អន្តរជាតិ - La Reine Media

ស្ថានភាព Covid-19 នៅ ASEAN គិតត្រឹមថ្ងៃទី 10មីនា 2021

យោងតាមទំព័រ Worldometers គិតមកដល់ម៉ោង 23៖59 នាទីនៃថ្ងៃទី 10 មីនា បណ្ដាប្រទេសស្ថិតក្នុងសមាគមប្រជាជាតិអាស៊ីអាគ្នេយ៍ (ASEAN) បានរកឃើញអ្នកវិជ្ជមាននឹង Covid-19 ថ្មីសរុបចំនួន 10,059 ករណី។

ក្នុងអំឡុង 24 ម៉ោងកន្លងទៅ ASEAN មាន 3 ប្រទេសដែលមានអ្នកស្លាប់ដោយសារវីរុស Covid-19 នោះគឺ ហ្វីលីពីន, ឥណ្ឌូនេស៊ី និងម៉ាឡេស៊ី ខណៈដែលប្រទេសចំនួន 9 របស់សមាគមនេះ មានករណីឆ្លង Covid-19។ ដោយឡែកប្រទេស ប្រ៊ុយណេ, មីយ៉ានម៉ា (មិនបញ្ចេញរបាយការណ៍) និងឡាវ មិនមានករណីឆ្លង ឬស្លាប់នោះទេ។

ឥណ្ឌូនេស៊ីនៅតែជាសម្បុកវីរុស Covid-19 ធំជាងគេនៅ ASEAN ប៉ុន្តែ ស្ថានភាពកំពុងតែប្រសើរឡើងជាងមុននៅពេលតួលេខអ្នកវិជ្ជមានថ្មីបានថយចុះបន្តិចបើធៀបនឹងប៉ុន្មានថ្ងៃមុននេះ។ យ៉ាងណាក្ដី ក្នុងអំឡុង 24 ម៉ោងនៃថ្ងៃទី 10 មីនា ប្រទេសនេះនៅតែជាទឹកដីដែលមានអ្នកវិជ្ជមានថ្មី និងករណីស្លាប់ថ្មីដោយសារ Covid-19 ខ្ពស់ជាងគេបង្អស់នៅក្នុងទ្វីបអាស៊ី។

ជារួម Covid-19 គិតមកដល់បច្ចុប្បន្ន បានសម្លាប់មនុស្សចំនួន 55,020 នាក់ នៅតំបន់អាស៊ីអាគ្នេយ៍ ពោលគឺកើន 197 ករណី បើធៀបនឹងមុននោះមួយថ្ងៃ ខណៈដែលតួលេខអ្នកវិជ្ជមានសរុប ឡើងដល់ជាង 2,552,300 នាក់។ ទន្ទឹមនឹងនេះ តំបន់នេះក៏មានអ្នកជាសះស្បើយចំនួនជាង 2,281,670 នាក់ផងដែរ៕

តួលេខស្ដីអំពី Covid-19 នៅតំបន់ ASEAN គិតត្រឹមថ្ងៃទី 10មីនា 2021៖

ប្រភព៖ Xinhua, Worldometers
ប្រែសម្រួល៖ បុត្រា

March 11, 2021

Meghan Markle ភរិយារបស់អតីតព្រះអង្គម្ចាស់អង់គ្លេស បានធ្វើឱ្យពិភពលោកនាំគ្នាពិចារណាអំពីបញ្ហាពលរដ្ឋត្រូវបង់ពន្ធដើម្បីចិញ្ចឹមរាជវង្ស

ជាមួយនឹងប្រជាជនសរុបចំនួន 66.8 លាននាក់ ជាមធ្យម ពលរដ្ឋអង់គ្លេសម្នាក់ត្រូវបង់ពន្ធចំនួន 1.28 ផោន ដើម្បីចិញ្ចឹមមហាក្សត្រី និងរាជវង្សានុវង្សនៃចក្រភពអង់គ្លេស។

កិច្ចសម្ភាសរបស់អតីតព្រះនាង Meghan Markle ដែលជាភរិយារបស់អតីតព្រះអង្គម្ចាស់ Harry (Henry Charles Albert David) នៃរាជវង្សអង់គ្លេស បានវាយប្រហារចំៗទៅលើរាជវាំង បើទោះជាប្រជាជនប្រទេសនេះ មានទម្លាប់គោរពរាជវង្សានុវង្ស។

ក្រោយពីកិច្ចសម្ភាសខាងលើ ក្រុមហ៊ុន YouGov ក៏បានធ្វើការស្ទង់មតិមួយ ហើយលទ្ធផលបានបង្ហាញថា ពលរដ្ឋប្រមាណ 40% មានការអាណិតដល់រាជវង្ស និងមហាក្សត្រីអង់គ្លេស Elizabeth II (Elizabeth Alexandra Mary Windsor) ដោយចាត់ទុកថា ត្រូវបានគេ «លាបពណ៌» នៅលើកញ្ចក់ទូរទស្សន៍ ខណៈដែល 24% សំដែងការអាសូរចំពោះគ្រួសារ Meghan ព្រោះតែបញ្ហាដែលពួកគេបានឆ្លងកាត់។ ចំណែក មតិចំនួន 24% ទៀត មិនចូលចិត្តភាគីខាងណាទាំងអស់។

តាមការពិត ពលរដ្ឋអង់គ្លេសបានជជែកគ្នាជាច្រើនអំពីខ្ទង់ថវិកាជាតិដែលត្រូវបានចំណាយទៅលើរាជវង្ស។ បើទោះជាកិត្តិនាមដ៏ល្បីល្បាញរបស់មហាក្សត្រី និងរាជវង្សានុវង្សអង់គ្លេស ទាក់ទាញបានភ្ញៀវទេសចរណ៍យ៉ាងច្រើនក៏ដោយ ប៉ុន្តែ សមាជិករាជវង្សក៏ត្រូវការខ្ទង់ប្រាក់ជំនួយសម្រាប់ជីវភាពលំដាប់ថ្លៃថ្នូរផងដែរ។

កិច្ចសម្ភាសខាងលើ មានអ្នកតាមដានរាប់សិបលាននាក់

យោងតាមច្បាប់ រាជវង្សអង់គ្លេស មានសិទ្ធិកាន់កាប់ទ្រព្យសម្បត្តិរបស់រាជវាំង ឬហៅថា «Crown Estate» រួមមានដីធ្លី រាជវាំង ឬកសិដ្ឋាន។ វិមាន Buckingham, Windsor ជាដើម សុទ្ធតែជាកម្មសិទ្ធិរបស់រាជវាំង និងទាក់ទាញភ្ញៀវទេសចរណ៍មកទស្សនាយ៉ាងច្រើនជារៀងរាល់ឆ្នាំ។ ក្រៅពីនេះ ថវិកាជាតិក៏ត្រូវបានទុកមួយខ្ទង់សម្រាប់ជាជំនួយដល់រាជវង្ស ដែលនេះត្រូវបានគេហៅថា «Sovereign Grant»។

ខ្ទង់ថវិកាខាងលើ ត្រូវបានគេចែងយ៉ាងច្បាស់ថា ដើម្បីជួយដល់មហាក្សត្រី រួមនឹងសមាជិករាជវង្ស សម្រាប់បំពេញកិច្ចការដែលជាភារកិច្ចរបស់មេដឹកនាំកិត្តិយស មានដូចជា ការទទួលជួបមេដឹកនាំបរទេស ដំណើរទស្សនកិច្ចក្រៅប្រទេស សកម្មភាពមនុស្សធម៌។ល។

ផ្ទុយមកវិញ ប្រភពចំណូលនៃវិមាននានារបស់រាជវាំងអង់គ្លេស នឹងត្រូវប្រគល់មកឱ្យរដ្ឋ ដែលនេះប្រៀបបានដូចជាការ «ដោះដូរ» គ្នា។

កិច្ចសម្ភាសរបស់អតីតព្រះនាង Meghan Markle និងអតីតព្រះអង្គម្ចាស់ Harry ជាមួយនឹងទូរទស្សន៍ CBS កាលពីពេលថ្មីៗនេះ

របាយការណ៍ថ្មីបំផុតរបស់រដ្ឋាភិបាលបង្ហាញថា ប្រាក់ចំណូលដែលរាជវាំងរកបានក្នុងឆ្នាំសារពើពន្ធ 2018-2019 ឡើងដល់ 343.5 លានផោន (476.5 លានដុល្លារអាមេរិក)។ ចំណែកខ្ទង់ជំនួយរបស់រដ្ឋាភិបាលសម្រាប់រាជវាំងក្នុងឆ្នាំ 2020-2021 មានត្រឹមតែ 85.9 លានផោនប៉ុណ្ណោះ ពោលគឺស្មើនឹង 25% បើធៀបនឹងចំណូលដែលរាជវាំង។

ដូច្នេះ ជាមួយនឹងប្រជាជន 66.8 លាននាក់ ជាមធ្យម ពលរដ្ឋអង់គ្លេសម្នាក់នឹងត្រូវបង់ 1.28 ផោន (ប្រហែលជិត 2 ដុល្លារអាមេរិក) ដើម្បីចិញ្ចឹមរាជវង្សានុវង្សអង់គ្លេស៕

ប្រភព៖ NYT, ABC News
ប្រែសម្រួល៖ បុត្រា

March 10, 2021

ប្រធានាធិបតីអ៊ីតាលី តម្រង់ជួររង់ចាំវេនចាក់វ៉ាក់សាំង Covid-19 ដូចគេ ដូចឯង

ប្រធានាធិបតីអ៊ីតាលី លោក Sergio Mattarella មិនត្រូវបានប្រព្រឹត្តជាពិសេសពីសំណាក់ក្រុមវេជ្ជបណ្ឌិតនោះទេ នៅពេលលោកទៅទទួលការចាក់វ៉ាក់សាំងបង្ការវីរុស Covid-19 នៅឯមន្ទីរពេទ្យមួយនាទីក្រុង Rome។

រូបថតដែលត្រូវបានការិយាល័យប្រធានាធិបតីចុះផ្សាយនៅថ្ងៃទី 9 មីនា បង្ហាញថា មេដឹកនាំវ័យ 79 ឆ្នាំរូបនេះ អង្គុយនៅលើកៅអីដូចទៅនឹងមនុស្សវ័យចំណាស់ដទៃទៀត នៅក្នុងសាលធំមួយនៃមន្ទីរពេទ្យ Spallanzani ក្នុងពេលដែលក្រុមគ្រូពេទ្យកំពុងធ្វើការ។ គ្រប់គ្នាសុទ្ធតែរក្សាគម្លាតសុវត្ថិភាពទៅតាមការកំណត់។

ប្រធានាធិបតី Sergio Mattarella រង់ចាំរហូតដល់ក្រុមវ័យរបស់លោកត្រូវបានហៅឈ្មោះ និងចាក់វ៉ាក់សាំង Moderna។ ការិយាល័យប្រធានាធិបតីឱ្យដឹងថា ប្រធានាធិបតីអ៊ីតាលីត្រូវបានចាក់វ៉ាក់សាំងទៅតាម «យុទ្ធនាការចាក់ថ្នាំបង្ការសម្រាប់មនុស្សដែលកើតក្នុងឆ្នាំ 1941»។

ប្រទេសអ៊ីតាលី ចាប់ផ្ដើមចាក់វ៉ាក់សាំងបង្ការវីរុស Covid-19 តាំងពីចុងខែធ្នូ 2020 ប៉ុន្តែ ដូចទៅនឹងប្រទេសផ្សេងៗ យុទ្ធនាការនេះត្រូវបានពន្យារពេលដោយសារខ្វះប្រភពផ្គត់ផ្គង់។ នាយករដ្ឋមន្ត្រីថ្មី Mario Draghi បានសន្យារថានឹងជំរុញល្បឿននៃយុទ្ធនាការចាក់វ៉ាក់សាំង ដោយសារអត្រាឆ្លងកើនឡើងលឿនព្រោះតែវីរុសក្លាយពូជថ្មី។

គិតមកដល់បច្ចុប្បន្ន អ៊ីតាលីបានចាក់វ៉ាក់សាំងអស់ចំនួន 5.6 លានដូស ក៏ប៉ុន្តែ មានតែ 1.7 លាននាក់ប៉ុណ្ណោះដែលបានចាក់រួចរាល់ នៅក្នុងចំណោមប្រជាជនសរុបជាង 60 លាននាក់។

មកដល់បច្ចុប្បន្ន ប្រទេសនេះបានរកឃើញអ្នកវិជ្ជមាននឹង Covid-19 សរុបចំនួន 3,101,093 នាក់ ក្នុងនោះមានអ្នកស្លាប់សរុប 100,479 នាក់ និងជាសះស្បើយចំនួន 2,521,731 នាក់ ខណៈអ្នកកំពុងព្យាបាលមានចំនួន 478,883 នាក់៕

ប្រភព៖ AFP
ប្រែសម្រួល៖ បុត្រា

March 10, 2021

លិចកប៉ាល់នៅសមុទ្រទុយនេស៊ី នាំឱ្យមនុស្សយ៉ាងតិច 39នាក់បានស្លាប់

យោងតាមក្រសួងការពារជាតិទុយនេស៊ី (Tunisia) កាលពីថ្ងៃទី 9 មីនាកន្លងទៅ មានជនចំណាកស្រុកយ៉ាងហោច 39 នាក់បានបាត់បង់ជីវិតនៅក្នុងករណីលិចកប៉ាល់នៅលើលម្ហសមុទ្ររបស់ប្រទេសទុយនេស៊ី ក្នុងពេលកំពុងព្យាយាមឆ្លងកាត់សមុទ្រមេឌីទែរ៉ាណេ ដើម្បីទៅកាន់កោះ Lampedusa របស់អ៊ីតាលី។

អ្នកនាំពាក្យរបស់ក្រសួងការពារជាតិទុយនេស៊ី បានឱ្យដឹងថា ឆ្មាំការពារឆ្នេរសមុទ្រប្រទេសនេះ សង្គ្រោះជីវិតមនុស្សបាន 165 នាក់ដែលធ្វើដំណើរតាមកប៉ាល់ខាងលើ ហើយបច្ចុប្បន្នកំពុងស្វែងរកជនរងគ្រោះផ្សេងទៀតនៅលម្ហសមុទ្រនៃទីក្រុង Sfax។ ពលរដ្ឋចំណាកស្រុកដែលបានស្លាប់ខាងលើ សុទ្ធតែជាអ្នកមកពីភាគខាងត្បូងនៃសមុទ្រខ្សាច់ Sahara នៅអាហ្វ្រិក។

តំបន់ឆ្នេរសមុទ្រក្បែរកំពង់ផែនៃទីក្រុង Sfax របស់ទុយនេស៊ី កន្លងមកនេះគឺជាកន្លែងចេញដំណើររបស់ក្រុមអ្នកចំណាកស្រុកដែលភៀសខ្លួនពីសង្គ្រាម និងគ្រោះទុរភិក្សនៅតំបន់អាហ្វ្រិក និងមជ្ឈិមបូព៌ា ដើម្បីស្វែងរកជីវភាពល្អប្រសើរនៅអឺរ៉ុប។

ក្នុងឆ្នាំ 2019 ជនភៀសខ្លួនប្រមាណ 90 នាក់មកពីអាហ្វ្រិក បានបាត់បង់ជីវិតនៅពេលកប៉ាល់របស់ពួកគេបានក្រឡាប់នៅលើសមុទ្រទុយនេស៊ី ក្រោយពីបានចេញដំណើរពីប្រទេសលីប៊ី ដើម្បីទៅកាន់អឺរ៉ុប។ តួលេខជនភៀសខ្លួនពីទុយនេស៊ី ទៅកាន់ឆ្នេរសមុទ្ររបស់អ៊ីតាលី បានកើនឡើងដល់ជាង 13,000 នាក់ ក្នុងឆ្នាំ 2020៕

ប្រភព៖ Guardian
ប្រែសម្រួល៖ បុត្រា

March 10, 2021

Covid-19 នៅ ASEAN និងពិភពលោក គិតត្រឹមដំណាច់ថ្ងៃទី 9មីនា 2021

ថ្ងៃទី 9 មីនា បណ្ដាប្រទេស ASEAN បានរកឃើញអ្នកឆ្លង Covid-19 ថ្មី ជាង 10,000 នាក់ នាំឱ្យតួលេខអ្នកឆ្លងសរុបឡើងដល់ 2.54 លាននាក់។

យោងតាមស្ថិតិរបស់គេហទំព័រ worldometers.info ក្នុងអំឡុង 24 ម៉ោងនៃថ្ងៃទី 9 មីនា បណ្ដាប្រទេសក្នុងសមាគមប្រជាជាតិអាស៊ីអាគ្នេយ៍ រកឃើញអ្នកវិជ្ជមានចំនួន 10,474 នាក់ និងអ្នកស្លាប់ចំនួន 266 នាក់។ ដូច្នេះ បច្ចុប្បន្ន តំបន់នេះមានអ្នកឆ្លងវីរុស Covid-19 សរុប 2,542,205 នាក់ ក្នុងនោះមាន 54,823 នាក់បានស្លាប់ និង 2,273,580 នាក់ បានជាសះស្បើយ។

ក្នុងថ្ងៃទី 9 មីនា តំបន់អាស៊ីអាគ្នេយ៍ មានប្រទេសចំនួន 3 ដែលមានអ្នកស្លាប់ដោយសារ Covid-19 រួមមាន ឥណ្ឌូនេស៊ី (210 នាក់), ហ្វីលីពីន (7 នាក់) និងម៉ាឡេស៊ី (9 នាក់)។

ឥណ្ឌូនេស៊ី បន្តជាសម្បុកវីរុស Covid-19 គ្រោះថ្នាក់ជាងគេក្នុងតំបន់អាស៊ីនអាគ្នេយ៍ ដោយមានករណីឆ្លងថ្មីចំនួន 6,389 នាក់ នាំឱ្យតួលេខសរុបឡើងដល់ 1,392,945 នាក់ ក្នុងនោះមានអ្នកស្លាប់ចំនួន 37,757 នាក់។

ស្ថានភាព Covid-19 នៅម៉ាឡេស៊ីក៏គួរឱ្យព្រួយបារម្ភ ដោយមានករណីឆ្លងថ្មីចំនួន 1,280 នាក់ កាលពីថ្ងៃទី 9 មីនា នាំឱ្យតួលេខសរុបឡើងដល់ 316,286 នាក់ ក្នុងនោះមានអ្នកស្លាប់សរុប 1,186 នាក់។ ចំណែកហ្វីលីពីនមានអ្នកស្លាប់សរុប 12,528 នាក់ ក្នុងចំណោមអ្នកឆ្លងសរុបចំនួន 600,428 នាក់។

នៅទូទាំងពិភពលោក អ្នកវិជ្ជមាននឹង Covid-19 សរុបបានកើនឡើងដល់ 118,143,312 នាក់ ក្នុងនោះមានអ្នកស្លាប់សរុបចំនួន 2,621,012 នាក់ និងជាសះស្បើយចំនួន 93,827,318 នាក់ ខណៈអ្នកកំពុងព្យាបាលមានចំនួន 21,694,982 នាក់៕

ប្រភព៖ Worldometers
ប្រែសម្រួល៖ បុត្រា

March 10, 2021

ប៉ូលិសមីយ៉ានម៉ា ដកថយពីតំបន់ឡោមព័ទ្ធបាតុករ ក្រោយពីចាប់មនុស្សបាន 50នាក់

ក្រុមប៉ូលិសប្រទេសភូមា (មីយ៉ានម៉ា) បានដកខ្លួនចេញពីតំបន់ដែលពួកគេបានឡោមព័ទ្ធចាប់បាតុករនៅកណ្ដាលទីក្រុង Yangon ជាកន្លែងដែលបាតុកររាប់រយនាក់បានជាប់គាំងនៅពេលយប់ បន្ទាប់ពីការបង្រាម និងចាប់ខ្លួនពីសំណាក់រដ្ឋអំណាច។

ក្រុមសកម្មជនប្រជាធិបតេយ្យ ថ្ងៃនេះបានឱ្យដឹងថា បាតុករអាចចាកចេញពីតំបន់ប្រជុំជននៅក្នុងសង្កាត់ San Chaung នាទីក្រុង Yangon ក្រោយពីត្រូវបានប៉ូលិសឡោមព័ទ្ធ និងតាមចាប់ខ្លួនពេញមួយយប់។ បាតុករម្នាក់ឈ្មោះ Shar Ya Mone បាននិយាយថា នាងបានជាប់នៅក្នុងអគារមួយដែលមានមនុស្ស ប្រហែលពី 15-20 នាក់ ប៉ុន្តែពេលនេះអាចត្រលប់ទៅផ្ទះបានហើយ។

កងកម្លាំងសន្តិសុខមីយ៉ានម៉ា តាំងពីព្រលប់ថ្ងៃទី 8 មីនា បានឡោមព័ទ្ធតំបន់ប្រជុំជនខាងលើដើម្បីតាមចាប់ខ្លួនបាតុករដែលស្នើឱ្យដោះលែងលោកស្រី Aung San Suu Kyi។ ពេលយប់ចូលមកដល់ ក្រុមប៉ូលិសចាប់ផ្ដើមសម្រុកចូលគាស់ទ្វារផ្ទះពលរដ្ឋដើម្បីឆែកឆេររកបាតុករដែលពួកគេសង្ស័យថាកំពុងលាក់ខ្លួន។

សារព័ត៌មានក្នុងស្រុកបានឱ្យដឹងថា យ៉ាងហោចមានមនុស្សចំនួន 50 នាក់ ត្រូវបានចាប់ខ្លួនដោយមិនមានដីកាតុលាការ នៅក្នុងយប់ថ្ងៃទី 8 មីនា និងរំលងអធ្រាត្រចូលថ្ងៃទី 9 មីនា។

មីយ៉ានម៉ា បានធ្លាក់ចូលក្នុងភាពវឹកវរក្រោយពីកងទ័ពប្រទេសនេះបានធ្វើរដ្ឋប្រហារ និងចាប់ខ្លួនទីប្រឹក្សារដ្ឋ Aung San Suu Kyi រួមនឹងក្រុមមន្ត្រីជាន់ខ្ពស់ជាច្រើនរូបកាលពីថ្ងៃទី 1 កុម្ភៈ ឆ្នាំ 2021។ បាតុកម្មដែលបានកើតឡើងរយៈពេលជាង 1 ខែមកនេះគឺដើម្បីស្នើឱ្យដោះលែងមនុស្សដែលត្រូវបានចាប់ខ្លួន និងស្នើឱ្យមានការគោរពលទ្ធផលនៃការបោះឆ្នោតកាលពីខែវិច្ឆិកា 2020 ដែលកងទ័ពចោទថាមានការលួចបន្លំសន្លឹកឆ្នោត៕

ប្រភព៖ Al Jazeera
ប្រែសម្រួល៖ បុត្រា

March 9, 2021

ជិត 118លាននាក់ឆ្លង Covid-19 នៅទូទាំងពិភពលោក៖ សហរដ្ឋអាមេរិកបន្ថយការរឹតត្បិតលើការដើរហើរចំពោះអ្នកបានចាក់វ៉ាក់សាំង

ពិភពលោកទាំងមូលបានរកឃើញករណីឆ្លង Covid-19 សរុបចំនួន 117,737,690 នាក់ ក្នុងនោះមានអ្នកស្លាប់សរុប 2,611,556 នាក់ និងជាសះស្បើយ 93,400,984 នាក់ ខណៈអ្នកជំងឺកំពុងទទួលការព្យាបាល មានចំនួន 21,725,150 នាក់។

សហរដ្ឋអាមេរិកដែលជាសម្បុកវីរុសធំជាងគេ បានរកឃើញមនុស្សចំនួន 29,743,289 នាក់ បានឆ្លងវីរុស Covid-19 ក្នុងនោះមាន 538,603 នាក់ បានបាត់បង់ជីវិត។ នាយកដ្ឋានគ្រប់គ្រង និងបង្ការជំងឺឆ្លងរបស់អាមេរិក (CDC) បានចាប់ផ្ដើមបន្ធូរបន្ថយការរឹតត្បិតលើការដើរហើររបស់ពលរដ្ឋដែលបានចាក់វ៉ាក់សាំងរួចរាល់ ដោយអនុញ្ញាតឱ្យមានការជួបជុំគ្នានៅក្នុងផ្ទះដោយមិនបាច់ពាក់ម៉ាស។

ប៉ុន្តែ ពលរដអាមេរិក នៅតែត្រូវបានស្នើឱ្យពាក់ម៉ាសនៅទីសាធារណៈ និងចៀសវាងការធ្វើដំណើរបើសិនមិនចាំបាច់។ ក្រុមមនុស្សដែលបានចាក់វ៉ាក់សាំងក៏នៅតែត្រូវពាក់ម៉ាសនៅពេលជួបមនុស្សដែលមិនទាន់បានចាក់វ៉ាក់សាំង និងចៀសវាការជួបជុំគ្នាដែលមានមនុស្សច្រើន។

បច្ចុប្បន្ន ពលរដ្ឋអាមេរិកជាង 90% មិនទាន់បានចាក់វ៉ាក់សាំងគ្រប់គ្រាន់នៅឡើយ នេះបើតាមប្រធានាធិបតី Joe Biden។ លោក Biden ក៏បានអំពាវនាវឱ្យពលរដ្ឋបន្តអនុវត្តតាមការណែនាំរបស់ CDC ដើម្បីទប់ស្កាត់ការឆ្លងរាលដាលបន្ទាប់៕

ប្រភព៖ Reuters
ប្រែសម្រួល៖ បុត្រា

March 9, 2021

ប៉ូលិសមីយ៉ានម៉ា ឡោមព័ទ្ធក្រុមបាតុករទាំងយប់៖ មនុស្ស 3នាក់ត្រូវបានបាញ់សម្លាប់

ក្រុមសន្តិសុខនៃរបបសឹកមីយ៉ានម៉ា បានឡោមព័ទ្ធបាតុកររាប់រយនាក់ដែលនាំគ្នាធ្វើបាតុកម្មនៅទីក្រុង Yangon និងបានគំរាមដល់ពលរដ្ឋណាដែលលាក់បំពួនបាតុករ។

សកម្មភាពខាងលើត្រូវបានធ្វើឡើងកាលពីយប់ថ្ងៃទី 8 មីនា ឆ្នាំ 2021 នៅក្នុងសង្កាត់ Sanchuang នៃទីក្រុង Yangon។ Stephane Dujarric អ្នកនាំពាក្យរបស់អង្គការសហប្រជាជាតិបានឱ្យដឹងថា អគ្គលេខាធិការ Antonio Guterres បានអំពាវនាវឱ្យ «អត់ធ្មត់ជាអតិបរមា និងដោះលែងគ្រប់គ្នាដោយសុវត្ថិភាព»។ ការិយាល័យអង្គការសហប្រជាជាតិនៅមីយ៉ានម៉ា រួមនឹងស្ថានទូតអាមេរិក និងអង់គ្លេស ក៏បានស្នើឱ្យប៉ូលិសទុកផ្លូវឱ្យបាតុករចាកចេញ។

ក៏ប៉ុន្តែ ពុំមានសញ្ញាណាមួយបង្ហាញថា ប៉ូលិសមីយ៉ានម៉ានឹងបង្អង់ដៃនោះទេ។ សារព័ត៌មានក្នុងស្រុក និងក្រុមអ្នកលេង Facebook បានឱ្យដឹងថា មនុស្សចំនួន 20 នាក់ ត្រូវបានចាប់ខ្លួននៅសង្កាត់ Sanchuang បន្ទាប់ពីក្រុមប៉ូលិសបានឆែកឆេរផ្ទះរបស់ពលរដ្ឋ។

នៅតំបន់ផ្សេងៗក្នុងទីក្រុង Yangon មនុស្សរាប់ពាន់នាក់បានចេញធ្វើបាតុកម្ម និងស្នើឱ្យដោះលែងបាតុករដែលប៉ូលិសបានចាប់ខ្លួន។ ប៉ូលិសបានផ្ទុះអាវុធ និងបាញ់គ្រាប់បែកសម្លត់ស្មារតី ដើម្បីបំបែកហ្វូងបាតុករ។

អ្នកនាំពាក្យរបបយោធាមីយ៉ានម៉ា មិនទាន់ធ្វើការអធិប្បាយអ្វីអំពីហេតុការណ៍ខាងលើនៅឡើយ។

សារព័ត៌មានក្នុងស្រុក កាលពីថ្ងៃទី 8 មីនា បានឱ្យដឹងថា បាតុករ 3 នាក់ ត្រូវបានបាញ់សម្លាប់នៅក្នុងបាតុកម្មនៅភាគខាងជើងប្រទេស និងតំបន់វាលរាបទន្លេ Irrawaddy។ យោងតាមអង្គការសហប្រជាជាតិ សកម្មភាពរបស់ប៉ូលិស និងកងទ័ពមីយ៉ានម៉ា បានបណ្ដាលឱ្យមនុស្សជាង 50 នាក់ ត្រូវបាត់បង់ជីវិត រាប់ចាប់ពីមានបាតុកម្មប្រឆាំងរដ្ឋប្រហារកើតឡើង។

មីយ៉ានម៉ា បានធ្លាក់ចូលក្នុងភាពវឹកវរក្រោយពីកងទ័ពប្រទេសនេះបានធ្វើរដ្ឋប្រហារ និងចាប់ខ្លួនទីប្រឹក្សារដ្ឋ Aung San Suu Kyi រួមនឹងក្រុមមន្ត្រីជាន់ខ្ពស់ជាច្រើនរូបកាលពីថ្ងៃទី 1 កុម្ភៈ ឆ្នាំ 2021។ បាតុកម្មដែលបានកើតឡើងរយៈពេលជាង 1 ខែមកនេះគឺដើម្បីស្នើឱ្យដោះលែងមនុស្សដែលត្រូវបានចាប់ខ្លួន និងស្នើឱ្យមានការគោរពលទ្ធផលនៃការបោះឆ្នោតកាលពីខែវិច្ឆិកា 2020 ដែលកងទ័ពចោទថាមានការលួចបន្លំសន្លឹកឆ្នោត៕

ប្រភព៖ Reuters
ប្រែសម្រួល៖ បុត្រា

March 9, 2021

វៀតណាមចាប់ផ្ដើមចាក់វ៉ាក់សាំងបង្ការវីរុស Covid-19 នៅថ្ងៃនេះ

ព្រឹកថ្ងៃទី 8 មីនានេះ វៀតណាមចាប់ផ្ដើមយុទ្ធនាការចាក់វ៉ាក់សាំងដល់ក្រុមមនុស្សអាទិភាពរបស់ខ្លួនដែលស្ថិតនៅក្នុងតំបន់ដែលមានហានិភ័យខ្ពស់ រួមមាននៅរដ្ឋធានីហាណូយ ទីក្រុងហូជីមិញ និងខេត្តហៃហ្សឿង។

ក្រុមមនុស្សដែលស្ថិតក្នុងអាទិភាពដំបូងគេ មានដូចជាក្រុមគ្រូពេទ្យ និងក្រុមមនុស្សដែលធ្វើកិច្ចការប្រយុទ្ធប្រឆាំងនឹងវីរុស Covid-19 ជាដើម។

វៀតណាម បច្ចុប្បន្នមានវ៉ាក់សាំងបង្ការ Covid-19 AstraZeneca ចំនួន 117,500 ដូស ត្រូវបានផ្គត់ផ្គង់ដល់ខេត្តចំនួន 13 ដែលកំពុងរងផលវិបាកដោយសារ Covid-19 ច្រើនជាងគេ។ ក្រៅពីនេះ មាន 600 ដូស ត្រូវបានប្រើប្រាស់ដើម្បីពិនិត្យគុណភាព។

ក្រុមអ្នកត្រូវចាក់វ៉ាក់សាំង នៅខេត្តហៃហ្សឿង

តាមគម្រោង នៅក្នុងខែមីនានេះ វៀតណាមនឹងទទួលបានវ៉ាក់សាំងចំនួន 1.3លានដូសទៀតនៅក្នុងកម្មវិធី Covax Facility។ ចំនួននេះនឹងកើនឡើងជាបន្តបន្ទាប់ រហូតដល់គម្រប់ 100 លានដូស។

គិតមកដល់បច្ចុប្បន្ន វៀតណាម មានអ្នកឆ្លង Covid-19 សរុបចំនួន 2,512 នាក់ ក្នុងនោះមាន 1,920 នាក់បានជាសះស្បើយ និង 35 នាក់បានបាត់បង់ជីវិត ខណៈ 553 នាក់កំពុងព្យាបាល៕

ប្រភព៖ VE
ប្រែសម្រួល៖ បុត្រា

March 8, 2021

ទិដ្ឋភាពបាតុកម្មនៅមីយ៉ានម៉ា ពេលមើលពីលើមេឃ

បណ្ដារូបថតពីផ្កាយរណបបង្ហាញថា បាតុកម្មប្រឆាំងកងទ័ពនៅប្រទេសភូមា (មីយ៉ានម៉ា) នៅតែមិនទាន់ចុះខ្សោយនៅឡើយ ក្រោយរដ្ឋប្រហារយោធាជាងមួយខែមកនេះ។

(រូបភាពខាងលើ)-បាតុករប្រមូលផ្ដុំគ្នាកាលពីថ្ងៃទី 4 មីនា នៅឧទ្យាន City Park នាទីក្រុង Mandalay ដើម្បីប្រឆាំងនឹងកងទ័ព និងដើម្បីប្រារព្ធពិធីរំលឹកវិញ្ញាណក្ខន្ធ Kyal Sin អាយុ 19 ឆ្នាំ ដែលត្រូវបានប៉ូលិសបាញ់សម្លាប់មុននោះមួយថ្ងៃ នៅពេលកំពុងចូលរួមធ្វើបាតុកម្មនៅ Mandalay។

អក្សរពីរបន្ទាត់ដែលសរសេរថា «ប្រឆាំងនឹងរដ្ឋប្រហារយោធា» និង «ដោះលែងមេដឹកនាំរបស់យើង» ត្រូវបានគេមើលឃើញយ៉ាងច្បាស់ពីផ្កាយរណបដែលបានថតដងផ្លូវក្នុងទីក្រុង Mandalay កាលពីថ្ងៃទី 4 មីនា។

រូបភាពពីផ្កាយរណបដែលហ្ស៊ូមឆ្ងាយជាងរូបខាងលើបន្តិច នៅតែអាចមើលឃើញអក្សរពីរបន្ទាត់យ៉ាងច្បាស់។

អក្សរមួយបន្ទាត់ពណ៌ស «សង្គ្រោះមីយ៉ានម៉ាផង» (ផ្នែកលើគេ និងនៅចំកណ្ដាល) ត្រូវបានសរសេរនៅលើឆ្នេរខ្សាច់តាមបណ្ដោយទន្លេ Irrawaddy នៅ Mandalay កាលពីថ្ងៃទី 4 មីនា។

«ដោះលែងក្រុមមេដឹកនាំរបស់យើងខ្ញុំ» គឺជាឃ្លាដែលត្រូវបានក្រុមបាតុករបាញ់ថ្នាំនៅលើដងផ្លូវក្នុងទីក្រុង Yangon កាលពីខែកុម្ភៈ។

រូបភាពពីផ្កាយរណបដែលបានមកពីក្រុមហ៊ុន Maxar Technologies បង្ហាញថា មានទាហានរាប់ពាន់នាក់ និងរថយន្តដឹកទាហានជិត 400 គ្រឿង ត្រូវបានដាក់ពង្រាយនៅក្បែរមូលដ្ឋានទ័ពនៅភាគខាងត្បូងនៃរដ្ឋធានីណៃពិដោ កាលពីថ្ងៃទី 4 មីនា។

កងទ័ពមីយ៉ានម៉ា នៅតែបន្តដាក់ពង្រាយទាហានទៅកាន់ទីក្រុងធំៗរបស់ប្រទេសនេះ ដើម្បីទប់ស្កាត់បាតុកម្មប្រឆាំងរដ្ឋប្រហារ។ ក្រុមបាតុករមីយ៉ានម៉ា ក៏នៅតែប្ដេជ្ញាចិត្ត ចេញធ្វើបាតុកម្មប្រឆាំងរដ្ឋាភិបាលយោធាដដែល បើទោះជាមានបាតុករជាច្រើនសិបនាក់ត្រូវបានប៉ូលិសបាញ់សម្លាប់។

ក្រុមបាតុករបាន និងកំពុងអំពាវនាវឱ្យកងទ័ពដោះលែងទីប្រឹក្សារដ្ឋ លោក Aung San Suu Kyi និងស្ដាររដ្ឋាភិបាលស៊ីវិលឡើងវីញ៕

ប្រភព៖ AFP/ Reuters/ AP
ប្រែសម្រួល៖ បុត្រា

March 6, 2021

Category: អន្តរជាតិ