អន្តរជាតិ - La Reine Media

ត្រូវចាក់វ៉ាក់សាំង Covid-19 «ច្រឡំ» រហូតដល់ 6ដូស នារីម្នាក់នៅអ៊ីតាលី ត្រូវចូលពេទ្យ

អ៊ីតាលី៖ នារីវ័យ23ឆ្នាំម្នាក់ ត្រូវចូលតាមដានសុខភាពនៅមន្ទីរពេទ្យមួយក្នុងតំបន់ Tuscany បន្ទាប់ពីត្រូវបានចាក់វ៉ាក់សាំងបង្ការវីរុស Covid-19 របស់ Pfizer រហូតដល់ 6ដូស ព្រោះតែការច្រឡំ។

ហេតុការណ៍នេះបានកើតឡើងនៅឯមន្ទីរពេទ្យមួយនៅក្នុងតំបន់ Tuscany ភាគកណ្ដាលនៃប្រទេសអ៊ីតាលី កាលពីថ្ងៃទី9 ខែឧសភា នៅពេលដែលគិលានុបដ្ឋាក បានចាក់វ៉ាក់សាំងអស់មួយម្ជុល ដែលស្មើនឹង 6ដូស ទៅឱ្យនារីម្នាក់ដែលមានអាយុ 23ឆ្នាំ។ បច្ចុប្បន្ន សុខភាពអ្នកជំងឺ កំពុងស្ថិតក្នុងស្ថានភាពល្អ បន្ទាប់ពីបានបញ្ចូលសេរ៉ូម និងលេបថ្នាំ paracetamol។

អត្តសញ្ញាណរបស់នារីរងគ្រោះ រួមនឹងមន្ទីរពេទ្យខាងលើ មិនទាន់ត្រូវបានបង្ហើបឱ្យដឹងនៅឡើយ ប៉ុន្តែ ហេតុការណ៍នេះត្រូវបានរាយការណ៍ដល់ស្ថាប័នគ្រប់គ្រងឱសថរបស់ប្រទេសអ៊ីតាលី រួចហើយ។

សារព័ត៌មានអ៊ីតាលី បានឱ្យដឹងថា ការពិសោធនានាទៅលើការចាក់វ៉ាក់សាំង Covid-19 លើសចំណុះកន្លងមក ត្រូវបានគេធ្វើឡើងត្រឹមតែ 4ដូសប៉ុណ្ណោះ ក្នុងនោះបានបង្ហាញថា ពុំមានផលវិបាកប្រកបដោយគ្រោះថ្នាក់ណាមួយកើតឡើងដល់អ្នកត្រូវបានចាក់នោះទេ។ គិតមកដល់បច្ចុប្បន្ន ករណីចាក់លើសចំណុះ បានកើតឡើងនៅក្នុងប្រទេសមួយចំនួន ក្នុងនោះមាន សហរដ្ឋអាមេរិក, អូស្ត្រាលី, អាល្លឺម៉ង់ និងអ៊ីស្រាអែលផងដែរ៕

ប្រភព៖ AFP
ប្រែសម្រួល៖ បុត្រា

May 11, 2021

សហរដ្ឋអាមេរិក «មើលឃើញពន្លឺនៅខាងចុងផ្លូវរូងរបស់ Covid-19 រួចហើយ!

សហរដ្ឋអាមេរិក កំពុងឈរនៅចំពោះមុខរបត់ថ្មីមួយដ៏ធំ នៅក្នុងការប្រយុទ្ធប្រឆាំងនឹង Covid-19 នៅពេលដែលចំនួនអ្នកវិជ្ជមានថ្មី និងអ្នកចូលពេទ្យ បានថយចុះយ៉ាងច្រើន ដែលនេះត្រូវបានគេជឿថាជា ជោគជ័យបានមកពីយុទ្ធនាការចាក់វ៉ាក់សាំង។

«យើងកំពុងកែប្រែស្ថានការណ៍» Jeffrey Zients អ្នកសម្របសម្រួលចំពោះកិច្ចការប្រឆាំងនឹង Covid-19 របស់សេតវិមាន បាននិយាយដូច្នេះ។

ដោយសារការចាក់វ៉ាក់សាំងយ៉ាងតិច 1ដូស ដល់មនុស្សពេញវ័យបានចំនួន 58% និងប្រហែល 113លាននាក់ (34%) បានចាក់រួចរាល់ សហរដ្ឋអាមេរិក កំពុងស្ថិតក្នុងផ្លូវទៅរកគោលដៅ ដែលប្រធានាធិបតី Joe Biden បានកំណត់ ក្នុងនោះបានចែងថា ពលរដ្ឋចំនួន 70% នឹងទទួលបានការចាក់វ៉ាក់សាំងយ៉ាងតិច 1ដូស ឱ្យបានមុនថ្ងៃទី4 ខែកក្កដា ឆ្នាំ2021។

«យើងគិតថា គ្រប់គ្នាសុទ្ធតែហត់នឿយ ហើយការពាក់ម៉ាស អាចជាប្រការដ៏រំខាន។ ប៉ុន្តែ យើងកំពុងធ្វើដំណើរជិតដល់គោលដៅ ហើយពន្លឺនៅខាងមុខ ក៏កាន់តែច្បាស់ឡើងៗហើយដែរ» Zients ថ្លែងដូច្នេះ។

លោក Anthony Fauci អ្នកជំនាញលំដាប់កំពូលខាងរោគឆ្លងរបស់សហរដ្ឋអាមេរិក

Anthony Fauci ដែលជាអ្នកជំនាញលំដាប់កំពូលខាងរោគឆ្លងរបស់សហរដ្ឋអាមេរិក ក៏បានលើកឡើងស្រដៀងនេះដែរ។ លោកនិយាយថា ដល់ពេលដែលត្រូវបន្ធូរបន្ថយវិធានការទាក់ស្កាត់ Covid-19 និងអនុញ្ញាតឱ្យជនជាតិអាមេរិកាំង ទទួលបទពិសោធន៍ល្អដែលបានមកពីយុទ្ធនាការចាក់វ៉ាក់សាំង។

«យើងត្រូវការចាប់ផ្ដើមសេរីភាពច្រើនជាងមុន នៅពេលដែលមានពលរដ្ឋកាន់តែច្រើន បានទទួលការចាក់វ៉ាក់សាំង» លោក Anthony Fauci ថ្លែងបែបនេះ។ ប៉ុន្តែ លោកក៏បានបញ្ជាក់ថា សង្គ្រាមនេះនៅតែត្រូវធ្វើបន្ត ដើម្បីសម្រេចបានគោលដៅ ព្រោះថា ប្រការនេះមានន័យថា «វីរុសនឹងលែងមានកន្លែងសម្រាប់ជ្រោកកោន»។

ក្រុមមន្ត្រីរដ្ឋាភិបាល និងក្រុមអ្នកវិទ្យាសាស្ត្រអាមេរិក មានមូលដ្ឋានដែលអាចឱ្យពួកគេមានក្ដីសង្ឃឹមក្នុងការរួចផុតពីមហារោគរាតត្បាត ដោយសារការចាក់វ៉ាក់សាំង។ តួលេខនៃករណីវិជ្ជមានថ្មីប្រចាំថ្ងៃនៅសហរដ្ឋអាមេរិក គិតជាមធ្យមក្នុងរយៈពេល 7ថ្ងៃ ដោយគិតត្រឹមថ្ងៃទី8 ខែឧសភា មានចំនួន 42,000នាក់ ថយចុះច្រើនបើធៀបនឹង 260,000នាក់ កាលពីខែមករា។ អត្រានៃករណីចូលពេទ្យ ជាមធ្យម ក្នុងរយៈពេល 7ថ្ងៃ គិតដល់ថ្ងៃទី7 ខែឧសភា គឺជាង 39,300នាក់ ថយចុះជាង 70% បើធៀបនឹង 137,600 កាលពីដើមខែមករា។ ចំណេកអត្រានៃការស្លាប់ ក៏បានថយចុះច្រើន ពោលគឺ ជាមធ្យម ក្នុងរយៈពេល 7ថ្ងៃ គិតត្រឹមថ្ងៃទី8 ខែឧសភា គឺមាន 675ករណី ថយចុះជិត 80% បើធៀបនឹងមធ្យមភាគ 3,352ករណី កាលពីពាក់កណ្ដាលខែមករា។

ក្រុមអ្នកជំនាញ បានអះអាងថា លទ្ធផលដ៏ល្អនេះគឺបានមកពីជោគជ័យនៃយុទ្ធនាការចាក់វ៉ាក់សាំងរបស់សហរដ្ឋអាមេរិក។ ប្រទេសនេះបានចាក់វ៉ាក់សាំងបង្ការ Covid-19 ជូនពលរដ្ឋជាង 257លានដូស ឈរលំដាប់ទីពីរ បើធៀបនឹង 318លានដូសរបស់ប្រទេសចិន (យោងតាមទិន្នន័យរបស់ Our World in Data)។ សហរដ្ឋអាមេរិក ក៏ស្ថិតក្នុងចំណោមប្រទេសចំនួន 5 ដែលចាក់វ៉ាក់សាំងជូនពលរដ្ឋយ៉ាងតិច1ដូស បានច្រើនជាងគេផងដែរ រួមមាន ប្រទេសទាំងដែនកោះ ស៊ីសែល (Seychelles), ប្រទេសអ៊ីស្រាអែល, អង់គ្លេស, និងប្រទេសបារ៉ែន។ សហរដ្ឋអាមេរិក ជាប្រទេសឈរលំដាប់ទី 4 ដែលមានអត្រានៃការចាក់វ៉ាក់សាំងរួចរាល់បានច្រើនជាងគេ បន្ទាប់ពីប្រទេសស៊ីសែល (60.7%), ប្រទេសអ៊ីស្រាអែល (58.6%) និងប្រទេសស៊ីលី (37%)។

ក្រុមអ្នកជំនាញក៏បានបញ្ជាក់ថា ការអនុវត្តយុទ្ធនាការចាក់វ៉ាក់សាំងបានលឿន និងប្រសិទ្ធភាព ក៏អាស្រ័យទៅលើប្រសិទ្ធភាពរបស់ប្រភេទវ៉ាក់សាំងផងដែរ។ វ៉ាក់សាំងចំនួន 3ប្រភេទ ដែលត្រូវបានសហរដ្ឋអាមេរិកអនុម័តឱ្យប្រើប្រាស់ រួមមាន Pfizer, Moderna និង Johnson & Johnson។ យោងតាមទស្សនាវដ្ដី Yale Medicine វ៉ាក់សាំងទាំងនេះ មានប្រសិទ្ធភាពខ្ពស់៕

ប្រភព៖ Guardian, NYTimes, WSJ, AP
ប្រែសម្រួល៖ បុត្រា

May 10, 2021

បច្ចុប្បន្នភាព Covid-19 នៅកម្ពុជា និងពិភពលោក គិតត្រឹមព្រឹកថ្ងៃទី10 ខែឧសភា ឆ្នាំ2021

កម្ពុជា បានរកឃើញអ្នកវិជ្ជមានថ្មីចំនួន 506នាក់ទៀត និងស្លាប់ 6នាក់ទៀត នៅក្នុងអំឡុង 24ម៉ោងនៃថ្ងៃទី9 ខែឧសភា ឆ្នាំ2021 ធ្វើឱ្យតួលេខអ្នកឆ្លង Covid-19 សរុប នៅកម្ពុជា កើនឡើងដល់ 19,743នាក់ និងអ្នកស្លាប់សរុបឡើងដល់ 126នាក់។

គិតមកដល់បច្ចុប្បន្ន ពិភពលោកទាំងមូល មានអ្នកឆ្លងវីរុសCovid-19 សរុបចំនួន 158,970,290នាក់ ក្នុងនោះមានអ្នកស្លាប់ 3,306,746នាក់, អ្នកជាសះស្បើយ 136,517,897នាក់ និងកំពុងព្យាបាលចំនួន 19,145,647នាក់៕

ប្រភព៖ ក្រសួងព័ត៌មាន
ដកស្រង់៖ បុត្រា

May 10, 2021

ចិនខណ្ឌចែកកំពូលភ្នំ Everest ដើម្បីទប់ស្កាត់ Covid-19

ប្រទេសចិន ខណ្ឌចែកកំពូលភ្នំអេវើរ៉េស (Everest) ដើម្បីទប់ស្កាត់ហានិភ័យនៃការចម្លង Covid-19 ពីក្រុមអ្នកឡើងភ្នំ ដែលមកពីប្រទេសនេប៉ាល់ មកឱ្យប្រជាជននៅតំបន់ទីបេ (Tibet)។

មគ្គទេសន៍ដែលនាំផ្លូវឡើងភ្នំមួយក្រុមមកពីតំបន់ទីបេ នឹងឡើងលើកំពូលភ្នំ អេវើរ៉េស និងធ្វើការខណ្ឌចែកតំបន់ ដើម្បីទប់ស្កាត់សកម្មភាពជួបជុំរវាងក្រុមអ្នកផ្សងព្រេងរបស់ភាគីមកពីប្រទេសចិន និងភាគីមកពីប្រទេសនេប៉ាល់។ នេះបើតាមសារព័ត៌មាន Xinhua ចុះផ្សាយកាលពីថ្ងៃទី9 ខែឧសភា ឆ្នាំ2021 ដោយដកស្រង់សម្ដីរបស់ប្រធានមន្ទីរកីឡានៃតំបន់ទីបី។

ក្រុមខាងលើដែលមានសមាជិកជាជនជាតិចិនចំនួន 21នាក់ កំពុងធ្វើដំណើរមកកាន់កំពូលភ្នំអេវើរ៉េស ដើម្បីបំពេញបេសកកម្មនេះ។ ប៉ុន្តែ សារព័ត៌មានចិន មិនបានអធិប្បាយអំពីរបៀបខណ្ឌចែក ដែលក្រុមនេះនឹងធ្វើនោះទេ។

ទីតាំងបោះជំរំលើកពូលភ្នំអេវើរ៉េស នៅលើទឹកដីប្រទេសនេប៉ាល់ ត្រូវ Covid-19 រាតត្បាតចាប់ពីចុងខែមេសា ឆ្នាំ2021 រហូតដល់បច្ចុប្បន្ន។ រដ្ឋាភិបាលនេប៉ាល់ ដែលជាប្រទេសពឹងផ្អែកច្រើនទៅលើចំណូលដែលបានមកពីវិស័យទេសចរណ៍ នៅតែមិនទាន់លុបចោលរដូវឡើងភ្នំ ដែលចាប់ផ្ដើមពីខែមេសា ដល់ខែមិថុនា រៀងរាល់ឆ្នាំ មុនពេលតំបន់នេះឈានចូលដល់រដូវវង្សា។

កំពូលភ្នំអេវើរ៉េស ស្ថិតនៅកម្ពស់ 8,848ម៉ែត្រ គឺជាតំបន់ធ្លាក់ព្រឹលតូចមួយដែលមានផ្ទៃដី អាចឱ្យអ្នកឡើងភ្នំ និងអ្នកនាំផ្លូវ ឈរក្នុងពេលតែមួយ ត្រឹមតែប៉ុន្មាននាក់ប៉ុណ្ណោះ។

ប្រទេសចិន បានហាមអ្នកឡើងភ្នំទាំងដែលមានបំណងឡើងទៅកាន់កំពូលភ្នំអេវើរ៉េស ពីទឹកដីនៃតំបន់ទីបេ របស់ចិន ចាប់តាំងពី Covid-19 បានផ្ទុះឡើងកាលពីឆ្នាំមុន។ ទេសចរដែលមកទស្សនាទេសភាពកំពូលភ្នំអេវើរ៉េស ក៏ត្រូវបានហាមឃាត់ទៅកាន់កន្លែងបោះជំរំលើទឹកដីទីបេផងដែរ។

ប្រទេសចិន កាលពីថ្ងៃទី9 ខែឧសភា បានរកឃើញអ្នកឆ្លង Covid-19 ចំនួន 11ករណី នាំឱ្យតួលេខអ្នកវិជ្ជមានសរុបឡើងដល់ 90,796នាក់ ក្នុងនោះមាន 4,637នាក់បានស្លាប់។ ចំណែកប្រទេសនេប៉ាល់ កាលពីថ្ងៃទី9 ខែឧសភា ក៏បានប្រកាសថា រកឃើញអ្នកវិជ្ជមានថ្មី ចំនួន 8,777នាក់ ធ្វើឱ្យតួលេខអ្នកឆ្លងវីរុសនេះកើនឡើងដល់ជាង 394,000នាក់ ក្នុងនោះមាន 3,720នាក់បានបាត់បង់ជីវិត៕

ប្រភព៖ Reuters
ប្រែសម្រួល៖ បុត្រា

May 10, 2021

កវីនិពន្ធប្រឆាំងកងទ័ពភូមា ត្រូវគេសម្លាប់ និងយកគ្រឿងក្នុងទៅបាត់!

ភរិយារបស់លោក Khet Thi ដែលជាអ្នកនិពន្ធប្រឆាំងនឹងរបបយោធាភូមា បានអះអាងថា សាកសពស្វាមីរបស់អ្នកស្រី ត្រូវគេយកគ្រឿងក្នុង នៅពេលត្រូវកងទ័ពចាប់ឃុំខ្លួន។

ភរិយារបស់ Khet Thi បានឱ្យដឹងថា ស្វាមីរបស់អ្នកស្រី ត្រូវក្រុមទាហាន និងប៉ូលិស ចាប់ខ្លួនទៅសួរនាំកាលពីថ្ងៃទី8 ខែឧសភា 2021។ Khet Thi អាយុ 45ឆ្នាំ គឺជាម្ចាស់កំណាព្យមួយដែលមានចំណងជើងថា «ពួកគេបាញ់តម្រង់ក្បាល ប៉ុន្តែមិនបានដឹងថា បដិវត្តស្ថិតនៅក្នុងបេះដូង»។

«ខ្ញុំត្រូវគេសួរនាំ។ គាត់ (ស្វាមី) ក៏ដូច្នេះ។ ពួកគេបានប្រាប់ថា គាត់កំពុងនៅក្នុងអង្គភាពសួរចម្លើយ ប៉ុន្តែ គាត់មិនបានវិលត្រលប់ជារៀងរហូត គឺនៅសល់តែសាកសពប៉ុណ្ណោះ» អ្នកស្រី Chaw Su ភរិយារបស់លោក Khet Thi បានឱ្យដឹងកាលពីម្សិលមិញ (09 ឧសភា)។

គ្រួសាររបស់ជនរងគ្រោះ រស់នៅក្នុងទីរួមស្រុកមួយនៃតំបន់ Sagaing ភាគកណ្ដាលប្រទេស ដែលជាតំបន់ប្រឆាំងយ៉ាងខ្លាំងក្លាយទៅនឹងរដ្ឋប្រហាររបស់កងទ័ពភូមា។

«ពួកគេបានហៅទូរស័ព្ទមកខ្ញុំនៅពេលព្រឹក ប្រាប់ថាឱ្យទៅកាន់មន្ទីរពេទ្យនៅ Monywa ដើម្បីជួបគាត់។ ខ្ញុំគិតថា គាត់គ្រាន់តែត្រូវបាក់ដៃ ឬប្រហាក់ប្រហែលនេះ។ ប៉ុន្តែ នៅពេលទៅដល់ រាងកាយរបស់គាត់បានស្ថិតនៅក្នុងសាលដាក់សាកសព ហើយគ្រឿងក្នុងរបស់គាត់ក៏ត្រូវគេយកទៅបាត់» អ្នកស្រី Chaw Su បាននិយាយទាំងទឹកភ្នែក នៅទីកន្លែងដែលមានចម្ងាយប្រហែល 100គម ពីផ្ទះ។

ខាងមន្ទីរពេទ្យ បានប្រាប់អ្នកស្រី Chaw Su ថា Khet Thi មានជំងឺបេះដូង ប៉ុន្តែ អ្នកស្រី មិនខ្ចីអានលិខិតបញ្ជាក់មរណភាពនេះទេ ព្រោះយល់ថា នេះមិនមែនជាការពិត។ អ្នកស្រី ឱ្យដឹងថា កងទ័ពប្រុងយកសាកសព Khet Thi ទៅកប់ ប៉ុន្តែ អ្នកស្រីបានសុំយកសពត្រលប់មកផ្ទះ។ អ្នកស្រីមិនបាននិយាយអំពីវិធីដែលស្វាមីរបស់ខ្លួនត្រូវគេយកគ្រឿងក្នុងនោះទេ។

អ្នកនាំពាក្យរបស់កងទ័ពមីយ៉ានម៉ា មិនបានឆ្លើយតបនឹងការស្នើឱ្យបកស្រាយអំពីការស្លាប់របស់លោក Khet Thi ជាកវីទីបី ដែលបានស្លាប់នៅក្នុងបាតុកម្មដែលអូសបន្លាយពេលជាងបីខែកន្លងមកនេះ។

Khet Thi គឺជាមិត្តរបស់ K Za Win អាយុ 39ឆ្នាំ ជាអ្នកនិពន្ធមួយរូប ដែលត្រូវបានបាញ់សម្លាប់ក្នុងបាតុកម្មនៅ Monywa កាលពីដើមខែមីនា។ សកម្មជនសង្គម វប្បធម៌ សិល្បៈ ជាច្រើនរូប ត្រូវបានចាប់ខ្លួនដោយសារតែមានមតិប្រឆាំងនឹងកងទ័ពភូមា។

Khet Thi ធ្លាប់ជាវិស្វករម្នាក់ មុនពេលបានឈប់ធ្វើការកាលពីឆ្នាំ2012 ដើម្បីផ្ដោតលើការសរសេរកំណាព្យ និងរកស៊ីចិញ្ចឹមជីវិតដោយរបរធ្វើការ៉ែម និងនំផ្អែម។

«ខ្ញុំមិនចង់ធ្វើជាអ្នកក្លាហាន មិនចង់ក្លាយជាអ្នកស្លាប់ដោយសារជំនឿ មិនចង់ក្លាយជាមនុស្សកំសាក មិនចង់ក្លាយជាមនុស្សឆោតល្ងង់» លោក Khet Thi សរសេរក្រោយរដ្ឋប្រហារបានពីរសប្ដាហ៍។ «ខ្ញុំមិនចង់គាំទ្រអយុត្តិធម៌។ បើសិនជានៅសល់មួយនាទីដើម្បីរស់ ខ្ញុំចង់រក្សាមនសិការឱ្យនៅស្អាតស្អំរហូតដល់ទីបំផុត»។

ក្រុមអ្នកតាមដានក្នុងស្រុក បានឱ្យដឹងថា ជនស៊ីវិលប្រមាណ 776នាក់ ត្រូវបានសម្លាប់នៅក្នុងបាតុកម្មប្រឆាំងកងទ័ពភូមា និង 3,778នាក់ផ្សេងទៀត កំពុងជាប់ឃុំ។ ភាគីកងទ័ព បានច្រានចោលរបាយការណ៍នេះ និងថា បុគ្គលិកសន្តិសុខយ៉ាងតិច 20នាក់របស់ខ្លួន បានស្លាប់នៅក្នុងករណីប៉ះទង្គិចជាមួយក្រុមបាតុករ៕

ប្រភព៖ Reuters
ប្រែសម្រួល៖ បុត្រា

May 10, 2021

Covid-19 នៅតំបន់អាស៊ីអាគ្នេយ៍ គិតត្រឹមព្រឹកថ្ងៃទី10 ខែឧសភា 2021៖ អ្នកស្លាប់សរុប ជិត 71,000នាក់

នៅក្នុងតំបន់អាស៊ីអាគ្នេយ៍ទាំងមូល តួលេខអ្នកឆ្លងវីរុសCovid-19 ថ្មី ក្នុងថ្ងៃទី09 ខែឧសភា ឆ្នាំ2021 មានចំនួន 17,778នាក់ ក្នុងនោះ កម្ពុជា មានចំនួន 520នាក់។

អ្នកស្លាប់សរុប ដោយសារ Covid-19 ក្នុងតំបន់នេះ កើនដល់ ចំនួន 70,971នាក់ នៅក្នុងថ្ងៃដដៃនេះ ខណៈអ្នកឆ្លង Covid-19 សរុបចំនួន 3,571,360នាក់៕

ប្រភព៖ Worldometers
ប្រែសម្រួល និងរៀបរៀងដោយ៖ បុត្រា

May 10, 2021

អាសន្ន! អង់គ្លេស ណែនាំឱ្យមនុស្សក្រោមវ័យ 40ឆ្នាំ «កុំចាក់វ៉ាក់សាំង AstraZeneca»

គណៈកម្មការចំពោះកិច្ចចាក់វ៉ាក់សាំងរបស់ប្រទេសអង់គ្លេស (JCVI) កាលពីថ្ងៃទី7 ខែឧសភា បានឱ្យដឹងថា ពលរដ្ឋក្រោមវ័យ 40ឆ្នាំ នឹងត្រូវបានចាក់វ៉ាក់សាំងបង្ការវីរុសCovid-19 ផ្សេង ជំនួសឱ្យវ៉ាក់សាំងរបស់ក្រុមហ៊ុន AstraZeneca។

ក្រុមអ្នកជំនាញបានឱ្យដឹងថា អត្រានៃការឆ្លង Covid-19 នៅអង់គ្លេស បានថយចុះ ដែលនេះគឺមានន័យថា ហានិភ័យនៃការប្រឈមនឹងបញ្ហាដែលកើតឡើងដោយសារការចាក់វ៉ាក់សាំង អាចធំជាងហានិភ័យនៃការឆ្លងវីរុស។ យោងតាមការវិភាគរបស់ស្ថាប័នគ្រប់គ្រង បានបង្ហាញថា អត្រាកកឈាមដ៏កម្រ (និយាយរួម) បន្ទាប់ពីចាក់វ៉ាក់សាំង AstraZeneca គឺប្រមាណ 1/100,000នាក់, អត្រានេះកើនឡើងប្រហែល 1/60,000នាក់ ចំពោះមនុស្សវ័យ 30ឆ្នាំ។ អត្រាស្លាប់ក្រោយការចាក់វ៉ាក់សាំងនេះ និយាយរួមគឺ ប្រហែល 2/1000,000នាក់ ខណៈវ័យចាប់ពី 30 ដល់ 39 គឺ 4.5/1,000,000នាក់។

ទិន្នន័យរបស់រដ្ឋាភិបាល ដែលបានប្រកាសកាលពីថ្ងៃទី6 ខែឧសភា បានឱ្យដឹងថា គិតមកដល់អំឡុងពេលនេះ ប្រទេសអង់គ្លេស រកឃើញករណីកកឈាមដ៏កម្រ ចំនួន 242នាក់ ក្រោយពីបានចាក់វ៉ាក់សាំងយ៉ាងតិច 1ដូស ដែលនេះគឺ កើន 33ករណី បើធៀបនឹងសប្ដាហ៍មុន ក្នុងនោះ មាន 49នាក់បានស្លាប់។ 2/3 នៃអ្នកស្ថិតក្រោមវ័យ 60ឆ្នាំ បានជួបផលវិបាក បន្ទាប់ពីបានចាកក់វ៉ាក់សាំង។

ការណែនាំថ្មីរបស់ប្រទេសអង់គ្លេស ដែលថា ក្រុមមនុស្សក្រោមវ័យ 40ឆ្នាំ «កុំចាក់វ៉ាក់សាំង AstraZeneca» គឺជាសម្ពាធមួយយ៉ាងធ្ងន់ធ្ងរសម្រាប់សាកលវិទ្យាល័យ Oxford និងដៃគូសហការរបស់ខ្លួន គឺក្រុមហ៊ុន AstraZeneca។ ប្រទេសដាណឺម៉ាក កាលពីខែមេសា ឆ្នាំ2021 បានបញ្ឈប់ការប្រើប្រាស់វ៉ាក់សាំង AstraZeneca។ ចំណែកប្រទេសជាច្រើនផ្សេងទៀតនៅអឺរ៉ុប ក៏បានកាត់បន្ថយការចាក់វ៉ាក់សាំង AstraZeneca សម្រាប់យុវវ័យ ដោយសារភ័ស្ដុតាងនានា បង្ហាញថា បញ្ហាកកឈាម ភាគច្រើនកើតឡើងនៅលើអ្នកដែលមានវ័យនៅក្មេង។

ការស្រាវជ្រាវរបស់សាកលវិទ្យាល័យ Cambridge បានអះអាងថា ចំពោះមនុស្សក្រោមវ័យ 30ឆ្នាំ ហានិភ័យនៃការឆ្លងវីរុសCovid-19 និងហានិភ័យដែលកើតឡើងដោយសារការចាក់វ៉ាក់សាំងគឺប្រហាក់ប្រហែលគ្នា អាស្រ័យលើអត្រានៃការឆ្លងនៅក្នុងសហគមន៍ ក្នុងអំឡុងពេលនីមួយ។

អង់គ្លេសគឺជាប្រទេសមួយក្នុងចំណោមប្រទេសដែលបានធ្វើយុទ្ធនាការចាក់វ៉ាក់សាំង ប្រកបដោយប្រសិទ្ធភាពជាងគេក្នុងពិភពលោក ដោយសារវ៉ាក់សាំង AstraZeneca។ បច្ចុប្បន្ន យុវវ័យប្រឈមនឹងហានិភ័យនៃការឆ្លងវីរុសCovid-19 មានកម្រិតទាបជាងឆ្ងាយ បើធៀបនឹងមួយរយៈពេលកន្លងទៅ៕

ប្រភព៖ Financial Times
ប្រែសម្រួល៖ បុត្រា

May 8, 2021

វ៉ាក់សាំង Covid-19! វៀតណាម៖ បុគ្គលិកសុខាភិបាលម្នាក់ បានស្លាប់ ក្រោយការចាក់វ៉ាក់សាំង Covid-19

ក្រសួងសុខាភិបាលវៀតណាម កាលពីយប់ថ្ងៃទី7 ខែឧសភា បានប្រកាសថា បុគ្គលិកសុខាភិបាលភេទស្រីម្នាក់ អាយុ 35ឆ្នាំ ធ្វើការនៅមន្ទីរពេទ្យខេត្ត An Giang ភាគខាងត្បូងប្រទេសនេះ បានបាត់បង់ជីវិត បន្ទាប់ពីបានទទួលការចាក់វ៉ាក់សាំងបង្ការវីរុសCovid-19។

មូលហេតុនៃការស្លាប់នេះ ត្រូវបានក្រុមប្រឹក្សាជំនាញនៃនាយកដ្ឋានសុខាភិបាលរបស់ខេត្ត An Giang បញ្ជាក់ថា ដោយសារ «ប្រតិកម្មនឹងប្រភេទថ្នាំ non steroid (បន្ថយការឈឺចាប់ និងប្រឆាំងរលាក) ដែលជាករណីកម្រជួប នៅពេលចាក់វ៉ាក់សាំងបង្ការ Covid-19»។

នេះគឺជាករណីស្លាប់ដំបូងក្រោយការចាក់វ៉ាក់សាំង Covid-19 នៅប្រទេសវៀតណាម។ ជនរងគ្រោះខាងលើ ត្រូវបានចាក់វ៉ាក់សាំង Covid-19 កាលពីព្រឹកថ្ងៃទី6 ខែឧសភា ឆ្នាំ2021។

វៀតណាម បានចាប់ផ្ដើមយុទ្ធនាការចាក់វ៉ាក់សាំងបង្ការ Covid-19 របស់ក្រុមហ៊ុន AstraZeneca តាំងពីថ្ងៃទី8 ខែមីនា ឆ្នាំ2021។ បច្ចុប្បន្ន ប្រទេសនេះ បានចាក់ជូនពលរដ្ឋចំនួន 747,827នាក់រួចហើយ។ អ្នកដែលទទួលបានអាទិភាពក្នុងការចាក់វ៉ាក់សាំង រួមមានមន្ត្រី និងបុគ្គលិកពេទ្យជួរមុខ, សមាជិកនៃសហគមន៍ Covid-19, គណៈកម្មការគ្រប់គ្រងវីរុស, ប៉ូលិស និងទាហាន។

គិតមកដល់បច្ចុប្បន្ន វៀតណាម បានទទួលវ៉ាក់សាំង AstraZeneca ពីរលើកមកហើយ ក្នុងនោះ លើកទីមួយ មាន 117,600ដូស នាំចូលដោយក្រុមហ៊ុន VNVC និងលើកទីពីរ ជាង 800,000ដូស ដែលផ្ដល់ដោយយន្តការ Covax ដែលដឹកនាំដោយអង្គការសហប្រជាជាតិ។

យោងតាមការវិភាគរបស់ស្ថាប័នគ្រប់គ្រង បានបង្ហាញថា អត្រាកកឈាមដ៏កម្រ (និយាយរួម) បន្ទាប់ពីចាក់វ៉ាក់សាំង AstraZeneca គឺប្រមាណ 1/100,000នាក់, អត្រានេះកើនឡើងប្រហែល 1/60,000នាក់ ចំពោះមនុស្សវ័យ 30ឆ្នាំ។ អត្រាស្លាប់ក្រោយការចាក់វ៉ាក់សាំងនេះ និយាយរួមគឺ ប្រហែល 2/1000,000នាក់ ខណៈវ័យចាប់ពី 30 ដល់ 39 គឺ 4.5/1,000,000នាក់។

ហ្វីលីពីន ផ្អាកការប្រើប្រាស់វ៉ាក់សាំង AstraZeneca សម្រាប់មនុស្សក្រោមអាយុ 60ឆ្នាំ។ ចំណែកអូស្ត្រាលីវិញ បានលើកទឹកចិត្តឱ្យពលរដ្ឋក្រោមវ័យ 50ឆ្នាំ ប្រើប្រាស់វ៉ាក់សាំងរបស់ Pfizer ខណៈដែលអ៊ីតាលី, បារាំង, ហូឡង់, អាល្លឺម៉ង់ និងប្រទេសជាច្រើនផ្សេងទៀតក្នុងសហភាពអឺរ៉ុប បានស្នើឱ្យចាក់វ៉ាក់សាំងនេះ សម្រាប់មនុស្សដែលមានវ័យនៅក្មេង៕

ប្រភព៖ VNE, Reuters
ប្រែសម្រួល៖ បុត្រា

May 8, 2021

ដំណឹងល្អ! វ៉ាក់សាំង Sinopharm របស់ចិន ទទួលបានការអនុម័តពី WHO រួចហើយ!

អង្គការសុខភាពពិភពលោក (WHO) បានអនុម័តលើវ៉ាក់សាំងបង្ការ Covid-19 របស់ក្រុមហ៊ុនចិន Sinopharm ដើម្បីប្រើប្រាស់ក្នុងករណីចាំបាច់បន្ទាន់។

«WHO ដាក់បញ្ចូលវ៉ាក់សាំងបង្ការវីរុសCovid-19 របស់ Sinopharm ដែលផលិតនៅរដ្ឋធានី ប៉េកាំង នៃប្រទេសចិន ទៅក្នុងបញ្ជីប្រើប្រាស់បន្ទាន់របស់ខ្លួនរួចហើយ។ នេះគឺជាវ៉ាក់សាំង Covid-19 ទី6 ក្នុងពិភពលោក ដែលត្រូវបាន WHO ទទួលស្គាល់ផ្នែកសុវត្ថិភាព ប្រសិទ្ធភាព និងគុណភាព» ប្រធាន WHO លោក Tedros Adhanom Ghebreyesu ថ្លែងនៅក្នុងសន្និសីទសារព័ត៌មាន កាលពីថ្ងៃទី7 ខែឧសភា។

លោក Tedros បានបន្តថា៖ «ក្រុមប្រឹក្សាយុទ្ធសាស្ត្រ រួមមានក្រុមអ្នកជំនាញផ្នែកចាក់វ៉ាក់សាំង (SASGE) បានពិនិត្យលើទិន្នន័យ និងស្នើឱ្យប្រើប្រាស់វ៉ាក់សាំងប្រភេទពីរដូសនេះ សម្រាប់មនុស្សដែលមានវ័យចាប់ពី 18ឆ្នាំឡើងទៅ»។

ដូច្នេះ នៅក្នុងបញ្ជីឈ្មោះវ៉ាក់សាំង Covid-19 ដែលត្រូវប្រើប្រាស់បន្ទាន់ របស់ WHO រួមមាន វ៉ាក់សាំងរបស់ក្រុមហ៊ុន Pfizer-BioNTech, Moderna, Johnson & Johnson, AstraZeneca និងក្រុមហ៊ុន Sinopharm។ ចំពោះវ៉ាក់សាំង AstraZeneca ដែលត្រូវបាន WHO អនុម័តឱ្យប្រើប្រាស់ នោះគឺប្រភេទដែលផលិតនៅប្រទេសឥណ្ឌា និងកូរ៉េខាងត្បូង។

ការបន្ថែមវ៉ាក់សាំង Sinopharm ទៅក្នុងបញ្ជីឈ្មោះខាងលើ របស់ WHO នឹងជួយឱ្យបណ្ដាប្រទេស មានមូលដ្ឋានគ្រប់គ្រាន់ដើម្បីអនុម័តក្នុងការបញ្ជាទិញ យកទៅប្រើប្រាស់ ពិសេសគឺបណ្ដាប្រទេសដែលមិនទាន់មានស្ថាប័នគ្រប់គ្រងស្ដង់ដាអន្តរជាតិដោយឡែករបស់ខ្លួន។

វ៉ាក់សាំងបង្ការ Covid-19 របស់ក្រុមហ៊ុនចិន Sinopharm បច្ចុប្បន្ន ត្រូវបានប្រើប្រាស់នៅក្នុងប្រទេស និងដែនដីចំនួន 42 ក្នុងពិភពលោក ឈរបន្ទាប់ពី AstraZeneca (166 ប្រទេស), Pfizer-BioNTech (94 ប្រទេស) និង Moderna (46 ប្រទេស)៕

ប្រភព៖ AFP
ប្រែសម្រួល៖ បុត្រា

May 8, 2021

Bill Gate ផ្ទេរទ្រព្យច្រើនជាង 1ប៊ីលានដុល្លារជូនអតីតភរិយា តែមិនទាន់សម្រេចពីតុលាការ

លោក Bill Gate ត្រូវបានប្រភពសារព័ត៌មានជាច្រើនរាយការណ៍ ដូចជា Cnet ឬ yahop finace ឱ្យដឹងថា លោកបានបំពេញបែបបទ ផ្ទេរទ្រព្យសម្បត្តិក្នុងទំហំទឹកប្រាក់ចំនួន 1.8ប៊ីលានដុល្លារ(ពាន់លាន)ប្រគល់ជូនអតីតភរិយា លោកស្រី Melinda Gate។

ប្រភពពីដំណឹងខាងលើត្រូវបានគេបញ្ជាក់ថា មហាសេដ្ឋីពិភពលោកទី4 ឆ្នាំ2021 រូបនោះ បានសម្រេចចិត្តធ្វើឡើងក្នុងថ្ងៃតែមួយ ស្របពេលដែលគ្រួសាររបស់លោក ប្រកាសលែងលះគ្នាជាសាធារណៈលើ Twitter រៀងៗខ្លួនកាលពីថ្ងៃចន្ទដើមសប្ដាហ៍។

ហេតុផលដែលបញ្ជាចិត្តគូស្នេហ៍ ដែលមានអាយុជិត 3ទសវត្សរ៍មកនេះ បណ្ដាលឱ្យចែកផ្លូវគ្នា ហាក់មិនបាននិយាយអ្វីច្រើននោះទេ ពួកគេគ្រាន់តែបង្ហើបថា គ្រួសារនេះមិនអាចបន្ដទៅមុខទៀតបានទេគ្រាន់តែត្រូវការគម្លាតចង់បានភាពជាឯកជន និងចង់ចាប់ផ្ដើមជីវិតថ្មី។

មកទល់ពេលនេះ ការលែងលះគ្នា រវាងលោក Bill Gate និងអ្នកស្រី Melina Gate ត្រូវបានគេដឹងជាសាធារណៈថា មិនទាន់ឈានដល់ដំណាក់កាលផ្លូវច្បាប់ នឹងមិនទាន់ត្រូវបានតុលាការសម្រេចនៅឡើយ៕

May 7, 2021

Category: អន្តរជាតិ