អន្តរជាតិ - La Reine Media

មនុស្សវ័យកំលោះ-ក្រមុំ ប្រឈមខ្លាំង! អាល្លឺម៉ង់ កំណត់ការចាក់វ៉ាក់សាំង “អ៊ែស្ត្រាហ្សេនេកា” ចំពោះតែមនុស្សចាស់ អាយុ 60ឡើងប៉ុណ្ណោះ

ប្រទេសអាល្លឺម៉ង់ ចាប់ពីថ្ងៃពុធ ទី31 មីនាម្សិលមិញ បានកំណត់ការប្រើវ៉ាក់សាំងការពារកូវីដ-19 របស់អ៊ែស្ត្រាហ្សេនេកា ចំពោះតែបុគ្គលដែលមានអាយុ 60ឆ្នាំឡើង ដូចគ្នានឹងក្រុមគោលដៅចម្បងៗដទៃទៀត បន្ទាប់ពីមានរបាយការណ៍ពាក់ព័ន្ធនឹងភាពប្រឈមនឹងសភាវដុំឈាមញ៉ុកណែន។

លោកស្រី អ៊ែនជេឡា មើរកែល នាយករដ្ឋមន្ត្រីនៃប្រទេសអាល្លឺម៉ង់បានថ្លែងព័ត៌មានកាលពីថ្ងៃអង្គារម្សិលមិញថា “យើងចាំបាច់ត្រូវតែអាចជឿទុកចិត្តលើវ៉ាក់សាំងបាន ហើយភាពគ្មានការលាក់លៀម គឺជាវិធីដែលល្អបំផុត ក្នុងការទប់ទល់នឹងស្ថានការណ៍បែបនេះ”

ក្នុងសកម្មភាពដែលដំណើរការ ទៅតាមការណែនាំរបស់គណៈកម្មការផ្នែកវ៉ាក់សាំងរបស់អាល្លឺម៉ង់ ឬដែលហៅថា STIKO ខាងរដ្ឋមន្ត្រីក្រសួងសុខាភិបាលរបស់រដ្ឋបាលកណ្ដាល និងប្រចាំរដ្ឋផ្សេងៗ យល់ឃើញដូចគ្នាថា គួរតែឱ្យវ៉ាក់សាំងកូវីដ-19 របស់អ៊ែស្ត្រាហ្សេនេកា ចំពោះបុគ្គលដែលមានអាយុតិចជាង 60ឆ្នាំ នៅពេលដែលបុគ្គលទាំងនោះ ស្ថិតក្នុងក្រុមគោលដៅលំដាប់ដំបូងៗគេ ដែលក្នុងនោះរួមទាំងអ្នកជំងឺដែលមានភាពប្រឈមខ្ពស់ និងបុគ្គលិកសុខាភិបាល ក្រោមការណែនាំប្រឹក្សារបស់ពេទ្យ។

សម្រាប់បុគ្គលដែលមានអាយុទាបជាង 60ឆ្នាំ ដែលបានទទួលវ៉ាក់សាំងអ៊ែស្ត្រាហ្សេនេកា ដូសដំបូងរួចទៅហើយ មានជម្រើសគឺ ចាក់វ៉ាក់សាំងអ៊ែស្ត្រាហ្សេនេកា ដូសទី2 តាមផែនការចាស់ បើសិនជាពួកគេស្ថិតក្នុងក្រុមមនុស្សគោលដៅលំដាប់ដំបូងៗ ឬមិនទេ ក៏រង់ចាំឱ្យខាង STIKO ចេញការណែនាំម្ដងទៀតជាមុនសិន ដែលគេរំពឹងថា នឹងធ្វើឡើងក្នុងអំឡុងចុងខែមេសា។

ទាំងអស់នេះ STIKO កំពុងសម្លឹងមើលទៅដល់ភាពអាចទៅរួច របស់ការចាក់វ៉ាក់សាំង ដូសទី2 ដោយវ៉ាក់សាំងរបស់ក្រុមហ៊ុនផ្សេងជំនួសវិញ។

ការកំណត់ថ្មី ពាក់ព័ន្ធនឹងការប្រើវ៉ាក់សាំងរបស់អ៊ែស្ត្រាហ្សេនេកានេះ បានបង្កភាពខាតបង់ដល់គ្រោងការចាក់វ៉ាក់សាំងរបស់ប្រទេសអាល្លឺម៉ង់ ដោយសារតែកាលពីពេលមុននេះ បានដំណើរការយ៉ាងយឺតយ៉ាវស្រាប់រួចទៅហើយ។

យ៉ាងណាក៏ដោយ អាល្លឺម៉ង់ នឹងអនុញ្ញាតឱ្យបុគ្គលអាយុ 60ឆ្នាំឡើងទៅ ចាក់វ៉ាក់សាំងអ៊ែស្ត្រាហ្សេនេកា ក្នុងការព្យាយាមពន្លឿនគ្រោងការចាក់វ៉ាក់សាំងឱ្យប្រជាជនទូទៅ ដែលរហូតមកដល់ពេលនេះ ទើបតែស្ថិតក្នុងដំណាក់កាល ចាក់វ៉ាក់សាំងឱ្យមនុស្សចាស់ វ័យ 70ឆ្នាំឡើង និងបុគ្គលផ្សេងៗ ដែលស្ថិតក្នុងក្រុមគោលដៅលំដាប់ដំបូងៗគេប៉ុណ្ណោះ។

ការសម្រេចចិត្ត (ផ្អាកចាក់វ៉ាក់សាំងអ៊ែស្ត្រាហ្សេនេកា ឱ្យក្រុមមនុស្សវ័យកំលោះ-ក្រមុំ) នេះ ចាប់ផ្ដើមមានឡើង ក្រោយពីស្ថាប័ន Paul Ehrlich Institute ឬ PEI) ដែលជាអង្គភាពផ្នែកវ៉ាក់សាំង របស់ប្រទេស បានរាយការណ៍បន្ថែមពាក់ព័ន្ធនឹងករណីកំណកឈាមញ៉ុកណែន ដែលហៅថា សភាវសរសៃឈាមខ្មៅក្នុងខួរក្បាលញ៉ុកណែន(Cerebral Sinus Vein Thrombosis ឬ CSVT)។

ស្ថាប័ន PEI បានទទួលរបាយការណ៍ករណី CSVT ចំនួន 31ករណី ដែលលទ្ធផលក៏គឺ មានអ្នកស្លាប់ 9នាក់ ពីចំណោមប្រជាជនប្រមាណ 2.7លាននាក់ ដែលបានចាក់វ៉ាក់សាងអ៊ែស្ត្រាហ្សេនេកា ដោយទាំងអស់នេះ លើកលែង 2ករណី ពាក់ព័ន្ធនឹងស្ត្រី អាយុចន្លោះ20 ដល់ 63ឆ្នាំ។

គួរបញ្ជាក់ដែរថា ដោយសារតែការចាក់វ៉ាក់សាំងនៅក្នុងប្រទេសអាល្លឺម៉ង់ ក្នុងរយៈពេលដំបូងៗ បានកំណត់ការប្រើចំពោះតែបុគ្គលអាយុទាបជាង 65ឆ្នាំ ដូច្នេះទើបក្នុងបណ្ដាអ្នកដែលបានទទួលវ៉ាក់សាំងរួចហើយ សុទ្ធតែជាមនុស្សវ័យកំលោះ-ក្រមុំ ជាពិសេសបុគ្គលិកសុខាភិបាល និងក្រុមគ្រូបង្រៀន៕

ប្រភព៖ ទីភ្នាក់ងារព័ត៌មាន Reuters
ប្រែ និងសម្រួលដោយ តាវ៉ែនតា

April 2, 2021

រុស្ស៊ីចុះឈ្មោះថ្នាំព្យាបាលជំងឺCovid-19 ដោយប្រើប្រាស់ប្លាស្មាក្នុងឈាមអ្នកជំងឺ

ក្រសួងសុខាភិបាលរុស្ស៊ីបានអនុញ្ញាតឱ្យប្រើប្រាស់ប្រភេទថ្នាំព្យាបាលជំងឺCovid-19 ដែលត្រូវបានផលិតឡើងដោយយោងទៅតាមប្លាស្មា (plasma) ក្នុងឈាមរបស់អ្នកជំងឺCovid-19 ដែលបានជាសះស្បើយ។

ប្រភពព័ត៌មានពីទីក្រុងម៉ូស្គូ បានឱ្យដឹងថា ក្រសួងសុខាភិបាលរុស្ស៊ី បានអនុម័តឱ្យប្រើប្រាស់ globulin ការពារការឆ្លងជំងឺពិសេសដើម្បីព្យាបាលអ្នកជំងឺដែលមានផ្ទុកវីរុសCovid-19។ COVID-globulin នេះក្លាយជាថ្នាំព្យាបាលជំងឺCovid-19 ដែលត្រូវបានចុះឈ្មោះដំបូងគេក្នុងពិភពលោក។ ថ្នាំនេះត្រូវបានអភិវឌ្ឍ និងផលិតឡើងដោយក្រុមហ៊ុន Natsimbio ជាបុត្រសម្ព័ន្ធរបស់ក្រុមហ៊ុន Rostec និងដោយយោងទៅតាមប្លាស្មាក្នុងឈាមរបស់ពលរដ្ឋដែលបានឆ្លងវីរុសCovid-19។ ដើម្បីបង្កើតបានផលិតផលជាឱសថនេះ ក្រុមហ៊ុនត្រូវការវត្ថុធាតុជីវសាស្ត្រចំនួន 2.5តោន។

លទ្ធផលក្នុងដំណាក់កាលពិសោធន៍ ស្រាវជ្រាវលើថ្នាំនេះ បានបង្ហាញថា មានសុវត្ថិភាព មិនមានផលប៉ះពាល់ និងមានប្រសិទ្ធភាពរាំងខ្ទប់សកម្មភាពរបស់វីរុស។ ថ្នាំនេះនឹងត្រូវបានប្រើសម្រាប់អ្នកជំងឺដែលមានអាការពីមធ្យមដល់ធ្ងន់ បន្ទាប់ពីបានបញ្ចប់ការពិសោធន៍លើមនុស្សដំណាក់ទីមួយ និងទីពីរ ដែលតាមគម្រោងនឹងត្រូវចំណាយពេលប្រហែល6ខែ។

ធាតុផ្សំនានានៅក្នុងឈាម ក្នុងនោះមានប្លាស្មាផងដែរ

លោក Sergei Chemezov អគ្គនាយកប្រតិបត្តិរបស់ Rostec បានសង្កត់ធ្ងន់ថា ប្រភេទថ្នាំនេះ មិនមែនក្នុងបំណងបង្ការនោះទេ តែគឺដើម្បីព្យាបាលជំងឺCovid-19 តែម្ដង។ លោកបន្តថា ថ្នាំថ្មីនេះនឹងជួយជាកម្លាំងយ៉ាងខ្លាំងក្លាដល់ក្រុមគ្រូពេទ្យ នៅក្នុង «សមរភូមិ» ប្រយុទ្ធប្រឆាំង Covid-19។

“COVID-globulin” ទទួលបានការអនុញ្ញាតឱ្យប្រើប្រាស់ចំពោះអ្នកជំងឺដែលមានអាយុចាប់ពី 18 ដល់ 60ឆ្នាំ។ បច្ចុប្បន្ន ថ្នាំនេះកំពុងត្រូវបានប្រើប្រាស់នៅក្នុងរង្វង់នៃការពិសោធនៅតាមមន្ទីរពេទ្យក្នុងរដ្ឋធានីម៉ូស្គូ ដើម្បីព្យាបាលអ្នកជំងឺដែលមានអាការមធ្យម និងធ្ងន់ធ្ងរ។

ក្រៅពី Sputnik ប្រទេសរុស្ស៊ីក៏នៅមានវ៉ាក់សាំងមួយប្រភេទទៀត នោះគឺ EpiVacCorona ដែលត្រូវបានអភិវឌ្ឍដោយមជ្ឈមណ្ឌល Vector នៅ Novosibirsk។ វ៉ាក់សាំងនេះត្រូវបានចាប់ផ្ដើមផ្គត់ផ្គង់ដល់មន្ទីរពេទ្យនានានៅក្នុងសប្ដាហ៍នេះ ខណៈដែលវ៉ាក់សាំង KoviVac ដែលអភិវឌ្ឍដោយមជ្ឈមណ្ឌល Chumakov ក៏នឹងត្រូវដាក់ឱ្យប្រើប្រាស់នៅដើមខែមេសានេះដែរ។ នេះបើតាម Mikhail Murashko រដ្ឋមន្ត្រីក្រសួងសុខាភិបាលរុស្ស៊ី៕

ប្រភព៖ Tass
ប្រែសម្រួល៖ បុត្រា

April 2, 2021

ក្រសួងសុខាភិបាលវៀតណាម ត្រៀមសេណារីយ៉ោ សម្រាប់ “លិខិតឆ្លងដែនវ៉ាក់សាំង”

ក្រសួងសុខាភិបាលវៀតណាម កំពុងត្រៀមសិក្សាស្រាវជ្រាវដើម្បីធ្វើចត្តាឡីស័កឱ្យបានសមស្របសម្រាប់អ្នកដំណើរមកពីបរទេសដែលបានចាក់វ៉ាក់សាំងរួចរាល់ ទន្ទឹមនឹងការត្រៀមសេណារីយ៉ោសម្រាប់ការប្រើប្រាស់ «លិខិតឆ្លងដែនវ៉ាក់សាំង» នាពេលខាងមុខ។

គិតមកដល់ថ្ងៃទី 31មីនា 2021 នៅប្រទេសវៀតណាម មនុស្សចំនួន 49,743នាក់ បានទទួលការចាក់វ៉ាក់សាំងCovid-19 រួចរាល់ហើយ ក្នុងនោះមានមន្ត្រីក្រសួងសុខាភិបាល បុគ្គលិកសុខាភិបាលដែលកំពុងព្យាបាលអ្នកជំងឺCovid-19, បុគ្គលិកសុខាភិបាលផ្នែកយកសំណាក ផ្នែកធ្វើតេស្តសំណាក និងអ្នកតាមរកអ្នកជំងឺ, សមាជិកអង្គភាពគ្រប់គ្រងសហគមន៍Covid-19 និងគណៈកម្មការទប់ស្កាត់Covid-19។

វៀតណាម បច្ចុប្បន្នមានអ្នកវិជ្ជមាននឹង Covid-19 សរុបចំនួន 2,603នាក់ ក្នុងនោះមាន 35នាក់បានស្លាប់ និង 209នាក់កំពុងសម្រាកព្យាបាល។

ទាក់ទងនឹងបញ្ហា «លិខិតឆ្លងដែនវ៉ាក់សាំង» អនុរដ្ឋមន្ត្រីក្រសួងសុខាភិបាលវៀតណាម ឱ្យដឹងថា ក្រសួងកំពុងធ្វើការជាមួយក្រុមមន្ត្រីជំនួញ និងវិស័យសិក្សាស្រាវជ្រាវ ពិនិត្យរបាយការណ៍របស់គណៈកម្មការទប់ស្កាត់ Covid-19 និងរបាយការណ៍របស់រដ្ឋាភិបាល ដើម្បីធានាសុវត្ថិភាពជូនប្រជាជននៅពេលបើកទ្វារសេដ្ឋកិច្ច និងទទួលអ្នកដំណើរបរទេស។

ផែនការដំបូងរបស់វៀតណាម គឺការប្រើប្រាស់វិធីសាស្ត្រធ្វើចត្តាឡីស័កប្រកបដោយភាពសមស្របចំពោះអ្នកដំណើរពីបរទេសដែលបានចាក់វ៉ាក់សាំងរួចរាល់។ ទន្ទឹមនឹងនេះ ក្រសួងក៏កំពុងតែត្រៀមសេណារីយ៉ោសម្រាប់ការប្រើប្រាស់ «លិខិតឆ្លងដែនវ៉ាក់សាំង» នាពេលខាងមុខផងដែរ។

យ៉ាងណាក៏ដោយ អនុរដ្ឋមន្ត្រីក្រសួងសុខាភិបាលវៀតណាម បានបញ្ជាក់ថា បញ្ហា «លិខិតឆ្លងដែនវ៉ាក់សាំង» ត្រូវតែមានការពិនិត្យ ពិចារណាឱ្យបានម៉ត់ចត់រវាងផលប្រយោជន៍នឹងហានិភ័យ៕

ប្រភព៖ TP
ប្រែសម្រួល៖ បុត្រា

April 1, 2021

(វីដេអូ)-ប្រភពនៃផ្ទាំងថ្ម «យក្ស» ដ៏អាថ៌កំបាំងចំនួនពីរ នៅក្រោមសម្បកផែនដី

ការសិក្សាស្រាវជ្រាវថ្មីមួយបានបង្ហាញថា ផ្ទាំងថ្មធំៗចំនួនពីរដែលកំពុងស្ថិតនៅខាងក្រោមសម្បកផែនដីនាតំបន់អាហ្វ្រិកខាងលិច និងមហាសមុទ្រប៉ាស៊ីហ្វិក អាចជាបំណែករបស់ពិភពដទៃដែលបានបន្សល់ទុកកាលពីអតីតកាល។

ក្រុមអ្នកវិទ្យាសាស្ត្រជាច្រើនជឿថា ការកកើតនៃឋានព្រះចន្ទគឺបណ្ដាលមកពីភពមួយដែលមានទំហំប៉ុនភពព្រះអង្គារ ដែលគេដាក់ឈ្មោះថា Theia បានហោះមកបុកផែនដីកាលពី 4.5ពាន់លានដុល្លារមុន។ នៅក្នុងរបាយការណ៍មួយរបស់សាកលវិទ្យាល័យ Arizona នៃសហរដ្ឋអាមេរិក ក្រុមអ្នកវិទ្យាសាស្ត្របានឱ្យដឹងថា បំណែកនានារបស់ភព Theia ទំនងបានក្លាយជាថ្មដ៏មហិមាចំនួនពីរផ្ទាំងដែលមានទំហំប្រហាក់ប្រហែលនឹងទ្វីបមួយ កំពុងលាក់ខ្លួនយ៉ាងជ្រៅនៅក្នុងសម្បកផែនដី។ ផ្ទាំងថ្មនេះ មួយផ្ទាំងស្ថិតនៅខាងក្រោមនៃតំបន់ភាគខាងលិចរបស់ទ្វីបអាហ្វ្រិក និងមួយផ្ទាំងទៀតស្ថិតនៅក្រោមមហាសមុទ្រប៉ាស៊ីហ្វិក។

អស់ជាច្រើនទសវត្សរ៍មកហើយដែលក្រុមអ្នកវិទ្យាសាស្ត្រព្យាយាមស្វែងរកចម្លើយស្ដីអំពីប្រភពរបស់ផ្ទាំងថ្មចំនួនពីរនេះ។ ពួកវាមានកម្ពស់ដល់ 1,000គីឡូម៉ែត្រ និងលាតសន្ធឹងរាប់ពាន់គីឡូម៉ែត្រ។ ទាំងនេះគឺជាវត្ថុធំជាងគេបំផុតនៅក្នុងសម្បកផែនដី។

រលកសញ្ញាដែលកើតចេញពីគ្រោះរញ្ជួយដី បានបង្អង់ល្បឿនភ្លាមៗនៅពេលវាឆ្លងកាត់ផ្ទាំងថ្មទាំងនេះ។ ប្រការនេះបង្ហាញថា ពួកវាមានសភាពក្រាស់ជាង និងមានធាតុគីមីខុសប្លែកឆ្ងាយ បើធៀបនឹងស្រទាប់ថ្ម mantle ដែលនៅជុំវិញ។

ក្រុមអ្នកវិទ្យាសាស្ត្រ មុននេះយល់ថា ផ្ទាំងថ្មចំនួនពីរនេះគ្រាន់តែជាលទ្ធផលដែលកើតចេញពីសមុទ្រកំអែភ្នំភ្លើងកាលពីយុគសម័យដំបូងនៃផែនដីតែប៉ុណ្ណោះ។ ក៏ប៉ុន្តែ យោងតាមរូបមន្តនៃការគណនាថ្មី ក្រុមអ្នកស្រាវជ្រាវជឿថា ពួកវាគឺជាបំណែកបុរាណនានានៃស្រទាប់ដ៏ក្រាស់ និងសម្បូរធាតុដែករបស់ភព Theia ដែលបានបន្សល់ទុក ក្រោយពីបានហោះមកបុកនឹងផែនដី។

លទ្ធផលនៃការស្រាវជ្រាវខាងលើ ត្រូវបានប្រកាសតាមរយៈទស្សនាវដ្ដី Geophysical Research Letters នៃសមាគមភូគព្ភសាស្ត្រអាមេរិក (American Geophysical Union)៕

ប្រភព៖ Next, Dailymail
ប្រែសម្រួល៖ បុត្រា

April 1, 2021

វៀតណាមចាប់ផ្ដើមធ្វើជាប្រធានបន្តវេននៃក្រុមប្រឹក្សាសន្តិសុខរបស់អង្គការសហប្រជាជាតិ

ប្រទេសវៀតណាម ថ្ងៃនេះ (1មេសា 2021) ចាប់ផ្ដើមឡើងដឹកនាំក្រុមប្រឹក្សាសន្តិសុខនៃអង្គការសហប្រជាជាតិ ក្នុងឋានៈជាប្រធានបន្តវេនក្នុងរយៈពេល 4ខែ ជាមួយនឹងការសន្យាថា នឹងធ្វើជា «ដៃគូសហការដើម្បីសន្តិភាពយូរអង្វែង» និងស្វែងរកវិធីសាស្ត្រដើម្បីដោះស្រាយបញ្ហាប្រឈមនានានៃជម្លោះរវាងបណ្ដាប្រទេសក្នុងពិភពលោក។

ស្រាបពេលដែលវៀតណាមឡើងធ្វើជាប្រធានបន្តវេននៃក្រុមប្រឹក្សាសន្តិសុខ (UNSC/United Nations Security Council) ឧបនាយករដ្ឋមន្ត្រី រដ្ឋមន្ត្រីក្រសួងការបរទេសវៀតណាម លោក Pham Binh Minh បានឱ្យដឹងនៅក្នុងសេចក្ដីប្រកាសមួយនាថ្ងៃនេះថា៖ «ការសន្យារបស់វៀតណាម នោះគឺ ការស្វែងរកដំណោះស្រាយជាទីពេញចិត្ត និងយូរអង្វែងសម្រាប់ជម្លោះនានា ការជំរុញកិច្ចសន្ទនា និងដោះស្រាយជម្លោះដោយសន្តិវិធី»។

នេះគឺជាឆ្នាំទីពីរហើយដែលវៀតណាមមានវត្តមាននៅក្នុងក្រុមប្រឹក្សាសន្តិសុខនៃអង្គការសហប្រជាជាតិ ហើយក៏ជាលើកទីពីរដែលវៀតណាមបានក្លាយជាប្រធាននៃស្ថាប័នមួយនេះ។ ក្នុងឋានៈជាប្រធាន វៀតណាមនឹងត្រូវប្រារព្ធ ដឹកនាំ និងគ្រប់គ្រងកិច្ចប្រជុំប្រមាណ 30លើករបស់ក្រុមប្រឹក្សាសន្តិសុខ តំណាងក្រុមប្រឹក្សាសន្តិសុខ ជាមួយនឹងបណ្ដាប្រទេសជាសមាជិក រួមនឹងស្ថាប័ននានារបស់អង្គការសហប្រជាជាតិ អង្គការអន្តរជាតិ និងស្ថាប័នសារព័ត៌មាន។

ក្នុងចំណោមនោះ ប្រធានបន្តវេនរបស់ UNSC នឹងដឹកនាំកិច្ចប្រជុំសំខាន់ៗចំនួនបី នៅក្នុងអាណត្តិរបស់ខ្លួន ជាមួយនឹងការផ្ដោតទៅលើការពិភាក្សាបើកចំហជាន់ខ្ពស់ដែលនឹងធ្វើឡើងនៅថ្ងៃទី 19មេសា ឆ្នាំ2021 ជាមួយនឹងប្រធានបទ «បង្កើនកិច្ចសហប្រតិបត្តិការរវាងអង្គការសហប្រជាជាតិ និងអង្គការក្នុងតំបន់ ដើម្បីជំរុញជំនឿទុកចិត្ត និងកិច្ចសន្ទនាដើម្បីរកដំណោះស្រាយសម្រាប់ទប់ស្កាត់ ក៏ដូចជាដោះស្រាយជម្លោះនានា»។

កិច្ចប្រជុំរបស់ក្រុមប្រឹក្សាសន្តិសុខនៃអង្គការសហប្រជាជាតិ

«យើងពិតជាមានជំនឿចិត្តយ៉ាងមុតមាំថា វៀតណាមនឹងទទួលបានជោគជ័យក្នុងតួនាទីជាប្រធាន UNSC នៅក្នុងអាណត្តិខែមេសា/2021 ជាមួយនឹងការរួមចំណែក និងលទ្ធផលថ្មីដែលនឹងទទួលបាន» លោក Pham Binh Minh អះអាងដូច្នេះ។

សូមរំលឹក UNSC ដែលជាស្ថាប័នសំខាន់មួយក្នុងចំណោមស្ថាប័នសំខាន់ចំនួន 6 របស់អង្គការសហប្រជាជាតិ ត្រូវបានបង្កើតឡើងដើម្បីរក្សាសន្តិភាព និងសន្តិសុខរបស់ពិភពលោក។ UNSC មានសមាជិកចំនួន 15 ក្នុងនោះមាន 5ប្រទេសជាសមាជិកអចិន្ត្រៃយ៍ និង 10ប្រទេសជាសមាជិកដែលត្រូវបានបោះឆ្នោតជាអាណត្តិកាលពីរឆ្នាំ។

យោងតាមការកំណត់ ប្រទេសដែលនឹងក្លាយជាសមាជិកមិនអចិន្ត្រៃយ៍របស់ UNSC គឺត្រូវតែទទួលបានសំឡេងឆ្នោតគាំទ្រចំនួន ចាប់ពី 70% (ស្មើនឹងសន្លឹកឆ្នោតប្រមាណ ពី 128-129សំឡេង) ឡើងទៅ ពីបណ្ដាសមាជិកក្នុងអង្គការសហប្រជាជាតិ ដោយមិនរាប់សន្លឹកឆ្នោតមិនបានការ ឬប្រទេសដែលបានបាត់បង់សិទ្ធិបោះឆ្នោត។

វៀតណាមធ្លាប់ជាសមាជិកមិនអចិន្ត្រយ៍របស់ UNSC ក្នុងអាណត្តិឆ្នាំ 2008-2009 និងធ្វើជាប្រធាន ក.ស.ស ក្នុងខែកក្កដា/2008 និងខែតុលា/2009។ ថ្ងៃទី 7មិថុនា/2019 វៀតណាមត្រូវបានបោះឆ្នោតជាសមាជិកមិនអចិន្ត្រៃយ៍របស់ UNSC ជាលើកទីពីរ សម្រាប់អាណត្តិឆ្នាំ 2020-2021 ដោយទទួលបានសន្លឹកឆ្នោតគាំទ្រចំនួន 192/193សំឡេង។

តំណែងប្រធាននៃ UNSC ត្រូវបានផ្ទេរពីប្រទេសមួយទៅប្រទេសមួយ រវាងប្រទេសជាសមាជិកចំនួន 15 ទៅតាមលេខរៀងនៃតួអក្សរ ហើយប្រទេសនីមួយៗកាន់កាប់តំណែងកំពូលនេះបានពីរលើកក្នុងមួយអាណត្តិ៕

ប្រភព៖ VE
ប្រែសម្រួល៖ បុត្រា

April 1, 2021

AstraZeneca ប្ដូរឈ្មោះវ៉ាក់សាំងបង្ការវីរុស Covid-19 របស់ខ្លួន បន្ទាប់ពីជួបឧបសគ្គក្នុងទីផ្សារ

ក្រុមហ៊ុនផលិតឱសថ AstraZeneca បានប្ដូរឈ្មោះវ៉ាក់សាំងបង្ការវីរុស Covid-19 របស់ខ្លួន ពី “AstraZeneca Covid-19 Vaccine” ទៅជា “Vaxzevria”។

យោងតាម Russia Today ការផ្លាស់ប្ដូរនេះត្រូវបានធ្វើឡើងនៅក្នុងគ្រាដែលក្រុមហ៊ុនត្រូវជួបការលំបាកក្នុងការស្ដារ និងធានាទំនុកចិត្តថា វ៉ាក់សាំងបង្ការ Covid-19 របស់ខ្លួនពិតជាមានសុវត្ថិភាព។ ដំណឹងទាក់ទិននឹងបញ្ហាប៉ះពាល់មួយចំនួន ដូចជាការបង្កឱ្យមានកំណកឈាមមិនទាន់ដឹងមូលហេតុច្បាស់លាស់ ជាដើម បន្ទាប់ពីបានចាក់វ៉ាក់សាំងរបស់ក្រុមហ៊ុននេះ។

នៅក្នុងប្រកាសរបស់ខ្លួន AstraZeneca ឱ្យដឹងថា ការប្ដូរឈ្មោះនេះមិនទាក់ទងនឹងការផ្លាស់ប្ដូរវ៉ាក់សាំង។ ក្រុមហ៊ុនឱ្យដឹងថា បុគ្គលិកសុខាភិបាលគួរតែយកចិត្តទុកដាក់ទៅលើស្លាកសញ្ញាថ្មី ព្រោះថា ស្លាកសញ្ញា និងការវេចខ្ចប់នឹងខុសពីមុន។

ស្ថាប័នវិទ្យាសាស្ត្រអឺរ៉ុប បានយល់ព្រមជាមួយនឹងការប្ដូរឈ្មោះថ្មីរបស់វ៉ាក់សាំង AstraZeneca កាលពីសប្ដាហ៍កន្លងទៅ។

ចំណែក Covishield ដែលជាវ៉ាក់សាំងបង្ការ Covid-19 មួយផ្សេងទៀតដែលប្រើប្រាស់រូបមន្តដូចគ្នា ប៉ុន្តែត្រូវបានអភិវឌ្ឍទៅតាមកិច្ចសហការរវាង AstraZeneca និងវិទ្យាស្ថាន Serum ឥណ្ឌា នឹងនៅតែរក្សាឈ្មោះ (Covishield) ដដែល។

ឈ្មោះ Vaxzevria បង្ហាញខ្លួននៅក្នុងគ្រាដែលក្រុមហ៊ុន AstraZeneca ត្រូវទប់ទល់នឹងបញ្ហាជាច្រើនជុំវិញវ៉ាក់សាំងនេះ។ ប្រទេសជាង 10 នៅអឺរ៉ុបបានផ្អាកការប្រើប្រាស់វ៉ាក់សាំងរបស់ AstraZeneca ជាបណ្ដោះអាសន្ន ក្រោយពីមានករណីកកឈាម។ កាលពីថ្ងៃទី 29មីនា 2021 ប្រទេសកាណាដាក៏បានផ្អាកបណ្ដោះអាសន្នលើចាក់វ៉ាក់សាំងរបស់ AstraZeneca សម្រាប់មនុស្សក្រោមអាយុ 55ឆ្នាំ ព្រោះតែមានការព្រួយបារម្ភអំពីសុវត្ថិភាព។

ផ្ទុយទៅវិញ អង្គការសុខភាពពិភពលោក (WHO), ក្រុមមន្ត្រីនៅសហភាពអឺរ៉ុប និងក្រុមហ៊ុន AstraZeneca សុទ្ធតែបានអះអាងថា វ៉ាក់សាំង AstraZeneca មានសុវត្ថិភាព និងមិនទាក់ទងជាមួយនឹងបញ្ហាកំណកឈាមនោះឡើយ។

ក្រៅពីបញ្ហានៅក្នុងប្រទេសមួយចំនួន AstraZeneca ក៏ពើបប្រទះនឹងឧបសគ្គមួយទៀត ក្រោយពីក្រុមមេដឹកនាំស្ថាប័នសុខាភិបាលអាមេរិកមានការព្រួយបារម្ភថា ទិន្នន័យនៃការពិសោធរបស់ AstraZeneca ដើម្បីគណនាអំពីកម្រិតសុវត្ថិភាព បានហួសសម័យ និងបង្កឱ្យមានការយល់ច្រឡំ។ ជាងនេះ សហរដ្ឋអាមេរិកក៏មិនទាន់បានអនុញ្ញាតឱ្យប្រើប្រាស់បន្ទាន់ចំពោះវ៉ាក់សាំងរបស់ AstraZeneca នេះដែរ៕

ប្រភព៖ RT
ប្រែសម្រួល៖ បុត្រា

April 1, 2021

សហរដ្ឋអាមេរិកនឹងបង្កភាពងាយស្រួលច្រើនជាងមុន ដល់មន្ត្រីរបស់ខ្លួន ក្នុងការប្រស្រ័យទាក់ទងនឹងមន្ត្រីកោះតៃវ៉ាន់

រដ្ឋាភិបាលរបស់លោក Joe Biden ត្រៀមចេញសេចក្ដីប្រកាសលុបចោលឧបសគ្គនានា និងបង្កភាពងាយស្រួលដល់ក្រុមមន្ត្រីការបរទេសអាមេរិក ក្នុងការប្រស្រ័យទាក់ទង និងជួបប្រជុំជាមួយក្រុមមន្ត្រីកោះតៃវ៉ាន់។

ក្នុងអំឡុងប៉ុន្មានសប្ដាហ៍ចុងក្រោយនៅសេតវិមាន ប្រធានាធិបតី Donald Trump បានធ្វើការសម្រេចចិត្តលើបញ្ហាមួយចំនួនទាក់ទិននឹងការកាត់បន្ថយការរឹតត្បិតលើទំនាក់ទំនងរវាងអាមេរិក និងតៃវ៉ាន់។ ក្រុមអ្នកវិភាគកំពុងរង់ចាំលោក Biden ធ្វើការសម្រេចចិត្តបញ្ច្រាសនឹងដំណើរការរបស់លោក Trump នៅពេលបានឡើងកាន់អំណាច។

មេដឹកនាំកោះតៃវ៉ាន់ លោកស្រី Tsai Ing-wen (ស្ដាំ) និងលោក Alex Azar ជំនួយការផ្នែកសុខាភិបាលរបស់លោក Trump ដែលបានធ្វើទស្សនកិច្ចទីក្រុងតៃប៉ិកាលពីខែសីហា 2020

ក៏ប៉ុន្តែ ការពិនិត្យឡើងវិញបានបង្ហាញថា ការផ្លាស់ប្ដូរនៅក្នុងសម័យរបស់លោក Trump ទាក់ទងនឹងគោលនយោបាយខាងលើនឹងត្រូវរក្សាទុកដូចដើម។ សារព័ត៌មាន Financial Times ដកស្រង់ប្រភពព័ត៌មានសុំមិនបញ្ចេញឈ្មោះ បានឱ្យដឹងថា ការសម្រេចចិត្តថ្មីនឹងលើកទឹកចិត្តឱ្យក្រុមមន្ត្រីសហរដ្ឋអាមេរិក ជួបប្រស្រ័យទាក់ទងជាមួយនឹងក្រុមមន្ត្រីតៃវ៉ាន់ ជំនួសឱ្យការហាមឃាត់ ឬរឹតត្បិត។

មាត្រាច្បាប់ស្ដីអំពីការកាត់បន្ថយទំនាក់ទំនងរវាងក្រុមមន្ត្រីអាមេរិក ជាមួយនឹងក្រុមមន្ត្រីតៃវ៉ាន់ ត្រូវបានបង្កើតឡើងកាលពីឆ្នាំ 1979 បន្ទាប់ពីសហរដ្ឋអាមេរិកទទួលស្គាល់សាធារណរដ្ឋប្រជាមានិតចិន។ ប៉ុន្តែ មកដល់ខែមករា ឆ្នាំ2021 រដ្ឋមន្ត្រីការបរទេសអាមេរិក កាលណោះគឺលោក Mike Pompeo បានដកការរឹតត្បិតមួយចំនួនចេញពីមាត្រានេះ។

លោក Antony Blinken រដ្ឋមន្ត្រីការបរទេសសហរដ្ឋអាមេរិក ធ្លាប់បានថ្លែងថា លោកចង់បង្កភាពងាយស្រួលក្នុងការប្រស្រ័យទាក់ទងនឹងមន្ត្រីកោះតៃវ៉ាន់

កាលពីថ្ងៃទី 28មីនា នៅក្នុងឥរិយាបថដោយខុសប្រក្រតីមួយ ឯកអគ្គរដ្ឋទូតអាមេរិកប្រចាំនៅប្រទេស ផៅឡូ (Palau) លោក John Hennessey-Niland បានធ្វើដំណើរទៅកាន់កោះតៃវ៉ាន់ ក្នុងនាមជាអ្នករួមដំណើរជាមួយប្រធានាធិបតីរបស់ ផៅឡូ (ផៅឡូ គឺជាប្រទេសមួយក្នុងចំណោមប្រទេសចំនួន 15ដែលគាំទ្រតៃវ៉ាន់ និងមានទំនាក់ទំនងការទូតជាមួយកោះនេះ)។ ភ្លាមនោះ ប្រទេសចិនក៏បានប្រតិកម្ម ដោយបានបញ្ជូនយន្តហោះចម្បាំងចំនួន 10គ្រឿងទៅកាន់តំបន់កំណត់អត្តសញ្ញាណការពារដែនអាកាសរបស់តៃវ៉ាន់៕

ប្រភព៖ Finnacial Times
ប្រែសម្រួល៖ បុត្រា

March 31, 2021

(វីដេអូ)-ស្ត្រីដើមកំណើតអាស៊ីម្នាក់ទៀតហើយ ត្រូវគេវាយរហូតដល់ដេកដួលលើដងផ្លូវដែលមានមនុស្សច្រើន

ស្ត្រីដើមកំណើតអាស៊ីម្នាក់ អាយុ 65ឆ្នាំ ត្រូវបានបុរសជនជាតិស្បែកខ្មៅម្នាក់ទាត់ធាក់ចំពោះ និងចំក្បាល នៅលើដងផ្លូវដែលមានមនុស្សច្រើន ប៉ុន្តែពុំមានអ្នកណាម្នាក់ចូលជួយសោះឡើយ។

កម្លាំងពិសេសប្រឆាំងបទល្មើសស្អប់ខ្ពើម និងរើសអើងនៃការិយាល័យប៉ូលិសក្រុង New York កាលពីថ្ងៃទី 30មីនា បានឱ្យដឹងថា ស្ត្រីដើមកំណើតអាស៊ី វ័យ 65ឆ្នាំខាងលើ ត្រូវបានគេវាយប្រហារដោយមិនមានហេតុផលនៅវេលាម៉ោងប្រហែល 11 និង40នាទី ថ្ងៃទី 29មីនា ឆ្នាំ2021 នៅលើដងផ្លូវក្នុងតំបន់ Manhattan នៃទីក្រុង New York សហរដ្ឋអាមេរិក។

ប៉ូលិសក្រុង New York បន្ទាប់មកក៏បានបញ្ចេញវីដេអូបង្ហាញអំពីសកម្មភាពខាងលើ ក្នុងនោះគេឃើញបុរសស្បែកខ្មៅម្នាក់ មានមាឌធំ ខ្ពស់ បានធាក់ទៅលើពោះ បណ្ដាលឱ្យស្ត្រីដើមកំណើតអាស៊ីត្រូវដួលទៅលើដី។ ជនដៃដល់នេះក៏បន្តទាត់ទៅលើក្បាលស្ត្រីរងគ្រោះជាបន្តបន្ទាប់ និងបានជេរប្រមាថជនជាតិអាស៊ីទៀតផង។

នៅពេលកើតហេតុ មានមនុស្សយ៉ាងតិចចំនួន 3នាក់កំពុងនៅក្បែរនោះ ប៉ុន្តែពុំមានអ្នកណាចូលជួយឡើយ។ ជាងនេះ មានអ្នកខ្លះប្រញាប់បិទទ្វារ នៅពេលជនដៃដល់បានចាកចេញ បើទោះស្ត្រីរងគ្រោះនៅដេកដួលលើដី។

ស្ត្រីរងគ្រោះ បន្ទាប់មកក៏ «ត្រូវបានបញ្ជូនទៅកាន់មន្ទីរពេទ្យ NYU Langone» នេះបើតាមការិយាល័យប៉ូលិសក្រុង New York។ បច្ចុប្បន្ន សមត្ថកិច្ចកំពុងតាមរកជនដៃដល់។

ក្រុមហ៊ុន Brodsky ដែលជាអ្នកគ្រប់គ្រងអគារកើតហេតុខាងលើ បានប្រកាសថ្កោលទោសចំពោះអំពើហិង្សា ការរើសអើងពូជសាសន៍ និងការស្អប់ខ្ពើមជនជាតិអាស៊ី។ ក្រុមហ៊ុនក៏បានផ្អាកការងារចំពោះបុគ្គលិកមួយចំនួនដែលបានឃើញហេតុការណ៍ប៉ុន្តែមិនបានចូលជួយស្ត្រីរងគ្រោះ។

ហេតុការណ៍ដែលបានកើតឡើងកាលពីថ្ងៃទី 29មីនានេះ គឺជាករណីវាយប្រហារថ្មីបំផុតសំដៅលើជនជាតិអាស៊ីនៅសហរដ្ឋអាមេរិក។ លទ្ធផលនៃការស្រាវជ្រាវទៅលើទិន្នន័យរបស់ការិយាល័យប៉ូលិសក្រុង New York បានបង្ហាញថា បទល្មើសស្អប់ខ្ពើម និងប្រឆាំងចំពោះជនជាតិដើមកំណើតអាស៊ី បានកើនឡើងច្រើននៅក្នុងទីក្រុងចំនួន 16 របស់សហរដ្ឋអាមេរិក ក្នុងអំឡុងឆ្នាំ 2020។

មជ្ឈមណ្ឌលស្រាវជ្រាវអំពីការស្អប់ខ្ពើម និងជ្រុលនិយម ប្រចាំសាកលវិទ្យាល័យរដ្ឋ California ក៏បានបញ្ចេញរបាយការណ៍ឱ្យដឹងថា បទល្មើសប្រឆាំងជនជាតិអាមេរិកាំងដើមកំណើតអាស៊ីនៅសហរដ្ឋអាមេរិក បានកើនឡើងដល់ 150% កាលពីឆ្នាំមុន៕

ប្រភព៖ NBC
ប្រែសម្រួល៖ បុត្រា

March 31, 2021

នាយករដ្ឋមន្ត្រីស្លូវ៉ាគី Igor Matovic លាលែងពីតំណែងជាផ្លូវការ ដោយសារបញ្ហាCovid-19

កាលពីថ្ងៃទី 30មីនាកន្លងទៅ នាយករដ្ឋមន្ត្រីនៃប្រទេសស្លូវ៉ាគី លោក Igor Matovic បានលាលែងពីតំណែង បើកផ្លូវឱ្យមានការបង្កើតរដ្ឋាភិបាលថ្មី ក្រោយពីវិបត្តិនយោបាយ និងសុខភាពដែលបានអូសបន្លាយពេលពេញមួយខែ។

ប្រធានាធិបតីស្លូវ៉ាគី លោកស្រី Zuzana Caputova បានប្រគល់ភារកិច្ចទៅឱ្យរដ្ឋមន្ត្រីក្រសួងហិរញ្ញវត្ថុ Eduard Heger ក្នុងការបង្កើតរដ្ឋាភិបាលថ្មី។ គណបក្សចំនួន 4 ដែលស្ថិតក្នុងសម្ព័ន្ធភាពកាន់អំណាច បានយល់ព្រមចូលរួមបង្កើតគណៈរដ្ឋមន្ត្រីថ្មី ជាមួយនឹងលោក Heger ដើម្បីបន្តដឹកនាំប្រទេស។

លោក Eduard Heger វ័យ 44ឆ្នាំ ជាអតីតអ្នកជំនួញ និងធ្លាប់ជាទីប្រឹក្សារបស់ក្រសួងការពារជាតិនៃប្រទេសស្លូវ៉ាគី។ លោក Eduard Heger ត្រូវបានតែងតាំងជារដ្ឋមន្ត្រីក្រសួងហិរញ្ញវត្ថុកាលពីខែមីនា ឆ្នាំ2020 នៅពេលបក្ស OĽaNO របស់លោក និងនាយករដ្ឋមន្ត្រី Matovic ដណ្ដើមបានជ័យជំនះនៅក្នុងការបោះឆ្នោត។ បច្ចុប្បន្ន លោក Heger ក៏ជារដ្ឋមន្ត្រីស្ដីទីនៃក្រសួងសុខាភិបាលផងដែរ។

កន្លងមក ការសម្រេចចិត្តរបស់លោក Matovic ក្នុងការទិញវ៉ាក់សាំង SputnikV ពីប្រទេសរុស្ស៊ី បាននាំឱ្យមានការខ្វែងគំនិតគ្នាផ្នែកនយោបាយ ក្នុងនោះអតីតរដ្ឋមន្ត្រីការបរទេស លោក Ivan Korcok បានហៅវ៉ាក់សាំងនេះថាជា «ឧបករណ៍សង្គ្រាមកូនកាត់»។ ប្រព័ន្ធសុខាភិបាលរបស់ស្លូវ៉ាគី បាន និងកំពុងប្រឈមនឹងបញ្ហាជាច្រើនក្នុងរលកទីបីនៃវិបត្តិសុខភាព Covid-19 ហើយប្រទេសនេះក៏កំពុងមានអត្រានៃការស្លាប់ស្ថិតក្នុងកម្រិតខ្ពស់បំផុតនៅក្នុងពិភពលោក ដោយសារវីរុសនេះ បើគិតតាមភាគរយនៃចំនួនប្រជាជន។

ចាប់តាំងពីមានវិបត្តិមកដល់បច្ចុប្បន្ន មានរដ្ឋមន្ត្រីចំនួន 6រូបហើយ បានចាកចេញពីគណៈរដ្ឋមន្ត្រីដែលមានសមាជិកចំនួន 16រូបនេះ។ ការលាលែងពីតំណែងនោះក៏មានរដ្ឋមន្ត្រីក្រសួងសុខាភិបាលផងដែរ។

ការស្ទង់មតិកាលពីថ្ងៃទី 21 មីនា បានបង្ហាញថា ជាង 80% នៃប្រជាជនស្លូវ៉ាគី បានឯកភាពថា លោកនាយករដ្ឋមន្ត្រី Igor Matovic គួរតែចុះចេញពីតំណែង៕

ប្រភព៖ Euro News
ប្រែសម្រួល៖ បុត្រា

March 31, 2021

មនុស្សជាង500នាក់បានស្លាប់ក្នុងការបង្ក្រាបបាតុកម្មនៅប្រទេសមីយ៉ានម៉ា

យ៉ាងហោចណាស់ មានមនុស្សចំនួន 510នាក់បានស្លាប់នៅក្នុងបាតុកកម្មប្រឆាំងរដ្ឋប្រហារយោធានៅភូមា (មីយ៉ានម៉ា) ក្នុងអំឡុងជិតពីរខែកន្លងទៅនេះ ខណៈដែលមនុស្សរាប់ម៉ឺននាក់នៅតែបន្តចេញធ្វើបាតុកម្ម។

សមាគមជួយសង្គ្រោះអ្នកទោសនយោបាយ (AAPP) បានឱ្យដឹងថា មនុស្សចំនួន 14នាក់បានស្លាប់នៅក្នុងបាតុកម្មកាលពីម្សិលមិញ (29មីនា) ក្នុងនោះមានយ៉ាងតិច 8នាក់ នៅជាយក្រុង Yangon ដែលជាទីក្រុងធំជាងគេនៅមីយ៉ានម៉ា។

យោងតាមសាក្សី និងវីដេអូដែលបានបង្ហោះលើបណ្ដាញសង្គម កងកម្លាំងប៉ូលិសបានប្រើប្រាស់អាវុធធុនធ្ងន់ជាច្រើនលើកដើម្បីបំបែកលេណដ្ឋានធ្វើអំពីការុងដាក់ខ្យាច់របស់ក្រុមបាតុករ។ បច្ចុប្បន្ន មិនទាន់ដឹងថា នេះគឺជាអាវុធអ្វីនៅឡើយ ប៉ុន្តែ ក្រុមសហគមន៍នៅលើបណ្ដាញសង្គមមួយបានបង្ហោះរូបថតទាហានម្នាក់កាន់កាំភ្លើងបាញ់ផ្លោងគ្រាប់បែក។

AAPP បានចាត់ទុកថា ថ្ងៃទី 27មីនា គឺជាថ្ងៃបង្ហូរឈាមបំផុតរាប់ចាប់ពីមានបាតុកម្មកើតឡើង ដោយសារតែមានមនុស្សស្លាប់រហូតដល់ 141នាក់។ បើទោះជាត្រូវប្រឈមនឹងសេចក្ដីស្លាប់ ប៉ុន្តែក្រុមបាតុករនៅតែបន្តចេញធ្វើបាតុកម្មនៅថ្ងៃទី29មីនាដដែល។ បច្ចុប្បន្ន តួលេខជនស៊ីវិលដែលបានស្លាប់ក្នុងការបង្រាបបាតុកម្មនៅមីយ៉ានម៉ា ក្នុងរយៈពេលជិតពីរខែមកនេះ បានកើនឡើងដល់ 512នាក់។

ក្រៅពីត្រូវបង្រាបបាតុករដែលជាគូប្រជែងផ្នែកនយោបាយរបស់ខ្លួន កងទ័ពមីយ៉ានម៉ា បច្ចុប្បន្នក៏ត្រូវទប់ទល់នឹងកងកម្លាំងប្រដាប់អាវុធរបស់ក្រុមជនជាតិភាគតិចផងដែរ។ ក្នុងរយៈពេលជាច្រើនថ្ងៃមកនេះ ការផ្ទុះអាវុធដាក់គ្នារវាងកងទ័ពមីយ៉ានម៉ា និងកងកម្លាំងប្រដាប់អាវុធនៃសម្ព័ន្ធជាតិការ៉ែន (Karen National Union / KNU) បានកើតឡើងនៅតាមបន្ទាត់ព្រំដែនជាប់ជាមួយប្រទេសថៃ។ ការប៉ះទង្គិចគ្នានេះបានបណ្ដាលឱ្យមនុស្សប្រមាណ 3,000នាក់ រត់ភៀសខ្លួនចូលប្រទេសថៃ នៅពេលយន្តហោះទម្លាក់គ្រាប់បែកលើតំបន់របស់ក្រុម KNU បន្ទាប់ពីក្រុមនេះសម្រុកចូលទៅកាន់ប៉ុស្ដិ៍យោធាមួយ និងបានសម្លាប់មនុស្ស 10នាក់៕

ប្រភព៖ Reuters
ប្រែសម្រួល៖ បុត្រា

March 30, 2021

Category: អន្តរជាតិ