អន្តរជាតិ - La Reine Media

អតីតប្រធានាធិបតី និងជាប្រធានសភា នៃប្រទេស ម៉ាល់ឌីវ ត្រូវគេលួចធ្វើឃាត

អតីតប្រធានាធិបតី នៃប្រទេសម៉ាល់ឌីវ (Maldives) ដែលបច្ចុប្បន្នជា ប្រធានសភា ត្រូវរងរបួសធ្ងន់ និងត្រូវបញ្ជូនទៅកាន់មន្ទីរពេទ្យ បន្ទាប់ពីអ្វីដែលក្រុមមន្ត្រីនិយាយថាជា ការលួចធ្វើឃាត នៅក្នុងរដ្ឋធានី។

ក្រុមមន្ត្រីឱ្យដឹងថា អតីតប្រធានាធិបតី Mohamed Nasheed អាយុ 53ឆ្នាំ កំពុងត្រៀមឈានជើងឡើងរថយន្តរបស់ខ្លួន នៅឯរដ្ឋធានី Male កាលពីថ្ងៃទី06 ឧសភា ក៏ស្រាប់តែគ្រាប់បែកមួយគ្រាប់ដែលត្រូវបង្កៃនៅលើម៉ូតូក្បែរនោះ បានផ្ទុះ។

«Mohamed Nasheed បានរួចផុតពីអំពើឃាតកម្មមួយ។ គាត់ត្រូវរបួស ប៉ុន្តែ សុខភាពបានប្រសើរឡើងវិញហើយ» នេះបើតាមការឱ្យដឹងពីមន្ត្រីរដ្ឋាភិបាលម៉ាល់ឌីវ។

អង្គភាពប៉ូលិសប្រដាប់អាវុធ និងកម្លាំងសន្តិសុខ បានឡោមព័ទ្ធ និងដាក់បំរាមគោចរនៅតំបន់ជុំវិញកន្លែងកើតហេតុ។ ប៉ូលិសបានបញ្ជាក់ថា Mohamed Nasheed រងរបួស និងកំពុងទទួលការព្យាបាលនៅមន្ទីរពេទ្យ ADK ប៉ុន្តែ មិនបាននិយាយលម្អិតនោះទេ។

ហេតុការណ៍នេះ បានកើតឡើងនៅមុនពេលបំរាមគោចរពេលយប់នៅរដ្ឋធានី ដើម្បីទប់ស្កាត់ Covid-19 ចាប់ផ្ដើមមានសុពលភាព។ ប្រទេសដែលមានប្រជុំកោះចំនួន 26 នេះ កំពុងរងការវាយលុកខ្លាំងពី Covid-19 ពិសេសគឺនៅរដ្ឋធានី Male។

លោក Nasheed គឺជាអតីតអ្នកទោសនយោបាយម្នាក់ ដែលបានក្លាយជាប្រធានាធិបតីដែលកើតឡើងដោយការបោះឆ្នោតតាមបែបប្រជាធិបតេយ្យដំបូងគេនៅប្រទេសម៉ាល់ឌីវ កាលពីដើមឆ្នាំ2008។ លោកត្រូវបានទម្លាក់ពីតំណែងដោយរដ្ឋប្រហារកាលពីឆ្នាំ2012 និងត្រូវបានកាត់ទោសឱ្យជាប់ពន្ធនាគារ 13ឆ្នាំ កាលពីឆ្នាំ2015 ក្រោមបទចោទ ភេរវកម្ម ដែលនេះ ត្រូវបានក្រុមការពារសិទ្ធិមនុស្សចាត់ទុកថាជា រឿងនយោបាយ។

ប្រធានាធិបតី Abdulla Yameen បានអនុញ្ញាតឱ្យលោក Nasheed ធ្វើដំណើរទៅព្យាបាលជំងឺ និងរស់នៅនិរទេសខ្លួននៅប្រទេសអង់គ្លេស ប៉ុន្តែ បានត្រលប់មកប្រទេសវិញកាលពីឆ្នាំ2018។ Nasheed បានក្លាយជាប្រធានសភា ជាតំណែងដែលមានអំណាចធំជាងគេទីពីររបស់ប្រទេសនេះ ក្រោយការបោះឆ្នោតកាលពីឆ្នាំ2019។

Mohamed Nasheed ប្រឆាំងនឹងការដែលរដ្ឋាភិបាលរបស់លោក Abdulla Yameen ទទួលបានប្រាក់កម្ចីដែលមានការខ្ពស់យ៉ាងច្រើនសន្ធឹកពីប្រទេសចិន និងបានចោទប្រកាន់ថា ប្រធានាធិបតីបច្ចុប្បន្ន យកកោះទាំងនេះដាក់បញ្ចាំឱ្យប្រទេសចិន ដើម្បីយកប្រាក់មកអនុវត្តគម្រោងសាងសង់ហេដ្ឋារចនាសម្ព័ន្ធ៕

ប្រភព៖ AFP
ប្រែសម្រួល៖ បុត្រា

May 7, 2021

(វីដេអូ)-ជនជាតិឥណ្ឌារាប់ពាន់នាក់ ចូលរួមធម្មយាត្រា នាំទឹកពិសិដ្ឋទៅថ្វាយអាទិទេព ដើម្បីទប់ស្កាត់ Covid-19

ស្ត្រីជនជាតិឥណ្ឌា រាប់ពាន់នាក់ នៅក្នុងរដ្ឋ Gufarat មិនខ្ចីអើពើចំពោះបំរាមគោចរទប់ស្កាត់ Covid-19 ដោយពួកគេប្រមូលផ្ដុំគ្នា បួងសួង ក្រោយពីអ្នកបួសមួយរូប បានប្រកាសថា Covid-19 កើតឡើងដោយសារការក្រោធខឹងរបស់អាទិទេព។

ហ្វូងមនុស្សដែលស្ទើរតែទាំងអស់ជាស្ត្រី បានហែក្បួនតាមដងផ្លូវ ពីភូមិ Navapara ទៅកាន់ប្រាសាទ Baliyadev នៅក្នុងភូមិ Nidradh ស្រុក Ahmedabad កាលពីថ្ងៃទី4 ខែឧសភា ដោយនៅលើក្បាលរបស់ពួកគេ មានក្អមទឹកពិសិដ្ឋ សម្រាប់ថ្វាយចំពោះអាទិទេព។ ក្នុងចំណោមមនុស្សរាប់ពាន់នាក់នេះ គេហាក់មិនបានឃើញអ្នកណាម្នាក់ពាក់ម៉ាស ហើយក៏មិនមានការរក្សាគម្លាតសុវត្ថិភាព បើទោះ រដ្ឋ Gujarat កំពុងមានករណីឆ្លង Covid-19 យ៉ាងច្រើនក៏ដោយ។

ធម្មយាត្រានេះ បានកើតឡើង បន្ទាប់ពីអ្នកបួសម្នាក់បានប្រកាសថា ការផ្ទុះឡើងរបស់ Covid-19 គឺ ដោយសារ «ការក្រោធខឹងរបស់ពួកអាទិទេព»។ អ្នកបួសនោះក៏បានស្នើឱ្យមានធម្មយាត្រាមួយដើម្បីនាំយកទឹកពិសិដ្ឋទៅថ្វាយអាទិទេព ដើម្បី «ទប់ស្កាត់ Covid-19»។

ប៉ូលិសជាន់ខ្ពស់មួយរូប ឈ្មោះ Kamaria បានឱ្យដឹងថា មនុស្សចំនួន 23នាក់ ត្រូវបានចាប់ខ្លួនដោយសារបានចូលរួមក្នុងព្រឹត្តិការណ៍នេះ ក្នុងនោះក៏មានមេភូមិផងដែរ។

ប៉ូលិសនិយាយថា ក្រុមអ្នកភូមិប្រារព្ធពិធីនេះគឺដោយសារមានជំនឿថា នឹងគេចផុតពីរោគរាតត្បាត។ សមត្ថកិច្ច និងក្រុមអ្នកជំនាញ កំពុងចុះទៅកាន់កន្លែងកើតហេតុ ដើម្បីពន្យល់អ្នកភូមិអំពីហានិភ័យទាក់ទងនឹងការប្រមូលផ្ដុំគ្នានេះ។

រដ្ឋ Gujarat កំពុងអនុវត្តវិធានការទប់ស្កាត់ Covid-19 ក្នុងនោះ ក៏មានការហាមទីតាំងសាសនា ធ្វើសកម្មភាព ខណៈដែលបំរាមគោចរនៅពេលយប់ក៏ត្រូវបានដាក់ចេញនៅតំបន់មួយចំនួនផងដែរ។

យ៉ាងនេះក្ដី ពលរដ្ឋឥណ្ឌាភាគច្រើន ហាក់មិនទាន់យល់ដឹងអំពីហានិភ័យនៃការប្រមូលផ្ដុំគ្នា នៅចំពោះមុខវិបត្តិ Covid-19។ មនុស្សរាប់លាននាក់ នៅតែចូលរួមធ្វើធម្មយាត្រា យុទ្ធនាការឃោសនារកសំឡេងឆ្នោត ឬទៅបោះឆ្នោត ដោយវិធានការទប់ស្កាត់ការឆ្លងវីរុសជាច្រើនមិនត្រូវបានអើពើ។

ប្រទេសឥណ្ឌា បច្ចុប្បន្ន គឺជាសម្បុកវីរុសCovid-19 ធំជាងគេលំដាប់ទីពីរក្នុងពិភពលោក បន្ទាប់ពីសហរដ្ឋអាមេរិក ដោយមានអ្នកវិជ្ជមានសរុប 21,077,410នាក់ ក្នុងនោះមាន 230,168នាក់បានស្លាប់, 17,280,844នាក់បានជាសះស្បើយ និង 3,566,398នាក់កំពុងព្យាបាល៕

ប្រភព៖ ANI, Global Times, Indian Express
ប្រែសម្រួល៖ បុត្រា

May 6, 2021

អាមេរិកគាំទ្រដល់ការលុបបំបាត់ «កម្មសិទ្ធិបញ្ញាសម្រាប់វ៉ាក់សាំង COVID-19»

រដ្ឋបាលរបស់លោក Joe Biden គាំទ្រដល់ការដកការគាំពារចំពោះកម្មសិទ្ធិបញ្ញាទាក់ទិននឹងវ៉ាក់សាំងបង្ការវីរុសCovid-19 ដែលនេះនាំមកនូវក្ដីសង្ឃឹមថ្មីដល់បណ្ដាប្រទេសក្រីក្រដែលកំពុងមានការលំបាកក្នុងការបញ្ជាទិញវ៉ាក់សាំងនេះ។

ប្រទេសឥណ្ឌា ជាទីដែល Covid-19 កំពុងរាតត្បាតខ្លាំង បាននាំមុខក្នុងការតស៊ូមតិនៅឯអង្គការពាណិជ្ជកម្មពិភពលោក (WTO) ដើម្បីអនុញ្ញាតឱ្យក្រុមហ៊ុនផលិតឱសថជាច្រើនផ្សេងទៀត អាចផលិតវ៉ាក់សាំងបង្ការវីរុសCovid-19 បានច្រើនជាងមុន ប៉ុន្តែមតិនេះត្រូវបានជំទាស់ដោយបណ្ដាក្រុមហ៊ុនផលិតឱសថធំ។

លោកស្រី Katherine Tai អ្នកតំណាងពាណិជ្ជកម្មរបស់សហរដ្ឋអាមេរិក កាលពីថ្ងៃទី5 ខែឧសភា ឆ្នាំ2021 បានប្រកាសថា បើទោះជាសិទ្ធិគ្រប់គ្រងកម្មសិទ្ធិបញ្ញាគឺជារឿងសំខាន់សម្រាប់ក្រុមហ៊ុននានា ប៉ុន្តែ ទីក្រុងវ៉ាស៊ីងតោន «គាំទ្រដល់ការដកវិធានការការពារកម្មសិទ្ធិបញ្ញា សម្រាប់វ៉ាក់សាំងCovid-19» ដើម្បីលុបបំបាត់មហារោគរាតត្បាតនេះ។

លោកស្រី Katherine Tai ថ្លែងថា៖ «នេះគឺជាវិបត្តិសុខាភិបាលសកល ហើយភាពមិនធម្មតារបស់ Covid-19 ទាមទារឱ្យមានវិធានការពិសេស»។ ការលើកឡើងនេះ កើតមានបន្ទាប់ពីលោកស្រី Katherine Tai បានជួបពិភាក្សាលើបញ្ហានេះជាមួយមេដឹកនាំរបស់ក្រុមហ៊ុនផលិតវ៉ាក់សាំងធំៗទាំងអស់របស់សហរដ្ឋអាមេរិក រួមមាន ក្រុមហ៊ុន Pfizer, Moderna និង Johnson & Johnson។

ប្រធានាធិបតី Joe Biden កំពុងទទួលរងសម្ពាធយ៉ាងធ្ងន់ នៅពេលភាគីជាច្រើន បាន និងកំពុងជំរុញឱ្យបោះបង់វិធានការការពារចំពោះក្រុមហ៊ុនផលិតវ៉ាក់សាំង ពិសេសគឺនៅក្នុងគ្រាដែលសហរដ្ឋអាមេរិក ត្រូវបានគេរិះគន់ថា រក្សាទុកវ៉ាក់សាំងCovid-19 ច្រើនហួសហេតុ ខណៈដែលបណ្ដាប្រទេសក្រីក្រ កំពុងជួបបញ្ហាអាសន្នធំ។

លោក Tedros Adhanom Ghebreyesus ប្រធានអង្គការសុខភាពពិភពលោក (WHO) បានហៅការសម្រេចរបស់សហរដ្ឋអាមេរិកថាជា «ប្រវត្តិសាស្ត្រ» និងជារបត់ថ្មីដ៏ធំសម្បើម នៅក្នុងការប្រយុទ្ធប្រឆាំងវីរុសCovid-19»។ ប៉ុន្តែ លោកស្រី Katherine Tai បានព្រមានថា ការចរចា «នឹងត្រូវចំណាយពេលយូរ ដោយសារតែ WTO ចេញសេចក្ដីសម្រេចដោយយោងទៅតាមការព្រមព្រៀង»។

ពិភពលោក បច្ចុប្បន្ន មានអ្នកជំងឺCovid-19 ជាង 3.2លាននាក់បានស្លាប់ ប៉ុន្តែ ប្រទេសអ្នកមានជាច្រើន បានទទួលជោគជ័យមួយចំនួនធំនៅក្នុងការទប់ស្កាត់វីរុសCovid-19 ដោយសារយុទ្ធនាការចាក់វ៉ាក់សាំង។ គិតមកដល់បច្ចុប្បន្ន ពិភពលោកបានចាក់វ៉ាក់សាំងជាង 1.2ពាន់លានដូស ប៉ុន្តែ ការចាក់វ៉ាក់សាំងនៅក្នុងបណ្ដាប្រទេសក្រីក្របំផុត មានមិនដល់ 1% នៅឡើយ។

សហរដ្ឋអាមេរិក មិនខ្វះវ៉ាក់សាំងដូចឥណ្ឌា និងបណ្ដាប្រទេសដទៃទៀតនោះទេ។ ពួកគេនឹងទទួលបានវ៉ាក់សាំងចំនួន 300លានដូសបន្ថែមទៀតនាពេលដ៏ខ្លីខាងមុខ ដែលតួលេខនៃវ៉ាក់សាំងនេះ ប្រហាក់ប្រហែលនឹងចំនួនប្រជាជនសរុបរបស់ប្រទេសនេះ។

ចំណែកនៅប្រទេសឥណ្ឌាវិញ បញ្ហាខ្វះវ៉ាក់សាំង កំពុងតែរារាំងកិច្ចប្រឹងប្រែងក្នុងការចាក់វ៉ាក់សាំងរបស់ប្រទេសនេះ។ កាលពីសប្ដាហ៍មុន រដ្ឋាភិបាលឥណ្ឌា បានប្រកាសអនុញ្ញាតឱ្យចាក់វ៉ាក់សាំងដល់ពលរដ្ឋដែលមានអាយុចាប់ពី 18ឆ្នាំឡើងទៅ ប៉ុន្តែ មានរដ្ឋចំនួន12 ប៉ុណ្ណោះ នៅក្នុងចំណោមរដ្ឋ និងដែនដីទាំង 36របស់ឥណ្ឌា មានវ៉ាក់សាំងគ្រប់គ្រាន់ដើម្បីចាក់៕

ប្រភព៖ AFP
ប្រែសម្រួល៖ បុត្រា

May 6, 2021

គ្រួសារ Bill Gates លែងលះគ្នា បន្សល់ទុកនូវសារខ្លីរបស់ប្រពន្ធថា ចង់មានជីវិតឯកជន

មហាសេដ្ឋីចិត្តធម៍ដ៏ល្បីល្បាញទាំងផ្នែកបច្ចេកវិទ្យា និងសង្គម លោក Bill Gates និងអ្នកស្រី Melinda Gates ត្រូវបានសារព័ត៌មានធំៗចុះផ្សាយថា បានលែងលះគ្នាហើយ បន្ទាប់ពីរួមរស់ជាប្តីប្រពន្ធអស់រយៈពេលជាង 27ឆ្នាំកន្លងមក បន្សល់ទុកនូវចំណងអាពាហ៍ពិពាហ៍ កូនស្រីដ៏ស្រស់ស្អាត 2នាក់ និងកូនប្រុសម្នាក់ ដែលឥឡូវពួកគេក៏ពេញវ័យហើយដែរ។

នៅក្នុងសាររបស់លោកស្រី Melina Gates បានសរសរថា៖ «កន្លងមកជាង 27ឆ្នាំមកនេះ ពួកយើងធ្វើដំណើរដ៏វែងឆ្ងាយ បន្សល់ទុកនូវកូនៗដ៏ឆ្លាតវៃ 3នាក់ និងបង្កើតមូលនិធិមនុស្សធម៍ស្ទើរតែជុំវិញពិភពលោក។ ពួកយើងនឹងនៅតែបន្តបេសកកម្មមនុស្សធម៌ដដែល ហើយក៏នឹងនៅតែធ្វើការជាមួយគ្នា តែពួកយើងលែងមានអ្វីត្រូវជឿជាក់ថា នឹងរីកចម្រើនជាលក្ខណៈគូស្វាមីភរិយាទៀតហើយ។ ខ្ញុំចង់បានជីវិតឯកជន ចង់ចាប់ផ្តើមជីវិតថ្មី»

លោក Bill Gates និងអ្នកស្រីបានរៀបការជាមួយគ្នានៅកោះហាវ៉ៃ តាំងពីឆ្នាំ1994 មកទល់បច្ចុប្បន្នលោក Bill Gate មានវ័យ 65ឆ្នាំ ត្រូវបានគេដឹងថា ជាអ្នកបង្កើតក្រុមហ៊ុនផលិត Software ធំជាងគេ គឺ Microsoft ចំណែកអ្នកស្រីមានវ័យ 56ឆ្នាំ ជាអ្នកបង្កើតអាជីវកម្ម និងជាអ្នកនិពន្ធសៀវភៅផងដែរ។

បេសកកម្មរួមគ្នារបស់ស្វាមី-ភរិយាមួយគូនេះ ដែលនឹងបន្តធ្វើការជាមួយគ្នានោះគឺ មូលនិធិ Philanthropic foundation៕

pic.twitter.com/fCVHDlZbvq
— Melinda French Gates (@melindagates) May 3, 2021

May 5, 2021

សហរដ្ឋអាមេរិក ផ្ដល់ប្រាក់រង្វាន់មិនមានដែនកំណត់ ដល់អ្នកនាំមនុស្សមកចាក់វ៉ាក់សាំង Covid-19

កន្លងមក មានពេលខ្លះ ការទទួលបានការណាត់ចាក់វ៉ាក់សាំងបង្ការ Covid-19 នៅសហរដ្ឋអាមេរិក មិនខុសពីការត្រូវឆ្នោតនោះឡើយ ក៏ប៉ុន្តែ បច្ចុប្បន្ន បញ្ហានេះ ផ្ទុយស្រឡះបាត់ទៅហើយ ដោយអាជ្ញាធររបស់រដ្ឋជាច្រើននៅសហរដ្ឋអាមេរិក កំពុងស្វែងរកវិធីសាស្ត្រល្អៗ ហើយពេលខ្លះក៏ប្លែកៗ ដើម្បីទាក់ទាញពលរដ្ឋមកចាក់វ៉ាក់សាំងបង្ការវីរុសCovid-19 ព្រោះពលរដ្ឋមានការរារែក។

Larry Hogan អភិបាលរដ្ឋ Maryland បានថ្លែងកាលពីថ្ងៃទី3 ខែឧសភាថា៖ «វ៉ាក់សាំង មានសុវត្ថិភាព និងប្រសិទ្ធភាពទាំងស្រុង ហើយវាសុទ្ធតែមិនគិតថ្លៃ និងនៅមានជានិច្ច បើទោះអ្នកបានចុះឈ្មោះមុន ឬអត់» Larry Hogan បានអំពាវនាវឱ្យក្រុមហ៊ុននានា ផ្ដល់អត្ថប្រយោជន៍ផ្សេងៗដល់បុគ្គលិកដែលបានចាក់វ៉ាក់សាំង។

យុទ្ធសាស្ត្រនេះ ត្រូវបានលើកឡើងក្នុងគ្រាដែលក្រុមអ្នកជំនាញផ្នែកសុខាភិបាលសាធារណៈ ទទួលស្គាល់ថា សហរដ្ឋអាមេរិក ពិបាកសម្រេចបានគោលដៅដែលបានកំណត់លើការចាក់វ៉ាក់សាំងបង្ការ Covid-19 ដោយសារបញ្ហាសេរីភាព និងការសង្ស័យលើសុវត្ថិភាពរបស់វ៉ាក់សាំង។

«ជាមនុស្ស យើងតែងតែប្រតិកម្មវិជ្ជមានទៅលើមើមការ៉ុតច្រើនជាងដំបង» បណ្ឌិត Megan Ranney មកពីសាកលវិទ្យាល័យ Brown នៅ Rhode Island ថ្លែងកាលពីថ្ងៃទី3 ខែឧសភា។

បើតាមអ្នកស្រី យុទ្ធនាការចាក់វ៉ាក់សាំង តែងមានប្រសិទ្ធភាពជាង នៅពេលគេប្រើពាក្យពេចន៍ដែលមិនកង្កប់ការបង្ខិតបង្ខំលើពលរដ្ឋ។ ការបញ្ជូនសារ «វ៉ាក់សាំងបានត្រៀមខ្លួនជាស្រេចសម្រាប់អ្នក» គឺជាឃ្លាដ៏ល្អ ដើម្បីទាក់ទាញពលរដ្ឋមកចាក់វ៉ាក់សាំង។

នៅក្នុងរដ្ឋ New Jersey អភិបាល Phil Murphy ឱ្យដឹងថា រាល់បុគ្គលដែលមានអាយុចាប់ពី 21ឆ្នាំ និងបានចាក់វ៉ាក់សាំងយ៉ាងតិចមួយដូស នឹងទទួលបានស្រាបៀរដោយមិនគិតថ្លៃ នៅទីតាំងលក់ស្រាបៀរដែលបានចូលរួមក្នុងកម្មវិធីរបស់រដ្ឋ។

រដ្ឋ Connecticut ក៏មានកម្មវិធីស្រដៀងនេះដែរ ក្នុងនោះ ពលរដ្ឋដែលបានចាក់វ៉ាក់សាំងយ៉ាងតិចមួយដូស នឹងទទួលបានភេសជ្ជៈមានអាល់កុល ឬមិនមានអាល់កុល នៅតាមហាងដែលបានសហការជាមួយអាជ្ញាធរ សម្រាប់ខែឧសភានេះ។

ការចាក់វ៉ាក់សាំងនៅតំបន់ Pittsburgh នៃរដ្ឋ Pennsylvania

នៅទីក្រុង Detroit កាលពីសប្ដាហ៍មុន បានប្រកាសថា នឹងផ្ដល់ប័ណ្ណអំណោយដែលមានតម្លៃ 50ដុល្លារ ទៅឱ្យបុគ្គលទាំងឡាយណាដែលបាននាំមនុស្សម្នាក់មកកាន់មណ្ឌលចាក់វ៉ាក់សាំង។ មិនមានការកំណត់លើចំនួនទឹកប្រាក់ដែលបុគ្គលម្នាក់ទទួលបាននោះទេ ប៉ុន្តែ បើទទួលបានលើសពី 600ដុល្លារ នឹងត្រូវបង់ពន្ធលើប្រាក់ចំណូល។

ដើម្បីជាការលើកទឹកចិត្តឱ្យបុគ្គលិករដ្ឋមកចាក់វ៉ាក់សាំង អាជ្ញាធររដ្ឋ Maryland កំពុងស្នើឱ្យផ្ដល់ប្រាក់រង្វាន់ 100ដុល្លារ បើសិនជាពួកគេយល់ព្រមចាក់វ៉ាក់សាំងCovid-19។

Jim Justice ដែលជាអភិបាលរដ្ឋ Virginia ខាងលិច កាលពីសប្ដាហ៍មុន បានឱ្យដឹងដែរថា រដ្ឋនេះនឹងផ្ដល់មូលបត្របំណុលសន្សំរបស់រដ្ឋ (Savings Bonds) ដែលមានតម្លៃស្មើ 100ដុល្លារ ដល់ពលរដ្ឋទាំងឡាយដែលមានអាយុចាប់ពី 16 ដល់ 35ឆ្នាំ និងបានចាក់វ៉ាក់សាំង Covid-19។ ប៉ុន្តែ កាលពីថ្ងៃទី3 ខែឧសភា លោកបាននិយាយថា នឹងពិនិត្យរកវិធីសាស្ត្រលើកទឹកចិត្តផ្សេងវិញ ដោយសារពិបាកបង្កើតកម្មវិធីនេះ។

នៅ Los Angeles នៃរដ្ឋ California សមាជិកម្នាក់នៃក្រុមប្រឹក្សាភិបាលក្រុង និងមជ្ឈមណ្ឌលវប្បធម៌ពហុជំនឿ កាលពីថ្ងៃទី30 ខែមេសា បានដំណើរការកម្មវិធីជូនអំណោយដល់បុគ្គលទាំងឡាយដែលបានមកកាន់កន្លែងចាក់វ៉ាក់សាំងដោយមិនគិតថ្លៃរបស់ពួកគេ។

ក៏ប៉ុន្តែ Arthur Caplan សាស្ត្រាចារ្យផ្នែកក្រមសីលធម៌វេជ្ជសាស្ត្រ មកពីសាលាវេជ្ជសាស្ត្រ Grossman នៃសាកលវិទ្យាល័យ New York បានព្រមានអំពីប្រសិទ្ធភាពរបស់កម្មវិធីលើកទឹកចិត្តការចាក់វ៉ាក់សាំងខាងលើ។

«ខ្ញុំគិតថា អារម្មណ៍រារែក និងការពន្យារពេល កំពុងចាក់ឫសជ្រៅ ហើយអ្នកពិតជាពិបាកដោះស្រាយដោយការប្រើប្រាស់អំណោយជាប្រាក់ 100ដុល្លារ ឬអំណោយប្រហាក់ប្រហែលនេះ» លោក Arthur Caplan ថ្លែងដូច្នេះ។

គិតមកដល់បច្ចុប្បន្ន សហរដ្ឋអាមេរិក បានប្រើប្រាស់វ៉ាក់សាំងចំនួន 247លានដូស ក្នុងនោះ អ្នកដែលបានទទួលការចាក់វ៉ាក់សាំងរួចរាល់ មានចំនួន 106លាននាក់ ស្មើនឹង 32.1%៕

ប្រភព៖ NYTimes
ប្រែសម្រួល៖ បុត្រា

May 5, 2021

ចាប់ផ្ដើមរកលែងបាន! ប្រេស៊ីល ជួបបញ្ហាខ្វះខាតវ៉ាក់សាំងកូវី-19 ត្រូវផ្អាកចាក់ដូសទី2

បញ្ហាខ្វះខាតវ៉ាក់សាំងកូវីដ-19 បានបង្ខំឱ្យទីក្រុងធំៗជាច្រើននៅក្នុងប្រទេសប្រេស៊ីល ត្រូវផ្អាកចាក់ដូសទី2 ជាបណ្ដោះអាសន្ន។ នេះបើតាមការឱ្យដឹងពីមន្ត្រី និងរបាយការណ៍ព័ត៌មានរបស់ប្រព័ន្ធផ្សព្វផ្សាយ កាលពីថ្ងៃចន្ទ ទី3 ឧសភា។ ហេតុការណ៍ផ្អាកចាក់វ៉ាក់សាំងប្រឆាំងជំងឺកូវីដ-19 យ៉ាងបន្ទាន់ចុងក្រោយនេះ បានកើតឡើងក្រោមស្ថានការណ៍ឆ្លងរាលដាលដ៏អាក្រក់។

ទីក្រុងធំៗ ចំនួន7 ក្នុងចំណោម 26រដ្ឋ របស់ប្រទេសប្រេស៊ីល ត្រូវបញ្ឈប់ការចាក់វ៉ាក់សាំងរបស់ CoronaVac ដែលអភិវឌ្ឍដោយប្រទេសចិន ដោយសារតែការផ្គត់ផ្គង់ មិនគ្រប់គ្រាន់។ នេះបើតាមរបាយការណ៍របស់វេបសាយព័ត៌មាន G1។

រីអូ ដឺ ចានេរ៉ូ ទីក្រុងធំបំផុត លំដាប់លេខ2 របស់ប្រទេសប្រេស៊ីល បានថ្លែងផ្អាកចាក់វ៉ាក់សាំងដូសទី2 រយៈពេល 10ថ្ងៃ នៅថ្ងៃសៅរ៍ ទី1 ឧសភា មុននឹងកែសម្រួលកាលវិភាគការចាក់វ៉ាក់សាំងជាថ្មី ដោយបែរមកចាក់ដូសជំរុញការប្រឆាំងមេរោគតាមក្រុមអាយុមនុស្សវិញម្ដង ទោះជាដំណើរការទៅយ៉ាងយឺតៗក៏ដោយ។

ទីក្រុងដែលមានប្រជាជនចំនួនជាង 6.7លាននាក់មួយនេះ បានវិលមកដំណើរការចាក់វ៉ាក់សាំងដូសទី2 កាលពីថ្ងៃចន្ទ ទី3 ឧសភា ម្សិលមិញ ចំពោះតែមនុស្សចាស់ វ័យ 70ឆ្នាំឡើងទៅ ចំណែកមនុស្សដែលអាយុតិចជាង 60ឆ្នាំ ក្នុងនោះរួមទាំងមន្ត្រីសុខាភាពសាធារណៈផងនោះ តាមកាលវិភាគចាក់វ៉ាក់សាំងថ្មីរបស់ទីក្រុងនេះ ពួកគេអាចនឹងត្រូវរង់ចាំយូរដល់ទៅ 2 ទៅ 12ថ្ងៃ តាមរយៈការណែនាំឱ្យចាក់វ៉ាក់សាំងក្នុង 1ដូសៗ ឆ្ងាយពីគ្នា 28ថ្ងៃ។

ចំណែកទីក្រុងធំៗផ្សេងទៀត ដែលផ្អាកការចាក់វ៉ាក់សាំងដូសទី2 ដែរនោះ រួមមាន ទីក្រុងធំ ដូចជា បូឡូ ហូរីសុនតេ និងប៉ូទូអា លេក្រេ ដែលមានប្រជាជនប្រមាណ 2.5លាននាក់ និង 1.5នាក់ តាមលំដាប់។

សារព័ត៌មាន Folha de Sao Paulo បានរាយការណ៍ថា ក្នុងបណ្ដាទីក្រុងធំៗរបស់រដ្ឋផ្សេងៗទូទាំងប្រទេសប្រេស៊ីល បច្ចុប្បន្ន ច្រើនជាងពាក់កណ្ដាល មិនមានវ៉ាក់សាំងគ្រប់គ្រាន់ សម្រាប់ការចាក់ដូសទី2 ឱ្យប្រជាជនគ្រប់គ្នា ដែលបានទទួលវ៉ាក់សាំងដូសទី1 រួចហើយនោះទេ។

កូវីដ-19 បានសម្លាប់ជីវិតមនុស្សនៅក្នុងប្រទេសប្រេស៊ីលរួចហើយ អស់ជាង 400,000នាក់ ខ្ពស់បំផុតលំដាប់លេខ2 របស់ពិភពលោក បន្ទាប់ពីសហរដ្ឋអាមេរិក តែពេលនេះ ពួកគេកំពុងជួបនឹងបញ្ហាក្នុងការស្វែងរកវ៉ាក់សាំង ចាក់ឱ្យប្រជាជនចំនួន 212លាននាក់។

កន្លងមកលោក ឆាអ៊ី បូលសូណេរ៉ូ ប្រធានាធិបតីស្ដាំនិយមរបស់ប្រទេសប្រេស៊ីល បានរងការរិះគន់យ៉ាងខ្លាំង ចំពោះការមើលស្រាលជំងឺរាតត្បាតដ៏ធំនេះ និងធ្វើព្រងើយកន្តើយ ចំពោះការណែនាំរបស់បណ្ដាអ្នកជំនាញការ ក្នុងវិធានការគ្រប់គ្រងការឆ្លងរាលដាលរបស់វីរុសកូរ៉ូណាប្រភេទថ្មីនេះ។

រហូតមកដល់ពេលនេះ មានប្រជាជនប្រេស៊ីល បានទទួលវ៉ាក់សាំងដូសបំបូងរួចហើយប្រមាណ 15% និងមាន 7.5% ដែលបានទទួលវ៉ាក់សាំងគ្រប់ទាំង 2ដូស៕

ប្រភព៖ ទីភ្នាក់ងារព័ត៌មាន AFP
ប្រែសម្រួលដោយ តាវ៉ែនតា

May 4, 2021

(វីដេអូ)-បាក់ស្ពានអាកាសនៃផ្លូវរថភ្លើងនៅប្រទេសម៉ិកស៊ិក! មនុស្សយ៉ាងតិច 15នាក់បានស្លាប់

យ៉ោងហោចណាស់ មានមនុស្សចំនួន 15នាក់ បានបាត់បង់ជីវិត នៅក្នុងករណីបាក់ស្ពានអាកាសនៃផ្លូវរថភ្លើងមួយកន្លែងនៅទីក្រុង Mexico City នាថ្ងៃទី5 ខែឧសភានេះ។

អង្គភាពការពារពលរដ្ឋ និងគ្រប់គ្រងហានិភ័យរបស់ប្រទេសម៉ិកស៊ិក បានបញ្ជាក់ថា ក្រៅពីបានសម្លាប់មនុស្សចំនួន 15នាក់ គ្រោះថ្នាក់នេះ ក៏បានបង្ករបួសធ្ងន់ស្រាលដល់អ្នកដំណើរចំនួន 70នាក់ផ្សេងទៀតផងដែរ។ ករណីនេះបានកើតឡើងនៅវេលាថ្ងៃត្រង់ នៃថ្ងៃទី5 ខែឧសភា ឆ្នាំ2021 (ម៉ោងនៅភ្នំពេញ)។

យោងតាមសារព័ត៌មាន Reuters របស់អង់គ្លេស គ្រោះថ្នាក់នេះកើតឡើងនៅពេលកំណត់ផ្លូវដែកមួយនៅលើទីខ្ពស់ នៅភាគខាងត្បូងទីក្រុង បានបាក់ភ្លាមៗ និងធ្លាក់ទៅលើដងផ្លូវខាងក្រោម ដែលមានរថយន្តជាច្រើនកំពុងបរឆ្លងកាត់។

សារព័ត៌មានក្នុងស្រុក បានចេញផ្សាយរូបថតនានា បង្ហាញអំពីទិដ្ឋភាពបុគ្គលិកពន្លត់អគ្គិភ័យ និងក្រុមអ្នកជួយសង្គ្រោះ បានទៅដល់កន្លែងកើតហេតុយ៉ាងឆាប់រហ័ស និងកំពុងជួយសង្គ្រោះជនរងគ្រោះដែលជាប់នៅក្រោមគំនរបាក់បែក។

https://www.youtube.com/watch?v=5tnhenVIHcs

អភិបាលក្រុង Mexico City លោកស្រី Claudia Sheinbaum ក៏បានបង្ហាញខ្លួននៅកន្លែងកើតហេតុ និងកំពុងដឹកនាំការជួយសង្គ្រោះនេះដោយផ្ទាល់៕

ប្រភព៖ Reuters
ប្រែសម្រួល៖ បុត្រា

May 4, 2021

កម្លាំងយោធា រវាងសហរដ្ឋអាមេរិក និងប្រទេសចិន តើប្រទេសណាខ្លាំងជាង?

កងទ័ពសហរដ្ឋអាមេរិក មានទាហាន និងនាវាមុជទឹកតិចជាងប្រទេសចិន ប៉ុន្តែ មាននាវាផ្ទុកយន្តហោះ, យន្តហោះ និងនាវាចម្បាំងច្រើនជាង។

ខាងក្រោមគឺជាទិន្នន័យនៃការប្រៀបធៀបកម្លាំងយោធា រវាងសហរដ្ឋអាមេរិក ទល់នឹងកម្លាំងយោធារបស់សាធារណរដ្ឋប្រជាមានិតចិន៖
ប្រភព៖ Global Fire Power, Express
ប្រែសម្រួល៖ បុត្រា

May 4, 2021

សូម៉ាលី ប្រទេសដែល ចោរគ្រងផែនដី

តាមរយៈការវាយតម្លៃរបស់ស្ថាប័នហ៊ិរ៉ាល់ បានឱ្យដឹងថា ក្រុមប្រដាប់អាវុធ អាល់-ឆាបាប់ មានប្រាក់ចំណូលដែលបានមកពីប្រមូលភាស៊ី ក្នុង 1ខែៗ មិនតិចជាង 15លានដុល្លារអាមេរិកឡើយ។ ជាចំនួនដែលមិនមែនតិចតួចឡើយ សម្រាប់ប្រទេសដែលអង្គការសហប្រជាជាតិ និងធនាគារពិភពលោក ចាត់ទុកថាជា ប្រទេសដែលទ័លក្របំផុតក្នុងពិភពលោកមួយនេះ។

ក្រុមភេរវករប្រដាប់អាវុធ “អាល់-ឆាបាប់” សម្ព័ន្ធមិត្តរបស់ក្រុមអាល់-កៃដា នៅក្នុងប្រទេសសូម៉ាលី បានប្រើអំពើហិង្សា និងការសម្លុតគំរាមកំហែង ទារយក “ភាស៊ីខុសច្បាប់” ទាំងពីប្រជាជន និងមន្ត្រីរបស់រដ្ឋ នៅក្នុងតំបន់ដែលពួកគេគ្រប់គ្រង បង្កើតប្រាក់ចំណូលបានយ៉ាងច្រើន ស្មើៗ ឬអាចច្រើនជាងរដ្ឋាភិបាលដែលអន្តរជាតិទទួលស្គាល់ទៅទៀត។ នេះបើតាមរបាយកាណ៍ លទ្ធផលនៃការសិក្សាស្រាវជ្រាវរបស់ស្ថាប័នហ៊ិរ៉ាល់ ក្នុងទីក្រុង ម៉ូកាឌិឈូ ប្រទេសសូម៉ាលី។

របាយការណ៍ខាងលើ ទទួលបានពីការសាកសួរប្រជាជនទូទៅ អ្នកធុរកិច្ច មន្ត្រីរបស់រដ្ឋ រួមទាំងអតីតសមាជិករបស់អាល់-ឆាបាប់ និងសមាជិកបច្ចុប្បន្ន ដែលមានតួនាទីដើរប្រមូលភាស៊ីខុសច្បាប់ ប្រកួតជាមួយរដ្ឋាភិបាលរបស់ពួកគេ។

តាមរយៈការវាយតម្លៃរបស់ស្ថាប័នហ៊ិរ៉ាល់ បានឱ្យដឹងទៀតថា ក្រុមអាល់-ឆាបាប់ ឬមានឈ្មោះពេញថាហារ៉ាកាត់ អាល់-ឆាបាប់ អាល់-មូចាហ៊ីឌីន ឬហេចបូលឡា អាល់-ឆាបាប់ ដែលមានន័យថា គណបក្សយុវជន(Party of the Youth) មានចំណូលពីការប្រមូលភាស៊ីខុសច្បាប់ ក្នុង 1ខែៗ មិនតិចជាង 15លានដុល្លារអាមេរិកឡើយ។ ជាចំនួនដែលមិនមែនតិចតួចឡើយ សម្រាប់ប្រទេសដែលអង្គការសហប្រជាជាតិ និងធនាគារពិភពលោក ចាត់ទុកថាជា ប្រទេសដែលទ័លក្របំផុតក្នុងពិភពលោក។

អ្វីដែលគួរឱ្យភ្ញាក់ផ្អើលនោះគឺ ជាងពាក់កណ្ដាលនៃប្រាក់ចំណូលប្រចាំខែក្នុង 1ខែៗនោះ គឺបានមកពីការជំរិតទារ នៅក្នុងតំបន់ទីក្រុងធំ ម៉ូកាឌិឈូ ទោះជាតំបន់ដែលគ្រប់គ្រងរបស់អាល់-ឆាបាប់ ស្ថិតនៅភាគខាងត្បូង និងភាគកណ្ដាលក្ដី និងជុំវិញទីក្រុងម៉ូកាឌិឈូក្ដី។

តាមរយៈទិន្នន័យរបស់ក្រសួងហិរញ្ញវត្ថុរបស់ប្រទេសសូម៉ាលី បានឱ្យដឹងថា ពេញ 1ឆ្នាំ2019 រដ្ឋាភិបាល មានចំណូលពីការប្រមូលពន្ធភាស៊ី និងផ្សេងៗក្នុងប្រទេស សរុប 230លានដុល្លារអាមេរិក។

ក្រុមអាល់-ឆាបាប់ បង្កើតឡើងនៅឆ្នាំ2006 ដោយមានគោលដៅចម្បង គឺប្រយុទ្ធប្រឆាំងនឹង “សត្រូវរបស់សាសនា” ដែលពួកគេគោរពជឿជាក់ និងផ្ដួលរំលំរដ្ឋាភិបាលសូម៉ាលី ដើម្បីបង្កើតរដ្ឋសាសនាក្នុងឧត្ដមគតិរបស់ពួកគេឡើង និងនៅក្នុងឆ្នាំ2014 មេខ្លោងធំរបស់ក្រុមពួកគេ បានប្រកាសភក្ដីភាពជាមួយក្រុមអាល់-កៃដា។

ប្រទេសជាច្រើន រួមទាំងសហរដ្ឋអាមេរិក សហរាជអាណាចក្រ អូស្ត្រាលី កាណាដា សហរដ្ឋអារ៉ាប់ អេមីរេត ឬសូម្បីតែប្រទេសម៉ាឡេស៊ី បានប្រកាសដាក់ក្រុមអាល់-ឆាបាប់ ចូលក្នុងបញ្ជីខ្មៅ ថាជា “អង្គការបង្កភេរវកម្ម” និងកាលពីខែមេសា ឆ្នាំ2015 ក្រសួងការបរទេសនៃសហរដ្ឋអាមេរិក បានប្រកាសដាក់រង្វាន់បង្ហាញតម្រុយ ក្នុងការឈានទៅដល់ការចាប់ខ្លួនមេខ្លោងលំដាប់ខ្ពស់ជាច្រើននាក់របស់អាល់-ឆាបាប់ រួមទាំងមេខ្លោងធំបំផុតនាពេលបច្ចុប្បន្ន គឺលោកអាម៉ាត់ អ៊ូម៉ា ក្នុងតម្លៃ 6លានដុល្លារអាមេរិក។

បច្ចុប្បន្ន អាល់-ឆាបាប់ មានអ្នកប្រយុទ្ធនៅក្នុងក្រុមប្រមាណជា 9,500នាក់ និងចំនួននោះកំពុងកើនឡើងជារឿយៗ មានទាំងជនជាតិសូម៉ាលី និងអ្នកស៊ីឈ្នួលប្រយុទ្ធជនជាតិបរទេស ដែលមានឧត្ដមគតិដូចគ្នា ហើយទិន្នន័យដែលទទួលបានពីអង្គភាពស៊ើបការណ៍អន្តរជាតិជាច្រើន បានបញ្ជាក់ថា ក្រុមអាល់-ឆាបាប់ បានទទួលការគាំទ្រផ្នែកហិរញ្ញវត្ថុ និងអាវុធ រួមទាំងអ្នកប្រយុទ្ធជនជាតិបរទេស ពីប្រទេសធំៗ ក្នុងតំបន់មជ្ឈិមបូព៌ា និងអាហ្វ្រិកខាងជើង យ៉ាងតិច 8ប្រទេស។

ការចុះទៅក្នុងតំបន់ ត្រួតពិនិត្យដោយផ្ទាល់ ដើម្បីស្វែងរកទិន្នន័យបែបស៊ីជម្រៅ របស់ក្រុមអ្នកស្រាវជ្រាវរបស់ស្ថាប័នហ៊ិរ៉ាល់ បានរកឃើញថា មានជនរងគ្រោះចំនួនដ៏ច្រើន ត្រូវបង់ថ្លៃភាស៊ីត្រួតគ្នា ទៅឱ្យទាំងរដ្ឋាភិបាល និងក្រុមអាល់-ឆាបាប់។

ក្រុមហ៊ុនធំៗ ទូទាំងប្រទេសសូម៉ាលី ត្រូវបង់ “ប្រចាំខែ” ឱ្យក្រុមអាល់-ឆាបាប់ ច្រើន-តិចទៅតាមការវាយតម្លៃរបស់អង្គភាពប្រមូលភាស៊ីខុសច្បាប់ ដែលអាចស៊ើបដឹងពីទិន្នន័យរបស់ធុរកិច្ច ស្មើៗនឹងមន្ត្រីពន្ធដាររបស់រដ្ឋបាលដែរ ក្រៅពីនោះ ថែមទាំងត្រូវបង់ “ប្រចាំឆ្នាំ” ក្នុងរូបបែបជា “សៈកាត” ឬប្រាក់បរិច្ចាគទានប្រចាំឆ្នាំ តែជាការបរិច្ចាគបែប “បង្ខំឱ្យបង់” ដោយគ្រប់ក្រុមហ៊ុនទាំងអស់ត្រូវបង់ 2.5% នៃចំណូលរបស់ក្រុមហ៊ុនទាំងអស់ក្នុង 1ឆ្នាំ។

ប្រាក់ចំណូលចម្បងៗ 1ផ្នែករបស់អាល់-ឆាបាប់ បានមកពីកំពង់ផែជាច្រើនកន្លែង ដែលស្ថិតនៅតាមបណ្ដោយព្រំដែនខាងសមុទ្រឥណ្ឌា ភាគខាងកើតប្រទេស រួមទាំងកំពុងផែធំក្នុងទីក្រុងម៉ូកាឌិឈូ ដោយប្រមូលភាស៊ី ពីមុខទំនិញ ទាំងនាំចេញ និងនាំចូល។

នាយទាហានលំដាប់ខ្ពស់របស់កងទ័ពសូម៉ាលីម្នាក់ ដែលសុំមិនប្រាប់ពីឋានន្តរស័ក្ដិ ដោយប្រាប់ត្រឹមតែមានតំណែងជាមេបញ្ជាការ បានបង្ហើបប្រាប់ស្ថាប័នហ៊ិរ៉ាល់ថា សូម្បីតែរូបគាត់ខ្លួនឯង ក៏នៅតែត្រូវបង់ប្រាក់ទៅឱ្យក្រុមអាល់-ឆាបាប់ដែរ…ដូចជា នៅពេលដែលលោក សង់ផ្ទះ 1ខ្នងថ្មីទៀត សុខៗស្រាប់តែអ្នកម៉ៅការកសាងដំបូងគេ បានបោះបង់ការងារចោល ហើយរត់បាត់ ដោយសារត្រូវក្រុមអាល់-ឆាបាប់ គំរាម ដោយក្រុមអាល់-ឆាបាប់នោះប្រាប់ថា នាយទាហានម្ចាស់ផ្ទះ មិនព្រមបង់ភាស៊ីឱ្យពួកគេ។ អ្នកម៉ៅការទី2 ក៏បោះបង់ការងារចោល ហើយរត់គេចបាត់ ដោយមូលហេតុដូចគ្នា។ ទីបំផុត នាយទាហានជាន់ខ្ពស់រូបនោះ ត្រូវតែបង់ប្រាក់ចំនួនស្មើនឹង 3,600ដុល្លារ ទើបផ្ទះសាងសង់រួច ដោយអ្នកម៉ៅការទី3៕

ប្រភព៖ សាព័ត៌មានបរទេស
ប្រែសម្រួលដោយ តាវ៉ែនតា

May 3, 2021

Covid-19! សហរដ្ឋអាមេរិក កំពុងប្រឈមនឹង វិបត្តិ «សល់វ៉ាក់សាំង» ក្នុងគ្រាដែលពលរដ្ឋជាង 100លាននាក់ បានចាក់រួចរាល់

ក្រុមមន្ត្រីក្រសួងសុខាភិបាលសហរដ្ឋអាមេរិក បានបែងចែកវ៉ាក់សាំងបង្ការ Covid-19 ជាច្រើនលានដូស ទៅឱ្យអាជ្ញាធរមូលដ្ឋាន ក្នុងនោះ ពលរដ្ឋជិត 105លាននាក់ បានចាក់វ៉ាក់សាំងពីរដូសរួចរាល់ហើយ។

មជ្ឈមណ្ឌលគ្រប់គ្រង និងទប់ស្កាត់ជំងឺឆ្លងរបស់សហរដ្ឋអាមេរិក (CDC) កាលពីម្សិលមិញ (02ឧសភា) បានប្រកាសថា ប្រទេសនេះបានចាក់វ៉ាក់សាំងបង្ការវីរុសCovid-19 ដល់ពលរដ្ឋ សរុប 245,591,469នាក់ បន្ទាប់ពីបានបែងចែកវ៉ាក់សាំងចំនួន 312,509,575ដូស ទៅឱ្យអាជ្ញាធរមូលដ្ឋាន។

ក្នុងចំណោមនោះ មានពលរដ្ឋជាង 147លាននាក់ បានចាក់វ៉ាក់សាំងយ៉ាងតិចមួយដូស ចំពោះវ៉ាក់សាំងប្រភេទដែលត្រូវចាក់ពីរដូស និងជិត 104.8លាននាក់បានចាក់រួចរាល់។ បច្ចុប្បន្ន អត្រាអ្នកបានចាក់វ៉ាក់សាំងរួចរាល់នៅសហរដ្ឋអាមេរិក បានឡើងដល់ 31.5% បើធៀបនឹងប្រជាជនសរុបជាង 332,610,000នាក់។

បណ្ដាប្រភេទវ៉ាក់សាំងប្រឆាំង Covid-19 ដែលត្រូវបាន CDC របស់សហរដ្ឋអាមេរិក ជ្រើសរើសសម្រាប់ការប្រើប្រាស់ រួមមាន វ៉ាក់សាំងរបស់ក្រុមហ៊ុន Moderna និងក្រុមហ៊ុន Pfizer Inc/BioNTech ដែលត្រូវចាក់ពីរដូស រួមនឹងវ៉ាក់សាំងរបស់ក្រុមហ៊ុន Johnson & Johnson ដែលត្រូវចាក់មួយដូស។

សហរដ្ឋអាមេរិក គឺជាសម្បុកវីរុសCovid-19 ធំជាងគេក្នុងពិភពលោក ដោយមានអ្នកឆ្លងជាង 33លាននាក់ និងស្លាប់ជាង 591,000នាក់។ ក្រោយរយៈពេលនៃការឡើងកាន់តំណែងបាន 100ថ្ងៃ របស់ប្រធានាធិបតី Joe Biden សហរដ្ឋអាមេរិក ពេលនេះត្រូវប្រឈមនឹង «វិបត្តិសល់វ៉ាក់សាំង» ដោយសារតែរដ្ឋជាច្រើនប្រើប្រាស់មិនអស់ បន្ទាប់ពីបានទទួល ខណៈដែលពលរដ្ឋជាច្រើន មានការរារែកក្នុងការចាក់វ៉ាក់សាំង ព្រោះតែការទទួលបានព័ត៌មានមិនបានគ្រប់ជ្រុងជ្រោយ និងហត់នឿយផ្លូវចិត្ត ក្រោយរងគ្រោះពី «មហារោគរាតត្បាត» នេះ។

បច្ចុប្បន្ន ក្រុមមន្ត្រីសុខាភិបាល បាននាំគ្នារិះរកវិធីដោះស្រាយបញ្ហាខាងលើ ក្នុងនោះ រួមមានទាំងការបញ្ជូនក្រុមវេជ្ជបណ្ឌិត និងក្រុមមនុស្សដែលមានឥទ្ធិពល ធ្វើយុទ្ធនាការផ្សព្វផ្សាយឱ្យពលរដ្ឋបានដឹងច្បាស់អំពីផលប្រយោជន៍នៃការចាក់វ៉ាក់សាំងប្រឆាំង Covid-19 ផងដែរ៕

May 3, 2021

Category: អន្តរជាតិ