អន្តរជាតិ - La Reine Media

ភរិយាមេដឹកនាំកូរ៉េខាងជើង បង្ហាញខ្លួនលើកដំបូងក្នុងអំឡុងជាងមួយឆ្នាំមកនេះ

ភរិយារបស់លោក Kim Jong-un បង្ហាញខ្លួននៅក្នុងរូបថតដែលត្រូវបានទីភ្នាក់ងារសារព័ត៌មានកូរ៉េខាងជើងចុះផ្សាយ កាលពីពេលថ្មីៗនេះ បន្ទាប់ពីបានអវត្តមាននៅចំពោះមុខសាធារណជន អស់រយៈពេលជាងមួយឆ្នាំ។

សារព័ត៌មាន Rodong Sinmum ដែលជាស្ថាប័ននាំពាក្យផ្លូវការរបស់បក្សពលករកូរ៉េខាងជើង កាលពីម្សិលមិញ (16 កុម្ភៈ) បានចុះផ្សាយរូបថតជាច្រើនសន្លឹកបង្ហាញអំពីព្រឹត្តិការណ៍សម្ដែងសិល្បអប់អរថ្ងៃខួបកំណើតរបស់អតីតប្រធានរដ្ឋ Kim Jong-il នារដ្ឋធានីព្យុងដែលត្រូវបានប្រារព្ធលើងកាលពីថ្ងសទី 15កុម្ភៈ។ ក្នុងបណ្ដារូបថតទាំងនោះ គេឃើញលោកស្រី Ri Sol-ju អង្គុយក្បែរ និងនិយាយគ្នាជាមួយនឹងស្វាមីដែលជាមេដឹកនាំកូរ៉េខាងជើង លោក Kim Jong-un ពេលកំពុងទស្សនាការសម្ដែងសិល្ប។

លោកស្រី Ri តែងតែបង្ហាញខ្លួនជាមួយស្វាមី នៅក្នុងព្រឹត្តិការណ៍ធំៗរបស់ប្រទេសនេះ ប៉ុន្តែ មិនធ្លាប់បានបង្ហាញវត្តមាននៅចំពោះមុខសាធារណជន ចាប់តាំងពីក្រោយពិធីអំណរបុណ្យចូលឆ្នាំចន្ទគតិកាលពីខែមករា ឆ្នាំ 2020។ ប្រការនេះ ធ្វើឱ្យមានការសន្និដ្ឋានថា លោកស្រីប្រហែលជាជួបបញ្ហាសុខភាព ឬកំពុងមានផ្ទៃពោះ។

អង្គភាពស៊ើបការណ៍សម្ងាត់របស់កូរ៉េខាងត្បូង (NIS) បានឱ្យដឹងថា លោកស្រី Ri Sol-ju ទំនងជាកំពុងគេចវេះការបង្ហាញខ្លួននៅទីដែលមានមនុស្សច្រើន ដើម្បីកាន់បន្ថយហានិភ័យនៃការឆ្លងវីរុស Covid-19 ហើយលោកស្រីតែងតែប្រលែងលេងជាមួយកូន។ លោក Kim Jong-un និងភរិយា ត្រូវបានគេជឿថា មានកូនជាមួយគ្នាចំនួន 3 នាក់ ប៉ុន្តែ មិនមានព័ត៌មានច្រើនស្ដីអំពីកូនៗរបស់ពួកគេទេ។

កូរ៉េខាងជើង គិតមកដល់បច្ចុប្បន្ន មិនទាន់មានសេចក្ដីរាយការណ៍អំពីករណីឆ្លង Covid-19 ប៉ុន្តែ NIS យល់ថា ប្រទេសនេះអាចមានការផ្ទុះឆ្លង ដោយសារមានទំនាក់ទំនងពាណិជ្ជកម្មជាច្រើនជាមួយនឹងចិន មុនពេលបិទច្រកព្រំដែនកាលពីដើមឆ្នាំមុន៕

ប្រភព៖ Reuters

February 17, 2021

Covid-19 បង្ហាញសញ្ញាគួរឱ្យត្រេកអរ កាលពីសប្ដាហ៍មុន ប៉ុន្តែវីរុសក្លាយពូជថ្មី កំពុងរាតត្បាតខ្លាំង

អង្គការសុខភាពពិភពលោក (WHO) បានរាយការណ៍ថា តួលេខនៃករណីឆ្លងថ្មីនៅទូទាំងពិភពលោកក្នុងសប្ដាហ៍កន្លង បានថយចុះរហូតដល់ 16% ដែលប្រហាក់ប្រហែលនឹងកន្លះលាននាក់ ខណៈតួលេខអ្នកស្លាប់ក៏បានថយចុះនៅគ្រប់តំបន់ក្នុងពិភពលោក។

សារព័ត៌មាន CNN បានដកស្រង់របាយការណ៍របស់អង្គការសុខភាពពិភពលោក បង្ហាញថា តួលេខសរុបនៃអ្នកឆ្លង Covid-19 ក្នុងពិភពលោក បានថយចុះ 16% ក្នុងសប្ដាហ៍កន្លងដែលបញ្ចប់នៅថ្ងៃទី 14 កុម្ភៈ ធៀបនឹងមួយសប្ដាហ៍មុននោះ។

ជារួម នៅក្នុងសប្ដាហ៍កន្លងទៅ មានករណីស្លាប់ចំនួន 81,000 នាក់ និងករណីឆ្លងថ្មីចំនួន 2.7 លាននាក់ ទាបជាងប្រហែល 500,000 ករណី បើធៀបនឹងមួយសប្ដាហ៍មុននោះ ដែលបញ្ចប់នៅថ្ងៃទី 7 កុម្ភៈ។

WHO បានឱ្យដឹងថា តួលេខអ្នកឆ្លងថ្មី ថយចុះពីរខ្ទង់ នៅក្នុងតំបន់ទាំងអស់លើពិភពលោក លើកលែងតែតំបន់ មេឌីទែរ៉ាណេភាគខាងកើត ចំណែកតួលេខអ្នកស្លាប់ថ្មីក៏ថយចុះនៅគ្រប់តំបន់ក្នុងពិភពលោក។

សហរដ្ឋអាមេរិក បច្ចុប្បន្ន រកឃើញករណីឆ្លងថ្មីខ្ពស់ជាងគេបង្អស់ក្នុងពិភពលោក បន្ទាប់មកគឺប្រទេសប្រេស៊ីល បារាំង រុស្ស៊ី អង់គ្លេស និងតំបន់អៀរឡង់ខាងជើង (Northern Ireland) របស់អង់គ្លេស។

WHO ក៏បានសង្កត់ធ្ងន់ថា វីរុសក្លាយពូជថ្មីនៅប្រទេសអង់គ្លេស បច្ចុប្បន្នត្រូវបានរកឃើញនៅក្នុងប្រទេសចំនួន 94 ចំណែកវីរុសក្លាយពូជនៅប្រទេសអាហ្វ្រិកខាងត្បូង បានបង្ហាញខ្លួននៅក្នុងប្រទេសចំនួន 46 ខណៈដែលវីរុសក្លាយពូជនៅប្រេស៊ីល បានឆ្លងទៅប្រទេសចំនួន 21 ក្នុងពិភពលោក៕

ប្រភព៖ CNN

February 17, 2021

ហ្វីលីពីនរិះគន់ថា «ជំនួយផ្នែកយោធារបស់អាមេរិក ប្រៀបបានទៅនឹងខ្ទង់ប្រាក់រាយ»

រដ្ឋាភិបាលហ្វីលីពីន យល់ថា ជំនួយផ្នែកយោធាដែលប្រទេសនេះទទួលបានពីសហរដ្ឋអាមេរិក ប្រៀបស្មើនឹង «ខ្ទង់ប្រាក់រាយ» និងបានអំពាវនាវឱ្យទីក្រុងវ៉ាស៊ីងតោន បង្កើនទំហំកញ្ចប់ជំនួយហិរញ្ញវត្ថុមកឱ្យទីក្រុងម៉ានីល។

«បើសិនជាយើងមានទំនាក់ទំនងយ៉ាងស្អិតល្មួតជាមួយនឹងសម្ព័ន្ធមិត្តដែលមានអំណាចខ្លាំង ខ្ញុំគិតថា វាគួរតែអមជាមួយនឹងជំនួយហិរញ្ញវត្ថុខ្នាតធំ។ យើងទទួលបាន 3.9 ពាន់លានដុល្លារ តើនេះគឺជាខ្ទង់ប្រាក់ដ៏ធំ ឬយ៉ាងណា? វាគ្រាន់តែជាខ្ទង់ប្រាក់រាយប៉ុណ្ណោះ បើធៀបនឹងជំនួយ (របស់អាមេរិក) សម្រាប់ប្រទេសផ្សេង» លោក Harry Roque អ្នកនាំពាក្យរបស់លោកប្រធានាធិបតីហ្វីលីពីន Rodrigo Duterte ថ្លែងកាលពីថ្ងៃទី 15 កុម្ភៈ។

អ្នកនាំពាក្យខាងលើ បានដកស្រង់លទ្ធផលនៃការស្រាវជ្រាវរបស់មជ្ឈមណ្ឌល Stimson ដែលមានមូលដ្ឋាននៅសហរដ្ឋអាមេរិក បានបង្ហាញថា ប្រទេសហ្វីលីពីន ទទួលបានប្រាក់ជំនួយ 3.9 ពាន់លានដុល្លារពីសហរដ្ឋអាមេរិក សម្រាប់ការប្រយុទ្ធប្រឆាំងនឹងក្រុមភេរវកម្ម ដំណាក់កាលឆ្នាំ 2000-2017 ដែលវាតិចជាងឆ្ងាយបើធៀបនឹង 16.4 ពាន់លានដុល្លារដែលសហរដ្ឋអាមេរិកបានជួយដល់ប្រទេសប៉ាគីស្ថាន នៅក្នុងដំណាក់កាលដូចគ្នា។

ស្ថានទូតអាមេរិកប្រចាំរដ្ឋធានីម៉ានីល មិនទាន់បញ្ចេញប្រតិកម្មអ្វីទៅនឹងការលើកឡើងនេះនៅឡើយ។ កាលពីខែធ្នូ 2020 ស្ថានទូតអាមេរិកបានឱ្យដឹងថា ហ្វីលីពីន កំពុងទទួលបានជំនួយច្រើនជាងគេបង្អស់ពីសហរដ្ឋអាមេរិក នៅក្នុងតំបន់ឥណ្ឌា-ប៉ាស៊ីហ្វិក ជាមួយនឹងសព្វាវុធដែលមានតម្លៃឡើងដល់ 689 លានដុល្លារ។

លោក Harry Roque អ្នកនាំពាក្យរបស់ប្រធានាធិបតីហ្វីលីពីន Rodrigo Duterte

ប្រធានាធិបតីហ្វីលីពីន ធ្លាប់បានរអ៊ូរទាំថា រដ្ឋាភិបាលអាមេរិក មិនបានអនុវត្តទៅតាមកិច្ចសន្យាដែលបានធ្វើជាមួយកងទ័ពប្រទេសនេះ ដូចជាករណីដែលទីក្រុងម៉ានីលយល់ព្រមចំណាយប្រាក់ដើម្បីទិញកាំជ្រួចនាំផ្លូវ ពីរដ្ឋាភិបាលរបស់អតីតប្រធានាធិបតី Donald Trump ប៉ុន្តែ មិនទទួលបានចម្លើយ។ លោក Duterte កាលពីសប្ដាហ៍មុន ក៏បានស្នើឱ្យអាមេរិកសងប្រាក់មកវិញ បើសិនជាចង់រក្សា «កិច្ចព្រមព្រៀងទស្សនកិច្ចប្រដាប់អាវុធ VFA» (Philippines–United States Visiting Forces Agreement) ដែលអនុញ្ញាតឱ្យទីក្រុងវ៉ាស៊ីងតោន ដាក់ពង្រាយកងកម្លាំងប្រដាប់អាវុធនៅប្រទេសនេះ។

VFA គឺជាកិច្ចព្រមព្រៀងមួយដែលត្រូវបានហ្វីលីពីន និងសហរដ្ឋអាមេរិកបង្កើតឡើងកាលពីឆ្នាំ 1998 ដើម្បីជាមូលដ្ឋានច្បាប់ អនុញ្ញាតឱ្យមានវត្តមានកងទ័ពអាមេរិកនៅលើទឹកដីហ្វីលីពីន និងគាំទ្រដល់កិច្ចព្រមព្រៀងការពាររួម ដែលធានាថា ប្រទេសទាំងពីរនឹងជួយគាំទ្រផ្នែកយោធាដល់គ្នា នៅក្នុងករណីដែលទឹកដីរបស់ពួកគេនៅក្នុងមហាសមុទ្រប៉ាស៊ីហ្វិក ត្រូវរងការវាយប្រហារ។

ប្រធានាធិបតី Duterte កាលពីឆ្នាំទៅ ក៏ធ្លាប់បានប្រកាសរំលាយកិច្ចព្រមព្រៀង VFA ផងដែរ ក្រោយពីសមាជិកព្រឹទ្ធសភាហ្វីលីពីន Ronald “Bato” dela Rosa ត្រូវសហរដ្ឋអាមេរិកបដិសេធការផ្ដល់ទិដ្ឋាការ ព្រោះតែរងការចោទប្រកាន់ថា បានសម្លាប់មនុស្សដោយគ្មានការកាត់ទោស ក្នុងគ្រាកំពុងកាន់កាប់តំណែងជាមេបញ្ជាការប៉ូលិសជាតិហ្វីលីពីន ទាក់ទងនឹងយុទ្ធនាការប្រយុទ្ធប្រឆាំងនឹងក្រុមជួញដូរគ្រឿងញៀន។

លោក Duterte បានផ្អាកបណ្ដោះអាសន្ននូវការរំលាយកិច្ចព្រមព្រៀង VFA នៅក្នុងស្ថានការណ៍ Covid-19 កំពុងឆ្លងរាលដាល។ ប៉ុន្តែ កាលពីខែធ្នូ ឆ្នាំ 2020 លោកបានបន្តគំរាមថា នឹងបញ្ចប់កិច្ចព្រមព្រៀងនេះ បើសិនអាមេរិកមិនផ្ដល់វ៉ាក់សាំង Covid-19 យ៉ាងតិច 20 លានដូស មកឱ្យហ្វីលីពីន៕

ប្រភព៖ Reuters

February 16, 2021

Elon Musk អញ្ជើញប្រធានាធិបតី Putin ជជែកគ្នានៅលើកម្មវិធីថ្មីមួយដែលសំឡេងមិនអាចត្រូវបានរក្សាទុក ឬថតចម្លង

ការជជែកគ្នារវាងមហាសេដ្ឋីអាមេរិក Elon Musk និងកំពូលមេដឹកនាំរុស្ស៊ី លោក Vladimir Putin នឹងកើតឡើងដែរ ឬទេ?

សារព័ត៌មាន CNN បានរាយការណ៍ថា លោក Elon Musk បានបង្ហាញពីបំណងអញ្ជើញប្រធានាធិបតីរុស្ស៊ី លោក Vladimir Putin ដើម្បីនិយាយគ្នាលេងនៅលើកម្មវិធីមួយរបស់បណ្ដាញសង្គមថ្មីដែលលោក Musk ចូលចិត្ត នោះគឺ Clubhouse។

កាលពីថ្ងៃទី 7 កុម្ភៈ CEO របស់ក្រុមហ៊ុន Tesla បានរំលឹកដល់គណនីផ្លូវការរបស់វិមានក្រិមឡាំង (Kremlin) ដើម្បីសាកសួរថា តើប្រធានាធិបតីរុស្ស៊ី លោក Putin ចង់ចូលរួមក្នុងការជជែកគ្នាជាមួយលោក នៅលើកម្មវិធី Clubhouse ដែរ ឬទេ។

«តើលោកមានបំណងចូលរួមក្នុងការជជែកគ្នាជាមួយខ្ញុំ នៅលើ Clubhouse ដែរ ឬយ៉ាងណា?» លោក Musk សរសេរដូច្នេះ និងបានបង្ហោះសារមួយឃ្លាដែលត្រូវបានសរសេរជាភាសារុស្ស៊ី ដែលមានខ្លឹមសារថា៖ «ពិតជាមានកិត្តិយសខ្លាំងណាស់ បើសិនជាបានជជែកជាមួយលោក»។

ឆ្លើយតបនឹងការអញ្ជើញរបស់មហាសេដ្ឋីអាមេរិកដើមកំណើតអាហ្វ្រិកនេះ តំណាងរបស់វិមានក្រិមឡាំង និយាយថា៖ «ការអញ្ជើញ» របស់លោក Elon Musk ពិតជាគួរឱ្យចាប់អារម្មណ៍ ប៉ុន្តែពួកគេត្រូវការស្វែងយល់លម្អិតជាងនេះ។ «យើងនឹងពិនិត្យមើល មុននឹងមានការឆ្លើយតបនាពេលក្រោយ» Dmitry Peskov តំណាងរបស់លោក Putin បានប្រាប់ក្រុមអ្នកយកព័ត៌មាននៅក្នុងថ្ងៃនេះ។

ជាក់ស្ដែង ប្រធានាធិបតី Putin មិនមែនជាបុគ្គលល្បីឈ្មោះតែម្នាក់គត់ដែលលោក Musk បានអញ្ជើញឱ្យចូលរួមពិភាក្សាគ្នានោះទេ ថ្មីៗនេះ CEO របស់ Tesla និង SpaceX រូបនេះ ក៏បានបង្ហើបឱ្យដឹងថា លោក និងអ្នកចម្រៀងរ៉ែប Kanye West អតីតបេក្ខភាពប្រធានាធិបតីអាមេរិក ក៏ធ្លាប់បាននិយាយគ្នាលេងនៅលើកម្មវិធី Clubhouse នេះផងដែរ។

លោក Musk ក៏ធ្លាប់បានបង្ហោះសារមួយឃ្លានៅលើ Twitter ប្រាប់ថា៖ «ផ្អាកការប្រើប្រាស់ Twitter មួយរយៈ» ប្រការនេះធ្វើឱ្យអ្នកវិភាគយល់ថា លោកចង់ប្រាប់ថា នឹងប្ដូរទៅប្រើប្រាស់ Clubhouse ជំនួសឱ្យ Twitter វិញម្ដង។

លោក Kanye West (មហាសេដ្ឋី និងជាអ្នកចម្រៀងរ៉ែបអាមេរិក) និងភរិយា នាង Kim Kardashian

Clubhouse គឺជាកម្មវិធីប្រព័ន្ធផ្សព្វផ្សាយសង្គមដែលយោងទៅលើសំឡេង។ ក្រុមហ៊ុនគ្រប់គ្រង Clubhouse បាននិយាយថា Clubhouse គឺជា «ប្រភេទបណ្ដាញសង្គមថ្មីដែលប្រើប្រាស់សំឡេង អនុញ្ញាតឱ្យគ្រប់គ្នានៅលើពិភពលោក ជជែកគ្នាលេង អភិវឌ្ឍគំនិត ធ្វើឱ្យមិត្តភាពកាន់តែប្រសើរឡើង ហើយអ្នកលេងនឹងអាចជួបមនុស្សថ្មីគួរឱ្យចាប់អារម្មណ៍នៅជុំវិញពិភពលោក»។

ជាមូលដ្ឋាន អ្នកអាចចូលរួម និងចាកចេញពី «បន្ទប់» ជជែកគ្នានានា ដែលមានប្រធានបទខុសៗគ្នា ពោលគឺវាស្រដៀងនឹង podcast ផ្សាយផ្ទាល់ និងដោយសេរី។ អ្នកអាចគ្រាន់តែចាំស្ដាប់ ឬជ្រើសរើសចូលរួមបញ្ចេញមតិទៅក្នុងបន្ទប់ជជែកគ្នាណាមួយនោះក៏បាន។

ចំណុចពិសេសរបស់ Clubhouse នោះគឺ សំឡេងនៃការជជែកគ្នានឹងមិនអាចយកចេញពីកម្មវិធីនេះឡើយ។ នេះគឺជាគោលការណ៍ចម្បង៖ មិនអាចថតសំឡេងនៃការជជែកគ្នា ហើយវានឹងមិនអាចត្រូវបានរក្សាទុក៕

ប្រភព៖ CNN

February 16, 2021

ពលរដ្ឋអូទ្រីស ទទួលបានឧបករណ៍ធ្វើតេស្តវីរុស ដោយមិនគិតថ្លៃ ទុកសម្រាប់ស្វែងរក Covid-19 នៅឯផ្ទះ

ការផ្ដល់ជូនដោយមិនគិតថ្លៃនូវឧបករណ៍ធ្វើតេស្តរកវីរុស Covid-19 នេះ នឹងជួយឱ្យពលរដ្ឋមានភាពងាយស្រួលក្នុងការធ្វើតេស្តដោយខ្លួនឯង និងមិនបាច់ព្រួយចិត្តក្នុងការធ្វើដំណើរទៅកាន់មណ្ឌលសុខភាព ក៏ដូចជាការបារម្ភអំពីហានិភ័យនៃការឆ្លងវីរុសនៅក្នុងសហគមន៍ ពិសេសគឺចំពោះមនុស្សវ័យចំណាស់។

រដ្ឋាភិបាលប្រទេសអូទ្រីស បានឱ្យដឹងថា ការចែកជូនឧបករណ៍ធ្វើតេស្តនេះនឹងចាប់ផ្ដើមពីខែមីនាខាងមុខ ពោលគឺចាប់ពីថ្ងៃទី 1 ខែមីនា ពលរដ្ឋគ្រប់រូបនៅប្រទេសនេះនឹងទទួលបានឧបករណ៍ធ្វើតេស្ត PCR ចំនួន 5 ឈុត ឬអង់ទីក័រ ជារៀងរាល់ខែ ដើម្បីទុកសម្រាប់ធ្វើតេស្តរកវីរុស Covid-19 ដោយខ្លួនឯង។

បច្ចុប្បន្ន កម្មវិធីខាងលើនេះ ទើបតែចាប់ផ្ដើមអនុវត្តចំពោះតែមនុស្សពេញវ័យប៉ុណ្ណោះ ប៉ុន្តែ រដ្ឋាភិបាលក៏កំពុងតែពិចារណាអំពីលទ្ធភាពផ្ដល់ជូនដល់ក្រុមគោលដៅជាកុមារផងដែរ។

រដ្ឋមន្ត្រីក្រសួងសុខាភិបាលនៃប្រទេសអូទ្រីស លោក Rudolf Anschober បាមឱ្យដឹងថា ការធ្វើតេស្តគឺជាវិធានការសំខាន់បំផុតដើម្បីទប់ស្កាត់ការឆ្លងរបស់វីរុស។

ក្នុងសប្ដាហ៍កន្លងទៅ ការធ្វើតេស្ត PCR ចំនួនជាង 3 លានដង និងការផ្ដល់ជូនអង់ទីក័រប្រមាណ 520,000 លើក ត្រូវបានធ្វើឡើងនៅប្រទេសអូទ្រីស។ ក្រៅពីពន្លឿនការធ្វើតេស្តរកវីរុស Covid-19 ប្រទេសអូទ្រីសក៏កំពុងតែផ្ដោតការយកចិត្តទុកដាក់ខ្ពស់ទៅលើយុទ្ធនាការចាក់វ៉ាក់សាំងការពារផងដែរ។ បច្ចុប្បន្ន ពលរដ្ឋនៃប្រទេសនេះប្រមាណជា 387,000 នាក់ ត្រូវបានចាក់វ៉ាក់សាំង ក្នុងនោះមានប្រមាណជា 150,000 នាក់ បានចាក់វ៉ាក់សាំងលើកទីពីរ៕

February 16, 2021

លោកស្រី Aung San Suu Kyi បង្ហាញខ្លួននៅតុលាការ

ទីប្រឹក្សារដ្ឋមីយ៉ានម៉ា លោកស្រី Aung San Suu Kyi បង្ហាញខ្លួននៅចំពោះមុខតុលាការតាមអនឡាញ ទាក់ទងនឹងការចោទប្រកាន់ពីសំណាក់កងទ័ព ប្រឆាំងនឹងលោកស្រី។

Khin Maung Zaw ដែលជាមេធាវីរបស់លោកស្រី Suu Kyi បានឱ្យដឹងថា លោកស្រី Suu Kyi និងប្រធានាធិបតី Win Myint នឹងត្រូវឡើងតុលាការនាថ្ងៃទី 16 កុម្ភៈ និង 17 កុម្ភៈ ឆ្នាំ 2021 ក្រោយពីត្រូវបានចាប់ខ្លួនដោយកងទ័ព នៅក្នុងរដ្ឋប្រហារយោធាកាលពីដើមខែ។ លោក Khin Maung Zaw ក្រោយពីមានកិច្ចប្រជុំជាមួយចៅក្រម បានថ្លែងនៅខាងក្រៅតុលាការ នារដ្ឋធានី ណៃពីដោ ថា «ការបង្ហាញខ្លួននៅចំពោះមុខតុលាការនេះនឹងធ្វើឡើងក្រោមរូបភាពវីដេអូអនឡាញ»។

កងទ័ពមីយ៉ានម៉ា កាលពីថ្ងៃទី 1 កុម្ភៈ បានចាប់ខ្លួនលោកស្រី Suu Kyi រួមនឹងមន្ត្រីជាន់ខ្ពស់ជាច្រើនរូបរបស់រដ្ឋាភិបាលស៊ីវិល ដោយត្រូវបានចោទប្រកាន់ថា មានអំពើលួចបន្លំសន្លឹកឆ្នោត នៅក្នុងការបោះឆ្នោតជាតិកាលពីខែវិច្ឆិកា ឆ្នាំ 2020។ ពីរថ្ងៃបន្ទាប់មក លោកស្រី Suu Kyi ក៏ត្រូវបានចោទប្រកាន់ពីបទនាំចូលខុសច្បាប់ នៅពេលក្រុមប៉ូលិសបានរកឃើញវិទ្យុទាក់ទងចំនួន 6 គ្រឿង ដែលត្រូវបាននាំចូល និងប្រើប្រាស់នៅក្នុងគេហដ្ឋានរបស់លោកស្រី នារដ្ឋធានី ណៃពីដោ។

ចំណែកប្រធានាធិបតី Win Myint ដែលត្រូវបានចាប់ខ្លួនជាមួយលោកស្រី Suu Kyi កាលពីថ្ងៃទី 1 កុម្ភៈ ក៏ត្រូវបានចោទប្រកាន់ពីបទរំលោភបទបញ្ជាហាមការជួបជុំក្នុងការទប់ស្កាត់ Covid-19 នៅពេលលោកបានចូលរួមព្រឹត្តិការណ៍ឃោសនារកសំឡេងឆ្នោតដែលមានមនុស្សរាប់រយនាក់បានចូលរួមកាលពីខែកញ្ញា ឆ្នាំ 2020។

មេដឹកនាំបក្សកាន់អំណាចស្របច្បាប់ទាំងពីររូបខាងលើ មិនបានបង្ហាញខ្លួនជាសាធារណៈចាប់តាំងពីក្រោយរដ្ឋប្រហារ ប៉ុន្តែ បក្សសម្ព័ន្ធជាតិដើម្បីប្រជាធិបតេយ្យ (NLD) ត្រូវបានប្រកាសឱ្យដឹងថា លោកស្រី Suu Kyi នៅមានសុខភាពល្អនៅឡើយ។ មេធាវី Khin Maung Zaw ឱ្យដឹងថា ការឃុំខ្លួនមេដឹកនាំខាងលើនឹងត្រូវបញ្ចប់នៅថ្ងៃទី 17 កុម្ភៈខាងមុខ។ ប៉ុន្តែ មកដល់ថ្ងៃទី 16 កុម្ភៈ លោក Zaw មិនទាន់បានជួបកូនក្ដីរបស់លោកនៅឡើយ។

ចាប់ពីរដ្ឋប្រហារកាលពីថ្ងៃទី 1 កុម្ភៈ មនុស្សប្រមាណ 400 នាក់ ត្រូវបានចាប់ខ្លួន ខណៈបាតុកម្មនៅមីយ៉ានម៉ា បានឈានចូលដល់ថ្ងៃទី 11។ កងទ័ពមីយ៉ានម៉ា បានដាក់ពង្រាយរថពាសដែកជាច្រើនគ្រឿងនៅតាមទីក្រុងធំៗ ដើម្បីទប់ទល់នឹងក្រុមបាតុករ ព្រមទាំងបានកាត់ផ្ដាច់សេវាអ៊ីនធើណិតផងដែរ៕

ប្រភព៖ AFP

February 16, 2021

ភ្នំភ្លើង Hawaii «ពាក់មួកព្រឹល» ពេលមើលពីលើមេឃ

រូបភាពយ៉ាងច្បាស់ដែលត្រូវបានថតដោយផ្កាយរណបកាលពីថ្ងៃទី 6 កុម្ភៈ បង្ហាញឱ្យឃើញនូវទិដ្ឋភាពព្រឹលសក្បុសកំពុងគ្របដណ្ដប់លើកំពូលភ្នំភ្លើងចំនួនពីរនៅលើកោះធំជាងគេរបស់ Hawaii នៃសហរដ្ឋអាមេរិក។

រូបភាពដែលថតដោយកាមេរ៉ា Operational Land Imager (OLI) នៅលើផ្កាយរណប Landsat-8 បានបង្ហាញយ៉ាងច្បាស់នូវទិដ្ឋភាពព្រឹលលើកំពូលភ្នំ Mauna Kea និង Mauna Loa និងមានទិដ្ឋភាពថ្មភ្នំភ្លើងព័ទ្ធជុំវិញ។ OLI គឺជាគម្រោងសហការរវាងទីភ្នាក់ងារអវកាសអាមេរិក NASA និងនាយកដ្ឋានស្រាវជ្រាវដីធ្លីអាមេរិក។ រូបថតនេះត្រូវបានចែករំលែកដោយស្ថានីយសង្កេតផែនដីរបស់ NASA។

ព្រឹលត្រូវបានគេសម្គាល់ឃើញថា មិនសូវកើតមាននៅតំបន់ត្រូពិកដូចជា Hawaii នេះទេ ប៉ុន្តែ ជាក់ស្ដែង ព្រឹលបានធ្លាក់នៅទីនេះយ៉ាងក្រាស់។ កំពូលភ្នំភ្លើង Mauna Kea កំពុងតែអសកម្ម ខណៈដែលកំពូលភ្នំភ្លើង Mauna Loa កំពុងធ្វើសកម្មភាពខ្លាំងក្លា និងទៀងទាត់នៅលើកម្ពស់ជាង 4,200 ម៉ែត្រ ធៀបនឹងផ្ទៃទឹកសមុទ្រ។ ភ្នំ Mauna Kea ខ្ពស់ជាង 38 ម៉ែត្រ ធៀបនឹង Mauna Loa និងតែងតែត្រូវគ្របដណ្ដប់ដោយព្រឹលស្ដើងៗយ៉ាងតិចមួយដងក្នុងមួយឆ្នាំ។

ឆ្នាំនេះ ដោយសារតែមានព្យុះខ្លាំង ទើបកំពូលភ្នំទាំងនេះមានព្រឹលដល់ទៅ 3 ដងក្នុងរយៈពេល 3 សប្ដាហ៍កន្លងទៅនេះ ដោយចាប់ផ្ដើមពីថ្ងៃទី 18 មករា។ ដោយឡែក ភ្នំភ្លើងអសកម្ម Haleakala ដែលមានកម្ពស់ 3,000 ម៉ែត្រ និងស្ថិតនៅលើកោះ Maui ក៏មានព្រឹលធ្លាក់យ៉ាងក្រាស់កាលពីថ្ងៃទី 3 ខែកុម្ភៈផងដែរ។

ព្រឹលធ្លាក់នៅលើកោះ Hawaii ក៏មានន័យថា រដ្ឋទាំងអស់របស់សហរដ្ឋអាមេរិក លើកលែងតែ Florida សុទ្ធតែមានព្រឹលធ្លាក់នៅក្នុងរដូវរងាឆ្នាំ 2021 នេះបើតាមគេហទំព័រ Weather Channel។ មូលហេតុនៃបាតុភូតនេះគឺដោយសារការប្ដូរទិសរបស់ខ្យល់ដែលកើតឡើងដោយសារព្យុះ Kona។

ការស្រាវជ្រាវកាលពីឆ្នាំ 2017 របស់មជ្ឈមណ្ឌលស្រាវជ្រាវប៉ាស៊ីហ្វិកអន្តរជាតិ (IPRC) នៃសាកលវិទ្យាល័យ Hawaii នៅ Manoa តាមរយៈទិន្នន័យពីផ្កាយរណប និងគំរូនៅលើកុំព្យូទ័រ បានព្យាករថា ព្រឹលធ្លាក់នៅលើភ្នំភ្លើងនឹងត្រូវថយចុះបន្តិចម្ដងៗនៅចុងសតវត្សរ៍ទី 21 ដោយសារតែការឡើងកម្ដៅផែនដី ក្រោមឥទ្ធិពលនៃការប្រែប្រួលអាកាសធាតុ៕

ប្រភព៖ Live Science

February 15, 2021

Covid-19! កូរ៉េខាងត្បូង បន្ធូរបន្ថយការរឹតត្បិតលើការដើរហើរ

ប្រទេសកូរ៉េខាងត្បូង នាថ្ងៃនេះបានចាប់ផ្ដើមបន្ធូរបន្ថយលើការកំណត់មួយចំនួនដោយសារ Covid-19 នៅក្នុងវិស័យពាណិជ្ជកម្ម ប៉ុន្តែ នៅតែរឹតបន្តឹងលើការជួបជុំលក្ខណឯកជន។

ឥរិយាបថបែបនេះរបស់រដ្ឋាភិបាលកូរ៉េខាងត្បូង ត្រូវបានធ្វើឡើងបន្ទាប់ពីនាយកដ្ឋានគ្រប់គ្រងនិងទប់ស្កាត់រោគឆ្លង (KDCA) បានរាយការណ៍ថា តួលេខអ្នកឆ្លងថ្មីបានថយចុះពី 400 ករណីមុនចូលឆ្នាំចិន មកនៅត្រឹម 344 ករណី គិតត្រឹមពាក់កណ្ដាលយប់នៃថ្ងៃទី 14 កុម្ភៈ។

យ៉ាងនេះក្ដី រដ្ឋមន្ត្រីក្រសួងសុខាភិបាល លោក Kwon Deok-cheol បានព្រមានឱ្យមានការប្រុងប្រយ័ត្នខ្ពស់ ខណៈដែលសម្បុកវីរុសនៅរដ្ឋធានីសេអ៊ូល និងតំបន់ក្បែរខាងមិនទាន់ត្រូវបានគ្រប់គ្រង។

គោលនយោបាយបន្ធូរបន្ថយខាងលើនេះ ត្រូវធ្វើឡើងនៅ Sudogwon ដែលមានតំបន់ក្រុងចំនួនពីរ រួមមាន សេអ៊ូល និង Incheon រួមនឹងបណ្ដាទីក្រុងរណបមួយចំនួនទៀត នឹងមានសុពលភាពចាប់ពីថ្ងៃទី 15 នេះតទៅ។ ម៉ោងដែលត្រូវបានដាក់ឱ្យស្ថិតក្នុងបំរាមគោចរសម្រាប់ភោជនីយដ្ឋាន និងហាងកាហ្វេ ត្រូវបានប្ដូរពីម៉ោង 21យប់ ទៅម៉ោង 22យប់។ បារ និងក្លឹបរាត្រីក៏ត្រូវបានអនុញ្ញាតឱ្យដំណើរការឡើងវិញ ប៉ុន្តែត្រូវគោរពទៅតាមម៉ោងដែលត្រូវហាមឃាត់ គឺម៉ោង 10 យប់ ចំណែកចំនួនភ្ញៀវក៏ត្រូវបានកំណត់។ បំរាមគោចរត្រូវបានលើកលែងចំពោះរោងកុន ហាងអ៊ីនធើណិត មជ្ឈមណ្ឌលបង្រៀនលើការត្រៀមប្រលង ឧទ្យានកំសាន្ត ផ្សារទំនើបធំៗ និងហាងធ្វើសក់។

នៅខាងក្រៅ Sudogwon អាជីវកម្មទាំងឡាយមិនត្រូវបានបង្ខំឱ្យធ្វើតាមបំរាមគោចរនោះទេ។ ចំនួនអ្នកមកកាន់វិហារ និងអ្នកចូលរួមព្រឹត្តិការណ៍កីឡានៅតែត្រូវបានរឹតបន្តឹង ប៉ុន្តែ ការកំណត់ត្រូវបានបន្ធូរបន្ថយ។ ចំណែកការហាមមិនឱ្យជួបជុំក្នុងផ្ទះលើសពី 4 នាក់ នៅតែត្រូវបានអនុវត្តនៅទូទាំងប្រទេសដដែល។

គិតមកដល់បច្ចុប្បន្ន កូរ៉េខាងត្បូងបានរកឃើញអ្នកវិជ្ជមាននឹង Covid-19 សរុបចំនួន 83,869 នាក់ ក្នុងនោះមានអ្នកស្លាប់ចំនួន 1,527 នាក់ និងអ្នកជាសះស្បើយមានចំនួនជាង 73,000 នាក់ ខណៈអ្នកកំពុងវិជ្ជមាន មានចំនួន 8,548នាក់៕

ប្រភព៖ Reuters

February 15, 2021

យានរុករករបស់ចិន ប្រទះឃើញបង្គោលថ្មចម្លែកនៅលើឋានព្រះចន្ទ

យានរុករករបស់ចិន ឈ្មោះ Yutu-2 ឬ Jade Rabbit បានដំណើរការជាថ្មី និងថតបានបង្គោលថ្មចម្លែកមួយនៅផ្នែកងងឹតនៃឋានព្រះចន្ត។

យានចុះចត Chang’e 4 និងរ៉ូបូតរុករក Yutu-2 បាន «ភ្ញាក់ដឹងខ្លួន» ឡើងវិញ នៅថ្ងៃទី 6 កុម្ភៈ ក្រោយពីបាន «ដេកលក់» នៅក្នុងរដូវត្រជាក់ និងបានបញ្ជូនរូបភាពថ្មីៗមកកាន់ផែនដី ក្នុងនោះគេឃើញមានរូបថតមួយសន្លឹកដែលបង្ហាញអំពីដុំថ្មចម្លែកមួយដែលមានរាងស្រដៀងនឹងបង្គោលមួយត្រូវបានបោះនៅផ្នែកងងឹតរបស់ព្រះចន្ទ។

នៅក្នុងអត្ថបទមួយដែលចេញផ្សាយដោយទំព័រ Our Space ក្រុមអ្នកវិទ្យាសាស្ត្រចិនបាននិយាយថា បង្គោលថ្មនេះគួរតែត្រូវបានពិនិត្យឱ្យមានលម្អិតជាងនេះ។

ក្រុមអ្នកគ្រប់គ្រងយាន បានរៀបចំផែនការដើម្បីបញ្ជាឱ្យយាន Yutu-2 ចូលទៅក្បែរដុំថ្មខាងលើ និងធ្វើការវិភាគដោយប្រើបច្ចេកវិទ្យា VNIS ដែលបំពាក់នៅលើយាន។ មុននេះ VNIS ត្រូវបានប្រើប្រាស់ដើម្បីពិនិត្យទៅលើសំណាកថ្ម និងថ្មកំបោរនៅតាមបណ្ដោយផ្លូវដែលរ៉ូបូតដើរកាត់តាមរណ្ដៅ Von Karman។

អ្នកស្រាវជ្រាវឋានព្រះចន្ទ Dan Moriarty មកពីមជ្ឈមណ្ឌលអវកាស Goddard របស់អង្គការ NASA ប្រចាំតំបន់ Greenbelt រដ្ឋ Maryland បាននិយាយថា «បង្គោលថ្មនេះ ដូចទៅនឹងបំណែកអ្វីមួយដែលលយចេញពីដី។ ប្រការនេះប្រាកដជាមានអ្វីមិនធម្មតា»។

អ្នកវិទ្យាសាស្ត្រខាងលើបកស្រាយថា ឥទ្ធិពលដដែលៗដែលកើតឡើងដោយសារវដ្ដនៃសីតុណ្ហភាព និងបាតុភូតរំលីងនៅលើផ្ទៃរបស់ព្រះចន្ទ តែងតែធ្វើឱ្យដុំថ្មនានាត្រូវប្រេះបែក និងរំលីងពួកវាជារាងមូល។ បង្គោលថ្មថ្មីដែលទើបត្រូវបានរកឃើញនេះ អាចជាលទ្ធផលនៃការធ្លាក់អាចម៍ផ្កាយនៅក្បែរនោះដោយមិនបានឆ្លងកាត់ដំណាក់កាលខាងលើ។

ក្រុមអ្នកវវិទ្យាសាស្ត្រសង្ឃឹមថា ទិន្នន័យដែលបានមកពី VNIS នៅក្នុងការស្រាវជ្រាវបន្ទាប់នឹងផ្ដល់ចម្លើយបានលម្អិតជាងបច្ចុប្បន្ន ដែលអនុញ្ញាតឱ្យគេដឹងបានថា បង្គោលថ្មនោះ ធ្លាក់ពីទីអវកាស ឬយ៉ាងណា៕

ប្រភព៖ Space

February 15, 2021

រាសីពិភពលោកក្នុងឆ្នាំឆ្លូវ ហោរាល្បីល្បាញហុងកុង ទាយថា លោក ស៊ី ជីនភីង ហេង ខណៈលោកបៃដិន នឿយ…

សារព័ត៌មាន សៅ ឆាយណា ម៉រនីង ផូស្ត បានរាយការណ៍ ពីការទស្សន៍ទាយជោគជតារាសី របស់មេដឹកនាំពិភពលោក ដោយហោរាល្បីឈ្មោះជនជាតិហុងកុង ស្វាគមន៍ឆ្នាំឆ្លូវ ដែលទើបតែចាប់ផ្ដើមឡើង តាមឆ្នាំតារានិកររបស់ចិន ដែលក្នុងរង្វង់ជុំនីមួយៗ នឹងកើតឡើង ៥ដង ក្នុងជុំ ៦០ឆ្នាំ និងក្នុងជុំនីមួយៗ នឹងចេញមកព្រមជាមួយធាតុផ្សេងៗ ដូចជា ឈើ ភ្លើង ដី មាស(លោហៈ) និងទឹក។

សត្វប្រចាំឆ្នាំតារានិករ នឹងមានលក្ខណៈពិសេសដោយឡែក ដែលហុចផលទៅដល់អ្នកដែលកើតឆ្នាំនោះ រួមទាំងអ្នកដែលមិនបានកើតក្នុងឆ្នាំតារានិករនោះផងដែរ។

សម្រាប់ឆ្នាំឆ្លូវ ក្នុងឆ្នាំនេះ មានភាពលេចធ្លោក្នុងរឿងភាពឧស្សាហ៍ព្យាយាម ស្មោះត្រង់ និងកម្លាំងថាមពល។

ចាប់ផ្ដើមពីមេដឹកនាំរបស់ទីក្រុងហុងកុង…ឆ្នាំនេះ នឹងក្លាយជាឆ្នាំដែលល្អមួយ របស់លោកស្រី ឃែរី ឡាំ អ្នកគ្រប់គ្រងតំបន់សេដ្ឋកិច្ចពិសេសហុងកុង បើទោះជាកូវីដ-១៩ រាតត្បាតខ្លាំងក្លា និងវិបត្តិសេដ្ឋកិច្ចវាយលុកខ្លាំងក៏ដោយ។

អ្នកស្រី ឆយ អ៊ីង វ៉ា សាស្ត្រាចារ្យផ្នែកហោរាសាស្ត្រហុងកុង បានទស្សន៍ទាយថា នឹងមានរឿងរ៉ាវល្អៗ កើតឡើងចំពោះលោកស្រីឡាំ ដែលកើតក្នុងឆ្នាំ១៩៥៧ ត្រូវនឹងឆ្នាំរកា (មាន់) ព្រោះមាន់ ជាសត្វដែលអាចទៅជាមួយគ្នា បានល្អជាមួយគោ(ឆ្លូវ) ដែលជារួមទៅ ឆ្នាំឆ្លូវ នឹងល្អចំពោះអ្នកដែលកើតឆ្នាំរកា។

លោកស្រីឡាំ នឹងមានសំណាង និងចេះរៀបយុទ្ធសាស្ត្របានល្អប្រសើរនាពេលអនាគត ដោយការតាំងប្រណិធានដែលមុតមាំនឹងនរ នឹងហុចផលឱ្យលោកស្រីឡាំ ឆ្លងកាត់ឧបសគ្គ និងការសាកល្បងផ្សេងៗទៅបាន ទោះជាមានបន្ទុកធំ ឱ្យចាត់ការក្ដី តែក៏នឹងកែខៃ ដោះស្រាយបានដោយការសម្រេចចិត្តដ៏ត្រឹមត្រូវបានដែរ។

ចំណែកលោក រេយ៍ម៉ុន ឡូ បរមគ្រូហុងស៊ុយ វិញ បានព្យាករថា លោកស្រីឡាំ នឹងមានឱកាសមាស ក្នុងឋានៈជាមន្ត្រីរបស់រដ្ឋ រហូតដល់ឆ្នាំខាងមុខ តែមិនបានទស្សន៍ទាយថា តើលោកស្រីឡាំ នឹងបានគ្រងតំណែង ជាអ្នកគ្រប់គ្រងតំបន់សេដ្ឋកិច្ចពិសេសហុងកុង ១អាណត្តិទៀតដែរឬទេ? ឬលោកស្រីឡាំ នឹងឈ្នះការបោះឆ្នោតជ្រើសតាំងក្នុងឆ្នាំក្រោយ ឬយ៉ាងណានោះទេ?

អ្នកស្រី ឆយ អ៊ីង វ៉ា-លោក រេយ៍ម៉ុន ឡូ-អ្នកស្រី យុន វឹន ស៊ី

អូឡាំពិក ឫក្សមិនល្អ ឯតៃវ៉ាន់ គួរឱ្យបារម្ភ

ចំណែកអ្នកស្រី យុន វឹន ស៊ី អ្នកជំនាញការខាងសាស្ត្រា ឈី មឹន ទុន ចៀ អាស្រ័យលើការតាមសង្កេតមើលសកម្មភាពខាងកម្លាំងថាមពល បានដាស់តឿនថា សម្ព័ន្ធភាពរវាងចិន-ជប៉ុន នឹងតានតឹង ក្នុងអំឡុងពាក់កណ្ដាលចុងក្រោយនៃឆ្នាំនេះ ពាក់ព័ន្ធនឹងបណ្ដុំកោះតៀវយូ ឬដែលជប៉ុនដាក់ឈ្មោះថា សេនសាគុ។

ឯអ្នកស្រី ឆយ អ៊ីង វ៉ា បានទស្សន៍ទាយបន្ថែម អំពីឧបសគ្គរបស់ប្រទេសជប៉ុនថា អូឡាំពិកហ្គេមស៍ ដែលទីក្រុងតូក្យូនឹងធ្វើជាម្ចាស់ផ្ទះ និងបានពន្យារពេលមករៀបចំក្នុងពាក់កណ្ដាលឆ្នាំនេះ ពីថ្ងៃទី១០ កក្កដា ដល់ថ្ងៃទី៧ សីហានោះ ត្រូវចំនឹងអំឡុងចង្វាក់ឫក្សមិនល្អរបស់ឆ្នាំឆ្លូវ ហើយបើនៅតែអះអាងថា នឹងរៀបចំក្នុងអំឡុងពេលនេះតទៅទៀត ត្រូវតែប្រយ័ត្នប្រយែងបំផុត ទើបជាការប្រសើរ។

ចំណែកសម្ព័ន្ធភាពរបស់ចិននឹងសហរដ្ឋអាមេរិក នឹងនៅតែស្ពឹកស្រពន់ដដែល ទោះជាការងើបឡើងរបស់ប្រទេសចិន នឹងមិនអាចថយត្រឡប់ទៅវិញដោយងាយៗក៏ដោយ តែអ្វីដែលត្រូវវិតក្កកង្វល់នោះ គឺតៃវ៉ាន់។

លោកគ្រូហុងស៊ុយ រេយ៍ម៉ុន ឡូ បានដាស់តឿនថា មានថាមពលអវិជ្ជមាន ស្ថិតនៅឯជើងមេឃ…តៃវ៉ាន់នឹងកើតបញ្ហាស្មុគស្មាញ និងមិនមែនជាឆ្នាំដែលល្អសម្រាប់លោកស្រីប្រធាធិបតី ឆៃ អ៊ឹងវឹន ឡើយ តែក៏មិនដល់ថ្នាក់ ប្រើប្រាស់កម្លាំងយោធាដែរ។

ខុសគ្នានឹងលោក ស៊ី ជីនភីង អ្នកកើតឆ្នាំរោង ក្រោយពីទើបបានជួបនឹងការប៉ះទង្គិច ក្នុងឆ្នាំជូតកន្លងមកថ្មីៗ ឆ្នាំឆ្លូវនេះ ការប៉ះទង្គិចនឹងស្រាកស្រាន្ត។ ប្រទេសចិន នឹងមានស្ថិរភាព និងភាពមានបានខាងសេដ្ឋកិច្ច និងស្ថានភាពលើវេទិកាពិភពលោក។

ចំណែកលោកប្រធានាធិបតី ចូ បៃដិន ដែលកើតឆ្នាំមមែ វិញ នឹងបានជួបនឹងឆ្នាំដែលធ្ងន់ធ្ងរដុនដាបខ្លាំងក្លា ទម្រាំនឹងបានធូរស្រាល ក៏ត្រូវរង់ចាំរហូតដល់ឆ្នាំខាល ក្នុងឆ្នាំ២០២២ ឯណោះ៕

ប្រភព៖ សារព័ត៌មានបរទេស
ប្រែ និងសម្រួលដោយ ទិទីតំតាតូ

February 15, 2021

Category: អន្តរជាតិ