាលី បណ្ដាលឱ្យមានការជម្លៀសអ្នកជំងឺ Covid-19 ចេញទៅរកកន្លែងសុវត្ថិភាព។

រណ្ដៅយក្សមួយដែលមានទំហំប្រហែល 50ម និងជម្រៅប្រហែល 15ម បានបង្ហាញខ្លួនភ្លាមៗនៅក្នុងទីលានចតរថយន្តក្បែរមន្ទីរពេទ្យ Ponticelli កាលពីថ្ងៃទី 8 មករា បន្ទាប់ពីមានសំឡេងផ្ទុះមួយយ៉ាងធំ។ ករណីនេះបានធ្វើឱ្យរថយន្តជាច្រើនគ្រឿងត្រូវ «លេបត្របាក់» ចូលក្នុងដី ប៉ុន្តែមិនទាន់មានរបាយការណ៍ស្ដីអំពីការស្លាប់នៅឡើយ។

កងកម្លាំងជួយសង្គ្រោះត្រូវបានបញ្ជូនទៅដល់កន្លែងកើតហេតុ ខណៈការស៊ើបអង្កេតរកមូលហេតុកំពុងចាប់ផ្ដើម។

មន្ទីរពេទ្យ Ponticelli ដែលជាកន្លែងព្យាបាលអ្នកជំងឺ Covid-19 កំពុងត្រូវបានដាក់ឱ្យស្ថិតក្នុងស្ថានភាពអាសន្ន បន្ទាប់ពីមានរណ្ដៅយក្សនេះបង្ហាញខ្លួន។ មន្ទីរពេទ្យក៏ត្រូវប្រើប្រាស់ម៉ាស៊ីនភ្លើង ដោយសារតែខ្សែភ្លើងរដ្ឋបានដាច់ក្រោយការផ្ទុះ។

ការិយាល័យរដ្ឋអាជ្ញានៃទីក្រុង Naples នឹងធ្វើការស្រាវជ្រាវលើហេតុការណ៍នេះ បើទោះពួកគេមិនបានគិតដល់សម្មតិកម្មដែលថាមានការវាយប្រហារភេរវកម្ម។ ព័ត៌មានដំបូងបានឱ្យដឹងថា បំពង់នាំអុកស៊ីសែនក្រោមដីរបស់មន្ទីរពេទ្យទំនងជាបានលេចធ្លាយ បង្កឱ្យមានការប្រមូលផ្ដុំឧស្ម័ន និងនាំឱ្យមានការផ្ទុះនេះ៕

ប្រភព៖ RT

January 9, 2021

កម្ពុជារកឃើញអ្នកវិជ្ជមាននឹង Covid-19 ថ្មី ចំនួន 1ករណី ខណៈពិភពលោករកឃើញជាង 811,290 ករណី

ក្រសួងសុខាភិបាលកម្ពុជាបានប្រកាសឱ្យដឹងថា បានរកឃើញអ្នកវិជ្ជមាននឹង Covid-19 សរុបចំនួន 387 នាក់ ក្នុងនោះមានអ្នកឆ្លងថ្មីចំនួន 1 ករណី។

អ្នកវិជ្ជមានថ្មីខាងលើគឺជាពលករដែលទើបតែត្រលប់មកពីប្រទេសថៃ មានអាយុ 24 ឆ្នាំ ស្នាក់នៅក្នុងស្រុកមង្គលបុរី ខេត្តបន្ទាយមានជ័យ។ ព័ត៌មានបន្ថែម សូមអានតារាងខាងក្រោម។ ក្រៅពីអ្នកវិជ្ជមានថ្មីខាងលើ ក្នុងរយៈពេល 24 ម៉ោងកន្លងទៅនេះ កម្ពុជាក៏មានអ្នកជាសះស្បើយពីជំងឺ Covid-19 ចំនួន 3 នាក់ទៀតផងដែរ ដែលជាករណីនាំចូល ក្នុងនោះមាន 2 នាក់ជាពលករិនីត្រលប់មកពីប្រទេសថៃ និងម្នាក់ទៀតជាជនជាតិខ្មែរ-អាមេរិកាំង។

គិតមកដល់ព្រឹកថ្ងៃទី 9 ខែមករានេះ កម្ពុជាបានរកឃើញអ្នកវិជ្ជមាននឹង Covid-19 សរុបចំនួន 387 នាក់ ក្នុងនោះមានអ្នកជាសះស្បើយសរុប 364 នាក់ និងអ្នកកំពុងព្យាបាលមានចំនួន 22 នាក់។

នៅទូទាំងពិភពលោក បច្ចុប្បន្នអ្នកវិជ្ជមាននឹង Covid-19 សរុបឡើងដល់ 89,322,699 នាក់ ក្នុងនោះមាន 63,990,133 បានជាសះស្បើយ 1,920,754 នាក់បានស្លាប់ និង 23,411,824 នាក់កំពុងព្យាបាល ប៉ុន្តែក្នុងចំណោមនេះ មានអ្នកជំងឺ 108,858 នាក់កំពុងមានអាការធ្ងន់ធ្ងរ៕

January 9, 2021

FBI ប្រកាសផ្ដល់រង្វាន់ 50,000 ដុល្លារដើម្បីរកមុខអ្នកដាក់គ្រាប់បែកនៅវ៉ាស៊ីងតោន

FBI បានប្រកាសបង្ហាញរូបថត និងរង្វាន់ 50,000ដុល្លារអាមេរិកដើម្បីស្វែងរកជនសង្ស័យដែលបានឆ្លៀតឱកាសលើករណីវឹកវរដោយសារបាតុកម្មនៅវិមានសភាដើម្បីបង្កៃគ្រាប់បែក។

រូបថតដែលត្រូវបានការិយាល័យជាតិស៊ើបអង្កេត (FBI) ប្រកាសកាលពីយប់ថ្ងៃទី 7 ខែមករា បង្ហាញថា ជនសង្ស័យគឺជាបុរសម្នាក់ ពាក់ម៉ាស ពាក់អាវយឺតធំមានមួក និងពាក់ស្រោមដៃ។ បុរសនេះត្រូវបានគេជឿថា ជាប់ទាក់ទងនឹងករណីដាក់គ្រាប់បែកបំពង់ដែលកែច្នៃដោយខ្លួនឯងនៅខាងក្រៅទីស្នាក់ការកណ្ដាលរបស់គណៈកម្មការជាតិនៃបក្សសាធារណរដ្ឋ និងបក្សប្រជាធិបតេយ្យកាលពីថ្ងៃទី 6 ខែមករា។ ទីស្នាក់ការរបស់គណៈកម្មជាតិនៃបក្សទាំងពីរមានចម្ងាយពីវិមានសភាតែប៉ុន្មានជួរផ្ទះប៉ុណ្ណោះ។

FBI នឹងផ្ដល់រង្វាន់ចំនួន 50,000ដុល្លារដល់អ្នកទាំងឡាយណាដែលផ្ដល់ព័ត៌មាននាំទៅរកការកំណត់អត្តសញ្ញាណ ចាប់ខ្លួន និងដាក់ទោសដល់អ្នកដែលទទួលខុសត្រូវក្នុងករណីដាក់គ្រាប់បែកនេះ។ ជនសង្ស័យបានឆ្លៀតឱកាសនៃភាពច្របូកច្របល់ដែលកើតឡើងដោយសារបាតុករសម្រុកចូលវិមានសភាអាមេរិក ដើម្បីដាក់បង្កៃគ្រាប់បែក។

ប្រភពព័ត៌មានពីសមត្ថកិច្ចឱ្យដឹងថា គ្រាប់បែកទាំងពីរគ្រាប់នេះសុទ្ធតែអាចផ្ទុះ និងបង្កការខូចខាតធំធេងដល់ជីវិត បើសិនត្រូវបានបំផ្ទុះ។ ក្រុមបុគ្គលិកផ្នែករាវមីន បន្ទាប់មកក៏បានប្រើប្រាស់ឧបករណ៍បច្ចេកទេសដើម្បីបំបែកផ្នែកនីមួយៗរបស់គ្រាប់បែកចេញពីគ្នា មុនពេលបិទមិនឱ្យផ្ទុះ នៅចំពេលដែលក្រុមបាតុករគាំទ្រលោក Trump សម្រុកចូលវិមានសភា។ FBI ក៏កំពុងប្រមូលតម្រុយនានាដែលអាចពាក់ព័ន្ធនឹងករណីដាក់គ្រាប់បែកនេះ។

សូមរំលឹកថា យ៉ាងហោចណាស់មានមនុស្សចំនួន 5 នាក់បានស្លាប់ បន្ទាប់ពីបាតុកររាប់រយនាក់ដែលគាំទ្រលោក Donald Trump បានសម្រុកចូលតំបន់ Capitol Hill កាលពីថ្ងៃទី 6 ខែមករា ដើម្បីរារាំងសភាអាមេរិកមិនឱ្យទទួលស្គាល់លទ្ធផលបោះឆ្នោតដែលបញ្ជាក់ថា លោក Joe Biden ជាអ្នកទទួលបានជ័យជំនះ។ ក្នុងចំណោមជនរងគ្រោះក៏មានស្ត្រីម្នាក់ត្រូវបានប៉ូលិសបាញ់សម្លាប់ និងប៉ូលិសម្នាក់ប្រចាំនៅតំបន់ Capitol Hill ផងដែរ។

មនុស្សរាប់សិបនាក់ត្រូវបានចាប់ខ្លួនក្រោមបទចោទថា បានកាន់កាប់កាំភ្លើងខុសច្បាប់ និងប្រើប្រាស់អាវុធដែលត្រូវបានហាមឃាត់ រំលោភលើបទបញ្ជាបម្រាមគោចររបស់ទីក្រុង និងសម្រុកចូលវិមានសភាដោយខុសច្បាប់។

បន្ទាប់ពីមានអំពើហិង្សានៅវិមានសភា ប្រធានាធិបតី Donald Trump ក៏បានចេញសេចក្ដីថ្លែងការណ៍ថ្កោលទោសចំពោះក្រុមបាតុករដែលបានធ្វើឱ្យមានភាពវឹកវរនេះដែរ៕

ប្រភព៖ USA Today

January 8, 2021

សញ្ញាបែងចែក «សត្រូវ និងមិត្ត» លើកាំភ្លើងខ្លីរបស់ប៉ូលិសមួយចំនួនក្នុងអំពើហិង្សានៅសភាអាមេរិក

ក្រុមប៉ូលិសដែលស្លៀកពាក់ស៊ីវិលប្រចាំការនៅវិមានសភាសហរដ្ឋអាមេរិក បានបិទបង់ចាំងពន្លឺលើកាំភ្លើងខ្លីដើម្បីជាសញ្ញាបែកចែកថា «អ្នកណាជាសត្រូវ និងអ្នកណាជាមិត្ត» នៅក្នុងករណីបាតុកម្មហិង្សាដែលបានកើតឡើងនៅឯវិមានសភាសហរដ្ឋអាមេរិក។

ក្នុងពេលដែលក្រុមបាតុករគាំទ្រលោក Donald Trump កំពុងសម្រុកចូលអគារសភាជាតិនៅតំបន់ Capitol Hill កាលពីថ្ងៃត្រង់ ទី 6 ខែមករា ក្រុមមន្ត្រីប៉ូលិសប្រចាំនៅសភាដែលស្លៀកពាក់ស៊ីវិល នាំគ្នាតម្រង់ជួរនៅខាងក្រោយទ្វារបន្ទប់ប្រជុំ និងដកកាំភ្លើងខ្លី Glock ដើម្បីបិទតែមសម្គាល់ ក្នុងបំណងគំរាមដល់ក្រុមបាតុករដែលមាន «ឈាមរាវ»។ កំភ្លើងខ្លីដែលក្រុមប៉ូលិសស្លៀកពាក់ស៊ីវិលប្រើប្រាស់ បានធ្វើឱ្យមានការចាប់អារម្មណ៍ខ្លាំង ដោយសារនៅលើកាំភ្លើងមានតែម ឬបង់ឆ្នូតក្រហម-ស ដែលចាំងប្លាតពន្លឺ។

Tomer Israeli អតីតប្រធានសន្តិសុខនៃអង្គភាពស៊ើបការណ៍សម្ងាត់របស់អ៊ីស្រាអែល (Shin Bet) បានអះអាងថា ការដែលមន្ត្រីប៉ូលិសសភាអាមេរិកបិទតែមចាំងប្លាតពន្លឺនៅលើកាំភ្លើងខ្លី «មិនមែនជារឿងខុសប្រក្រតីនោះទេ»។ Tomer Israeli និយាយថា៖ «បង់នេះត្រូវបានប្រើដើម្បីបែងចែកមិត្តនិងសត្រូវ នៅក្នុងស្ថានការណ៍ដែលមានមនុស្សច្រើន ដែលនេះអាចជួយឱ្យក្រុមមន្ត្រីធ្វើការសម្រេចចិត្តបានត្រឹមត្រូវថា ត្រូវវាយប្រហារលើគោលដៅ ឬអត់ នៅក្នុងមួយប៉ប្រិចភ្នែក»។

កងកម្លាំងសន្តិសុខក៏ប្រើប្រាស់សញ្ញាពិសេសនៅលើកាំភ្លើង ដើម្បីកំណត់អត្តសញ្ញាណក្រុមរបស់ខ្លួន និងដើម្បីជៀសវាងការភាន់ច្រលំនៅក្នុងស្ថានភាពច្របូកច្របល់ ពិសេសនៅពេលមានខ្មាន់កាំភ្លើងម្នាក់ ឬច្រើននាក់ដែលប្រើប្រាស់កាំភ្លើងដូចពួកគេ។

និពន្ធនាយក Joseph Trevithick និង Tyler Rogoway របស់សារព័ត៌មាន The Drive បានអះអាងថា៖ «បង់ចាំងពន្លឺក៏ជាវិធីដើម្បីកំណត់អត្តសញ្ញាបានឆាប់រហ័សថា វាជាកាំភ្លើងរបស់ប៉ូលិសប្រចាំការនៅសភា ពោលគឺមិនមែនជាកាំភ្លើងសម្រាប់ប្រព្រឹត្តអំពើខុសច្បាប់ណាមួយនោះឡើយ»។ កាលពីពេលកន្លងទៅនេះ មន្ត្រីប៉ូលិសប្រចាំនៅសភាអាមេរិកក៏ធ្លាប់បានភ្លេចកាំភ្លើងនៅក្នុងបន្ទប់ទឹកជាច្រើនករណីផងដែរ។

ក្រុមមន្ត្រីប៉ូលិសនៅសភាអាមេរិក ចាប់តាំងពីឆ្នាំ 2019 ត្រូវបានបំពាក់កាំភ្លើងខ្លី ម៉ាក Glock 22។ ប៉ុន្តែ នៅក្នុងការប៉ះទង្គិចគ្នាជាមួយក្រុមបាតុករនៅសភាកាលពីថ្ងៃទី 6 មករា គេមិនទាន់ដឹងច្បាស់ថា កាំភ្លើងដែលក្រុមប៉ូលិសបានប្រើនោះជាប្រភេទអ្វីនៅឡើយ។

កងកម្លាំងសន្តិសុខពិសេស Shin Bet របស់អ៊ីស្រាអែល

នៅក្នុងការប៉ះទង្គិចនៅសភា គេឃើញមានមន្ត្រីប៉ូលិសយ៉ាងតិច 2 នាក់ កាន់កាំភ្លើងដែលមានសញ្ញាខាងលើ ខណៈមន្ត្រីផ្សេងពីនេះមិនមានសញ្ញានេះទេ។ ប៉ុន្តែគេមិនបានដឹងថា ក្នុងចំណោមពួកគេ មានមន្ត្រីរូបណាជាសមាជិករបស់កម្លាំងសម្ងាត់នៅទេ។

នៅពេលហេតុការណ៍កំពុងកើតឡើង ក្រុមមន្ត្រីប៉ូលិស និងកងកម្លាំងពិសេសនៃអធិការដ្ឋាននគរបាលក្រុងវ៉ាស៊ីងតោន អង្គភាពស៊ើបការណ៍ជាតិ (FBI) ស្ថាប័នគ្រប់គ្រងស្រា បារី អាវុធជាតិផ្ទុះ រួមនឹងនគរបាលយុត្តិធម៌ជាដើម ត្រូវបានបញ្ជូនទៅកាន់វិមានសភាដើម្បីជួយដល់កងកម្លាំងដែលនៅខាងក្នុង។ កងកម្លាំងការពារជាតិនៃតំបន់ពិសេស Columbia និង Virginia ក៏ត្រូវបានបញ្ជូនទៅកាន់កន្លែងកើតហេតុដើម្បីទប់ទល់នឹងបាតុករ ខណៈរដ្ឋមួយចំនួនក៏បានបញ្ជូនកងកម្លាំងប្រដាប់អាវុធរបស់ខ្លួន ទៅកាន់រដ្ឋធានីវ៉ាស៊ីងតោន៕

ប្រភព៖ Drive

January 8, 2021

អំពើហិង្សានៅសភាជាន់ខ្ពស់អាមេរិក បណ្ដាលឱ្យប៉ូលិសម្នាក់ស្លាប់! ប៉ុន្តែ អាជ្ញាធរបានបដិសេធដំណឹងនេះ

សមត្ថកិច្ចនៅតំបន់ Capitol Hill បានឱ្យដឹងថា ព័ត៌មានដែលថា មានមន្ត្រីប៉ូលិសម្នាក់បានស្លាប់នៅក្នុងករណីប្រើអំពើហិង្សានៅវិមានសភាអាមេរិកគឺជារឿងមិនពិត។

នៅក្នុងសេចក្ដីប្រកាសមួយកាលពីថ្ងៃទី 7 មករា ប៉ូលិសប្រចាំតំបន់ Capitol Hill បានឱ្យដឹងថា មន្ត្រីនគរបាលជាច្រើនរូបបានរងរបួស និងត្រូវបញ្ជូនចូលពេទ្យ ក្រោយពីក្រុមបាតុករគាំទ្រលោក Trump បានបង្កឱ្យមានអំពើហិង្សានៅវិមានសភា។ ប៉ុន្តែ បច្ចុប្បន្នមិនមានមន្ត្រីប៉ូលិសណាម្នាក់បានបាត់បង់ជីវិតនោះទេ។

មុននេះ ប្រភពព័ត៌មានជាច្រើនបានឱ្យដឹងថា មន្ត្រីប៉ូលិសម្នាក់នៅ Capitol Hill បានស្លាប់ដោយសារក្រុមបាតុករបានយកធុងពន្លត់អគ្គិសភ័យវាយចំក្បាល។ សារព័ត៌មាន NewsNation បានចុះផ្សាយថា មន្ត្រីប៉ូលិសខាងលើបានស្លាប់នៅក្នុងមន្ទីរពេទ្យ បន្ទាប់ពីក្រុមគ្រូពេទ្យបានដកឧបករណ៍ជំនួយដង្ហើម ដោយដឹងថា មន្ត្រីរូបនេះដាច់ខ្យល់ទៅហើយ។

សូមរំលឹកថា មនុស្សរាប់រយនាក់ដែលជាអ្នកគាំទ្ររបស់ប្រធានាធិបតី Donald Trump កាលពីថ្ងៃទី 6 ខែមករា បានបំផ្លាញរបងសន្តិសុខ និងសម្រុកចូលនៅខាងក្នុងតំបន់ Capitol Hill នៅពេលដែលសភាអាមេរិកាំងកំពុងបើកកិច្ចប្រជុំទទួលស្គាល់លទ្ធផលបោះឆ្នោត។ ក្រុមបាតុករបានប្រឈមមុខដាក់គ្នានឹងក្រុមប៉ូលិសប្រដាប់អាវុធ និងបានវាយបំផ្លាញឧបករណ៍មួយចំនួន។ ការប៉ះទង្គិចគ្នានេះបាននាំឱ្យកិច្ចប្រជុំរបស់សភាត្រូវផ្អាកបណ្ដោះអាសន្ន ខណៈក្រុមតំណាងរាស្ត្រខ្លះនាំគ្នារត់ពូនយករួចខ្លួន ខ្លះត្រូវបានជម្លៀសចេញពីកន្លែងកើតហេតុ។

ស្ត្រីម្នាក់ត្រូវបានប៉ូលិសនៅ Capitol Hill បាញ់សម្លាប់នៅនឹងកន្លែង និង 3 នាក់ទៀតបានស្លាប់នៅក្នុងមន្ទីរពេទ្យ ក្រោយពីការជួយសង្គ្រោះបន្ទាន់។ ប៉ូលិសនៅ Capitol Hill និងវ៉ាស៊ីងតោនជាង 50 នាក់ បានរងរបួស ក្នុងនោះមានម្នាក់ត្រូវបានបញ្ជូនទៅកាន់មន្ទីរពេទ្យ។

នៅក្នុងសេចក្ដីថ្លែងការណ៍មួយអំពីអំពើហិង្សាខាងលើ ប្រធានអធិការដ្ឋាននគរបាលតំបន់ Capitol Hill លោក Steven Sund បានថ្កោលទោសក្រុមបាតុករថា បានបញ្ចេញ «ភាពកាចសាហាវ» ដាក់ក្រុមប៉ូលិសដែលកំពុងការពារវិមានសភា និងក្រុមមន្ត្រីអនុវត្តច្បាប់ ដោយពួកគេបានប្រើប្រាស់បំពង់ដែក ជាតិគីមី និងអាវុធជាច្រើនផ្សេងទៀត។

ក្រុមតំណាងរាស្ត្រយល់ថា កងកម្លាំងសន្តិសុខខ្វះការប្រុងប្រៀបឱ្យបានល្អ បើទោះកាលពីច្រើនសប្ដាហ៍កន្លងទៅ លោក Trump បានអំពាវនាវឱ្យមានបាតុកម្មធំមួយដើម្បីរារាំងសភាមិនឱ្យទទួលស្គាល់ជ័យជំនះរបស់លោក Joe Biden។

ប៉ុន្តែ លោក Sund បានបកស្រាយថា ក្រុមប៉ូលិសបានត្រៀមកម្លាំងរួចរាល់សម្រាប់បាតុកម្មដែលបង្ហាញអំពីសេរីភាពបញ្ចេញមតិ ដោយមិនបានគិតដល់ការវាយប្រហារ និងអំពើហិង្សាយ៉ាងដូច្នេះ។ លោកថា នេះគឺជាអំពើហិង្សាដែលមិនដូចទៅនឹងព្រឹត្តិការណ៍ណាមួយដែលខ្លួនធ្លាប់បានជួបប្រទះនៅក្នុងរយៈពេល 30 ឆ្នាំនៃការចូលបម្រើការងារក្នុងវិស័យអនុវត្តច្បាប់។

លោក Steven Sund បានប្រកាសថា នឹងលាលាំងពីតំណែងនៅថ្ងៃទី 16 ខែមករា ទៅតាមការស្នើរបស់ប្រធានសភាជាន់ទាប Nancy Pelosi៕

ប្រភព៖ CNN, Abc27

January 8, 2021

ពិភពលោករកឃើញអ្នកឆ្លង Covid-19 សរុបជាង 88,459,000នាក់ ខណៈកម្ពុជាកើនជិតដល់ 390នាក់

ក្រសួងសុខាភិបាលកម្ពុជា នាព្រឹកថ្ងៃទី 8 ខែមករានេះ បានឱ្យដឹងថា បានរកឃើញករណីវិជ្ជមាននឹង Covid-19 ថ្មីចំនួន 1 នាក់ទៀតដែលជាពលការិនីទើបតែត្រលប់មកពីប្រទេសថៃ។

ករណីខាងលើនេះកើតឡើងចំពោះស្ត្រីជនជាតិខ្មែរ អាយុ 33 ឆ្នាំ នៅស្រុកបវេល ខេត្តបាត់ដំបង។ ព័ត៌មានលម្អិតសូមអានតារាងខាងក្រោម។

គិតមកដល់ព្រឹកថ្ងៃទី 8 ខែមករា ឆ្នាំ 2021 នេះ តួលេខសរុបនៃអ្នកឆ្លងវីរុស Covid-19 នៅកម្ពុជា បានឡើងដល់ 386 នាក់ ក្នុងនោះមានអ្នកជាសះស្បើយចំនួន 362 នាក់ និងអ្នកកំពុងព្យាបាលមានចំនួន 24 នាក់។

នៅទូទាំងពិភពលោក មានអ្នកឆ្លង Covid-19 សរុបចំនួន 88,459,051 នាក់ ក្នុងនោះមានអ្នកស្លាប់ចំនួន 1,905,209 នាក់ និង 63,595,615 នាក់បានជាសះស្បើយ ខណៈ 22,958,227 នាក់កំពុងទទួលការព្យាបាល ដែលក្នុងនេះមាន 108,292 នាក់កំពុងស្ថិតក្នុងស្ថានភាពគ្រោះថ្នាក់ដល់ជីវិត៕

January 8, 2021

ហុងកុងចាប់ខ្លួនពលរដ្ឋអាមេរិកាំង និងសកម្មជនបក្សប្រឆាំងរាប់សិបនាក់ ទៅតាមច្បាប់សន្តិសុខជាតិ

ក្រុមប៉ូលិសក្រុងហុងកុងនៃប្រទេសចិន បានចាប់ខ្លួនសកម្មជនបក្សប្រឆាំងប្រមាណ 50 នាក់ ដោយប្រើច្បាប់សន្តិសុខថ្មី ក្នុងនោះក៏មានឈ្មោះ John Clancey ដែលមានសញ្ជាតិអាមេរិកផងដែរ។

John Clancey ជាពលរដ្ឋអាមេរិកាំង និងជាមេធាវីរបស់ក្រុមហ៊ុនផ្នែកច្បាប់ Ho Tse Wai & Partners ដែលជាក្រុមហ៊ុនល្បីឈ្មោះជាមួយនឹងករណីការពារក្ដីទាក់ទងនឹងសិទ្ធិមនុស្ស ត្រូវបានចាប់ខ្លួននៅក្នុងព្រឹកនេះ (6 មករា) ដោយត្រូវបានសង្ស័យថា មានល្បិចកល «ផ្ដួលរំលំ» នេះបើតាមប្រភពព័ត៌មានពីស្ថាប័នច្បាប់។ ប្រភពព័ត៌មានពីប៉ូលិសក៏បានបញ្ជាក់អំពីការចាប់ខ្លួន Clancey និងការចោទប្រកាន់មកលើមេធាវីរូបនេះ។

ប្រភពព័ត៌មាននានាបានឱ្យដឹងថា ប៉ូលិសជាង 30 នាក់បានចូលឆែកឆេការិយាល័យរបស់ក្រុមហ៊ុនច្បាប់ Ho Tse Wai & Partners។ នេះជាក្រុមហ៊ុនមួយដែលត្រូវបានក្រុមសកម្មជនបក្សប្រឆាំងជួលជាញឹកញាប់ ខណៈដែលមេធាវី Clancey ក៏ជាហេរញ្ញិករបស់ Power for Democracy ដែលធ្លាប់បានជួយដល់កិច្ចការបោះឆ្នោតបឋមកាលពីខែកក្កដា ឆ្នាំ 2020។

Power for Democracy គឺជាក្រុមនយោបាយមួយដែលគាំទ្រប្រជាធិបតេយ្យនៅហុងកុង ដែលត្រូវបានបង្កើតឡើងកាលពីឆ្នាំ 2002 ដោយក្រុមសកម្មជនដែលគាំទ្រប្រជាធិបតេយ្យ។

Clancey គឺជាពលរដ្ឋអាមេរិកាំងដំបូងគេដែលត្រូវបានចាប់ខ្លួនទៅតាមច្បាប់សន្តិសុខនៅហុងកុង។ Clancey ក៏ជាប្រធានគណៈកម្មការសិទ្ធិមនុស្សអាស៊ី និងជាសហស្ថាបនិកម្នាក់នៃគណៈកម្មាធិការប្រតិបត្តិនៃក្រុមមេធាវីសិទ្ធិមនុស្សចិនផងដែរ។

Clancey ស្ថិតក្នុងចំណោមអតីតតំណាងរាស្ត្រ និងសកម្មជនបក្សប្រឆាំងរបស់ហុងកុងប្រមាណ 50 នាក់ដែលត្រូវបានប៉ូលិសហុងកុងចាប់ខ្លួនកាលពីព្រឹកមិញនេះ ដែលភាគច្រើនត្រូវបានចោទប្រកាន់ថា «ផ្ដួលរំលំរដ្ឋាភិបាល» ទៅតាមច្បាប់សន្តិសុខជាតិដែលត្រូវបានទីក្រុងប៉េកាំងអនុម័តកាលពីខែឧសភា ឆ្នាំ 2020។ នេះគឺករណីចាប់ខ្លួនជាក្រុមធំបំផុតដែលត្រូវបានធ្វើឡើងបន្ទាប់ពីច្បាប់សន្តិសុខជាតិរបស់ចិនបានចូលជាធរមាន។

សូមរំលឹកថា ច្បាប់សន្តិសុខជាតិសម្រាប់ទីក្រុងហុងកុងដែលត្រូវបានសភាចិនអនុម័តកាលពីថ្ងៃទី 30 មិថុនា ឆ្នាំ 2020 មិនត្រឹមតែទប់ស្កាត់ និងដាក់ទោសលើជនដែលធ្វើ “សកម្មភាពប្រឆាំង” នានានោះទេ តែច្បាប់នេះក៏រាប់បញ្ចូលទាំងសកម្មគំរាមកំហែងដល់សន្តិសុខផងដែរ៕

ប្រភព៖ AFP

January 6, 2021

ចិនរារាំងមិនឱ្យអ្នកជំនាញរបស់ WHO ស្រាវជ្រាវប្រភព Covid-19 នៅលើទឹកដីរបស់ខ្លួន

អាជ្ញាធរចិនបានប្រកាសថា មិនផ្ដល់ទិដ្ឋាការដល់ក្រុមអ្នកជំនាញរបស់អង្គការសុខភាពពិភពលោក សម្រាប់ការចូលមកកាន់ទីក្រុង Wuhan ដើម្បីស្រាវជ្រាវរកប្រភពរបស់វីរុស Covid-19 បើទោះសមាជិកមួយចំនួនបានចេញដំណើររួចហើយក្ដី។

ប្រតិភូនៃអ្នកជំនាញរបស់អង្គការសុខភាពពិភពលោក (WHO) មានគម្រោងទៅកាន់ទីក្រុង Wuhan នៃខេត្ត Hubei របស់ប្រទេសចិន ជាកន្លែងដែលត្រូវគេជឿថា ជាប្រភពនៃវីរុស Covid-19 ដើម្បីធ្វើការស្រាវជ្រាវលើករណីដំបូងៗនៃការឆ្លងវីរុសនេះ។ ក្រុមអ្នកជំនាញនេះ មិនមានបំណងស្រាវជ្រាវលើទ្រីស្ដីដែលថា Covid-19 មានប្រភពចេញពីបន្ទប់ពិសោធន៍នៅ Wuhan ដែលធ្លាប់ត្រូវបានក្រុមអ្នកវិទ្យាសាស្ត្របដិសេធនាពេលកន្លង។

វេជ្ជបណ្ឌិត Mike Ryan នាយកប្រតិបត្តិនៃកម្មវិធីសុខាភិបាលបន្ទាន់របស់ WHO បានឱ្យដឹងថា ប្រតិភូនេះរួមមាន ក្រុមអ្នកជំនាញមកពីប្រទេសនានាដែលបានធ្វើការយ៉ាងជិតស្និទ្ធជាមួយនឹងចិនទាក់ទងនឹងគម្រោងទៅកាន់ប្រទេសចិន។ លោក Ryan បាននិយាយកាលពីថ្ងៃទី 5 ខែមករាថា៖ «ក្រុមនេះនឹងចាប់ផ្ដើមធ្វើកិច្ចការនៅថ្ងៃស្អែក»។

ក៏ប៉ុន្តែ នៅពេលសមាជិកពីរនាក់ដែលនៅឆ្ងាយបានចេញដំណើរ ក្រុមអ្នកស្រាវជ្រាវនេះក៏បានទទួលព័ត៌មានថា ទិដ្ឋាការរបស់ពួកគេមិនត្រូវបានមន្ត្រីចិនអនុញ្ញាតនោះឡើយ។ សមាជិកម្នាក់បានត្រលប់ក្រោយវិញ ខណៈម្នាក់ទៀតកំពុងឆ្លងកាត់ប្រទេសទីបី។

លោក Tedros Adhanom Ghebreyesus ប្រធានអង្គការសុខភាពពិភពលោក បានសម្ដែងការខកចិត្តចំពោះព័ត៌មានខាងលើនេះ និងឱ្យដឹងថា បានអំពាវនាវឱ្យប្រទេសចិន អនុញ្ញាតឱ្យក្រុមអ្នកជំនាញបានចូលស្រុក។

លោក Tedros ថ្លែងថា៖ «ខ្ញុំបានទាក់ទងទៅកាន់ក្រុមមន្ត្រីចិន និងបានធ្វើឱ្យប្រាកដអំពីភារកិច្ចថា នេះគឺជាអាទិភាពមួយរបស់ WHO និងក្រុមអ្នកស្រាវជ្រាវអន្តរជាតិ»។

ជាច្រើនខែមកហើយ WHO បានប្រឹងប្រែងដើម្បីអាចបញ្ជូនក្រុមអ្នកជំនាញអន្តរជាតិទៅកាន់ប្រទេសចិន។ ពួកគេចាប់ផ្ដើមពិភាក្សាជាមួយក្រុមមន្ត្រីចិនតាំងពីខែកក្កដា ដើម្បីរកផ្លូវចូលទៅកាន់ទីក្រុង Wuhan ក្នុងបំណងស្រាវជ្រាវឱ្យដឹងប្រាកដថា តើវីរុស Covid-19 បានឆ្លងពីសត្វមកមនុស្សដោយរបៀបណាខ្លះ។

Ilona Kickbusch ប្រធានមជ្ឈមណ្ឌលសុខាភិបាលសកលនៅទីក្រុងហ្សឺណែវ យល់់ថា កត្តាភូមិសាស្ត្រនយោបាយបាននិងកំពុងរារាំងបណ្ដាប្រទេសក្នុងការសហការគ្នាដើម្បីប្រយុទ្ធប្រឆាំងនឹង Covid-19 ហើយអរិភាពដែលកើតឡើងអាចជាឧបសគ្គនៃយុទ្ធនាការស្វែងយល់អំពីប្រភព និងដំណើរការនៃរោគរាតត្បាត។

Kickbusch ថ្លែងថា៖ «ខ្ញុំគិតថា នឹងមានការលំបាកខ្លាំងនៅក្នុងការស្វែងរកប្រភពរបស់វីរុស ព្រោះថា ពេលវេលាបានកន្លងផុតទៅយូរណាស់មកហើយ»។

ក៏ប៉ុន្តែ ក្រុមអ្នកជំនាញរបស់ WHO សង្ឃឹមថា ការដែលចិនបដិសេធមិនឱ្យពួកគេចូលប្រទេសនេះ គ្រាន់តែជាបញ្ហាបន្ទាប់បន្សំប៉ុណ្ណោះ ហើយថា «បញ្ហាការិយាធិបតេយ្យនឹងត្រូវបានដោះស្រាយយ៉ាងឆាប់រហ័ស»៕

ប្រភព៖ Guardian

January 6, 2021

ប្រទេសដែលចាក់វ៉ាក់សាំង Covid-19 ជូនពលរដ្ឋ បើទោះមិនមានអ្នកឆ្លងសូម្បីតែម្នាក់

សាធារណរដ្ឋផៅឡូ អាចក្លាយជាប្រទេសមួយក្នុងចំណោមបណ្ដាប្រទេសដំបូងគេក្នុងពិភពលោកដែលបញ្ចប់យុទ្ធនាការចាក់វ៉ាក់សាំង Covid-19 បើទោះជាមិនទាន់មានអ្នកឆ្លងវីរុសនេះក៏ដោយ។

សាធារណរដ្ឋផៅឡូ (Palau) ដែលជាប្រទេសកោះមួយមានប្រជាជនសរុប 18,000 នាក់ កាលពីថ្ងៃទី 2 ខែមករា បានទទួលវ៉ាក់សាំង Covid-19 លើកទីមួយពីក្រុមហ៊ុនអាមេរិក Moderna។ ក្រសួងសុខាភិបាលប្រទេសនេះ បានប្រកាសនៅលើទំព័រ Twitter ថា យុទ្ធនាការចាក់វ៉ាក់សាំងបានចាប់ផ្ដើមចាប់ពីថ្ងៃទី 3 ខែមករា ឆ្នាំ 2021។

វ៉ាក់សាំងចំនួន 2,800 ដូសដំបូង ដែលបានបញ្ជូនដល់ប្រទេសនេះ ត្រូវបានចាក់ជូនក្រុមមនុស្សអាទិភាពដំបូង រួមមាន បុគ្គលិកសុខាភិបាលជួរមុខ ក្រុមមន្ត្រីសំខាន់ៗ និងក្រុមពលរដ្ឋងាយរងគ្រោះ ក្នុងនោះ ម្នាក់ៗនឹងត្រូវបានចាក់ពីរម្ជុលដែលមានគម្លាតពីគ្នា 28 ថ្ងៃ។

អង្គការសុខាភាពពិភពលោក (WHO) បានឱ្យដឹងថា សាធារណរដ្ឋផៅឡូ គឺជាប្រទេសមួយក្នុងចំណោមប្រទេសភាគតិចក្នុងពិភពលោកដែលមិនទាន់មានអ្នកឆ្លងវីរុស Covid-19 និងអ្នកស្លាប់ដោយសារវីរុសនេះ។ កាលពីខែមករា ឆ្នាំ 2020 នៅពេល Covid-19 បានចាប់ផ្ដើមរាតត្បាតតំបន់អាស៊ីប៉ាស៊ីហ្វិក ផៅឡូ គឺជាប្រទេសដែលបានចាប់ផ្ដើមប្រើប្រាស់វិធានការរឹតបន្តឹងព្រំដែនយ៉ាងតឹងរ៉ឹងបំផុត។

ផៅឡូបានចាប់ផ្ដើមបិទច្រកព្រំដែននៅក្នុងខែមីនា និងចាប់ផ្ដើមធ្វើតេស្តរកវីរុស Covid-19 ជូនពលរដ្ឋនៅក្នុងខែមេសា។ វិធានការទាំងនេះបានរួមចំណែកជួយឱ្យប្រទេសកោះមួយនេះ រួចផុតពីការរាតត្បាតរបស់ Covid-19។ នេះបើតាមការចែករំលែករបស់ឯកអគ្គរដ្ឋទូតប្រទេសផៅឡូនៅអង្គការសហប្រជាជាតិកាលពីខែឧសភា ឆ្នាំ 2020។

ជាប្រទេសឯករាជ្យ និងមានទំនាក់ទំនងសេរីជាមួយសហរដ្ឋអាមេរិក ផៅឡូ បានទទួលផលប្រយោជន៍ពីកម្មវិធីចាក់វ៉ាក់សាំងរបស់សហរដ្ឋអាមេរិក ឬហៅថា យុទ្ធនាការអភិវឌ្ឍវ៉ាក់សាំងមហាលឿនដែលមានឈ្មោះថា Operation Warp Speed (OWS)។

Sylvia Osarch អាយុ 60 ឆ្នាំ ជាវេជ្ជបណ្ឌិតផ្នែកមនុស្សចាស់ គឺជាមនុស្សដំបូងគេនៅផៅឡូ ដែលបានទទួលការចាក់វ៉ាក់សាំង Covid-19

ប្រទេសកោះ ផៅឡូ មានផ្ទៃដីត្រឹមតែ 459 គីឡូម៉ែត្រក្រឡាប៉ុណ្ណោះ ដែលនេះស្មើនឹង 1/6 នៃទំហំផ្ទៃដីរបស់ Rhode Island ជារដ្ឋតូចបំផុតនៅសហរដ្ឋអាមេរិក។ ជាមួយនឹងផ្ទៃក្រឡាតូចបែបនេះ ផៅឡូ អាចក្លាយជាប្រទេសដំបូងគេមួយក្នុងពិភពលោកដែលបញ្ចប់យុទ្ធនាការចាក់វ៉ាក់សាំង Covid-19។

តាមគម្រោងដំបូង ផៅឡូ នឹងបញ្ចប់យុទ្ធនាការចាក់វ៉ាក់សាំងនៅក្នុងខែឧសភា ប៉ុន្តែ Ritter Udui អ្នកទទួលខុសត្រូវលើស្ថានភាពបន្ទាន់របស់ក្រសួងសុខាភិបាល បាននិយាយថា ដំណាក់កាលបញ្ចប់យុទ្ធនាការនេះអាចនឹងយឺតជាងការគ្រោងទុក ដោយសារតែមានការពន្យារពេលក្នុងការផ្គត់ផ្គង់វ៉ាក់សាំងពីសហរដ្ឋអាមេរិក។

«ការចាក់វ៉ាក់សាំងមិនត្រូវបានចាប់បង្ខំនោះទេ ដូច្នេះទើបគោលដៅរបស់យើងគឺត្រូវចាក់វ៉ាក់សាំងឱ្យបាន 80% នៃប្រជាជនសរុប» Udui ថ្លែងបែបនេះ។

Sylvia Osarch អាយុ 60 ឆ្នាំ ជាវេជ្ជបណ្ឌិតផ្នែកមនុស្សចាស់ គឺជាមនុស្សដំបូងគេនៅផៅឡូ ដែលបានទទួលការចាក់វ៉ាក់សាំង Covid-19 ដែលបានធ្វើឡើងកាលពីថ្ងៃទី 3 ខែមករា។

ផៅឡូបានជ្រើសរើសវ៉ាក់សាំងដែលអភិវឌ្ឍដោយក្រុមហ៊ុន Moderna របស់សហរដ្ឋអាមេរិក ព្រោះថាវាអាចត្រូវបានរក្សាទុកក្នុងទូទឹកកកប្រភេទស្ដង់ដា ជំនួសឱ្យការរក្សាទុកក្នុងសីតុណ្ហភាព -70 អង្សាសេដូចជាវ៉ាក់សាំងរបស់ Pfizer។ ប៉ុន្តែ ក្រុមមន្ត្រីប្រទេសនេះបានឱ្យដឹងថា ផៅឡូ បានទទួលឃ្លាំងត្រជាក់មួយកាលពីចុងខែធ្នូ ឆ្នាំ2020 ដែលអាចរក្សទុកវ៉ាក់សាំង 5,000 ដូសរបស់ក្រុមហ៊ុន Pfizer៕

ប្រភព៖ CNN

January 6, 2021

ចិនជិតចាប់ផ្ដើមសាងសង់នាវាផ្ទុកយន្តហោះក្នុងស្រុកទីបី

ប្រទេសចិន កំពុងត្រៀមខ្លួនសម្រាប់ការចាប់ផ្ដើមសាងសង់នាវាផ្ទុកយន្តហោះក្នុងស្រុកទីបី នៅដើមឆ្នាំ 2021 នេះ បើទោះជាជួបការលំបាកច្រើនទាក់ទងនឹងបញ្ហាហិរញ្ញវត្ថុ បច្ចេកទេស និងការហ្វឹកហ្វឺន។

ប្រភពព័ត៌មានពីកងទ័ពបានឱ្យដឹងថា នាវាផ្ទុកយន្តហោះក្នុងស្រុកទីបីរបស់ចិន គឺជាប្រភេទ Type 002 នឹងត្រូវបានចាប់ផ្ដើមសាងសង់នៅដើមឆ្នាំនេះ ក្នុងគ្រាដែលនាវាប្រភេទដូចគ្នាដំបូងកំពុងស្ថិតក្នុងដំណាក់កាលនៃការបង្ហើយ។ នាវាប្រភេទ Type 002 ទាំងពីរគ្រឿងនេះ អាចនឹងត្រូវបានបំពាក់ប្រព័ន្ធបាញ់បង្ហោះយន្តហោះទំនើបបំផុតក្នុងពិភពលោក។

នេះគឹជានាវាផ្ទុកយន្តហោះទីបីដែលផលិតឡើងដោយប្រទេសចិនផ្ទាល់ ប៉ុន្តែវាគឺជានាវាផ្ទុកយន្តហោះទីបួនរបស់ប្រទេសនេះ។ ប្រទេសចិន មុននេះបានទិញនាវាផ្ទុកយន្តហោះចាស់មួយគ្រឿងពីប្រទេសអ៊ុយក្រែន និងបានជួសជុលឡើងវិញ ហើយបានដាក់ឈ្មោះឱ្យថា Liaoning ដែលជានាវាផ្ទុកយន្តហោះដំបូងគេរបស់ប្រទេសនេះ។

ដោយយោងទៅតាមរចនារបស់ Liaoning ប្រទេសចិនក៏បានសាងសង់នាវាផ្ទុកយន្តហោះក្នុងស្រុកដំបូងគេដែលមានឈ្មោះថា Shandong និងត្រូវបានដាក់ឱ្យប្រើប្រាស់កាលពីខែធ្នូ ឆ្នាំ 2019។ ក្រោយមក ចិនក៏បានចាប់ផ្ដើមសាងសង់នាវាផ្ទុកយន្តហោះមួយប្រភេទផ្សេងទៀតដែលមានឈ្មោះថា Type 002 ដែលត្រូវបានគេជឿថា បំពាក់ឧបករណ៍បច្ចេកវិទ្យាទំនើបជាង Liaoning និង Shandong។

នាវាផ្ទុកយន្តហោះដំបូងដែលស្ថិតក្នុងប្រភេទ Type 002 ត្រូវបានចាប់ផ្ដើមសាងសង់កាលពីដើមឆ្នាំ 2017។ គម្រោងសាងសង់នាវាផ្ទុកយន្តហោះទីបួនរបស់ចិន ក៏ស្ថិតក្នុងប្រភេទ Type 002 ដែលត្រូវបានចាប់ផ្ដើមសាងសង់នៅចុងឆ្នាំ 2017 ប៉ុន្តែត្រូវពន្យារពេលដោយសារតែ Covid-19។

តំបន់ស្មុគស្មាញដែលមានតម្លៃ 2.8 ពាន់លានដុល្លារអាមេរិក ទំហំជាង 240 ហិកតា គឺជាកន្លែងសម្រាប់ធ្វើសកម្មភាពស្រាវជ្រាវ រចនារូបរាងនាវា និងជាទីដែលមានរោងចក្រនានាសម្រាប់ការសាងសង់នាវាផ្ទុកយន្តហោះ Type 002។

ប្រទេសចិនមានគម្រោងបង្កើតក្រុមនាវាផ្ទុកយន្តហោះយ៉ាងតិចចំនួនបួននៅក្នុងឆ្នាំ 2030 ដើម្បីក្លាយជាកម្លាំងជើងទឹកខ្លាំង និងទាន់សម័យជាងគេលំដាប់ទីពីរក្នុងពិភពលោក បន្ទាប់ពីសហរដ្ឋអាមេរិក។ ក៏ប៉ុន្តែ ប្រភពព័ត៌មានមួយចំនួនឱ្យដឹងថា ដំណើរការនៃការហ្វឹកហាត់របស់កងទ័ពជើងទឹកចិន នៅមិនទាន់ជឿនលឿន ខណៈក្រុមនាវិកនឹងមិនទទួលបានការបណ្ដុះបណ្ដាលគ្រប់គ្រាន់នៅក្នុងអំឡុងនាវាផ្ទុកយន្តហោះទីបួនត្រូវបានដាក់ទៅលើផ្ទៃទឹក៕

ប្រភព៖ SCMP

January 5, 2021

Category: អន្តរជាតិ