អន្តរជាតិ - La Reine Media

អ្នកជំងឺCovid-19 ដំបូងគេដែលត្រូវបានវះកាត់ប្ដូរសួតពីស្វាមី និងកូន

ជប៉ុន៖ ស្ត្រីម្នាក់នៅតំបន់ Kansai ដែលទើបត្រូវបានវះកាត់ដាក់សួតរបស់ស្វាមី និងកូនប្រុស បានក្លាយជាអ្នកជំងឺCovid-19 ដំបូងគេក្នុងពិភពលោក ដែលត្រូវបានប្ដូរសួតពីអ្នកបរិច្ចាគដែលនៅរស់។

មន្ទីរពេទ្យនៃសាកលវិទ្យាល័យវេជ្ជសាស្ត្រ Kyoto កាលពីថ្ងៃទី8 ខែមេសា បានប្រកាសថា បានទទួលជោគជ័យក្នុងការវះកាត់ប្ដូរ និងភ្ជាប់សួតជូនអ្នកជំងឺCovid-19 ម្នាក់។ ការវះកាត់នេះត្រូវចំណាយពេលអស់11ម៉ោង និងមានការចូលរួមពីវេជ្ជបណ្ឌិត និងក្រុមគ្រូពេទ្យរហូតដល់ 30នាក់។

ការវះកាត់ខាងលើ ត្រូវបានធ្វើឡើងកាលពីថ្ងៃទី7មេសា ហើយអ្នកជំងឺនេះត្រូវបានវះកាត់ភ្ជាប់សួតដែលបានមកពីស្វាមី និងកូនប្រុសរបស់គាត់។ មន្ទីរពេទ្យខាងលើបានអះអាងថា នេះគឺជាអ្នកជំងឺCovid-19 ដំបូងគេក្នុងពិភពលោកដែលត្រូវបានប្ដូរសួតពីមនុស្សនៅរស់។

វេជ្ជបណ្ឌិត Hiroshi Date ដែលជាអ្នកទទួលខុសត្រូវលើការវះកាត់ បានឱ្យដឹងថា ជោគជ័យនេះបាននាំមកនូវក្ដីសង្ឃឹមសម្រាប់អ្នកជំងឺដែលរងរបួសសួតធ្ងន់ធ្ងរដោយសារ Covid-19។

ស្ត្រីអ្នកជំងឺ មិនត្រូវបានគេឱ្យដឹងអំពីអត្តសញ្ញាណនោះទេ ប៉ុន្តែ ជាពលរដ្ឋរស់នៅក្នុងតំបន់ Kansai ភាគខាងលិចប្រទេសជប៉ុន។ សួតរបស់អ្នកជំងឺនេះ ត្រូវខូចខាតយ៉ាងធ្ងន់ធ្ងរ បន្ទាប់ពីបានឆ្លងវីរុសCovid-19 កាលពីចុងឆ្នាំ2020 និងត្រូវតែវះកាត់ប្ដូរសួតដើម្បីរក្សាជីវិត។

ស្វាមី និងកូនប្រុសរបស់អ្នកជំងឺ សុទ្ធតែកំពុងស្ថិតក្នុងស្ថានភាពសុខភាពល្អបន្ទាប់ពីបានបរិច្ចាគសួត។ ភាគីខាងមន្ទីរពេទ្យឱ្យដឹងថា ស្ត្រីជាអ្នកជំងឺនេះ នឹងអាចចាកចេញពីពេទ្យ ក្រោយរយៈពេលប្រហែលពីរខែទៀត៕

ប្រភព៖ CNN
ប្រែសម្រួល៖ បុត្រា

April 9, 2021

(វេដេអូ)-បាតុកម្មនៅកៀហ្ស៊ីស៊ីស្ថាន បន្ទាប់ពីនារីក្រមុំម្នាក់ត្រូវគេសម្លាប់ ក្រោយពីត្រូវចាប់ជំរិតតាម «ទម្លាប់បុរាណ» ដើម្បីយកទៅរៀបការ

នារីវ័យក្មេងម្នាក់ ត្រូវគេច្របាច់ករហូតដល់ស្លាប់ បន្ទាប់ពីនាងប្រតិកម្មតបតនឹងបុរសមួយក្រុមដែលបានចាប់ជំរិត និងបង្ខំឱ្យនាងរៀបការ ដែលទង្វើនេះ ត្រូវបានចាត់ទុកថា ជាទម្លាប់អាក្រក់ដែលបន្សល់ពីមនុស្សសម័យបុរាណនៃប្រទេសកៀហ្ស៊ីស៊ីស្ថាន។

សកម្មភាពដែលថតបានដោយកាមេរ៉ាសុវត្ថិភាព បានបង្ហាញថា នាង Aizada Kanatbekova អាយុ 27ឆ្នាំ ត្រូវបានបុរសមួយក្រុមស្ទាក់ផ្លូវ និងចាប់ខ្លួននៅលើដងផ្លូវក្នុងរដ្ឋធានី Bishkek នៃប្រទេសកៀហ្ស៊ីស៊ីស្ថាន (Kyrgyzstan) នៅពេលនាងកំពុងបើកបររថយន្តត្រលប់មកផ្ទះ កាលពីថ្ងៃទី5មីនា។

ដំបូងឡើយ បុរសម្នាក់បានព្យាយាមទាញនាងទៅកាន់រថយន្តពណ៌ក្រហមរបស់ពួកគេ ប៉ុន្តែ ដោយសារនាងមិនព្រម ក៏ស្រាប់តែមានបុរសម្នាក់ទៀតបានចូលមកក្បែរ ជួយលើក និងរុញនាងចូលឡាន។ ក្រុមនេះនៅមានបុរសម្នាក់ទៀត ដែលទំនងជាអ្នកចាំមើលស្ថានភាពជុំវិញ។ ជនម្នាក់នេះក៏បានជួយបើកទ្វាររថយន្តដើម្បីឱ្យជនពីរនាក់ទៀត រុញនារីរងគ្រោះចូលក្នុងឡានពណ៌ក្រហម។

នាង Aizada Kanatbekova ត្រូវបានគេជឿថា ជាជនរងគ្រោះនៃអំពើ «ចាប់ជំរិតបង្ខំឱ្យរៀបការ»។ ពីរថ្ងៃក្រោយមក សាកសពរបស់នាងក៏ត្រូវគេរកឃើញនៅជាយក្រុង Bishkek។ ប៉ូលិសបានឱ្យដឹងថា នាងត្រូវគេសម្លាប់ដោយការច្របាច់ក។

ជនដៃដល់នាំមុខគេក្នុងការចាប់ខ្លួន និងសម្លាប់នាង Kanatbekova នោះគឺជាបុរសវវ័យ 36ឆ្នាំម្នាក់ ដែលត្រូវគេរកឃើញថាបានស្លាប់ផងដែរ។ ចំណែកជនដៃដល់មួយចំនួនទៀត ក៏ត្រូវបានចាប់ខ្លួន និងកំពុងរង់ចាំឡើងតុលាការ។ នេះបើតាមទូរទស្សន៍ជាតិ កៀហ្ស៊ីស៊ីស្ថាន។

ករណីខាងលើនេះ បាននាំឱ្យមានការក្ដៅក្រហាយពីប្រជាជននៅកៀហ្ស៊ីស៊ីស្ថានផងដែរ។ មនុស្សប្រមាណជាង 500នាក់ បាននាំគ្នាចេញធ្វើបាតុកម្មនៅក្នុងរដ្ឋធានី Bishkek កាលពីថ្ងៃទី8មេសា ដោយទាមទាររកយុត្តិធម៌ជូននាង Kanatbekova ព្រមទាំងបានស្នើឱ្យស្នងការប៉ូលិស ចុះចេញពីតំណែងទៀតផង។

ការធ្វើបាតុកម្មទាមទារខាងលើនេះ ក៏ព្រោះតែប៉ូលិសមិនបានជួយនារីរងគ្រោះឱ្យទាន់ពេល បើទោះជាសកម្មភាពចាប់ជំរិតត្រូវបានកាមេរ៉ាសុវត្ថិភាពថតជាប់យ៉ាងច្បាស់ក៏ដោយ។

អំពើចាប់កូនក្រមុំគេមករៀបការ ឬភាសាក្នុងស្រុកហៅថា Ala Kachuu គឺជាទម្លាប់មួយដែលមានតាំងពីយូរយារមកហើយនៅប្រទេស កៀហ្ស៊ីស៊ីស្ថាន ហើយវាបានអូសបន្លាយដល់សព្វថ្ងៃ បើទោះជាស្ថិតក្នុងទ្រង់ទ្រាយតូចក្ដី។ ទម្លាប់នេះ អនុញ្ញាតឱ្យពួកបុរសចាប់នារីណាម្នាក់ដែលខ្លួនពេញចិត្ត យកមកផ្ទះ និងបង្ខំឱ្យនាងយល់ព្រមរៀបការជាលាយលក្ខណ៍អក្សរ៕

ប្រភព៖ Daily Mail
ប្រែសម្រួល៖ បុត្រា

April 9, 2021

ពលរដ្ឋអាមេរិក ជិត20% បានចាក់វ៉ាក់សាំងបង្ការ Covid-19 រួចរាល់ហើយ

យោងតាមសារព័ត៌មានក្នុងស្រុក សហរដ្ឋអាមេរិក បច្ចុប្បន្ន បានចាក់វ៉ាក់សាំងបង្ការវីរុសCovid-19 ជូនដល់ពលរដ្ឋរបស់ខ្លួនប្រមាណ 66លាននាក់រួចហើយ ខណៈដែលអ្នកជំងឺចំនួន 573,849នាក់បានស្លាប់ដោយសារវីរុសនេះ។

គិតមកដល់ថ្ងៃទី8មេសា ពលរដ្ឋជិត20% នៅសហរដ្ឋអាមេរិក បានទទួលការចាក់វ៉ាក់សាំងបង្ការ Covid-19 រួចរាល់ ដែលនេះបាននាំមកនូវ «ខែលការពារ» ដល់មនុស្សប្រមាណ 66លាននាក់ ក្នុងចំណោមប្រជាជនសរុបជាង 331,002,600នាក់។

កម្មវិធីចាក់វ៉ាក់សាំងបង្ការ Covid-19 របស់សហរដ្ឋអាមេរិក ត្រូវបានជំរុញយ៉ាងខ្លាំងក្លា ដោយនៅក្នុងនោះ មានវ៉ាក់សាំងជិត 175លានដូស ត្រូវបានប្រើប្រាស់ចាប់តាំងពីខែធ្នូ ឆ្នាំមុន។ ពលរដ្ឋអាមេរិកាំងជាង 112លាននាក់ ពោលគឺជាង 1/3 នៃប្រជាជនសរុប បានចាក់វ៉ាក់សាំងបង្ការ Covid-19 យ៉ាងតិចចំនួន 1ដូសរួចរាល់ហើយ។ នេះបើតាមមជ្ឈមណ្ឌលគ្រប់គ្រង និងទប់ស្កាត់រោគឆ្លង (CDC) របស់សហរដ្ឋអាមេរិក។

ដោយឡែក ក្រុមមន្ត្រីនៅ New York បានឱ្យដឹងថា អាជ្ញាធរនៃរដ្ឋនេះនឹងផ្ដល់ជំនួយជាទឹកប្រាក់រហូតដល់ 15,600ដុល្លារ ដល់ពលករគ្មានលិខិតស្នាមទាំងឡាយដែលរងផលប៉ះពាល់ដោយសារ Covid-19។ កាយវិការនេះអាចនាំមកនូវផលប្រយោជន៍ដល់មនុស្សជិត 300,000នាក់ នៅក្នុងរដ្ឋ New York។

គិតមកដល់បច្ចុប្បន្ន សហរដ្ឋអាមេរិកបានរកឃើញអ្នកឆ្លងCovid-19 សរុបចំនួន 31,716,672នាក់ ក្នុងនោះមាន 573,849នាក់បានស្លាប់ និង 24,271,887នាក់បានជាសះស្បើយ ខណៈអ្នកជំងឺ 6,870,936នាក់កំពុងព្យាបាល។ ក្នុងអំឡុង24ម៉ោងកន្លងទៅ សហរដ្ឋអាមេរិក ក៏បានរកឃើញអ្នកវិជ្ជមានថ្មីចំនួន 79,429នាក់ និងអ្នកស្លាប់ថ្មីចំនួន 1,002នាក់ផងដែរ៕

ប្រភព៖ CNN, Washington Post, Worldometers
ប្រែសម្រួល៖ បុត្រា

April 9, 2021

កងទ័ពមីយ៉ានម៉ា ចេញបញ្ជាឱ្យចាប់ខ្លួនបវរកញ្ញា Han Lay

របបសឹកភូមា បានចេញបញ្ជាឱ្យតាមចាប់ខ្លួន Han Lay ព្រោះតែបានអំពាវនាវឱ្យពិភពលោក ជួយដល់ប្រទេសរបស់នាង នៅក្នុងព្រឹត្តិការណ៍ប្រលងបវរកញ្ញាសន្តិភាពអន្តរជាតិ កាលពីពេលថ្មីៗកន្លងទៅនេះ។

សារព័ត៌មាន Global New Light ដែលគ្រប់គ្រងដោយកងទ័ពភូមា កាលពីយប់ថ្ងៃទី6មេសា បានចុះផ្សាយបញ្ជីឈ្មោះរបស់ក្រុមមនុស្សដែលកងប្រទេសនេះកំពុងតាមចាប់ខ្លួន ក្នុងនោះក៏មាន Han Lay ដែលជាបវរកញ្ញាសន្តិភាពមីយ៉ានម៉ា2020 ផងដែរ។ រាប់ចាប់ពីថ្ងៃទី4មេសា សារព័ត៌មាននេះ បានចុះផ្សាយព័ត៌មានស្ដីអំពីការតាមចាប់ខ្លួនអ្នកល្បីឈ្មោះចំនួន100នាក់ហើយ ដែលអ្នកទាំងនេះបានគាំទ្រដល់បាតុកម្មប្រឆាំងនឹងរដ្ឋប្រហារយោធានៅមីយ៉ានម៉ា។

ប្រភពព័ត៌មានពីប្រទេសថៃ និងមីយ៉ានម៉ា ឱ្យដឹងថា បទបញ្ជាតាមចាប់ខ្លួននាង Han Lay នេះ ត្រូវបានរបបសឹកមីយ៉ានម៉ា ធ្វើឡើងបន្ទាប់ពីបវរកញ្ញារូបនេះ សំដែងការប្រឆាំងនឹងរដ្ឋប្រហារយោធា នៅក្នុងព្រឹត្តិការណ៍ប្រលងបវរកញ្ញាសន្តិភាពអន្តរជាតិកាលពីសប្ដាហ៍មុន។ កងទ័ពភូមា ក៏កំពុងតាមចាប់ខ្លួនក្រុមមនុស្សដែលបានជួយ Han Lay ចូលទៅកាន់ប្រទេសថៃផងដែរ។

របបសឹកភូមា មិនទាន់បានអធិប្បាយអ្វីអំពីព័ត៌មាននេះនៅឡើយ ប៉ុន្តែ ប្រភពព័ត៌មាននានាបានឱ្យដឹងថា ការអំពាវនាវឱ្យសហគមន៍អន្តរជាតិជួយដល់មីយ៉ានម៉ា របស់ Han Lay គឺជាដើមហេតុនៃការតាមចាប់ខ្លួននេះ។

Han Lay អាយុ22ឆ្នាំ មិនធ្លាប់ជាប់ពាក់ព័ន្ធនឹងរឿងនយោបាយអ្វីឡើយ រហូតដល់ពេលដែលកងទ័ពមីយ៉ានម៉ា បានធ្វើរដ្ឋប្រហារកាលពីថ្ងៃទី1កុម្ភៈ។ បវរកញ្ញាមីយ៉ានម៉ារូបនេះ ក្រោយមកក៏បានឆ្លៀតយកឱកាសក្នុងព្រឹត្តិការណ៍ប្រលងបវរកញ្ញាសន្តិភាពអន្តរជាតិនៅប្រទេសថៃ កាលពីចុងខែមីនា ដើម្បីអំពាវនាវឱ្យសហគមន៍អន្តរជាតិជួយដល់ប្រទេសខ្លួន។

កាលពីចុងខែមីនា ពីកោះ Phuket ប្រទេសថៃ Han Lay ឱ្យដឹងថា នាងនឹងស្នាក់នៅក្នុងប្រទេសថៃជាបណ្ដោះអាសន្ន ដោយសារស្ថានភាពនៅមីយ៉ានម៉ា កំពុងវឹកវរ៕

ប្រភព៖ Philstar
ប្រែសម្រួល៖ បុត្រា

April 8, 2021

អាមេរិកសម្រេចដកកងទ័ពទាំងអស់ចេញពីប្រទេសអ៊ីរ៉ាក់

សហរដ្ឋអាមេរិកបានយល់ព្រមដកក្រុមទាហានដែលនៅសល់ក្នុងប្រទេសអ៊ីរ៉ាក់ ត្រលប់មកស្រុកវិញ នៅក្នុងពេលវេលាជាក់លាក់មួយបន្ទាប់ពីកិច្ចចរចាជាមួយរដ្ឋធានីបាកដាត។

សហរដ្ឋអាមេរិកនឹងរក្សាបុគ្គលិកមួយចំនួនដែលបំពេញភារកិច្ចជាទីប្រឹក្សាប៉ុណ្ណោះ សម្រាប់ជួយដល់ការប្រយុទ្ធប្រឆាំងនឹងក្រុមភេរវកម្ម។ នេះគឺជាចំណុចគោលដែលត្រូវបានលើកឡើងនៅក្នុងសេចក្ដីប្រកាសរួមដែលធ្វើឡើងក្រោយកិច្ចចរចារវាងរដ្ឋមន្ត្រីការបរទេសអាមេរិក Antony Blinken និងសមភាគី Fuad Hussein នៃប្រទេសអ៊ីរ៉ាក់ កាលពីថ្ងៃទី7មេសា 2021។

ភាគីទាំងពីរបញ្ជាក់យ៉ាងច្បាស់ថា វត្តមាននៃកងទ័ពអាមេរិកនៅប្រទេសអ៊ីរ៉ាក់ គឺធ្វើឡើងទៅតាមការស្នើរបស់អ៊ីរ៉ាក់ ក្នុងបំណងជួយគាំទ្រកងកម្លាំងសន្តិសុខអ៊ីរ៉ាក់ (ISF) ក្នុងការប្រយុទ្ធប្រឆាំងនឹងក្រុមភេរវកម្មរដ្ឋអ៊ីស្លាម (IS)។ ភាគីទាំងពីរបញ្ជាក់ថា ភារកិច្ចបច្ចុប្បន្នរបស់សហរដ្ឋអាមេរិក និងកងកម្លាំងសម្ព័ន្ធមិត្ត គឺផ្ដោតទៅលើតែការបណ្ដុះបណ្ដាល និងប្រឹក្សាយោបល់ប៉ុណ្ណោះ។

ទាហានអាមេរិកាំងនៅមូលដ្ឋានទ័ពអាកាស K1 ក្នុងតំបន់ Kirkuk កាលពីឆ្នាំ2020

ប្រការខាងលើនេះនឹងអនុញ្ញាតឱ្យអាមេរិក ដកទាហានដែលនៅសល់ក្នុងប្រទេសអ៊ីរ៉ាក់ ត្រលប់ទៅមាតុភូមិវិញ នៅក្នុងពេលវេលាសមស្របណាមួយ ក្រោយកិច្ចពិភាក្សាលម្អិត រវាងប្រទេសទាំងពីរនាពេលខាងមុខ។

ការសម្រេចខាងលើនេះ ត្រូវបានធ្វើឡើងក្នុងគ្រាដែលកងទ័ពអាមេរិកនៅអ៊ីរ៉ាក់ ថ្មីៗនេះត្រូវរងការវាយប្រហារជាបន្តបន្ទាប់។ កាលពីថ្ងៃទី4មេសា មូលដ្ឋានទ័ពអាកាស Balad នៅក្បែររដ្ឋធានីបាកដាត បានរងការវាយប្រហារដោយរ៉ុកកែតចំនួនពីរគ្រាប់។ មូលដ្ឋាននេះគឺជាកន្លែងស្នាក់នៅសំខាន់របស់បុគ្គលិកសន្តិសុខ និងអ្នកវិនិយោគអាមេរិក។ ប៉ុន្តែ ករណីវាយប្រហារនេះមិនបានបង្កឱ្យមានអ្នកស្លាប់ ឬរងរបួសនោះទេ ដោយសារគ្រាប់រ៉ុកកែតបានហោះខុសគោលដៅ៕

ប្រភព៖ RT
ប្រែសម្រួល៖ បុត្រា

April 8, 2021

WHO មិនទាន់យល់ស្របនឹងលិខិតឆ្លងដែនCovid-19 ខណៈជាង133លាននាក់បានឆ្លងCovid-19 នៅទូទាំងពិភពលោក

អង្គការសុខភាពពិភពលោក (WHO) មិនទាន់គាំទ្រការធ្វើដំណើរដោយប្រើប្រាស់លិខិតឆ្លងដែនCovid-19 ឬលិខិតឆ្លងដែនវ៉ាក់សាំងនៅឡើយ ដោយសារតែនៅមានមូលហេតុច្រើនយ៉ាង ខណៈពិភពលោករកឃើញមនុស្សជិត 133លាននាក់បានឆ្លងវីរុសCovid-19 ក្នុងនោះមានអ្នកជំងឺជិត 2.9លាននាក់បានស្លាប់។

Margaret Harris អ្នកនាំពាក្យរបស់អង្គការសុខភាពពិភពលោក (WHO) កាលពីថ្ងៃទី 6មេសា បានឱ្យដឹងថា នៅក្នុងកាលៈទេសៈបច្ចុប្បន្ន WHO «មិនចង់ឃើញលិខិតឆ្លងដែនវ៉ាក់សាំង ក្លាយជាតម្រូវការចាំបាច់សម្រាប់ការធ្វើដំណើរចេញ-ចូលប្រទេសនោះទេ ព្រោះថា បច្ចុប្បន្នមិនទាន់ប្រាកដថា វ៉ាក់សាំងនឹងអាចទប់ស្កាត់ការឆ្លងរាលដាលបាននៅឡើយ»។ លោកស្រី Margaret Harris បន្ថែមថា ទន្ទឹមនឹងនោះគឺជា «ការព្រួយបារម្ភអំពីបញ្ហាសមាសភាព»។

មតិរបស់ WHO ត្រូវបានលើកឡើងក្នុងគ្រាដែល សិង្ហបុរី ក្លាយជាប្រទេសដំបូងគេដែលទទួលយកលិខិតឆ្លងដែនអេឡិចត្រូនិករបស់សមាគមដឹកជញ្ជូនតាមផ្លូវអាកាសអន្តរជាតិ (International Air Transport Association) រួមមានការទទួលស្គាល់ចំពោះការធ្វើតេស្ត និងការចាក់វ៉ាក់សាំងបង្ការCovid-19។ អ្នកដំណើរអាចចូលទឹកដីសិង្ហបុរីបាន ដោយគ្រាន់តែរាយការណ៍អំពីកម្មវិធីទូរស័ព្ទដែលមានផ្ទុកទិន្នន័យទាក់ទងនឹងCovid-19 របស់ខ្លួន ដែលមានការបញ្ជាក់ពីមន្ទីរពិសោធន៍នានាដែលគួរជាទីទុកចិត្ត។

ក្រុមហ៊ុនអាកាសចរណ៍នានាកំពុងតែសង្ឃឹមថា ប្រទេសជាច្រើននឹងទទួលស្គាល់លិខិតឆ្លងដែនអេឡិចត្រូនិកនៅលើទូរស័ព្ទឆ្លាតវៃ ដើម្បីអនុញ្ញាតឱ្យការធ្វើដំណើរត្រូវបានស្ដារឡើងវិញឆាប់រហ័ស និងចៀសវាងការបំពេញ និងត្រួតពិនិត្យបែបបទដ៏ស្មុគស្មាញ និងយឺតយ៉ាវនៅឯព្រលានយន្តហោះ។

គិតមកដល់បច្ចុប្បន្ន ពិភពលោកទាំងមូលបានរកឃើញអ្នកវិជ្ជមាននឹងCovid-19 សរុបចំនួន 133,009,551នាក់ ក្នុងនោះមាន 2,885,279នាក់បានស្លាប់, 107,255,216នាក់ជាសះស្បើយ និង 22,869,852នាក់កំពុងព្យាបាល។ ក្នុងអំឡុង 24ម៉ោងនៃថ្ងៃទី 6មេសា ពិភពលោកក៏បានរកឃើញអ្នកជំងឺCovid-19 ថ្មី ចំនួន 574,753នាក់ និងអ្នកស្លាប់ថ្មីដោយសារវីរុសនេះ ចំនួន 11,779នាក់ផងដែរ៕

ប្រភព៖ Reuters, AFP, Worldometers
ប្រែសម្រួល៖ បុត្រា

April 7, 2021

(វីដេអូ)-បុរសម្នាក់បានស្លាប់ដោយសារការដាក់ពិន័យពីសមត្ថកិច្ច ព្រោះតែល្មើសនឹងបំរាមគោចរប្រឆាំងCovid-19 នៅហ្វីលីពីន

ដោយសារតែចេញទៅក្រៅផ្ទះបន្ទាប់ពីមានបំរាមគោចរ កំលោះវ័យ28ឆ្នាំម្នាក់នៅប្រទេសហ្វីលីពីន ត្រូវកងសន្តិសុខក្នុងតំបន់ចាប់ខ្លួន និងដាក់ពិន័យឱ្យអង្គុយចុះ-ក្រោកឈរ ចំនួន 300ដង។

សារព័ត៌មាន Rappler បានរាយការណ៍ថា កំលោះ Darren Manaog Peñaredondo បានចេញពីផ្ទះទៅទិញទឹកផឹកនៅវេលាក្រោយម៉ោង18យប់ ដូច្នេះក៏បានរំលោភលើបំរាមគោចររបស់ទីក្រុង General Trias នៃខេត្ត Cavite ដែលបំរាមនេះត្រូវអនុវត្តចាប់ពីម៉ោង 18យប់ ដល់ម៉ោង 5ព្រឹកនៃថ្ងៃបន្ទាប់ ដើម្បីទប់ស្កាត់វីរុសCovid-19។

មិត្តម្នាក់របស់ Peñaredondo ឈ្មោះ Reichelyn Balce បាននិយាយកាលពីថ្ងៃទី1មេសាថា គាត់រួមនឹងបុរសម្នាក់ផ្សេងទៀតបានល្មើសនឹងបំរាមគោចរ ទើបត្រូវចាប់ខ្លួនបញ្ជូនទៅកាន់មជ្ឈមណ្ឌលពាណិជ្ជកម្ម Malabon ដែលស្ថិតនៅទល់មុខសាលាក្រុង។ ក្រោយមក ពួកគេក៏ត្រូវបានបង្គាប់ឱ្យធ្វើកាយវិការអង្គុយចុះ-ក្រោកឈរចំនួន 100ដង។

យោងតាមការឱ្យដឹងពីសាច់ញាតិរបស់កំលោះខាងលើ សមត្ថកិច្ចបាននិយាយថា អ្នកទាំងពីរត្រូវតែធ្វើកាយវិការនេះសាជាថ្មី បើសិនពួកគេធ្វើមិនបានស្របគ្នា ឬឈប់កណ្ដាលទី។ ជាលទ្ធផល អ្នកទាំងពីរត្រូវធ្វើកាយវិការនេះរហូតដល់ប្រហែល 300ដង។

Peñaredondo ត្រលប់មកផ្ទះនៅវេលាម៉ោង 8ព្រឹក ថ្ងៃទី4 ខែមេសា ហើយគាត់ស្ទើរតែកម្រើកដៃជើងលែងរួច ព្រោះតែបាក់កម្លាំងជ្រុល។ Peñaredondo បានប្រាប់ Balce ថា ខ្លួនបានដួលជាច្រើនលើកនៅក្នុងពេលទទួលពិន័យ។ «ពេញមួយថ្ងៃនោះ គាត់ពិបាកដើរខ្លាំងណាស់ ដោយគ្រាន់តែអាចវារនៅលើដីប៉ុណ្ណោះ» Balce បានបង្ហោះនៅលើ Facebook ដូច្នេះ។

ចូលដល់ថ្ងៃទី 3មេសា Peñaredondo ចាប់ផ្ដើមប្រកាច់ និងគាំងបេះដូង។ កំលោះវ័យ 28ឆ្នាំរូបនេះបានដឹងខ្លួនឡើងវិញក្នុងរយៈពេលខ្លី ហើយក៏បានបាត់បង់ជីវិតនៅវេលាម៉ោង10ព្រឹក ក្នុងថ្ងៃដដែល។

ក៏ប៉ុន្តែ ស្នងការប៉ូលិសក្រុង General Trias លោក Marlo Nillo Solero បានឱ្យដឹងថា ពួកគេមិនដាក់ពិន័យបែបនេះចំពោះជនដែលល្មើសនឹងបំរាមគោចរទាក់ទងនឹង Covid-19 នោះទេ។ ផ្ទុយទៅវិញ អ្នកល្មើសគ្រាន់តែត្រូវស្ដាប់ការអប់រំពីសមត្ថកិច្ច។ ចំណែកអភិបាលក្រុង គឺលោក Antonio Ferrer បានបញ្ជាក់ថា សមត្ថកិច្ចបានចាប់ផ្ដើមបើកការស៊ើបអង្កេតលើបញ្ហាខាងលើនេះហើយ។

រដ្ឋាភិបាលហ្វីលីពីន បានពន្យារសុពលភាពនៃបំរាមគោចរទូទាំងប្រទេសក្នុងរយៈពេលមួយសប្ដាហ៍បន្ថែមទៀត ដោយរាប់ចាប់ពីថ្ងៃទី 5មេសា បន្ទាប់ពីករណីឆ្លង Covid-19 បានកើនឡើងជាថ្មី។ គិតមកដល់បច្ចុប្បន្ន ស្ថានភាពCovid-19 នៅប្រទេសនេះ មានភាពធ្ងន់ធ្ងរជាងគេលំដាប់ទីពីរនៅក្នុងតំបន់អាស៊ីអាគ្នេយ៍ បន្ទាប់ឥណ្ឌូនេស៊ី ដោយបានរកឃើញអ្នកវិជ្ជមាននឹងCovid-19 សរុបជាង 795,000នាក់ ក្នុងនោះមាន 13,425នាក់បានស្លាប់៕

ប្រភព៖ Guardian
ប្រែសម្រួល៖ បុត្រា

April 6, 2021

ជាង150នាក់បានស្លាប់ដោយសារទឹកជំនន់នៅឥណ្ឌូនេស៊ី និងទីម័រខាងកើត

តួលេខអ្នកស្លាប់ដោយសារទឹកជំនន់ និងបាក់ដីនៅប្រទេសឥណ្ឌូនេស៊ី និងទីម័រខាងកើត កាលពីសប្ដាហ៍មុន បានកើនឡើងដល់ 157នាក់ ខណៈដែលមនុស្សរាប់សិបនាក់ផ្សេងទៀតកំពុងបាត់ខ្លួន។

ស្ថាប័នគ្រប់គ្រងគ្រោះធម្មជាតិឥណ្ឌូនេស៊ី នាថ្ងៃនេះបានប្រកាសឱ្យដឹងថា បានរកឃើញមនុស្សចំនួន 130នាក់បានស្លាប់នៅក្នុងតំបន់ប្រជុំកោះនៅក្បែរប្រទេសទីម័រខាងកើត ជាប្រទេសដែលបានរកឃើញអ្នកស្លាប់ចំនួន 27នាក់ ដោយសារទឹកជំនន់ និងបាក់ដីកាលពីចុងសប្ដាហ៍មុននេះដែរ។ កងកម្លាំងជួយសង្គ្រោះនៅឥណ្ឌូនេស៊ី កំពុងតែរត់ប្រណាំងជាមួយនឹងពេលវវេលា នៅក្នុងការស្វែងរកជនរងគ្រោះជាង 70នាក់ ដែលកំពុងបាត់ខ្លួន។

ភ្លៀងធ្លាក់ខ្លាំងដោយសារតែព្យុះ Seroja បង្កឱ្យមានទឹកជំនន់ និងបាក់ដី ចាប់ពីថ្ងៃទី 3មេសា បានបំផ្លិចបំផ្លាញតំបន់ជាច្រើនរបស់ឥណ្ឌូនេស៊ី នាំឱ្យមនុស្សរាប់ពាន់នាក់ត្រូវជម្លៀសទៅកាន់ទីសុវត្ថិភាព។

មន្ត្រីឥណ្ឌូនេស៊ីបានឱ្យដឹងថា ផ្ទះសម្បែករាប់ពាន់ខ្នង មន្ទីរពេទ្យជាច្រើនកន្លែង រួមនឹងសាលារៀន ហេដ្ឋារចនាសម្ព័ន្ធជាច្រើន ត្រូវរងការបំផ្លិចបំផ្លាញ ព្រោះតែទឹកជំនន់ និងការបាក់ដី។ អ្នកនាំពាក្យរបស់ស្ថាប័នគ្រប់គ្រងគ្រោះធម្មជាតិឥណ្ឌូនសេស៊ី Raditya Djati បានបញ្ជាក់ថា ស្ថានភាពអាកាសធាតុអាក្រក់នឹងនៅតែបន្តកើតមានក្នុងរយៈពេលជាច្រើនថ្ងៃតទៅមុខទៀត។

នៅឯទីម័រខាងកើតវិញ រដ្ឋធានី Dili ក៏ទទួលរងគ្រោះទឹកជំនន់យ៉ាងធ្ងន់ធ្ងរ បង្កការខូចខាតដល់ផ្លូវថ្នល់ និងលិចទាំងវិមានប្រធានាធិបតីផងដែរ។ ឧបនាយករដ្ឋមន្ត្រីទីម័រខាងកើត Jose Reis បានឱ្យដឹងថា នេះគឺជាគ្រោះធម្មជាតិអាក្រក់បំផុតដែលមិនធ្លាប់មាននៅតំបន់នេះក្នុងអំឡុង40ឆ្នាំកន្លងមក៕

ប្រភព៖ AFP/Reuters
ប្រៃសម្រួល៖ បុត្រា

April 6, 2021

ស្ថិតិCovid-19 គិតត្រឹមម៉ោង12 នៃថ្ងៃទី6មេសា៖ ពិភពលោករកឃើញអ្នកជំងឺថ្មី11,671នាក់ ខណៈកម្ពុជារកឃើញ72នាក់

ព្រឹកថ្ងៃទី6 ខែមេសា ឆ្នាំ2021នេះ ក្រសួងសុខាភិបាលកម្ពុជាបានឱ្យដឹងថា បានរកឃើញករណីវិជ្ជមាននឹងCovid-19 ថ្មីចំនួន 72នាក់ នាំឱ្យតួលេខអ្នកបានឆ្លងវីរុសនេះសរុបកើនដល់ 2,824នាក់។

ក្នុងចំណោមអ្នកឆ្លងថ្មីទាំង 72នាក់ខាងលើ មាន1នាក់គឺជាករណីនាំចូល និង 71នាក់ជាករណីពាក់ពាន់នឹងព្រឹត្តិការណ៍20កុម្ភៈ។ ក្នុងរយៈពេល24ម៉ោងកន្លងទៅ កម្ពុជាក៏មានអ្នកជាសះស្បើយចំនួន 47នាក់ និងអ្នកស្លាប់ថ្មីចំនួន1នាក់ផងដែរ។

គិតមកដល់បច្ចុប្បន្ន កម្ពុជា មានអ្នកស្លាប់ចំនួន 22នាក់, អ្នកជាសះស្បើយចំនួន 1,794នាក់ និងអ្នកកំពុងព្យាបាលចំនួន 1,003នាក់ ក្នុងចំណោមអ្នកវិជ្ជមាននឹង Covid-19 សរុបចំនួន 2,824នាក់ ដែលក្រសួងសុខាភិបាលបានរកឃើញកន្លងមក។

នៅទូទាំងពិភពលោក បច្ចុប្បន្នមានមនុស្ស 132,415,764នាក់បានឆ្លងវីរុសCovid-19 ក្នុងនោះមាន 2,873,715នាក់បានស្លាប់, 106,712,864នាក់បានជាសះស្បើយ, 22,829,185នាក់កំពុងទទួលការព្យាបាល និង11,671នាក់ទើបតែបានរកឃើញថាវិជ្ជមាននឹងCovid-19 ក្នុងអំឡុង24ម៉ោងនៃថ្ងៃទី5មេសា៕

April 6, 2021

ពលរដ្ឋដើមកំណើតអាស៊ីម្នាក់ទៀត ត្រូវគេធ្វើបាបនៅទីក្រុង New York

បុរសដើមកំណើតអាស៊ីម្នាក់ ត្រូវជនដៃដល់ដាល់ចំកណ្ដាលមុខ នៅលើដងផ្លូវក្នុងទីក្រុង New York ក្នុងគ្រាដែលស្ថានការណ៍នៃអំពើរើសអើងពូជសាសន៍ចំពោះជនជាតិអាស៊ី ចេះតែកើនឡើងមិនឈប់ឈរនៅសហរដ្ឋអាមេរិក។

ប៉ូលិសបានឱ្យដឹងថា ករណីវាយប្រហារនេះកើតឡើងនៅរសៀលថ្ងៃទី 4មេសា នៅពេលជនរងគ្រោះកំពុងដើរក្នុងទីប្រជុំជន។ ជនដៃដល់បានបង្ហាញខ្លួននៅខាងក្រោយខ្នង រួចបានប្រើកណ្ដាប់ដៃ ដាល់ទៅលើមុខរបស់បុរសរងគ្រោះ និងមិនបាននិយាយអ្វីទាំងអស់មុនពេលចាកចេញ។

ជនដៃដល់មានអាយុប្រហែល 40ឆ្នាំ និងមានកម្ពស់ប្រហែល 1.8ម៉ែត្រ។ ជនរងគ្រោះត្រូវងងឹតមុខបន្ទាប់ពីត្រូវគេដាល់មួយដៃ ប៉ុន្តែបានបដិសេធការព្យាបាលនៅនឹងកន្លែងកើតហេតុ។

បច្ចុប្បន្ន ប៉ូលិសមិនទាន់រកឃើញជនសង្ស័យនៅឡើយ។ ក្រុមប៉ូលិសបង្ក្រាបអំពើរើសអើងជាតិសាសន៍នៃទីក្រុង New York កំពុងស្រាវជ្រាវលើករណីវាយប្រហារនេះ ដើម្បីបញ្ជាក់ថា តើវាទាក់ទិននឹងបញ្ហារើសអើងពូជសាសន៍ដែរ ឬយ៉ាងណា។

នេះគឺជាករណីវាយប្រហារថ្មីបំផុតនៅក្នុងចំណោមការវាយប្រហារដោយគ្មានមូលហេតុ មកលើពលរដ្ឋដើមកំណើតអាស៊ីនៅទីក្រុង New York។ ពលរដ្ឋនៅទីក្រុង New York ជាច្រើនរូបផ្សេងទៀត បានក្លាយជាជនរងគ្រោះនៅក្នុងអំពើទាក់ទិននឹងបញ្ហារើសអើងពូជសាសន៍នេះដែរ។

ថ្មីៗនេះ នៅសហរដ្ឋអាមេរិក គេឃើញអំពើវាយប្រហារដោយសារការប្រកាន់ពូជសាសន៍ កើនឡើងយ៉ាងច្រើនមិនគួរឱ្យជឿ។ មជ្ឈមណ្ឌលស្រាវជ្រាវអំពីលទ្ធិស្អប់ខ្ពើប និងជ្រុលនិយម ប្រចាំសាកលវិទ្យាល័យរដ្ឋ California បានប្រកាសទិន្នន័យឱ្យដឹងថា អំពើឧក្រិដ្ឋប្រឆាំងនឹងពលរដ្ឋដើមកំណើតអាស៊ីនៅសហរដ្ឋអាមេរិកបានកើន 150% ក្នុងឆ្នាំ2020៕

ប្រភព៖ NY Post
ប្រែសម្រួល៖ បុត្រា

April 6, 2021

Category: អន្តរជាតិ