អន្តរជាតិ - La Reine Media

កម្ពុជារកឃើញករណីវិជ្ជមាននឹង Covid-19 ថ្មីចំនួន 2នាក់បន្ថែមទៀត ខណៈតួលេខអ្នកឆ្លងសរុបនៅទូទាំងពិភពលោកកើនដល់ជាង 107,389,000នាក់

ព្រឹកថ្ងៃទី 10 ខែកុម្ភៈ ឆ្នាំ 2021 នេះ ក្រសួងសុខាភិបាលកម្ពុជាឱ្យដឹងថា មានករណីវិជ្ជមានថ្មីចំនួន 2 នាក់ទៀត ត្រូវបានរកឃើញកាលពីថ្ងៃទី 9 កុម្ភៈ ក្នុងនោះមានពលករខ្មែរមកពីថៃម្នាក់ និងអ្នកដំណើរមកពីប្រទេសផ្សេងម្នាក់ទៀត។

គិតមកដល់ព្រឹកថ្ងៃទី 10 កុម្ភៈ ឆ្នាំ 2021 នេះ កម្ពុជាបានរកឃើញអ្នកវិជ្ជមាននឹង Covid-19 សរុបចំនួន 478 នាក់ ក្នុងនោះមានអ្នកជាសះស្បើយចំនួន 457 នាក់ និងអ្នកកំពុងព្យាបាលមានចំនួន 210 នាក់។

នៅទូទាំងពិភពលោក អ្នកស្លាប់ដោយសារវីរុស Covid-19 បានកើនដល់ 2,349,171 នាក់ និងជាសះស្បើយមានចំនួន 79,297,474

នាក់ ខណៈអ្នកកំពុងព្យាបាលមានចំនួន 25,595,712 នាក់ នៅក្នុងចំណោមអ្នកវិជ្ជមានសរុបចំនួន 107,389,998 នាក់៕

February 10, 2021

សភាជាន់ខ្ពស់អាមេរិកចាប់ផ្ដើមកាត់ទោសអតីតប្រធានាធិបតី Trump

នៅវេលាម៉ោង 13 នៃថ្ងៃទី 9 កុម្ភៈ (ទៀបភ្លឺថ្ងៃទី 10 កុម្ភៈ ម៉ោងនៅកម្ពុជា) សភាជាន់ខ្ពស់អាមេរិក បានចាប់ផ្ដើមជំនុំជម្រះក្ដីលើចុងចោទដែលជាអតីតប្រធានាធិបតីនៃប្រទេសនេះ នោះគឺលោក Donald Trump។

ការដែលសភាជាន់ខ្ពស់អាមេរិកបើកការជំនុំជម្រះនេះ លោក Donald Trump បានក្លាយជាអតីតប្រធានាធិបតីដំបូងគេក្នុងប្រវត្តិសាស្ត្រនៃសហរដ្ឋអាមេរិកដែលត្រូវបានសភាកាត់ទោស។ លោកក៏ជាអតីតប្រធានាធិបតីដំបូងគេនៅអាមេរិកដែលត្រូវបានសភាចោទប្រកាន់ដល់ទៅពីរលើកផងដែរ។

កាលពីថ្ងៃទី 13 មករា ឆ្នាំ 2021 សភាជាន់ទាបអាមេរិកដែលគ្រប់គ្រងដោយបក្សប្រជាធិបតេយ្យ បានបោះឆ្នោតអនុម័តលើមាត្រាច្បាប់ដែលចោទប្រកាន់ថា លោកបាន «បញ្ឆេះអំពើវឹកវរនៅវិមានសភា» ដែលពេលនោះ លោក Trump នៅជាប្រធានាធិបតីអាមេរិកនៅឡើយ។

ក្រុមតំណាងរាស្ត្រមកពីបក្សប្រជាធិបតេយ្យ យល់ថា លោក Trump ត្រូវតែទទួលខុសត្រូវ បន្ទាប់ពីបានប្រើប្រាស់ពាក្យពេចន៍ដែលនាំឱ្យមានបាតុកម្មហិង្សានៅវិមានសភាអាមេរិកកាលពីថ្ងៃទី 6 មករា ជាពេលដែលសភាកំពុងប្រជុំដើម្បីទទួលស្គាល់លទ្ធផលនៃការបោះឆ្នោតប្រធានាធិបតីកាលពីខែវិច្ឆិកា 2020។ បាតុកម្មហិង្សានោះបានបណ្ដាលឱ្យមានមនុស្សស្លាប់ 5នាក់។

តាមធម្មតា ការជំនុំជម្រះទោសចំពោះមន្ត្រីអនុវត្តច្បាប់ថ្នាក់កំពូលនៅសហរដ្ឋអាមេរិកនឹងត្រូវបានដឹកនាំដោយប្រធានតុលាការកំពូល។ ប៉ុន្តែ ដោយសារលោក Trump មិនស្ថិតក្នុងតំណែង ទើបតំណាងរាស្ត្របក្សប្រជាធិបតេយ្យ Patrick Leahy នឹងធ្វើជាប្រធានអង្គជំនុំជម្រះលើកនេះ ជំនួសឱ្យប្រធានតុលាការកំពូល John Roberts។

នៅក្នុងអង្គជំនុំជម្រះនេះ តំណាងរាស្ត្រនៅសភាជាន់ខ្ពស់នឹងដើរតួនាទីចំនួនពីរក្នុងពេលតែមួយ៖ គណៈវិនិច្ឆ័យ និងចៅក្រម។ ចំណែកក្រុមតំណាងរបស់សភាជាន់ទាប ដើរតួជាភាគីរដ្ឋអាជ្ញា។

តំណាងនៃក្រុមមេធាវីការពារក្ដីរបស់អតីតប្រធានាធិបតី Trump រួមមានមេធាវី Bruce Castor ដែលជាអតីតមេធាវីរបស់រដ្ឋនៅ Pennsylvania និង David Schoen ដែលជាមេធាវីផ្នែកសិទ្ធិពលរដ្ឋដ៏ល្បីឈ្មោះនៅសហរដ្ឋអាមេរិក។

ក្នុងថ្ងៃដំបូងនៃការជំនុំជម្រះ ក្រុមតំណាងរបស់សភាជាន់ទាប និងក្រុមមេធាវីរបស់លោក Trump មានរយៈពេល 2 ម៉ោងស្មើគ្នាដើម្បីសំដែងការយល់ឃើញរបស់ខ្លួនអំពីភាពស្របច្បាប់នៃអង្គជំនុំជម្រះនេះ។ បន្ទាប់មក សភាជាន់ខ្ពស់បោះឆ្នោតដើម្បីស្វែងរកភាពស្របច្បាប់នៃអង្គជំនុំជម្រះនេះជាផ្លូវការ។ បើសិនជាលទ្ធផលបោះឆ្នោតមានសំឡេងគាំទ្រយ៉ាងតិច 51 សំឡេង នោះការជំនុំជម្រះនេះនឹងត្រូវបន្តទៅមុខទៀត។ ប៉ុន្តែ បើផ្ទុយពីនេះ អង្គជំនុំជម្រះនឹងត្រូវបានលុបចោលជាស្ថាពរ៕

February 10, 2021

WHO ការពារវ៉ាក់សាំង Covid-19 របស់ AstraZeneca ក្រោយអាហ្វ្រិកខាងត្បូងផ្អាកប្រើប្រាស់

វ៉ាក់សាំងទប់ស្កាត់ Covid-19 ដែលអភិវឌ្ឍដោយក្រុមហ៊ុនឱសថអង់គ្លេស AstraZeneca សហការជាមួយសាកលវិទ្យា Oxford នៅតែជាអាវុធសំខាន់ក្នុងការប្រយុទ្ធនឹងវីរុសនាពេលបច្ចុប្បន្ន។

មេដឹកនាំនៃសម្ព័ន្ធច្នៃប្រឌិតទប់ទល់នឹងរោគរាតត្បាត CEPI (Coalition for Epidemic Preparedness Innovations) នៃអង្គការសហប្រជាជាតិ (WHO) បានអះអាងដូចខាងលើកាលពីថ្ងៃទី 8 កុម្ភៈ បន្ទាប់ពីប្រទេសអាហ្វ្រិកខាងត្បូងសម្រេចផ្អាកប្រើប្រាស់វ៉ាក់សាំង Covid-19 របស់ AstraZeneca ដោយសារមានការព្រួយបារម្ភអំពីបញ្ហាប្រសិទ្ធភាពរបស់វ៉ាក់សាំងនេះនៅចំពោះមុខការក្លាយពូជរបស់ Covid-19 ដែលបច្ចុប្បន្នបានកើនឡើងដល់ 80% នៃករណីឆ្លងថ្មីនៅប្រទេសនេះ។

លោក Richard Hatchett និយាយថា វាឆាប់រហ័សពេកក្នុងការបំបាត់វ៉ាក់សាំងរបស់ AstraZeneca ហើយវានៅតែជាឧបករណ៍ដែលមានប្រសិទ្ធភាពក្នុងការទប់ទល់នឹងវីរុស Covid-19។ មុននេះ ក្រុមមន្ត្រីនៃប្រទេសមួយចំនួន ដូចជា អូស្ត្រាលី និងអង់គ្លេសក៏ធ្លាប់បានមានមតិការពារវ៉ាក់សាំង AstraZeneca នេះដែរ។ ចំណែកភាគីក្រុមហ៊ុន AstraZeneca បានអះអាងថា វ៉ាក់សាំងរបស់ពួកគេ ធានាសុវត្ថិភាព និងមានប្រសិទ្ធភាពក្នុងការទប់ទល់នឹង Covid-19 ទន្ទឹមនឹងការបញ្ជាក់ថា ក្រុមហ៊ុនកំពុងតែកែសម្រួលវ៉ាក់សាំងនេះដើម្បីឱ្យមានប្រសិទ្ធភាពទប់ទល់នឹងវីរុស Covid-19 ក្លាយពូជថ្មី នៅអាហ្វ្រិកខាងត្បូង។

វ៉ាក់សាំងរបស់ AstraZeneca កាន់កាប់មួយភាគធំនៅក្នុងកម្មវិធី COVAX ដែលជាយន្តការយុត្តិធម៌មួយដែលនឹងបែងចែកវ៉ាក់សាំង Covid-19 ទៅឱ្យបណ្ដាប្រទេសក្រីក្រ។ បច្ចុប្បន្ន WHO និង UN (អង្គការសហប្រជាជាតិ) កំពុងសហការគ្នាបែងចែកវ៉ាក់សាំងសរុប 337.21 លានដូស ទៅឱ្យប្រទេសចំនួន 145 នៅក្នុងពាក់កណ្ដាលដើមឆ្នាំ 2021 ក្នុងក្របខ័ណ្ឌ COVAX។

អាហ្វ្រិកខាងត្បូង ដែលជាប្រទេសកំពុងរងផលប៉ះពាល់ខ្លាំងបំផុតពី Covid-19 នៅអាហ្វ្រិកខាងត្បូង គ្រោងនឹងចាប់ផ្ដើមយុទ្ធនាការចាក់វ៉ាក់សាំង Covid-19 ដោយប្រើប្រាស់វ៉ាក់សាំង AstraZeneca នាប៉ុន្មានថ្ងៃខាងមុខ។ ប៉ុន្តែ ប្រទេសដែលមានវ៉ាក់សាំង Covid-19 ចំនួន 1.5 លានដូសក្នុងដៃនេះ បានសម្រេចចិត្តផ្អាកយុទ្ធនាការចាក់វ៉ាក់សាងទៅវិញ ដោយសារទិន្នន័យដែលប្រមូលបានបង្ហាញថា វ៉ាក់សាំង AstraZeneca មានប្រសិទ្ធភាពតិចតួចចំពោះវីរុស Covid-19 ក្លាយពូជនៅប្រទេសនេះ៕

ប្រភព៖ WSJ

February 9, 2021

វៀតណាមបានបញ្ចប់ការធ្វើតេស្តលើមនុស្សដំណាក់កាលទីមួយដោយជោគជ័យ ចំពោះវ៉ាក់សាំង Covid-19 ឈ្មោះ Nano Covax

វៀតណាម៖ ជំហានដំបូងបង្ហាញថា វ៉ាក់សាំង Nano Covax មានសុវត្ថុភាព បង្កើតប្រតិកម្មប្រឆាំងនឹងវីរុសបានល្អ និងមានប្រសិទ្ធភាពក្នុងការទប់ទល់នឹង Covid-19 សូម្បីតែប្រភេទក្លាយពូជថ្មីរបស់វីរុសនេះ។

ព័ត៌មានពីវិទ្យាស្ថានវេជ្ជសាស្ត្រយោធាបានឱ្យដឹងថា អង្គភាពនេះទើបតែបានបញ្ចប់ការធ្វើតេស្តវ៉ាក់សាំងលើមនុស្សនៅក្នុងដំណាក់កាលដំបូង ក្រោយពីបានចាក់វ៉ាក់សាំង Nano Covax ចំនួន 120 ម្ជុលទៅឱ្យអ្នកស្ម័គ្រចិត្តចំនួន 60 នាក់។

ក្រុមអ្នកជំនាញបានវាយតម្លៃថា ជំហានដំបូងបង្ហាញថា វ៉ាក់សាំង Nano Covax នេះ មានសុវត្ថិភាព បង្កើតប្រតិកម្មប្រឆាំងនឹងវីរុសបានល្អ និងមានប្រសិទ្ធភាពចំពោះវីរុស Covid-19 ក្នុងនោះបូករួមទាំងវីរុស Covid-19 ប្រភេទក្លាយពូជផងដែរ។ បន្ទាប់ពីបានចាក់វ៉ាក់សាំង ក្រុមអ្នកស្ម័គ្រចិត្ត សុទ្ធតែមានសុខភាពល្អ ដោយមានករណីមួយចំនួនតូចប៉ុណ្ណោះដែលមានអាការឈឺត្រង់កន្លែងចាក់ ក្ដៅខ្លួនស្ទេញៗ ប៉ុន្តែបានបាត់ទៅវិញក្រោយរយៈពេលពី 1-2 ថ្ងៃ។

វិទ្យាស្ថានវេជ្ជសាស្ត្រយោធាវៀតណាម កំពុងតែបន្តប្រមូលទិន្នន័យដើម្បីធ្វើរបាយការណ៍ជូនក្រសួងសុខាភិបាល។ តាមគម្រោង ក្រោយបុណ្យចូលឆ្នាំចិន ក្រុមប្រឹក្សាវិទ្យាសាស្ត្រនិងសីលធម៌ជីវវេជ្ជសាស្ត្រ រួមនឹងក្រសួងសុខាភិបាលនឹងជួបប្រជុំគ្នាដើម្បីវាយតម្លៃលើវ៉ាក់សាំងខាងលើ មុនពេលអនុម័តឱ្យធ្វើតេស្តលើមនុស្សដំណាក់ទីពីរ។

ដំណាក់កាលទីពីរនឹងធ្វើតេស្តលើអ្នកស្ម័គ្រចិត្តចំនួន 560 នាក់ ដោយប្រើពេល 6 ខែ ខណៈដែលដំណាក់កាលទីបីនឹងពិសោធលើមនុស្សចំនួនជាង 10,000 នាក់ នៅតាមបណ្ដាប្រទេសដែលមានករណីឆ្លងក្នុងសហគមន៍ច្រើន ហើយដំណាក់កាលនេះនឹងត្រូវបញ្ចប់នៅដើមឆ្នាំ 2022។

Nano Covax គឺជាវ៉ាក់សាំងប្រឆាំង Covid-19 ដំបូងគេរបស់វៀតណាម ដែលត្រូវបានធ្វើតេស្តនៅលើមនុស្ស ក្នុងនោះ វ៉ាក់សាំងម្ជុលដំបូងត្រូវបានចាក់កាលពីថ្ងៃទី 17 ធ្នូ ឆ្នាំ 2020។

លោក Nguyen Thanh Long រដ្ឋមន្ត្រីក្រសួងសុខាភិបាលវៀតណាម កាលពីថ្ងៃទី 5 កុម្ភៈ បានថ្លែងថា បច្ចុប្បន្ន វ៉ាក់សាំង Nano Covax របស់ក្រុមហ៊ុន Nanogen បានឆ្លងផុតដំណាក់កាលទីមួយនៃការធ្វើតេស្តលើមនុស្ស និងត្រៀមចូលដំណាក់កាលទីពីរ។

ក្រៅពី Nanogen វៀតណាមក៏មានក្រុមហ៊ុនមួយចំនួនទៀតដែលកំពុងពិសោធវ៉ាក់សាំងប្រឆាំង Covid-19 មានដូចជា ក្រុមហ៊ុន IVAC និង ក្រុមហ៊ុនVABIOTEC ជាដើម។

គិតដល់ខែមិថុនា ឆ្នាំ 2021 វៀតណាមនឹងមានវ៉ាក់សាំង Covid-19 ប្រមាណ 30 លានដូសដើម្បីចាក់ឱ្យពលរដ្ឋ។ ជាងនេះ វៀតណាមក៏កំពុងតែស្វែងរកជាវវ៉ាក់សាំងពីបរទេស ដើម្បីបង្កើនចំនួននៃប្រភពផ្គត់ផ្គង់។ តាមគម្រោង វ៉ាក់សាំង Covid-19 ឈុតដំបូងដែលវៀតណាមបានបញ្ជាទិញពី AstraZeneca នឹងមកដល់ប្រទេសនេះនៅចុងខែកុម្ភៈ ឬដើមខែមីនា2021៕

February 9, 2021

តំណាងរាស្ត្រអាមេរិកដំបូងគេដែលស្លាប់ដោយសារ Covid-19

តំណាងរាស្ត្រមកពីបក្សសាធារណរដ្ឋ លោក Ron Wright វ័យ 67 ឆ្នាំ បានបាត់បង់ជីវិតនៅពេលកំពុងព្យាបាល Covid-19 ដែលនេះគឺជាតំណាងរាស្ត្រកំពុងកាន់តំណែងដំបូងគេដែលស្លាប់ដោយសារវីរុស Covid-19 នៅសហរដ្ឋអាមេរិក។

ការិយាល័យរបស់លោក Wright តំណាងរាស្ត្រមកពីរដ្ឋ Texas បានឱ្យដឹងថា តំណាងរាស្ត្ររូបនេះបានទទួលមរណភាពកាលពីថ្ងៃទី 7 កុម្ភៈ នៅមន្ទីរពេទ្យក្នុងក្រុង Dallas ជាកន្លែងដែលលោក និងភរិយាកំពុងទទួលការព្យាបាលជំងឺ Covid-19។

លោក Wright កាលពីថ្ងៃទី 27 មករា បានប្រកាសថា លោកទទួលបានលទ្ធផលវិជ្ជមាននឹង Covid-19 ប៉ុន្តែមានរោគសញ្ញាស្រាលប៉ុណ្ណោះ។ យ៉ាងនេះក្ដី ស្ថានភាពរបស់លោកកាន់តែដុនដាបឡើងៗ ហើយលោកក៏ត្រូវទៅព្យាបាលនៅមន្ទីរពេទ្យក្នុងរយៈពេល 2 សប្ដាហ៍។

លោក Joe Biden បានហៅលោក Wright ថាជា «អ្នកចម្បាំងដ៏ក្លាយហាន ដែលបានទប់ទល់ទាំងជំងឺមហារីក ទាំងជំងឺ Covid-19» និងបានប្រកាសចូលរួមរំលែកទុក្ខជាមួយគ្រួសារនៃសពផងដែរ។

លោក Ron Wright បានជាប់ឆ្នោតជាសមាជិកសភាតាំងពីឆ្នាំ 2018 និងមានកៅអីនៅក្នុងគណៈកម្មការកិច្ចការបរទេស អប់រំ និងពលកម្មរបស់សភាជាន់ទាបផងដែរ។

កាលពីចុងខែធ្នូ ឆ្នាំ 2020 តំណាងរាស្ត្រដែលទើបតែបានជាប់ឆ្នោតនៅសភាជាន់ទាប លោក Luke Letlow អាយុ 41 ឆ្នាំ ក៏បានបាត់បង់ជីវិតដោយសារ Covid-19 នៅមុនថ្ងៃស្បថចូលកាន់តំណែងតែប៉ុន្មានថ្ងៃប៉ុណ្ណោះ។

សហរដ្ឋអាមេរិក គិតមកដល់ព្រឹកថ្ងៃទី 9 កុម្ភៈនេះ មានអ្នកវិជ្ជមាននឹង Covid-19 សរុបចំនួនជាង 27 លាននាក់ ក្នុងនោះមានជាង 476,000 នាក់បានស្លាប់៕

ប្រភព៖ AFP

February 9, 2021

យន្តហោះទម្លាក់គ្រាប់បែកយុទ្ធសាស្ត្រទាំងបីប្រភេទ ហោះកាត់កីឡាដ្ឋានអាមេរិកក្នុងកម្ពស់យ៉ាងទាប

យន្តហោះទម្លាក់គ្រាប់បែក B-1B, B-2 និង B-52 របស់សហរដ្ឋអាមេរិក បានរួមគ្នាបង្កើតជាក្រុមហោះហើរមួយ ហោះឆ្លងកាត់ពីលើកីឡាដ្ឋាន Raymond James ដើម្បីចូលរួមបើកការប្រកួតបាល់ឱប Super Bowl។

ការហោះហើរសំដែងខាងលើនេះត្រូវបានធ្វើឡើងកាលពីថ្ងៃទី 7 កុម្ភៈ នៅលើដែនអាកាសនៃទីក្រុង Tampa រដ្ឋ Florida សហរដ្ឋអាមេរិក ជាកន្លែងដែលមានព្រឹត្តិការណ៍ប្រកួតបាល់ឱប Super Bowl រវាងក្រុម Kansas City Chiefs និងក្រុម Tampa Bay Buccaneers។

ក្នុងក្រុមហោះហើរខាងលើនេះ រួមមានយន្តហោះល្បឿនលឿន B-1B Lancer យន្តហោះទម្លាក់គ្រាប់បែកយុទ្ធសាស្ត្រ B-52H និងយន្តហោះបំបាំងកាយ B-2 Spirit។ យន្តហោះទាំងនេះបានហោះចេញពីរដ្ឋផ្សេងៗគ្នា បន្ទាប់មកក៏បានផ្គុំគ្នានៅក្បែរទីក្រុង Tampa រួចបង្កើតជាក្រុមមួយ ហោះហើរឆ្លងកាត់ពីលើកីឡាដ្ឋាន Raymond James ក្នុងគ្រាដែលភ្លេងជាតិអាមេរិកចាប់ផ្ដើមបន្លឺឡើង។

នេះជាលើកដំបូងហើយដែលទ័ពអាកាសអាមេរិកបញ្ចេញយន្តហោះទម្លាក់គ្រាប់បែកទាំងបីប្រភេទ ឱ្យទៅហោះហើរក្នុងរយៈកម្ពស់ទាប នៅពីលើកីឡាដ្ឋានដើម្បីអបអរការប្រកួតដណ្ដើមពានរង្វាន់បាល់ឱប Super Bowl។ ក្រោយការសំដែងនេះ យន្តហោះទាំងបីក៏បានចាកចេញពីក្រុមហោះហើរ និងបន្តបំពេញបេសកកម្មរៀងៗខ្លួន។

Super Bowl គឺជាព្រឹត្តិការណ៍ប្រកួតដណ្ដើមពានរង្វាន់ខ្ពស់បំផុតនៃបាល់ឱបនៅសហរដ្ឋអាមេរិក។ នេះគឺជាព្រឹត្តិការណ៍កីឡាធំបំផុតរបស់ប្រទេសនេះ និងតែងតែមានមនុស្សទស្សនាច្រើនជាងគេនៅលើកញ្ចក់ទូរទស្សន៍៕

https://www.youtube.com/watch?v=RBmhfZ9A1Nw

ប្រភព៖ WFLA

February 8, 2021

អាហ្វ្រិកខាងត្បូងផ្អាកប្រើប្រាស់វ៉ាក់សាំង AstraZeneca

ក្រុមមន្ត្រីសុខាភិបាលនៃប្រទេសអាហ្វ្រិកខាងត្បូងបានឱ្យដឹងថា កំពុងតែផ្អាកការចែកចាយវ៉ាក់សាំង AstraZeneca បន្ទាប់ពីការសិក្សាស្រាវជ្រាវមួយបង្ហាញថា វ៉ាក់សាំងនេះមានប្រសិទ្ធភាពតិចតួចនៅចំពោះមុខ Covid-19 ក្លាយពូជថ្មី។

នៅក្នុងសន្និសីទសារព័ត៌មានមួយកាលពីថ្ងៃទី 7 កុម្ភៈ រដ្ឋមន្ត្រីក្រសួងសុខាភិបាលនៃប្រទេសអាហ្វ្រិកខាងត្បូង វេជ្ជបណ្ឌិត Zweli Mkhize បានថ្លែងថា នេះគឺជាការសម្រេចចិត្តជាបណ្ដោះអាសន្ននៅក្នុងពេលរង់ចាំក្រុមអ្នកវិទ្យាសាស្ត្រកំណត់បាននូវវិធីសាស្ត្រថ្មីក្នុងការប្រើប្រាស់វ៉ាក់សាំង AstraZeneca ឱ្យមានប្រសិទ្ធភាពបំផុត។ លោក Zweli Mkhize បានបញ្ជាក់ថា ប្រទេសនេះនឹងបន្តប្រើប្រាស់វ៉ាក់សាំងរបស់ Pfizer/BioNTech និង Johnson & Johnson។

របាយការណ៍ដំបូងដែលត្រូវបានប្រកាសក្នុងថ្ងៃដដែលនោះបានបង្ហាញថា វ៉ាក់សាំង Oxford/AstraZeneca មានប្រសិទ្ធភាពកម្រិតទាប និងមធ្យមនៅចំពោះមុខ Covid-19 ក្លាយពូជនៅទ្វីបអាហ្វ្រិក។

ការស្រាវជ្រាវខាងលើនេះ ត្រូវបានធ្វើឡើងនៅលើអ្នកស្ម័គ្រចិត្តប្រមាណ 2,000 នាក់ ដែលមានវ័យជាមធ្យម 31 ឆ្នាំ ក្នុងនោះមានពាក់កណ្ដាលត្រូវបានចាក់វ៉ាក់សាំង Oxford/AstraZeneca និងពាក់កណ្ដាលទៀតចាក់វ៉ាក់សាំងផ្លាសេបូ (placebo) ដែលជាថ្នាំមិនមានសារធាតុសកម្ម/គ្មានប្រសិទ្ធភាព។

ការសិក្សាស្រាវជ្រាវខាងលើ ត្រូវបានធ្វើឡើងដោយសាកលវិទ្យាល័យ Witwatersrand របស់ប្រទេសអាហ្វ្រិកខាងត្បូង រួមនឹងសាកលវិទ្យា Oxford និងត្រូវបានប្រកាសនៅលើទំព័រសារព័ត៌មាន។ លទ្ធផលត្រូវបានបញ្ជូនទៅកាន់ថ្នាក់លើដើម្បីធ្វើការត្រួតពិនិត្យ ហើយវានឹងត្រូវបានប្រកាសជាផ្លូវការជាលាយលក្ខណ៍អក្សរនៅពេលឆាប់ៗខាងមុខ៕

ប្រភព៖ CNN

February 8, 2021

មនុស្ស 150នាក់ទំនងជាបានបាត់បង់ជីវិត នៅក្នុងគ្រោះបាក់ទន្លេទឹកកកនៅលើជួរ Himalaya!

ទន្លេទឹកកកមួយនៅលើជួរភ្នំ Himalaya (ហិមពាន្ត) កាលពីថ្ងៃទី 7 កុម្ភៈ បានបាក់ និងបានគួចទំនប់វារីអគ្គិសនីមួយនៅភាគខាងជើងប្រទេសឥណ្ឌា បណ្ដាលឱ្យមនុស្សប្រមាណ 150 នាក់ ត្រូវបានគេជឿថា បានបាត់បង់ជីវិត។

«តួលេខផ្លូវការមិនទាន់ត្រូវបានបញ្ជាក់» ប៉ុន្តែ មនុស្សប្រហែលពី 100 ទៅ 150 នាក់ អាចបានស្លាប់ នេះបើតាម Om Prakash ដែលជាប្រធានការិយាល័យនៃរដ្ឋ Uttarakhand ជាកន្លែងដែលមានហេតុការណ៍បាក់ទឹកកកនេះ។

សាក្សីម្នាក់បានឱ្យដឹងថា គាត់បានឃើញផ្ទាល់នឹងភ្នែកនូវទិដ្ឋភាពធូលី ថ្ម និងទឹក កញ្ជ្រោលលាយចូលគ្នាដូចទៅនឹងការបាក់ដុំព្រឹលយក្ស ធ្លាក់ចុះជ្រលងភ្នំ Dhauli Ganga ដែលមានចម្ងាយពីទីក្រុង New Delhi ប្រហែល 500 គីឡូម៉ែត្រទៅទិសខាងជើង។

នគរបាល Ashok Kumar នៅក្នុងរដ្ឋ Uttarakhand បានឱ្យដឹងថា មនុស្សជាង 50 នាក់ កំពុងធ្វើការនៅក្នុងការដ្ឋានសាងសង់ទំនប់វារីអគ្គិសនី Uttarakhand ប្រហែលជាមិនមានអ្នកណាម្នាក់នៅមានជីវិតនោះទេ។ នាយករដ្ឋមន្ត្រីឥណ្ឌា Narendra Modi បានឱ្យដឹងថា លោកនិងក្រុមការងារកំពុងតាមដានហេតុការណ៍នេះយ៉ាងយកចិត្តទុកដាក់។

កងទ័ព និងក្រុមសមត្ថកិច្ចជំនាញជាច្រើនក្រុម ដែលប្រើប្រាស់ឧទ្ធម្ភាគចក្រ ត្រូវបានបញ្ជូនទៅកាន់កន្លែងកើតហេតុដើម្បីជួយសង្គ្រោះជនរងគ្រោះ។

រដ្ឋ Uttar Pradesh ដែលនៅក្បែរខាងរដ្ឋ Uttarakhand ក៏បានដាក់តំបន់នានារបស់ខ្លួនដែលស្ថិតនៅជាប់ទន្លេ ឱ្យស្ថិតក្នុងសភាពអាសន្នកម្រិតខ្ពស់។

តំបន់ Uttarakhand នៅលើជួរភ្នំ Himalaya គឺជាកន្លែងដែលងាយកើតមានគ្រោះបាក់ដី និងទឹកជំនន់ជាងគេ។ កាលពីខែមិថុនា ឆ្នាំ 2013 តំបន់នេះធ្លាប់មានគ្រោះទឹកជំនន់ដ៏ធំមួយបណ្ដាលមកពីភ្លៀងធ្លាក់ខ្លាំង នាំឱ្យមនុស្សជិត 6,000 នាក់បានបាត់បង់ជីវិត៕

ប្រភព៖ Reuters

February 8, 2021

អាមេរិកចាប់ខ្លួនអ្នកលួចឡើងយន្តហោះដឹកក្រុមមន្ត្រីជាន់ខ្ពស់

បុរសម្នាក់ត្រូវបានចាប់ខ្លួន ក្រោយពីបានលួចឡើងយន្តហោះ C-40 របស់ក្រុមហោះហើរនៅមូលដ្ឋានទ័ព Andrews ដែលតែងត្រូវបានប្រើប្រាស់ក្នុងការដឹកក្រុមមន្ត្រីជាន់ខ្ពស់របស់សហរដ្ឋអាមេរិក កាលពីថ្ងៃទី 4 កុម្ភៈ។

«បុរសនេះបានរំលោភចូលកន្លែងចតយន្តហោះ និងបានចូលទៅក្នុងយន្តហោះ C-40 មួយគ្រឿងដែលជាកម្មសិទ្ធិរបស់ក្រុមហោះហើរលេខ 89។ កងកម្លាំងសន្តិសុខនៅមូលដ្ឋានទ័ព Andrews បានចាប់ខ្លួន និងសួរនាំបុរសនេះ» ការិយាល័យនៃមូលដ្ឋានទ័ព Andrews នៅ Maryland ប្រកាសកាលពីថ្ងៃទី 5 កុម្ភៈ។

អ្នកនាំពាក្យនៃមន្ទីរបញ្ចកោណ លោក John Kerby បានឱ្យដឹងថា ក្រសួងការពារជាតិ និងទ័ពអាកាស កំពុងតែពិនិត្យហេតុការណ៍នេះយ៉ាងម៉ត់ចត់។ លោក Kerby បន្ថែមថា «មូលដ្ឋានទ័ព បានប្រគល់បុរសនេះឱ្យសមត្ថកិច្ចអនុវត្តច្បាប់ក្នុងតំបន់រួចហើយ។ មិនមានតម្រុយណាមួយបង្ហាញថា បុរសនេះជាប់ទាក់ទិននឹងក្រុមជ្រុលនិយមនោះទេ»។

ក្រុមហោះហើរលេខ 89 មានយន្តហោះ Air Force One សម្រាប់ដឹកប្រធានាធិបតី និងយន្តហោះមួយចំនួនទៀតដែលប្រើប្រាស់ដើម្បីដឹកអនុប្រធានាធិបតី និងសមាជិកគណៈរដ្ឋមន្ត្រីផងដែរ។

មន្ត្រីម្នាក់នៅក្រសួងការពារជាតិ បានបញ្ជាក់ថា យន្តហោះ C-40 ដែលបុរសនេះបានលួចចូលទៅខាងក្នុង មិនស្ថិតនៅក្នុងក្រុមយន្តហោះអមដំណើរប្រធានាធិបតីនោះទេ៕

ប្រភព៖ CNN

February 6, 2021

កម្ពុជារកឃើញ 2នាក់ទៀតដែលវិជ្ជមាននឹង Covid-19

ក្រសួងសុខាភិបាលកម្ពុជា នាព្រឹកថ្ងៃទី 6 កុម្ភៈ ឆ្នាំ 2021 នេះ បានប្រកាសថា រកឃើញអ្នកវិជ្ជមាននឹង Covid-19 ចំនួន 2 ករណីបន្ថែមទៀត នាំឱ្យតួលេខអ្នកឆ្លងសរុបកើនដល់ 472 នាក់។

ករណីឆ្លងថ្មីខាងលើនេះ កើតឡើងចំពោះ អ្នកដំណើរដែលចូលមកកម្ពុជា ក្នុងនោះមានជនជាតិខ្មែរម្នាក់ ស្នាក់នៅក្នុងទីក្រុងតាខ្មៅ និងជនជាតិឥណ្ឌូនេស៊ីម្នាក់ស្នាក់នៅក្នុងខណ្ឌចំការមន រាជធានីភ្នំពេញ។ ព័ត៌មានលម្អិត សូមបន្តអានរបាយការណ៍របស់ក្រសួងសុខាភិបាលដែលមាននៅក្នុងសេចក្ដីប្រកាសខាងក្រោម។

គិតមកដល់ព្រឹកថ្ងៃទី 6 កុម្ភៈ ឆ្នាំ 2021 នេះ កម្ពុជាបានរកឃើញអ្នកវិជ្ជមាននឹង Covid-19 សរុបចំនួន 472 នាក់ ក្នុងនោះមានអ្នកជាសះស្បើយចំនួន 453 នាក់ និងកំពុងព្យាបាលចំនួន 19 នាក់។

February 6, 2021

Category: អន្តរជាតិ