អន្តរជាតិ - La Reine Media

វីរុសផ្ដាសាយអាចទប់ស្កាត់ការ «copy-past» របស់វីរុស Covid-19

ក្រុមអ្នកវិទ្យាសាស្ត្រអង់គ្លេសបានរកឃើញថា ប្រព័ន្ធភាពស៊ាំដែលកើតឡើងបន្ទាប់ពីបានឆ្លង rhinovirus ដែលជាវីរុសបង្កជំងឺផ្ដាសាយធម្មតា អាចបង្កើតបានជាការការពារមួយចំនួន ជួយឱ្យរាងកាយប្រឆាំងនឹងវីរុស Covid-19។

ក្រុមអ្នកវិទ្យាសាស្ត្រនៅមជ្ឈមណ្ឌលស្រាវជ្រាវវីរុស (CVR) នៃសាកលវិទ្យាល័យ Glasgow (អង់គ្លេស) បានរកឃើញថា វីរុស rhinovirus ដែលបង្កជំងឺផ្ដាសាយធម្មតា មានលទ្ធភាពដាស់ប្រព័ន្ធការពាររាងកាយពីកំណើត ឱ្យមានសកម្មភាព ដើម្បីទប់ស្កាត់ដំណើរការនៃការ «ថតចម្លង» (បង្កើតកូនចៅ) របស់ Covid-19 នៅក្នុងកោសិកានៃប្រព័ន្ធដង្ហើម។ លទ្ធផលនៃការសិក្សាស្រាវជ្រាវខាងលើត្រូវបានចុះផ្សាយលើទស្សនាវដ្ដី Journal of Infectious Diseases កាលពីថ្ងៃទី 23មីនា 2021។

ក្នុងការស្រាវជ្រាវនេះ អ្នកវិទ្យាសាស្ត្របានចម្លងវីរុស Covid-19 ទៅកាន់កោសិកានៃប្រព័ន្ធដង្ហើមរបស់មនុស្សនៅក្នុងបន្ទប់ពិសោធន៍ និងបង្កើតបរិស្ថានដូចទៅនឹងកោសិកាដែលជំងឺឆ្លងធម្មតាបានកើតមាន។ ក្រោយមក ពួកគេវិភាគទៅលើការកកើតកូនចៅរបស់ Covid-19 នៅក្នុងបរិស្ថាននេះ ហើយវាត្រូវបានចែកជាពីរករណីគឺ «មាន» និង «មិនមានវីរុសផ្ដាសាយ»។

សាស្ត្រាចារ្យ Pablo Murcia ដែលជាសមាជិកម្នាក់របស់ក្រុមស្រាវជ្រាវខាងលើ បានឱ្យដឹងថា ការពិសោធន៍បានបង្ហាញថា វីរុស rhinovirus នៅក្នុងរាងកាយមនុស្ស ធ្វើឱ្យសកម្មលើប្រព័ន្ធភាពស៊ាំពីកំណើតនៅក្នុងកោសិកាផ្លូវដង្ហើមរបស់មនុស្ស ហើយតាមរយៈនេះ ក៏ទប់ស្កាត់ការកកើតកូនចៅរបស់ Covid-19។

លោក Pablo Murcia ថ្លែងថា៖ «ប្រការនេះមានន័យថា ការឆ្លើយតបរបស់ប្រព័ន្ធការពាររាងកាយដែលបង្កើតឡើងដោយដំណើរការនៃការឆ្លងវីរុសផ្ដាសាយ អាចផ្ដល់នូវការការពារច្រើនកម្រិតដើម្បីប្រឆាំងនឹង Covid-19 ដោយវាមានសក្ដានុពលក្នុងការទប់ស្កាត់ការឆ្លងរាលដាលរបស់វីរុសនេះ និងកាត់បន្ថយកម្រិតនៃភាពធ្ងន់ធ្ងរដែល Covid-19 អាចបង្កឡើង»។

ការវិភាគនៅលើកុំព្យូទ័ររបស់ក្រុមអ្នកស្រាវជ្រាវបានបង្ហាញថា អន្តរកម្មរវាងវីរុសនានា អាចមានឥទ្ធិពលទៅលើបរិមាណនៃបណ្ដុំរបស់វីរុស ពោលគឺការឆ្លងវីរុសផ្ដាសាយមានអត្រាខ្ពស់កម្រិតណា តួលេខនៃការឆ្លង Covid-9 ក៏អាចថយចុះកម្រិតនោះ។

របកគំហើញនេះ ជួយឱ្យក្រុមស្រាវជ្រាវ ស្វែងយល់អំពីយន្តការ និងកម្រិតនៃអន្តរកម្មរបស់វីរុសផ្ដាសាយ ជាមួយនឹង Covid-19 ដែលនាំឱ្យមានការអភិវឌ្ឍវិធីសាស្ត្រព្យាបាលជំងឺCovid-19 នៅក្នុងកម្រិតម៉ូលិគុល។ «ប៉ុន្តែ ការចាក់វ៉ាក់សាំង អាចនៅតែជាវិធីសាស្ត្រល្អបំផុតដើម្បីការពាររាងកាយពីវីរុស» អ្នកវិទ្យាសាស្ត្រ Pablo Murcia បញ្ជាក់បន្ថែម៕

ប្រភព៖ Oxford Academic
ប្រែសម្រួល៖ បុត្រា

March 26, 2021

ពលរដ្ឋមីយ៉ានម៉ារាប់ពាន់នាក់បន្តចេញធ្វើបាតុកម្ម ក្រោយ «នៅស្ងៀម» បានមួយថ្ងៃ

មនុស្សរាប់ពាន់នាក់បាននាំគ្នាចេញដង្ហែក្បួនជាបាតុកម្មនៅតាមដងផ្លូវក្នុងទីក្រុងនានានៃប្រទេសភូមានាថ្ងៃនេះ បន្ទាប់ពីបានធ្វើ «កូដកម្មស្ងាត់ស្ងៀម» រយៈពេលមួយថ្ងៃ ដើម្បីប្រឆាំងនឹងរដ្ឋប្រហារយោធា។

បាតុកម្មនាថ្ងៃនេះ ត្រូវបានធ្វើឡើងនៅទីក្រុង Yangon និង Monywa រួមនឹងនៅទីក្រុងមួយចំនួនទៀតនៃប្រទេសមីយ៉ានម៉ា។ នេះបើតាមក្រុមសាក្សី និងអត្ថបទបង្ហោះតាមបណ្ដាញសង្គម។

«តើយើងមានសាមគ្គីភាពដែរ ឬទេ? មាន! យើងត្រូវតែមានសាមគ្គីភាព» ក្រុមបាតុករនាំគ្នាស្រែកហ៊ោនៅទីក្រុង Monywa និងបានប្រកាសថា ការតស៊ូរបស់ពួកគេ «ត្រូវតែឈ្នះ»។

នារីជាបាតុករម្នាក់ ឈ្មោះ Nant Khi Phyu Aye ឱ្យដឹងថា អ្នកដែលចូលរួមចលនាបាតុកម្ម ភាគច្រើនគឺជាយុវវ័យ។ «ពួកគេចង់ចូលរួមគ្រប់ពេល មិនបោះបង់មួយថ្ងៃឡើយ»។

យោងតាមសារព័ត៌មាន Hinthar Media ក្រុមប៉ូលិសបានបង្ក្រាបបាតុកម្មមួយនៅ Mawlamyine និងបានចាប់ខ្លួនបាតុករចំនួន 20នាក់។ មនុស្សយ៉ាងតិចពីរនាក់បានរងរបួង ប៉ុន្តែមិនទាន់មានព័ត៌មានទាក់ទិននឹងករណីស្លាប់ ឬរបួសនៅតំបន់ផ្សេងៗនៅឡើយ។

បាតុកម្មនៅទីក្រុង Yangon ក្នុងថ្ងៃទី 25 មីនា

បាតុកម្មខាងលើត្រូវបានធ្វើឡើងក្រោយពីការធ្វើ «កូដកម្មស្ងៀមស្ងាត់» កាលពីថ្ងៃទី 24មីនា នៅពេលពលរដ្ឋបានអំពាវនាវឱ្យបិទទ្វារនៅក្នុងផ្ទះ នាំឱ្យតំបន់ដែលធ្លាប់មានមនុស្សអ៊ូអរ ប្រែជាស្ងប់ស្ងាត់ខុសធម្មតា។

ទំហំនៃបាតុកម្មនានានៅតាមដងផ្លូវក្នុងទីក្រុង បានថយចុះនៅក្នុងអំឡុងប៉ុន្មានថ្ងៃកន្លងទៅនេះ បន្ទាប់ពីមានអំពើបង្ក្រាបយ៉ាងចាស់ដៃពីសំណាក់របបយោធាមីយ៉ានម៉ា។ ក៏ប៉ុន្តែ ក្រុមសកម្មជនប្រជាធិបតេយ្យបានអំពាវនាវឱ្យគ្រប់គ្នាបន្តចេញធ្វើបាតុកម្ម ចាប់ពីថ្ងៃនេះតទៅ។

កងទ័ពភូមា បានធ្វើរដ្ឋប្រហារយោធាកាលពីថ្ងៃទី 1កុម្ភៈ និងបានចាប់ខ្លួនក្រុមមន្ត្រីជាន់ខ្ពស់ជាច្រើនរូបនៃបក្សកាន់អំណាចរបស់លោកស្រី Aung San Suu Kyi ក្រោមលេសថា មានការលួចបន្លំសន្លឹកឆ្នោតនៅក្នុងការបោះឆ្នោតកាលពីខែវិច្ឆិកា ឆ្នាំ2020។ ទង្វើនេះបាននាំឱ្យមានបាតុកម្មកើតឡើងជាបន្តបន្ទាប់ ក្នុងនោះ មានមនុស្សយ៉ាងតិច 286នាក់បានស្លាប់ដោយសារគ្រាប់កាំភ្លើងរបស់ប៉ូលិស។ នេះបើតាមសមាគមសង្គ្រោះអ្នកទោសនយោបាយ (AAPP)៕

ប្រភព៖ Reuters
ប្រែសម្រួល៖ បុត្រា

March 25, 2021

ប្រទេសចិនចែកប័ណ្ណទិញទំនិញដល់អ្នកបានចាក់វ៉ាក់សាំង Covid-19

ខណ្ឌ Daxing នៃរដ្ឋធានីប៉េកាំង ប្រទេសចិន ដែលមានប្រជាជនសរុបចំនួន 1.8លាននាក់ បានផ្ដល់ប័ណ្ណទិញទំនិញដល់ពលរដ្ឋដែលបានចាក់វ៉ាក់សាំងបង្ការ Covid-19 ចាប់ពីថ្ងៃទី 24មីនា 2021។

«ប័ណ្ណទិញទំនិញដែលមានតម្លៃចាប់ពី 8 ដល់ 30យុន (1.23-4.6ដុល្លារអាមេរិក) ក្នុងមួយសន្លឹក ត្រូវបានបែងចែកទៅតាមលក្ខខណ្ឌមួយចំនួន និងអាចប្រើប្រាស់នៅក្នុងផ្សារទំនើបនានាក្នុងខណ្ឌ» នេះបើតាមក្រុមមន្ត្រីនៅខណ្ឌ Daxing។ សារព័ត៌មាន Beijing Daily បានរាយការណ៍ថា ប័ណ្ណទិញទំនិញទាំងនេះមានតម្លៃសរុបជាង 200លានយុន (30.7លានដុល្លារអាមេរិក)។

ក៏ប៉ុន្តែ មនុស្សមួយចំនួនបានសំដែងការព្រួយបារម្ភអំពីកម្មវិធីផ្ដល់ប័ណ្ណទិញទំនិញខាងលើ។ អ្នកលេងបណ្ដាញសង្គមម្នាក់បានសរសេរនៅលើបណ្ដាញសង្គម Weibo ថា៖ «ការលើកទឹកចិត្តតាមវិធីនេះដើម្បីឱ្យពលរដ្ឋចាក់វ៉ាក់សាំង នឹងធ្វើឱ្យការជឿជាក់ទៅលើវ៉ាក់សាំងមានការថយចុះ»។

ពលរដ្ឋជាង 73% ដែលមានអាយុចាប់ពី 18ឆ្នាំឡើងទៅ នៅក្នុងខណ្ឌ Daxing បានចាក់វ៉ាក់សាំងបង្ការ Covid-19 យ៉ាងតិចមួយម្ជុល នេះបើតាម Beijing Daily។ វ៉ាក់សាំងដែលកំពុងត្រូវបានប្រើប្រាស់ច្រើនជាងគេនៅប្រទេសចិន នោះគឺ BBIBP-CorV របស់ Sinopharm និង CoronaVac របស់ Sinovac ដែលទាំងនេះសុទ្ធតែត្រូវបានអភិវឌ្ឍនៅក្នុងស្រុក និងត្រូវចាក់ជាពីរម្ជុល។

មជ្ឈមណ្ឌលគ្រប់គ្រងជំងឺឆ្លងរបស់ប្រទេសចិន បានកំណត់គោលដៅចាក់វ៉ាក់សាំងបង្ការ Covid-19 ឱ្យបាន 40% នៃចំនួនប្រជាជនសរុប ពោលគឺប្រហាក់ប្រហែលនឹង 560លាននាក់ នៅក្នុងខែមិថុនា។ ប៉ុន្តែ គិតមកដល់ត្រឹមថ្ងៃទី 8មីនា ប្រទេសនេះចាក់បានតែ 65លាននាក់ប៉ុណ្ណោះ។

ចិនត្រូវបានវាយតម្លៃថាជាប្រទេសមួយក្នុងចំណោមប្រទេសដែលគ្រប់គ្រង Covid-19 បានល្អ ដោយមានអត្រានៃការស្លាប់ទាប ព្រោះតែវិធានការតឹងរ៉ឹង និងការផលិតវ៉ាក់សាំងផ្ទាល់ខ្លួន។ បច្ចុប្បន្ន ប្រទេសចិនមានសមត្ថភាពផលិតវ៉ាក់សាំងបង្ការ Covid-19 បាន 5លានដូស/ថ្ងៃ កើនឡើងច្រើនជាង 3ដង បើធៀបនឹង 1.5លានដូស/ថ្ងៃ កាលពីដើមខែកុម្ភៈ៕

ប្រភព៖ Reuters
ប្រែសម្រួល៖ បុត្រា

March 25, 2021

របបសឹកនៅមីយ៉ានម៉ា ដោះលែងបាតុករជាង 600នាក់ ក្រោយពីបានឃុំខ្លួនមួយរយៈពេល

របបសឹកនៃប្រទេសមីយ៉ានម៉ា បានដោះលែងក្រុមបាតុករប្រឆាំងរដ្ឋប្រហារជាង 600នាក់នៅក្នុងថ្ងៃទី 24មីនានេះ ខណៈដែលក្រុមសកម្មជនអំពាវនាវឱ្យ «ធ្វើកូដកម្មស្ងាត់ស្ងៀម» នៅទីក្រុង Yangon។

«យើងបានដោះលែងបុរសចំនួន 360នាក់ និងស្ត្រីចំនួន 268នាក់ ពីពន្ធនាគារ Insein នៅថ្ងៃនេះ» មន្ត្រីជាន់ខ្ពស់ម្នាក់របស់ពន្ធនាគារ បានប្រាប់ដូច្នេះ។

ក្រុមសាក្សី ដែលរួមមានទាំងមេធាវីរបស់បាតុករដែលត្រូវបានចាប់ខ្លួន បានឱ្យដឹងថា រថយន្តដែលដឹកពេញដោយមនុស្សជាច្រើនគ្រឿងបានចាកចេញពីពន្ធនាគារ Insein នៅទីក្រុង Yangon ជាទីក្រុងធំលំដាប់ទីមួយនៅមីយ៉ានម៉ា នៅវេលាម៉ោងប្រហែល 10ព្រឹក។

មេធាវីបាននិយាយថា៖ «អ្នកដែលត្រូវបានដោះលែងទាំងអស់ សុទ្ធតែត្រូវបានចាប់ខ្លួននៅក្នុងបាតុកម្មមុននោះ ដែលត្រូវបានចាប់នៅពេលយប់ ឬក្រុមមនុស្សដែលចេញក្រៅផ្ទះដើម្បីទៅទិញរបស់របរ (រំលោភលើបទបញ្ជាអាជ្ញាសឹក)»។ មេធាវីបន្ថែមថា រថយន្តប្រហែល 16គ្រឿងបានចាកចេញពីពន្ធនាគារ។ «ពួកគេត្រូវបានដឹកទៅកាន់ប៉ុស្តិ៍ប៉ូលិសនានាដែលជាប់ទាក់ទង មុននឹងបានត្រលប់ទៅផ្ទះ»។

បច្ចុប្បន្ន របបសឹកភូមាមិនបានបញ្ជាក់អំពីតួលេខអ្នកទោសដែលត្រូវបានដោះលែងនៅឡើយ។ អ្នកនាំពាក្យរបស់កងទ័ព មិនបានលើកទូរស័ព្ទរបស់អ្នកយកព័ត៌មាន។

សមាគមជួយអ្នកទោសនយោបាយ (AAPP) បានឱ្យដឹងថាមនុស្សប្រមាណ 2,600នាក់ ត្រូវបានចាប់ខ្លួន និងយ៉ាងតិច 275នាក់បានស្លាប់ រាប់ចាប់ពីមានបាតុកម្មប្រឆាំងរដ្ឋប្រហារនៅមីយ៉ានម៉ា។ ក្រុមសកម្មជនយល់ថា តួលេខជាក់ស្ដែងអាចខ្ពស់ជាងនេះឆ្ងាយណាស់។

បាតុករមីយ៉ានម៉ា ដែលត្រូវបានដោះលែងនៅថ្ងៃនេះ

កូដកម្មមួយបានកើតឡើងមួយថ្ងៃក្រោយពីបុគ្គលិករបស់ក្រុមរៀបចំពិធីបុណ្យសពនៅ Mandalay ដែលជាទីក្រុងធំលំដាប់ទីពីរនៅមីយ៉ានម៉ា បានឱ្យដឹងថា ក្មេងស្រីអាយុ 7ឆ្នាំម្នាក់ ត្រូវបានកងកម្លាំងសន្តិសុខបាញ់សម្លាប់ និងបានក្លាយជាជនរងគ្រោះដែលមានអាយុទាបបំផុតនៅក្នុងវិបត្តិនយោបាយនៃប្រទេសមីយ៉ានម៉ានាបច្ចុប្បន្ន។ ភាគីខាងកងទ័ពក៏មិនទាន់មានការអធិប្បាយអ្វីមួយអំពីហេតុការណ៍នេះនៅឡើយ៕

ប្រភព៖ AFP, Reuters
ប្រែសម្រួល៖ បុត្រា

March 24, 2021

វ៉ាក់សាំងបង្ការ Covid-19 ប្រភេទហិតតាមផ្លូវដង្ហើម ត្រូវបានចិនអនុម័តឱ្យប្រើសាកល្បង

នាយកដ្ឋានគ្រប់គ្រងឱសថរបស់ចិន បានអនុញ្ញាតឱ្យក្រុមហ៊ុន CanSino Biologics ប្រើប្រាស់សាកល្បងវ៉ាក់សាំងបង្ការវីរុស Covid-19 ប្រភេទហិត ជំនួសឱ្យការចាក់ដូចធម្មតា។

នៅក្នុងឯកសារដែលត្រូវបានប្រកាសនៅលើផ្សារហ៊ុនហុងកុង កាលពីថ្ងៃទី 23មីនា ក្រុមហ៊ុន CanSino បានឱ្យដឹងថា ពួកគេបានទទួលការអនុញ្ញាតឱ្យប្រើប្រាស់សាកល្បងវ៉ាក់សាំងប្រភេទហិតដែលក្រុមហ៊ុនបានសហការអភិវឌ្ឍជាមួយនឹងវិទ្យាស្ថានបច្ចេកវិទ្យាជីវសាស្ត្រប៉េកាំង។

CanSino មិនបានបង្ហើបឱ្យដឹងអំពីព័ត៌មានបន្ថែមទាក់ទងនឹងវ៉ាក់សាំងបង្ការ Covid-19 ប្រភេទហិតនេះទេ ប៉ុន្តែ បានព្រមានថា សុវត្ថិភាព និងប្រសិទ្ធភាពរបស់វ៉ាក់សាំងនេះ នឹង «ត្រូវបានទទួលស្គាល់» ក្រោយពីការប្រើប្រាស់សាកល្បងជាផ្លូវការតែប៉ុណ្ណោះ។

វ៉ាក់សាំងបង្ការ Covid-19 មួយប្រភេទរបស់ CanSino

ដំណឹងខាងលើនេះបានលេចឡើងបន្ទាប់ពីនាយកដ្ឋានគ្រប់គ្រងផលិតផលសុខាភិបាលជាតិចិន បានអនុម័តឱ្យប្រើប្រាស់មានលក្ខខណ្ឌចំពោះវ៉ាក់សាំងមួយប្រភេទផ្សេងទៀតរបស់ CanSino កាលពីខែមុន។ ប្រទេសចិន បច្ចុប្បន្នមានវ៉ាក់សាំងបង្ការ Covid-19 ចំនួន 5ប្រភេទ ដែលត្រូវបានអនុញ្ញាតឱ្យប្រើដោយមានលក្ខខណ្ឌ ឬក្នុងស្ថានភាពបន្ទាន់ ប៉ុន្តែពុំមានប្រភេទណាមួយដែលប្រើប្រាស់តាមផ្លូវដង្ហើមនោះឡើយ។

គិតមកដល់ថ្ងៃទី 20មីនា ប្រទេសចិនបានចាក់វ៉ាក់សាំងបង្ការ Covid-19 ចំនួន 74.96លានដូសរួចហើយ នេះបើតាម Our World in Data ជាអង្គការផ្គត់ផ្គង់ទិន្នន័យសហការរវាងសាកលវិទ្យាល័យ Oxford និងអង្គការមនុស្សធម៌មួយទៀត៕

ប្រភព៖ AFP
ប្រែសម្រួល៖ បុត្រា

March 24, 2021

សហរដ្ឋអាមេរិកមានហេតុការណ៍បាញ់ប្រហារចំនួន 7ករណី ក្នុងរយៈពេលតែ 7ថ្ងៃប៉ុណ្ណោះ

ករណីបាញ់រះចំនួន 7លើក កើតមាននៅក្នុងអំឡុងពេលតែមួយសប្ដាហ៍ បានបង្ហាញនូវទិដ្ឋភាពដែលព្រមានអំពីស្ថានភាពនៃអំពើហិង្សាប្រដាប់អាវុធនៅសហរដ្ឋអាមេរិក។

ករណីបាញ់ប្រហារនៅក្នុងផ្សារទំនើបមួយនៅ Boulder ក្នុងរដ្ឋ Colorado កាលពីព្រលប់ថ្ងៃទី 22មីនា (ម៉ោងក្នុងស្រុក) បានកើតឡើងក្រោយមិនដល់មួយសប្ដាហ៍ បន្ទាប់ពីមនុស្ស 8នាក់បានស្លាប់នៅក្នុងហេតុការណ៍បាញ់រះសំដៅទីតាំងស្ប៉ាមួយកន្លែងនៅ Atlanta។

យោងតាម CNN ករណីបាញ់រះខាងលើអាចនឹងជួយជំរុញឱ្យមានកិច្ចប្រជុំបន្ថែមអំពីច្បាប់គ្រប់គ្រងអាវុធនៅសហរដ្ឋអាមេរិក។ ហេតុការណ៍បាញ់រះនេះក៏ស្ថិតក្នុងចំណោមករណីបាញ់ប្រហារដោយកាំភ្លើងយ៉ាងតិចចំនួន 7 លើក ដែលបានកើតឡើងកាលពីសប្ដាហ៍មុននៅទូទាំងសហរដ្ឋអាមេរិក។ គ្រាន់តែនៅក្នុងថ្ងៃទី 20មីនា សហរដ្ឋអាមេរិកមានហេតុការណ៍បាញ់រះរហូតដល់ 3ករណី។

កងកម្លាំង FBI និង SWAT រាប់សិបនាក់ ត្រូវបានបញ្ជូនមកកាន់កន្លែងកើតហេតុនៅឯទីក្រុង Boulder នៃរដ្ឋ Colorado

កាលពីថ្ងៃទី 16មីនា ខ្មាន់កាំភ្លើងជាជនជាតិស្បែកសម្នាក់ បានសម្រុកចូលក្នុងហាងស្ប៉ាមួយកន្លែងនៅ Atlanta និងបានបាញ់រះសម្លាប់មនុស្សចំនួន 8នាក់ ក្នុងនោះមានជនជាតិអាស៊ី 6នាក់។ ថ្ងៃទី 17មីនា នៅ Stockton រដ្ឋ California មនុស្សចំនួន 5នាក់ដែលកំពុងរៀបចំពិធីបួងសួងក៏ត្រូវបានបាញ់រះដោយជនបើកបររថយន្តម្នាក់ ប៉ុន្តែមិនបង្កឱ្យមានអ្នកស្លាប់នោះទេ។

ថ្ងៃទី 18មីនា ជនរងគ្រោះចំនួន 4នាក់នៅក្នុងករណីបាញ់រះមួយនៅទីក្រុង Portland រដ្ឋ Oregon ត្រូវបានបញ្ជូនមកកាន់មន្ទីរពេទ្យ ដោយសារត្រូវរបួសធ្ងន់ធ្ងរ។

ថ្ងៃទី 20មីនា មនុស្សចំនួន 5នាក់ត្រូវបានបាញ់ប្រហារក្នុងហេតុការណ៍ហិង្សាក្នុងក្លឹបរាត្រីមួយ នាទីក្រុង Houston ក្នុងនោះមានម្នាក់ស្ថិតក្នុងស្ថានភាពគ្រោះថ្នាក់ដល់ជីវិត។

ប៉ូលិសក្នុងនាំមនុស្សម្នាចេញពីកន្លែងគ្រោះថ្នាក់ក្នុងហេតុការណ៍បាញ់ប្រហារ

ថ្ងៃទី 20មីនាដដែល នៅ Dallas ខ្នាន់កាំភ្លើងម្នាក់មិនស្គាល់អត្តសញ្ញាណ បានវាយប្រហារដោយកាំភ្លើង បណ្ដាលឱ្យមនុស្សចំនួន 7នាក់រងរបួស និងម្នាក់បានស្លាប់។

ក្នុងអំឡុងពេលខាងលើនោះដែរ ក៏មានមនុស្សម្នាក់បាត់បង់ជីវិត និង 5នាក់ផ្សេងទៀតបានរងរបួសនៅក្នុងហេតុការណ៍បាញ់រះក្នុងពិធីជប់លៀងខុសច្បាប់មួយនៅ Philadelphia។

មកដល់ថ្ងៃទី 22មីនា ករណីបាញ់ប្រហារមួយទៀត បានកើតឡើងនៅក្នុងផ្សារទំនើប King Soopers បណ្ដាលឱ្យមនុស្សចំនួន 10នាក់ត្រូវបាត់បង់ជីវិត ក្នុងនោះក៏មានប៉ូលិសម្នាក់ផងដែរ។

តួលេខនៃអំពើបាញ់ប្រហារខាងលើ បានធ្វើឱ្យមានការព្រួយបារម្ភកាន់តែខ្លាំងអំពីបញ្ហាសុវត្ថិភាពនៃអាយុជីវិតរបស់មនុស្សទូទៅ ព្រមទាំងកំពុងជំរុញឱ្យមានការពិភាក្សាបន្ថែមទៅលើច្បាប់គ្រប់គ្រងអាវុធជាតិផ្ទុះនៅសហរដ្ឋអាមេរិក ខណៈពលរដ្ឋនៅក្នុងរដ្ឋភាគច្រើននៃប្រទេសនេះ មានសិទ្ធិកាន់កាប់អាវុធ។

យោងតាមមជ្ឈមណ្ឌលគ្រប់គ្រង និងបង្ការជំងឺឆ្លង (CDC) របស់សហរដ្ឋអាមេរិក មនុស្សចំនួនជិត 40,000នាក់បានស្លាប់នៅក្នុងហេតុការណ៍ដែលពាក់ព័ន្ធនឹងកាំភ្លើង នៅក្នុងឆ្នាំ 2019។

កាលពីថ្ងៃទី 11មីនា សភាជាន់ទាបអាមេរិក បានអនុម័តលើសេចក្ដីព្រៀងច្បាប់មួយដើម្បីរិតបន្តឹងលើការត្រួតពិនិត្យអាវុធជាតិផ្ទុះ ក្នុងបំណងទប់ស្កាត់មិនឱ្យក្រុមមនុស្សដែលមិនមានលក្ខខណ្ឌគ្រប់គ្រាន់ មិនអាចមានឱកាសកាន់កាប់អាវុធ។

ការបាញ់ប្រហារបានកើតឡើងនៅក្នុងថ្ងៃទី 22មីនា 2021 នៅទីក្រុង Boulder នៃរដ្ឋ Colorado

មុននោះ នៅក្នុងយុទ្ធនាការឃោសនារកសំឡេងឆ្នោត លោក Biden បានប្រកាសថានឹងបង្កើតច្បាប់ហាមផលិតអាវុធ និងទិញអាវុធវាយប្រហារ ក៏ដូចជាអាវុធដែលបង្កការស្លាប់កម្រិតខ្ពស់ ទន្ទឹមនឹងការប្រមូលទិញអាវុធដែលកំពុងចរាចរណ៍នៅលើទីផ្សារ។

ក៏ប៉ុន្តែ យោងតាមការស្ទង់មតិមួយដែលត្រូវបានធ្វើឡើងកាលពីខែវិច្ឆិកា ឆ្នាំ 2020 ដោយវិទ្យាស្ថាន Gallup បានបង្ហាញថា អត្រានៃអ្នកគាំទ្រដល់ការរិតបន្តឹងច្បាប់ប្រើប្រាស់អាវុធ កំពុងស្ថិតក្នុងកម្រិតទាបបំផុតនៅសហរដ្ឋអាមេរិក រាប់ចាប់ពីឆ្នាំ 2016៕

ប្រភព៖ CNN
ប្រែសម្រួល៖ បុត្រា

March 24, 2021

Pfizer ចាប់ផ្ដើមសាកល្បងប្រើថ្នាំលេបសម្រាប់ព្យាបាល Covid-19

ក្រុមហ៊ុនឱសថអាមេរិក Pfizer កាលពីថ្ងៃទី 23មីនា បានប្រកាសថា បានចាប់ផ្ដើមពិសោធដំណាក់កាលដំបូងនៅសហរដ្ឋអាមេរិក ចំពោះប្រភេទថ្នាំគ្រាប់សម្រាប់ព្យាបាល Covid-19។

យោងតាមសារព័ត៌មាន Reuters ក្រុមហ៊ុន Pfizer ឱ្យដឹងថា បេក្ខភាពថ្នាំប្រឆាំងនឹងវីរុសបានបង្ហាញថា វាសកម្មយ៉ាងខ្លាំងក្លាក្នុងការប្រឆាំងនឹងវីរុស Covid-19 នៅក្នុងការស្រាវជ្រាវនៅមន្ទីរពិសោធន៍នានា។ ក្រុមហ៊ុនខាងលើបានប្រាប់ថា ថ្នាំនេះអាចយកទៅព្យាបាលអ្នកជំងឺដែលមានរោគសញ្ញាដំបូងនៃការឆ្លងវីរុស។

បេក្ខភាពថ្នាំប្រឆាំង Covid-19 របស់ Pfizer ដែលត្រូវបានដាក់ឈ្មោះបែបវិទ្យាសាស្ត្រថា PF-07321332 និងជាសារធាតុទប់ស្កាត់ protease បានបង្ហាញអំពីប្រសិទ្ធភាពក្នុងការរារាំងមិនឱ្យវីរុសបង្កើនចំនួននៅក្នុងកោសិកា។

ក្រុមហ៊ុនឱ្យដឹងថា សារធាតុទប់ស្កាត់ protease មានប្រសិទ្ធភាពក្នុងការប្រឆាំងនឹងបណ្ដាវីរុសដូចជា HIV, វីរុសបង្កជំងឺរលាកថ្លើមប្រភេទ C ជាដើម ដោយការប្រើប្រាស់ដោយឡែក ឬផ្សំជាមួយនឹងប្រភេទថ្នាំប្រឆាំងនឹងវីរុសដទៃ។

ក្រុមហ៊ុន Pfizer ក៏កំពុងតែពិសោធដំណាក់កាលដំបូងលើបេក្ខភាពថ្នាំប្រឆាំងនឹងវីរុស Covid-19 មួយផ្សេងទៀត តាមរយៈការចាក់ចូលក្នុងសរសៃឈាមរបស់អ្នកជំងឺ Covid-19 ដែលកំពុងព្យាបាលនៅមន្ទីរពេទ្យ។

«បេក្ខភាពថ្នាំគ្រាប់ និងថ្នាំចាក់ក្នុងសរសៃឈាម មានសក្ដានុពលបង្កើតបានជារូបមន្តមួយក្នុងការព្យាបាលពីដំបូងដល់ចប់ បន្ថែមពីលើការចាក់វ៉ាក់សាំង សម្រាប់ករណីដែលនៅតែកើតជំងឺ» នេះបើតាម Mikael Dolsten នាយកផ្នែកសុខាភិបាលរបស់ Pfizer បានឱ្យដឹងនៅក្នុងសេចក្ដីប្រកាសរបស់ក្រុមហ៊ុន។

បេក្ខភាពថ្នាំព្យាបាល Covid-19 ថ្មីរបស់ Pfizer នេះ ឈរពីក្រោយបេក្ខភាពថ្នាំប្រឆាំងវីរុសប្រភេទគ្រាប់សម្រាប់លេបចំនួនពីរផ្សេងទៀត ដែលកំពុងស្ថិតក្នុងដំណាក់កាលសាកល្បង ក្នុងនោះមានបេក្ខភាពមួយគឺជាថ្នាំដែលត្រូវបានសហការអភិវឌ្ឍដោយក្រុមហ៊ុន Merck & Co និងក្រុមហ៊ុន Ridgeback Bio ខណៈបេក្ខភាពថ្នាំលេបទីពីរមកពីក្រុមហ៊ុន Roche Holding និង Atea Pharmaceuticals។

បច្ចុប្បន្ន remdesivir របស់ Gilead Sciences គឺជាប្រភេទថ្នាំតែមួយគត់ដែលត្រូវបាននាយកដ្ឋានគ្រប់គ្រងចំណីអាហារ និងថ្នាំពេទ្យអាមេរិក (FDA) ទទួលស្គាល់សម្រាប់ការព្យាបាល Covid-19។

FDA បានអនុញ្ញាតបន្ទាន់ឱ្យប្រើប្រាស់ថ្នាំអង្គបដិប្រាណ Eli Lilly-bamlanivimab ដោយប្រើប្រាស់ដោយឡែក ឬផ្សំជាមួយនឹង etesevimab និងការព្យាបាលមួយផ្សេងទៀតដែលរួមផ្សំជាមួយនឹងថ្នាំពីក្រុមហ៊ុន Regeneron៕

ប្រភព៖ Reuters, CNBC
ប្រែសម្រួល៖ បុត្រា

March 24, 2021

ស្ថានភាពគ្រោះទឹកជំនន់ធំបំផុតនៅអូស្ត្រាលី៖ ប្រជាជនចំនួន 40% ទទួលបានការព្រមានអំពីអាកាសធាតុអាក្រក់

ប្រទេសអូស្ត្រាលី ក្នុងថ្ងៃទី 23មីនានេះ បានចេញសេចក្ដីប្រកាសព័ត៌មានអំពីគ្រោះជំនន់ទឹកភ្លៀង និងបទបញ្ជាជម្លៀសប្រជាជនចំនួន 40% នៃពលរដ្ឋសរុបរបស់ប្រទេសនេះ នៅពេលមានភ្លៀងធ្លាក់ខ្លាំងជាបន្តបន្ទាប់នៅក្នុងតំបន់ជាច្រើននៅទូទាំងប្រទស។

គ្រោះជំនន់ទឹកភ្លៀង បង្កឱ្យមានការជនលិច និងគួចយកផ្ទះសម្បែង និងបំផ្លិចបំផ្លាញផ្លូវថ្នល និងកសិដ្ឋានរាប់មិនអស់របស់ប្រទេសអូស្ត្រាលី។ នាយកដ្ឋានព្យាករណ៍ឧតុនិយមជាតិ បានចេញសេចក្ដីព្រមានអំពីស្ថានភាពអាកាសធាតុអាក្រក់នៅគ្រប់រដ្ឋ និងតំបន់នានារបស់ទ្វីបនេះថា ពលរដ្ឋប្រមាណ 10លាននាក់ក្នុងចំណោម 25លាននាក់របស់អូស្ត្រាលី នឹងរងផលប៉ះពាល់ពីជំនន់ទឹកភ្លៀង។ នេះបើយោងតាមសារព័ត៌មាន CNN របស់សហរដ្ឋអាមេរិក។

នៅចំពោះមុខក្រុមអ្នកយកព័ត៌មាន នាយករដ្ឋមន្ត្រីអូស្ត្រាលី Scott Morrison បានថ្លែងថា៖ «ស្ថានភាពជំនន់ទឹកភ្លៀងនៅតែបន្តប្រែប្រួលយ៉ាងស្មុគស្មាញ និងខ្លាំងក្លាបំផុត»។

គិតមកដល់បច្ចុប្បន្ន មនុស្សរាប់ពាន់នាក់ត្រូវបានជួយសង្គ្រោះចេញពីតំបន់ជនលិចធ្ងន់ធ្ងរ ប៉ុន្តែមិនមានករណីស្លាប់ណាមួយត្រូវបានរាយការណ៍នៅឡើយ។ ជាសរុប មនុស្សចំនួន 18,000នាក់ត្រូវបានជម្លៀសចេញពីតំបន់ជនលិច និង 15,000នាក់ផ្សេងទៀត ត្រូវបាននាំទៅកាន់កន្លែងសុវត្ថិភាព។

ស្ថានភាពជំនន់ទឹកភ្លៀងនៅក្នុងរដ្ឋ New South Wales ត្រូវបានគេរាយការណ៍ថា មានសភាពធ្ងន់ធ្ងរជាងគេ ក្នុងនោះក៏មានករណីទឹកគួចបាក់ស្ពាន លិចផ្ទះសំបែង និងនាំឱ្យសត្វពាហនៈត្រូវជាប់ក្នុងទឹក។ល។

ប្រភព៖ CNN, Guardian, AP
ប្រែសម្រួល៖ បុត្រា

March 23, 2021

តៃវ៉ាន់ផ្អាករាល់ការហោះហើររបស់យន្តហោះយោធា ក្រោយករណីធ្លាក់យន្តហោះចម្បាំង

តៃវ៉ាន់ផ្អាករាល់សកម្មភាពហ្វឹកហាត់ និងការហោះហើររបស់ទ័ពអាកាស បន្ទាប់ពីមានគ្រោះថ្នាក់យន្តហោះចម្បាំង F-5E បណ្ដាលឱ្យអ្នកបើកបរយ៉ាងតិចមួយនាក់បានបាត់បង់ជីវិត។

«កងទ័ពការពារដែនអាកាសបានផ្អាករាល់សកម្មភាពហោះហើរ-ហ្វឹកហាត់ចំពោះយន្តហោះយោធា ដើម្បីវាយតម្លៃលើសុវត្ថិភាព ប៉ុន្តែ ភារកិច្ចត្រៀមខ្លួនជាស្រេចសម្រាប់ប្រយុទ្ធនៅតែរក្សាដូចដើម។ អង្គភាពការពារជាតិកំពុងស្វែងរកអ្នកបើកបរដែលបានបាត់ខ្លួនក្នុងអំឡុងពេល 72ម៉ោង» មេបញ្ជាការកងទ័ពការពារដែនអាកាសតៃវ៉ាន់ ឧត្តមសេនីយ៍ Huang Chih-wei បានឱ្យដឹងកាលពីម្សិលមិញ។

សេចក្ដីសម្រេចខាងលើត្រូវបានដាក់ចេញ ក្រោយពីករណីយន្តហោះចម្បាំង F-5E ចំនួនពីរគ្រឿង បានធ្លាក់ចូលសមុទ្រក្នុងពេលកំពុងហោះហើរហ្វឹកហាត់។ «ការស្រាវជ្រាវបឋមបានបង្ហាញថា នេះអាចជាករណីប៉ះទង្គិចគ្នានៅលើអាកាស ដោយមិនទទួលរងឥទ្ធិពលពីកត្តាបច្ចេកទេស និងអាកាសធាតុ» នេះបើតាមឧត្តមសេនីយ៍ Huang។

យន្តហោះចម្បាំង F-5E ពីរគ្រឿង បានធ្លាក់នៅលើលម្ហសមុទ្រភាគខាងកើតនៃស្រុក Pingtung ដែលស្ថិតនៅភាគខាងត្បូងនៃកោះតៃវ៉ាន់ ក្រោយពីបានប៉ះគ្នា។ អ្នកបើកបរម្នាក់ អាយុ 28ឆ្នាំ ត្រូវបានរកឃើញក្នុងស្ថានភាពដែលអាចនៅមានជីវិត ប៉ុន្តែ ការប្រឹងប្រែងក្នុងការជួយសង្គ្រោះជីវិតបានទទួលបរាជ័យ និងត្រូវបានគេបញ្ជាក់ថា បានស្លាប់នៅមន្ទីរពេទ្យ។

ចំណែកអ្នកបើកបរម្នាក់ទៀតដែលមានអាយុ 26ឆ្នាំ មិនទាន់ត្រូវបានរកឃើញនៅឡើយ។ ក្រុមមន្ត្រីតៃវ៉ាន់ បានបញ្ជូនឧទ្ធម្ភាគចក្រពីរគ្រឿង និងនាវាល្បាតចំនួន 6គ្រឿងដើម្បីស្វែងរកអ្នកបើកបរយន្តហោះដែលកំពុងបាត់ខ្លួន។

F-5 គឺជាយន្តហោះចម្បាំងធន់ស្រាល ត្រូវបានអភិវឌ្ឍដោយសហរដ្ឋអាមេរិកតាំងពីទសវត្សរ៍ 1972 ខណៈដែលកំណែ F-5E Tiger II បានហោះហើរដំបូងក្នុងអំឡុងទសវត្សរ៍ 1972។ តៃវ៉ាន់បានទទួល F-5E ដំបូងចាប់ពីឆ្នាំ 1975 ហើយបច្ចុប្បន្ន F-5E និងកំណែល្បាតប្រយុទ្ធ RF-5E ចំនួន 25គ្រឿងកំពុងត្រូវបានប្រើប្រាស់ ចំណែក 90-100គ្រឿងទៀត កំពុងស្ថិតក្នុងស្ថានភាពរក្សាទុកក្នុងឃ្លាំង។

កាលពីខែតុលា 2020 យន្តហោះចម្បាំង F-5E មួយគ្រឿងរបស់តៃវ៉ាន់ ក៏បានដាំក្បាលចូលសមុទ្រ ក្រោយពីមានបញ្ហាម៉ាស៊ីន បណ្ដាលឱ្យអ្នកបើកបរត្រូវបាត់បង់ជីវិត។ ខែធ្នូ ឆ្នាំដដែល អ្នកបើកបរ F-16 មួយគ្រឿងរបស់តៃវ៉ាន់ បានស្លាប់ ព្រោះតែយន្តហោះនេះបានធ្លាក់នៅពេលកំពុងធ្វើដំណើរទៅចូលរួមសកម្មភាពហ្វឹកហាត់នាពេលយប់។

ឧត្តមសេនីយ៍ Shen Yi-ming មេបញ្ជាការកងទ័ពតៃវ៉ាន់ រួមនឹងមន្ត្រីយោធា 7នាក់ផ្សេងទៀត ក៏បានបាត់បង់ជីវិតកាលពីខែមករា 2020 បន្ទាប់ពីឧទ្ធម្ភាគចក្រដែលដឹកពួកគេ បានបុកនឹងភ្នំ ក្នុងដំណើរទៅសួរសុខទុក្ខក្រុមទាហាននៅតំបន់ភ្នំ ក្បែរខាងទីក្រុងតៃប៉ិ៕

ប្រភព៖ AFP
ប្រែសម្រួល៖ បុត្រា

March 23, 2021

ស្អាតដូចតួកុន! ស្ត្រីចិនអ្នកបកប្រែ ដណ្ដើមបានចំណាប់អារម្មណ៍អ្នកតាមដាន កិច្ចប្រជុំមន្ត្រីជាន់ខ្ពស់ “ចិន-អាមេរិក”

កាលពី 8ឆ្នាំមុន កិច្ចប្រជុំក្នុងប្រធានបទដ៏វែងអន្លាយមួយស្ដីពី “ខ្លឹមសារដែលពាក់ព័ន្ធ និងចំណុចពិចារណា នៃផែនការកែសម្រួលស្ថាប័ន និងការធ្វើការងាររបស់សភានៃរដ្ឋ” របស់សភាប្រជាជននៃប្រជាជាតិចិន ដែលជាកិច្ចប្រជុំសម័យទី12 បានក្លាយជាព័ត៌មាន និងទទួលបានការចាប់អារម្មណ៍ពីសាធារណជនយ៉ាងច្រើនលើសលប់ និងមិនគួរឱ្យជឿ។

ប្រាកដណាស់! មិនមែនមកពីខ្លឹមសាររបស់កិច្ចប្រជុំនោះទេ តែដោយសារតែអ្នកបកប្រែស្រីស្អាតម្នាក់ ដែលមានឈ្មោះថា ចាងជីង ហ្នឹងឯង ដែលមកដល់ថ្ងៃនេះ នាងបានវិលមកល្បីល្បាញជាថ្មីម្ដងទៀតហើយ…។

ចាងជីង ជាអ្នកស្រុកហាំងចូ ចាប់ផ្ដើមចេញពន្លឺលេចធ្លោឡើង ដោយសារការរៀនផ្នែកភាសាបរទេស នៅមហាវិទ្យាល័យ ក្នុងស្រុកកំណើត រហូតត្រូវបានជ្រើសរើស ឱ្យទៅសិក្សាបន្តនៅឯស្ថាប័នការសិក្សាដ៏ល្បីល្បាញមួយ ជាមហាវិទ្យាល័យទំនាក់ទំនងអន្តរជាតិ ស្ថិតនៅក្នុងទីក្រុងប៉េកាំង ដែលតែងតែជ្រើសរើសចម្រាញ់យកតែនិស្សិតណា ដែលមានភាពលេចធ្លោជាពិសេសផ្នែកភាសា ចំនួន 200នាក់ ពីទូទាំងប្រទេស ឱ្យមកសិក្សាបន្ត ដើម្បីបំពេញតួនាទីលើផ្នែកការបរទេសរបស់រដ្ឋបាលចិន ហើយចាងជីង ក៏ជាមនុស្សម្នាក់ក្នុងចំណោមនោះដែរ។

លក្ខណសម្បត្តិផ្ទាល់ខ្លួន របស់ចាងជីង អាចនិយាយបានថា មានភាពលេចធ្លោ មកតាំងពីសម័យជានិស្សិតស្រាប់ទៅហើយ និងក្លាយជាទីគោរពរាប់អានរបស់សិស្សជំនាន់ប្អូនជាច្រើន ហើយថែមទាំងធ្លាប់បានចូលរួមប្រកួតប្រជែងជំនាញផ្នែកភាសា រហូតទទួលបានរង្វាន់លំដាប់ថ្នាក់ជាតិរួចមកហើយជាច្រើនដង រួមទាំងការដណ្ដើមបានរង្វាន់ ការថ្លែងសុន្ទរកថា ជាភាសាអង់គ្លេស កាលពីសម័យនៅជានិស្សិតទៀតផង។

រហូតនៅពេលបានទទួលការដាក់បញ្ចូលឈ្មោះជាមន្ត្រីរបស់រដ្ឋបាលចិន ចាងជីង ក៏បានបង្ហាញនូវភាពលេចធ្លោ ក្នុងការបំពេញតួនាទី នៅក្នុងកិច្ចប្រជុំក្នុងកម្រិតអន្តរជាតិ រហូតលេចចេញជាព័ត៌មាន ទាំងលើប្រព័ន្ធផ្សព្វផ្សាយរបស់ចិនខ្លួនឯង និងក្នុងសារព័ត៌មានអន្តរជាតិទៀតផង។

រហូតមកដល់ថ្ងៃនេះ ឈ្មោះចាងជីង បានវិលត្រឡប់មកក្លាយជាព័ត៌មានល្បីល្បាញជាថ្មីម្ដងទៀត ជាមួយការបំពេញតួនាទី ជាអ្នកបកប្រែនៅក្នុងកិច្ចប្រជុំពាណិជ្ជកម្មកំពូល រវាងចិន និងសហរដ្ឋអាមេរិក កាលពីពេលថ្មីៗនេះ។ ឃ្លីប ដែលចាងជីងបំពេញតួនាទី ដែលមានអ្នកទស្សនានៅក្នុងប្រទេសចិនដីគោករាប់សិបលានដង និងរឿងរ៉ាវ ជាមួយរូបភាពរបស់នាង ថែមទាំងត្រូវបានបង្ហាញឡើងនៅក្នុងប្រព្ធ័ន្ធផ្សព្វផ្សាយបរទេសជាច្រើនផងដែរ។

នៅក្នុងបទសម្ភាសមួយ ជាមួយប្រព័ន្ធផ្សព្វផ្សាយចិន ចាងជីង បានប្រាប់ថា នាងគ្រាន់តែជាជនជាតិចិនធម្មតាៗម្នាក់ ដែលចូលចិត្តអានវណ្ណកម្មរបស់ចិន និងតាំងចិត្តរៀនសូត្រតាមប្រក្រតីតែប៉ុណ្ណោះ។

អ្នកយកព័ត៌មាន បានសួរថា តើហេតុអីបានអ្នកនាង មើលទៅមានទឹកមុខ ហាក់ដូចជាមាំម៉ឺងម៉ាត់ ពេលបំពេញការងារ? ចាងជីងប្រាប់ថា ទឹកមុខដែលនាងធ្វើ គឺត្រូវការបង្ហាញភាពគួរឱ្យគោរពជឿជាក់ ដូច្នេះហើយទើបនាងមិនអាចញញឹមញញែម ឬសើចលេងអ្វីបានច្រើននោះទេ។

កំលោះៗជនជាតិចិនជាច្រើន សុទ្ធតែប្រាប់ថា ចាងជីង គឺជាស្ត្រីក្នុងក្ដីសុបិនរបស់ពួកគេយ៉ាងពិតប្រាកដ ចំណែកនារីៗជាច្រើននាក់វិញ ប្រាប់ថា នេះគឺជាកម្លាំងជំរុញចិត្តរបស់ពួកគេដូចគ្នា និងថែមទាំងមានអ្នកប្រាប់ថា រូបសម្ផស្សរបស់នាង មើលទៅហាក់ស្រដៀងនឹងតារាស៊ូភើរស្តាររបស់ចិនដីគោកម្នាក់ ឈ្មោះ ចៅវើយ មែនទែន៕

ប្រភព៖ សាព័ត៌មានបរទេស
ប្រែសម្រួលដោយ ទិទីតំតាតូ

March 23, 2021

Category: អន្តរជាតិ