អន្តរជាតិ - La Reine Media

ធនាគារជាតិចិន លើកទឹកចិត្តពលរដ្ឋក្នុងការបង្កើតកូនចៅ ដើម្បីប្រជែងផ្នែកសេដ្ឋកិច្ចជាមួយសហរដ្ឋអាមេរិក និងឥណ្ឌា

ធនាគារប្រជាជនចិន (PBOC/People’s Bank of China) យល់ថា ប្រទេសនេះគួរតែ «ផ្ដល់សេរីភាពទាំងស្រុង និងលើកទឹកចិត្តឱ្យពលរដ្ឋបង្កើតកូនចៅ» ដើម្បីបង្កើនកម្លាំងពលកម្ម ដែលនឹងជួយទីក្រុងប៉េកាំង ក្នុងការប្រកូតប្រជែងបានជោគជ័យជាមួយនឹងបណ្ដាប្រទេស ក្នុងនោះរួមមានទាំងសហរដ្ឋអាមេរិក និងឥណ្ឌា នៅក្នុងវិស័យសេដ្ឋកិច្ច។

យោងតាមលទ្ធផលនៃការស្ទង់មតិដែលត្រូវបានប្រកាសកាលពីដើមសប្ដាហ៍កន្លង ទីភ្នាក់ងារសារព័ត៌មាន Sputnik បានរាយការណ៍ថា PBOC ព្យាករថា នៅក្នុងរយៈពេល 30ឆ្នាំខាងមុខ ចំនួនប្រជាជនចិនអាចថយចុះប្រមាណ 32លាននាក់ ខណៈដែលតួលេខពលរដ្ឋនៅសហរដ្ឋអាមេរិក អាចកើនបន្ថែម 50លាននាក់ នៅមុនដំណាច់ឆ្នាំ2049 ក្នុងនោះក៏មានពលរដ្ឋអន្តោប្រវេសន៍ដ៏ច្រើនសន្ធឹកសន្ធាប់។

ក្រុមអ្នកស្រាវជ្រាវក៏បានព្រមានថា កម្លាំងពលកម្មនៅប្រទេសចិននឹងត្រូវថយចុះក្នុងអំឡុងប៉ុន្មានទសវត្សរ៍ខាងមុខ ក្នុងគ្រាដែលសហរដ្ឋអាមេរិក នឹងបានឃើញការកើនឡើងនៃកម្លាំងពលកម្មនេះ។

នៅក្នុងលទ្ធផលនៃការស្រាវជ្រាវ ក្រុមអ្នកជំនាញបានបញ្ជាក់ថា៖ «ដើម្បីកាត់បន្ថយគម្លាតជាមួយនឹងសហរដ្ឋអាមេរិក នៅក្នុងអំឡុងបួនទសវត្សរ៍កន្លងទៅ ប្រទេសចិនពឹងផ្អែកទៅលើកម្លាំងពលកម្មដែលមានតម្លៃទាប និងចំនួនប្រជាជនដ៏ច្រើនសម្បើម។ យើងនឹងត្រូវផ្អែកទៅលើអ្វីខ្លះក្នុងរយៈពេល 30ឆ្នាំខាងមុខ? ប្រការនេះគួរឱ្យយើងយកមកពិចារណា»។

ពួកគេបានព្យាករថា នៅឆ្នាំ2030 ចំនួនប្រជាជនចិន អាចកើនដល់ចំណុចកំពូលបំផុត ប្រមាណ 1.46ពាន់លាននាក់ ហើយក្រោយមកនឹងថយចុះនៅត្រឹម 1.40ពាន់លាននាក់នៅឆ្នាំ2050។

PBOC ព្យាករថា នៅក្នុងរយៈពេល 30ឆ្នាំខាងមុខ ចំនួនប្រជាជនចិនអាចថយចុះប្រមាណ 32លាននាក់

ក្នុងគ្រានោះដែរ ប្រទេសឥណ្ឌា នឹងមានការកើនឡើងទាំងចំនួនប្រជាជន ទាំងកម្លាំងពលកម្ម។ ការស្រាវជ្រាវបានបង្ហាញថា មហាយក្សនៅអាស៊ីខាងត្បូងនេះអាចក្លាយជាប្រទេសដែលមានប្រជាជនច្រើនជាងគេបង្អស់ក្នុងពិភពលោកនៅឆ្នាំ2027។

ក្រុមអ្នកស្រាវជ្រាវបានជំរុញឱ្យរដ្ឋាភិបាលចិន «ស្វែងយល់អំពីការប្ដូរផ្លាស់ច្បាស់ក្រឡែតនៅចំពោះមុខស្ថានការណ៍» និងប្រញាប់កែប្រែគោលនយោបាយទាំងឡាយដែលទាក់ទងនឹងផែនការគ្រួសារ ដោយការអនុញ្ញាតឱ្យគ្រួសារនីមួយៗ អាច «បង្កើតកូនចាប់ពីបីនាក់ឡើងទៅ» រួមនឹងគំនិតផ្ដួចផ្ដើមដទៃទៀត។

ចិន បច្ចុប្បន្ននៅតែជាប្រទេសដែលមានប្រជាជនច្រើនជាងគេបង្អស់ក្នុងពិភពលោក ដោយមាន 1.43ពាន់លាននាក់។ ក្នុងអំឡុងច្រើនទសវត្សរ៍មកនេះ រដ្ឋាភិបាលបានអនុវត្តគោលនយោបាយគ្រប់គ្រងការបង្កើតកូនចៅយ៉ាងតឹងរ៉ឹង។ កាលពីឆ្នាំ2013 គោលនយោបាយខាងលើ ត្រូវបានបន្ធូរបន្ថយ ដោយរដ្ឋាភិបាលអនុញ្ញាតឱ្យគ្រួសារនីមួយៗ អាចយកកូនច្រើនបំផុតត្រឹមពីរនាក់។

កាលពីខែកុម្ភៈកន្លងទៅ ក្រសួងសន្តិសុខសាធារណៈនៃប្រទេសចិន (Ministry of Public Security of China) បានរាយការណ៍ថា តួលេខនៃទារកដែលកើតនៅប្រទេសនេះ បានថយចុះយ៉ាងតិច15% នៅក្នុងឆ្នាំ2020 ក្នុងគ្រាដែលវិបត្តិ Covid-19 និងឱនភាពសេដ្ឋកិច្ចកំពុងកើតឡើង៕

ប្រភព៖ SCMP
ប្រែសម្រួល៖ បុត្រា

April 19, 2021

បើកអាថ៌កំបាំង បាល់ទាត់ពិភពលោកកាតារ៍ សម្លាប់ជីវិត “ពលករ” អស់ 6,500នាក់ហើយ

សារព័ត៌មាននៃប្រទេសអង់គ្លេស បានបើកកកាយអាថ៌កំបាំង ស្ដីពីជីវិតពលករចំណាកស្រុកនៅក្នុងប្រទេសកាតារ៍ ដែលធ្វើការងារ ពាក់ព័ន្ធនឹងភាពត្រៀមរួចជាស្រេច ក្នុងការរៀបចំព្រឹត្តិការណ៍បាល់ទាត់ពិភពលោក2022 ឬ World Cup 2022 ដែលបានយកជីវិតទៅចោល នៅក្នុងដែនដីមជ្ឈិមបូព៌ា អស់រួចហើយជាង 6,500នាក់ ជាពិសេសពលករដែលទៅពីប្រទេសក្នុងតំបន់អាស៊ីខាងត្បូង ដោយឯកសារផ្លូវការ បានបញ្ជាក់ថា ភាគច្រើនបណ្ដាលមកពីមូលហេតុខាងធម្មជាតិ។

សារព័ត៌មាន “ដឹ ហ្គាដៀន” ប្រព័ន្ធផ្សព្វផ្សាយដ៏ល្បីល្បាញរបស់ប្រទេសអង់គ្លេស បានបង្ហាញពីលទ្ធផលនៃការស្រាវជ្រាវ ដែលបានរកឃើញថា គិតចាប់តាំងពី ប្រទេសកាតារ៍ បានទទួលសិទ្ធិធ្វើជាម្ចាស់ផ្ទះរៀបចំព្រឹត្តិការណ៍បាល់ទាត់ពិភពលោក2022 កាលពីឆ្នាំ2011 រហូតមកដល់អំឡុងចុងឆ្នាំ2020 កន្លងមក មានពលករចំណាកស្រុក ដែលធ្វើការពាក់ព័ន្ធនឹងការត្រៀមខ្លួនធ្វើជាម្ចាស់ផ្ទះនេះ មិនថាតែការកសាងកីឡដ្ឋាន, ទីលានបាល់ទាត់ ឬហេដ្ឋារចនាសម្ព័ន្ធផ្សេងៗនោះទេ បានសម្លាប់ជីវិតមនុស្សរួចហើយ អស់ជាង 6,500នាក់ នេះរាប់ចំពោះតែពលករ ដែលទៅពីប្រទេសក្នុងតំបន់អាស៊ីខាងត្បូងប៉ុណ្ណោះ ឬគិតជាមធ្យម គឺស្លាប់ក្នុង 1សប្ដាហ៍ដល់ទៅ 12នាក់ឯណោះ។

របាយការណ៍របស់ដឹ ហ្គាដៀន បានយោងតាមតួលេខផ្លូវការរបស់ប្រទេសកាតារ៍ ដែលបានបញ្ជាក់ថា ក្នុងចំនួនពលករមកពីអាស៊ីខាងត្បូងជាង 6,500នាក់ដែលបានស្លាប់ ក្នុងអំឡុងជិត 1ទសវត្សរ៍កន្លងទៅនោះ ចែកចេញជា ពលករទៅពីប្រទេសឥណ្ឌា 2,711នាក់ ពីនេប៉ាល់ 1,461នាក់ ពីបង់ក្លាដែស 1,018នាក់ ពីប៉ាគីស្ថាន 824នាក់ និងទៅពីស្រីលង្កា 557នាក់ ដោយការរកឃើញនេះ នៅមិនទាន់រួមជាមួយពលករ ទៅពីភូមិភាគផ្សេងទៀត ដូចជាពលករទៅពីទ្វីបអាហ្វ្រិក ជាពិសេសប្រទេសឃេនយ៉ា រួមទាំងភូមិភាគផ្សេងៗរបស់ទ្វីបអាស៊ី ដូចជាពលករហ្វ៊ីលីពីន ដែលមានចំនួនដ៏ច្រើនមហាសាលដូចគ្នា។ តែយ៉ាងណាក៏ដោយ រដ្ឋបាលនៃប្រទេសកាតារ៍ បានបញ្ជាក់ថា ចំនួនពលករដែលស្លាប់នេះ ត្រូវបានចាត់ទុកថា ជាចំណែកមួយដែលប្រក្រតី បើប្រៀបធៀបនឹងអំឡុងពេល 1ឆ្នាំៗនៃចំនួនពលករបរទេសដែលចូលមកធ្វើការនៅក្នុងប្រទេសមួយនេះ។

ក្រៅពីនេះ សារព័ត៌មានល្បីរបស់ប្រទេសអង់គ្លេសមួយនេះ ថែមទាំងបានបញ្ជាក់ទៀតផងថា តាមដែលអាចស្រាវជ្រាវរកឃើញនោះ មាន 37នាក់ បានស្លាប់ក្នុងខណៈប្រតិបត្តិការងារ ក្នុងការកសាងទីលានបាល់ទាត់ថ្មីទាំង 7កន្លែង ដែលម្ចាស់ផ្ទះ ត្រៀមទុកសម្រាប់រៀបចំការប្រកួត World Cup 2022 ផ្ទាល់តែម្ដង ខណៈដែលអ្នកស្លាប់ភាគច្រើន គឺជាពលករដែលធ្វើការក្នុងគ្រោងការដែលពាក់ព័ន្ធនឹងព្រឹត្តិការណ៍បាល់ទាត់ពិភពលោក ខណៈដែលមូលហេតុនៃការស្លាប់ទាំងអស់នោះ មានតាំងពី ការត្រូវវត្ថុរឹងបុកប៉ះ ការខ្វះខ្យល់ដកដង្ហើម រហូតដល់ការចងកសម្លាប់ខ្លួន តែមូលហេតុភាគច្រើន ដែលបានបញ្ជាក់នៅក្នុងឯកសារផ្លូវការនោះគឺ ការស្លាប់ដោយសារមូលហេតុធម្មជាតិភាគច្រើន មិនថាតែគាំងបេះដូង ឬមូលហេតុបណ្ដាលមកពី សភាពធាតុអាកាស ដែលក្ដៅខ្លាំងរបស់ប្រទេសកាតារ។

ទាំងអស់នេះ ប្រទេសកាតារ៍ រួមទាំងប្រទេសជាច្រើនទៀតនៅក្នុងភូមិភាគមជ្ឈិមបូព៌ា ត្រូវបានចាត់ទុកថា ជាប្រទេសដែលពឹងពាក់លើពលករបរទេសជាចម្បង ក្នុងចំនួនប្រជាជន 2.6លាននាក់នោះ មានអ្នកដែលមានសញ្ជាតិកាតារ៍ តែប្រមាណជា 313,000នាក់ប៉ុណ្ណោះ ចំណែក 2.3លាននាក់ទៀត ជាពលករចំណាកស្រុកបរទេស ដោយកាលពីពេលមុននេះ ប្រទេសនៅពីដែនដីមជ្ឈិមបូព៌ាមួយនេះ តែងតែត្រូវបានគេសង្ស័យ ពីរឿងការប្រតិបត្តិចំពោះពលករចំណាកស្រុកបរទេស រួមទាំងរឿងសិទ្ធិមនុស្សជាបន្តបន្ទាប់ផងដែរ៕

ប្រភព៖ សារព័ត៌មានបរទេស
ប្រែសម្រួលដោយ តាវ៉ែនតា

April 18, 2021

WHO ៖ កូវីដឥណ្ឌា ក្លាយពូជ 2ជាន់ អាចចម្លងរាលដាលលឿន…

នៅថ្ងៃទី17 មេសា ម្សិលមិញ ទីភ្នាក់ងារព័ត៌មាន Reuters បានរាយការណ៍ថា លោកនាយករដ្ឋមន្ត្រី ណារិនដ្រា ម៉ូឌី មេដឹកនាំនៃប្រទេសឥណ្ឌា បានសំណូមពរដល់អ្នកបួស និងប្រជាជនហិណ្ឌូជាច្រើនសែននាក់ ដែលមកជួបជុំប្រមូលផ្ដុំគ្នា ងូតទឹកនៅឯដងទន្លេគង្គា ភាគខាងជើងនៃប្រទេស ដើម្បីលាងជម្រះបាប នៅក្នុងពិធីមហាគុម្ភៈមេឡា តាមជំនឿសាសនាព្រាហ្ម-ហិណ្ឌូ សូមឱ្យផ្អាកធ្វើពិធីនេះសិន។

ក្រោមស្ថានការណ៍មានអ្នកឆ្លងមេរោគប្រចាំថ្ងៃ លើស 200,000នាក់ ជាប់ៗគ្នា រយៈពេល 3ថ្ងៃមកហើយនោះ មានអ្នកឆ្លងមេរោគថ្មីក្នុងជុំ 24ម៉ោងចុងក្រោយ ស្ថិតក្នុងចំនួន 234,692នាក់ ធ្វើឱ្យចំនួនសរុប កើនឡើងដល់ជិត 14.5លាននាក់ តាមក្រោយតែសហរដ្ឋអាមេរិកមួយប៉ុណ្ណោះ ចំណែកចំនួនអ្នកស្លាប់វិញ កើនឡើងដល់ 175,649នាក់។

លោកនាយករដ្ឋមន្ត្រី ម៉ូឌី បានធ្វីតធើរសំណេរថា ពិធីនេះ ពេលនេះ គួរធ្វើជាលក្ខណៈនិមិត្តរូបវិញប្រសើរជាង ខណៈមេដឹកនាំសាសនា បានឯកភាពចំពោះសំណើនេះ និងអំពាវនាវឱ្យប្រជាជន កុំមកប្រមូលផ្ដុំគ្នា។

ទាំងអស់នេះ រដ្ឋបាលឥណ្ឌា ធ្លាប់ត្រូវរងការរិះគន់ ពាក់ព័ន្ធនឹងការចាត់ការលើវិបត្តិសុខភាពសាធារណៈ ដោយសារតែរដូវកាលសាសនា និងយុទ្ធនាការឃោសនាបោះឆ្នោត ដែលនៅតែបន្តដំណើរការ បើទោះជាមានរបាយការណ៍ អំពីការខ្វះខាតគ្រែអ្នកជំងឺ ធុងខ្យល់អុកស៊ីហ្ស៊ែន និងវ៉ាក់សាំងការពារកូវីដ-19ក៏ដោយ។

ជាពិសេស ការឃោសនារកសំឡេងឆ្នោត របស់លោកនាយករដ្ឋមន្ត្រី ម៉ូឌីខ្លួនឯង 2លើក នៅក្នុងរដ្ឋបេងហ្គាលខាងលិច ដែលនឹងមានការបោះឆ្នោតថ្នាក់រដ្ឋ ដែលមានអ្នកគាំទ្រចូលរួមជាច្រើនពាន់នាក់ តែមានមនុស្សចំនួនតិចតួចបំផុត ដែលប្រតិបត្តិតាមវិធានការសុវត្ថិភាពពីកូវីដ-19។

នៅថ្ងៃជាមួយគ្នា ទីភ្នាក់ងារព័ត៌មាន ប្ល៊ូមប៊ើក បានរាយការណ៍ថា អង្គការសុខភាពពិភពលោក ឬ WHO បានបញ្ជាក់ថា វីរុសកូរ៉ូណាប្រភេទដែលបង្កឱ្យកើតជំងឺកូវីដ-19 ប្រភេទក្លាយពូជ B.1.617 ដែលចាប់កំណើតឡើងនៅក្នុងប្រទេសឥណ្ឌា អាចមានសមត្ថភាពក្នុងការចម្លងរាលដាលបានយ៉ាងលឿន និងឆាប់រហ័ស។

លោកស្រី ម៉ារៀ វែន ឃើខូហ្វ ប្រធានផ្នែកតិចនិកកូវីដ-19 របស់ WHO បានថ្លែងថា ក្រុមអ្នកស្រាវជ្រាវ ជីណូមកូវីដ-19 នៃប្រទេសឥណ្ឌា (INSACOG) បានបង្ហើបឱ្យដឹងថា B.1.617 បានបង្ហាញខ្លួនលើកដំបូងក្នុងប្រទេសឥណ្ឌា កាលពីថ្ងៃទី7 ធ្នូ ឆ្នាំ2020 មានការក្លាយពូជលក្ខណៈពិសេសដោយឡែក 2ជាន់ មាន E484Q និង L452R ជារូបបែប ដែលរកឃើញនៅក្នុងប្រភេទវីរុស ដែលកំពុងឆ្លងរាលដាលដ៏ធំ និងបានដាក់ការសង្កេតឃើញថា B.1.617 កំពុងសាយភាយទៅក្នុងប្រទេសជាច្រើន និងមានរបាយការណ៍ អំពីការពិនិត្យរកឃើញនៅទូទាំងទ្វីបអាស៊ី និងអាមេរិកខាងជើងទៀតផង។

យ៉ាងណាក្ដី WHO បានចាត់ទុកវីរុសក្លាយពូជ 2ជាន់នេះ ជាមេរោគដែលត្រូវតែតាមស៊ើបអង្កេត ឬជាមេរោគដែលមិនទាន់អាចពិសោធបានយ៉ាងច្បាស់លាស់នៅឡើយ តែត្រូវចាប់ផ្ដើមប្រុងប្រយ័ត្នយ៉ាងដិតដល់ និងមិនទាន់អាចបញ្ជាក់អំពីភាពចាំបាច់ ត្រូវលើកកម្ពស់កម្រិតការដំណើរការ ខាងសុខភាពសាធារណៈ ដែរឬទេនៅឡើយ។

ខណៈដែលក្រសួងសុខាភិបាលនៃប្រទេសឥណ្ឌា ចេញសេចក្ដីថ្លែងការណ៍ជាផ្លូវការថា B.1.617 អាចបង្កើនអត្រាការឆ្លងមេរោគ និងអាចបែកធ្លាយចេញពីប្រព័ន្ធប្រឆាំងជំងឺរបស់រាងកាយបាននោះ ក្រសួងសុខាភិបាលរបស់ប្រទេសអ៊ីស្រាអែល ក៏បានថ្លែងពីការរកឃើញ B.1.617 លើកដំបូងក្នុងប្រទេសដែរ ដោយមានអ្នកឆ្លងមេរោគថ្មីនេះ ជាជនជាតិអ៊ីស្រាអែល ចំនួន 7នាក់ ធ្វើដំណើរមកពីក្រៅប្រទេស ហើយទាំងអស់នោះ សុទ្ធតែមិនទាន់បានចាក់វ៉ាក់សាំងទាំងអស់៕

ប្រភព៖ សាព័ត៌មានបរទេស
ប្រែសម្រួលដោយ តាវ៉ែនតា

April 18, 2021

នាវាចម្បាំងអាមេរិកបីគ្រឿង តាមពីក្រោយនាវាផ្ទុកយន្តហោះចម្បាំងចិន នៅលើសមុទ្រចិនខាងត្បូង

នាវិកអាមេរិកបានបង្ហោះវីដេអូមួយបង្ហាញអំពីយន្តហោះចម្បាំងកំពុងចុះចតលើនាវាផ្ទុកយន្តហោះចម្បាំង Liaoning របស់ចិន ខណៈដែលរូបភាពពីផ្កាយរណបបង្ហាញថា នាវាចម្បាំងអាមេរិកចំនួនបីគ្រឿង ដេញតាមពីក្រោយនាវាផ្ទុកយន្តហោះចិន។

យោងតាមវីដេអូដែលត្រូវបានចែករំលែកនៅលើបណ្ដាញសង្គម Twitter កាលពីថ្ងៃទី17មេសា ក្រុមប្រយុទ្ធនាវាចម្បាំងចិន Liaoning ធ្វើដំណើរនៅលើសមុទ្រចិនខាងត្បូង ដែលវីដេអូនេះទំនងជាត្រូវបានថតពីលើនាវាចម្បាំងរបស់សហរដ្ឋអាមេរិក។

នៅក្នុងវីដេអូ គេឃើញមានយន្តហោះចម្បាំង J-15 ចុះចតលើនាវាផ្ទុកយន្តហោះ Liaoning ធ្វើឱ្យក្រុមនាវិកមានការភ្ជាក់ផ្អើល។ នៅជុំវិញនាវាផ្ទុកយន្តហោះចិន គឺជាក្រុមនាវាអមដំណើរដែលមាននាវាចម្បាំងការពារដែនអាកាស Type-052D យ៉ាងតិចមួយគ្រឿង និងនាវាចម្បាំងធុនធ្ងន់ Type-055 មួយគ្រឿង។

រូបភាពដែលត្រូវបានថតដោយផ្កាយរណបកាលពីថ្ងៃទី16មេសា បង្ហាញថា ក្រុមប្រយុទ្ធនាវាចម្បាំង Liaoning របស់ចិន ធ្វើដំណើរនៅលើសមុទ្រចិនខាងត្បូង ចម្ងាយជិត500គីឡូម៉ែត្រទៅទិសអាគ្នេយ៍នៃមូលដ្ឋានទ័ព Yulin Naval នៅលើកោះហៃណាននៃប្រទេសចិន។

ក្រុមប្រយុទ្ធនាវាផ្ទុកយន្តហោះចិន រួមមាន នាវាផ្ទុកយន្តហោះ Liaoning, នាវាចម្បាំង Type-055 មួយគ្រឿង, នាវាចម្បាំងការពារដែនអាកាស Type-052D មួយគ្រឿង, នាវាចម្បាំង Type-054A មួយគ្រឿង និងនាវា Type-901 មួយគ្រឿង។ ក្រុមនាវាចម្បាំងដែលផ្លាស់ទីក្បែរក្រុមប្រយុទ្ធរបស់ចិនទាំងបីទិសគឺក្រុមនាវាចម្បាំង Arleigh Burke របស់សហរដ្ឋអាមេរិក។

ក្រសួងការពារជាតិសហរដ្ឋអាមេរិក និងចិន មិនទាន់មានការអធិប្បាយអ្វីអំពីព័ត៌មាននេះនៅឡើយ។

នាវាចម្បាំងចិន (លេខ 1-5) និងនាវាសហរដ្ឋអាមេរិក នៅលើសមុទ្រចិនខាងត្បូងកាលពីថ្ងៃទី16មេសា 2021។ រូបភាព៖ Twitter/OSINT-1

ព្រឹត្តិការណ៍ខាងលើនេះ បានកើតឡើងបន្ទាប់ពីក្រុមចម្បាំងនាវាផ្ទុកយន្តហោះអាមេរិក USS Theodore Roosevelt និងក្រុមនាវាវាយឡើងច្រាំង USS Makin Island បានចាកចេញពីសមុទ្រចិនខាងត្បូង។ ក្នុងព្រឹត្តិការណ៍នេះ គេមិនបានដឹងច្បាស់ថា មាននាវាចម្បាំងអាមេរិកតាមពីក្រោយក្រុមនាវាផ្ទុកយន្តហោះចម្បាំងចិនដែរ ឬអត់នោះទេ។ កងទ័ពជើងទឹកសហរដ្ឋអាមេរិក ធ្លាប់បានបញ្ជាឱ្យនាវា USS Mustin ដេញតាមពីក្រោយនាវាផ្ទុកយន្តហោះចម្បាំងចិន Liaoning កាលពីថ្ងៃទី10មេសា នៅពេលវាចូលទៅកាន់សមុទ្រចិនខាងត្បូង។

ភាពតានតឹងខាងលើបានកើតឡើងចាប់តាំងពីថ្ងៃទី7មីនា នៅពេលដែលកប៉ាល់នេសាទចិនរាប់រយគ្រឿងនាំគ្នាចតនៅក្បែរថ្មប៉ប្រះទឹក Whitsun ដែលប្រទេសចិន ហ្វីលីពីន និងវៀតណាម អះអាងថាជារបស់ខ្លួន៕

ប្រភព៖ Express, SCMP
ប្រែសម្រួល៖ បុត្រា

April 18, 2021

Pfizer ៖ អ្នកដែលបានទទួលវ៉ាក់សាំងគ្រប់ហើយ អាចត្រូវចាក់ “ដូសទី3” ទៀតក្នុងរយៈពេល 6-12ខែ

គណៈគ្រប់គ្រងក្រុមហ៊ុនផលិតឱសថ Pfizer បានឱ្យដឹងថា អ្នកដែលបានទទួលវ៉ាក់សាំងការពារកូវីដ-19 គ្រប់ទាំង 2ដូសហើយ អាចមានភាពចាំបាច់ ត្រូវចាក់ដូសទី3 បន្ថែមទៀត ដើម្បីជំរុញប្រព័ន្ធប្រឆាំងជំងឺ ក្នុងរយៈពេល 6-12ខែទៀត។

នៅថ្ងៃទី15 ខែមេសា វេបសាយព័ត៌មាន CNBC បានផ្សព្វផ្សាយបទសម្ភាសរបស់លោក អាល់ប៊ើត បួឡា នាយកប្រតិបត្តិរបស់ ហ្វ៉ៃហ្ស៊ើរ ដែលបានបញ្ជាក់ផងដែរថា មានភាពអាចទៅរួចខ្លាំង ដែលមនុស្សទាំងអស់ អាចនឹងត្រូវចាក់វ៉ាក់សាំងការពារវីរុសកូរ៉ូណា ជាប្រចាំរៀងរាល់ឆ្នាំ។

“យើងនៅត្រូវរង់ចាំមើលទាំងអស់គ្នាថា តើវាមានភាពចាំបាច់ ក្នុងការត្រូវតែចាក់ដដែលៗឡើងវិញញឹកញាប់ប៉ុនណា?…តែ វាអាចទៅរួច ក្នុងការត្រូវតែចាក់ដូសទី3 ក្នុងអំឡុងពេល 6-12ខែ និងបន្ទាប់ពីនោះ ក៏អាចនឹងត្រូវចាក់ឡើងវិញរៀងរាល់ឆ្នាំទៀតផង ប៉ុន្តែទិន្នន័យទាំងអស់នេះ នៅត្រូវការរង់ចាំការអះអាងពីអ្នកជំនាញការជាមុនសិន” លោកបួឡា បានថ្លែងបែបនេះ ព្រមទាំងបន្ថែមថា ការក្លាយពូជរបស់មេរោគវីរុស ក៏ជា “កត្តាប្រែប្រួលសំខាន់” មួយទៀតដែរ។

អ្នកស្រាវជ្រាវទូទាំងពិភពលោក មិនទាន់អាចប្រកាសបាននៅឡើយថា តើវ៉ាក់សាំងប្រភេទផ្សេងៗ ដែលកំពុងមាននាពេលបច្ចុប្បន្ននេះ នឹងអាចការពារការឆ្លងមេរោគវីរុសកូរ៉ូណា បានយូរប៉ុនណាឡើយ។

លទ្ធផលការសិក្សាស្រាវជ្រាវថ្មីបំផុតរបស់ហ្វ៉ៃហ្ស៊ើរ បានអះអាងថា វ៉ាក់វ៉ាក់សាំងរបស់ខ្លួន មានប្រសិទ្ធភាពក្នុងការការពារវីរុសកូរ៉ូណាបាន 91% និងទប់ស្កាត់ការធ្លាក់ខ្លួនឈឺដោយកូវីដ-19 កម្រិតធ្ងន់ធ្ងរ បានច្រើនជាង 95% រយៈពេលយូរបំផុត 6ខែ បន្ទាប់ពីចាក់ដូសទី2 រួច។

តែយ៉ាងណាក្ដី អ្នកវិទ្យាសាស្ត្រ បានបញ្ជាក់ថា នៅត្រូវសិក្សាពីទិន្នន័យបន្ថែមទៀតថា តើវ៉ាក់សាំងនឹងហុចលទ្ធផលក្នុងការការពារ ក្រោយពេល 6ខែកន្លងផុតទៅ ដែរឬទេ?៕

ប្រភព៖ ទីភ្នាក់ងារព័ត៌មាន AFP
ប្រែសម្រួលដោយ តាវ៉ែនតា

April 17, 2021

អេស្ប៉ាញ៖ ថ្នាក់រៀនពិសេសនៅលើឆ្នេរសមុទ្រ ជួយឱ្យសិស្សានុសិស្សមានអារម្មណ៍ល្អ និងសប្បាយរីករាយក្នុងសម័យCovid-19

បើសិនជាការសិក្សានៅលើឆ្នេរសមុទ្រគឺជាក្ដីស្រមៃ នោះក្ដីស្រមៃនេះបានក្លាយជាការពិតហើយសម្រាប់សិស្សជាច្រើនរូបនៅតំបន់ Murcia នៃប្រទេសអេស្ប៉ាញ។

ក្រោយរយៈពេលមួយឆ្នាំដែលត្រូវរៀនពីចម្ងាយ ដោយសារបំរាមគោចរ និងគម្លាតសង្គមដើម្បីបង្ការCovid-19 សាលា Felix Rodriguez de la Fuente នៅតំបន់ Murcia បានបង្កើតថ្នាក់រៀននៅលើឆ្នេរសមុទ្រដើម្បីប្រើប្រាស់បរិយាកាសប្រកបដោយខ្យល់បរិសុទ្ធដែលត្រូវគេជឿថា កម្រមានហានិភ័យនៃការឆ្លងវីរុសCovid-19។

ប៉ុន្តែ សិស្សដែលមកកាន់ «សាលារៀន» នៅលើឆ្នេរសមុទ្រ Playa de los Nietos នេះ នៅតែត្រូវពាក់ម៉ាស់ និងអង្គុយលើកៅអីដែលត្រូវបានគេរៀបចំទៅតាមការកំណត់ដើម្បីរក្សាគម្លាតសុវត្ថិភាព។ គ្រូបង្រៀនម្នាក់ ឈ្មោះ Juan Francisco Martinez បានឱ្យដឹងថា សិស្សទាំងអស់ សុទ្ធតែមានអារម្មណ៍សប្បាយរីករាយ ហើយនឹងមានអនុស្សាវរីយ៍ពិបាកបំភ្លេចបាន។

សាលារៀននេះគឺជាផ្នែកមួយនៃគម្រោងមួយដែលមានឈ្មោះថា «Fresh Air» (ខ្យល់បរិសុទ្ធ) ក្នុងបំណងនាំមកនូវខ្យល់ល្អបរិសុទ្ធសម្រាប់ក្មេងៗនៅក្នុងសម័យCovid-19។ ក្រុមគ្រូបង្រៀននឹងត្រូវបង្រៀនសិស្សនៅលើឆ្នេរខ្សាច់សមុទ្រ ចាប់ពីម៉ោង8ព្រឹកជារៀងរាល់ថ្ងៃ។

គម្រោងខាងលើនេះ មានថ្នាក់រៀនចំនួន8 ហើយសិស្សមានអាយុចាប់ពី3-12ឆ្នាំ។ ថ្នាក់រៀនទាំងនេះ នៅតែសិក្សាទៅតាមថ្នាក់ដែលពួកគេធ្លាប់បានរៀនកន្លងមក។ មកដល់បច្ចុប្បន្ន ពុំមានករណីឆ្លង Covid-19 ណាមួយដែលត្រូវបានរកឃើញនៅក្នុងថ្នាក់រៀនទាំងនេះទេ។ សិស្សទាំងឡាយ សុទ្ធតែពេញចិត្តនឹងរបៀបសិក្សានេះ ព្រោះពួកគេបាននៅខាងក្រៅ បានជួបមិត្តភ័ក្ដិ មានអារម្មណ៍ស្រស់ស្រាយជាងការរៀនតាមកុំព្យូទ័រនៅឯផ្ទះ។

ដើម្បីរួមចំណែកជួយឱ្យសកម្មភាពសិក្សាកាន់តែរស់រវើក និងកាន់តែអស្ចារ្យ ពលរដ្ឋក្នុងតំបន់ថែមទាំងបានតុបតែងខ្លួនជាទាហាន ឬជាអ្នកនេសាទ ដើម្បីណែនាំប្អូនៗអំពីប្រវត្តិសាស្ត្រ, របរនេសាទ និងមុខរបរចិញ្ចឹមជីវិតផ្សេងទៀតរបស់ប្រជាជនក្នុងតំបន់។ គ្រូបង្រៀនឈ្មោះ Alfonso Vera ឱ្យដឹងថា អ្នកស្រុកក្នុងភូមិបានបង្រៀនក្មេងៗអំពីវិធីស្ទូចត្រី និងចែករំលែកអំពីរបៀបដែលពួកគេស្វែងរកអាហារនៅក្នុងគ្រាលំបាកបំផុត ដូចជាសម័យCovid-19 នេះជាដើម៕

ប្រភព៖ Reuters
ប្រែសម្រួល៖ បុត្រា

April 13, 2021

អាមេរិក៖ បាតុករជនជាតិស្បែកស ប៉ះទង្គិចនឹងបាតុករជនជាតិស្បែកខ្មៅ នាំឱ្យមនុស្សជាច្រើននាក់ត្រូវចាប់ខ្លួន

មនុស្សមួយក្រុមបាននាំគ្នាធ្វើបាតុកម្មមួយដែលត្រូវគេដាក់ឈ្មោះថា «ជីវិតរបស់ជនស្បែកសសំខាន់» នៅតំបន់ Huntington Beach នៃរដ្ឋ California ក៏ប៉ុន្តែ មិនបានយូរប៉ុន្មានក៏ក្លាយជាបាតុកម្មហិង្សា។

បាតុកម្ម «ជីវិតជនស្បែកសសំខាន់» ដើម្បីប្រឆាំងនឹងចលនា «ជីវិតជនស្បែកខ្មៅសំខាន់» ត្រូវបានធ្វើឡើងនៅកំពង់ផែ Huntington Beach ក្នុងរដ្ឋ California រសៀលថ្ងៃទី11មេសា។ ព្រឹត្តិការណ៍នេះបានក្លាយជាបាតុកម្មហិង្សា នៅពេលក្រុមបាតុករ និងក្រុមប្រឆាំងបាតុករបានប្រឈមមុខដាក់គ្នា និងឈានដល់ការវ៉ៃតប់គ្នា។

ប្រមាណជា 90នាទី បន្ទាប់ពីបាតុកម្មត្រូវបានធ្វើឡើង កងកម្លាំងប៉ូលិសបានស្នើឱ្យក្រុមបាតុករ «ប្រឆាំងការរើសអើងលើជនស្បែកស» រំសាយគ្នា និងបានចាត់ទុកថា ជាសកម្មភាពប្រមូលផ្ដុំដោយខុសច្បាប់ និង «មិនសមហេតុផល»។

ក្រុមបាតុករជនជាតិស្បែកសភាគច្រើនហែក្បួនដោយដៃទទេ និងស្រែកជ័យឃោសន៍គាំទ្រសហគមន៍នេះ។ ក្រុមមន្ត្រីឱ្យដឹងថា បានចាប់ខ្លួនបុគ្គលមួយចំនួនដែលយកកាំបិត និងបំពង់បាញ់ឧស្ម័នបង្ហូរទឹកភ្នែកតាមខ្លួន។

ក្រុមប៉ូលិសក៏បានចាប់ខ្លួនមនុស្សជាច្រើននាក់ដែលប្រឆាំងនឹងបាតុកម្មខាងលើ ក្នុងនោះក៏មានបុរសជនជាតិស្បែកខ្មៅម្នាក់ ដោយចោទថា «រំលោភលើគោលការណ៍ហាមបង្កសំឡេងរំខាននៅទីសាធារណៈ»។ ស្នងការប៉ូលិសក្រុង Hungton Beach លោក Brian Smith ក្រោយមកក៏បានបញ្ជាក់ថា បានចាប់ខ្លួនមនុស្សទីពីរ ដោយសារព្យាបាលរារាំងមិនឱ្យក្រុមប៉ូលិសចាប់ខ្លួនបុរសស្បែកខ្មៅដំបូង។

មុនបាតុកម្មខាងលើកើតឡើង គេឃើញមានក្រុមមួយដែលមានឈ្មោះថា «Loyal White Knights» បានបង្ហោះសារនៅលើ Telegram អំពាវនាវឱ្យធ្វើបាតុកម្មដើម្បី «ស្ដារឡើងវិញនូវស្មារតីជាតិសាសន៍ស្បែកស និងបង្រួបបង្រួមជនជាតិស្បែកស ប្រឆាំងនឹងអំពើរើសអើងសហគមន៍នេះ។

បច្ចុប្បន្ន សមត្ថកិច្ចកំពុងតាមឃ្លាំមើលរាល់សកម្មភាពរបស់ក្រុមបាតុករនានា ដែលអាចប្រមូលផ្ដុំគ្នាធ្វើបាតុកម្មជាថ្មីនៅពេលខាងមុខ៕

ប្រភព៖ News Week, LA Times
ប្រែសម្រួល៖ បុត្រា

April 12, 2021

អ្នកទោសរាប់ម៉ឺននាក់នៅសហរដ្ឋអាមេរិក ដែលបានរួចខ្លួនដោយសារ Covid-19 ពេលនេះអាចត្រូវវិលចូលពន្ធនាគារវិញ ក៏ព្រោះតែ Covid-19

គោលនយោបាយនៃអតីតរដ្ឋាភិបាលរបស់លោក Donald Trump អាចនាំឱ្យអ្នកទោសរាប់ពាន់នាក់ដែលមុននេះត្រូវបានព្យួរទោសដោយសារ Covid-19 ត្រូវត្រលប់ចូលពន្ធនាគារវិញនាពេលខាងមុខ។

អ្នកទោសម្នាក់ ឈ្មោះ Kendrick Fulton ត្រូវបាន Covid-19 បើកផ្លូវឱ្យចាប់ផ្ដើមជីវិតថ្មីនៅ Round Rock (រដ្ឋ Texas សហរដ្ឋអាមេរិក) បន្ទាប់ពីបានជាប់ពន្ធនាគារអស់រយៈពេល17ឆ្នាំ ដោយសារជួញដូរគ្រឿងញៀន។

យោងតាមសារព័ត៌មាន Reuters ព្រោះតែមានការលំបាកក្នុងការទប់ស្កាត់ការឆ្លងរាលដាលនៃវីរុសCovid-19 នៅក្នុងពន្ធនាគារ ក្រសួងយុត្តិធម៌អាមេរិក កាលពីឆ្នាំ2020 បានសម្រេចឱ្យ Fulton រួមនឹងអ្នកទោសជាង 23,800នាក់ អនុវត្តទោសរបស់ខ្លួនដោយការព្យួរនៅក្រៅឃុំ។

ប៉ុន្តែ បច្ចុប្បន្ន នៅពេលមនុស្សជាច្រើនបានចាក់វ៉ាក់សាំងបង្ការ Covid-19 រួចរាល់ អ្នកទោសរាប់ម៉ឺននាក់ដែលត្រូវបានអនុញ្ញាតឱ្យនៅក្រៅឃុំ កំពុងប្រឈមនឹងការប្រមូលចូលពន្ធនាគារវិញ ដើម្បីបន្តអនុវត្តទោសដែលនៅសល់ ដែលក្រសួងយុត្តិធម៌បានដាក់ចេញកាលពីដំណាក់កាលចុងក្រោយនៃរដ្ឋាភិបាលរបស់អតីតប្រធានាធិបតី Donald Trump។

តំណាងរាស្ត្រនៃគណបក្សប្រជាធិបតេយ្យ និងក្រុមសកម្មជនគាំទ្រវិសោធនកម្មច្បាប់ បានអំពាវនាវឱ្យប្រធានាធិបតីអាមេរិក លោក Joe Biden និងរដ្ឋមន្ត្រីក្រសួងយុត្តិធម៌ Merrick Garland ធ្វើបញ្ច្រាសគោលនយោបាយខាងលើ។ ប៉ុន្តែ មកដល់ពេលនេះ រដ្ឋាភិបាលថ្មីនៅតែមិនទាន់មានសកម្មភាពណាមួយឡើង ទាក់ទិននឹងបញ្ហានេះ។

យោងតាមសេចក្ដីសម្រេចចិត្តរបស់អតីតរដ្ឋាភិបាលនៃលោក Trump នៅពេលដែលបទបញ្ជាលើស្ថានភាពអាសន្នត្រូវបានដកចេញ នាយកដ្ឋានជាតិគ្រប់គ្រងពន្ធនាគារ ត្រូវតែនាំខ្លួនអ្នកទោសដែលត្រូវបានដាក់ឱ្យនៅក្រៅឃុំ ត្រលប់ចូលពន្ធនាគារវិញ បើសិនពួកគេមិនមានលក្ខខណ្ឌគ្រប់គ្រាន់ដើម្បីនៅផ្ទះ។ ប្រការនេះអាចប៉ះពាល់ដល់អ្នកទោសចំនួន 7,399នាក់ ដែលកំពុងត្រូវបានឃុំខ្លួនក្នុងផ្ទះ ព្រោះថា ពួកគេនៅមានពេលអនុវត្តទោសនៅឡើយ។

កន្លែងសម្រាករបស់អ្នកទោសមួយកន្លែង នៅ California សហរដ្ឋអាមេរិក កាលពីឆ្នាំ 2011

នៅចំពោះមុខហានិភ័យត្រូវត្រលប់ចូលពន្ធនាគារវិញ Fulton អាយុ47ឆ្នាំ ត្រូវប្រឈមនឹងស្ថានភាពបាត់បង់ជីវភាពថ្មីដែលទើបតែបានចាប់ផ្ដើម។ Fulton ឱ្យដឹង ខ្លួនអាចទទួលបានការវះកាត់ក្បាលជង្គង់ និងមានការងារមួយនៅក្រុមហ៊ុនលក់កញ្ចក់រថយន្ត បើសិនមិនត្រលប់ចូលពន្ធនាគារ។

«ពុំមានពាក្យអ្វីដែលអាចអធិប្បាយបានអំពីអារម្មណ៍របស់ខ្ញុំ នៅពេលត្រលប់មកផ្ទះបានឆាប់ជាង11ឆ្នាំ។ ខ្ញុំបានអនុវត្តទោសជាង17ឆ្នាំមកហើយ។ ខ្ញុំគួរត្រូវត្រលប់ទៅចំណាយពេល11ឆ្នាំទៀត ដោយគ្រាន់តែដើម្បីអង្គុយ ឬអត់» Fulton សំដែងការព្រួយបារម្ភ។

ក្រុមអ្នកគាំទ្រកំណែទម្រង់ច្បាប់ បានឱ្យដឹងថា បើសិនជាសេតវិមាន បន្តអនុវត្តគោលនយោបាយខាងលើ នោះនឹងនាំឱ្យមានការបំផ្លាញជីវភាពរបស់មនុស្សរាប់ម៉ឺននាក់ដែលទំនងជាមិនមានលទ្ធភាពបំពានច្បាប់ជាថ្មី និងកំពុងប្រកបរបរចិញ្ចឹមជីវិតដោយស្ថិរភាព បន្ទាប់ពីបានចេញពីពន្ធនាគារ។

«ការរក្សាគោលនយោបាយនេះ នឹងដើរបញ្ច្រាសទៅនឹងការប្ដេជ្ញាធ្វើកំណែទម្រង់ច្បាប់ដែលរដ្ឋាភិបាលថ្មីធ្លាប់បានសន្យា» Inimai Chettiar នាយកនៃអង្គការបណ្ដាញសកម្មភាពដើម្បីយុត្តិធម៌ បានថ្លែងដូច្នេះ។

មន្ត្រីនៃសហជីពតំណាងបុគ្គលិកនៅមន្ទីរកែប្រែមួយ យល់ថា ការប្រមូលអ្នកទោសចូលពន្ធនាគារវិញ នឹងមិនអាចទៅរួចនោះទេ បើគិតអំពីស្ថានភាពភ័ស្ដុភារ។ ចំណែកអ្នកនាំពាក្យមួយរូបរបស់ក្រសួងយុត្តិធម៌សហរដ្ឋអាមេរិក មិនបានឆ្លើយនឹងសំណួរស្ដីអំពីគោលនយោបាយប្រមូលអ្នកទោសចូលពន្ធនាគារវិញនោះទេ ប៉ុន្តែ បែរជាលើកសរសើរអំពីជោគជ័យនៃយុទ្ធនាការចាក់វ៉ាក់សាំងឱ្យបុគ្គលិកនៅមន្ទីរកែប្រែ និងអ្នកទោសទៅវិញ៕

ប្រភព៖ Reuters
ប្រែសម្រួល៖ បុត្រា

April 12, 2021

អាមេរិក រិះគន់ថា ចិនធ្វើឱ្យ Covid-19 កាន់តែធ្ងន់ធ្ងរជាងមុន ខណៈពិភពលោកមានអ្នកឆ្លងCovid-19 ជិត137លាននាក់

ពិភពលោកទាំងមូល បច្ចុប្បន្ន មានអ្នកឆ្លងវីរុសCovid-19 ជិត 137លាននាក់ និងជាង 2.9លាននាក់បានស្លាប់ ធ្វើឱ្យសហរដ្ឋអាមេរិក រិះគន់ចិន និងជំរុញឱ្យស្វែងរកប្រភពពិតរបស់វីរុសនេះ។

គិតមកដល់បច្ចុប្បន្ន ពិភពលោកទាំងមូលបានរកឃើញអ្នកវិជ្ជមាននឹងCovid-19 សរុបចំនួន 136,613,721នាក់ ក្នុងនោះមានអ្នកស្លាប់ 2,948,824នាក់, អ្នកជាសះស្បើយ 109,840,495នាក់ និងអ្នកកំពុងព្យាបាលមានចំនួន 23,824,402នាក់។ នេះបើតាមទំព័រ Worldometers។

ទាក់ទិននឹងបញ្ហា Covid-19 រដ្ឋមន្ត្រីការបរទេសសហរដ្ឋអាមេរិក Antony Blinken កាលពីថ្ងៃទី11មេសា បានរិះគន់ចិនថា មិនបានផ្ដល់សិទ្ធិដល់ក្រុមអ្នកជំនាញអន្តរជាតិ និងមិនព្រមចែករំលែកទិន្នន័យទៅតាមពេលវេលាទាន់ហេតុការណ៍។ «ជាលទ្ធផលគឺថា បានបាត់បង់ការគ្រប់គ្រងលើវីរុសយ៉ាងឆាប់រហ័ស និងកាន់តែធ្ងន់ធ្ងរ» លោក Antony Blinken ថ្លែងដូច្នេះ។

ការថ្លែងរបស់លោក Blinken បានសង្កត់ធ្ងន់ទៅលើការរិះគន់ពីសំណាក់ក្រុមមន្ត្រីរបស់លោក Joe Biden សំដៅលើទៅក្រុងប៉េកាំង នាពេលថ្មីៗនេះ ក្នុងនោះក៏មានការយល់ឃើញថា ចិនខ្វះតម្លាភាពក្នុងគ្រាដំបូងនៃវិបត្តិសុខភាព។

ប្រធានអង្គការសុខភាពពិភពលោក (WHO) លោក Tedros Adhanom Ghebreyesus កាលពីថ្ងៃទី30មីនា បានឱ្យដឹងថា ទិន្នន័យជាច្រើនមិនត្រូវបានផ្ដល់ដល់ក្រុមអ្នកជំនាញរបស់ WHO នៅក្នុងដំណើរស្វែងរកប្រភពវីរុសCovid-19 នៅប្រទេសចិន ហើយថា បញ្ហាជាច្រើនទៀតត្រូវការការស្រាវជ្រាវបន្ថែម។

«ប្រការសំខាន់គឺត្រូវតែមានលទ្ធផលចុងក្រោយដែលប្រាកដប្រជាអំពីរបៀបដែលវីរុសផ្ទុះឆ្លងរាលដាល។ យើងត្រូវការធ្វើដូច្នេះដើម្បីយល់ច្បាស់អំពីអ្វីដែលបានកើតឡើង និងទប់ស្កាត់ការកើតឡើងជាថ្មី។ នោះគឺជាមូលហេតុដែលយើងត្រូវការស្វែងយល់រហូតដល់ទីបញ្ចប់» លោក BlinKen ថ្លែងដូច្នេះ និងបានបន្តថា ចិនត្រូវតែចូលរួមកែសម្រួលប្រព័ន្ធសន្តិសុខសុខាភិបាលជាសកល ដើម្បីធានានូវតម្លាភាព និងការចែករំលែកព័ត៌មានពិត។

ពលរដ្ឋអាមេរិកាំង កំពុងរង់ចាំចាក់វ៉ាក់សាំង

សហរដ្ឋអាមេរិក គឺជាសម្បុកវីរុសCovid-19 ធំជាងគេក្នុងពិភពលោក ដោយបានរកឃើញអ្នកវិជ្ជមាន 31,918,591នាក់ និងស្លាប់ 575,829នាក់។ វ៉ាក់សាំងជិត 175លានដូសត្រូវបានចាក់នៅប្រទេសនេះ រាប់ចាប់ពីដើមខែធ្នូ ឆ្នាំ2020។ ពលរដ្ឋជាង 112លាននាក់បានទទួលការចាក់វ៉ាក់សាំងយ៉ាងតិចមួយម្ជុល ស្មើនឹងជាង 1/3 នៃចំនួនប្រជាជនសរុបរបស់សហរដ្ឋអាមេរិក។

គិតមកដល់ថ្ងៃទី8មេសា ឆ្នាំ2021 ពលរដ្ឋអាមេរិកាំងជិត 20% បានចាក់វ៉ាក់សាំងបង្ការ Covid-19 រួចរាល់។ ក្រុមហ៊ុន Pfizer កាលពីថ្ងៃទី9 ខែមេសា បានឱ្យដឹងថា កំពុងសុំច្បាប់ពីរដ្ឋាភិបាលដើម្បីប្រើប្រាស់វ៉ាក់សាំង សម្រាប់កុមារចាប់ពីអាយុ12-15ឆ្នាំ ហើយក្រុមហ៊ុនក៏នឹងដាក់សំណើដូចគ្នានេះទៅកាន់ស្ថាប័នដទៃទៀតនៅទូទាំងពិភពលោក នាពេលខាងមុខ៕

ប្រភព៖ CNN
ប្រែសម្រួល៖ បុត្រា

April 12, 2021

ស្វាមីរបស់មហាក្សត្រីអង់គ្លេស Elizabeth ទីពីរ សោយទិវង្គត

ព្រះរាជវាំង Buckingham បានប្រកាសឱ្យដឹងថា ព្រះអង្គម្ចាស់ Philip ដែលជាព្រះស្វាមីរបស់ព្រះមហាក្សត្រី Elizabeth ទីពីរ នៃចក្រភពអង់គ្លេស បានសោយទិវង្គតកាលពីថ្ងៃទី9មេសា ក្នុងព្រះជន្មាយុ 99វង្សា ដោយរោគាពាធ។

សេចក្ដីប្រកាសព័ត៌មានរបស់រាជវាំង Buckingham បានបញ្ជាក់ថា៖ «ព្រះអង្គម្ចាស់បានសោយទិវង្គតនៅវេលាព្រឹកនេះ នាវិមាន Windsor» និងបានឱ្យដឹងថា នឹងប្រកាសព័ត៌មានបន្ទាប់នៅពេលវេលាសមស្រប។

យោងតាមរាជវាំង Buckingham ក្សត្រា Philip និងមហាក្សត្រី Elizabeth ទីពីរ បានរៀបអភិសេកជាមួយគ្នាកាលពីឆ្នាំ1947 និងជាគូក្សត្រា-ក្សត្រីដែលបានដឹកនាំរាជវង្សបានយូរអង្វែងបំផុតក្នុងប្រវត្តិសាស្ត្រនៃប្រទេសអង់គ្លេស។ ព្រះអង្គម្ចាស់ Philip បានឈប់បំពេញរាជកិច្ចតាំងពីឆ្នាំ2017។

ព្រះអង្គម្ចាស់ Philip និងមហាក្សត្រី Elizabeth ទីពីរ នៃចក្រភពអង់គ្លេស

ក្នុងមួយរយៈពេលចុងក្រោយនេះ សុខភាពរបស់ក្សត្រា Philip បានចុះទ្រុឌទ្រោមជាងមុន ក្នុងនោះ កាលពីឆ្នាំ2019 ទ្រង់ធ្លាប់ត្រូវយាងចូលមន្ទីរពេទ្យរយៈពេល4យប់ទៀតផង ដើម្បីតាមដាន និងព្យាបាលព្រះរោគ។ ថ្មីៗនេះ ព្រះអង្គក៏ធ្លាប់ទទួលការវះកាត់ព្យាបាលបេះដូងដោយជោគជ័យផងដែរ៕

ប្រភព៖ BBC
ប្រែសម្រួល៖ បុត្រា

April 10, 2021

Category: អន្តរជាតិ