អន្តរជាតិ - La Reine Media

ថៃជិតបានចាក់វ៉ាក់សាំង Covid-19 ដែលផលិតក្នុងស្រុក

ប្រទេសថៃមានគម្រោងផលិតវ៉ាក់សាំង AstraZeneca ដែលផលិតក្នុងស្រុកដើម្បីត្រៀមសម្រាប់យុទ្ធនាការចាក់វ៉ាក់សាំង Covid-19 ទ្រង់ទ្រាយធំនៅក្នុងខែមិថុនាខាងមុខ។

ប្រធានវិទ្យាស្ថានជាតិវ៉ាក់សាំងរបស់ថៃ លោក Nakorn Premsri កាលពីពេលថ្មីៗនេះ បានឱ្យដឹងថា តាមផែនការ ប្រទេសនេះនឹងបញ្ចប់ការពិសោធវ៉ាក់សាំង AstraZeneca ដែលផលិតក្នុងស្រុក នៅចុងខែឧសភា និងផលិតរួចរាល់នៅក្នុងខែមិថុនា 2021 ដើម្បីត្រៀមសម្រាប់ការចាក់វ៉ាក់សាំងជូនពលរដ្ឋក្នុងទ្រង់ទ្រាយធំ។ លោក Nakorn Premsri បាននិយាយថា ប្រទេសថៃអាចផលិតវ៉ាក់សាំង Covid-19 បានចំនួន 18 លានដូសរៀងរាល់ខែ។

យោងតាមមេដឹកនាំវិទ្យាស្ថានខាងលើ មូលហេតុដែលប្រទេសនេះបានជ្រើសរើសវ៉ាក់សាំងផលិតក្នុងស្រុកគឺព្រោះពួកគេចង់ធានាឱ្យមានប្រភពវ៉ាក់សាំងគ្រប់គ្រាន់សម្រាប់ការប្រើប្រាស់ក្នុងស្រុក ក្នុងគ្រាដែលពិភពលោកកំពុងប្រយុទ្ធប្រឆាំងនឹងវីរុស Covid-19 ដែលបានសម្លាប់មនុស្សជាង 2 លាននាក់។

ប្រទេសថៃបានចុះកិច្ចព្រមព្រៀងទិញវ៉ាក់សាំងពីក្រុមហ៊ុនផលិតឱសថ AstraZeneca កាលពីខែតុលា ឆ្នាំ 2020 តាមពីក្រោយប្រទេសមួយចំនួន ដូចជា អង់គ្លេស អាមេរិក និងឥណ្ឌា។ ថៃបានបញ្ជាទិញវ៉ាក់សាំង AstraZeneca ដែលផលិតក្នុងប្រទេសថៃ ចំនួន 61 លានដូស គ្រប់គ្រាន់សម្រាប់មនុស្ស 30 លាននាក់ ដែលស្មើនឹងជាងពាក់កណ្ដាលនៃពលរដ្ឋពេញវ័យរបស់ប្រទេសនេះ ដោយមិនទាន់រាប់បញ្ចូលទាំងពលរដ្ឋអាយុក្រោម 18 ឆ្នាំ និងស្ត្រីមានផ្ទៃពោះ។

គិតរហូតដល់ខែមិថុនា ឆ្នាំ 2021 នេះ ប្រទេសថៃនឹងនៅតែបន្តពឹងផ្អែកលើវ៉ាក់សាំង Covid-19 ដែលនាំចូលពីបរទេស។ តាមផែនការ ប្រទេសនេះនឹងទទួលបានវ៉ាក់សាំងនាំចូលចំនួន 50,000 ដូសដំបូង ពីក្រុមហ៊ុន AstraZeneca នៅខែក្រោយនេះ រួចហើយនឹងបន្តទទួល 100,000 ដូសទៀតក្នុងរយៈពេលប៉ុន្មានខែបន្ទាប់នោះ។ ប៉ុន្តែ រដ្ឋមន្ត្រីក្រសួងសុខាភិបាលថៃ លោក Anutin Charnvirakul កាលពីម្សិលមិញបានសំដែងការព្រួយបារម្ភលើបញ្ហាផ្គត់ផ្គង់នៅអឺរ៉ុប ដែលអាចនាំឱ្យកាលបរិច្ឆេទទទួលវ៉ាក់សាំងពី AstraZeneca ត្រូវពន្យារពេល។

AstraZeneca គឺជាក្រុមហ៊ុនផលិតឱសថពហុប្រទេសរបស់ស៊ុយអែត និងអង់គ្លេស។ ក្រុមហ៊ុននេះមានទីស្នាក់ការកណ្ដាលនៅទីក្រុង Cambridge ប្រទេសអង់គ្លេស និងមានសាខារោងចក្រផលិតឱសថនៅក្នុងប្រទេសមួយចំនួនផងដែរ។

រដ្ឋមន្ត្រីក្រសួងសុខាភិបាលថៃ លោក Anutin Charnvirakul

ប្រទេសថៃក៏បានបញ្ជេទិញវ៉ាក់សាំង Sinovac Biotech របស់ចិនចំនួន 2 លានដូស ដែលថៃនឹងត្រូវទទួលបាន 200,000 ដូសនៅក្នុងខែកុម្ភៈ បើទោះជាវ៉ាក់សាំងនេះមិនទាន់ត្រូវបានអាជ្ញាធរអនុម័តឱ្យប្រើប្រាស់ក៏ដោយ។

ប្រទេសថៃ បច្ចុប្បន្នមានអ្នកឆ្លងវីរុស Covid-19 សរុបចំនួន 17,023 នាក់ ក្នុងនោះមានអ្នកស្លាប់ចំនួន 76 នាក់ និងជាសះស្បើយចំនួន 11,396 នាក់ ខណៈអ្នកកំពុងសម្រាកព្យាបាលមានចំនួន 5,551 នាក់៕

ប្រភព៖ Reuters

January 30, 2021

កម្ពុជារកឃើញករណីវិជ្ជមាននឹងវីរុស Covid-19 ថ្មី 1នាក់ទៀត ខណៈពិភពលោករកឃើញជិត 5.6សែននាក់

ក្រសួងសុខាភិបាលកម្ពុជា នាព្រឹកថ្ងៃទី 30 មករានេះ បានប្រកាសឱ្យដឹងថា បានរកឃើញអ្នកវិជ្ជមាននឹង Covid-19 ថ្មីចំនួន 1 ករណីទៀត ដែលជាពលករត្រលប់មកពីប្រទេសថៃ។

អ្នកវិជ្ជមានខាងលើនេះគឺជាស្ត្រីជនជាតិខ្មែរ អាយុ 37 ឆ្នាំ នៅខេត្តបាត់ដំបង។ ក្រៅពីករណីវិជ្ជមាន ថ្ងៃនេះក៏មានករណីជាសះស្បើយចំនួន 5 នាក់ផងដែរ។ ព័ត៌មានលម្អិតសូមអានបញ្ជីខាងក្រោម។

គិតមកដល់ព្រឹកថ្ងៃទី 30 ខែមករា ឆ្នាំ 2021 នេះ កម្ពុជាបានរកឃើញអ្នកវិជ្ជមាននឹង Covid-19 សរុបចំនួន 464 នាក់ ក្នុងនោះមានអ្នកជាសះស្បើយចំនួន 443 នាក់ និងអ្នកកំពុងព្យាបាលមានចំនួន 21 នាក់។

នៅទូទាំងពិភពលោក ករណីវិជ្ជមាននឹង Covid-19 បានកើនដល់ 102,577,402 នាក់ ក្នុងនោះមានអ្នកស្លាប់ចំនួន 2,214,032 នាក់ និងអ្នកកំពុងព្យាបាលមានចំនួន 26,086,562 នាក់ ខណៈអ្នកជាសះស្បើយមានចំនួន 74,273,103 នាក់៕

January 30, 2021

26.3លាននាក់បានឆ្លង Covid-19 នៅអាមេរិក ខណៈសហគមន៍អ្នកវេជ្ជសាស្ត្រថា វីរុស Covid-19 ក្លាយពូជថ្មី មានសមត្ថភាពទប់ទល់នឹងវ៉ាក់សាំង

សហរដ្ឋអាមេរិកគឺដែលជាសម្បុកវីរុស Covid-19 ធំជាងគេក្នុងពិភពលោក បានប្រកាសថា វីរុស Covid-19 ក្លាយពូជថ្មី មានសមត្ថភាពទប់ទល់នឹងវ៉ាក់សាំង ធ្វើឱ្យមានការព្រួយបារម្ភកាន់តែខ្លាំង។

សហរដ្ឋអាមេរិក គិតមកដល់ព្រឹកថ្ងៃទី 29 មករានេះ បានរកឃើញអ្នកវិជ្ជមាននឹង Covid-19 សរុប 26,310,559 នាក់ និងអ្នកស្លាប់សរុប 443,162 នាក់ ក្នុងនោះមានអ្នកជំងឺថ្មី 145,343 នាក់ និងអ្នកស្លាប់ថ្មីចំនួន 3,463 នាក់ ដែលត្រូវបានរកឃើញក្នុងអំឡុង 24 ម៉ោងកន្លងទៅនេះ។

ក្រុមមន្ត្រីសុខាភិបាលអាមេរិក កាលពីថ្ងៃទី 28 មករា បានប្រកាសជាលើកដំបូងថា បានរកឃើញវីរុស Covid-19 ក្លាយពូជថ្មីដែលមានប្រភពពីអាហ្វ្រិក នៅលើអ្នកជំងឺ 2 នាក់នៅក្នុងរដ្ឋ Carolina ខាងត្បូង។ សហគមន៍អ្នកវេជ្ជសាស្ត្រយល់ថា វីរុសក្លាយពូជថ្មីនេះគឺជាឧបសគ្គដ៏គួរឱ្យប្រកាសអាសន្ននៅក្នុងការប្រឹងប្រែងទប់ស្កាត់វីរុស ព្រោះថា មន្ទីរពិសោធន៍ជាច្រើនបានបញ្ជាក់ថា វីរុសក្លាយពូជថ្មីនេះមានសមត្ថភាពទប់ទល់នឹងវ៉ាក់សាំង និងកាត់បន្ថយប្រសិទ្ធភាពរបស់អង្គបដិប្រាណដែលបង្កើតឡើងដោយវ៉ាក់សាំងទៀតផង។

ព័ត៌មានខាងលើនេះត្រូវបានលើកឡើងតែប៉ុន្មានថ្ងៃប៉ុណ្ណោះ ក្រោយពីនាយកដ្ឋានសុខាភិបាលរដ្ឋ Minnesota បានរកឃើញករណីឆ្លងវីរុស Covid-19 ក្លាយពូជដែលមានសមត្ថភាពឆ្លងរាលដាលខ្ពស់ និងមានប្រភពពីប្រទេសប្រេស៊ីល ខណៈដែលវីរុសក្លាយពូជមកពីអង់គ្លេសបានបង្ហាញខ្លួននៅក្នុងរដ្ឋយ៉ាងតិចចំនួន 28 នៅសហរដ្ឋអាមេរិក៕

ប្រភព៖ RT

January 29, 2021

ប្រទេសជិតខាងរបស់កម្ពុជា ឈរលើកំពូលតារាងចំណាត់ថ្នាក់ស្ដីពីការគ្រប់គ្រង Covid-19

ប្រទេសនូវែលហ្សេឡង់ វៀតណាម និងតៃវ៉ាន់ គឺជាប្រទេស និងដែនដីដែលឈរលើកំពូលតារាងចំណាត់ថ្នាក់ស្ដីពីការប្រយុទ្ធប្រឆាំងនឹង Covid-19 ដោយសារតែគ្រប់គ្រងស្ថានភាពវិបត្តិសុខភាពនេះបានយ៉ាងល្អ។

តារាងចំណាត់ថ្នាក់នៃការទប់ទល់នឹង Covid-19 (Covid Performance Index) ដែលត្រូវបានវិទ្យាស្ថាន Lowy នៅទីក្រុង Sydney ប្រទេសអូស្ត្រាលី ប្រកាសបង្ហាញក្នុងថ្ងៃទី 28 មករា បានបង្ហាញថា នូវែលហ្សេឡង់ ឈរលំដាប់កំពូលតារាង ព្រោះតែគ្រប់គ្រងស្ថានភាព Covid-19 បានល្អជាងគេនៅក្នុងចំណោមប្រទេស និងដែនដីចំនួនជិត 100 ក្នុងពិភពលោក ដែលវិទ្យាស្ថាន Lowy បានវាយតម្លៃ។ វិទ្យាស្ថាន Lowy បានបញ្ជាក់ថា បញ្ជីចំណាត់ថ្នាក់នេះ មិនបានរាប់បញ្ចូលប្រទេសចិន ជាកន្លែងដែល Covid-19 ចាប់ផ្ដើមបង្ហាញវត្តមានដំបូងគេកាលពីខែធ្នូ ឆ្នាំ 2019 នោះទេ ដោយសារតែខ្វះទិន្នន័យបើកចំហ។ ដូច្នេះ ប្រទេស និងដែនដីទាំងឡាយ (ក្នុងនោះមានកម្ពុជា) ដែលមិនមានឈ្មោះនៅក្នុងបញ្ជីចំណាត់ថ្នាក់នេះ ក៏អាចមានមូលហេតុដូចគ្នានេះដែរ។

ក្រុមប្រទេសផ្សេងៗដែលស្ថិតនៅក្នុង «top 10» នៃតារាងចំណាត់ថ្នាក់នេះ រួមមាន ប្រទេសថៃ (លេខ 3) ប្រទេសស៊ីប ប្រទេសរវ៉ាន់ដា អ៊ីស្លង់ អូស្ត្រាលី ឡាតវី និងស្រីលង្កា។ ទាំងនេះគឺជាប្រទេសដែលសុទ្ធតែមានអត្រានៃការឆ្លង និងអត្រានៃការស្លាប់ក្នុងកម្រិតទាប បើធៀបនឹងប្រជាជនសរុប និងមធ្យមភាគលើមនុស្សម្នាក់។

ចំណែកប្រទេសដែលស្ថិតក្នុង bottom 10 (បាតតារាង) នៃតារាងចំណាត់ថ្នាក់នេះ រួមមាន ប្រទេស ប្រេស៊ីល ម៉ិកស៊ិក កូឡុំប៊ី អ៊ីរ៉ង់ សហរដ្ឋអាមេរិក បូឡាវី ប៉ាណាម៉ា អូម៉ង់ អ៊ូយក្រែន និងប្រទេសឈីលី ដោយសារតែគ្រប់គ្រង Covid-19 មិនបានល្អ។

ជាសរុប មានប្រទេសចំនួន 98 ត្រូវបានវិទ្យាស្ថាន Lowy វាយតម្លៃអំពីស្ថានភាព Covid-19 នៅក្នុងអំឡុងពេល 36 សប្ដាហ៍ រាប់ចាប់ពីការរកឃើញករណីវិជ្ជមានទី 100 នៃប្រទេសនីមួយៗ និងយកទិន្នន័យដែលមានស្រាប និងគិតដល់ថ្ងៃទី 9 មករា។

ទិន្នន័យធម្យមភាគត្រូវបានគិតក្នុងអំឡុង 14 ថ្ងៃ គឺជាករណីឆ្លងត្រូវបានបញ្ជាក់ តួលេខនៃការឆ្លងដែលបានបញ្ជាក់លើពលរដ្ឋ 1លាននាក់ តួលេខអ្នកស្លាប់ដែលបានទទួលស្គាល់ តួលេខអ្នកស្លាប់ម្នាក់លើ 1 លាននាក់ រួមនឹងចំនួនករណីដែលត្រូវបានបញ្ជាក់ទៅតាមអត្រានៃការធ្វើតេស្ត និងអត្រាធ្វើតេស្តលើម្នាក់លើ 1 លាននាក់។

បណ្ដាប្រទេស និងដែនដីដែលឈរលើកំពូលតារាងចំណាត់ថ្នាក់

របាយការណ៍នៃការស្រាវជ្រាវនេះ ត្រូវបានបង្ហាញឱ្យដឹង ក្នុងគ្រាដែលពិភពលោកទាំងមូលបានរកឃើញអ្នកវិជ្ជមានជាង 100 លាននាក់ ក្នុងនោះមានអ្នកស្លាប់ជាង 2 លាននាក់។

តារាងចំណាត់ថ្នាក់ខាងលើក៏បានបង្ហាញថា បណ្ដាប្រទេស និងដែនដីនៅទ្វីបអាស៊ីប៉ាស៊ីហ្វិក ទទួលបានជោគជ័យក្នុងការគ្រប់គ្រង Covid-19 ខណៈដែលអឺរ៉ុប និងអាមេរិក ត្រូវបានជាន់ពន្លិចដោយរលកនៃការឆ្លងរាលដាលយ៉ាងឆាប់រហ័ស៕

ស្វែងយល់បន្ថែម៖ នៅទីនេះ

ប្រភព៖ Reuters

January 28, 2021

កម្ពុជាមានករណីវិជ្ជមាននឹង Covid-19 ថ្មី 1នាក់ ខណៈពិភពលោករកឃើញជាង 101លាននាក់

ក្រសួងសុខាភិបាលកម្ពុជា ព្រឹកថ្ងៃទី 28 មករានេះ បានឱ្យដឹងថា បានរកឃើញករណីវិជ្ជមាននឹង Covid-19 ថ្មីចំនួន 1 ករណី ដែលជាពលករត្រលប់មកពីប្រទេសថៃ។

ករណីវិជ្ជមានថ្មីនេះកើតឡើងចំពោះស្ត្រីជនជាតិខ្មែរ អាយុ 42 ឆ្នាំ នៅសង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។ ក្រៅពីករណីវិជ្ជមាន ក្នុងរយៈពេល 24 ម៉ោងចុងក្រោយនេះ កម្ពុជាក៏មានករណីជាសះស្បើយចំនួន 5 នាក់ផងដែរ។ ព័ត៌មានលម្អិត សូមអានតារាងខាងក្រោម។

គិតមកដល់ព្រឹកថ្ងៃទី 28 មករា ឆ្នាំ 2021 នេះ កម្ពុជាបានរកឃើញអ្នកវិជ្ជមាននឹង Covid-19 សរុបចំនួន 461 នាក់ ក្នុងនោះមានអ្នកជាសះស្បើយចំនួន 428 នាក់ ខណៈអ្នកកំពុងព្យាបាលមានចំនួន 33 នាក់។

នៅទូទាំងពិភពលោក អ្នកវិជ្ជមាននឹង Covid-19 បានកើនដល់ 101,403,758 នាក់ ក្នុងនោះមានអ្នកស្លាប់ចំនួន 2,182,237 នាក់ និងអ្នកកំពុងព្យាបាលមានចំនួន 25,919,908 នាក់។ ក្នុងអំឡុង 24 ម៉ោងមកនេះ ពិភពលោកក៏មានអ្នកវិជ្ជមានថ្មីជាង 582,340 នាក់ផងដែរ៕

January 28, 2021

យន្តហោះស៊ើបការណ៍អាមេរិក-ចិន ប្រឈមមុខដាក់គ្នានៅក្បែរកោះតៃវ៉ាន់

យន្តហោះឈ្លបយកការណ៍ EP-3E របស់សហរដ្ឋអាមេរិក និង Y-8G របស់ប្រទេសចិន បានហោះទន្ទឹមគ្នានៅក្នុងតំបន់កំណត់អត្តសញ្ញាណការពារដែនអាកាសភាគនិរតីនៃកោះតៃវ៉ាន់ ដែលនេះគឺជាឥរិយាបថមួយដែលមិនធ្លាប់មានពីមុនមក។

ទំព័រ Aircraft Spots ដែលមានជំនាញខាងតាមដានជើងហោះហើរ បានឱ្យដឹងថា យន្តហោះឈ្លបយកការណ៍យុទ្ធសាស្ត្រដែលបំពាក់ឧបករណ៍បច្ចេកវិទ្យាទំនើបៗ និងអាចចូលរួមក្នុងសង្គ្រាមអេឡិចត្រូនិក EP-3E ដែលមានលេខសម្គាល់ 156528 របស់កងទ័ពជើងទឹកអាមេរិក និងយន្តហោះស៊ើបការណ៍រលកសញ្ញា Y-8G ដែលមានលេខសម្គាល់ 30518 របស់ទ័ពអាកាសចិន បានប្រឈមមុខដាក់គ្នានៅវេលាម៉ោង 11 និង 4 នាទី ក្នុងថ្ងៃទី 26 មករាកន្លងទៅ។

យន្តហោះ Y-8G ហោះនៅលើគន្លងដែលយន្តហោះចម្បាំងចិនធ្លាប់បានហោះហើរស្ទើរតែរាល់ថ្ងៃនៅភាគនិរតីនៃកោះតៃវ៉ាន់ ដែលស្ថិតក្នុងតំបន់កំណត់អត្តសញ្ញាណការពារដែនអាកាស (ADIZ) របស់កោះនេះ។ ប្រការដែលខុសប្លែកពីសព្វមួយដងនោះគឺថា ផ្លូវហោះហើរនេះមានលក្ខណទន្ទឹមគ្នា ប៉ុន្តែបញ្ច្រាសទិញគ្នា នៅក្នុងគម្លាតយ៉ាងជិតទៅនឹងយន្តហោះ EP-3E របស់អាមេរិក។

យន្តហោះស៊ើបការណ៍របស់អាមេរិក និងចិន តែងតែហោះចូលទៅកាន់តំបន់ ADIZ របស់តៃវ៉ាន់ នៅពេលបំពេញភារកិច្ច ប៉ុន្តែកន្លងមក សុទ្ធតែហោះហើរឆ្ងាយពីគ្នា និងមិនដែលហោះទន្ទឹមគ្នាក្នុងគម្លាតជិតយ៉ាងនេះ។

ក្រុមអ្នកតាមដានយល់ថា នេះអាចជាយុទ្ធសាស្ត្រថ្មីរបស់កងទ័ពអាមេរិកក្រោមការដឹកនាំរបស់លោក Joe Biden ក្នុងបំណងកំញើញដល់យន្តហោះចម្បាំងចិនដែលហោះកៀកកោះតៃវ៉ាន់។

ហេតុការណ៍នេះបានកើតឡើងស្របពេលដែលគោលនយោបាយរបស់ប្រធានាធិបតី Biden ជាមួយនឹងតៃវ៉ាន់ មិនទាន់មានភាពច្បាស់លាស់ ប៉ុន្តែ រដ្ឋាភិបាលថ្មីរបស់អាមេរិក ទំនងជានឹងបន្តអនុវត្តវិធានការតឹងរ៉ឹងចំពោះចិន ដូចទៅនឹងរដ្ឋាភិបាលរបស់លោក Trump។

ប្រទេសចិន កាលពីដើមសប្ដាហ៍នេះបានបញ្ជូនយន្តហោះរាប់សិបគ្រឿង រួមមានយន្តហោះទម្លាក់គ្រាប់បែក និងយន្តហោះចម្បាំង ហោះចូលមកក្បែរកោះតៃវ៉ាន់ ក្នុងអំឡុងពីរថ្ងៃជាប់ៗគ្នា ក្នុងគ្រាដែលក្រុមនាវាផ្ទុកយន្តហោះចម្បាំង USS Theodore Roosevelt របស់អាមេរិក ធ្វើដំណើរចូលមកកាន់សមុទ្រចិនខាងត្បូង។

ប្រទេសចិនតែងតែចាត់ទុកថា តៃវ៉ាន់គឺជាផ្នែកមួយនៃទឹកដីរបស់ខ្លួនដែលកំពុងរង់ចាំការបង្រួបបង្រួម។ ទីក្រុងប៉េកាំង បានបញ្ជូនយន្តហោះជាច្រើនគ្រឿង ហោះលើដែនអាកាសភាគខាងត្បូងរបស់តៃវ៉ាន់ជារៀងរាល់ថ្ងៃ នៅក្នុងប៉ុន្មានខែចុងក្រោយនេះ។ ក្នុងសម័យប្រធានាធិបតី Donald Trump ទំនាក់ទំនងរវាងអាមេរិក ជាមួយនឹងតៃវ៉ាន់ កាន់តែកក់ក្ដៅពីមួយថ្ងៃទៅមួយថ្ងៃ ខណៈដែលទំនាក់ទំនងរវាងអាមេរិក-ចិន ឬចិន-តៃវ៉ាន់ តែងតែមានភាពតានតឹងខ្លាំងឡើង៕

ប្រភព៖ Taiwan News

January 27, 2021

ស្នំឯករបស់មហាក្សត្រថៃ ត្រូវបានតែងតាំងជាមហេសីទីពីរ

មហាក្សត្រថៃ ព្រះបាទ Maha Vajiralongkorn តែងតាំងស្នំឯកជាមហេសីទីពីររបស់ទ្រង់ ដើម្បីជាអំណោយនៅក្នុងខួបកំណើតទី 36 របស់របស់ស្នំរូបនេះ។

ប្រភពព័ត៌មាននានាបានឱ្យដឹងថា ព្រះបាទ Maha Vajiralongkorn ព្រះជន្ម 68 វស្សា កាលពីថ្ងៃទី 26 មករា ឆ្នាំ 2021 បានតែងតាំងស្នំឯក Sineenat Wongvajirapakdi ជាមហាសីពេញសិទ្ធិរបស់ទ្រង់។ ព្រះអង្គម្ចាស់ទាំងពីរ គ្រងឈុតពណ៌ខៀវខ្ចី នៅក្នុងព្រះរាជពិធីអភ័យទាន់ដល់សត្វ និងត្រី នៅក្នុងការបួងសួងមួយនៃខួបកំណើតទី 36 របស់ស្នំឯក Sineenat ដែលត្រូវបានរៀបចំឡើងនៅឯកំពង់ផែ Wasukri ក្នុងរាជធានីបាងកក។

ការតែងតាំង និងដំឡើងឋានៈទៅឱ្យស្នំឯក Sinneenat នេះ ធ្វើឱ្យមានការភ្ញាក់ផ្អើលខ្លាំង ព្រោះថា ព្រះស្នំរូបនេះធ្លាប់ត្រូវបានដកហូតតំណែងម្ដងរួចហើយកាលពីខែកក្កដា ឆ្នាំ 2019 ក្រោយទទួលបានការតែងតាំងជាស្នំឯកបាន 3 ខែ ព្រោះតែ «មិនស្មោះត្រង់» និង «មានហិច្ឆតា» ដណ្ដើមតំណែងរបស់មហេសី Suthida។

Sinneenat ទទួលបានការតែងតាំងជាស្នំឯកជាថ្មី បន្ទាប់ពីត្រូវបានដកតំណែងអស់រយៈពេលជិត 1 ឆ្នាំ។ ចាប់តាំងពីពេលនោះមក ស្នំឯករូបនេះតែងតែបង្ហាញខ្លួននៅក្នុងព្រឹត្តិការណ៍នានាក្នុងទីសាធារណៈ។ ថ្មីៗនេះ ព្រះស្នំ Sinneenat ក៏ត្រូវបានតែងតាំងជាទីប្រឹក្សារងនៅក្នុងគណៈកម្មការថែទាំសុខភាពរបស់អ្នកទោសដែលមហាក្សត្រជាអ្នកបង្កើតឡើង។ ព្រះស្នំនេះក៏បង្ហាញខ្លួនក្បែរមហាក្សត្រថៃ ខណៈកំពុងបោសសម្អាតពន្ធនាគារមួយកាលពីដើមខែនេះផងដែរ ដែលនេះត្រូវបានគេមើលឃើញថា ដើម្បីស្ដារកិត្តិយសរបស់រាជវាំងថៃឡើងវិញ៕

ប្រភព៖ Daily Mail

January 27, 2021

ម៉ាឡេស៊ីទិញវ៉ាក់សាំងចំនួន 18.4លានដូស ខណៈអ្នកស្លាប់ដោយសារ Covid-19 កើនដល់ជាង 1.9សែននាក់

ក្រសួងសុខាភិបាលម៉ាឡេស៊ី កាលពីថ្ងៃទី 26 មករា បានចុះកិច្ចព្រមព្រៀងជាមួយក្រុមហ៊ុនផ្គត់ផ្គង់ឱសថចំនួនពីរគឺ Pharmaniaga Lifescience Sdn Bhd និង Doupharma Sdn Bhd ដើម្បីទិញវ៉ាក់សាំង Covid-19 ចំនួន 18.4 លានដូស។

យោងតាមប្រភពព័ត៌មានពីរាជធានី គួឡាឡាំពួរ Pharmaniaga Lifescience Sdn Bhd ដែលជាក្រុមហ៊ុនបុត្រសម្ព័ន្ធរបស់ Pharmaniaga (ក្រុមហ៊ុនលំដាប់កំពូលរបស់ម៉ាឡេស៊ី) នឹងផ្គត់ផ្គង់វ៉ាក់សាំង CoronaVac របស់ក្រុមហ៊ុនចិន Sinovac ចំនួន 12 លានដូស មកឱ្យម៉ាឡេស៊ី។

ក្រសួងសុខាភិបាលឱ្យដឹងថា បរិមាណនៃវ៉ាក់សាំង CornaVac ខាងលើនេះ គ្រប់គ្រាន់សម្រាប់ចាក់ឱ្យមនុស្សចំនួន 6 លាននាក់ ស្មើនឹង 18.75% នៃប្រជាជនសរុបរបស់ប្រទេសម៉ាឡេស៊ី។ វ៉ាក់សាំង CornaVac នឹងត្រូវបានផ្គត់ផ្គង់មកឱ្យម៉ាឡេស៊ី ទៅតាមដំណាក់កាល ដោយចាប់ផ្ដើមពីចុងខែមីនាខាងមុខ។

ចំណែកវ៉ាក់សាំង Sputnik V ដែលផលិតឡើងដោយក្រុមហ៊ុនរុស្ស៊ី Gamaleya ចំនួន 6.4 លានដូស ដែលផ្គត់ផ្គង់ដោយក្រុមហ៊ុន Duopharma នឹងចាក់ឱ្យពលរដ្ឋបាន 3.2 លាននាក់។

វ៉ាក់សាំងចំនួនពីរប្រភេទខាងលើនឹងត្រូវបានចាក់ចំនួន 2 លើកសម្រាប់មនុស្សម្នាក់ និងចាក់ឱ្យពលរដ្ឋដែលមានអាយុចាប់ពី 18 ឆ្នាំឡើងទៅ។ ចំពោះ CoronaVac ការចាក់លើកទីពីរនឹងមានគម្លាតពីលើកទីមួយចំនួនពីរសប្ដាហ៍ ខណៈ Sputnik V គម្លាតនេះនឹងមានរយៈពេល 21 ថ្ងៃ។

ប្រទេសម៉ាឡេស៊ី គិតមកដល់ព្រឹកថ្ងៃទី 27 មករា ឆ្នាំ 2021 នេះ បានរកឃើញអ្នកវិជ្ជមាននឹង Covid-19 សរុបចំនួន 190,434 នាក់ ក្នុងនោះមានអ្នកស្លាប់ចំនួន 700 នាក់ ខណៈ 40,574 នាក់កំពុងសម្រាកព្យាបាល៕

ប្រភព៖ Yahoo News

January 27, 2021

ស្ថានភាព Covid-19 នៅទូទាំងពិភពលោក និងកម្ពុជា គិតត្រឹមព្រឹកថ្ងៃទី 27 មករា

ក្រសួងសុខាភិបាលកម្ពុជា ព្រឹកថ្ងៃទី 27 មករា ឆ្នាំ 2021 នេះ បានឱ្យដឹងថា មិនមានករណីឆ្លងវីរុស Covid-19 ថ្មីនោះទេ ប៉ុន្តែ មានករណីជាសះស្បើយជាច្រើននាក់ ខណៈពិភពលោកមានករណីថ្មីជាង 523,962 នាក់។

ករណីជាសះស្បើយនៅកម្ពុជាសម្រាប់ព្រឹកនេះ មានចំនួន 11 នាក់ សុទ្ធតែជាពលករ ពលការិនី ដែលត្រលប់មក ពីប្រទេសថៃ។ ព័ត៌មានលម្អិត សូមអានតារាងខាងក្រោម។

គិតត្រឹមព្រឹកថ្ងៃទី 27 មករានេះ កម្ពុជាបានរកឃើញអ្នកឆ្លង Covid-19 សរុបចំនួន 460 នាក់ ក្នុងនោះមានអ្នកជាសះស្បើយចំនួន 423 នាក់ អ្នកកំពុងព្យាបាលចំនួន 37 នាក់។

នៅទូទាំងពិភពលោក ករណីឆ្លងវីរុស Covid-19 សរុប បានកើនដល់ 100,807,884 នាក់ ក្នុងនោះមាន 2,165,020 នាក់បានស្លាប់ និង 25,824,124 នាក់កំពុងសម្រាកព្យាបាល៕

January 27, 2021

រកឃើញប្រព័ន្ធផ្កាយដែលមានព្រះអាទិត្យចំនួន 6 ដួង នៅក្នុងកាឡាក់ស៊ី Milky Way

ក្រុមអ្នកវិទ្យាសាស្ត្របានរកឃើញប្រព័ន្ធតារាមួយដែលមានផ្កាយចំនួនដល់ទៅ 6 ដួង វិលជុំវិញគ្នា នៅក្នុងកាឡាក់ស៊ី Milky Way ដែលមានចម្ងាយប្រមាណ 2,000 ឆ្នាំពន្លឺពីផែនដី។

ទស្សនាវដ្ដី arXiv កាលពីថ្ងៃទី 12 មករា បានចុះផ្សាយថា ប្រព័ន្ធផ្កាយដែលមានឈ្មោះថា TIC 168789840 នេះ ត្រូវបានរកឃើញដោយទីភ្នាក់ងារអវកាសអាមេរិក (NASA) ដោយយោងទៅលើទិន្នន័យពី TESS ដែលជាផ្កាយរណបជំនាញខាងរុករកភពក្រៅប្រព័ន្ធព្រះអាទិត្យ។

ប្រព័ន្ធផ្កាយ TIC 168789840 នេះ មានព្រះអាទិត្យ ឬផ្កាយចំនួន 6 ដួង ដែលវិលជុំវិញគ្នា។ បើសិនជាគេពិនិត្យមើលដោយប្រើកែវយឹតធម្មតាពីផែនដី គេនឹងគ្រាន់តែឃើញថា ប្រព័ន្ធផ្កាយនេះ មានសភាពដូចទៅនឹងផ្កាយ 1 ដូងនៅលើមេឃតែប៉ុណ្ណោះ។ ក៏ប៉ុន្តែ ដោយសារតែពន្លឺរបស់វាមានការប្រែប្រួលខុសធម្មតា ទើបក្រុមអ្នកវិទ្យាសាស្ត្រប្រើប្រាស់តេឡេស្កុបរបស់ផ្កាយរណប TESS ដើម្បីសង្កេតបន្ថែម ហើយក៏បានរកឃើញថា តាមពិត វាគឺជាប្រព័ន្ធផ្កាយមួយដែលមានព្រះអាទិត្យដោយឡែកចំនួន 6 ដួង។

NASA បានបកស្រាយថា ព្រះអាទិត្យចំនួន 6 ដួងរបស់ TIC 168789840 នេះ វិលជុំវិញគ្នានៅលើផ្ទៃដែលរាប់ស្មើដូចថាស និងចំហៀងរបស់វាបែរត្រង់មករកផែនដី ដូច្នេះ នៅពេលមានផ្កាយណាមួយក្នុងប្រព័ន្ធនេះ គោចរឆ្លងកាត់ពីមុខផ្កាយមួយទៀត នោះវានឹងបង្កើតបានជាបាតុភូតសូរ្យគ្រាស ធ្វើឱ្យពន្លឺរបស់ប្រព័ន្ធផ្កាយត្រូវថយចុះ។

TIC 168789840 មិនមែនជាប្រព័ន្ធផ្កាយដែលមានព្រះអាទិត្យចំនួន 6 តែមួយគត់ក្នុងកាឡាក់ស៊ី Milky Way នោះទេ តែវាស្រដៀងនឹងប្រព័ន្ធផ្កាយ Castor មានចម្ងាយ 51 ឆ្នាំពន្លឺពីផែនដី ដែលត្រូវបានរកឃើញកាលពីឆ្នាំ 1920។

ជាក់ស្ដែង ព័ន្ធផ្កាយនេះវិលជុំវិញគ្នាជាគូ ដោយក្នុងនោះ គូទីមួយ និងគូទីពីរ (ដូចទៅនឹង Castor A និង A) ភ្ជាប់ជាមួយគ្នាយ៉ាងម៉ត់ចត់ ហើយដើម្បីវិលបានមួយជុំលើគន្លងគោលពីរនេះ ផ្កាយមួយដួងស៊ីពេលអស់ 31 ម៉ោង ខណៈផ្កាយមួយដួងទៀតចំណាយអស់ 38 ម៉ោង។ ប្រព័ន្ធផ្កាយទាំងពីរគូនេះ ក៏វិលជុំវិញចំណុចកណ្ដាលរួមមួយដែលធំជាងគន្លងគោចរដោយឡែករបស់ពួកវា ដោយត្រូវចំណាយពេល 3.7 ឆ្នាំ ទើបគោចរបានមួយជុំ។

ចំណែកប្រព័ន្ធផ្កាយភ្លោះទីបី (ដូចទៅនឹង Castor C) ត្រូវចំណាយពេលអស់ 2,000 ឆ្នាំ ឬយូរជាងនេះ ទើបធ្វើដំណើរបានមួយជុំនៃគន្លងគោចរធំជាងគេរបស់ប្រព័ន្ធផ្កាយ TIC 168789840 នេះ។ ផ្កាយ 2 ដូងនៅក្នុងប្រព័ន្ធផ្កាយភ្លោះទីបីនេះ វិលជុំវិញគ្នាលើគន្លងគោចរដែលមានគោលរៀងៗខ្លួន និងត្រូវចំណាយពេល 129 ម៉ោងទើបវិលបានមួយជុំ។

យ៉ាងនេះក្ដី ក្រុមអ្នកវិទ្យាសាស្ត្រមិនបានយល់ច្បាស់អំពីប្រភព ឬវិធីចាប់កំណើតរបស់ប្រព័ន្ធផ្កាយ TIC 168789840 នេះនៅឡើយ៕

ប្រភព៖ Live Science

January 26, 2021

Category: អន្តរជាតិ