អន្តរជាតិ - La Reine Media

COVID-19! បុគ្គលិកសុខាភិបាលជាង 115,000នាក់បានស្លាប់ ខណៈ WHO ចង់ឱ្យពិភពលោកចាក់វ៉ាក់សាំងបាន 10% ត្រឹមខែកញ្ញា ឆ្នាំ2021

បុគ្គលិកសុខាភិបាល និងគិលានុបដ្ឋាកគឺជា «ក្រុមប្រយុទ្ធជួរមុខ» នៅក្នុងសង្គ្រាមប្រឆាំង Covid-19 ហើយនៅទូទាំងពិភពលោក ក្នុងចំណោមពួកគេ គឺ មានយ៉ាងតិច 115,000នាក់បានស្លាប់ដោយសារ Covid-19។

គិតមកដល់បច្ចុប្បន្ន ពិភពលោក មានមនុស្សចំនួន 167,974,466នាក់ បានឆ្លង Covid-19 ក្នុងនោះមាន 3,486,863នាក់ បានស្លាប់ និង149,289,439នាក់ បានជាសះស្បើយ ខណៈ 15,198,164នាក់ កំពុងទទួលការព្យាបាល។ នេះបើតាមគេហទំព័រ Worldometers។

«ជិត18ខែកន្លងទៅ ក្រុមបុគ្គលិកសុខាភិបាល និងគិលានុបដ្ឋាក នៅទូទាំងពិភពលោក បានឈរនៅចំពោះមុខព្រំដែនរវាងការស្លាប់ និងរស់។ ពួកគេបានជួយសង្គ្រោះជីវិតមនុស្សរាប់មិនអស់ និងប្រយុទ្ធដើម្បីអ្នកដទៃ។ បើទោះជាបានខំប្រឹងអស់ពីកម្លាំងកាយ កម្លាំងចិត្ត ពួកគេមួយចំនួន ក៏បានដួល» ប្រធានអង្គការសុខភាពពិភពលោក (WHO) Tedros Adhanom Ghebreyesus ថ្លែងនៅក្នុងការបើកកិច្ចប្រជុំប្រចាំឆ្នាំរបស់ក្រុមប្រឹក្សាសុខាភិបាលពិភពលោក (WHA) កាលពីថ្ងៃទី24 ខែឧសភា។

លោកបន្តថា៖ «ជាច្រើននាក់បានឆ្លងវីរុសCovid-19។ របាយការណ៍នៅមានតិចតួច ប៉ុន្តែ យើងគណនាឃើញថា បុគ្គលិកសុខាភិបាល និងគិលានុបដ្ឋាកយ៉ាងតិច 115,000នាក់ បានបាត់បង់ជីវិត នៅពេលព្យាបាលជូនអ្នកដទៃ»។

បុគ្គលិកសុខាភិបាល និងគិលានុបដ្ឋាកយ៉ាងតិច 115,000នាក់ បានបាត់បង់ជីវិត

យោងតាមប្រធានអង្គការ WHO ចាប់តាំងពីវិបត្តិសុខភាពកើតឡើង បុគ្គលិកសុខាភិបាលជាច្រើន មានអារម្មណ៍ថា «អស់សង្ឃឹម អសមត្ថភាព និងមិនត្រូវបានការពារ ដោយសារខ្វះឧបករណ៍ ឬសម្ភារការពារខ្លួន និងខ្វះវ៉ាក់សាំង»។ លោក Tedros ក៏បានអធិប្បាយអំពីវិសមភាពជារួមនៅក្នុងការប្រើប្រាស់វ៉ាក់សាំង និងព្រមានថា បញ្ហានេះកំពុង «អូសបន្លាយមហារោគរាតត្បាត»។ វ៉ាក់សាំងប្រឆាំង Covid-19 ជាង 75% កំពុងស្ថិតនៅក្នុងប្រទេសចំនួន 10 តែប៉ុណ្ណោះ។

លោក Tedros ក៏បានអំពាវនាវដល់ប្រទេសដែលកំពុងរក្សាទុកវ៉ាក់សាំងដ៏ច្រើន ចូលរួមចែករំលែក និងសហការបន្ថែមទៀត ដើម្បីបង្កើនការផលិត ក៏ដូចជាបែងចែកវ៉ាក់សាំងឱ្យបានស្មើភាពគ្នា។

«ថ្ងៃនេះ ខ្ញុំអំពាវនាវដល់បណ្ដាប្រទេសជាសមាជិក គាំទ្រដល់ការជំរុញដ៏ធំមួយ ដើម្បីចាក់វ៉ាក់សាំងជូនពលរដ្ឋឱ្យបានយ៉ាងតិច 10% នៅគ្រប់ប្រទេស ត្រឹមខែកញ្ញាខាងមុខ» ប្រធាន WHO ថ្លែងដូច្នេះ៕

ប្រភព៖ AFP, Worldometers
ប្រែសម្រួល៖ បុត្រា

May 25, 2021

COVID-19! ពលរដ្ឋឥណ្ឌា រាប់រយនាក់ រត់គេចពីកន្លែងធ្វើតេស្តនៅឯចំណតរថភ្លើង ខណៈអ្នកវិជ្ជមានកើនដល់ជាង 27លាននាក់

អ្នកដំណើរប្រមាណ 400នាក់ បាននាំគ្នារត់ចាកចេញ ពេលរថភ្លើងឈប់នៅចំណតមួយក្នុងរដ្ឋ Assam ដើម្បីគេចពីការធ្វើតេស្ត Covid-19 ខណៈប្រទេសនេះមានអ្នកជំងឺជាង 303,750នាក់បានស្លាប់ដោយសារ Covid-19។

នៅក្នុងវីដេអូមួយ បង្ហាញថា ក្រោយចុះពីរថភ្លើង មនុស្សរាប់រយនាក់ បានប្រញាប់រត់ចេញពីចំណត Jagi Road ក្នុងរដ្ឋ Assam ភាគឦសានប្រទេសឥណ្ឌា កាលពីថ្ងៃទី23 ខែឧសភា ខណៈដែលក្រុមប៉ូលិស និងបុគ្គលិកផ្លូវដែក ឃាត់ខ្លួនអ្នកដំណើរបានតែប៉ុន្មាននាក់ប៉ុណ្ណោះ។

រថភ្លើងដែលដឹកអ្នកដំណើរដែលភាគច្រើនជាពលករចំណាកស្រុក ក្នុងនោះមានស្ត្រី និងកុមារ បានធ្វើដំណើរពី Tamil Nadu ឆ្លងកាត់រដ្ឋ Kerala, Andhra Pradesh, Odisha និង Bengal ខាងលិច ក្នុងរយៈពេល5ថ្ងៃ។ Assam គឺជារដ្ឋដែលតម្រូវឱ្យធ្វើតេស្ត Covid-19 ចំពោះពលរដ្ឋទាំងអស់ដែលធ្វើដំណើរតាមរថភ្លើង។

https://www.youtube.com/watch?v=AqeLft-l724

ព្រឹត្តិការណ៍ដូចគ្នានេះ ក៏ធ្លាប់បានកើតឡើងនៅក្នុងរដ្ឋ Bihar ផងដែរ កាលពីប៉ុន្មានខែមុន។ មនុស្សរាប់សិបនាក់ ក្នុងនោះមានទាំងស្ត្រី បាននាំគ្នារត់ចេញពីចំណតរថភ្លើងមួយនៅក្នុងទីក្រុង Buxar ព្រោះតែខ្លាចត្រូវគេចាប់ធ្វើតេស្តរក Covid-19។

គិតមកដល់បច្ចុប្បន្ន ប្រទេសឥណ្ឌា បានរកឃើញអ្នកវិជ្ជមាននឹង Covid-19 សរុប 26,752,447នាក់ ក្នុងនោះមាន 303,751នាក់បានស្លាប់, 23,728,011នាក់បានជាសះស្បើយ និង 2,720,685នាក់កំពុងព្យាបាល។ រដ្ឋ Assam កាលពីថ្ងៃទី22 ខែឧសភា បានរកឃើញអ្នកឆ្លងជាង 6,000នាក់ នាំឱ្យតួលេខអ្នកឆ្លងវីរុសCovid-19 សរុបក្នុងរដ្ឋនេះ កើនដល់ជាង 365,000នាក់។ Assam ក៏មានអ្នកស្លាប់ដោយសារ Covid-19 សរុបជាង 2,660នាក់ផងដែរ៕

ប្រភព៖ NDTV
ប្រែសម្រួល៖ បុត្រា

May 24, 2021

តួលេខអ្នកឆ្លង COVID-19 នៅកម្ពុជា និងពិភពលោក គិតត្រឹមព្រឹកថ្ងៃទី24 ខែឧសភា ឆ្នាំ2021

ក្រសួងសុខាភិបាលកម្ពុជា ព្រឹកនេះ (24 ឧសភា) បានប្រកាសឱ្យដឹងថា បានរកឃើញអ្នកវិជ្ជមាននឹង Covid-19 ថ្មី ចំនួន 556នាក់បន្ថែមទៀត ក្នុងអំឡុង 24ម៉ោងនៃថ្ងៃទី23 ខែឧសភា ឆ្នាំ2021។

គិតមកដល់បច្ចុប្បន្ន កម្ពុជាមានអ្នកឆ្លងវីរុសCovid-19 សរុប ចំនួន 25,761នាក់។ ព័ត៌មានបន្ថែម សូមអានរវាយការណ៍សង្ខេបខាងក្រោម។

នៅទូទាំងពិភពលោក គិតមកដល់ពេលនេះ មានអ្នកឆ្លង Covid-19 សរុបចំនួ 167,527,962នាក់ ក្នុងនោះមាន 3,478,355នាក់បានស្លាប់, 148,544,144នាក់បានជាសះស្បើយ និង 15,505,463នាក់ កំពុងទទួលការព្យាបាល៕

ប្រភព៖ ក្រសួងសុខាភិបាល, worldometers
ដកស្រង់៖ បុត្រា

May 24, 2021

មុនពេលវីរុស COVID-19 ផ្ទុះឆ្លងរាលដាលនៅ Wuhan ក្រុមអ្នកវិទ្យាសាស្ត្រនៃវិទ្យាស្ថានវីរុសសាស្ត្រចិន ធ្លាប់ចូលពេទ្យទទួលការព្យាបាល

អ្នកស្រាវជ្រាវជាច្រើនរូប នៃវិទ្យាស្ថានវីរុសសាស្ត្រ Wuhan ធ្លាប់បានចូលពេទ្យទទួលការព្យាបាល កាលពីខែវិច្ឆិកា ឆ្នាំ2019 ដែលនេះបានកើតឡើងជាច្រើនខែ មុនពេលប្រទេសចិន ប្រកាសថាមាន Covid-19។

ព័ត៌មានខាងលើនេះ ត្រូវបានសារព័ត៌មាន Wall Street Journal (WSJ) របស់សហរដ្ឋអាមេរិក ចុះផ្សាយកាលពីថ្ងៃទី23 ខែឧសភាកន្លងទៅ ដោយដកស្រង់ប្រភពព័ត៌មានពីអ្នកស៊ើបការណ៍សម្ងាត់របស់អាមេរិក។ របាយការណ៍បានផ្ដល់ព័ត៌មានថ្មីស្ដីពីចំនួនអ្នកវិទ្យាសាស្ត្រដែលធ្លាប់បានធ្លាក់ខ្លួនឈឺ រួមនឹងពេលវេលានៃការឆ្លងជំងឺ និងចំនួនលើកដែលពួកគេបានទៅវិទ្យាស្ថានរបស់ពួកគេ។ ព័ត៌មាននេះ អាចធ្វើឱ្យការអំពាវនាវឱ្យមានការស៊ើបអង្កេតស៊ីជម្រៅជាងបច្ចុប្បន្ន លើលទ្ធភាពដែលថា វីរុសCovid-19 បាន «រួចចេញ» ពីបន្ទប់ពិសោធន៍នៅប្រទេសចិន ដែលកន្លងមក ត្រូវបានអាជ្ញាធររបស់អតីតប្រធានាធិបតីសហរដ្ឋអាមេរិក លោក Donald Trump ដាក់ការសង្ស័យ ហើយវាក៏ជាប្រការដែលទីក្រុងប៉េកាំង បានច្រានចោលម្ដងហើយ ម្ដងទៀត។

នៅពេលប្រធានាធិបតី Trump ជិតអស់អាណត្តិ ក្រសួងការបរទេសសហរដ្ឋអាមេរិក បានប្រកាសឯកសារដែលបង្ហាញថា «រដ្ឋាភិបាលអាមេរិក មានមូលហេតុដើម្បីជឿបានថា អ្នកស្រាវជ្រាវមួយចំនួននៅវិទ្យាស្ថានវីរុសសាស្ត្រ Wuhan បានធ្លាក់ខ្លួនឈឺកាលពីរដូវស្លឹកឈើជ្រុះនៃឆ្នាំ2019 មុនពេលករណីឆ្លង Covid-19 ដំបូង ត្រូវបានគេដឹង ជាមួយនឹងអាការរោគដូចទៅនឹង Covid-19 និងជំងឺតាមឆ្លងតាមរដូវ ផ្សេងៗទៀត»។

ព័ត៌មានខាងលើនេះ ត្រូវបានសារព័ត៌មាន WSJ ចេញផ្សាយនៅយប់ មុនកិច្ចប្រជុំមួយរបស់ស្ថាប័នចេញសេចក្ដីសម្រេចរបស់អង្គការសុខភាពពិភពលោក (WHO) ដែលតាមគម្រោងនឹងពិភាក្សាលើដំណាក់កាលបន្ទាប់នៃការស៊ើបអង្កេតរកប្រភពរបស់ Covid-19។

អ្នកនាំពាក្យម្នាក់របស់ក្រុមប្រឹក្សាសន្តិសុខសហរដ្ឋអាមេរិក មិនបានអធិប្បាយអ្វីចំពោះព័ត៌មានដែល WSJ បានចេញផ្សាយ ប៉ុន្តែ បានឱ្យដឹងថា រដ្ឋាភិបាលរបស់លោក Joe Biden បន្តចោទសួរនូវ «សំណួរប្រកបដោយភាពម៉ឺនម៉ាត់ អំពីដំណាក់កាលដំបូងនៃជំងឺរាតត្បាត Covid-19 រួមទាំងប្រភពរបស់វានៅប្រទេសចិន»។ អ្នកស្រីឱ្យដឹងថា រដ្ឋាភិបាលសហរដ្ឋអាមេរិក កំពុងធ្វើការជាមួយនឹង WHO និងបណ្ដាប្រទេសជាសមាជិកផ្សេងទៀត ដើម្បីធានាថា ការវាយតម្លៃនេះនឹងត្រូវបានធ្វើឡើងប្រកបដោយវិជ្ជាជីវៈ ស្ដីពីប្រភពរបស់មហារោគរាតត្បាត ដោយ «មិនត្រូវបានភាគីណាមួយរារាំង ឬធ្វើនយោបាយូបនីយកម្ម»។

វិទ្យាស្ថានវីរុសសាស្ត្រ Wuhan របស់ប្រទេសចិន ក្លាយជាទីចំណាប់អារម្មណ៍នៃការស្រាវជ្រាវរកប្រភពរបស់ Covid-19

«យើងនឹងមិនប្រកាសអំពីអ្វីមួយដែលប៉ះពាល់ដល់ដំណើរការស្រាវជ្រាវលើប្រភព Covid-19 ដែល WHO កំពុងធ្វើ ប៉ុន្តែយើងបាននិយាយហើយថា សម្មតិកម្មដែលគួរជាទីទុកចិត្ត គួរតែត្រូវបានក្រុមអ្នកជំនាញអន្តរជាតិ វាយតម្លៃឱ្យបានម៉ត់ចត់»។

សហរដ្ឋអាមេរិក, ន័រវែស, កាណាដា, អង់គ្លេស និងប្រទេសមួយចំនួន កាលពីខែមីនា បានសំដែងការព្រួយបារម្ភអំពីការស្រាវជ្រាវលើប្រភព Covid-19 ដែលដឹកនាំដោយ WHO ព្រមទាំងបានអំពាវនាវឱ្យមានការស្រាវជ្រាវបន្ថែម និងប្រមូលរាល់ទិន្នន័យទាក់ទិននឹងមនុស្ស សត្វ និងទិន្នន័យផ្សេងទៀត ស្ដីពីដំណាក់កាលដំបូងនៃការផ្ទុះឆ្លង Covid-19។ ទីក្រុងវ៉ាស៊ីងតោន ចង់ឱ្យមានការធានាលើកិច្ចសហការ និងតម្លាភាពជាងបច្ចុប្បន្ន ពីសំណាក់ទីក្រុងប៉េកាំង។

បច្ចុប្បន្ន ស្ថានទូតចិនប្រចាំទីក្រុងវ៉ាស៊ីងតោន មិនទាន់មានការអធិប្បាយអ្វីទាក់ទិននឹងការបញ្ចេញមតិខាងលើនេះនៅឡើយ។

ក្រសួងការបរទេសចិន កាលពីម្សិលមិញ បានបញ្ជាក់ថា អ្នកជំនាញការមួយក្រុមដែលដឹកនាំដោយ WHO បានសន្និដ្ឋានថា លទ្ធភាពដែលវីរុសរួចចេញពីបន្ទប់ពិសោធន៍ គឺជារឿងដ៏លំបាក បន្ទាប់ពីពួកគេបានធ្វើទស្សនកិច្ចនៅវិទ្យាស្ថានវីរុសសាស្ត្រ Wuhan កាលពីខែកុម្ភៈ។

ក្រសួងការបរទេសចិន បានប្រាប់ WSJ ថា៖ «សហរដ្ឋអាមេរិក បន្តបំប៉ោងសេណារីយោ វីរុសរួចចេញពីបន្ទប់ពិសោធន៍។ តើពួកគេពិតជាយកចិត្តទុកដាក់លើការស្វែងរកប្រភព ឬព្យាយាមបង្វែរចំណាប់អារម្មណ៍?»។

សូមរំលឹកថា ប្រទេសចិន កាលពីខែកុម្ភៈ បានបដិសេធផ្ដល់ទិន្នន័យដើមទាក់ទិននឹងករណី Covid-19 ដំបូងៗរបស់ខ្លួន ដែល WHO ស្នើសុំ នៅក្នុងការស្រាវជ្រាវរកប្រភពនៃវីរុសនេះ។ នេះបើតាមអ្នកជំនាញមួយរូបរបស់ក្រុមស្រាវជ្រាវនៃអង្គការសុខភាពពិភពលោក។ ប្រការនេះអាចធ្វើឱ្យមានភាពស្មុគស្មាញដល់កិច្ចខិតខំក្នុងការស្វែងយល់អំពីវិធីដែលវីរុសបានផ្ទុះឆ្លងរាលដាលដំបូង៕

ប្រភព៖ Reuters
ប្រែសម្រួល៖ បុត្រា

May 24, 2021

វ៉ាក់សាំង COVID-19! ទិន្នន័យសរុបស្ដីពីតួលេខនៃការចាក់វ៉ាក់សាំងទូទាំងពិភពលោក គិតត្រឹមថ្ងៃទី21 ឧសភា ឆ្នាំ2021

ប្រទេស និងដែនដីជាង 190 ក្នុងពិភពលោក បានធ្វើយុទ្ធនាការចាក់វ៉ាក់សាំងបង្ការវីរុសCovid-19 ក្នុងនោះ អ៊ីស្រាអែល កំពុងនាំមុខគេអំពីអត្រានៃពលរដ្ឋដែលបានចាក់វ៉ាក់សាំងយ៉ាងតិចមួយម្ជុល។

ចំនួនប្រទស និងដែនដី ដែលបានធ្វើយុទ្ធនាការចាក់វ៉ាក់សាំងប្រឆាំង Covid-19 ៖ 196
អត្រានៃការចាក់វ៉ាក់សាំងបង្ការ Covid-19 ៖ 9.24%
ចំនួនដួសនៃវ៉ាក់សាំងដែលត្រូវបានចាក់ ៖ 1.53 ពាន់លានដូស
អត្រានៃការចាក់វ៉ាក់សាំងនៃតំបន់នានាក្នុងពិភពលោក (មិនទាន់រួមបញ្ចូលប្រទេសចិន ដោយសារប្រទេសនេះមិនទាន់ប្រកាសពីចំនួនពលរដ្ឋដែលបានចាក់) ៖
1.ទ្វីបអាមេរិក ៖ 25.66% (262.42 លាននាក់)
2.ទ្វីបអាហ្វ្រិក ៖ 1.36% (18.17 លាននាក់)
3.ទ្វីបអឺរ៉ុប ៖ 27.49% (205.79 លាននាក់)
4.ទ្វីបអាស៊ី ៖ 5.02% (233.07 លាននាក់)
5.ទ្វីបអូសេអានី ៖ 1.75% (0.75 លាននាក់)
10ប្រទេសដែលមានអត្រានៃការចាក់វ៉ាក់សាំងបង្ការ Covid-19 ខ្ពស់ជាងគេក្នុងពិភពលោក ៖
1.អ៊ីស្រាអែល៖ 60%
2.អង់គ្លេស៖ 55.1%
3.បារ៉ែន៖ 52.1%
4.ហុងគ្រី៖ 49%
5.ឈីលី៖ 48.5%
6.សហរដ្ឋអាមេរិក៖ 48.2%
7.កាណាដា៖ 46.9%
8.កាតា៖ 43.1%
9.អាល្លឺម៉ង់៖ 38.2%
10.ប្រទេសបែលហ្សិក៖ 35.4%
ចំនួន (លាន) ដូស នៃវ៉ាក់សាំងដែលត្រូវបានចាក់៖
1.ប្រទេសចិន៖ 449.5
2.សហរដ្ឋអាមេរិក៖ 275.5
3.ឥណ្ឌា៖ 185.2
4.អង់គ្លេស៖ 57.4
5.ប្រេស៊ីល៖ 55.3
6.អាល្លឺម៉ង់៖ 41.2
7.បារាំង៖ 29.7
8.អ៊ីតាលី៖ 28.4
9.ទួរគី៖ 26.5
10.រុស្ស៊ី៖ 24.5
ចំនួនពលរដ្ឋ (លាននាក់) ដែលបានចាក់វ៉ាក់សាំងរួចរាល់ (មិនទាន់រួមបញ្ចូលប្រទេសចិន ដោយសារប្រទេសនេះមិនទាន់ប្រកាសពីចំនួនពលរដ្ឋដែលបានចាក់)៖
1.សហរដ្ឋអាមេរិក៖ 124.46
2.ឥណ្ឌា៖ 40.92
3.អង់គ្លេស៖ 20.55
4.ប្រេស៊ីល៖ 17.49
5.ម៉ិកស៊ិក៖ 10.65
6.រុស្ស៊ី៖ 9.93
7.អាល្លឺម៉ង់៖ 9.89
8.ឥណ្ឌូនេស៊ី៖ 9.29
9.បារាំង៖ 9.14
10.អ៊ីតាលី៖ 9.05

ទិន្នន័យខាងលើនេះ ត្រូវបានគិតត្រឹមថ្ងៃទី21 ខែឧសភា ឆ្នាំ2021។

ប្រភព៖ Our World In Data
ដកស្រង់ និងប្រែសម្រួល៖ បុត្រា

May 22, 2021

(វីដេអូ)-ក្មេងជំទង់ យំហែលឆ្លងសមុទ្រចូលទឹកដីអឺរ៉ុបដោយក្ដីអស់សង្ឃឹម ខណៈនៅចំពោះមុខ មានកងទ័ពរង់ចាំចាប់ខ្លួន

ក្មេងប្រុសជំទង់ម្នាក់ ដែលចងដបជ័រជុំវិញខ្លួន យំបណ្ដើរ ហែលឆ្លងសមុទ្របណ្ដើរ ហើយព្យាយាមរត់គេចពីទាហាន សំដៅឆ្លងកាត់ជញ្ជាំង ដើម្បីចូលទៅកាន់ទីក្រុង Ceuta នៃប្រទេស អេស្ប៉ាញ។

ក្មេងជំទង់ដែលមានវ័យប្រហែល 13-14ឆ្នាំរូបនេះ គ្រាន់តែជាមនុស្សម្នាក់ប៉ុណ្ណោះ ក្នុងចំណោមជនចំណាកស្រុក ម៉ារ៉ុក រាប់ពាន់នាក់ ដែលព្យាយាមហែលឆ្លងសមុទ្រ ចូលទៅកាន់ទីក្រុង Ceuta ក្នុងសប្ដាហ៍នេះ។ ជនចំណាកស្រុកប្រហែល 1,500 មកពីប្រទេស ម៉ារ៉ុក ភាគច្រើនជាកូនក្មេង និងក្មេងជំទង់។

រូបភាពក្មេងជំទង់មួយរូបខាងលើនេះ ត្រូវបានគេចែករំលែងពេញបណ្ដាញសង្គម។ បន្ទាប់ពីបានឡើងដល់ច្រាំង ក្មេងនេះក៏ប្រញាប់ស្រាយដបចេញពីខ្លួន រួចរត់សំដៅជញ្ជាំងរបង ដើម្បីចូលទៅទីក្រុង Ceuta មុនពេលត្រូវកម្លាំងសន្តិសុខរបស់ អេស្ប៉ាញ ឃាត់ខ្លួន។

គេមិនបានដឹងថា នឹងមានរឿងអ្វីកើតឡើងចំពោះកុមាររូបនេះ បន្ទាប់ពីត្រូវបានចាប់ឃាត់ខ្លួន។ ការបណ្ដេញចេញក្មេងមិនទាន់គ្រប់អាយុ ត្រូវបានចាត់ទុកថាជាសកម្មភាពខុសច្បាប់ នៅប្រទេស អេស្ប៉ាញ ជាហេតុនាំឱ្យមានកុមារ និងក្មេងជំទង់ជាច្រើនសម្រុកធ្វើចំណាកស្រុកមកកាន់ទឹកដីនេះ។

ចំនួនពលរដ្ឋចំណាកស្រុកចូលមកកាន់ប្រទេស អេស្ប៉ាញ ថ្មីៗនេះ បានកើនឡើងយ៉ាងឆាប់រហ័ស ក្នុងគ្រាដែលភាពតានតឹង រវាង ប្រទេស អេស្ប៉ាញ និង ម៉ារ៉ុក កំពុងកើតឡើង ជុំវិញបញ្ហាមេដឹកនាំ Brahim Ghali របស់ក្រុមផ្ដាច់ខ្លួន Polisario ជាចលនាមួយដែលចង់ឱ្យតំបន់ សាហារ៉ាខាងលិច ក្លាយជាប្រទេសឯករាជ្យពីប្រទេស ម៉ារ៉ុក។

រដ្ឋមន្ត្រីការពារជាតិរបស់ អេស្ប៉ាញ លោកស្រី Margarita Robles កាលពីថ្ងៃទី20 ខែឧសភា បានចោទប្រកាន់អាជ្ញាធរប្រទេស ម៉ារ៉ុក ថា មិនអើពើ ចំពោះពលរដ្ឋ ម៉ារ៉ុក ដែលឆ្លងដែនខុសច្បាប់ចូលទឹកដី អេស្ប៉ាញ។ Margarita Robles ចោទថា ម៉ារ៉ុក បានរុញច្រានជនចំណាកស្រុករាប់ពាន់នាក់ ក្នុងនោះមានទាំងកុមារ និងក្មេងជំទង់ផងដែរ ឱ្យប្រឈមនឹងស្ថានភាពគ្រោះថ្នាក់ដល់ជីវិត នៅពេលបណ្ដោយឱ្យពួកគេហែលឆ្លងសមុទ្រ ចូលតំបន់ Ceuta។

Ceuta គឺជាទីក្រុងស្វយ័តមួយរបស់ប្រទេស អេស្ប៉ាញ ស្ថិតនៅតំបន់ឆ្នេរសមុទ្រអាហ្វ្រិកខាងជើង និងមានព្រំដែនជាប់នឹងប្រទេស ម៉ារ៉ុក ប្រវែង 6.4គីឡូម៉ែត្រ។ ទីក្រុងនេះ ត្រូវខណ្ឌចែកពីទឹកដី ម៉ារ៉ុក ដោយរបងព្រំដែនដែលមានកម្ពស់រហូតដល់ 10ម៉ែត្រ។ ក្រុមពលរដ្ឋចំណាកស្រុក ភាគច្រើនជ្រើសរើសវិធីហែលឆ្លងសមុទ្រ ដើម្បីឆ្លងដែនចូលតំបន់អឺរ៉ុប៕

ប្រភព៖ Independent
ប្រែសម្រួល៖ បុត្រា

May 22, 2021

(វីដេអូ)-ចិនប្រើប្រាស់គ្រឿងចក្រពិសេស បាញ់អាចម៍ដីឡើងលើភ្នំត្រងោល ដើម្បីកែលម្អបរិស្ថាន

ថ្មីៗនេះ បណ្ដាលទូរទស្សន៍អន្តរជាតិចិន CGTN (China Global Television Network) បានចេញផ្សាយវីដេអូមួយ បង្ហាញពីសកម្មភាពកម្មករ ប្រើប្រាស់ម៉ាស៊ីនពិសេស បាញ់អាចម៍ដី ឡើងទៅលើភ្នំត្រងោល ដើម្បីបង្កលក្ខណៈងាយស្រួលដល់ការដុះដាលរបស់រុក្ខជាតិ។

នៅជាយក្រុង Taiyuan នៃខេត្ត Shanxi របស់ប្រទេសចិន ក្រុមកម្មករក្នុងតំបន់ កំពុងនាំគ្នាប្រើប្រាស់គ្រឿងចក្រពិសេស បាញ់អាចម៍ដីដែលមានជីជាតិ ឡើងទៅលើភ្នំត្រងោល។ ក្រៅពីមានផ្ទុកជីសរីរាង្គ និង cellulose ដែលជួយឱ្យរុក្ខជាតិរីកលូតលាត់បានល្អជាងធម្មតាអាចម៍ ដីនេះក៏មានផ្ទុកគ្រាប់ពូជនៃរុក្ខជាតិផងដែរ។ គ្រាប់ពូជនេះ នឹងដុះឡើងយ៉ាងឆាប់ ហើយគ្របដណ្ដប់ពណ៌បៃតង នៅលើភ្នំនេះ។

សកម្មភាពខាងលើនេះ ត្រូវបានធ្វើឡើងនៅឯភ្នំ Muyun ដែលមានអណ្ដូងរ៉ែថ្មកំបោររាប់សិបកន្លែង ដែលបន្សល់ទុកកាលពីជាងមួយទសវត្សរ៍មុន។ តំបន់នេះ ធ្លាប់ជាទីដ៏ហួតហែងនាពេលកន្លង។

ឆ្នាំ2017 អាជ្ញាធរក្នុងតំបន់ បានបិទទ្វារអណ្ដូងរ៉ែចំនួន 14កន្លែង និងចាប់ផ្ដើមស្ដារបរិស្ថាននៅទីនេះឡើងវិញ។ ក្នុងដំណាក់កាលនៃការដាំព្រៃ រណ្ដៅរ៉ែ ជាច្រើនក៏ត្រូវបានចាក់ដីបំពេញ។ បច្ចុប្បន្ន ផ្ទៃដីភាគច្រើននៃតំបន់នេះ កំពុងគ្របដណ្ដប់ដោយរុក្ខជាតិពណ៌បៃតងយ៉ាងត្រជាក់ភ្នែក ហើយកម្មករអណ្ដូងរ៉ែ ក៏បាន និងកំពុងងាកទៅដាំដើមឈើ ដើម្បីរកប្រាក់ចិញ្ចឹមជីវិត។ ការងារថ្មីនេះ នាំមកនូវប្រាក់ចំណូលច្រើនដល់ក្រុមកម្មករ និងជួយឱ្យបរិស្ថានបានល្អប្រសើរជាងមុន៕

ប្រភព៖ CGTN
ប្រែស្រួល៖ បុត្រា

May 21, 2021

អ្នកវិជ្ជមាននឹង COVID-19 នៅកម្ពុជា កើនដល់ជាង 24,000នាក់ ខណៈពិភពលោក កើនដល់ជាង 165លាននាក់

គិតមកដល់ថ្ងៃទី21 ខែឧសភា ឆ្នាំ2021 នេះ កម្ពុជា បានរកឃើញអ្នកឆ្លងវីរុសCovid-19 សរុបចំនួន 24,157នាក់ ដែលនេះគឺជាតួលេខពីក្រសួងសុខាភិបាល។

នាព្រឹកនេះ ក្រសួងបានប្រកាស បានរកឃើញអ្នកជំងឺCovid-19 ថ្មី ចំនួន 460នាក់, ករណីស្លាប់ថ្មីចំនួន 1នាក់ និងអ្នកជំងឺCovid-19 ចំនួន 826នាក់ បានជាសះស្បើយ នៅក្នុងអំឡុង 24ម៉ោង នៃថ្ងៃទី20 ខែឧសភា។

នៅទូទាំងពិភពលោក បច្ចុប្បន្ន អ្នកវិជ្ជមាននឹង Covid-19 បានកើនឡើងដល់ 165,857,655នាក់ ក្នុងនោះមានអ្នកស្លាប់ 3,444,901នាក់, ជាសះស្បើយចំនួន 146,539,738នាក់ និងកំពុងព្យាបាលចំនួន 15,873,016នាក់៕
ប្រភព៖ ក្រសួងសុខាភិបាល, worldometers
ដកស្រង់៖ បុត្រា

May 21, 2021

អាមេរិក សន្យាថា កសាង ហ្គាហ្សា ឡើងវិញ និងបន្ថែមរ៉ុក្កែតឱ្យប្រព័ន្ធ Iron Dome របស់អ៊ីស្រាអែល តែមិន «លេងចូល» ក្រុម ហាម៉ាស

ប្រធានាធិបតីសហរដ្ឋអាមេរិក បានសន្យាថា នឹងជួយកសាងតំបន់ ហ្គាហ្សា របស់ ប៉ាលេស្ទីន និងស្ដារប្រព័ន្ធការពារមីស៊ីល Iron Dome របស់កងទ័ព អ៊ីស្រាអែល ឡើងវិញ បន្ទាប់ពី អ៊ីស្រាអែល និង ប៉ាលេស្ទីន សម្រេចបានកិច្ចព្រមព្រៀងឈប់បាញ់នៅ ហ្គាហ្សា។

នៅក្នុងប្រកាសមួយ ពីសេតវិមាន កាលពីថ្ងៃទី20 ខែឧសភា ប្រធានាធិបតី សហរដ្ឋអាមេរិក លោក Joe Biden បានថ្កោលទោសកងជីវពល ហាម៉ាស និងបានឱ្យដឹងថា លោកបានពិភាក្សាតាមទូរស័ព្ទចំនួន 6លើក ជាមួយនឹងនាយករដ្ឋមន្ត្រី អ៊ីស្រាអែល លោក Benjamin Netanyahu ក្នុងអំឡុង 11ថ្ងៃ ដែល អ៊ីស្រាអែល និងក្រុម ហាម៉ាស ប្រយុទ្ធគ្នា។

«យើងនៅតែសន្យាថា ធ្វើការជាមួយអង្គការសហប្រជាជាតិ និងភាគីអន្តរជាតិផ្សេងទៀតដែលពាក់ព័ន្ធ ដើម្បីផ្ដល់ជំនួយមនុស្សធម៌ឆាប់រហ័ស និងសហការផ្ដល់ជំនួយជាអន្តរជាតិ ដល់ប្រជាជននៅតំបន់ ហ្គាហ្សា ក៏ដូចជាការកសាងតំបន់នេះឡើងវិញ» លោក Biden ថ្លែងដូច្នេះ។

ក៏ប៉ុន្តែ ប្រធានាធិបតី សហរដ្ឋអាមេរិក សង្កត់ធ្ងន់ថា៖ «យើងនឹងធ្វើដូច្នេះ នៅក្នុងកិច្ចសហការគ្រប់ជ្រុងជ្រោយជាមួយអាជ្ញាធរ ប៉ាលេស្ទីន តែប៉ុណ្ណោះ ពោកគឺមិនមែនជាមួយក្រុម ហាម៉ាស នោះឡើយ ហើយមិនអនុញ្ញាតឱ្យក្រុម ហាម៉ាស បំពាក់អាវុធរបស់ខ្លួនឡើងវិញ»។

ហាម៉ាស ដែលជាអង្គការអ៊ីស្លាមជ្រុលនិយមមួយ មានទំនាក់ទំនងជាមួយនឹងអង្គការបងប្អូនមូស្លីម របស់អេហ្ស៊ីប (Egypt’s Muslim Brotherhood) បានគ្រប់គ្រងតំបន់ ហ្គាហ្សា ចាប់តាំងពីឆ្នាំ2017 ខណៈដែលអាជ្ញាធរ ប៉ាលេស្ទីន របស់ប្រធានាធិបតី Mahmoud Abbas គ្រប់គ្រងបានតែតំបន់ វេសប៊ែង (West Bank) ប៉ុណ្ណោះ។

ផែនទីបង្ហាញពីការបាត់បង់ទឹកដីរបស់ ប៉ាលេស្ទីន (រូបភាព៖ palestinecampaign)

លោក Biden ក៏បានសង្កត់ធ្ងន់ដែរថា សហរដ្ឋអាមេរិក នឹងជួយបំពាក់អាវុធឡើងវិញ ដល់ប្រព័ន្ធការពារដែនអាកាស Iron Dome របស់ប្រទេសអ៊ីស្រាអែល ដែលបានស្ទាក់ចាត់ និងកម្ទេចរ៉ុក្កែតស្ទើរតែទាំងអស់ ដែលបាញ់ចេញពី ហ្គាហ្សា។

កិច្ចព្រមព្រៀងឈប់បាញ់មួយ បានមានសុពលភាពនៅតំបន់ ហ្គាហ្សា ចាប់ពីវេលាទៀបភ្លឺ នៃថ្ងៃទី21 ខែឧសភា បានបញ្ចប់ការប្រយុទ្ធគ្នាអស់រយៈពេល 11ថ្ងៃរវាង អ៊ីស្រាអែល និង ហាម៉ាស បន្ទាប់ពីប្រទេសអេហ្ស៊ីប ធ្វើជាអាជ្ញាកណ្ដាល។

ផែនទីបច្ចុប្បន្នរបស់ ប៉ាលេស្ទីន (រូបភាព៖ BBC)

យ៉ាងនេះក្ដី លោក Biden នៅតែបន្តអះអាងថា៖ «សហរដ្ឋអាមេរិក គាំទ្រទាំងស្រុងចំពោះសិទ្ធិការពារខ្លួនរបស់ អ៊ីស្រាអែល នៅចំពោះមុខការវាយប្រហារដោយរ៉ុក្កែតផ្ដេសផ្ដាស ពីសំណាក់ក្រុម ហាម៉ាស និងក្រុមភរវកម្មដទៃទៀត ដែលបានឆក់យកជីវិតពលរដ្ឋគ្មានកំហុសនៅ អ៊ីស្រាអែល»។

ចាប់តាំងពីផ្ទុះការវាយប្រហារគ្នារ វាងកងជីវពល ហាម៉ាស និងកងទ័ព អ៊ីស្រាអែល កាលពីថ្ងៃទី10 ខែឧសភា ក្រុមមន្ត្រីសុខាភិបាលនៅតំបន់ ហ្គាហ្សា បានឱ្យដឹងថា ពលរដ្ឋ ប៉ាលេស្ទីន 232នាក់ ក្នុងនោះមានទាំងកុមារចំនួន 65នាក់ និងស្ត្រីចំនួន 39នាក់ បានបាត់បង់ជីវិត និងជាង 1,900នាក់ បានរងរបួស នៅក្នុងការវាយប្រហារដោយយន្តហោះចម្បាំងរបស់ អ៊ីស្រាអែល។ ចំណែកភាគី អ៊ីស្រាអែល វិញ មានពលរដ្ឋប្រមាណតែ 10នាក់ប៉ុណ្ណោះ បានស្លាប់ក្រោមគ្រាប់រ៉ុក្កែត របស់ ហាម៉ាស។

នៅពេលកិច្ចព្រមព្រៀងឈប់បាញ់ រវាង អ៊ីស្រាអែល និងកងជីវពលរបស់ចលនាប៉ាលេស្ទីន ត្រូវបានបង្កើតឡើង នៅតំបន់ ហ្គាហ្សា គេឃើញមានប្រជាជន ប៉ាលេស្ទីន ជាច្រើន នាំគ្នាចេញមកអបអរសាទរ៕

ប្រភព៖ Al Jazeera, NYPost
ប្រែសម្រួល៖ បុត្រា

May 21, 2021

អ៊ីស្រាអែល និង ហាម៉ាស សម្រេចបានកិច្ចព្រមព្រៀងឈប់បាញ់! សហរដ្ឋអាមេរិក និងអង់គ្លេស សំដែងការសាទរ

ប្រធានាធិបតីសហរដ្ឋអាមេរិក និងរដ្ឋមន្ត្រីការបរទេសអង់គ្លេង បានសំដែងការអបអរសាទរចំពោះកិច្ចព្រមព្រៀងឈប់បាញ់ដែលសម្រេចបានរវាង អ៊ីស្រាអែល និងកងជីវពលហាម៉ាស នៃចលនាប៉ាលេស្ទីន។

ប្រធានាធិបតី Joe Biden កាលពីថ្ងៃទី20 ខែឧសភា ឆ្នាំ2021 បានអបអរសាទរចំពោះកិច្ចព្រមព្រៀងឈប់បាញ់ដែលសម្រេចបានរវាង អ៊ីស្រាអែល និងកងជីវពលហាម៉ាស របស់ប៉ាលេស្ទីន និងបានឱ្យដឹងថា សហរដ្ឋអាមេរិក នឹងគាំទ្រដល់តំបន់ ហ្គាហ្សា ដោយកញ្ចប់ជំនួយមនុស្សធម៌។

ពីសេតវិមាន ប្រធានាធិបតី Joe Biden បាននិយាយថា៖ «ខ្ញុំជឿថា យើងមានឱកាសពិតប្រាកដ ដើម្បីធ្វើឱ្យមានការរីកចម្រើន ហើយខ្ញុំសន្យាថា នឹងប្រឹងប្រែងសម្រេចឱ្យបានកិច្ចការនោះ»។ លោក Biden ក៏បានវាយតម្លៃខ្ពស់ចំពោះតួនាទីជាអាជ្ញាកណ្ដាលរបស់ប្រទេស អេហ្ស៊ីប នៅក្នុងការរៀបចំកិច្ចព្រមព្រៀងឈប់បាញ់នេះ។

ចំណែករដ្ឋមន្ត្រីការបរទេសអង់គ្លេង លោក Dominic Raab ក៏សំដែងការសាទរចំពោះកិច្ចព្រមព្រៀងខាងលើ។ ទន្ទឹមនឹងនេះ លោកក៏បានអំពាវនាវឱ្យគ្រប់ភាគី សហការគ្នាដើម្បីរក្សាបទឈប់បាញ់ឱ្យបានយូរអង្វែង និងបញ្ចប់អំពើហិង្សានៅក្នុងតំបន់។ លោក Dominic Raab បានសរសេរនៅលើទំព័រ Twitter ថា៖ «គ្រប់ភាគី ត្រូវការកិច្ចសហការគ្នា ដើម្បីរក្សាបទឈប់បាញ់ឱ្យបានយូរអង្វែង និងបញ្ចប់បញ្ហាវិលវល់នៃអំពើហិង្សាដែលមិនអាចទទួលយកបាន ក៏ដូចជាការបាត់បង់ជីវិតប្រជាពលរដ្ឋ»។

ការប្រយុទ្ធគ្នា បណ្ដាលឱ្យភាគី អ៊ីស្រាអែល និង ប៉ាលេស្ទីន រងការខូចខាតយ៉ាងធ្ងន់ធ្ងន់

សូមបញ្ជាក់ថា កាលពីថ្ងៃទី20 ខែឧសភា ឆ្នាំ2021 ប្រទេស អ៊ីស្រាអែល និងចលនា ហាម៉ាស របស់ ប៉ាលេស្ទីន បានប្រកាសថា សម្រេចបានកិច្ចព្រមព្រៀងឈប់បាញ់មួយដែលមានសុពលភាពចាប់ពីវេលាម៉ោង 2 នៃថ្ងៃទី21 ខែឧសភា ឆ្នាំ2021 (ម៉ោងក្នុងស្រុងក)។ កិច្ចព្រមព្រៀងនេះ ត្រូវបានលើកឡើងក្នុងគ្រាដែលទ័ពអាកាសរបស់ អ៊ីស្រាអែល បន្តវាយប្រហារពេញមួយយប់ នៃថ្ងៃទី20 ខែឧសភា។

ក្នុងសប្ដាហ៍កន្លងទៅ កងទ័ពអ៊ីស្រាអែល បានវាយប្រហារតាមផ្លូវអាកាស តម្រង់គោលដៅនានារបស់ ហាម៉ាស នៅតំបន់ ហ្គាហ្សា ខណៈដែលកងជីវពល ហាម៉ាស ក៏បានបាញ់រ៉ុក្កែត ជាង 3,000គ្រាប់ សំដៅគោលដៅនានារបស់ អ៊ីស្រាអែល ផងដែរ។

ទិន្នន័យរបស់ការិយាល័យសម្របសម្រួលកិច្ចការមនុស្សធម៌របស់អង្គការសហប្រជាជាតិ បានឱ្យដឹងថា ជនជាតិប៉ាលេស្ទីន យ៉ាងតិច 219នាក់ ក្នុងនោះមានកុមារ 63នាក់ផងដែរ បានបាត់បង់ជីវិត នៅក្នុងការប្រយុទ្ធគ្នា រវាង អ៊ីស្រាអែល និង ហាម៉ាស។ ប្រភពព័ត៌មានពី អ៊ីស្រាអែល ឱ្យដឹងថា ជនជាតិអ៊ីស្រាអែល 12នាក់ បានស្លាប់ ក្នុងនោះមានកុមារ 2នាក់ និងទាហាន 1នាក់។ ក្រៅពីនេះ ជម្លោះរវាងភាគីទាំងពីរនេះ ក៏បានធ្វើឱ្យមនុស្សរាប់ពាន់នាក់ រងរបួសផងដែរ ដែលភាគច្រើន កើតមាននៅក្នុងតំបន់ ហ្គាហ្សា និងតំបន់ វេសប៊ែង (West Bank)៕

ប្រភព៖ Reuters, Aljazeera
ប្រែសម្រួល៖ បុត្រា

May 21, 2021

Category: អន្តរជាតិ